رواية جحيم أنس الفصل الثاني عشر 12 بقلم أحمد نبيل
رواية جحيم أنس الجزء الثاني عشر
رواية جحيم أنس البارت الثاني عشر
رواية جحيم أنس الحلقة الثانية عشر
( 12 ) والأخيرة
شقة صديق كريم
يدخل كريم الشقة ومعه انس
تجلس انس على أقرب مقعد وتبكى
يجلس كريم بجوارها
انس (تتمتم) : ابوك هو اللى قتلنى يا كريم … هو اللى بعت الورقة يوم عيد ميلادى واختك خلاص ضاعت منى … أنا خلاص حياتى اتحولت لجحيم
يقف كريم ويقترب منها
كريم (وهو يمسك يدها) : أنا أسف … أسف يا ماما
انس (وهى تمسح على شعره) : انت الحاجة الوحيدة الحلوة اللى باقية فى حياتى
كريم : بس أنا عايز اعترفلك بحاجة
انس تنظر اليه ولا تعلق
كريم : أنا اللى بعت الورقة يوم عيد ميلادك
تتوقف انس عن البكاء وتتسع عيناها عن اخرها دون تعليق
كريم : أنا أسف … أنا والله مكنت عايز أكمل وكنت هتراجع واقولك فى نفس اليوم بس فضولى هو اللى خلانى أكمل … أنا اشتركت أنا وزمايلى فى مسابقة ومطلوب فيها اننا نعمل فيلم وكان لازم ندور على قصة جديدة وجت فى دماغى ان احط حد فى تجربة معينة واشوف رد فعله بعدها إيه وجه يوم عيد ميلادك ونطت الفكرة فى دماغى وخليت حد يوصل علبة الهدية اللى فيها الورقة البيت وانا عارف ان الكاميرات لسه مشتغلتش فى العمارة وبعد ما شوفتى الورقة كنت براقب رد فعلك ورد فعل كل اللى حواليكى وقررت يومها انى مكملش واقولك الحقيقة خصوصا بعد الحالة اللى انتى دخلتى فيها وشكك فى كل اللى حواليكى بس طمعى وفضلولى خلانى اكمل واشوفك وانت كل يوم بتتعرضى وتواجهى حاجة جديدة وشكك وخوفك كل يوم بيزيد ومهتمتش غير انى اراقبك واكتب كل ردود فعلك عشان اكمل القصة وفى نفس الوقت مكنتش مصدق كل اللى بيحصل حوالينا ده … أنا اسف انا عارف انى حيوان واستاهل اى حاجة تعمليها فيا … أنا قطعت كل اللى كتبته وكنت مقرر خلاص النهاردة اقولك على كل حاجة بس حصل اللى حصل
انس تنظر الى كريم دون تعليق وتتساقط دموعها على وجنتيها
كريم (وهو يقبل يدها) : ماما كلمينى طب ردى عليا أنا عارف انى غلطان بس انا والله مكنتش اعرف ان كل ده هيحصل وانا مليش ذنب فيه
تقف انس وتتجه الى باب الشقة
كريم يلحق بها
كريم : انت رايحه فين ياماما … مش هسيبك تمشى وتسبينى … طب خلينا نكلم أنا مليش غيرك
تلتفت انس اليه وتصفعه على وجهه بقوة ثم تفتح الباب وتغادر ويتابعها كريم دون أن يلحق بها
…………………………………..
