رواية سلف ودين الفصل السادس والثلاثون 36 بقلم لولو محمد
رواية سلف ودين الجزء السادس والثلاثون
رواية سلف ودين البارت السادس والثلاثون
رواية سلف ودين الحلقة السادسة والثلاثون
ندى / ما ليش مزاج اروح تعال نروح السينما ايه رايك
مصطفى يمسك ايدها جامد
ندى / او نقعد فى كافيه او نشوف مطعم ناكل فيه تصدق انا جعانه اوى انا هشوف تاكس ثوانى
ندى تروح توقف تاكس يقف
ندى / فاضى ياسطى
الراجل/ على فين
ندى / بص انا هديك اللى انت عاوزه بس عاوزاك معايا طول اليوم قولت ايه
الراجل / اللى تؤمرى بيه
ندى / والدى زى ما انت شايف حالته الصحيه على قده و الدكتور قال محتاج تغير جو ممكن تساعدنى نفسحه و كدا و اللى انت عاوزه هتاخده ما تقلقش خالص
الراجل / تحت امرك يا ست الكل
الراجل ينزل و يساعد مصطفى يركب و يطبق الكرسى و يحطه فى شنطه العربيه و ندى تركب و يمشوا
……………………………..
فى شقه منال
جرس الباب يضرب على يروح يفتح يلاقى نور مبتسمه
على / اتفضلى
نور تدخل و شايله حبيبه و منال تطلع من المطبخ و شايله صينيه عليها كوبايتين شاى تحطها على الترابيزه و تروح تحضن منال
منال / بقى كدا يا وحشه ان ما كانش على ما تفكريش تجيلى
نور / والله يا طنط انتى ما عارفه انا الفتره اللى فاتت عامله ازاى ان ما كانتش فى الصيدليه ببقى قاعده مع حبيبه او عمى
على / اخباره ايه صحيح
نور / يعنى فى تحسن بسيط اوى بس ما يذكرش طمنى انت على أية
على / نفس الوضع تحسن ما يذكرش
منال/ انتوا الاتنين احمدوا ربنا على الاقل الحاله مش بتسوء
على / اكيد الحمد لله عندى خبر وحش
منال / يا ساتر يارب خير
على / سمر اتوفت النهرده
منال / لا اله الا الله
نور / يا حبيبتى يا أية ياترى هتستقبل الخبر ده ازاى دلوقت
على / والله نفس اللى قاله عمر اول ما سمع الخبر
منال / هى بس تفوق و بعدين يحلها حلال
نور / معاكى حق
منال / اخبار ندى ايه
نور / والله ما تعرفيلهاش حال بس غالبا كويسه حسام كتبلها الشقه باسمها و قايدلها صوابعه العشره شمع هى قالتله ان دى اخر فرصه ليه و هو بيحاول يستغلها كويس
منال / ربنا يهدى سرهم
نور / بس ما اعرفش ايه اللى حصل النهرده تعرف يا على انها راحت تشوف سمر النهرده
على / عارف شوفتها فى القسم
نور / بجد
على / اه كانت بتعيط على اخرها و غالبا الحوار اللى دار بينها و بين سمر مهم اوى خصوصا ان سمر ماتت بعديه علاطول
منال / تفتكر تكون قالتلها ايه
نور / ما اعرفش بس هى فعلا كانت متغيره اوى لما رجعت و بعدين لما طلعت تانى ما لقيتهاش و لقيت موبايلها مقفول
على / مش فاهم
نور / و لا انا و على فكره ندى الفتره دى ما تتفهمش لما تتكلم معاها تقول انها مش بتحب حسام بس بتديله فرصه عشان خاطر حبيبه لكن تشوفها معاه بوس ايادى و كلام عسل و دلع و خروجات و هدايا تقول دول قصه حب و لا بتاعه الافلام
منال / ربنا يهدى
نور / والله بقول كدا مدام هاديين و متفاهمين خلاص مليش دعوه
على / طب ما تجربى تكلميها كدا تطمنى عليها
نور / حاولت كتير يجى ستين مره غير متاح على العموم اهو
نور تطلع الموبايل و تحاول تانى غير متاح
نور / شوفت غير متاح
منال / ما يمكن فصل منها
نور / انا قولت كدا برضه
على / هو لو حسام وصلها هيطمنك ؟؟؟ حسام عارف ان تليفونها غير متاح و كدا صح
نور / اه عارف بس ما اعرش بقى هيكلمنى و لا لا
على / الله طب ما تكلميه تطمنى يا بنتى
نور / اوك
نور تتصل بحسام
نور / الو
حسام / فى اخبار يا بنتى رجعت
نور / لا انا خرجت انا و بيبو عند طنط منال فبطمن منك
حسام / انتى بتستعبطى يا نور يعنى اعرف منين انها روحت دلوقت و لا لا
نور تبتسم للى حواليها و تقوم تروح البلكونه
نور / انت بتزعقلى كدا ليه هو انا بشتغل عندك
حسام / انا اسف يا ستى بس قدرى موقفى
نور / و انا لو ما كنتش مقدره كنت اتصلت اطمن
حسام / بصى اقفلى اقفلى انا هتصل بماما على الله تفيدنى
نور / اوك
نور تقفل تلاقى على واقف وراها
على / فى اخبار
نور / لا بس لو فى جديد هيكلمنى
على يجى يمشى نور تمسك ايده
نور / على
على / نعم
نور / انت زعلان منى
على / لا
نور / والله يا على انا مليش اى دخل باللى حصل و انا بعترف ان حسام له اخطاء هو مش ملاك يعنى كلنا بنغلط
على / نور لو سمحتى خلاص اعتبريها فتره و عدت و انسى اى حاجه تمام
نور / يعنى …ياترى… هينفع نرجع زى زمان
على / مفيش حاجه بعيد عن ربنا
نور تبتسم و تدخل هى و على
…………………………………..
