رواية سلف ودين الفصل الخامس والسبعون 75 بقلم لولو محمد
رواية سلف ودين الجزء الخامس والسبعون
رواية سلف ودين البارت الخامس والسبعون
رواية سلف ودين الحلقة الخامسة والسبعون
الحلقه السابعه و ثلاثون
نور / تعال معايا خلى الدكتور يبص عليك
حسام / انا مش مجنون انتوا اللى عمالين تستفزوا فيا لما خرجتونى عن شعورى انتوا ايه ما بتحسوش
نور / يا حسام ندى محتاجه علاج و انت بتتصرف
حسام/ مش عاوزه تخدميني فى رقدتى ما تعذبينيش مش عاوزه تقفى جنبى فى مرضي ما ترمينيش فى مصحه نفسيه
نور / انا ما قولتش انى هحطك فى المصحه انا بس عاوزه اطمن عليك
حسام / انا كويس الحمد لله بصي يا نور انا عمرى ما هطلق ندى و انا حاليا الواصي عليها و على بنتى لو حضرتك حابه تساعدى اخوكى و بنته و ندى يبقي تتفضلي على اوضتك جوه و تلمى حاجه على بيه ترميهاله و تعيشي معايا
نور / انا مش ندى مش هتلوى دراعى عشان ما تحرمنيش من حبيبه
حسام / تمام يبقي ما ترجعيش تزعلى
نور / تمام
نور تيجي تشيل حبيبه حسام يمسك ايدها و يضغط عليها نور تبصله
حسام / المره الجايه هكسرهالك
محمد / هو مفيش احترام لوجودى خالص كدا
حسام / اتفرج عليا يمكن تتعلم ازاى تحمى عيالك فى اكتر وقت محتاجينك فيه
امانى / ما تستهدوا بالله يا جماعه ما تشميتوش الناس فينا الله بقولك ايه يا نور اخوكى تعبان مش كدا استنى على الاقل لما يقوم شويه بالسلامه
نور تبص لمحمد
حسام/ مش لو لسه شيفانى اخوها
نور / انت لو ما كنتش اخويا كنت حبستك
حسام / ما روحتوش تبلغوا عنى يعني
نور / لما انت حاولت تطلع ندى من المستشفي
حسام / انا مش واثق فى المكان ده انا كنت هنقلها مكان احسن
نور / حسام
حسام / انتى دخلتى فى نيتي يعني دا ايه دا يا ربى
امانى / يا ولاد الموضوع كله سوء تفاهم مش اكتر
نور / و على كان سوء تفاهم برده
حسام / لو ما كنتيش سعيده معاه ما كنتش سكت بس انتى كنتى مبسوطه و حتى الحاجات اللى كان بيعملها و كنا بنعترض عليها كنتى بتبقي فى صفه نسيتي كان بيعمل معايا ايه نسيتي كان بيكرهنى قد ايه و بعدين انا ما اتاخرتش عنك فى حاجه مفيش مشكله قابلتك الا اما كنت اول واحد يقف جنبك عمرى ما اتاخرت و لا استخسرت حصل و لا لا
نور / حصل
حسام / و فى الاخر بتبيعيني عشانه
نور / انا مش ببيعك انا بصلح الغلط اللى انت عملته
حسام / و الغلط ده ما يتصلحش الا انى اخسر بنتى مش كدا تبقي من غير اب و ام هو انا مش عاوز ندى تخرج من المصحه مش عاوزها تروح تفتكرى انا مبسوط باللى هى فيه بصيلى يا نور بصي لاخوكى على الكرسي ابو عجل شوفى انا عملت لعمى ايه و بصي لما جيت مكانه مين واقف جنبى كلكوا ما صدقتوا وقعت و كل واحد عاوز يعمل بطل على حسابى
نور / انا عمرى ما كنت اتخيل ان العلاقه بينا توصل لكدا
حسام / و انا اللى وصلتها يا نور انا
نور / انا يعني
حسام/ لا انا و لا انتى بس بايدنا نتفق نوصل لحل وسط
نور / تطلق ندى
حسام / و تجوزيها لعلى هو ده الحل للدرجادى بتحبيه لدرجه انك تلغينا كلنا عشانه حتى ندى تلغي رايها
نور / يتجوزوا ما يتجوزوش دا موضوع ما يخصنيش و لا يخصك
حسام / طب على الاقل تخف و بعدين نتكلم
نور / عمرها ما هتخف طول ما انت فى حياتها
امانى / يا اختى ما ترحمينا بقى انا سكتالك من الصبح
محمد / انت رعبت ندى اقنعتها انها لو سابتك هتحرمها من حبيبه
حسام / اقوم اسيبها انا عشان اثبتلها انى قال يعني كدا مش هحرمها من حبيبه انتوا عقلكوا صورلكوا كدا يعني
نور / و انت عقلك صورلك ايه بقي
حسام / طلقت ندى تقدرى ازاى تثبتيلها انى ما حرمتهاش من حبيبه
نور / هاخدهالها كل يوم المستشفي
حسام / ندى حاولت تقتل حبيبه
امانى / يا مصيبتى
حسام / ندى خطر على حبيبه
نور / انا هبقي موجوده ما تقلقش
حسام / تمام خديهالها كل يوم و لما تبقي ندى تخف نبقي نتكلم
نور / و انا اضمن منين انك
حسام / انا على كرسي بعجل يا نور انا ممكن اعمل ايه و انا حتى مش قادر اروح الحمام لوحدى
امانى / استهدى بالله يا بنتى و انت يا محمد انزل هات اخوك و خلونا نتلم عيله تانى
حسام/ و لما تبقي ندى تخف اوعدك يا نور انى مش هفكر فى حاجه الا مصلحتها و مصلحه حبيبه
نور تبص لمحمد و ترجع تبص لحسام مبتسم
فى شقه على تحت
أية / اقطع دراعى من هنا ان ما كانش بلفهم فوق
منال / اخوها يا أية و تعبان
أية / قولى ثعبان مش تعبان انا عارفه ربنا ما اخدوش ليه فى الحادقه و ريحنا من سمه و قرفه
على يقوم يدخل اوضه يلاقي ليلى ممدده جنب بيرين و بتلاعبها
على / قاعده لوحدك ليه
ليلى / اعمل ايه كل واحد فيكوا ليه همه قولت اخليني انا جنب القمر دى شويه
على يروح يقعد جنبها
ليلى / على قد ما كنت اتمنالك عروسه غير نور بس ما اقدرش انكر انى مضايقه من طلاقكوا
على / قدر الله و ما شاء فعل
ليلى / بس ان كنت رافضه نور قيراط فندى
على / ندى متجوزه
ليلى / بس اللى فهمته ان نور و ابوها بيحاولوا يطلقوها
على / هيخلصوها من حسام عشان يدبسوها فيا
ليلى / و انت يعيبك ايه
على / القرد فى عين امه غزال حضرتك اصلك ما عيشتيش معانا واحد شاف واحده و حبها و البنت كانت عيله مراهقه فحبته و اتعلقت بيه و هو ما حلتوش اى حاجه لا اب و لا ام و لا عيله و لا فلوس لو جالك عريس زى ده لبنتك هتوافقى
ليلى تبصله
على / انا لو كنت اب ما كنتش وافقت برده على فكره ما فيش اب يرضي يمرمط بنته كل اب بيبقي عاوز بنته عايشه مرتاحه و انا نفسي ما كنتش مرتاح عايش انا و اخويا فى اوضه فى شقه عمال عاملها صاحب المحل مساعده انسانيه و مرتبى يادوب مغطى مصاريفنا و بنحوش منه ملاليم و ابويا مش راضي يجي معايا اطلبها واخد فى ايدى صاحب الشغل و اخويا الصغير و مفيش فى جيبي جنيه تفتكرى فى اب ممكن يوافق عليا
ليلى / لا
