رواية شريك حياتي الفصل الثالث 3 بقلم عمرو راشد

رواية شريك حياتي البارت الثالث

رواية شريك حياتي الجزء الثالث

رواية شريك حياتي الحلقة الثالثة

بالمناسبة السعيدة انا جاي اطلب ايد أستاذة رقية
= انت عبيط يابني ولا ايه،، اولا رقية مخطوبة وثانيا انت ازاي تدخل علينا كدا
” ساعتها بصيتلها وقولتلها
أنتي مخطوبة؟
” عينها كانت عليا وجواها كلام كتير ولكن في الاخر هي مردتش عليا ولكن وليد قام من مكانه و شدني من الچاكيت بتاعي
انت عايز مننا ايه؟،، تحب اطلبلك البوليس دلوقتي؟
= البوليس لو هييجي دلوقتي هياخدك انت يا وليد عشان الناس اللي انت بعتها يضر*بوني
ناس مين؟ ايه الكلام الاهبل دا؟
= ليه هما مش الاتنين اللي واقفين برا بيحرسو الفيلا بتاعتك يعني تعرفهم واكيد هما مش هيعملو حاجة زي دي غير بإشارة منك
طب انا لاخر مرة هقولك امشي و ملكش دعوة بينا
= انا مش هخرج من هنا غير لما توافق على طلبي
انت غبي!!،، قولتلك رقية مخطوبة
= مفيش دبلة في ايدها
ملكش دعوة،، خليك في حالك،، احنا ناس مبنحبش نلبس دبل
= انا مش مجنون عشان اصدق الكلام دا
= كلمة واحدة كمان وهطلب البوليس فعلا وييجو يشيلوك من هنا
” ساعتها رقية قامت من مكانها وقالتلي بصوت هادي
امشي يا فارس،، عشان خاطري امشي
” كنت ببصلها مرة وببص على وليد مرة وفي النهاية انا قررت امشي لان حاسس ان في حاجة غريبة بتحصل ووجودي هنا مش هيحل حاجة،، خرجت من الفيلا و رجعت البيت،، امي قابلتني ساعتها و اول ما شافتني صرخت وقالت
ياالهوي ايه اللي عمل فيك كدا؟
” اتحركت من عند باب الشقة و روحت قعدت على الكنبة
مفيش يا ماما خناقة بسيطة مع واحد معايا في الشغل
= خناقة ايه يا فارس؟،، من امتا وانت بتتخانق يا ابني؟
يا ماما عادي فيها ايه يعني
= فيها انك راجع متبهدل بالشكل دا
انا هدخل انام
= انت ماشي في سكة غلط يا فارس
سكة ايه مش فاهم؟
= انا معرفش،، بس قولت انبهك عشان شكلك مكمل ومش واخد بالك انت رايح على فين
مانا طول عمري ماشي صح كنت استفدت ايه؟
= انا ابني فارس عمره ما يرد رد زي دا،، وانا كدا اتأكدت فعلا ان في حاجة غلط
” قومت مشيت من قدامها ودخلت اوضتي،، أنا فعلا مش مستحمل اي كلام دلوقتي،، كل تركيزي في البنت دي،، الموضوع بيتعقد زيادة،، وسط تفكيري في حل لمحت على الكوميدينو جنبي الكارت بتاع وليد،، خدته وأنا مقرر اروحله بكرا الشركة بتاعته،، أنا لازم افهم في ايه،، وفعلا مجرد ما الصبح طلع لبست ونزلت و روحت الشركة وطلبت اقابله وطبعا مقولتش على اسمي الحقيقي للسكرتيرة عشان لو كنت قولت مكنتش هدخل،، دخلت و هو كان قاعد على مكتبه وباصص في الورق اللي قدامه،، ساعتها اتكلم وقال
خير،، اقدر اساعدك ازاي؟
= انا عايز اتجوز رقية
” ساعتها رفع عينه و بص ليا بتعجب،، وعلى عكس المتوقع لقيته هادي جدا وقالي
اتفضل اقعد يا فارس
” قربت من المكتب وقعدت فعلا على الكرسي اللي قدامه،، بعدها قالي
تشرب حاجة؟
= شكرا مش عايز
تمام ندخل في الموضوع علطول،، هو سؤال واحد و ارجوك تجاوبني بصراحة،، انت عايز ايه من رقية؟
= قولتلك أنا عايز اتجوزها
هو انت تعرفها يا فارس اصلا؟،، انت تعرف ايه هنا؟
= ماهي قالتلك احنا صحاب
طب احنا عايزين نتكلم بصراحة للاخر،، اولا لو انتو صحاب يا فارس كنت عرفت انها ليها اخت توأم ومكنتش هتتلخبط بينها وبين اختها
= ماشي انت صح،، أنا فعلا معرفش رقية بس انا شوفتها قبل كدا كتير
فين؟،، في الشارع؟
= في الحلم
ازاي يعني؟
= انا حلمت ب رقية اكتر من مرة و هو دا السبب اللي مخليني عايز اقرب منها
وهو اي حد نشوفه في الحلم نقرب منه؟ يعني انا لو شوفت واحد م*يت في الحلم اروح اقت*ل نفسي عشان ابقا قريب منه،، قول كلام ينفع اصدقه يا فارس
= والله انا ما بكدب،، أنا فعلا شوفتها في الحلم وكان باين ان عندها مشكلة وفي حاجة بتمنعني عنها
مشكلة!!