فى شقه تهانى
تهانى / انتى كمان جايه تغلطينى
امانى / حرام عليكى يا تهانى هى كانت عشره يوم
تهانى / كانت اللى كانت و كل واحد راح لحاله بقى
امانى / هو مش محمد عملك كل اللى انتى عوزاه و اخدتى الفلوس بدل الشبكه
تهانى / الشبكه اللى نقتها لبنتى حته حته و جرام جرام تلبسها ست الحسن و عوزانى اهدى
امانى / امال انا اعمل ايه دا انتى ادرى بيا منى قد ايه مش طيقاها دى مبهدلاه و مبهدلانا كلنا معاها
تهانى / احسن اللى يتلفح بالحيه يا اختى
امانى / دى خلت الواد يكتبلها الشقه بيع و شرى
تهانى / يا مصيبتى
امانى / هو اللى فيا دا شويه و مشغله نور عندها بالسخره تقعد بالبت شويه و تقعد بابوها شويه و الغندوره كل يوم فى مكان اشى كوافير اشى باديكير تفقع
تهانى / يلا هو اللى جابه لنفسه
امانى / امال حبيبه قلبى فين
تهانى / هتلاقيها فى اوضتها
امانى / ما تقسيش عليها يا تهانى البت
تهانى / بنتى و انا حره فيها اربيها زى ما انا عاوزه ماشى و ان كان ابنك ضحك عليها مره فانا مش هبله عشان اسيبها ينضحك عليها تانى
امانى / والله ما عارفه اقولك ايه عينى منك فى الارض
تهانى / البت غلطت اه بس عشان وثقت فى ابن عمها ما كانتش تعرف انه مسحورله و لا انه هيستوطى معاها كدا يلا منه لله
امانى / ما تدعيش على الواد اقسم بالله مظلوم العيب على الحربايه اللى مسخناه و ممشياه و انتى بنفسك قولتيها سحراله و مجرجراه قادره و تعملها
تليفون امانى يرن
امانى / دا حسام …. الو ازيك يا حبيبى
حسام / ازيك يا ماما بقولك هى ندى روحت و لا لسه
امانى / اوووووف و انا مالى انا لتكون فاكرنى السكرتيره بتاعتها
حسام / معلش يا ماما شوفيها بس عشان خاطرى عشان خاطرى
امانى / ما تكلمها ياخويا على الموبايل الغالى اللى جايبهولها
حسام / ماما مش وقته بالله عليكي٠،، يا ست الكل ريحينى و شوفيها بس
امانى / انا اصلا مش هناك انا عند عمتك براضيها الست مش طايقه تبص فى وشى من عمايلك السوده انت و الست بتاعتك
حسام / سلميلى عليها
امانى / و بعدين مالك كدا ملهوف على ايه ما تغور و لا تروح فى ستين داهيه تاخدها و تريحنا منها هى دى زوجه دى و لا تنفع حتى هو انا عمرى اقدر اكون فى مكان من غير علم ابوك دى فاجره بس اقول ايه انت اللى سايبلها الحبل على الغارب يا دلدول يا معفن
حسام / فى اى حاجه تانيه تحبى تقوليها و لا اقفل
امانى / اقفل يا خويا اقفل و اجرى اتسحل ورا السنيوره على الله نسمع خبرها قريب قادر يا كريم
حسام / سلام يا ماما
امانى / سلام يا حبيبى سلام
امانى تقفل و تنفخ
تهانى / ايه طفشت
امانى / من بقك لباب السما اياكش ننضف بقى من الارف ده يا باى تقيله على قلبى بشكل
تهانى / الخفيفه كانت عندك كنتى عملتيلها ايه
امانى / اخص عليكى يا تهانى لا والله اخص امال لو ما كانش كل حاجه على ايدك
تهانى /خلاص يا امانى فضيها سيره بقي انا هقوم اعملك شاى
امانى / لا كتر خيرك انا ماشيه سلام
تهانى / نورتى
امانى تقوم و تمشى و تهانى ما تقومش حتى توصلها للباب
……………………………..
فى كفايه
مصطفى يشاور لندى عاوز ينام
ندى / تعبت و لا ايه …. طيب ثوانى
ندى تقوم تفتح موبايلها يرن فى ساعتها ترد
ندى / الو
حسام / انتى فين
ندى / و انت مالك
حسام / اقسم بالله
ندى / ششششششششش اسكت خالص و اسمعنى عشان لو انا اتعصبت هقفل الموبايل و ارميه فى اقرب صفيحه زباله و ابقى قابلنى لو عرفتلى طريق جره
صمت
ندى / شاطر بتفهم ندى بتاعه زمان اللى كانت بتعيط جنب الحيطه خلاص انساها انا الايد اللى بتوجعنى بقطعها و لا يهمنى اصل عمرك ما هتاذى حبيبه مش عشان انت ابوها و لا حنيه الدنيا اللى بتشر من عنيك و لا عشان اى حاجه غير انك واثق و متاكد ان حبيبه هى الكارت الوحيد اللى فى ايدك عشان افضل معاك و انى لو مسكت عليك غلطه صغيره تخص حبيبه هتخسرنى نهائى تحب تخسرنى نهائى يا حسام
حسام / لا
ندى / اتفقنا نرجع بقى للاتفاق القديم انا ما بشتغلش عندك لا جريتك و لا خدامتك عاوز تعيش معايا بما يرضى الله تتعامل معايا بما يرضى الله لا فى بينا غش و لا كدب و لا تاليف و لا اى حركه من حركاتك الزباله انا عرفت الحقيقه و عرفت ان على ما كانلوش اى ذنب فى اللى حصل مش زى ما قولتلى
حسام / انتى فين يا ندى
ندى / هتعرف انا فين لما يجيلى مزاج اقولك انا فين دلوقت تعتزر عن اللى انت عملته و توعدنى انك زى الشاطر مش هتكرره تانى عشان اقسم بالله المره الجايه مش هكتفى بقرصه و دن يا حسام باشا المره الجايه هقطعهالك فاهم و لا لا
حسام / تعجبينى
ندى / انا اعجب المهم انا قدامى ساعه بالكتير اكون فى البيت الاقيك مستنينى مع حبيبه و عشوه حلوه و كادو لطيف كفايا ساعه و لا اتاخر شويه
حسام / كفايا اوى
ندى / اوك اتفقنا سلام
ندى تقفل و تشاور للسواق قاعد على ترابيزه تانيه و بياكل يروحلها جرى
ندى / بابا للاسف تعب كمل اكلك على ما احاسب عشان نروح
السواق / تحت امرك يا ست الكل
…………………………….
فى شقه منال
تليفون نور يرن
نور / عن اذنكوا ثوانى
نور تقوم البلكونه و ترد
نور / الو ايوه يا حسام خير فى جديد
حسام / هاتى بيبوا و على البيت
نور / اوك حاضر بس طمنى لقيت ندى
حسام / اه احنا فى طريقنا للبيت اهو
نور / طب الحمد لله انا هاجى اهو سلام
حسام / سلام
نور تقفل و تدخل جوه
نور / انا لازم اروح
على / فى اخبار عن ندى
نور / اه مروحين فانا هحصلهم على البيت بقى
على / ممكن اوصلك
نور / اوك مفيش مشكله
منال / بقولكوا ايه مش عشان اتصالحتوا تبيعونى الزياره دى مش محسوبه تكرروها
نور / اكيد سلام
على / ادعيلى
منال / ربنا يبعد عنكوا ولاد الحرام مع السلامه
…………………………..
