رواية سلف ودين الفصل السادس والخمسون 56 بقلم لولو محمد
رواية سلف ودين الجزء السادس والخمسون
رواية سلف ودين البارت السادس والخمسون
رواية سلف ودين الحلقة السادسة والخمسون
نور نايمه فى السرير و واخده نغم فى حضنها
نغم / هو الدكتوره كتبتلك حقن تانى
نور / مش هاخد حقن تانى ما تخافيش
نغم / امال زعلانه ليه
نور / عملتى واجبك
نغم / انا ما اخدتش درس النهرده و الواجب مخلصاه امبارح انتى نسيتى
نور / كلتى
نغم / تيته منال عملتلنا جلاش و ساندوسه
نور تبتسم
نغم / حطت بسله مع اللحمه و فلفل احمر مع الجبنه و الزاتون انا مش بس الزاتون بتاعها كان وحش
نور / تحبى اعملك حاجه تاكليها
على يدخل شايل صينيه عليها حاواوشي
على / الحواوشي السخن اللى بيشر سمنه
يس يدخل يقعد على السرير جنب نور
نور / نغم اكلت ساندوسه
يس / يووووه انتى مش هتتعلميها بقي
نور / و انا صغيره كنت بقول عليها القطايف المثلثه
على يقعد و الصينيه على رجله
على / دى بعيده اوى
نور / ماما كانت بتعملها فى رمضان بس مع القطايف تقلى السمبوسه و بعدين تقلى القطايف فى نفس الزيت فكنت فكراهم واحد
على / قومى كلى لقمه و هو سخن دا انا عاملهولك بايدي
نور / مش جعانه
على / قومى خلينا نفتح نفس بعض
تليفون نور يرن ندى
نور / هتلاقيها بتطمن
على / ردى عليها
نور / هتزعل عشاني
على / انا مش شايف سبب للزعل اصلا ردى عليها قوليلها هنكمل فى العلاج شهر و لا اتنين كمان و نجرب تانى
نور / هى سهله اوى كدا
على / هنمشي الطريق لاخره لحد ما ربنا يكرمنا لو تحبى نشوف دكتور تانى نشوف
نور / انا مش عاوزه حاجه خالص
على / طب مره كمان بس
نور/ اتعشم تانى
على / خلى املك فى ربنا كبير هيفاجئك
نور / و نعم بالله
على / ردى عليها زمانها قلقانه
نور تبص فى الموبايل و تبص لعلى بياكل
على / سخن و مدهنن دوقوا كدا يا عيال
على ياكل العيال نور تاخد التليفون و تطلع بره
………………..
فى شقه ندى
ندى / و هتياسي بالسرعه دى
نور / مفيش فايده يا ندى مفيش فايده
ندى / طول ما فى سكك تمشي فيها اسعى ما تكسليش
نور / كلها مسدوده يا ندى
ندى / مش هتعرفى الا لما تجربى ما يمكن ربنا شايلك حاجه مستخبيه
نور / ربنا يبارك فى نغم و يس بقي خلاص
ندى / مره كمان طيب
نور / هى فلوس حرام يا ندى
ندى / لا حلال بس مش هيحصل حاجه لو جربتوا مره كمان يمكن ربنا يكرم
نور / انا تعبت
ندى / تعبتى من ايه ما تنشفي كدا ان كان على الحقن و الادويه فتهون الحمد لله انها مش كيماوى ولا حاجه وحشه
نور / الحمد لله
ندى / خلى املك فى ربنا كبير ما لناش غيره اسعى و جربى تانى
نور / مش هقدر
ندى / مفيش حاجه بتنجح من اول مره شوفى انا عشان اعمل صينيه كيكه عدله رميت كميه دقيق و بيض تفتح مخبز
نور تبتسم
ندى / شوفى كيكتى دلوقت حد كان يصدق ان انا اعمل كيكه و لا اقيد البوتجاز اصلا
نور / كلنا عارفين انك سهنه و مدكنه
ندى / جربى تانى يا نور انتى صغيره لسه حاولى ما تياسيش والله مستاهله
نور / حماتى جت
ندى / انشفي كدا ما تشمتيهاش فيكي
نور / هكلمك بعدين
ندى / ماشي يا قلبي سلام
ندى تقفل و تقوم تبص على حبيبه بتلعب
ندى / الحمد لله اللذى عافانا مما ابتلى بيه غيرنا
ندى تبوس راس حبيبه و تسيبها و تروح المطبخ
……………..
فى شقه على
ليلى تحضن نور
ليلى / لا انا كدا هغير رايي فيكي دا انا كنت بقول قويه و هتسند الواد لو حصلت فى الامور امور تقومى تعيطي كدا من اول مطب فى حياتكوا
على / المشكله ان اقسم بالله ما كنا معشمين نفسنا و عارفين ان الامل ضعيف
نور / انا عشمت نفسي مع كل ابره اتغرزت فى جسمى كنت بقول بكره
ليلى / المناحه دى كلها على شويه حقن امال انتى فاكره العيال بتيجي بالساهل لا انشفي كدا و بعدين الحمد لله معاكى راجل بيحبك حتى من غير عيال بدل ما تحطيله احمر و اخضر قلباها عياط و نكد كدا
على /و بعدين احنا مش هنفقد الامل هنكمل العلاج و نجرب مره و اتنين و تلاته
نور / منين
على / و انتى مالك و انتى راجل البيت و لا انا
ليلى/ اما صحيح هو اكل و لا بحلقه و بعدين الحمد لله المحل بيجيب كويس و انا محوشه مبلغ صغير بس اهو يسد
على / و بعدين ربنا اللى بيرزق انت شايله هم الفلوس ليه بقي
نور / ايوه بس انت دفعت فلوس كتير اشتراك نادى و دروس و مصاريف البيت و العيال و العلاج و العمليه
على /دا دورى على فكره و كتر خيرك انك عامله عليا بس انا بقولك اهو ما لكيش فيه لما ابقي اتزنق هبقي اتصرف
نور تبصلهم و تسكت
ليلى / انا قولت هاجى الاقيها بتستقبلنى بضيافه حلوه انما نقول ايه
نور / طب والله ابدا حالا هقوم اعملك حاجه حلوه
ليلى / انا عاوزه ام على
نور / طب تصدقى عندى جوه
ليلى / ما انا عارفه نغم قالتلى انها كالتنى امبارح
على يضحك و نور تقوم تدخل المطبخ
على / شكرا
ليلى / العفو بس على ايه
على / انك ما عيرتيهاش و خففتى عنها
ليلى / و انت شايفني وحشه اوى للدرجادى
على يبتسم و يقوم يقعد جنب مامته و يبوس راسها نور تدخل و شايله برام ام على تحطه قدام ليلى
نور / بارده معلش
ليلى / هى ما تتاكلش الا بارده اساسا تسلم ايدك
………………..