فى الشارع
انس تسير فى الشارع وهى تبكى
تتمتم : أنا ابنى يعمل فيا كده … يحطنى فى تجربة عشان خاطر فيلم … أنا كنت فاكره أن جوزى وبنتى هما اللى قتلونى طلع اغلى حد عندى هو اللى قتلنى بس انا اللى غلطانة … انا اللى اخترت غلط من الاول … انا اللى غلطانة
هاتف انس يصدر رنين
تتجاهله انس وتستمر فى السير دون وجهة محددة
تتوقف وهى تتلفت حولها ثم تجلس على الرصيف في الشارع
تلمح رجل وامرأة يسيران في الشارع ومعهم طفل صغير
تتذكر انس أشياء من الماضى
باااااااااااااااااك
انس في غرفتها في بيت والدها
والد انس : أنا عمرى ما أدخلت في اختيارتك يا انس بس ازم تفكرى كويس
انس : يا بابا سيد كويس ومشفتش منه حاجة وحشه
تتدخل والدة انس في الحديث : يابنتى ابوك سأل عليه ومعرفش عنه أصل من فصل
انس : تانى يا ماما أنا مش اكلمت أنا وانت قبل كده
والد انس : بصى يا انس هو لحد دلوقتى مفيش حاجة واضحة عليه سواء كويسة ولا وحشة بس ده في حد ذاته حاجة تقلق وانا شخصيا مش عارف اخد قرار
انس : يا بابا هو بيشتغل اعمال حرة وقالى ان والده ووالدته متوفيين وبعدين هنعمل فترة خطوبة ونشوف
والدة انس : مفيش فايدة فيكى اللى في دماغك في دماغك بس هقولك تانى انا مش موافقة ومش هدخلك بيت انت فاهمة
………………………………….
في الشارع
تبكى انس وهى تتذكر حديثها مع والدها ووالدتها
تتمتم : كان عندك حق أنا اللى غبية غبية
هاتفها يصدر رنين مرة أخرى
تنظر انس الى اسم الطالب وتجد كريم يتصل بها
تتجاهله انس ولا ترد
تلمح سيارة ملاكى تتوقف بالقرب منها وبداخلها شاب وفتاة
تنظر انس الى وجه الفتاة وتكتشف انها دعاء عبد العزيز
من داخل السيارة
الشاب (بغضب) : يعنى بعد كل اللى عملته معاكى ده كله وعايزة تسبينى
دعاء : انت مش عايز تفهم ليه بقولك خلاص كده كفاية
الشاب : كفاية انت بتستهبلى يا روح امك مش ايمن الجوهرى اللى واحده تعلم عليه
دعاء : هى خلصت كده سلام
تحاول دعاء فتح باب السيارة
يغلق كريم سنتر السيارة ويمنعها من النزول ويحاول الاعتداء عليها وتقبيلها
تدفعه دعاء عنها وهى تصرخ
تظهر انس امامهم
تصيح : افتح الباب
تلتفت اليها دعاء
دعاء : ابلة انس
انس : بقولك سبها وافتح الباب
ايمن : اه هو انتى بقى الابلة بقولك ايه البت دى تخصنى ومحدش ليه دعوة
يظهر امين شرطة
الأمين : في ايه يا استاذة
ايمن (بارتباك) : لا مفيش يا باشا دى خناقة كده بسيطة مع خطيبتى وامها وخلصت خلاص
انس : خليها تنزل من العربية
يجز كريم على اسنانه بغيظ ويفتح باب السيارة
تنزل دعاء من السيارة وينصرف ايمن بسرعة من المكان
ينصرف أمين الشرطة
دعاء : أنا متشكرة يا ابلة انس أنا مش عارفه أقولك ايه
انس : خلاص متكلميش انت ساكنة فين
دعاء : ليه يا أبلة
انس : هوصلك البيت
……………………………..
بيت دعاء
انس تجلس في الصالة وتدخل عليها عمة دعاء
عمة دعاء : انا اسفة لحضرتك يا أستاذة انس … انا عرفت كل حاجة من دعاء بس اعمل ايه باباها مات وماماتها اجوزت وسافرت وسبتهالى وتحملت مسئوليتها … انا مجوزتش وقاعدة لوحدى واعتبرت دعاء بنتى بس يظهر انى فشلت في تربيتها
انس : بص حضرتك اى حاجة في حياتنا ممكن تتصلح ويمكن ربنا بعتنى ليها النهاردة عشان الحقها رغم كل اللى حصل منها معايا بس لازم تبدأى معاها بداية جديدة
تدخل دعاء عليهم
دعاء : أنا اسفة يا ابلة واوعد حضرتك انى هتغير
انس تقف وتنظر اليها ثم تفتح ذراعيها اليها
تندفع نحوها دعاء وتحتضنها
انس : معلش انا اللى غلطانة … كان لازم اساعدك … انا اللى غلطانة … سامحينى يا نانيس
دعاء : نانيس مين يا ابلة
انس (بارتباك) : انا اسفة أنا لازم امشى وبكره ترجعى المدرسة من بكره وتبدأى من جديد فى حياتك
تتركهم انس وتنصرف
………………………………..