فى المستشفى عند أية
غاده تقفل الكتاب و تنفخ
غاده / بصراحه ليكى حق ما تفوقيش لو دى نوعيه الحاجات اللى بيقراهالك ايه الملل ده دا انا نمت …. هيتجنن عليكى على فكره …. صحيح الدنيا دى ما لهاش كبير …. شوفى انتى مثلا فاكره لما كنتى بتقفى تعيطى قدام الكليه و عمر بيهزائك ما تعرفيش كان بيتكلم عنك ازاى قد ايه بيكرهك قد ايه مش طايقك شوفى دلوقت حتى بعد كل اللى حصل مش هاين عليه تقعدى لوحدك …. قال يعنى فارق معاكى …. انا اصلا مش شايفه مبرر انك تفوقى بصراحه هتفوقى تعملى ايه هتواجهى الناس و المجتمع هتقدرى تكملى مع عمر ازاى اصلا بعد اللى حصل …. ما تقوليش اللى اتكسر يتصلح كلو الا الشرف سورى يعنى تضمنى منين انك حتى لو بعد عشرين سنه ما تطلعش صورك و يتعاير بيها عيالك عادى بالنسبالك يعنى …. طب هتبررى موقفك بايه ان مامتك هى اللى عملت فيكى كدا دا عزر اقبح من ذنب على فكره … على فكره انا متعاطفه معاكى جدا بس دى الحقيقه عمر بيقاوح مش اكتر عشان ضميره ما يوجعوش خصوصا بعد ما حاولتى تنتحرى و انتى عارفه كويس ان عمر عنده مشكله مع الموضوع ده عبير الله يرحمها …. لكن تضمنى منين انه هيقدر يكمل حياته معاكى … هو اصلا ملوش ذنب فى كل ده هو اكتر واحد اتاذى … تفتكرى شكله ايه قدام الطلبه بتوعه او قدام زمايله فى الكليه او الشركه … الله يعينه بصراحه …
الباب يتفتح و عمر يدخل
عمر / اتاخرت عليكى انا اسف
غاده / ابدا ما اتاخرتش و لا حاجه
عمر / تسلمى انا مش عارف من غيرك كنت عملت ايه
غاده / ولا يهمك طمنى انت عليك
عمر / هموت و انام بصراحه
غاده / حقك الله يكون فى عونك على العموم انا همشى و هحاول اعدى عليك بكره لو فضيت
عمر / ادعيلى يا غاده
غاده / علاطول بدعيلك والله يا عمر ربنا يصبرك على اللى انت فيه و يعينك بجد موقف صعب
عمر يهز راسه غاده تشاورله و تمشى
عمر / عامله ايه يا حوبى وحشتينى ………اتاخرت عليكى معلش بس والله كان غصب عنى … بس انا مخاصمك كل ده سيبانى لوحدى هونت عليكى … ما صعبتش عليكى نومتى بعيد عنك مش عارف اخدك فى حضنى و ابوس راسك زى الاول … بتعاقبينى صح والله اتربيت و مش هعمل كدا تانى … سامحينى بقى و ارجعيلى انا بجد محتاجك اوى محتاجك و مكسور اوى من جوايا بسبب فراقنا ده
عمر يقوم و يفتح الكنبه سرير و يحط راسه و يبص لأية
عمر / تصبحى على خير يا قلبى
عمر يغمض عينه و ينام
……………………………………..
قدام عماره حسام
ندى تنزل من التاكس و السواق يعدل ابوها على الكرسى تديله فلوس مقفوله يعدها
ندى / مرضى
الراجل / الف شكر يا ست الكل
ندى / انا معايا رقمك و انت عرفت العنوان
الراجل / اربعه و عشرين ساعه حضرتك تؤمرينى بس
ندى / ميرسى مع السلامه
التاكس يطلع و حسام يركن مكانه و ينزل من العربيه و هو متنرفز على الاخر تبصله و تبتسم
حسام / كنتى فين
ندى / ايه ده ما لناش بيت نتكلم فيه و لا ايه
حسام / انتى عارفه انا قلقت عليكى ازاى انا كنت بدور عليكى فى الشوارع زى المجنون ما سبتش حته ممكن تروحيها
ندى تعدى ايدها بالراحه من على خد حسام
ندى / على اساس انى هبله هروح حته انت عارفها و لا حتى هعرفك كنت فين بص يا حسام اهدى كدا يا حبيبى … اهدى عشان مش كل مره هرجع ماشى
عربيه على تركن و على و نور ينزلوا نور شايله حبيبه حسام يشوف على يجرى عليه و يزقه
حسام / انت مصمم بقى موتك يبقى على ايدى
على يزقه بعيد عنه و ندى و نور يحوشوا
على / انت هتنسى نفسك و لا ايه
حسام / لو شوفتك جنب اختى او مراتى تانى هقتلك فاهم
نور/ انا اسفه اوى يا على لو سمحت امشى دلوقت
ندى / انت هتساعدنى اطلع بابا فوق و لا هتقف تتخانق و تفرج الناس علينا
حسام / انا قولتلك اخرج من حياتى خالص
على يركب العربيه و يمشى
نور / انت بتعمل كدا ليه هو الحق عليه انه وصلنى يعنى
حسام / و يوصلك بصفته ايه يعنى الكائن ده ما تكلميهوش تانى
نور / انت ملكش حكم عليا انت فاهم
نور تاخد حبيبه و تطلع و ندى واقفه مربعه ايديها و عنيها بتطق شرار حسام ينفخ و يزق كرسى مصطفى و يدخل العماره
………………….
فى شقه امانى
نور و حسام بيتخانقوا و ندى قاعده حاطه رجل على رجل و مصطفى قاعد على كرسيه
نور / انت بتتصرف بمنتهى الهمجيه
حسام / انا اخوكى الكبير و ادرى بمصلحتك
نور / انا مش صغيره و اعرف مصلحتى كويس و ياريت تفتكر ان بابا لسه عايشه و هو اللى مسؤل عنى مش انت
حسام / اسمعى الكلام بدل و الل
نور / هتعمل ايه رد قولى هتعمل ايه
الباب يتفتح و امانى تدخل
امانى / فى ايه يا ولاد صوتكوا جايب لاخر الشارع …. اهلا بالست الغندوره نورتى البيت يا اختى
ندى / ميرسى يا طنط دا نورك
حسام / كلمه و مش هعيدها لو الكلب اللى اسمه على قرب منك تانى سواء كلمتيه او قابلتيه ما حدش يلومنى على رده فعلى بقى بعد كدا مفهوم
نور / انا مش صغيره
حسام / انا ادرى بيه منك ابعدى عنه احسنلك
امانى / هو فى ايه يا حسام
نور / كنت عند طنط منال و على وصلنى ليه و ليه البيه لما شافه جرى عليه فى الشارع و حاول يضربه
امانى / معزور يا نور ما قدرش على الحمار قال يتشطر على البردعه
حسام / قصدك ايه بقى بالكلام ده
ندى / تقصد انك مش قادر عليا يعنى ففشيت غلك فعلى صح كدا يا طنط
امانى / صبرنى يارب
امانى تسيب المكان و تدخل جوه
حسام / ندى قومى نطلع شقتنا … و انتى اعملى حسابك لما بابا يرجع ليا كلام تانى معاه
نور / اعلى ما فى خيلك اركبه
نور تسيب المكان و تدخل اوضتها قبل ما حسام ياخد اى رد فعل ندى تقوم و تحط ايدها على كتف حسام
ندى / معلش معلش لكل جواد كبوه يلا يلا
ندى تشيل حبيبه و شنطتها و كيس العشا و تطلع و حسام واقف بيلف حوالين نفسه و هو بينفخ يبص يلاقى عمه مبتسمله اوى
حسام / فرحان فيا مش كدا ماشى ماشى
حسام يزق كرسى عمه و يطلع بره و يقفل الباب وراه
……………………………
فى شقه نهاد