فى شقه امانى
امانى تفتح الباب و محمد طالع و شايل
امانى / انت فين كل ده
محمد / ما قولتلك فى الطريق
امانى / و انت خاسس عليك ايه ما انت رايق
محمد / لا اله الا الله انا طالع لنور
امانى / تطلع لنور فين حماتها فوق
محمد / و انتى قاعده هنا يا امانى
امانى / مستنياك تديني الحاجه اطلع بيها امال ادخل على الوليه بايدي فاضيه
محمد / وليه ايه انتى مش هتبطلى الداء المنيل ده
امانى /داء ايه دا زمانها نزلت فى بنتك سلخ و معايره لما قالت يا بس
محمد / طب بلاش انتى لتمسكوا فى بعض تانى
امانى / طبعا ما انت نفسك تطلع و يخلالك الجو
محمد / ربنا يهديكي جو ايه بس
امانى / انا هاخد العلبه دى قال يعني كنت بطلعها و اتفاجئت بوجودها
محمد / انا عارف ان خراب بيت البت دى على ايدك
امانى / خراب ايه انت هتعرف مصلحه بنتى اكتر منى هات العلبه
امانى تاخد منه العلبه وتطلع و محمد واقف بيضرب كف على كف
……………….
فى شقه نور
الكل قاعد يضحك
يس / دا بيقولى كاته ايه و دوجه ايه قولتله الكابتن لو سمعك هيعمل منك بطاطس محمره
نور / انتوا بتجيبوا الكلام ده منين
يس / انا عارف العيال دى جايه منين
على / انا كل اللى يهمنى البطاطس دى بالكاتشب و لا من غير
نور / شجعه شجعه
ليلى / و هو الواد قال حاجه ما دمه خفيف اهو
نور / اطلع انا منها يعني ماشي يا سي يس مين قدك تيته فى صفك
نغم / و انا !!
على يشدها يقعدها على رجله
على / انتى حبيبه بابا
نغم تضحك الجرس يضرب على يقوم يفتح و هو شايل نغم
على / اهلا ست الكل اتفضلى
امانى تدخل و تناول على علبه الحلويات
امانى / عمك نزل مخصوص جاب لنونو الحلويات اللى بتحبها كلها
على / تسلم ايدك اتفضلي
امانى / الله دا الغاليه هنا
ليلى / اهلا اهلا يا ست امانى اتفضلى
نور / تشربى ايه يا ماما
امانى / ما تتعبيش نفسك يا حبيبتي انا مش ضيفه
على / طبعا يا طنط و دى فيها كلام
نور / هقوم اعمل دور كاكاو و اهو عشان يس و نغم يتعشوا قبل ما يناموا
امانى / ابقي هاتى اطباق و وزعى من الحلويات اللى ابوكى جايبها
على / امال عمى ما طلعش معاكى ليه
امانى / تعب يا قلبي من المشوار قولتله ارتاح انت و ابقي اطلعلهم الصبح
على / ينور
امانى / هقوم اساعد نور
على / اتفضلي
امانى تقوم تدخل المطبخ
ليلى / ربنا يعينك
على يبتسم
……………….
فى شقه ندى
حسام / امال انا ليه ما حدش قالى
ندى / اكيد ما حبوش يزعجوك
حسام / ازاى يعني كنت كلمتها و طيبت خاطرها بكلمتين
ندى / ما احنا فيها اديك عرفت ما تكلمها
حسام / خليني الصبح احسن بلاش اكلمها و حماتها عندها
ندى / اللى انت شايفه بس لو سالتنى ان مفيش داعى للكلام ده كلمها فى حموتها و خلاص
حسام / انا مش عارف هقولها ايه دى اكيد زعلانه اوى
ندى / قولها ما تزعلش تجرب تانى مفيش حاجه تستاهل زعلها قولها اى حاجه انت هتغلب
حسام/ اقولها انى اترقيت و لا مش وقته
ندى / مش عارفه اى حاجه مش فارقه
حسام يمسك التليفون و يتصل بنور
………………
فى المطبخ
نور بتتكلم فى التليفون و امانى جنبها
نور / لا والله خلاص
حسام / بصي ابعتيلى الملف بتاعك على الواتس صوريه بالموبايل كدا و ابعتيه اوريه للدكاتره اللى هنا يمكن
نور / و هو الدكاتره اللى هنا
حسام / يا ستى ما دام سعى بسعى نجرب هتخسرى ايه
نور / حاضر
حسام / و بعدين لعلمك الحاله النفسيه بتفرق جدا يعني ففكيها كدا
نور / حاضر يا حبيبي
حسام / اقولك خبر حلو
نور / قول
حسام / النهرده اترقيت
نور / الف مبروك يا حبيبي والله فرحتلك اوى
حسام / انا داخل جمعيه الفتره دى لما اقبضها هبعتلك تيجي تغيرى جو كام يوم
نور / اجى فين دا بدل ما تنزل انت اجازه انا ما ينفعش اجى خالص
حسام / عشان العيلين اللى عندك دول يعني
نور / مش بس بقولك ايه انت لسه داخل من بره تعبان روح كلك لقمه و ارتاح و انا كمان مش هينفع اسيب حماتى بره كل ده
امانى / ما ابنها معاها
نور تبص لامانى
نور / ماشي يا قلبي سلام
نور تقفل و تصب الشاى
امانى / ما قولتليش الوليه دى قالتلك ايه قبل ما اطلع
نور / وليه ايه عيب كدا يسمعونا تبقي مشكله
امانى / ما يتفلقوا
نور / قالتلى ما تزعليش
امانى / يا بت
نور / والله ده اللى قالتهولى … هو انتى بتتلككى للمشاكل و خلاص
امانى / اشبعى بيهم
نور تاخد صينيه الشاى و تطلع
……………….
بعد فتره فى الشركه
هدايه / لتكون الفكه اللى زادتلك على المرتب شبعتك
حسام / لا ما شبعتنيش بس لازم نهدى مش كل فرع اتنقله تحصل فيه كارثه انا كدا هتهرش
هدايه / ليه ما انت اول ما اتنقلت كان لينا حركه برده
حسام / بس ما اتهرشتش لسه
هدايه / ما دى كمان هتبقي سيكريت
حسام / برده مش وقته بصي انا باص ظبطوا انتوا و انا هعمل عبيط و نسبتى وزعوها بينكوا براحتكوا
هدايه / ازاى يعني
حسام/ هتغلبوا اتصرفى يا دودو
هدايه / طب فكر تانى
حسام/ دا قرار نهائي براحتك بقي
هدايه / برده فكر يمكن تغير رايك
حسام / تمام مش دا هيريحك هفكر بس ما افتكرش فى حاجه هتتغير
هدايه تبتسم و تسيبه و تمشي
………………
فى النادى
نور / والله ابدا حتى على حكالى كنت هموت من الضحك
وفاء / الله امال ما كنتيش بتيجي ليه
نور / عادى الفاضي بيوصل
وفاء/ ربنا يصلحلك الحال
نور / امين
وفاء / المهم ما حكتليكيش اللى فاتك الفتره اللى فاتت
نور / خير
وفاء / الحربوئه ام محب استغلت غيابك و مسكت ودان الماميز واحده واحده تقولهم انك مش مامه يس و نغم و انكوا متبنينهم و قالتلى انهم قابلوا جوز عمتهم
نور / هى ما كدبتش
وفاء / حقه !!
نور / ايوه والد يس و مامته متوفيين و انا مش عندى اولاد فاستاذنت عمتهم انى اربيهم فى بيتي
وفاء / انا
نور / انا ما عنديش مشكله انكوا تتكلموا بس ياريت و احنا بنتكلم نراعى بس ان دول اطفال مش لازم كل شويه نفكرهم ان ابوهم و امهم ماتوا
وفاء / معاكى حق طبعا و انا والله عمرى ما كنت اصدق انكوا يعني … اصل العيال متعلقين بيكوا اوى و انتوا كمان اللى يشوفكوا يقول انكوا بتحبوهم اوى
نور / ما احنا بنحبهم فعلا و كانهم ولادنا بالظبط
يس يطلع من التمرين
يس / شوفتيني الكابتن قالى انى شاطر اوى
نور / برافو عليك يا حبيبي اول ما نخلص هاخدك تجيب كل الحلويات اللى بتحبها
يس يبتسم و يدخل التمرين تانى و نور تبص لوفاء
……………….