= ممكن انا معرفش
طب بص يا فارس انت شكلك طيب و ابن ناس لولا كدا انا كان زماني مبلغ عنك دلوقتي،، وعشان كدا هنصحك واقولك ان موضوع جوازك من رقية دا صعب
= صعب ليه
رقية مريضة يا فارس،، عندها مرض نفسي خطير،، رقية عدوا*نية جدا مبتسمعش كلام حد ولا بيهمها اي شخص،، بتعمل مشاكل كتير جدا،، وانا من ضمن الناس اللي اتأذ*يت بسببها لانها عملتلي أكتر من مشكلة في شغلي،، الدكاترة بيقولو ان دي حالة اضطراب ما بعد الصدمة لان أبوها اللي يرحمه توفى،، ومن ساعتها انا واختها بنحاول نبعدها عن الناس بقدر الإمكان عشان متعملش اي مشكلة تانية
= بس أنا لما شوفتها كانت طبيعية جدا ومفيش أي حاجة باينة عليها بالعكس دي كانت هادية جدا
ماهو دا طبع رقية تكون هادية معاك في الأول وبعد كدا تبدأ المصيب*ة،، الكلام دا انا مكنش ينفع اقوله بس انا كان لازم احذرك خصوصا انك مصمم على كلامك
” كانت صدمة كبيرة بالنسبالي مكنتش قادر استوعبها،، حاسس بتشويش في دماغي،، صوت وليد نفسه مكنتش قادر اسمعه،، بعد مرور ثواني صوته رجع يقرب تاني وسمعته بيقول
لو لسة عايز تشتغل معايا انا ممعنديش مانع بس فكرة الجواز دي تنساها خالص
= شكرا
#بقلم : #عمرو راشد
” قومت مشيت وخرجت من الشركة،، مكنتش عارف اروح فين،، فضلت ماشي في الشوارع مكنتش مصدق اي كلمة من اللي سمعتها،، في حاجة غلط اكيد انا مش غبي عشان ملاحظش عليها اي حاجة من اللي قالها وليد،، الساعة كانت 1 الضهر ولقيت رسالة من رقم غريب،، كان مكتوب فيها
” مستنياك في الكافيه الساعة 3 متتأخرش ”
” مكنتش محتاج اعرف مين اللي بعت الرسالة،، ساعتها علطول ركبت تاكسي و روحت على مكان الكافيه،، وصلت في معادي بالظبط ودخلت لقيتها قاعدة على نفس الترابيزة،، رغم اني كنت مضايق ساعتها بس معرفتش اكتم ابتسامتي لما شوفتها،، مجرد بس ما اشوفها بحس ان الحياه جميلة أوي،، بحس اني لازم أعيشها مليون مرة وفي كل مرة هختارها برضو،، قعدت قدامها وكانت عاقدة حواجبها
في حاجة ولا ايه؟
= ممكن تقولي ايه اللي انت عملته امبارح دا؟
” كانت مضايقة وساعتها حسيت ان كلام وليد ممكن يكون صح وقولت في سري
الحالة باين عليها اشتغلت
= انت بتقول ايه؟
مبقولش حاجة،، قوليلي انا عملت ايه؟
= انت ازاي تيجي تتقدملي وانت متعرفنيش أصلا ولا أنا اعرفك؟
ماهي الخطوبة اتعملت عشان نتعرف على بعض،، مش كدا ولا ايه؟
= لا مش كدا لان انا قولتلك ان الموضوع مينفعش،، وانت برضو جيت ورايا وعملتلي مشكلة في البيت
انا بجد اسف انا مكنتش اقصد اعملك مشاكل بس..