البنت / انتى اتجننتى مصر ايه اللى تنزليها
نهاد / هو انا عملت جريمه انا هنزل مصر الفتره دى لحد ما ربنا يحلها من عنده و اخد فلوسى
البنت / يا بنتى مروان مش هيسيبك فى حالك
نهاد / انا مش عوزاكى تشيلى همى دلوقت انا كل اللى طلباه انك تشوفيلى اى صرفه اخلص بيها من ورطتى بتاعه الفلوس دى و ترجعوهالى ممكن
البنت / مش عارفه ارد عليكى بصراحه
نهاد / ما ترديش انا داخله اللم حاجتى عن اذنك
…………………………
فى شقه على
على يدخل يغير هدومه و لسه هيفرد ضهره تليفونه يرن يمسكه و يبص فتره طويله و يرد
على / الو
نور / ما كنتش ناوى ترد عيا صح
على / لا كنت هرد
نور / هو حقك بصراحه بعد اللى حصل انا بجد مش قادره افهم حسام ازاى بيتصرف بالطريقه دى دا عمره ما كان كدا
على / معلش حصل خير
نور / انا بتصل عشان اعتزر و على فكره انا اول ما بابا يجى هكلمه و اوعدك ان الموضوع ده مش هيتكرر تانى
على / لا الحقيقه هيتكرر كتير اوى
نور / انا بس مش فاهمه هو ليه بيكرهك اوى كدا
على / ههههههههههههههههههه انتى محتاجه اسباب اكتر من اللى حصلت عشان نكره بعض
نور / على فكره انت ما تعرفش حسام عشان كدا بتحكم عليه
على / لا لا تصرفاته هى اللى بتحكم عليه دا انسان مريض مكانه فى مستشفى المجانين مش وسطينا
نور / على فكره اللى بتتكلم عنه ده اخويا
على / بيتهيالى انتى اللى طلبتى انى ما اتعاملش معاكى على انه اخوكى
نور / لا انا طلبت انك ما تاخدنيش بذنبه
على / الله يعنى معترفه ان ليه ذنب اهو
نور / يا على احنا بشر كلنا بنغلط و هو بيعمل كل اللى يقدر عليه عشان يصلح اخطاءه انت مش متخيل هو بيعمل ايه لندى عشان بس تفضل معاه
على / واضح عمايله فعلا بدليل اللى حصل النهرده
نور / شوفت بقى انك ما تعرفش حاجه بص انا عارفه انك مش هتقدر تحكم بموضوعيه بس انا متاكده انك لو شوفت الموضوع من ناحيتى هتغير رايك ده نهائى و مش بعيد تتعاطف مع حسام
على / تصدقى نفسى عشان كدا هخلينى معاكى للاخر يمكن ربنا ينفخ فى صورتك و تقنعينى
نور / اتريق اتريق انا قولتلك انك ما تعرفش حاجه احنا اصلا زمان خالص بابا اتجوز ماما و سافروا بره من غير لا عفش و لا شقه و لا اى حاجه و قالوا لما يرجعوا يبقوا يفرشوا و كنا بننزل اجازه كل فين و فين فى بيت جدوا ده نقعد و نرجع نسافر تانى و عمى مصطفى كان متجوز مع باباه و عايش فى البيت و عمتى متجوزه فى بيتها بس لما كنا بننزل كنا بنقعد كلنا فى بيت جدوا فانا و ندى و حسام كنا تقريبا عايشين مع بعض طول الوقت طول ما احنا فى مصر المهم لما نزلنا اشترينا ارض اللى احنا عايشين فيها
على / نور انا مش بحاول اقاطعك بس ده ايه علاقته بحسام
نور / ما انا بوريك قد ايه احنا متعلقين ببعض احنا التلاته المهم لما اشترينا الارض دى كان حسام فى الكليه نزل قعد مع جدوا و كان عايش مع ندى فى البيت و فى الفتره دى حسام و ندى اتعلقوا ببعض اوى و كانوا اكتر من صحاب بس ظروف بابا فى الشغل بره باظت خالص و عملوله نهائى و نزلنا مصر و ما كانش البيت اتبنى و عشنا كلنا فى بيت جدوا اللى للاسف كانت صحته تعبت و محتاج عمليه و بابا الحمد لله اتكفل بيها كلها و بابا دخل فى اكتر من مشروع و خسر فبنى البيت بس ما اتبقاش فلوس يشطبه او يفرشه فى الوقت ده حسام كان اتخرج و سافر و بقى يبعت فلوس لبابا كل فتره يكمل البيت و قعد فتره طويله ما بينزلش و كان بيكلم ندى طول الوقت و حتى لما نزل اول مره اجازه كان جايب هدايا كتير اوى
على / نور الفجر هياذن على فكره
نور/ باختصار حسام عاش خمس سنين مع عمره كاملين مع ندى فى بيت واحد و سافر عشان يلم فلوس يبنى شقتهم سوا و كان بيكلمها علاطول و بيحبها
على / كان عندها قد ايه معلش فكرينى وقتها
نور / مش بالسن على فكره هو كان عايش ان دى مراته و على ما تكبر هيكون هو جهز نفسه كان بيربيها لنفسه
على / و لما نزل عمل ايه ضحك عليها مش كدا
نور / لا يا على حسام لما نزل اتقدم لعمى و اتجوزوا و سافرو
على / دا اللى حضرتك شوفتيه بس مش الحقيقه
نور / عارفه هو كمان قال الحقيقه بعدين اللى حصل ان حسام ما استحملش ان يكون فى حد غيره فى حياه ندى هو ما كانش نازل يتجوز هو كان نازل يخطبها و يجهز شقته عشان يتجوزوا لانها كانت مبنيه بس واقفه على التشطيب
على / و هى رفضت
نور / حط نفسك مكانه واحد بيحب واحده الحب دا كلو هيسيبها تروح منه بالبساطه دى هو دافع عن حبه بنلوم الناس اللى بتتحجج بالظروف عشان تفركش علاقات لكن حسام عمل المستحيل عشان يقهر الظروف دى و يوصل للى بيحبها
على / حتى لو غصب عنها
نور / اى واحده تتمنى يتعملها نص اللى حسام عمله لندى هو بس كان اسلوبه غلط هو نفسه قال هى نفسها قالت يمكن لو كان صبر عليها شويه و خدها بالتدريج كانت حبته لانه والله يتحب و كمان كان فى بينهم زكريات كتير اوى حلوه
على / بس ده ما حصلش
نور / ايوه غلط و دفع تمن غلطته
على / اللى هو ايه بقى معلش
نور / انه اتحرم منها يا على
على / انتى هتجننينى دا اتجوز من قبل حتى ما يطمن ان كانت ماتت و لا عايشه
نور / لا جوازه كان غصب عنه
على / والله
نور / بص جوازه حسام التانيه كانت ملعبكه و هو نفسه ادبس فيها و مليانه تفاصيل انا ما اقدرش احكيهالك لانها خاصه جدا بس والله جوازته التانيه كانت غصب عنه و اول ما ندى خيرته بينها و بين اروى اختار ندى فى ثانيه مع ان ده خسرنا علاقتنا بعمتى بس عملها اللى طلبته و صان كرامتها و مش بس كدا كتبلها الشقه بالعفش اللى هى عايشه فيها بيع و شرا و شبكه جديده و كل اللى بتطلبه بيعمله انا بنت يا على و بقولك مفيش بنت فى الدنيا ما تتمناش ربع اللى حسام بيعمله لندى و لعلمك برده هو مستعد يقدم اكتر هو بيحب
على / زى الدبه اللى قتلت صاحبها من حبها فيه
نور / كل حاجه مباحه فى الحب و الحرب يا على معروفه و مش انا اللى مالفاها