على / و دا اللى حصل بس هى صغيره و عنديه فجوزوها غصب و لانها عنديه حاربت و قاومت بس مفيش فى ايدها حاجه خسرت الرحم و رماها بتنزف فى الصحرا و فى بطنها طفله جت الدنيا غصب هى بتتعذب لوحدها فى الغربه و انا ربنا فجاه كرمنى لحكمه يعلمها وحده و بقي معايا فلوس و ظروفى اتبدلت رجعت واحده تانيه عمرى ما هنسي ملامحها ندى اللى رجعت من السفر غير ندى اللى سافرت عيانه و وشها اصفر و الرعب مالى ملامحها عاوزه تربى بنتها و خايفه من اهلها و قال انا بقي اللى هعدل المايل ما انا بقي معايا الفلوس اهو مشكلتى اتحلت
ليلى تطبطب على على
على / اتفق مع مرات ابويا انهم يفرقوا بينا و راحت ندى و راحت أية فى الرجلين و عمر اضطر يسيب شغله اللى تعب عشانه سنين و كل اللى حواليا ادمروا و انا واقف اتفرج عاجز مش عارف اخد حقى لا بالقانون و لا بغيره اصلي هاذى ندى و هحرمها من ينتها فعندت و اتجوزت نور اخته
ليلى / كنت ناوى تنتقم يعني
على / لا … كنت ناوى انتقم منه اه لكن نور لا نور كنت اعرفها و ندى مسافره بالصدفه و كان فى بينا كيميا بس ندى كانت الحب فهمانى
ليلى / بس انت كنت سعيد مع نور
على / عشان نور كانت … نور كانت حاجه ما تتحكيش هى كمان كانت موجوعه زيي طيبه و الدنيا جايه عليها و عاوزه تعيش … حبيتها و نسيت نفسي
ليلى / بس ما نسيتش ندى
على يتنهد و يلاعب بيرين صاحيه فى الملاكوت
ليلى / كنت حاسه انك مخبى حاجه كنت حاسه ان فى حاجه بتحصل الكل فاهمها الا انا
على / قبل ما عبير
ليلى تبصله و الدموع تملا عنيهم
على / قالتلى انها … بتحب زميل ليها فى الكليه و عاوز يجي يتقدم
ليلى / اسكت
على / حاضر
ليلى تعيط على يحضنها ليلى تمسح دموعها و تبعد
ليلى / هو يس و نغم فين العيال دى اتظلموا جامد فى السفريه دى اوعى اما اقوم اللعب معاهم و لا اخدهم و ننزل نجيب حاجه حلوه من الكشك اللى تحت البيت و لا اى حاجه وسع كدا وسع
ليلى تطلع بره و على متابعها يمد ايده و يشيل بيرين أية تدخل
أية / انت هنا
على يقف
على / اسف تعالى خدى راحتك
أية / انا عاوزه اشوف ندى
على / بكره مفيش زياره دلوقت
أية / وعد
على / وعد
على يقوم يشيل بيرين لأية و يطلع بره و هى متبعاه
………………..
فى اوضه نور فوق
امانى / بقي فى واحده عاقله تعمل اللى انتى عملتيه ده بقي بتبقي ندى على اخوكى
نور ساكته
امانى / انا عملتلك ايه قصرت معاكى فى ايه
نور / حضرتك ما لكيش علاقه بالموضوع
امانى / امال بتقهريني ليه مش كفايا قهرتى على اخوكى اخوكى مش هيمشي تانى يا نور اخوكى عيان و الجرح ما لمش اخوكى خرج نفسه من المستشفي و هو تعبان عشان خايف منك
نور / منى انا
امانى / ايوه منك خايف تاذوه عاوز يروح عاوز يشوف ندى و حبيبه خايف تحرموه منها انا مش هعرف اغيرله على الجرح قلبي مش هيستحمل المنظر
نور تبص لامانى
امانى / طب اخوكى غلط … غلط ليه ما هو اى راجل مكانه مش هيشوف مراته فى حضن عاشيقها و يسكت
نور / ابنك سكت سكت و فكر و خطط و
امانى / ابنى كان بينتقم لشرفه واحد غيره كان قتلهم هم الاتنين
نور / طب ما هو قتلها يا ماما قتلها
امانى / اكيد ما كانش يقصد الحكايه توصل لكدا حبه ليكي و ليها منعه حبه ليكي منعه يتكلم و حبه ليها منعه انه يقتلها
نور / ندى تعبانه اوى يا ماما
امانى / و هو اخوكى اتاخر ما جرى معاكوا على المصحه اللى اخترتوها و مش بس كدا دا بيدور على مصحه تانيه احسن فى مصر و مش بخلان عليها من جنيه لالف
نور / ياريت المساله كانت فلوس ندى مرعوبه فاقده الثقه فى كل حاجه و كل الناس انتى لو شوفتيها
امانى / يا ستى ربنا يشفينا جميعا كل واحد فيه اللى مكفيه بس اخوكى كمان تعبان و مفيش حاجه هتخفف عنه غير لمتنا حواليه ما تفرقيناش اكتر ما احنا متفرقين … قومى يا بنتى بصي على اخوكى و طيبي خاطره بكلمتين النفسيه مهمه جدا لحالته قومى دا مهما كان اخوكى ما لكوش غير بعض
نور / بس انا
امانى / زعلانه منه حقك بس يا قلبي الغايه تبرر الوسيله و هو فى الاول و الاخر اخوكى مهما غلط مفيش حاجه هتغير ده وهو عمل كل ده عشان ايه مش عشان بيحبك انتى و ندى قومى يا ضنايه اطمنى على اخوكى قومى يا بنتى دا جبر الخواطر على الله و هو ما عندوش اغلى منك
نور تبص فى الارض و تهز راسها و تقوم
امانى / ربنا يهديكي يا بنتى و يبعد عنك ولاد الحرام
…………………….
فى اوضه يس
نغم / يعني احنا مش هنروح بيتنا تانى
على / لا يا قلبي طبعا انتى و يس اكيد هتروحوا و انا و ماما نور هنظبط المواعيد بس الفتره دى لحد ما خالتو ندى تخف هتفضلوا معايا فى شقه تيته ليلى
يس / بس انا تعبت كل يوم تودونا فى حته انا بحب اوضتى فيها لعبى و حاجتى
على يبصله بحزن
يس / انا اه بحب عمو عمر و تيته منال بس انا عاوز ارجع بيتي
على / هترجع يا حبيبي ان شاء الله و بعدين انا هجبلك حاجات زى اللى عندك بالظبط و احلى لما تبقي عندى تلعب بيها و لما تروح عند ماما نور ابقي اللعب بحاجتك القديمه
نغم / و هتجبلى انا كمان
على / هجبلك كل اللى انتى عوزاه بس تسمعى الكلام
نغم / انا بسمع الكلام
عمر يدخل
عمر / انا طلبت اكل لو حد جعان
على / ايه رايكوا ناكل دلوقت و بعدين ننزل نتمشي شويه و نتفسح و نغير جو شويه
نغم / انا كنت عاوزه اروح البحر
عمر / بكره ان شاء الله اوديكي البحر ايه رايك
نغم تبص لعلى
على / روحى مع تيته منال و تيته ليلى و عموا عمر
يس / يعنى حتى البحر مش هتيجي معانا
على / حقك عليا يا يس والله ورايا حاجات كتير اوى بس لو خلصت بدرى هاجيلكوا على البحر
نغم / طب و ماما نور
على/ بقولك ايه يا بت انتى انتى شكلك شبعانه و هتقعدى ترغى لحد ما الاكل يبرد
نغم / هههههههههههههههه
على / يلا يا ابنى ناكل انا واقع
عمر / انا شخصيا مش هسيب حاجه لحد هنسف الاكل كله
يس / انا اللى هنسفه
يس و نغم يجروا على بره
على / اعمل ايه يا عمر
عمر / كل حاجه بتبقي صعبه فى اولها واحده واحده هتظبط قوم كلك لقمه .. و قبل ما تصدعنى بماليش نفس و الهبل ده قوم اكل عيالك على الاقل يلا انا جعان
عمر يتحرك و على يتنهد و يقوم وراه
…………………..
