رواية رجل في مهمة مستحيلة الفصل الرابع 4 بقلم عادل عبدالله

رواية رجل في مهمة مستحيلة الجزء الرابع

رواية رجل في مهمة مستحيلة البارت الرابع

رواية رجل في مهمة مستحيلة الحلقة الرابعة

: وايه االي اتغير كمان في الدنيا يا ممدوح ؟ انا حاسس ان انا بحلم .
: حاجات كتير يا طاهر اتغيرت في الدنيا .متستعجلش مع الوقت هتتأقلم مع التغييرات اللي حصلت في الحياة .
ممدوح مرضيش ينام علشان يقعد معايا لما عرف اني هقعد للصبح وهسافر بدري .
وقرب الساعة سبعة الصبح لقيت ممدوح بيطلع تليفون ضخم وبيتصل بمراته في المستشفي علشان يطمن عليها .
ولقيته فاتح اسبيكر وبيتكلم وبيبص في الموبايل ..استغربت اوي هو بيعمل كده ليه ومش حاطط الموبايل علي ودنه ليه !!!!!
وبعد ما خلص المكالمة سألته هو كان بيبص علي الموبايل ليه طول المكالمة وبيكلم مراته كأنه شايفها ؟
قالي : انا كنت بكلمها فيديو كول .
: ازاي ؟
: عن طريق الانترنت .
: هو التليفون فيه انترنت ؟
: ايوه طبعا .
: وانت جايبه منين الموبايل اللي فيه انترنت ده كمان ؟
: من اي مكان .
:هو بقه عادي ان التليفون يكون فيه انترنت ؟!!
: ايوه .
: ايه ده ؟!! معقول !!! طيب يا اخي كنت خليتني كلمت امي فيديو علشان اطمن عليها .
: معلش نسيت والله وعموما احنا فيها .
اتصل ممدوح بأمي وعمل مكالمة فيديو واعطاني الموبايل اكلمها .
بعد ما كلمت امي فيديو وقفلت المكالمة لاحظت التاريخ علي الموبايل انه سنة ٢٠٢٠ ..!!!!!!!
كنت هتجنن !! فضلت باصص للموبايل وانا مندهش وسألت ممدوح : هو احنا دلوقتي سنة ٢٠٢٠ ؟
رد ممدوح ايوه .
يعني انا في غيبوبة من ١٤ سنة !!!
: يعني انت مكنتش تعرف انك في غيبوبة من ٢٠٠٦ لغاية ٢٠٢٠ .
:لا .اللي اعرفه اني في غيبوبة من سنة بس يعني كنت فاكر اننا في ٢٠٠٧ .
: ومين اللي قالك كده ؟
: الدكتور هو اللي قالي كده .
: ممكن يكون قالك كده علشان الصدمة متبقاش قوية عليك .
: يعني انا دلوقتي عندي ٤٧ سنة ؟
: ايوه .
وقفت قدام المرايا اشوف تفاصيل التغيير في شكلي …
الشعر الابيض اللي انتشر في شعري .بعض التجاعيد تحت عيوني ..دي تأثير الزمن مش المرض .
وبقيت بقول لنفسي شبابك راح يا طاهر وانت في غيبوبة واحلي سنين عمرك سرقها المرض منك .
بعدها مشيت من عند ممدوح بعد ما صمم انه يعطيني ٥٠٠ جنية علشان كان عارف اني مش معايا فلوس .
سافرت اسكندرية واول ما وصلت عند أمي .( ممدوح كان قالي اني مش اسلم علي حد بالايد او بالاحضان ) .لكن اول ما شوفت امي رميت نفسي في حضنها وبقيت ببكي وانا ببوس راسها وايديها وانا حاسس ان روحي رجعتلي تاني .
امي كان ظهر عليها اوي تقدم العمر فقد اقتربت من السبعين .
: عاملة ايه يا امي ؟ وحشتيني اوي .
: الحمد لله يا حبيبي انا روحي رجعتلي تاني لما عرفت انك فوقت .
: و نجلا مراتي وشهاب ابني ودنيا بنتي اخبارهم ايه .
سكتت امي شوية وبعدين ابتسمت : الحمد لله يا حبيبي بخير .
: اومال هما فين يا ماما ؟
: هقولك مكانهم يا حبيبي متقلقش عليهم .
: وطارق وهشام وراندا اخواتي فين وعاملين ايه ؟ وازاي باعوا الفيلا يا ماما .
: طارق اخوك الله يسامحه هو اللي مشي في موضوع بين الفيلا بعد ما اقنع اخوك هشام .
: وبعدين ؟
:طارق بعد ما باع واخد نصيبه هاجر كندا بقاله عشر سنين . اول سنتين كان بيتصل بيا علي فترات ومن ٨ سنين مكلمنيش .( وتدمع عينيها وتبكي )نسيني خلاص يا طاهر .
حاولت اخفف الحزن عنها ومسحت دموعها .
: وهشام فين يا ماما ؟
: هشام اخوك اخد فلوسه وراح عمل مطعم كبير في الغردقة واشتري بيت هناك واتجوز وعايش هناك ومبيسألش عني الا كل كام شهر مرة ولما قلتله ان الشركة بتاعتنا هتفلس ولازم يمسك الشركة .مش عمل حاجة وقالي انه مش هيقدر يسيب شغله وقالي ان راندا اختنا تاخد بالها من الشغل .
: وراندا اختي اخبارها ايه ؟
: راندا اختك الله يخليها هي الوحيدة اللي مسبتنيش حتي بعد ما اتجوزت علطول بتيجي هي وجوزها يطمنوا عليا ويقعدوا معايا .ده غير انها شايلة شغل الشركة كلها علي دماغها وطلبت من جوزها انه يساعدها في الشغل .
.والشركة بقيت دلوقتي علي وشك انها تفلس .لازم تقف يا طاهر جنب اختك لحد ما الشركة تقف علي رجلها تاني .
اتنهدت بعد ما حسيت بالضيق والهم من الاخبار السيئة : ومراتي واولادي فين ؟
اتنهدت امي وسكتت وبعدين شوفت الدموع في عنيها