على / يعنى لو عرفتى فى يوم ان حد استغلك عشان يوصل لحبه ده هتقولى كل شئ مباح فى الحب و الحرب و لا هتزعلى
نور / انا واحده عشت سنين فاكره انى عايشه اجمل قصه حب هو صحيح ربنا ما اكرمنيش بالخلفه و دى سببت فى مشاكل كتير بس ما كانتش حاجه فى لحظه صفا بنا و كلمه حلوه منه لحد فى يوم لقيته بيتسحب منى و عرفت انه ما حبنيش هو كان كويس معايا بس ما استحملش يكون فيا عيب باعنى بالرخيص اوى باعنى عشان واحده سرقته و اتخلت عنه و هو فى امس الحاجه ليها
على / و فاق لغلطه و رجعلك ما سامحتهوش ليه زى ما بتطلبوا من ندى تسامح حسام هو مش بتقولى كل انسان بيغلط
نور / معاك بس حسام و هو بيراضى ندى قدم كتير و لسه مستعد يقدم حسام و هو بيغلط كانت نيته يحمى حبه مش يحقق رغباته حسام ما خانش ندى فى فرق كبير بين حسام و مروان
على / الفرق ان انتى مش الضحيه فى حاله حسام فسهل انك تلاقيله مبرر لكن فى حاله مروان الوجع وجعك انتى
نور/ تفتكر
على / لو الانسان من حقه يحارب عن حبه حتى لو اللى قدامه ما بيحبوش ليه ما حاربتيش عشان مروان ليه ما حاولتيش تكسبيه تانى
نور / حاولت فتره طويله جدا حاولت و حاولت اخرجها من حياتنا بس كل ما كنت بحاول كان بيتمسك بيها اكتر و تدخل فى حياتنا اكتر كان كل محاولاتى كانت فى مصلحتها هى فى الاخر
على / بس سابها فى الاخر و كان فى محنه و حاول يرجعلك و يصلح غلطه ليه ما اتمسكتيش بحبك و حاولتى مره تانيه
نور / عشان الحب بيموت يا على بيموت و هو ما عملش اى حاجه عشان يرجع الحب ده هو كل اللى عمله انه طلب نرجع ما حاولش يكسبنى من الاول او ينسينى اللى حصل
على / و هو حسام حاول مع ندى
نور / بيحاول اهو حسام لسه ما رجعش لندى و عمال يقدم و يقدم
على / لسه عند موقفى بتكايلى بمكيالين بصى يا نور مشكلتك انك بتنسى انى عارف كل حاجه عن القصتين مروان جالك و ندمان و عرض عليكى يكتبلك الشقه باسمك زى ما حسام عمل مع ندى بالظبط و وعدك انه مش هيعمل كدا تانى زى حسام بالظبط و لو كنتى اديتيله فرصه تانيه زى اللى ندى ادتها لحسام كان عملك اكتر من اللى حسام عمله لندى
نور / بس ندى و حسام فى بينهم حبيبه هتوفق بينهم هتجمعهم لو مش النهرده بكره
على / فى بينهم حبيبه دراع ندى اللى بيوجعها اللى حسام ماسكها منه صح
صمت
على / نور انا عارف ان صعب اوى تشوفى حقيقه اخوكى و عارف ان مستحيل هقدر اشوف الامور من عقله لانى ما اتعودتش اخد الحاجه بالغصب مهما كانت عينى فيها او بحبها او عاوزها بس انا كل اللى يهمنى فى الموضوع ان ندى تكون سعيده هى و حبيبه بس ما يبقاش كل اللى اتعمل و الناس اللى اتاذت من غير ذنب راحوا هدر و فى الاخر تيجى على حسابها انتى بتقولى اتربيتى مع ندى و بتحبيها حاولى زى ما بتدى اعزار لاخوكى تديها حاولى تحسى بيها انتوا ستات زى بعض و اخوات هى اولى بتعاطفك من حسام على فكره
نور / و مين قالك انى مش بعمل كدا والله انا بكلم حسام طول الوقت انه يراعى ربنا فى ندى و بقف مع ندى فى اى قرار بتاخده او مشوار بتروحه و بحاول اكون اخت بجد ليها
على / مش مطلوب منك اكتر من كدا
نور / ينهار ابيض احنا طولنا اوى
على / مش اول مره يعنى
نور / يا ترى هتبقى اخر مره
على / تفتكرى انها فكره كويسه اننا نكررها
نور / احنا ما بنعملش حاجه غلط و بعدين انا بابا و ماما عارفين حسام ما لوش كلمه عليا
على / خلاص سيبيها لله بقى سلام
نور / اوك سلام
………………………………………..
فى شقه حسام
ندى / حسام انا مرهقه و عاوزه انام كفايا بقى انت ما بتزهقش
حسام / انتى بتعملى كدا ليه انا عاوز افهم
ندى / بعمل ايه تفتكر انى هفضل لحد امتى مستسلمه لحوار هحرمك من حبيبه هاخد منك حبيبه تفتكر البعبع ده هيفضل شغال معايا لحد امتى
حسام / ندى انا بحبك و بخاف عليكى
ندى / يبقى تبين ده حوار الدكر الجاحد اللى هيكسرنى ده تنساه عشان انا مش هطاطى تانى لاى سبب حتى لو حبيبه حتى لو هتموتنى حتى لو على حساب ايه انا مش هطاطى تانى فهمت
حسام / انا اسف خلاص
ندى / خلاص و بعدين انت ايه اللى عملته فى الشارع ده دلوقت الشارع كلو هيتكلم عن اختك و اللى ما شفهاش و هى نازله من عربيه على هيشوفها بطل بقى حركات العيال دى
حسام / طب ريحينى و قوليلى كنتى فين عشان خاطرى عشان الشيطان ما يلعبش بعقلى ارجوكى ما تجننيش
ندى / انت غبى اوى يا حسام هكون فين يعنى هو انا ليا مكان اروحه هو انا ليا حد اللجاءله او ادارى عنده انا كنت بلف فى الشوارع زى العيل التايه
ندى تعيط
ندى / العيل اللى لا لاقيله اهل و لا بيت ضلمت الدنيا فى وشى و خلتنى اهج من الدنيا بما فيها حتى بنتى بعتها ارتاحت انت لما عملت فيا كدا ارتحت
حسام يحاول ياخدها فى حضنه تزقه
ندى / ايه المطلوب منى اعمله اكتر من اللى عملته قولى ايه المطلوب اعمله عشان اثبتلك انى بقيت بتاعتك و مستنيه اليوم اللى هتجيب الماذون فيه عشان نكتب الكتاب قولى اثبتلك ازاى و انا هثبت
حسام / حقك عليا والله انا من كتر حبى ليكى لما بشوف على جنبك بتجنن
ندى / طب انت قدرت تفرق بينى و بين على للابد هتعمل ايه فى نور هتقدر تبعدها عنه
حسام / نور مش صغيره و يوم و التانى هتفهم انه بيحاول ينتقم منى بيها
ندى / ايه ده هو انت ما تعرفش
حسام / ايه
ندى / على و نور يعرفوا بعض من قبل ما انا و انت ننزل مصر من قبل طلاقنا اتقابلوا عند الحجه منال جاره نور اللى هى فى نفس الوقت مرات الحج انور اللى مشغل على و كتبله كل املاكه
حسام / و ده ينفى يعنى استغل الموضوع ده عشان ينتقم مننا اننا اتجوزنا
ندى / خيالك سرح بيك اوى ناقص تقول ان هو اللى عرف مروان على نهاد عشان يطلق نور و يخلاله الجو و لا يمكن هو اللى بطريقه جهنميه خلى نور ما بتخلفش
حسام / مش وقت تريقه ماشى
ندى / على قطع علاقته بنور و نور فضلت مصممه انها تكمل العلاقه دى و تقريبا بتحبه
حسام يبصلها