فى اوضه حسام
حسام نايم فى السرير و حبيبه بتلعب جنبه و هو بيناولها اللعب و يلعب معاها و نور تدخل لابسه تروح تشيل حبيبه من جنبه
حسام / تفتكرى مش حاسه بغياب امها ؟ تفتكرى هنقدر نلهيها لحد امتى ؟
نور تبص لحسام
حسام / عاوزك تاخديني معاكى اشوف ندى
نور / ما افتكرش ان دى فكره كويسه عشانك على الاقل انت تعبان و محتاج ترتاح طلوعك و نزولك مش هتكون فكره كويسه انت لسه طالع من حادثه ربنا وحده اللى يعلم خرجت منها ازاى فاهدى بقي و ارتاح
حسام / هههههههههههههه اهدى بقي و ما تقرفناش
نور / انا ما قولتش كدا
حسام / احنا اصلا مش مصدقين انك نجيب كنت مت كنا ارتحنا
نور / الطريقه دى مش هتاكل معايا على فكره
حسام / انتى رايحه لندى دلوقت صح
نور / اه و هاخدلها حبيبه تشوفها و عشان زى ما قولت احنا مش هنقدر نلهيها عن امها
حسام / خديني معاكى ارجوكى
نور / مش هقدر … نزولك و طلوعك مش سهل و لو لقيت طريقه و ناس تساعدنى انت مش هتستحمل
حسام / هاخد مسكن
نور / و ندى هتستحمل تشوفك احنا بنحاول ننسيها
حسام/ تنسيها ايه تنسيها جوزها تنسيها ايه
نور / هو مفيش فايده ايه كلام الليل مدهون بذبده و لا ايه
امانى تدخل
امانى / فى ايه يا ولاد صوتكوا عالى ليه
حسام / عاوز اروح لندى انتوا وعدتونى اللى بيحصل ده ما يرضيش ربنا انا مش عيل صغير هتحبسونى هنا انا مش هسكت
جرس الباب يضرب
امانى / و دا مين اللى جايلنا هنا ده
نور / هروح افتح
حسام / هاتى حبيبه جنبى
نور / مش هخطفها هو فى ايه
نور تطلع بره تفتح الباب تلاقى منال و جنبها نغم
نور / كنت نزلالكوا اتفضلى يا طنط اتفضلى
منال / يزيد فضلك عامله ايه
نور / أية لبست
منال / اه لبست و واقفه فى الشارع مع ابوكى و قولت لعلى ما يروحش النهرده هياخد العيال يفسحهم و يوديهم البحر نفسيتهم بقت وحشه اوى
نور تبص لنغم
نغم / اشتريت ميوه جديد امبارح
نور / امال مش لبساه ليه كنت شوفته
نغم / لبساه تحت الهدوم
امانى تطلع من جوه
امانى / الله انتوا واقفين كدا ليه
منال / كنت عوزاكى فى كلمتين بس لما نور تنزل عشان باباها مستنيها تحت
امانى / تحت امرك يا حبيبتى اتفضلي
نور / طب عن اذنكوا انا … يلا يا نغم
نور تمشي و تقفل الباب وراها حسام ينادى من جوه
حسام / ماما … نور
امانى / ثوانى جايه
حسام / خلى نور تستنانى
امانى / هتنزل تلبس نغم و جايه ما تخافش … اقعدى يا ست منال اقعدى
صوت حسام / يا ماما يا ماما
منال / بصي عشان انا مش عاوزه اعطلك دول ايجار الشقه اللى تحت اللى دفعه الدكتور حسام
صوت حسام / يا ماما
امانى / انتى بتقولى ايه بس يا ست الكل بقي ده يصح برده
منال / قدر الله و ما شاء فعل
امانى / طب والله ازعل
حسام / يا ماما يا ماما بقي الله هو فى ايه
منال / روحيله هو محتاجلك عن اذنك
امانى / والله انا وشي منك فى الارض
منال / ربنا يعينك و يصبرك عن اذنك
منال تنزل و امانى تقفل الباب حسام يحاول يطلع بالكرسي
امانى / انت بتعمل ايه
حسام / فاكريني عيل صغير فاكرين هتضحكوا عليا انتوا ايه حابسيني انا فين هنا انا فين
امانى / جرا ايه يا حسام كل ده ليه عشان خايفين عليك و عاوزينك ترتاح
حسام / انا مش عاوز ارتاح انتوا هتحجروا عليا انا كبير كفايا انى اعرف مصلحتى
امانى / و مصلحتك ايه بقي انك تنقلب على السلم بالبجامه فى حد عاقل يعمل كدا
حسام / انا مجنون مش ده اللى انتوا عاوزينه انى اتجنن انا مجنون سيبونى فى حالى بقي عاوز اروح لندى
امانى / ندى ندى ندى عليك عفريت اسمه ندى بقولك ايه انا مش عاوزه اسمع اسم البنت دى تانى انت فاهم و لا لا
حسام / ليه بقي ان شاء الله هتخرسيني كمان هتحبسونى و تتحكموا فى حياتى و تخرسونى كمان ان اعمل اللى انا عاوزه و اقول اللى انا عاوزه و دلوقت هثبتلك انى مش عاجز
حسام يطلع الموبايل امانى تاخده منه
امانى / انت ازاى تكلمنى بالطريقه دى
حسام / هاتى الموبايل
امانى / مفيش موبايل و مفيش ندى و بطل حركات العيال دى تعبتنى
امانى تحاول تزق كرسي حسام لجوه يفضل يقاوم لحد ما يقلب الكرسي فى الارض
امانى / يووووه بقي انت بتعمل كدا ليه بتعمل معايا كدا ليه انا امك
حسام / و انا ابنك بتقهريني ليه بتعجزيني ليه انا مش هتحبس فى الاوضه انا هنزل بالزوق بالعافيه هنزل انتى فاهمه هنزل يعني هنزل
امانى / ما انتش نازل يا حسام و خليك فى الارض كدا لما يبانلك صاحب و ان كنت دلعتك و انت صغير فماحدش بيكبر على الربايه