صباحا في المدرسة
كريم يذهب الى المدرسة
يتوجه نحو غرفة انس
يصطدم امامه بهدى
هدى : انت عايز مين يا استاذ
كريم : هي الأستاذة انس مش موجودة
هدى : لأ مش موجودة انت مين بقى
كريم : أنا كريم ابنها
هدى : اه انت بقى كريم وعايز ايه بقى
كريم : هو حضرتك مسمعتيش انا جاى للاستاذة انس
هدى : الأستاذة انس مجتش النهاردة ومش هتيجى
كريم : يعنى ايه مش هتيجى مش فاهم حضرتك
هدى : يعنى اتوقفت عن العمل وهيحققوا معاها في الوزارة
كريم : ايه اتوقفت
هدى : ايوه هي عايزة تمد ايدها عليا وتكمل فى مكانها عادى كده
كريم لا يعلق
هدى : اتفضل يا أستاذ عشان وجودك هنا دلوقتى غير مرغوب فيه
تنصرف هدى وينظر كريم الى غرفة انس ثم ينصرف من المكان والمدرسة
…………………………………….
بيت انس
سيد يجلس مع جمادة فى الريسبشن
سيد (بغضب) : يعنى ايه مش هجيب الفلوس اللى اتفقنا عليها
حمادة : يعنى مفيش فلوس يا اونكل
سيد : انت بتضحك عليا وتقرطسنى ياد انت
حمادة : اعتبرها زى ما انت عاوز وبعدين عايز تقطع الورقة اللى اجوزت بيها بنتك قطعها
سيد (يهب واقفا) : لا يا روح امك مش سيد الجمال اللى يضحك عليه احنا اتفقنا هوافق على جوزاك من البت قصاد المبلغ اللى هتدهولى
حمادة : وانا مجوزتهاش لحد دلوقتى … بنتك رافضة انى المسها يعنى اتفاقنا لاغى
سيد : انت بتستهبل يلا ولا شكلك طلعت لمؤاخذة مبتعرفش
حمادة : بس يا اونكل احنا اتفقنا وفى طرف منفذ الاتفاق يبقى خلاص فنيتو
يخرج حمادة ورقة الزواج العرفى من جيبه ويقوم بتمزيقها امام عين سيد
حمادة : باى يا ابو السيد
يمنعه سيد من المغادرة ويضربه فى وجهه بقوة
سيد : انت فاكر انك هتمشى كده وحياة امك مهسيبك
تخرج نانيس من غرفتها وهى تصرخ
نانيس : سيبه يا بابا يمشى
سيد : نعم يا ختى اسيبه … يعنى اعمل ده كله وينضحك عليا واسكت وانت بروح امك عصيانه عليه ليه
نانيس : مش قادره اعمل كده وبعدين احنا عملنا ده كله عشان نكيد ماما وخلاص بقى الموضوع خلص
سيد : اسمع يا د انت انت هتدفع الفلوس ولا
حمادة : انا قطعت الورقة خلاص وملكش حاجة عندى وبنتك عندك
يهم حمادة بالانصراف
يخرج سيد مسدسه
تندفع نحوه نانيس وهى تصرخ : سيبه يابابا يمشى
يدفعها سيد بعيدا ويضغط على الزناد
تصيب الرصاصة حمادة ويسقط جثة هامدة مع صراخ نانيس
ينفتح باب الشقة ويدخل مجموعة من الجيران ويشاهدون ما حدث
………………………………..
أمام العمارة
يصل كريم ويجد مجموعة من الجيران أمام العمارة وسيارة البوليس والاسعاف تتوقف أمامها
يظهر سيد وهو يخرج من العمارة بصحبة رجال الشرطة
يندفع كريم نحوه
كريم : في ايه يا بابا حصل ايه
ينظر له سيد دون تعليق
تظهر جثة حمادة على محفة ورجال الإسعاف تحمله
تظهر نانيس وهى تبكى
كريم : في ايه يا نايس
نانيس : بابا يا كريم بابا قتل حمادة
يحتضن كريم نانيس التي تستمر في البكاء ويتابعان سيد وهو يغادر فى سيارة الشرطة وخلفه سيارة الإسعاف وبداخلها جثة حمادة
……………………………………….