فى الشركه
حسام واقف بيتكلم مع هدايه
حسام / يا ستى الله الغنى
هدايه/ براحتك انا كدا عملت اللى عليا و
هدايه توصلها رساله على الموبايل تفتحها و ملامحها تتغير
حسام / خير فى حاجه و لا ايه
هدايه / ثوانى
هدايه تتصل غير متاح
حسام / مالك يا بنتى قلقتيني
هدايه توريله الرساله
حسام / اخر فرصه لو ما دفعتيش الفلوس هبعتك لرامى تونسوا بعض بعد ما اسلم المستندات و الصور اللى معايا على عمليات السرقه اللى بتعملوها … يعني ايه ما كانش رامى
هدايه / امال مين
حسام / هترجعى تشكى فيا تانى ايه هبلغ عن نفسي
هدايه تسيبه و تمشي حسام يتابعها يلاقيها داخله مكتب عدنان
حسام / يا انا يا انتى يا هدهد يا انا يا انتى
……………………..
فى شقه أية
اسماء / حتى عيد ميلادى مش عاوزه تحضريه دا فى الشقه اللى فوقك يا شيخه
أية / يا ستى هاجى اساعدك و نزوق الشقه و اعملك حلويات و بعدين انزل قبل ما الناس يجوا
اسماء / هو انتى عليكي تار مستخبيه منه انا ما شوفتش فى حياتى واحده بيتوته اوى كدا
أية / و انا ما شوفتش واحده زنانه اوى كدا
اسماء / ههههههههههههههههه هو انتى لسه شوفتى زن
أية / الله يعينه استاذ شريف
اسماء / بصي براحتك بس بجد هزعل منك
أية / يا بنتى افهمى دول اهلك و صحابك انا ما اعرفش حد فيهم و عمر بقي ما يعرفش حد خالص يعني
اسماء / ما دى فرصه اننا نعرفهم على بعض
أية / خليها مره تانيه يا اسماء على رواقه
اسماء / و هى فين الرواقه دى و انتى كل مره تطلعيلى بحجه شكل ما تكلميه يمكن يوافق
أية / خلاص تمام هكلمه بس لو رفض
اسماء/ يا ستى لو رفض خلاص
أية / خلاص بقي بطلى زن دا انتى فظيعه
اسماء / قومى يلا اعمليلى كبايه شاى بدل اللى بردت دى
أية / شاى ايه انا هقوم اطفى على المكرونه و اجبلك خرطه تدوقى بقي و تحكمى بنفسك
اسماء / ما تحاوليش مفيش اجمد من مكرونتى
أية / اما نشوف
أية تقوم تدخل المطبخ و اسماء تقلب فى التليفزيون
……………………..
فى شقه نور
على / ما كانت صفاء شغاله و بتشكرى فيها
نور / الله و هو انا اللى طردتها ما هى اللى اعتزرت
على / يا ترى ليه
نور تبص لعلى
نور / هو يعني اللى خلقها ما خلقش غيرها
على / انا كدا كدا ما ليش فيه اعتزرى للمدرسه الجديده اللى مش عجباكى دى و هاتى غيرها
نور / انا هديها فرصه تكمل معاهم الشهر و اشوف المستوى هيفضل زى ما هو كدا و لا هتتعدل
على / فكره كويسه بس ما تسبيش الدنيا عايمه لاخر الشهر اللفتى نظرها للحتت اللى مضيقاكى دى
نور / اكيد بكره هتكلم معاها طبعا و اقولها امال هسكت
على / انا هقوم اشوفهم خلصوا الواجب و لا لا مش هيسهروا للصبح يعنى
على يقوم و يطلع بره و نور تقف قدام المرايه و تسرح شعرها
………………………
فى شقه ندى
حسام يفتح الباب
حسام / ندى انا جيت جاهزين
حسام يدخل اوضه عمه يلاقي ندى بتحط الموبايل فى الشنطه
ندى / احنا جاهزين
حسام / تعالى ساعديني ننزل عمى و بعدين نطلع نجيب الشنطه و حبيبه
ندى / يلا
حسام يحرك الكرسى و يلفه و ينزل و ندى تسند قدامه لحد نا يوصلوا للشارع غديى يدخل و يساعد حسام ندى تطلع تجيب حبيبه و الشنطه و تنزل تلاقى حسام بيطبق الكرسي و يحطه فى الشنطه
حسام / شكرا يا غديي
غديي / تكرم خيي
ندى تركب العربيه و حسام يسوق و يمشوا
ندى / ما بحبوش الجدع ده
حسام / ما يبقاش قلبك اسود بقي
ندى / خلاص تمام
حسام / اخبار نور ايه كلمتيها النهرده
ندى / هى مش اختك ما بتكلمهاش ليه
حسام / بكلمها طبعا بس انتوا بتتكلموا كل يوم لكن انا يا مشغول فى الشركه يا معاكى فى البيت و بعدين هو انا عشان بسالك هتتهميني انى مش بهتم باختى كل ده عشان بحاول افتح معاكى حوار
ندى / سورى يا حسام انا بجد مرهقه جدا النهرده طول اليوم مع حبيبه بتزن بسبب التسنين الزفت ده لما تعبت
حسام / لو مش قادره ارجعك
ندى / و انت يعني هتاخدها عنى ما انا هفضل برده شيلاها لحد ما ترجع
حسام / خلاص اهدى نخلص السيشن و نروح نامى و ارتاحى و انا هقعد بيها
ندى تتنهد و تهز راسها و تبص من الشباك على الطريق
ندى / هى مصر مش بتوحشك
حسام / لو كنت لقيت فى مصر ربع اللى بلاقيه هنا كنت رجعت من بدرى
ندى / امال انا مش لاقيه ليه
حسام / يمكن انتى بس بتركزى على السلبيات عمى بقاله قد ايه بيتعالج فى مصر و شوفى المستوى اللى وصله هنا
ندى / الدكتور هنا نفسه قالك لو ما كانش اللى اتعمله فى مصر ما كناش وصلنا للمستوى ده
حسام / انا مش فاهم ايه اللى فكرك بمصر يعني مين ليكي فى مصر ابوكى و بنتك و جوزك هنا هتعوزى ايه تانى
ندى / انا بس اتخنقت من قعده البيت مش اكتر
حسام/ بكره اخدكوا افسحكوا
ندى / بفكر اسمع كلام نور واكمل دراستي
حسام / مفيش مشكله
ندى / تفتكر هقدر اوفق
حسام / هشوفلك واحده تيجي تاخد بالها من عمى و حبيبه و البيت و انتى تشرفى عليها و تتفرغى للمزاكره لحد ما ارجع من الشركه بيتهيالى كدا عدانى العيب و ازح
ندى تهز راسها و تبص من الشباك
حسام/ تعرفى بفكر فى ايه
ندى تبصله
حسام / اشوف واحده تقعد بعمى و حبيبه و اخدك نسهر فى اى حته تشوفى لبنان و جمال لبنان بالليل تعيشي و تخرجى من البيت
ندى / ازاى اثق فى واحده غريبه على راجل مريض و طفله رضيعه
حسام / انا مش هجيب اى حد من الشارع يعني هجيب واحده ثقه ما تقلقيش
ندى / ما افتكرش دى فكره كويسه
حسام / انتى مش هتفضلى تحرسيهم طول الوقت انا و انتى برده محتاجين وقت لوحدنا
ندى / نبقي نتكلم بعدين
حسام / عشان باباكى يعني ما هو اكيد فاهمنى اكتر منك كمان
ندى / طيب يبقي نتكلم بعدين تمام
حسام / تمام
ندى تبص من الشباك و حسام يكمل سواقه
…………………
فى شقه نور
على / بالبساطه دى
نور / بتقولى انا ادرى بشغلى و باسلوبى ايه قله الزوق دى قولتلها اسلوبك مش ماشي معايا
على / يعني رجعنا لنقطه الصفر اننا نلاقى مدرسه كويسه للعيال
نور / انا سالت على الفايس و لقيت كذا واحده و بجمع نمر و ان شاء الله بكره اكلم اول واحده تيجي اجربها