حسام / يا سلام
امانى / هتشوف
امانى تشد الكرسي حسام يمسك الكرسي و هى تشد و هو يشد امانى تتنطر فى الارض دماغها تتخبط فى الترابيزه تجيب دم
امانى / ااااااه كدا يا حسام كدا امك قلبي و ربى غضبانين عليك قلبي و ربى غضبانين عليك يا حسام يا ابن بطنى قلبي و ربى غضبانين عليك
امانى تقوم و تفتح الباب و تنزل و ترزع الباب وراها و حسام يعدل الكرسي و يحاول يقعد عليه ما يعرفش جسمه مش قادر من الوجع يحاول يزحف بايد واحده للاوضه و يشد كيس الدوا من الكومدينو و يعانى عشان يطول كبايه المايه تقع تتكب يصرخ
حسام / هو فى ايه كلكوا عليا و لا ايه
حسام يحاول يزحف بره يتعب و ينام فى الارض و يزعق و هو بيحاول يزحف
حسام / دى اخرتها يعنى كلكوا تسيبونى لوحدى كدا … سيبونى … سيبونى لوحدى ما انا طول عمرى لوحدى حسام ده مجرد محفظه بنك سافر يا حسام عشان تجيب فلوس ما تنزلش عشان تحوش فلوس احرم نفسك عشان تبعت فلوس يا ماماااا … حد سامعنى … عاوز اخد الدوا … مش طايل المايه … حد سامعنى … ماماااا… يا ناس يالي تحت … ايه صحرا … ما حدش سامعنى خالص يعني … ايه العجل وقع و لا ايه
حسام يوصل للمطبخ بمعاناه و النور مطفى و هو نايم على بطنه يتحرك ناحيه التلاجه يفتحها و يشد ازازه يضحك و هو مبسوط
حسام / ههههههههههه مش حسام زغلول اللى يتحوج يا ولاد الكلب
حسام يعدل نفسه و يسند على التقفيل و ياخد الدوا
حسام / بكره افوقلكوا يا ولاد الكلب والله لدفعكوا تمن وجعى ده غالي اوى و بكره تشوفوا
حسام يقلب فى الكيس و يطلع المهدئ
حسام / افوقلكوا بس حاضر حاضر
حسام يطلع حبايتين و ياخدهم
…………………………
فى المستشفي
منال / ما تقلقيش يا اختى ان شاء الله خير
نور تدخل و وراها محمد
نور / فى ايه يا ماما مالك مين اللى عمل فيكي كدا
امانى / اقولك ايه بس دا مش حسام ابنى ابدا دا كانه ملبوس انتى نزلتى من هنا و اتهبل و انا لوحدى ما قدرتش عليه فجاه لقيت الدم بيبك من دماغى نزلت استنجدت بالحجه منال الحمد لله كانت لسه فى البيت كنت احتست انا بطولى ما ليش حد
محمد / و ما كلمتينيش ليه كنت رجعتله
امانى / و هو كان فارق معاك اصلا اهو لوحده فى البيت اهو روحله روح عقله بكلمتين يمكن تقدر انت عليه
نور / معقول سبتوه فى البيت لوحده روحله يا بابا بسرعه ليكون محتاج حاجه
محمد / لو محتاج حاجه اكيد هيتصل
امانى / يا قلبك يا راجل انت اب انت دا ابنك اتجنن لما بنته بعدت عنه و انت سايب ابنك المشلول لوحده فى البيت كدا
محمد / تصدقى انى غلطان انى جيت اطمن عليكى انا ماشي
امانى / لا يا خويا كتر خيرك على العموم انا مروحه اللحق انت ست ندى قبل ما الخانكه تقفل و ما تعرفوش تطمنوا عليها
منال / امال أية فين
محمد / ركبت تاكس و راحت المستشفي لندى ما رضيتش ترجع معانا و لا رضيت اروحها
امانى/ تيجى معاك دا ايه انت عاوز تنقطنى بقولكوا ايه انا الحمد لله بقيت كويسه هروح بلا وجع قلب
منال / استنى اجى معاكى اوصلك
امانى / كتر خيرك اصيله و بنت اصول هى ديما كدا تيجي من الغريب و ما تجيش من القريب بس انا مش عاوزه اعطلك كفايا ضيعتي خروجتك عشانى
نور / هو حضرتك ما روحتيش مع الولاد البحر ليه صحيح فى حاجه حصلت
امانى / بختى و قسمتى كان مين هيلحقنى ساعتها
منال / بصراحه اخوكى كان صوته عالى اوى قولتلهم يسبقونى و فضلت قاعده و فعلا معداش وقت و نزلتلى بالمنظر ده
امانى / فيكي الخير يا اختى بنادمه و بتحسي
محمد / طب الحمد لله مش خلصنا نمشي بقي و لا نفضل واقفين نضيع وقت و نرمى كلام و خلاص
امانى / و هو انت بيحوق فيك كلام
منال / حسام لوحده فى البيت يلا لحسن تتاخرى عليه
امانى / شوفى انا زعلانه منه بس نقول ايه ما لوش غيرى اصل اكيد ابوه واخته اللى ما لوش غيرها هيروحوا لندى و يسيبوه
نور / هنجيب حبيبه من أية و نرجعله
امانى / يا مصيبتي سبتوا البت مع المجنونه بنت المجنونه دى
محمد / و انتى كنتى واخده بالك اصلا ان البت مش معانا يلا يا نور دى هتنقطنى
محمد يمشي
امانى / و هو انت بيحوق فيك حاجه داهيه تاخدك
نور و منال يبصوا لبعض و الكل يمشي
…………………….
فى شقه حسام
حسام قاعد فى المطبخ فجاه يسمع صوت ضحك
حسام / مين … مين
مصطفى يدخل هو و أية و مصطفى على رجله بيضحكوا حسام يبصلهم باستغراب
حسام / انتوا … انت … انت بتمشى !!