ندى / دا ان ما كانش اكيد
حسام / دا على جثتى
ندى/ انا مش قادره بجد انا داخله انام ابقى خد الباب فى ايدك و انت نازل
ندى تسيب حسام و تدخل تقفل عليها الباب حسام ينزل و يقفل الباب
……………………………
تانى يوم الصبح فى المستشفى
فى ناس كتير ملمومه و على يدخل يجرى
على / فى ايه ايه اللى حصل
عمر / فاقت
على / بتتكلم جد قول وربنا
عمر / والله العظيم صحيت الصبح دخلت الحمام غيرت هدومى و روشت و روحت اصبح عليها لقيت عنيها مفتحه و بتبصلى ما قولكش بقيت اجرى فى كل حته زى المجنون
على / احمدك و اشكر فضلك يارب طب طمنى عملت هى ايه لما شافتك
عمر / ما عملتش حاجه و لا اى اندهاش كانت بتبصلى و ساكته و الدكاتره عندها جوه و مش عارف هيقولوا ايه بقى لما يطلعوا
على / لا باذن الله خير
عمر / هو انا هقولها ايه لو سالت عن امها ؟؟؟
الدكتور يطلع يجروا عليه
عمر / طمنى ايه الاخبار
الدكتور / الحمد لله كل المؤشرات بتقول ان مفيش مشاكل
عمر / الف حمد و شكر ليك يارب
الدكتور / بس احنا هنخليها هنا تحت الملاحظه لحد ما نتاكد انها بقت كويسه و كمان عشان الجروح و الكدمات اللى فى جسمها
عمر / ممكن اشوفها
الدكتور / اكيد
عمر يدخل يجرى يقعد جنب أية و على يقف عند الباب بيبص من بعيد و محرج يدخل
عمر / الف حمد الله على السلامه يا قلبى كدا تقلقينى عليكى كل ده حقك عليا حقك عليا
أية تبص حواليها و تبص لعمر تانى
عمر / على فكره على هو اللى نقلك المستشفى و انا جيتلك جرى اول ما عرفت اقسم بالله يا أية كانت لحظه شيطان اقسم بالله ما كنت اقصد اتخلى عنك
أية / هى ماما ما تعرفش ان انا هنا
على / أية انا عاوز اعتزرلك على اللى حصل انا ما قصدتش حاجه من اللى قولتها و اوعدك انى مش هكرر الموضوع ده و اوعدك ان اول ما تطلعى من هنا
أية تشاور لعلى يقف على يسكت
عمر / أية على نقل العفش من شقه بابا الله يرحمه لمخزن و خلى النقاشين يشتغلوا فى الشقه و بما انك قمتى بقى تحبى تختارى دهانات ايه لشقتنا
أية / امال ماما قاعده فين
عمر يبص لعلى
على / و بما ان الفستان جاهز و البدله جاهزه انا مش شايف اى سبب اننا ناجل الفرح اقفى بس على رجلك عشان نعمل احلى فرح فى التاريخ و هجيبلك الموبيليا جاهزه من مكان ما تحبى
أية تعيط و تمسح دموعها
عمر / أية انسى اللى حصل انسى كل اللى فات احنا هنبدا صفحه جديده فى حياتنا
أية / ما عادش ينفع
على / ما ترهقهاش يا عمر بالكلام ارتاحى انتى بس و قومى بالسلامه و اى حاجه تعوزيها هنفذها
أية / انا عاوزه اكلم ماما لو سمحتوا فى كلام كتير اوى بينى و بينها لازم يتقال
عمر / على ممكن تطلع بره ثوانى
على يبص لعمر و يطلع بره
عمر / أية انا مش عارف اقولك ايه بس مامتك لما عرفت اللى حصل
أية / ايه هربت ما قدرتش تستنى تطمن عليا ما فكرتش فيا
عمر / البقاء لله يا أية مامتك تعيشى انتى
أية تبص لعمر و الدموع ماليه عنيها
أية / امتى
عمر / امبارح
أية تعيط من غير صوت عمر يقوم يقعد جنبها على السرير و ياخدها فى حضنه تحط راسها على صدره و تغمض عنيها
…………………………………………
فى شقه امانى
محمد / انت اصلا مين اداك الحق تعمل حاجه زى دى
حسام / يا بابا دا انسان مش كويس و انا عارفه كويس صدقنى عارف الست اللى حاولت تقتلنى يا بابا دى تبقى مرات ابوه
محمد / انا عاوز افهم ايه اللى بينك و بين الناس دى اصلا عشان مش بس يحاولوا يقتلوك لا دول بيطاردوك فى كل حته
حسام / ما انا قولت لحضرتك قبل كدا انها تبقى مامه صاحبه ندى
محمد / ما هو ان كنت سكت المره اللى فاتت عشان قولتلى انك تعبان و الايام جريت ورا بعضها و انشغلنا انى هعديها النهرده خصوصا انك بتقول ان على ده بيحاول ياذى نور
امانى / لا يا محمد على ده احنا عارفينه من زمان ده معرفه الحجه منال
محمد / عارف يا امانى عشان كدا بفهم ايه وجهه نظر حسام بالظبط ليه الست دى حاولت تقتلك
حسام / اتخانقنا يا بابا اتخانقنا و شتمنا بعض و هى ست مجنونه اصلا قامت ماسكه السكينه و ضرباها فى كتفى
محمد / بالبساطه دى
حسام / حضرتك ما تعرفش غلاوه ندى عندهم دى كانت بتبات مع أية هناك و لما عرفت ان ندى هترجعلى حاولت تقنعنى انى اسيبها فى حالها كلمه منى كلمه منها قومنا فى بعض
امانى / يا خويا كنت سبت ندى و سمعت كلامها
محمد / يا امانى انتى بتظيطى و خلاص اصلا الحكايه دى مش مقنعه نهائى خصوصا ان الفتره اللى فاتت حواراتك كانت كلها كدب
حسام / المقنعه منها كانت كدب بس هى الحقيقه كدا للاسف مش شرط تكون منطقيه يعنى
محمد / طب هفرض انى مصدقك على بقى ايه علاقته بالموضوع
حسام / حضرتك مش شايف انها غريبه اوى ان على يدخل حياه نور بعد جوازى من ندى بفتره صغيره
امانى / والله ما فاهمه حاجه
محمد / انت بتقول ايه يا حسام يا ابنى انت نظريه المؤامره لحست مخك امك كانت مع نور و الاتنين اتقابلوا صدفه
حسام / و كلامه معاها فى التليفون بالساعات صدفه برده
امانى / اسمع يا حسام انا بنتى متربيه احسن تربيه و ما بتعملش حاجه من ورانا
حسام / يا ماما لو سمحتى افهمى حتى لو احنا ناس اوبن مايندد اللى زى ده مش هيبصلها كدا مش هيشوف نور الا واحده شمال بيتسلى معاها و بيها
محمد / يا حسام
حسام / يا بابا دا واد ملوش اهل ربايه شوارع ابوه رماه فى الشارع من زمان هو و اخوه اسالنى انا
امانى / الفقر مش عيب شاب عصامى بنى نفسه بنفسه و خلاص
حسام / لا بجد مفيش فايده من الكلام معاكوا
محمد / استنى يا حسام انت ممكن يكون ليك وجهه نظر برده
حسام / الحمد لله
امانى / و دى تطلع ايه ان شاء الله
محمد / ان كلام نور معاه لوقت طويل ممكن يخليه يفهم او يفسر العلاقه دى بشكل غلط و احنا فى مجتمع شرقى برده
امانى / ايوه بس
محمد / سبولى الموضوع ده انا هتكلم فيه مع نور
حسام / ياريت والله
امانى / والله ما عارفه الدنيا دى مخبيالنا ايه تانى
…………………………..