على / بصي هى مجرد فكره يارب ما اندمش انى قولتها
نور تبصله
على / كلمى صفاء ترجع
نور / و اعتزرلها كمان لو تحب و لا اقولك خد رقمها انت كلمها
على يضحك
نور / ما تستفزنيش ايه يعني البلد ما فيهاش غير صفاء اكيد هلاقى حد
على / تمام ما تسالي صحباتك الجداد بتوع النادى
نور / سالتهم طبعا وفاء قالتلى على واحده بتدى لابنها بس غاليه اوى
على / ما تجربيها
نور / تاخد ميه و خمسين جنيه فى الحصه يا على
على / يا ستى لو شاطره جربيها ان شالله شهر لحد ما تلاقي واحده تانيه
نور / لا خليها فى الاخر هجرب الاول اللى جبت نمرهم من الفايس و بعدين يحلها ربنا
على / و نعم بالله … انا هقوم افرد ضهرى شويه هتعوزى منى خاجه
نور / لا يا حبيبي ربنا يخليك هخلى الولاد يوطوا التى فى عشان ترتاح
على يبوس راسها و يقوم
…………………
فى الشركه
حسام / يعني ايه كل حاجه هتفضل زى ما هى افرضي بلغ افرضي كان عارف فعلا
هدايه / يعمل اللى يعمله
حسام/ راجعتى الكاميرات تانى لو مش رامي يبقي مين
هدايه / لو مش رامى يبقي انت يا حسام … هو حد غير رامى ساعدك تلاقي الشقه و كان عارف انك هتكون فيها وقتها
حسام / انا كنت معاكى وقت ما استلمتى الرساله لو نسيتي
هدايه / يبقي رامى فى حد بيساعده
حسام / حد زى مين يعني
هدايه / عشان نعرف لازم كل حاجه تمشي طبيعي
حسام / بس دى مجازفه كبيره
هدايه / و انت قلقان ليه ما كدا كدا انت لا تعرف تفاصيل العمليه و لا معاد التسليم و لا ليها علاقه بيك
حسام / و دا كويس عشان افضل بره دايره الشك
هدايه / انت كدا كدا بره دايره الشك اصل رامى اتسجن عشان كان وحدانى يا عيني انما انت مش وحدانى يا حسام
حسام ملامحه تتغير
حسام / دا تهديد
هدايه / لا طبعا احنا فى نفس التيم و لا نسيت
حسام / امال تقصدى ايه بانى مش وحدانى
هدايه / حسام الشغل ده مش بيمشيه بنت حلوه زيي دى مافيا حبيبي مافيا
حسام / ما ليش فيه انا ما اعرفش غيرك فى الليله دى
هدايه / و اديني بقولك
حسام / و انتى قولتى حاجه
هدايه / اديتك كل اللى انت محتاج تعرفه عن اذنك عشان ورايا شغل كتير
هدايه تمشي و حسام متابعها و مبتسم بنت تروح تتكلم مع هدايه تجرى على مكتب عدنان
…………………
فى شقه اسماء
أية بتساعد اسماء فى تزويق البيت جرس الباب يضرب أية تروح تلبس النقاب و اسماء تفتح تلاقي اكياس كتير جدا محطزطه على الارض
اسماء / دا شريف طاب الطلبات
أية / طب هنزل انا بقي
اسماء / ايه الوطنيه دى دا بدل ما تساعديني
أية / الله مش جوزك جه
اسماء / لا اله الا الله هو هياكلك ما تهدى شويه
أية / يا اسماء ما تحرجينيش بقي
اسماء / شريف كلم جوزك و قال هيجي يعني ما طلعش هو المشكله المشكله فيكي
أية / يا بنتى ما انا عملت معاكى كل حاجه اهو
اسماء / طب خلى عندك دم بقي و كملى جميلك لاخره
شريف يدخل شايل تورته كبيره اسماء و أية يوسعوا يدخل يحطها على السفره أية تنزل اسماء تبص عليها
اسماء / دى مش طبيعيه ابدا عمرى ما شوفت كدا
شريف / ما تسبيها على راحتها مش قالتلك ما بتندمجش وسط الناس و لا انتى غاويه تتعبى قلبك و خلاص
اسماء / بتصعب عليا اوى وحدتها
شريف / هى مرتاحه كدا يلا يلا ساعديني نجهز الحاجه قبل ما الناس يجوا يلا احنا لسه ما لبسناش
اسماء تروح تجيب كيسين و شريف يجيب كيسين تانين و يوزعوا الحاجه على السفره
……………………
فى الشركه
حسام / نعم و عوزانى اهدى هتعامل ازاى مع مستر عدنان و لا احط عينى فى عينه ازاى بعد كدا
هدايه / قولتلك اهدى الموضوع تحت السيطره
حسام / دا ايه البكاسه دى بقي انا الدكر محروق دمى و انتى عادى ما صحيح ما هو حافظ جسمك هتفرق معاكى فى ايه
هدايه / تفرق بس الحمد لله انه بعتها لعدنان هيسكت و مش هيفتح بقه لحد
حسام / ازاى يعني و بعدين تضمنى منين انه ما بعتهمش لحد تانى
هدايه / لو حد تبعنا هيقولى و لو مش تبعنا اكيد مش هيتفرج و يسكت
حسام / بالظبط هينقلوها بين بعض زى مقاطع البلوتوث الساخنه زمان
هدايه / لا يا اهبل يا هيغمزولك و يتغامزوا عليك يا هيحاولوا ياخدوا دورهم معايا
حسام / لا خبره بصحيح لحظه يعني ايه الكلام ده يعني مستر عدنان تبعنا
هدايه / اذكى اخواتك طبعا تبعى هو اللى بيني و بينه شويه
حسام / قصدك ايه
هدايه / يعني زى ما قولت انت انا خبره فى الحاجات دى انت مش اول راجل اتصور معاه بس الفرق ان عدنان انا اللى صورته
حسام / و ابتزيتيه
هدايه / لا عيب مستر عدنان مش عيل صغير و انا مش من مصلحتى ازعله منى
حسام / و انا بقي العيل الصغير اللى تبتزيه عادى
هدايه / انت بتهزر صح
حسام / لا يا ست هانم انتى اللى بتهزرى لو فكرانى لقمه سهله
هدايه / لا يابس و لحمك مر بس مش انا اللى بلعب معاك .. الماسج بتاعه الموبايل جاتلى و انا معاك
حسام / انتى عارفه بيتي فين و سهل تحطيلى الجواب و حوار مراجعه الكاميرات تم عن طريقك ما كانليش بيه دخل و النوته انتى اللى لقيتها و برده انتى اللى راجعتى الكاميرات و طيرتى رامى اللى كنتى مرقداله و رساله الموبايل سهل اى حد من الشله بتاعتك يبعتهالك و انا واقف و الرسايل اللى كانت بتوصل لندى ما حدش كان يعرف اننا هنتقابل فين و امتى غيرنا برده حد من اللاضيشك صورنا و هدوئك دلوقت بيقول ان كل اللعبه دى ما تطلعش غير من تحت ايدك
هدايه / تمام هصارحك انا اللى صورت الكام صوره فى الاول
حسام / يعني كلامى صح
هدايه / مش كلو
حسام / كنتى فاكره ايه انى هطلق ندى و اجرى اعيط فى حضنك يعني
هدايه / اكيد لا بس لما تبقي فى مشاكل هتحتاج هدايا للترضيه فلوس مصارى
حسام / يا سلام
هدايه / الطريقه دى مجرباها قبل كدا كتير مش اول واحد يعني
حسام / و مين ساعدك فى التصوير دخلتى مين بينا بقي و ما عدتيش قادره تسيطرى عليه
هدايه / ما حدش
حسام / صورتيني بنفسك يعني
هدايه / لا
حسام / انا تعبت و صدعت و بجد مش طايقك
هدايه / اسمعنى يا حسام
حسام / انا كنت غلطان لما وثقت فيكي عن اذنك
حسام يمشي و هدايه تحاول تحصله ما تقدرش
……………………..