مصطفى / امال انت فاكر ايه يا مغفل هههههههههههههه
أية / مش تباركله النهرده فرح بنته
حسام / دى تهيات من العلاج مجرد تهيات من الحبوب انتوا مش بجد الباب مقفول و انتوا ما تقدروش تدخلوا و انت مشلول انتوا مش بجد
أية / المشلول الحقيقي هو انت و احنا
مصطفى / احنا نقدر ندخل و نخرج زى ما احنا عاوزين انما انت انت هتفضل مرمى فى الارض هنا لما الدود ياكلك
أية / و ندى هتتجوز على
حسام / لا
أية / و انت ما حدش هيفتكرك اصلا كانك ما كنتش موجود
حسام / ندى مراتى انا ما طلقتهاش و مش هطلقها
أية / ههههههههههههه
مصطفى / ههههههههههههههه
أية / هههههههههههههههه
حسام / انتوا بتضحكوا علي ايه بتضحكوا على ايه ندى مراتى ندى مراتى انا
على يدخل
على / جرا ايه يا جماعه كدا هنتاخر
حسام / انتوا مش بجد انتوا اوهام فى دماغى
على يوطى على حسام
على / الوهم الحقيقي ان اللى انكسر ممكن يتصلح و انت انكسرت يا حسام انكسرت و مش هتقوملك قومه تانى
مصطفى / هتفضل مرمى فى الارض لما الدود ياكلك الدود هياكلك يا حسام الدود هياكلك ههههههههههههههههه
صوت نور / على … على
حسام يصرخ / نور نور
نور تدخل
نور / اتاخرنا يا جماعه زمان ندى جهزت فى الكوافير
حسام / نور ساعديني
نور / جرا ايه يا حسام انت لسه ما لبستش … ايه الريحه دى
أية / شكله عملها على روحه
نور / لا انا مش فاضيه اغيرلك خليك بقي لحد ما نرجع ماما تبقي تتصرف معاك
حسام / انتوا مش بجد انتوا مش حقيقين انتوا اوهام فى خيالى
أية / هههههههههههه يا حرام دا اتجنن على الاخر
مصطفى / ارموه فى مستشفي المجانين
حسام / انتوا مش حقيقيين انتوا مش بجد انتوا انتوا
على / يلا يا جماعه مفيش وقت
أية / يلا يا ابو حبيبه
حسام / حبيبه بنتى انا بنتى انا انا ابو حبيبه
الكل يمشي
حسام / ندى مراتى انا حبيبه بنتى انا نور يا نور يا نور انا اخوكى يا نور يا نور يا نور
حسام يمسك دماغه
حسام / لاااااا انتوا مش بجد انتوا اوهام فى دماغى عمى مشلول و ندى مراتى و أية منقبه و نور عمرها ما تبيعنى و على عمره ما هيتجوز ندى ندى مراتى حبيبه بنتى بنتى انا ندى مراتى انا انتوا مش بجد ايوه انا مش بتاع كفته انا عارف الدوا انتوا مش بجد مش بجد
حسام يفتح الدوا و ياخد حبايتين كمان
حسام / انا لازم اهدى لازم اهدى قبل ما حد يدخل عليا و يفتكرونى مجنون ما حدش فيهم بيحبنى و لا هيسال عنى هيرمونى فى اعفن مصحه و لا هيسالوا عنى … ايوه كلهم بيكرهونى كلهم بيحقدوا عليا انا احسن منهم كلهم كلهم بيحقدوا عليا عشان كدا لازم اهدى
حسام يفتح و ياخد حبايتين كمان
حسام / مش هشمتكوا فيا يا ولاد الكلب مش هنولهالكوا يا
حسام وشه يزرق و يبدا يعانى انه ياخد نفسه و يتشنج يحاول يزحف ناحيه الحوض و يسند على البوتجاز باب الفرن يتفتح و حسام ايديه تحرك زراير البوتجاز و حسام يقع فى الارض و هو بيتشنج
…………………
قدام البيت
امانى / يا راجل خلى عندك دم و اطلع اطمن على ابنك
محمد / ما قولنا هجيب البت و اجى الله
منال / طب هستاذنكوا انا بقي هروح للاولاد على البحر زمانهم محتاسين ما شاء الله بالعيال
نور / هنجيب أية و ابقي اجى اللعب مع الاولاد شويه
امانى / يا اختى كميله كركر
الكل يبصلها
امانى / هتسيبي اخوكى و تروحى تلعبى مع طليقك عشنا و شوفنا
محمد / قالت العيال
امانى / ليكونوا عيالها بصحيح و انا مش واخده بالى
منال / عن اذنكوا انا عشان ما اتاخرش
منال تبص لنور و تمشي
نور / تمام يا ماما اطلعى حضرتك و انا هجيب حبيبه و اجيلك مش هروح البحر
امانى / ماشي هستناكى
نور تبتسم امانى تطلع محمد و نور يركبوا و محمد يسوق و يمشي
…………………….
فى المستشفي عند ندى
ندى بتلاعب حبيبه و بيضحكوا و أية بتكلمها و ندى مش مركزه
أية / على و نور أطلقوا و حسام عمل حادثه و اتشل ربنا جابلك حقك منه اتشل زى ما شل ابوكى
ندى / انتى قلب ماما وحشتيني
أية / ما عادش يقدر يهددك و لا ياذيكي بعد كدا دا حتى ما عادش بيقدر يدخل الحمام لوحده
ندى بتلاعب حبيبه
أية / لما تخرجى من هنا ارفعى قضيه خلع و اخلصي منه و ما تخافيش نور و عمك فى صفك ما هو طلق العقربه مراته خلاص يا ندى خلاص حقنا راجع خلاص
ندى / اجبلك عصير انتى ما شربتيش حاجه هنا خالص
أية / عصير ايه انا بكلمك فى ايه و انتى بتتكلمى فى ايه
ندى / هى نور زعلانه منى
أية / ابدا دى حتى كانت جايه معايا بس امها اتصلت بيها من المستشفي دماغها اتفتحت و اتحداكى ان لقوا جواها مخ اساسا و لا حتى نزلت نقطه دم واحده
ندى / شششش حسام يزعل ما تتكلميش كدا على مامته
أية / ما يزعل و لا يتحرق بجاز اكتر ما هو محروق اشوفه والع يارب اشوفه
ندى / بس بس انتى ايه خلاص قلبك مات مش خايفه على نفسك خافى عليا ان كان عمر هيحميكي انا ما عنديش اللى يحميني
أية / الحامى هو الله و هباب البرك ده خلاص شوكته اتكسرت
ندى / انتى ما تعرفيهوش دا تلاقيه على سرح بيكي تانى عادته و لا هيشتريها
أية / يلاهوى بعد كل اللى قولته ده
ندى / انتى تعرفى حسام قدى انا اصلا مش فاهمه هو انا عملت ايه تانى زعله اوى كدا دا كان ما بيقدرش على بعدى انا عملتله كل الحاجات اللى بيحبها
أية / يا حبيبتي حسام اتشل حسام عمل حادثه كبيره و نجى منها باعجوبه لجل بختنا المنيل مش كان مات و خلصنا
ندى / انا مش عاوزه اموت دلوقت يا أية مين هيربى حبيبه
أية / يا حبيبتي طوله العمر ليكي انا بتكلم عن حسام
ندى / حسام عمره ما هيموت و يسبنى هياخدنى معاه فهمتى و لا لا
أية / هم بيدوكى ادويه ايه هنا شكلها مضروبه
ندى / كلميه يا أية عشان خاطرى عارفه انك زعلانه منه بس انا محتاجاكى كلميه و قوليله انه وحشنى اوى و انى بخاف و انا هنا لوحدى قوليله انى بحبه اوى
أية / نعم يعني فى ايه
ندى / هتكلميه صح
أية / اكلم مين ؟و اقوله ايه ؟ حسام !! و اقوله انك بتحبيه انتى عاوزه تنقطيني
ندى / عشان خاطرى يا أية عشان خاطرى
الدكتور يدخل إية تنزل النقاب
ندى / لسه بدرى
الدكتور / مدام أية وراها مواعيد تانيه
ندى / طب سيب حبيبه معايا النهرده
الدكتور / احنا اتكلمنا النهرده فى الموضوع ده على فكره
ندى / طب هتكلملى حسام
الدكتور / كلمته و قال فى الطريق لما يطمن ان مدام أية و حبيبه روحوا بالسلامه هيجي بنفسه ممكن بقي ترتاحى دلوقت و تاخدى العلاج بتاعك
ندى تبص لأية و تبص للدكتور و تمد ايدها تاخد العلاج أية تشيل حبيبه
ندى / خليكي لحد ما انام
أية / انا هنا اهو … هى هتفضل كدا لحد امتى
الدكتور / على فكره الحاله بتتحسن بسرعه ما شاء الله و بشكل ملحوظ الدافع انها تروح لبنتها بيخليها تواجه خوفها و تسيطر على نفسها
أية / بس دى لسه بتخاف من حسام و مش عاوزه تقتنع ان الموضوع انتهى خلاص
الدكتور / انا ما قولتش الحاله خفت انا قولت بتتحسن
أية تبص على ندى نايمه
أية / على فكره اسمها ندى احسن كتير من الحاله الحاله الحاله
الدكتور يبتسم أية تهز راسها و تمشي
…………………….