فى المستشفى
باب الاوضه يتفتح و غاده تدخل تلاقى أية نايمه نص نومه و سانده ضهرها على السرير تتنحلها
أية / ازيك يا غاده عامله ايه
عمر يطلع من الحمام غاده تبصله
عمر / اهلا غاده جيتى امتى
غاده / لسه واصله ايه المفاجاه الحلوه دى
عمر / اه احلى اصطباحه النهرده الصبح بجد مش قادر اوصفلك فرحتى …. على فكره يا أية غاده سهرت جنبك طول الليل امبارح
غاده / طبعا أية زى اختى بالظبط
أية / دا العشم برده
غاده تروح تسلم على أية و تبوسها
غاده / لا بسم الله ما شاء الله فرق شاسع بين النهرده و امبارح
عمر / اسمعى بقى يا ست غاده عشان تبقى اول المعازيم باذن الله الاسبوع الجاى فرحى على أية
غاده / بالسرعه دى
عمر / اتاجلت كتير
غاده / بس انت قولتلى ان الشقه اتبهدلت خالص
عمر / لا دى … على قال للمحامى يشوفلها بيعه و يشترى شقه فى حته تانيه و احنا هنتجوز فى شقه بابا الله يرحمه
غاده / اه منطقه حلوه بس هتلحقوا توضبوا و لا هتعيشوا فى العفش القديم و خلاص
عمر / لا انا و أية هنتجوز و نطلع شهر عسل فى الغردقه كنت واعد يويو بيه من زمان و على ما نرجع هيكون على ظبط كل حاجه
غاده تروح تقعد جنب أية
غاده / لا سورى بقى يا أية فى الموضوع ده تسالينى انا دا هيبقى بيتك و مملكتك ما ينفعش حد يفرشهالك على زوقه امال انتى روحتى فين يعنى
أية / ما هو على قال ان فى عمال فى الشقه دلوقت بيدوها وش معجون و جابولى كتالوجات انقى منها العفش و الديكورات و باذن الله على هيقف عليها لحد ما نرجع قدامه شهر بحاله
غاده / و هيلحق
أية / انتى شايله الهم اوى كدا ليه لو ما لحقش نمد شهر العسل شويه مش كدا يا عمر
عمر / كدا يا روح قلب عمر
غاده / و الكليه و الشركه
عمر / انا قررت ان مش هينفع اكمل فيهم الاتنين بشتت نفسى على الفاضى الفتره اللى فاتت ما كنتش مركز فى اى حاجه لا فى الكليه و لا فى الشركه و لا حتى فى رسالتى فعلى ايه بقى انا هفتح محل بابا الله يرحمه و اديره انا
غاده / بالبساطه دى ؟؟؟ اصلا قله تركيزك ما كانش بسبب الشركه و لا الجامعه كان بسبب المشاكل فى حياتك
أية / غاده غاده بصى انا مقدره انك بتعتبرى عمر اخ ليكى بس دى حياتنا انا و هو اتفقنا على اللى يريحنا
غاده / بس انتى كدا بتشجعيه يرمى مستقبله فى الزباله عشان ايه عشان يبقى جنبك و يرضيكى يعنى
عمر / فى ايه يا غاده ايه الاسلوب ده
غاده / فى مليون شاب يتمنى النعمه اللى انت بترفصها دى
عمر / و فى مليون شاب يتمنى يكون عنده زوجه و اولاد و شغل خاص لا ملتزم بحضور و انصراف و لا فى ديد لاينز ملزم بيها و تحت بيته براحته
غاده / مهو أية كدا كدا هتبقى فى تجاره و هتبقى معاك فى الجامعه
عمر / أية هتقدم انتساب
غاده / اه قول كدا بقى انتوا عاوزين تداروا من الناس اللى يعرفوكوا كلهم عشان الفضيحه بس ايه يضمنلك انك بعد ما تضحى بكل ده مش هيطلع حد فى منطقتكوا الجديده شاف الفيديوهات دى
عمر / اطلعى بره
أية / عمر
عمر / سمعتينى اطلعى بره
غاده / انت بتطردنى دى اخرتها بعد كل اللى قدمتهولك و عملته عشانك دى اخرتها
أية / هو ما يقصدش يا غاده يا عمر هى بس مصدومه و نوعا ما معاها حق
عمر / بيتهيالى انى اعرف مصلحتى احسن من اى حد تمام
غاده / انا ماشيه و انسى انك عرفتنى فى يوم من الايام و براحتك سلام
أية / غاده غاده استنى … ليه كدا يا عمر
عمر / ما اعرفش اللى حصل بقى
أية / بس هى معاها حق و انا قولتلك
عمر / ممكن بس تهدى انتى و ما تشغليش بالك باى حاجه
أية / بس هى معاها حق الهروب من اللى حصل مش هيحله
عمر / يا بنتى هو اللى هنعيده هنزيده ما انا قولتلك ان الفيديوهات دى اتشالت خالص و مباحث النت حذفتها هى و الصور و الاكونتات
أية / ما اعرفش بس ما افتكرش اللى حصل ده ممكن يموت او يتنسى
عمر / انسى يا أية مش عاوزك تفكرى فى حاجه غير انك تقومى من هنا عشان انا نومتى على الكنبه دى قطمتلى ضهرى ماشى
أية تبصله و تتنهد
…………………………..