فى شقه نور
نور / و فيها ايه يعني
على / هو ايه اللى و فيها ايه لو هتاخدى الحصه تحت عند امك ابلعها لكن تقعدوا لوحدكوا هنا
نور / لوحدنا ايه دا هيقعد مع يس و نغم
على / دول عيال يا ست الكل
نور / يعني اعملك ايه يعني
على / بسيطه ياخدوا الحصه عند ماما ايه رايك
نور / و ايه لزمتها الشحطته و نتقل على مامتك
على / ما انا مش هرفع الإريال على اخر الزمن
نور / انت مش واثق فيا
على / دى حاجه و دى حاجه تانيه خالص افردى الشيطان وزه احط النار جنب البنزين ليه من الاول
نور / انت اوفر اوى
على / دا اللى عندى
نور / العيال كل ده ما خادوش درس واحد
على / مش انا اللى بغير كل يوم مدرسه
نور / ايوه ايوه لف لف وارجع لنفس الموضوع
على / موضوع ايه
نور / صفاء طبعا هو فى غيرها
على / مين فينا اللى بيلف يلف و يرجع لنفس الموضوع بقي
نور / ظبط مواعيدك و تعال اقعد وقت الحصه
على / و لو حصل ظرف نلغى الحصه
نور / طب ايه رايك اعمل مجموعه عندى فى البيت
على / اعملى اللى تعمليه
نور / و دا يعني ايه بقي
على / يعني ما دام مش هتبقي انتى و الراجل لوحدكوا فى الشقه براحتك اعملى اللى تشوفيه الصح انا بثق فى قراراتك ثقه عمياء
نور / تمام يا على
……………………..
فى الشركه
حسام بيشتغل هدايه تدخل
حسام / جايه متاخر النهرده يعني
هدايه / ما بتردش على تليفوناتى ليه
حسام / نسيت الموبايل فى العربيه
هدايه / نسيته و لا سيبته
حسام / عوزانى اخده معايا عشان تفضلى تتصلى و تعمليلى مشاكل مع ندى
هدايه / انا مش هستفيد حاجه لما اوقع بينك و بين مراتك بالعكس انا عوزاك يبقي معاك فلوس تدلعها و تفسحها وتحسن الوضع بينكوا
حسام / الوضع بينا كويس اطلعى انتى بس منها
هدايه / مش هيبقي احسن لما تقدم لحبيبه فى انترناشونال كيندر جارتن
حسام / انا توبت
هدايه/ بلاش يا حسام ما تعاندش مع ناس ممكن ينسفوك انت و اهلك
حسام / انا مش واثق فيكي اشتغل معاكى ازاى
هدايه / انا خايفه عليك هيندموك
حسام يبص يمين و شمال ما حدش باصصلهم
حسام / مش خايفه اللى بيبتزك يبلغ فعلا
هدايه / ما تقلقش مش هيقدر يعمل حاجه
حسام / جايبه الثقه دى منين
هدايه / لانه اهبل ما يعرفش حاجه العبيط بعت الصور لعدنان ما يعرفش حاجه بقولك
حسام / مش فاهم
هدايه / صدقنى كل ما كنت عارف اقل كل ما كنت فى امان
حسام / كل ما كنت عارف اكتر كل ما كنت مطمن و عارف انا مسنود على مين
هدايه / انت مسنود عليا
حسام / روحنا فى داهيه انتى بعتى رامى فى لحظه من غير ما تكلفى نفسك لحظه تتاكدى او حتى تواجهيه
هدايه / كان هيحصل مساله توقيت مش اكتر
حسام / مش فاهم
هدايه / كان بدا يعمل مشاكل و حاجات ملهاش لزمه
حسام / و انا نايم فى العسل يعني و لا ايه
هدايه / مش بقولك كل ما عرفت اقل كل ما كان احسن
حسام / انا طلبت من واحد صاحبى يرتبلى زياره لرامى
هدايه / صاحبك !!! لحقت يبقالك صحاب هنا
حسام / اهو ربنا بيوقفلى ولاد الحلال
هدايه / و يا ترى ممكن اعرف عاوز تروحله ليه
حسام / هعرف قال لمين و عمل معايا كدا ليه
هدايه / انت ازاى بالسذاجه دى
حسام / انا كدا و لو سمحتى ما تعطلينيش بقي اتفضلي
هدايه تنفخ و تقوم
هدايه / انا الصبر مش من طبيعتى بلاش تجبرنى
حسام يبتسم بسخافه هدايه تعدل هدومها و تمشي
……………….