على البحر
عمر شايل بيرين بيهشكها و على بيبنى قلعه بالرمل مع يس و نغم و ليلى قاعده فى جنب بتعمل ساندوتشات
عمر / انا قولت الهوا هيخبطها هتنام انما دى فاقت ما شاء الله كدا الواحد مش هينزل الميه فى سنته
على / استني اما أية تيجي و ابقي انزل الدنيا ما طارتش يعني … تفتكر هيتاخروا
نغم تجرى على ليلى
نغم / ممكن واحد
ليلى / اغسلي ايدك من الرمل الاول
على يروح يغسلها ايدها و يقعدها و يناول عمر ساندوتش و يشيل منه بيرين
على / هات يا سيدى عنك البت اللى تعبتك دى
على يبص ما يلاقيش يس
على / يس فين
على و عمر يبصوا و الكل يتوتر
عمر / هناك هناك واقف مع الواد اللى هناك ده …يس يس
يس يجرى على على
يس / ممكن اروح اللعب معاهم الكاسل بتاعتهم اكبر من بتاعتنا و معاهم لعب و حاجات غير اللى معانا
ليلى / يا حبيبي ما ينفعش اصلا تتكلم مع حد ما تعرفوش
يس / بس انا عاوز اللعب
على / تعال بس اغسل ايدك و كل لقمه و انا اوعدك اننا هنعمل كاسل احسن من بتاعتهم مليون مره
يس / انا مش جعان انا عاوز اللعب
عمر / لا دا انت عاوز تتغرق بقي
عمر يحط الساندوتش فى العلبه و يشيل يس و يجرى بيه يحدفه فى البحر نغم تنزل تجرى على عمر
نغم / و انا كمان و انا كمان
عمر يشيلها و يحدفها هى كمان و على متابع و شايل بيرين
ليلى / هات البت عنك و ادخل انبسطلك شويه انت من يومك بتحب البحر
على / لا انا هتابعهم من هنا احسن
ليلى / ما حدش هينفعك ما حدش هيقول على انبسط بعد ما طلق نور و ندى فى المستشفي
على / و ايه علاقه نور و ندى بالموضوع انا بس اللى مش فى المود مضايق كمان اننا سايبين عم مصطفى فى البيت لوحده
ليلى / كنت هتشيله بكرسيه يعني اهو قاعد قدام التليفزيون … و بعدين هو مش لوحده ما الحجه منال معاه يعني
على / الله تصدقى صحيح هى اتاخرت كدا ليه دى قالت هتجهز الغدى و تحصلنا
ليلى / طب هات البت و كلمها شوفها فين
على يديها بيرين و يطلع الموبايل و عينه على عمر بيلاعب يس و نغم
على / ايوه يا طنط ازيك
منال / انا جايه اهو بعدى الشارع و جيالكوا
على / احنا قدام البيت بالظبط خشي طوالى شمسيه زرقا مكتوب عليها بيبسي
منال / هههههههههههههه دا نص البحر شمسيات زرقا يا على
على يبص حواليه و يضحك
منال / شوفتك شوفتك اديني دقيقتين و اوصل
على / شوفتك
منال / يلا اقفل ما تلبخنيش بالموبايل بقي يلا سلام
على / سلام
على يقفل و يعين الموبايل
ليلى / اهى جايه تقعد معايا ممكن بقي تنزل الميه تنبسط شويه احنا مش بنيجي كل يوم
على / ممكن تنبسطي حضرتك و ما تشغليش بالك بيا انا والله مبسوط جدا
ليلى / مفيش فايده يعني
على / هو انا وجودى تقيل على حضرتك اوى كدا
منال تدخل بتنهج
منال / مش هتصدقوا اللى حصل بعد ما نزلتوا
على و ليلى ينتبهوا
……………………….
فى عماره حسام
امانى طالعه السلم بتنهج
امانى / ما لقاش عماره اعلى من دى … فالحين بس ياخدوا ايجار قد كدا على قلبهم مش عارفين يركبوا حته اسانسير … لا … و مدى لعلى و اهله الشقه اللى تحت و احنا رمينا على السطوح … شقه بومه نحستنا و جابتلنا العله و المرض … لا … انا اول ما هنزل مصر هعمل شيك اب على نفسي مش معقول بنهج من سلمتين كدا … هههه… سلمتين !! قولى الفين … اقل واجب والله لا مش قادره كانوا حطوا كرسي و لا اى حاجه ايه ده هو فى ايه
امانى توصل لباب الشقه تقف و تاخد نفسها و تطلع المفتاح و تفتح
امانى / ايه الريحه دى … يا لهوى غاز
امانى تجرى على المطبخ تايد النور المطبخ ينفجر
………………………….
على البحر
ليلى / ينهار ابيض و بعدين
فجاه صوت الانفجار الكل يتلفت
منال / يا ساتر يا رب
على / دى شقتنا
على يجرى
ليلى / جيب العواقب سليمه يا رب
عمر يطلع يجرى يشد تيشيرت و يجرى ورا اخوه
عمر / خدوا بالكوا من العيال
منال / معايا معايا
ليلى / دى شقتنا بجد يا لاهوى هنعمل ايه
منال / لمى الحاجه لمى على ما اطلع العيال
منال تروح تمسك ايد يس و نغم
………………
قدام شقه حسام
الناس ملمومه و الباب مكسور على يطلع جرى يبص على المنظر
راجل ١ / لا اله الا الله لا اله الا الله الاسعاف اتاخرت كدا ليه
راجل ٢ / اسعاف ايه مفيش غير اتنين ميتين جوه
على يبصله و ينزل يلاقي عمر بيفتح الباب مصطفى قاعد فى جنب و خايف
عمر / ساعدنى يا على .. ما تخافش امان امان
على / حسام وامه ماتوا فوق
عمر / المفروض ازعل يعني
على / عمر
عمر / ما يولعوا ازفت من ستى الا سيدى كلنا هنموت يا على كلنا هنموت و مش دول اللى هنبكى عليهم ساعدنى ننزل الراجل و ياريت لو نلم حاجتنا ما حدش عارف اخرتها ايه فى الحريقه دى
على / نور يا عمر
عمر / انا برملى يا على بلاش استفزاز
على يبصله و يميل كرسي مصطفى عمر يشيل قدامه
…………………..