فى شقه منال
على / ما هو انا مش فاهم تسهر تتكلم معايا طول الليل و الصبح ما تردش على تليفوناتى ايه الهبل ده هو لعب عيال
منال / يا ابنى يمكن نايمه نسيته فى البيت اى حاجه
على / هو انا هحب فيها فى التليفون دا انا كنت عاوزها تعرف ان أية فاقت مش اكتر
منال / خلاص اهدى و انا هكلمها
منال تجيب التليفون نور ترد من اول رنه
منال / الو ايوه يا قلبى ازيك
نور / الحمد لله تمام ازيك
منال / عندى ليكى خبر بمليون جنيه
نور / بجد اللحقينى بيه لحسن انا على اخرى
منال / أية فاقت فى المستشفى و انا بلبس وريحالها
نور / بجد انا فرحت مش هتصدقى قد ايه
منال / اكيد عشان كدا قولتلك
على يشاورلها تنفخ لا يشاورلها عشان خاطرى
منال / بقولك يا نور
نور / ايوه يا طنط اؤمرى
منال / احنا عاوزين نتجمع حوالين أية نحسسها انها مش لوحدها فكنا عاوزين نلم حبايبها كلهم جنبنا حاولى تجيبى ندى و حبيبه معاكى
نور /مش عارفه والله يا حجه
منال / مش انتى جايه برضه و لا ايه
نور / ما اعرفش هحاول بس اصل فى مشاكل فى البيت كدا لحد ما تهدى بصى انا هطلع لندى و احاول و هنشوف
منال /حاولى عشان خاطر البت اليتيمه الغلبانه دى
نور / اوك والله هحاول
منال / سلام يا روح قلبى
منال تقفل
على / قالتلك ايه
منال / زى ما انت قولت فى مشاكل فى البيت اكيد حسام عامل مشاكل للركب
على / كنت متاكد انه هيفش خلقه فيهم
منال / انت هتخبى على نور لحد امتى
على / مش هخبى انا عن نفسى هنسى ان كان فى اى حاجه بينى و بين ندى هى معاها حق وجودى فى حياتها مش هيجيبلها غير المشاكل
منال تبصله بحزن
على / كفايا اللى هى فيه ده و كمان ما اقدرش اجازف انه يحرمها من حبيبه او ياذيها باى شكل بسببى
منال / مده سبب اقوى انك تكون قريب منها خصوصا انها ما لهاش حد دلوقت
على / هعمل ايه بس يا حجه ما كلو على يدك
منال / انا متاكده انك لو قولت لنور الحقيقه هتساعدك
على / هو انا ما حكتلكيش على حوار امبارح مع نور نور متعاطفه جدا مع حسام و بتطلعله مبررات من تحت الارض
منال / اخوها برضه مش سهل عليها
على / و عشان كدا عازرها والله يا حجه
منال / بقولك ايه كفايا رغى يلا نروح نطمن على الغلبانه اللى فى المستشفى دى
على / يلا
………………………….
فى شقه ندى
ندى / صدقينى انا عاوزه اروح بس حسام مش هيسكت و انا مش هقدر عليه لوحدى
نور / ما انا هبقى معاكى
ندى / مش عارفه بصى هو عمى تحت
نور / اه
ندى / خلاص انزلى قوليله يلبس و يجى معانا
نور / انتى بتهزرى صح
ندى / بالعكس عمى لو جه معانا حسام مش هيقدر يتكلم قوليله ان صحبتى فاقت من الكومه و هى فى المستشفى و انا عاوزه اروح اطمن عليها
نور / و لو سالنى هى ليه دخلت فى الكومه دى هعمل ايه
ندى / كانوا سالوا لما روحنا المره اللى فاتت بصى انا هلبس و اللبس حبيبه و اجهز حاجه بابا جنبه على ما تقنعى عمى و كلمينى انزلك
نور / اوك تمام
نور تنزل تجرى و ندى تجرى على جوه
………………………….
فى المستشفى عند أية
منال / الف حمد الله على السلامه يا ست الكل
أية / الله يسلمك
منال / كدا يا بت توقعى قلوبنا كدا دا احنا كنا هنتجنن عليكى
عمر / عدت بقى يا حجه المهم انتى وعدتينا انك هتقفى مع أية فى الفرح و تسلميهالى بايدك
منال / امال دا انا هعملها حته حنه عندى فى الشقه و نلم البنات بقى و نظبطها
أية تبتسم
منال / يلا قومى بالسلامه لحسن الواد ده خلل هههههههههههههههههههه
عمر / بتقولى فيها
الباب يتفتح و ندى تدخل شايله حبيبه و وراها نور و باباها الكل يقف و ندى تروح تحضن أية
ندى / كل ده يا بنت اللذينه نشفتى دمى
أية / انا اسفه
ندى / ما كانتش غلطتك
أية / انا عوزاكى لوحدينا
ندى/ ازاى بس
نور تدخل تسلم على أية أية تسلم عليها
على / اتفضل يا حج اتفضل
محمد / الف سلامه يا بنتى
عمر / تشرب ايه يا حج
محمد / و لا اى حاجه
منال / ازاى يا حج محمد بس دا كفايا مجيتك عندنا النهرده
محمد / يبقى كبايه شاى لو امكن
عمر / انا هطلب من الكافيتريا حد يشرب حاجه
على / هات لكلو شاى و لا اقولك هات للبنات ينسون
نور /احسن برده ههههههههههههههههه
محمد يبص لنور تسكت
أية / لو سمحتوا انا عاوزه ندى فى كلمه لوحدينا ممكن على ما الشاى يجى تستنوا بره
الكل يبص لأية باستغراب و هى بتبلع ريقها و ندى متوتره
نور / هو من لقى صحابه نسى احبابه اليومين دول ماشى يا عم يلا يا جماعه
الكل يطلع بره و ندى تقعد جنب أية
أية / انتى بجد هتتجوزى الحيوان ده
ندى / ما قداميش حل تانى على الاقل عشان خاطر حبيبه
أية / دا مجرم هو اللى عمل فينا كدا ما ينفعش هياذيكى تانى
ندى / غصب عنى والله ما اقدرش و بعدين ما تخافيش انا المرادى مش متغميه زى المره اللى فاتت لا انا صحيالهم صحيالهم اوى كمان
أية / انا اسفه اوى يا ندى بجد حقيقى اسفه اوى كمان
ندى / انا هطلع انادى عمى لحسن يستعوقنا يزهق
أية تهز راسها تفتح الباب تلاقى عمر و محمد واقفين
عمر / ايه ده بالسرعه دى
ندى تبتسم يدخلوا يقعدوا
ندى / الله امال فين طنط و نور
محمد / طلعوا الكافيتريا فوق اصل الحجه عاوزه تتكلم مع نور فى كلمتين هى كمان
عمر / ههههههههههه و احنا ما حدش عاوز يكلمنا كلمتين احنا كمان و لا ايه
أية / امال على فين
عمر / نزل ينقل العربيه حد اتصل بيه و قاله انه سادد الطريق على عربيه تانيه اصله مدى رقمه للسايس المره اللى فاتت ما قولكش الراجل طلع يخبط على الاوض اوضه اوضه لحد ما وصلنا قولناله حرام تتعب نفسك اوى كدا و اديناله نمرنا
محمد / والله فكره جامده انا مره اتحبست بالعربيه ساعه و نص اتارى الست هانم صاحبه العربيه بتعمل شوبينج فى مول
عمر / بتبقى حركه بايخه اوى فعلا
محمد / حقيقه
………………………………….
فى الكافيتريا فوق
نور / بابا لو طلع الكافيتريا لاى سبب و شافنا بجد هيزعل منى اوى و انا مش متعوده انى ما اسمعش كلامه او اكسره
على / بس انا من حقى افهم ايه اللى جد من امبارح للنهرده
نور / بص الكلام ده انا مش مقتنعه بيه بس حسام اقنع بيه بابا النهرده الصبح
على / اللى هوه
نور / بص يا على هو بيقول ان مش معنى اننا عيله منفتحه و كدا ان كل الناس هتبصلنا كدا و ان اللى بعمله ده هياثر على سمعتى خصوصا يعنى انى … مطلقه و كدا
على / اللى هو ايه اللى بنعمله معلش مش واخد بالى
نور / انك توصلنى تتعامل معايا تكلمنى فى التليفون نتقابل فى اى مكان
على / اه فهمت
نور / هو انت ممكن تكون شايفنى بالطريقه دى بجد يا على
على / بتهزرى صح
…………………
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية سلف ودين)
تعليق واحد