فى شقه على
على يدخل يلاقي فى ست كبيره قاعده مع نغم
على / السلام عليكم
الست / و عليكم السلام
على يدخل يلاقي نور قاعده فى اوضه يس جنبه بيعمل الواجب
على / هى دى المدرسه الجديده
نور / مش عاوزه اقولك ربنا يباركلها شاطره جدا قعدت لمت كل اللى فات مع يس و ادتله مراجعه و المره الجايه هتبدا فى الجديد
على / لحقت ليه هى بقالها قد ايه هنا
نور / ساعتين قعدت مع يس ساعتين و لسه هشوف هتقعد قد ايه مع نغم الاسبوع ده هتدى كل حصه ماده و بعد كدا هتدى مادتين فى الحصه
على / انا مش مجمع معاكى بس المهم انتوا تمام
يس / انا مش تمام انا واخد واجب يكسر صوابعى
نور / ما انت بقالك كتير اوى واخد اجازه
على / هو مش بقاله ساعتين بيزاكر معاها خد ريست شويه و بعدين كمل
نور / ما هى هتيجي بكره تانى هى مش هتدى الاتنين فى نفس الحصه فزودنا عدد الحصص
على / مش كتير على الولاد كدا دول مش ثانويه عامه لكل ده
نور / هنضغط بس الفتره دى عشان
على / ما فيش مبرر للضغط اصلا اللى ما نخلصوش فى الدراسه نعوضه فى الاجازه العيال صغيرين و محتاجين
نور / ممكن ما نتكلمش قدام الولد لو سمحت بليز كان قاعد بيحل دلوقت مش هقدر عليه
على يتنهد
على / طب فى اكلو لا ايه
نور/ ثوانى هغرفلك
………………
فى اوضه الزياره فى الحجز
حسام قاعد رامى يدخل
رامى / شو جابك
حسام / انا عارف ان هدايه اللى ملفقالك التهمه
رامى / عن جد !! بالله اقصفتلى ركبى لتكون مفكر ان هاى اللمألعطه تقدر تزتنى لهون و لا حتى تعمل اى شى هاى اخرها شغل تخوت اكتر من هيك ما فيها
حسام / امال مين اللى عمل فيك كدا
رامى / شو شكلك استحليت المكان و بدك تشرف حدى
حسام / انا اقدر اخرجك من هنا
رامى / بالله شو شو مفكرنى ببقي هون لا يا حبيبي انا من زمان و انا بعرف ان ما حدا لحدا و قد ما بيعرفوا عنى بعرف عنهم
حسام/ اقدر اساعدك ازاى
رامى / بعلمى انك ما بدك اضهر من هون
حسام / هدايه اشتغلتنى و صورتنى و بتهددنى انها توقع بينى و بين مراتى انا عاوز اخلص منها باى تمن حتى لو هسيب الشركه خالص
رامى / هدايه لساتها صغيره ما فى منها خوف دير بالك على الديب الكبير اللى بيحركها
حسام / حد اعرفه
رامى / لتكون مفكرهم جايبنك لهون لانك ابضاى و ما فى متلك بالمجره لا حبيبي فوق هم بيعرفوا انك مجوى متلك متلهم
حسام / انا اتعرفت على مستر مروان فى دبى
رامى / ايه بعرف و وقع فى غرامك من اول نظره و عرض عليك وظيفه ما بتحتاج لدراستك و بمرتب خيالي من شان سواد عيونك مو هيك
حسام / ازاى هيسرق نفسه يعني ايه الهبل ده
رامى / يسرق نفسه شو يا اهبل عدنان بيتاجر بالادويه المخدره فى السوق السودا بس بيعمل شى حركات من شان ما حدا يحاسبه و لا يساله لوين بيودى الادويه المخدره
حسام مصدوم
رامى / انا خبرتك بالحكايه و انت تصطفل لحالك و اياك تفكر ان عدنان هو راس الحيه عدنان راجل نسوانجى درجهاولى ضحكه توديه و غمزه تجيبه بس ان كان بدك انا عطيتك طرف الخيط و انت اعمل شو ما بدك
حسام / انا مش عارف اقولك ايه
رامى / ما تقول و لا تدرى شو خبر هيك السكربينه انى بس بضهر من هون والله لفرجيها و اخلى فوقيها تحتيها
حسام يهز راسه و يقوم و يمشي
…………………….
فى شقه ليلى
على / بس دا ما كانش كلامك قدام نور يعني
ليلى / يا ابنى افهمنى انا بحب نور و بخاف على مشاعرها بس اللى بيحصل ده ما يرضيش ربنا
على / يعني جوازى عليها فى السر هو اللى يرضي ربنا
ليلى / و مين قاله انه هيبقي فى السر بس
على / لا بقي انا كدا تهت منك
ليلى / يا حبيبي
على / انا سمعت كلامك و اتجوزت و ربنا اراد و نور خلفت هعمل ايه
ليلى / يبقي خير و بركه
على / منين طيب دى تولد و دى تولد و انا اقلب عبد المنعم مدبولى انا اللى جبت
دا كله لنفسي انا اللى جبت دا كله لنفسي مش كدا
ليلى / يا على افهم
على / انا بحاول ما ابقاش ابن عاق بس انا سعيد بحياتى كدا
ليلي / انك تربى ولاد الناس يا على ان ما افرحش بعوضك يا ابنى
على / اديني بسعى
ليلى / ما هو جوازك سعى برده
على / ماما ابوس ايدك فضيها سيره بقي
ليلى / طب يعني مش هتغير و انت شايف اخوك الصغير الاصغر منك شايل عياله و انت لا
على / اخويا الصغير و اصغر منى كمان فى نفس الجمله و ورا بعض
ليلى / انا بتكلم جد
على / لا مش هغير عمر متجوز قبلى بفتره طويله و انا متجوز نور و انا فاقد الامل فى الخلفه اساسا و ده كان قرارى
ليلى / يعني دا عمره يكون قرار حد عاقل يا ابنى دا المال و البنون زينه الحياه الدنيا
على / و انا و كافل اليتيم كهاتين فى الجنيه انا مش عاوز الحياه الدنيا انا برسم على تقيل
ليلى / انت تعبت قلبي
على / سلامه قلبك و بعدين دا حتى يس و نغم عيال تشرح القلب الحزين
ليلى / بكره خلفتك تطلع احلى واطعم
على / ربنا يقدم اللى فيه الخير
ليلى / براحتك انا تعبت
على يبوس ايدها و هى تتنهد
………………
فى شقه حسام
حسام واقف فى البلكونه سرحان
///////////////
حسام / اللعبه وسعت عليك اوى يا حسام … بالعكس انا النهرده موقفى اتغير خالص … ازاى من غير دليل … انا كل ما بقعد هنا بتوحل فى العك ده اكتر … هترجع مصر يعني … ارجع لسي زفت تانى دا انا ما صدقت … و بعدين انت ما كسرتش قرش رجوعك دلوقت يعني زى ما روحت زى ما جيت … اكلم الناس فى الامارات… و الممانعه اللى عليك … استحمل لحد ما تخلص … لا الامارات مش امان بالنسبة لى ندى لو طلعت عارفه رقم الامير و اتفقت معاه عليا … ندى اهبل من كدا بكتير … ما هو ما يتخافش غير من الهبله … انا لازم الفتره الجايه اركز انى امسك اى دليل على عدنان … او هدايه هدايه اكيد و هى بتنضف ورا عدنان هيكون عندها حاجه كدا و لا كدا … و دى هتوصلها ازاى دى … هوصل مسيرى هوصل
//////////////
ندى تدخل
ندى / اعملك حاجه تشربها
حسام ينتبه و يبصلها
حسام / ناموا
ندى / اه ناموا … انت كويس
حسام / اه الحمد لله
ندى / الفتره اللى فاتت حساك بتسرح كتير بتفكر كتير فى مشاكل فى الشغل
حسام / العادى يعني
ندى / انا عارفه ان مصاريفنا كتير بس
حسام / انا ما اشتكتلكيش انا الحمد لله الدنيا ماشيه معايا هو بس واحد زميلنا حصلتله مشكله و كنت زعلان عليه بس مش اكتر لا مساله فلوس و لا اى حاجه
ندى / الحمد لله .. قصدى الحمد لله انها مش مساله فلوس مش ان صاحبك فى مشكله اقصد
حسام يبتسم
ندى / اعملك حاجه ؟
حسام / اخاف اطلب تكسفيني
ندى / انا عاينه شيكولاته فى التلاجه ايه رايك
حسام / ندى
ندى تبصله
حسام / نسكافيه كفايا
ندى تهز راسها و تمشي و حسام يقعد مكانه و يكمل تفكير
………………….