فى المستشفي
نور قاعده منهاره فى حضن منال بتطبطب عليها و محمد قاعد جنبها مسهم على يدخل
على / انا خلصت الاجراءات و جبت العربيه اللى هتنقلهم مصر
مفيش اى رد فعل
على / حضرتك هتنزل معاهم مصر صح عشان الدفنه و العزا صح
نور تمسح دموعها و تبص لعلى
على / اكرام الميت دفنه انا عارف ان الصدمه كانت شديده عليكوا بس انا اوعد حضرتك انى هفضل جنبك لاخر لحظه
نور تبص الناحيه التانيه و تغمض عنيها و على متابعها
على / احنا لمينا حاجتنا من الشقه و هينزلوا مع عمر و حضرتك مصر
نور / و حضرتك مش هتنزل مش كنت بتقول هتفضل جنبه لاخر لحظه
على / ان هروح المستشفي و اتكلم مع الدكتور لو فى مصحه أحسن فى مصر
نور / و انت تكلمه بصفتك ايه اصلا ندى مش هتلاقى معامله احسن من هنا انا هسيبها هنا تتعالج كفايا بهدله فيها بقي انتوا ايه ما بتشبعوش
محمد / نور
نور تمسح دموعها و تبص الناحيه التانيه
على / انا مقدر على فكره
نور تبصله و تبص لمحمد
نور / يلا يا بابا اكرام الميت دفنه فعلا و هم تعبوا بما فيه الكفايه خلينا نريحهم و نفوق لندى
على / نور انا
نور / انا مش قدرالك .. كتر خيرك بجد بس انا فيا اللى مكفيني خليني اساعدها و اوعدك انى هخرج من حياتكوا بس ارجوك
على / انا ما
محمد / لا يا على لا وقته و لا مكانه
منال / يلا يا نور
نور/ انا دعيت بعزم قلبي دعيت و سجدت لحد ما … حكمتك يا رب
منال / هم فى دار الحق دلوقت و احنا فى دار الباطل
نور / ارجوكى ما تسبينيش ارجوكى خليكي جنبى
منال / و انا ممكن اروح فين بس يا ضنايا تعالى يا قلبي تعالى معايا
منال تاخد نور فى حضنها و يمشوا على يبص لمحمد
محمد / انا عارف انه اذاكوا كتير بس هو عند ربنا دلوقت و انا اب و بطلب منك تساعده لو فاكرلى اى حاجه حلوه تسامحه انا ممكن ادعيله ربنا يسامحه بس ربنا عمره ما بيسامح فى حقوق العباد
على / يلا يا عمى يلا خلينا نلحق الطريق يلا
محمد يمسح دموعه و يقوم يمشي مع على
……………………..
فى شقه امانى فى مصر
نور تدخل شايله حبيبه و وراها محمد شايل شنطه هدوم وراهم على و عمر شايلين كرسي مصطفى
عمر / هنزل اجيب باقى الشنط
على / انا هطلب دليفرى تحبوا اطلبلكوا حاجه معينه
نور تدخل اوضتها و تقفل الباب
محمد / كتر خيرك يا ابنى تعبناك معانا
على / حضرتك كويس
محمد / هبقي ان شاء الله
على / انا هطلع فوق اللم حاجتى لو حضرتك او نور احتاجتوا اى حاجه فى اى وقت
محمد / انا هتكلم معاها لو تحب
على / احب جدا و صدقني الموضوع مش زى ما انتوا فاهمين … انا عارف ان مش سهل اشرح بس ربنا وحده اللى عالم بغلاوه نور فى قلبي
محمد / اديها وقتها و لو ليك نصيب فى حاجه هتشوفها
على يهز راسه و يطلع ثوانى و عمر يدخل شايل شنطه كمان
عمر / انا ما لقيتلكوش حاجه تانيه بس لما اروح لو لقيت حاجه هرجعها
محمد / كتر خيرك يا ابنى … على فوق بيلم حاجته
عمر / تمام هروح الجماعه عشان العيال و ارجع اخده حضرتك تحب اجبلك اى حاجه و انا راجع
محمد / كتر خيرك يا ابنى تعبناكوا معانا
عمر / تعب ايه بس يا عمى ما تقولش كدا احنا اهل … عن اذن حضرتك
عمر يمشي و محمد يقفل الباب و ياخد مصطفى اوضه حسام و يساعده ينام
محمد / ارتاح يا خويا ارتاح
محمد يجي يمشي مصطفى يمسك ايده محمد يبصله
محمد / عاوز حاجه يا خويا ناقصك حاجه
مصطفى يشاور على قلم على الترابيزه محمد يجيب قلم و ورقه و يديهم لمصطفى يكتب
محمد / زعلان !! والله ما عارف يمكن لسه ما استعوبتش و يمكن لانه متغرب طول عمره واخد على فراقه و يمكن الحاجات اللى حصلت قست قلبي و يمكن انا ما عنديش قلب من اصله
محمد يقعد جنب مصطفى
محمد / تفتكر فى حد هيحضر العزا بالليل تفتكر فى حد كان بيحبه هيترحم عليه تفتكر الناس اللى اذاهم ممكن يسامحوه
جرس الباب يضرب
محمد / هروح اشوف مين
محمد يفتح يلاقى تهانى اول ما تشوفه تصرخ
تهانى / يا حبيبتي يا غاليه ما كانش يومك يا ابن اخويا
محمد / بس يا تهانى مش عاوز نواح هنا
نور تخرج من الاوضه مفزوعه
تهانى / و الله ان ما كنت اخويا لكنت سمعتك كلمتين ايه مش عاوزنا نحزن على
على ينزل يجرى
نور / و هو الحزن بالطريقه دى حضرتك كدا بتعذبيهم
تهانى / بقي دا منظر واحده امها و اخوها ماتوا ده قال و انا اللى جايه
نور تدخل الاوضه و ترزع الباب
تهانى / شايف بنتك و قله ادبها
محمد يزرع باب الشقه فى وش تهانى تهانى تبص لعلى
تهانى / نصيبه اما تشيلكوا ايه العيله الهم دى قال وانا اللى جايه اتكفى على بوزى
على يطلع فوق تهانى تليفونها يرن
تهانى / ايوه يا اروى … اهدى بس مش فاهمه حاجه بتعيطي ليه … هو مين اللى متجوز بره … طلقك !!! دا انا هاجى اطلع روحه استنيني جيالك اهو
………………..
فى شقه نور
نور تتمشي فى الشقه و الحزن مالى ملامحها تدخل اوضتها و تفتح الدولاب نصه فاضي تقعد على السرير و تبصله و تمسح دموعها محمد يدخل
محمد / انتى كويسه يا بنتى
نور سرحانه و ساكته و الدموع بتنزل على خدها محمد يروح يقعد جنبها
محمد / سؤال غبى انا عارف بس ان شاء الله
نور/ كل حاجه راحت فى ثانيه
محمد / انتى لسه صغيره
نور/ امى و اخويا و جوزى و حياتى كلها فجاه كدا
محمد / ما حدش عارف الخير فين
نور/ طب انا عملت ايه عشان يجرالى كل ده دا انا كنت بحاول اخرج من حزنى على عيالي انا بخرج من الحزن بحزن اقوى منه طب انا هخرج من ده ازاى فى ايه تانى اكبر من كدا ممكن يحصلى
محمد / ما يمكن دى يا بنتى عنق الزجاجه
نور / و هخرج منها بقي اروح فين هتوه فى الدنيا دى لوحدى
محمد / ربنا يخليلك يس و نغم تعوضيهم و يعوضوكى
نور / و هو على هيسيبهم يا بابا
محمد يسكت و فجاه كانه افتكر حاجه
محمد / طب على الاقل ندى و حبيبه
نور تهز راسها
محمد / و انا و عمك … انا عارف اننا حمل مش سند
نور / ما تقولش كدا
محمد / دى الحقيقه من و انتى صغيره لما كانت بتقابلك اى مشكله كنتى بتروحى لامك او اخوكى انا …مجرد ضيف شرف اخرى اطبطب فى الحزن و اسقف فى الفرح
نور / انا كنت طالعه اللمله حاجته لو كان نسي حاجه بس ما شاء الله نضف مكانه كويس … هو اصلا ما عادش فى سبب يرجع تانى عشانه
محمد / و انتى عوزاه يرجع
نور / هيرجع بس مش عشانى
نور تقوم و تمشي و محمد متابعها بحزن
…………………..