= بس إيه؟،، قول اللي عندك؟
بصراحة انا كنت لسة مع وليد جوز اختك وقالي على اللي حصل ليكي
” حسيت ان عنيها بدأت تدمع وقالتلي
قالك هيرجعني المستشفى صح،، عشان خاطري يا فارس قوله ميرجعنيش انا مش عايزة اروح هناك
= مستشفى ايه بس فهميني؟
” مسحت دموعها وقالتلي
انا دخلت المستشفى فترة عشان أعصابي تهدى،، هما كانو بيقولولي اني بعمل مشاكل وبتخانق مع الناس بس أنا مش فاكرة اي حاجة من دي،، أنا في حاجة غريبة كانت بتحصلي،، زي ما يكون مكنتش في وعيي وأنا بعمل كدا
= هو مين اللي قال انك تدخلي المستشفى
وليد،، هو عمل كدا عشاني وعشان شركة بابا لانه كان خايف المشاكل دي تأثر على الشركة
= ايه شركة بابا دي؟ هو ابوكي عنده شركة؟
ايوا الشركة اللي وليد بيشتغل فيها دي بتاعت بابا
= انا كدا فهمت
فهمت ايه
= رقية أنتي عندك مانع اننا نتجوز؟
تاني،، تاني يا فارس
= المرادي مفيهاش هزار،، انا بتكلم بجد،، وليد هو الرياح الشديدة اللي بتمنعني عنك في الحلم،، هو اللي قال انك تدخلي المستشفى عشان هو يعرف ياخد الشركة ويستولى عليها
وهو يعمل كدا ليه؟
= اكيد طمع
لو طمع مكنتش خرجت من المستشفى يا فارس
= ماهي دي اللي أنا مش فاهمها بقا،، في حاجة ناقصة عشان الصورة تبقا واضحة،، لو هو هيستولى على الشركة سمح انك تخرجي من المستشفى ليه؟
انا مش مصدقة كلامك ومش مقتنعة،، وليد دا يبقا جوز اختي و هو اللي محافظ علينا بعد وفاه بابا،، مستحيل هو يفكر بالطريقة دي
= انتي طيبة بزيادة يا رقية ومش فاهمة حاجة
فارس ارجوك انا مش عايزة مشاكل وكفاية لحد كدا،، ياريت تبعد عني بقا وتسيبني في حالي
” قامت وسابتني من غير حتى ما ارد عليها،، بس انا تفكيري صح لكن رقية طيبة ومش هتفهم كلامي،، مش هينفع اسيبها،، أنا متأكد ان وليد دا وراه حاجة كبيرة اوي وعشان كدا لازم اكمل،، لازم اكون معاها،، الليل كان خلاص جه وانا ساعتها ركبت تاكسي،، و روحت وقفت قدام الفيلا بتاعتها لاحظت ان عربيته مش موجودة،، فضلت واقف مستني لحد ما وليد يرجع وفعلا بعد أقل من ساعة لقيته رجع،، دخلت وراه واول ما نزل من عربيته كنت انا واقف في وشه
في ايه يا فارس؟،، ايه اللي جابك تاني؟
= انا فكرت كويس في كلامك و لقيت ان عندي حق وعشان كدا انا بجدد طلبي وعايز اتجوز رقية
انت مش هترتاح غير لما تتسجن صح؟
= اتسجن ليه هو انا عملت ايه؟،، أنا جايلك اهو من الباب وبقولك عايز اتجوز رقية
وانت معاك ايه عشان تتجوز رقية؟
= شوف طلباتك ايه وانا موافق
” ساعتها مشي من قدامي ودخل الفيلا وانا دخلت وراه لقيته فتح باب كبير كان جواه المكتب بتاعه،، قعد على الكرسي وقالي
طالما مصمم يبقا تدفع بقا،، رقية مهرها غالي أوي معتقدش انك تقدر عليه
= اي حاجة هتقولها انا موافق عليها
منين يا فارس؟،، اللي انا اعرفه عنك انك على قد حالك يعني
= والله انا شايف اننا نسأل رقية احسن وهي اللي تقرر،، انت مش وكيلها عشان تتكلم معايا
انا هنا راجل البيت دا،، دي الأصول برضو ولا ايه؟
= اصول،، بس هي برضو لازم تبقا موجودة في القعدة دي
الكلام هيكون معايا انا ولو مش عاجبك تقدر تمشي بكل سهولة
= تمام،، طلباتك ايه؟
سيبني افكر وهرد، رقية دي اصلها غالية اوي عندي ولازم اكون ضامن مستقبلها
” نزلت من على السلم وشوفت فارس خارج من أوضة مكتب وليد،، بعدها وليد خرج وشافني ولكن متكلمش،، ساعتها انا جريت على فوق و دخلت اوضتي،، يا ترى فارس كان جاي يعمل ايه تاني؟،، أنا مش مطمنة،، استنيت ساعة بالظبط وخرجت من اوضتي بهدوء ووقفت قدام اوضة اختي وسمعت نورا اختي وهي بتقوله
انت بجد موافق على جواز رقية من الواد دا؟
= انتي عبيطة ولا ايه يا نورا؟،، الواد دا انا مش مطمنله،، وشكله بيتكلم كتير وممكن يقلب علينا الدنيا
وهتعمل معاه ايه؟
= الواد دا لازم يختفي!!