فى شقه نور
امانى و نور واقفين فى المطبخ و نور بتعمل ساندوتشات
امانى / امال امتى ان شاء الله
نور / همشي شويه فى العلاج مش ناويه استعجل تانى
امانى / و انتى بقي هتمشي مع نفسك مش هتتابعى مع الدكتوره
نور / لا هدور على حد تانى
امانى / يا بنتى لو على اللى عملتيه فاكيد هى هتقدر و اولى تعتزريلها
نور / سبيها لله
امانى / امال جوزك ناوى يروح من عند امه امتى
نور / ما اعرفش زمانه جاى
امانى /زمانها بتاكل ودانه فى موضوع الجواز
نور / تعمل اللى تعمله
امانى / الزن على الودان امر من السحر
نور / انا تعبت يا ماما يحصل اللى يحصل بقي
امانى / امال اتشالتى و اتهبدتى لما عرفتى انه كان زميل المدرسه اياها وطردتيها طرده الكلاب
نور / هى اللى اعتزرت
امانى / ما علينا ما روحناش بعيد
نور / ماما انا تعبت و نفسيتي فى الارض عوزانى اعمل ايه
امانى / كلميه استعجليه قوليله انه واحشك و مش قادره على بعاده بشويه دلع هيجيلك على ملا وشه
صوت باب الشقه بيتقفل
نور / اهو جه
على يدخل المطبخ يشوف امانى يتخض
على / مساء الخير يا حماتى منوره
امانى / بنورك يا حبيبي … انا نازله بقي يا نور
على / و دا ينفع برده ايه اذاحضرت الشياطين ذهبت الملائكه و لا ايه
امانى / لا دا انا كنت بس طالعه اطلع لنور كيس ملح و نازله علاطول
على / طب اتعشي معانا طيب
امانى / مره تانيه عن اذنكوا
امانى تمشي تعدى على يس و نغم بيتفرجوا على الكرتون
نغم / انتى نازله يا تيته
امانى / اه عاوزه حاجه
نغم / اجى معاكى اللعب مع جدو
امانى / نايم تعالى بكره
نغم / ماشي
امانى تفتح الباب و تنزل نور و على يطلعوا من المطبخ نور شايله طبق ساندوتشات و على شايل صينيه عليها كبايات لبن و يروحوا يقعدوا وسط العيال
على / العشا عشان عاوزين ننام بدرى
يس / مش عاوز انام
على / احنا اتفقنا على ايه
يس / حاضر
على يبوس راس يس و يناوله كبايه لبن
…………………….
فى الشركه
حسام واقف بيبص على ورق فى الارشيف هدايه تدخل
هدايه / لسه زعلان منى
حسام / مش فارقه
هدايه / تحب نروح فى حته نتكلم على رواقه
حسام / عشان تصوريني تانى
هدايه / ما يبقاش قلبك اسود بقي انت عارف غلاوتك
حسام / مش باين
هدايه / طب عملت ايه مع رامى
حسام / و لا حاجه قعد يقول كلام اهبل ما فهمتش منه حاجه
هدايه/ ازاى يعني
حسام / بيقول ان معاه ورق يدينك انتى و مستر عدنان
هدايه / ورق ايه ده
حسام / ما اعرفش ما فهمتش اصلا ايه علاقه مستر عدنان باى حاجه دا راجل دوغرى ما لوش فى اللف و الدوران و كل شغله قانونى
هدايه / ما تشغلش بالك بالهبل ده حلاوه روح مش اكتر … انت بتعمل ايه هنا
حسام / فى لخبطه عندى فبراجع الازونات
هدايه / محتاج مساعده
حسام / شكرا شايلك للتقيله
هدايه تسيبه و تمشي و حسام يكمل تدوير فى الملفات
…………………
فى عياده النسا
نور بتعدل هدومها و تروح تقعد قدام الدكتوره
الدكتوره / التحاليل اللى قدامى بتقول ان فى تحسن كبير فى الحاله
نور/ يعني المرادى فى امل
الدكتوره / الامل فى ربنا بس انا رايي اننا نعمل المرادى حقن مجهرى افضل و هزرع اكتر من جنين عشان لو لا قدر الله حصل حاجه لواحد منهم التانين يسندونا لحد التاسع
نور / تمام
الدكتوره / الفتره الجايه عوزاكى تمشي على العلاج ده و الزياره الجايه هنحدد هنعمل العمليه امتى
نور / تمام يا دكتوره و بعتزر مره تانيه
الدكتوره / باذن الله المرادى الدنيا تكون احسن
نور / امين يا رب امين
نور تاخد شنطتها و تطلع من العياده تليفونها يرن ترد
نور / ايوه يا على ازيك
على / روحتى لوحدك برده مفيش سمعان كلام خالص
نور / يا حبيبي ما انت كنت مشغول
على / نور
نور / قالت استمرى على العلاج ما قالتش حاجه مهمه يعني
على / طب انتى فين دلوقت
نور / لسه خارجه من العياده هطلب اوبر و اروح
على / لا ما تروحيش هبعتلك لوكايشن تجيلى فيه
نور / لوكايشن ايه ده
على / اعتبريها مفاجاه
نور / على
على / حسيتك متنشنه جامد الفتره اللى فاتت قولت اعمل اللى عليا عشان لو فضلتى متنشنه بعد كدا يبقي العيب منك
نور / يا سلام
على / لا ما انا مش هسمحلك تجرجريني فى الكلام و اقولك المفاجاه اللى بقالى كام يوم بحضرلك فيها و دافع فيها دم دم قلبي
نور / شوقتنى قول بقي
على / انا هقفل عشان تطلبى الاوبر يلا سلام
على يقفل و نور تبص فى الموبايل يوصلها رساله تبتسم و تطلب اوبر
………………………
فى الشركه
حسام قاعد على مكتب فى الارشيف بيبص فى ورق هدايه تدخل
هدايه / هتبات هنا يعني قولى ضايع منك ايه و انا اساعدك
حسام / انت لقيت اللى بدور عليه خلاص
هدايه / طب الحمد لله
حسام يكمل تقليب فى الورق
هدايه / الناس كلها روحت
حسام / مش كلهم انتى لسه هنا اهو
هدايه / ما هانش عليا اروح و اسيبك
حسام / قلبك الطيب ده هو اللى جايبك ورا
هدايه/ ليك حق تتمسخر
حسام يقفل الملف و يقوم يرجعه مكانه
حسام / ابدا والله مش بتمسخر خالص بالعكس … انا خلصت و مروح تحبى اوصلك فى طريقي
هدايه / انا معايا عربيتي بس ما عنديش مانع ارميها و اركب معاك
حسام / هو عدنان ما اضايقش خالص لما شاف صورنا سوا كنت متوقع يرفدنى او يجازيني او اى غيره يعني خوف على مصلحه الشغل
هدايه/ ادايق طبعا بس انا عرفت اللمه قولتله حياتى الشخصيه ما خصك فيها
حسام / امال ايه اللى يخصه … تعرفى ايه الغريب
هدايه / ايه
حسام / ان الفرع اللى انفجر كان متامن عليه و ان فرع الشركه ده حصل فيه حريق قبل ما اتعين بسنه و برده كان متامن عليه
هدايه / ما طبيعي يكون متامن عليه دى لبنان يعني الحاجات دى بتحصل كتير ربنا ينجينا من الإرهاب و الارهابيين
حسام / اه طبعا
هدايه / انت بتدور فى الملفات القديمه ليه
حسام / مفيش انا كنت بدور على ملفات معينه فخدت بالى ان فى تواريخ ناقصه مع ان المكان مترتب ما شاء الله سالت قالولى ان حصل حريق هنا و فى جزء كبير من الملفات اتحرقت
هدايه / و بعدها دخلنا الكومبيوتر بشكل اكبر و غيرنا نظام الشركه خالص
حسام / ما دا اللى استغربته هو ده بالظبط اللى استغربته … منين شركه كبيره زى دى تكون لسه ماشيه بسيستم قديم زى ده
هدايه/ مهما كانت الشركه حديثه مفيش استغناء عن المستندات الورقية اذونات صرف فواتير استلام
حسام / ما الحاجات دى كلها كانت على الكومبيوتر فى الامارات
هدايه / و ما كنتش بتعرف تسرق هناك
حسام / اعوذ بالله انا اسرق !!