فى المستشفي عند ندى
الدكتور / هو انا مش خليتك تكلميها فيديو كول عشان تصدقى
ندى / و هو انى اشوف بنتى فيديو زى انى اخدها فى حضنى انكوا تمنوا عليا بحضنها ساعه زى انها تفضل قدام عيني طول الوقت
الدكتور / انتى عارفه انتى هنا ليه
ندى / عشان مجنونه هكون ليه يعني
الدكتور / و انتى شايفه انك مجنونه
ندى تبصله
الدكتور / انتى لسه خطر على نفسك و على اللى حواليكي ؟
ندى / مش عارفه حضرتك قولى
الدكتور / انا شايف انك بقيتي كويسه
ندى / امال انا لسه هنا ليه ما روحتش لبنتى ليه ما دام انا سليمه حبسيني هنا ليه و لا هو مش ناوى يرحمنى بقي
الدكتور / عشان كدا انتى لسه هنا عشان انتى لسه مش قادره تقتنعى ان كابوس حسام انتهى
ندى / انا لو شوفته فى تربته مش هصدق انه مات بالبساطه دى انتوا ما تعرفوهوش قدى يمكن فخ يمكن … يمكن … يمكن بيختبرنى عمل ميت عشان يراقبنى بيراقبنى و اول ما اغلط .. عاوز يحرمنى من حبيبه
الدكتور متابعها و ساكت ندى تبصله
ندى / طب ان كان حرمانى من حبيبه عقاب ليا لما اغلط طب ما انا محرومه منها فعلا اهو
الدكتور يتعدل
الدكتور / و لو خرجتى و رجعتيلها شايفه يعني انه مثلا ايه السيناريو المتوقع
ندى / هعيشله خدامه تحت رجليه العمر كله
الدكتور / حسام
ندى تهز راسها
الدكتور / تمام هكتبلك على خروج
ندى / بجد
الدكتور / يعني هو مش خروج بالمعنى الحرفى بس انا شايف انك لما تروحى و تتاكدى بنفسك انه مات … مع الملاحظة طبعا و الاستمرار على العلاج دا هيكون مفيد اكتر لحالتك
ندى تبص للدكتور مش مستوعبه
الدكتور/ انا بحاول اتخيل انى راجل طول بعرض كدا لو مريت بربع اللى بريتي بيه هقدر اقعد و اتكلم و اتفاعل زيك كدا … الحاجه الوحيده اللى ساعدتك تتخطى كل اللى حصل و تخفى هى رغبتك الحقيقيه فى انك تجتمعى تانى مع بنتك و انا شايف ان ده العلاج الانسب ليكي عشان تقدرى تعدى المرحله الاخيره فى علاجك
ندى / انا مش عارفه اقول لحضرتك ايه
الدكتور / انا مش هقدر انزل القاهره بس حضرتك تقدرى تيجي هنا كفسحه مره فى الاسبوع نطمن عليكى و نلعب مع حبيبه شويه و ممكن تتابعى فى القاهره مع … انا ليا صديق شخصي شاطر جدا ممكن ابعتله حالتك و تتابعى معاه يظبطلك الجرعات و يسحبها بشكل تدريجي … اكيد مش هتفضلى على العلاج طول عمرك
ندى تهز راسها
الدكتور / تمام اتفقنا انا هتصل بمدام نور و ابلغها تيجي تستلمك
ندى تبتسم الدكتور يقوم و يطلع بره
………………..
فى شقه فى اسكندريه
نور بتحمر شعريه جرس الباب يضرب نور تشيل الحله من على النار و تروح تفتح تلاقي اكياس كتير فى الارض تتنهد و تفتح واحده تلاقي جواها جواب تفتحه و تبتسم فيه رسمه بنت صغيره مكتوب عليها نغم ماسكه فى ايد واحده كبيره مكتوب عليها نور و ورد كتير و قلوب نور تمسح دموعها تاخد الاكياس جوه و تقفل الباب ثوانى و على ينزل من فوق و يمشي
……………
فى شقه عمر
أية بتتكلم فى التليفون
أية / بجد يا نور
نور / والله العظيم كلمونى و بلبس و رايحه المستشفي اهو
أية / يا ما انت كريم يا رب يا ما انت كريم يا رب طب ايه اللبس و اجيلك و لا ايه
نور / انا كلمت بابا و هيجى ياخدنى بس هو مش لاقي حد يقعد مع عمى لان ممكن نبات انتى فاهمه انا مش عارفه الدنيا هتمشي ازاى انا اساسا لسه مش مستوعبه الصدمه
أية / يا ستى و لا يكون عندك فكر انا حالا هكلم عمر و اكيد هو هيتصرف
نور / تمام يا أية تسلمى طنط خلصت صلاه و لا لسه
أية / مش عارفه هوديلها التليفون اهو اصل انا فى الاوضه ثوانى
…………………
فى شقه فى اسكندريه
على يدخل و هو بيقفل الباب و بيتكلم فى التليفون
على / اه دخلت اهو هلم حاجتى و ارجع
عمر / هترجع دلوقت
على / دورى هنا خلص
عمر / وهو كان ايه دورك عندك معلش
على / انت عاوز ايه يا عمر
عمر / و لا حاجه تيجي بالسلامه
على يقفل و يدخل على اوضه و يجيب شنطه من الدولاب و يحط فيها الهدوم
……………….
فى شقه ليلى تانى يوم
ليلى / و انا يعنى لو اتكلمت معاه هيفرق دا ما بيسمعش لحد
منال / هانت خلاص احنا كنا فين و بقينا فين
ليلى / و حتى لو اتحلت خالص هيحصل ايه هو احنا يعني هنخلص من الدوامه دى هنفوق لروحنا و حياتنا و شغلنا
منال / مش عارفه اقولك ايه
ليلى / العيال اللى جوه دول نور هتاخدهم و ندى زى ما انتى عارفه
منال / ندى خفت و الا ما كانوش سابوها تخرج
ليلى / دا نور عندى اهون على الاقل حملت حتى لو ربنا ما تمهاش علينا بس اهو شعاع نور فى اخر النفق لكن ندى حيطه سد ما انتى عارفه ظروفها هيفضل طول عمره يربى فى عيال غيره هيفضل طول عمره تايهه كدا و عمره بيتسرسب منه لا عارفله راس من رجل
منال / معاكى حق بس الحاجات دى مش بايدينا
ليلى / على العموم انا لميت حاجه العيال زى ما طلبتى و مش هتكلم فى السيره دى تانى
الباب يتفتح و على يدخل
منال / الله اهلا اهلا
على / اهلا بحضرتك ايه المفاجاه الحلوه دى
ليلى / تلاقيك جعان هسخنلك تاكل
على / لا ارتاحى حضرتك انا مش جعان
على يروح يقعد جنب منال
منال / نور بعتانى اجبلها العيال
على يبتسم بحزن و يهز راسه تمام
منال/ هم بردوا واحشينا و وحشاهم و انا هبقي اظبط معاها مواعيد تشوفهم فيها
على / تمام اللى حضرتك شيفاه
ليلى / هقوم اعمل شاي
ليلى تقوم
منال / ناوى على ايه
على / فى ايه
منال / فى الحكايه دى هتفضل لحد امتى كدا
على / كدا ازاى يعني مالى ما انا الحمد لله كويس اهو و الشغل ما شاء الله شغال
منال / بتكلم عن ندى و نور
…………………….
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية سلف ودين)
تعليق واحد