بيت انس
يجلس كريم مع نايس فى حالة وجوم تامة
نانيس : هو بابا كده خلاص ضاع
كريم : انا اتصلت بالمحامى وهيروحله
نانيس : وماما فين
كريم : بتسألى عليها دلوقتى
نانيس : انا السبب في ده كله
كريم : خلاص كل حاجة خلصت يا نانيس
نانيس : طب قولى يا كريم ماما فين
كريم : معرفش معرفش فين
نانيس : يعنى ايه متعرفش هي مش كانت معاك
كريم لا يعلق
نانيس : رد عليا يا كريم
كريم (بحدة) : ايوه كانت معايا بس سبتنى ومشيت وروحتلها المدرسة النهاردة وملقتهاش هناك
نانيس : يعنى ايه اختفت
كريم : معرفش يا نانيس معرفش
هاتف كريم يصدر رنيين
يرد كريم : ايوه … مين حضرتك … بتقولى ايه
………………………………..
فى القسم
يخرج سيد من الحبس ويتجه الى غرفة رئيس المباحث
يجد صافى تنتظره
سيد : صافى
تقف صافى وتقترب منه
صافى : أنا قولت أعمل بأصلى وأجى اشوفك
سيد : عارفه انت الوحيدة اللى جيتى تسألى عنى حتى ولادى ومراتى مجوش ورايا
صافى : ايه حضرة الناظره ادتك خلاص استمارة 6
ينظر سيد اليها ولا يعلق
صافى : المحامى قلى ان القضية لابساك لابساك وانك خلاص هتروح تقابل عشماوى قريب
سيد : انت جاية تشمتى فيا بقى
صافى تخرج ورقة من حقيبة يدها
صافى : لأ يا حبيبى أنا جاية أقطع دى قدامك وأقولك سلام يا ابو السيد
تمزق صافى ورقة الزواج العرفى وتلقيها فى وجه سيد ثم تنصرف من المكان ويتابعها سيد دون تعليق
…………………………………………..
منطقة سكنية
يصل كريم ونانيس الى عمارة سكنية ويصعدان بسرعة الى احدى الشقق
يطرق كريم جرس الباب
ينفتح الباب وتظهر سلمى المدرسة خلفه
كريم : هو حضرتك الاستاذة سلمى اللى كلمتينى
سلمى : ايوه اتفضلوا
يدخل كريم ونانيس
تشير لهم سلمى الى احدى الغرف
يندفع كريم ونانيس نحو الغرفة
يفتحان الباب ويجدان انس ترقد بالداخل على السرير والارهاق والتعب على وجهها
يندفع كريم ونانيس نحوها ويقبلان يدها
كريم : انا اسف … حقك عليا يا ماما والله مكنت اقصد يحصل ده كله
نانيس : ماما سامحينى انا السبب في كل ده
انس (تنظر الى سلمى) : كده يا سلمى هو ده اتفاقى معاكى
سلمى : مقدرتش يا ابلة اخبى خصوصا بعد ما تعبتى لما عرفتى خبر وقفك عن العمل واللى حصل للأستاذ سيد
كريم : سامحينى يا ماما أنا اللى عيشتك فى الجحيم ده بس والله ما هعمل حاجة تانى تزعلك
نانيس (تبكى) : بابا يا ماما بابا ضاع خلاص
تقبل نانيس يدها وتمسح انس على شعرها
انس : انتوا اللى تسامحونى لأن انا السبب في ده كله انا اللى اخترت شريك حياتى غلط وكان لازم تبقى دى النتيجة في الاخر … كان لازم حياتى تتحول لجحيم بسبب اختيارى
تبكى انس
يحتضنها كريم ونايس
تتابعهم سلمى ثم تخرج وتغلق الباب
🌷💕تمت اشكركم على المتابعة💕🌷
……………
لقراءة الرواية كاملة اضغط على : (رواية جحيم أنس)