هدايه / يا راجل … بقولك ايه يا حسام ما كفايا لف و دوران لانى دوخت
حسام / سلامتك
هدايه / الله يسلمك يا حبيبي هات من الآخر
حسام / مش لما تجيبي انتى الاول
هدايه / مش فاهمه
حسام/ لا فاهمه كويس انتى بس اللى مش عاوزه تريحي و ترتاحى
هدايه / قولتلك مليون مره فى حاجات الاحسن انك ما تعرفهاش
حسام / تمام انا مروح عن اذنك
حسام يمشي و يسيب هدايه واقفه مضايقه
…………………….
امام فندق على النيل
عربيه تركن و نور تنزل منها تبص يمين و شمال و بعدين تطلع الموبايل و تتصل بعلى
نور / الو … انا وصلت
ثوانى و على يطلع من الفندق تروحله
على / اتاخرتى كدا ليه
نور / هو فى ايه بالظبط
على / تعالى
نور و على يدخلوا و يروحوا ناحيه اسانسير و نور عماله تبص فى كل حته بحماس الاطفال اول ما باب الاسانسير يتقفل
نور / ما تقول بقي احنا هنا ليه
على / انا خدت الولاد من مامتك وديتهم عند طنط منال و لما سالتنى ليه قولتلها عشان رايح انا و انتى مشوار مهم
نور / زمانها قاعده على اعصابها مستنيانا نروح
باب الاسانسير يتفتح على يمسك ايد نور و يروحوا سويت على يفتح الباب نور تدخل تلاقى بلالين و ورد و شموع نور تبص لعلى يروح يفتح الستاره فيو على النيل نور تروح تفتح التراس و تطلع تبص على يروح يفتح الدولاب و يطلع شنطه و يفتحها يطلع منها قميص نوم و بجامه و يعلق فستان فى كيس و بدله فى الدولاب نور تدخل
نور / انت بتعمل ايه
على / الساعه تمانيه فى عشا رومانسي على ضوء الشموع
باب الاوضه يخبط على يروح يفتح روم سيرفيس بيزق ترولى على ياخدها منه و يديله تيبس و يقفل الباب نور تروح تبص على يرفع الغطا من على الاكل جمبرى و كابوريا
على / الغدى
نور / انا لسه مش مستوعبه اللى بيحصل
على / شويه فسفور لزوم الجو يعني
نور / هههههههههههههه
على يروح يقفل الستاره نور تبصله يروح يلف ايديه حوالين وسطها و تتعلق فى رقبته بايديها و يبص فى عنيها
على / حسيت اننا فجاه نسينا اننا لسه عرسان و دخلنا فى جو كبير علينا قولت نهرب كام ساعه نفتكر فيهم اننا لسه عرسان
نور / المكان هنا شكله غالى اوى
على / مش اغلى من ضحكتك الحلوه دى
نور / الدكتوره قالت المرادى هتعمل حقن مجهرى و
على / شششششش بقولك عرسان جداد شهر عسل انا و انتى بس
نور تبتسم
على / انا جبتلك القميص اللى بحبه هاخد بجامتى المتواضعه و ادخل الحمام اغير .. جبتلك علبه المكياج الصغيره بتاعتك مع انك حلوه كدا بس قولت يمكن تحتاجيها
على يروح ياخد بجامته من على السرير و يدخل الحمام و نور تبص حواليها و هى مبتسمه
……………….
فى شقه ندى
حسام قاعد فى البلكونه بيبص فى اللاب ندى تدخل شايله صينيه عليها كيك و شاى
ندى / انا مش هعطلك بس الكيكه لسه طالعه من الفرن قولت اجبلك حتتين سخنين انت بتحبها كدا
حسام / انا بحب اى حاجه من ايدك
ندى تبتسم و تيجي تدخل حسام يمسك ايدها
حسام / حبيبه و عمى فين
ندى / بابا بيتفرج على مسرحيه و حبيبه نايمه
حسام يسيب ايدها
ندى / هسيبك تخلص شغلك لو احتجت اى حاجه ناديني
حسام تليفونه يرن رقم غريب
حسام / الو
ست / دكتور حسام زغلول ؟
حسام / ايوه مين
الست / انا فيروز مرته لرامى حسون
حسام / اهلا و سهلا اقدر اقدملك ايه
فيروز / ما بعرف ان كان وصلك الخبر و لا لا بس هم حاولوا يقتلوا رامى
حسام / ازاى و امتى دا انا كنت معاه امبارح
فيروز / النهرده الصبح اتنين رجال هجموا عليه فى الحمام و تشارعوا و بعدين واحد منهم خنقه بالزنار تبعيتو فقد الوعى فكروه مات الحمد لله و تركوه مرمى فى الارض هو هلا فى المشفى الحمد لله لساته عايش لحقوه
حسام / الحمد لله الحمد لله
فيروز / رامى تلفنلى لما فاق و خبرنى اعطيك اوراق مهمه
حسام / اوراق ايه دى
فيروز / والله ما بعرف شو فيها كل اللى اعرفه انه عطانى رقمك و قالى اكلمك و قال ان هيدى الاوراق راح تساعدك كتير فى القضيه انا بعرف رامى منيح رامى انسان محترم و بيخاف الله بعمره ما يسوى هيك اشيا
حسام / اكيد طبعا اقدر اقابلك فين
فيروز / انا ما بقدر اضهر و اسيب الاولاد لحالهم راح ابعتلك الاوراق على العنوان على الواتس تبعيتك مع واحده من رفقاتى
حسام / مسافه السكه و اكون عندك … مع السلامه
حسام يقفل و يجرى على الاوضه و ندى وراه تلاقيه بيلبس
ندى / خير فى ايه
حسام/ واحد زميلى فى الشغل اللى كنت بزوره امبارح نقلوه المستشفي و مراته كلمتنى
ندى / لا اله الا الله
حسام / انا مش هتاخر
ندى / خد بس بالك من نفسك
حسام ياخد الموبايل و المفاتيح و يمشي
………………..
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية سلف ودين)
2 تعليقات