رواية تربية حواري الفصل السادس والأربعون 46 بقلم ولاء حامد

رواية تربية حواري الجزء السادس والأربعون

رواية تربية حواري البارت السادس والأربعون

رواية تربية حواري الحلقة السادسة والأربعون

الكل بيبص بفرحه مرسومه ومتوقعين رد حور بالقبول بعد كل التعب والمجهود الجبار داه
حور بهدوء ووجع : للمره التانيه برد عليك نفس الرد طلبك مرفوض يا بشمهندس
شهقه عاليه كان صدي صوتها مسمع في المكان
يونس بصدمه بانت على ملامحه:بردوا هنالك تاني ليه
حور بوجع قدرت تداريه بصعوبه: سبق وقولتلك لما بوافق مش بقول اسباب ولما برفض بردوا بحب احتفظ بالاسباب
يونس بحسم: حتى لو قولتلك اني بحبك وبعشقك بجد كنت شايل الكلمه جوايا لحد ما تبقى على اسمي بس قولتها علشان اثبتلك
حور بوجع قربا من هدي : انا مش محتاجه حب لاني اتربيت في بيت مليان حب عمران بالحب انا لو كنت محتاجه فأنا محتاجه الأمان محتاجه الثقه
يونس بسرعه: وعد هاكون امانك وحمايتك هاكون السند والضهر ليكي
حور بهدوء: مش بالكلام يا بشمهندس لا انا من توبك وانا من توبي بعتذر بجد ربنا يرزقك ببنت الحلال اللي تقدر تجاري حياتك عن اذنك اخدت أمها وركبت العربيه وانسحبت من سكات
مشيت حور والكل بيبص لبعضه بصدمه من رد حور واكتر الموجوعين كان يونس
ياسر حس بيه قرب منه هو ومازن
مازن بقلق: يونس انتا كويس
يونس بهزه راس: تمام تمام متقلقش
ياسر بتقدير للموقف: عارف انك موجوع بس انا سبق وقولتلك حور مش بتتحط تحت أمر واقع
يونس: للأسف حسبتها غلط
في الوقت نفس كان انسحب كل اللي في المكان بهدوء ماعدا ياسر ومازن اللي قعدوا جمب يونس
مازن بحكمه: طول عمرك مش بتستسلم ليه المره دي غير اول مره اشوفك يأس
يونس بصوت مبحوح: لاني لأول مره احتار مش عارف أقنعها ازاي
ياسر بصله بنظره بألف كلمه: الصبر يا يونس الصبر حور محتاجه وقت محتاجه معجزه علشان تقدر تخرج اللي جواها
مازن بصلهم بعظم فهم: قصدك إيه
يونس بسرعه: مش قصده حاجه هو علشان حور طبيعتها مش بتقتنع بسهوله ومحتاجه وقت علشان تقدر تقتنع بيا وبشخصي
مازن بعدم اقتناع: بس سبق وكانت مخطوبه
يونس بجديه: لان خطيبها كان شخص سيئ وساب أثر سيئ انه كل الرجاله بتاع كلام وحوارات
مازن بكشه وش: بس كل إنسان ليه شخصيه مختلفه ليه احكم على الكل من شخص ثم هي بتتعامل مع رجاله أشكال وألوان في شغلها معني كده ان كلهم نفس الشخصيه
ياسر بدفاع: حور بتتعامل في نطاق الشغل انما اللي يمس حياتها الشخصيه غيب وداه مش اي موضوع والسلام داه حياه مقسومه بين شخصين العمر كله حور لو وافقت ودخلت بيت يونس عمرها ما هتسيبه لأنها اكتر شخص تعرف وتقدس الحياه الزوجيه
مازن : بس بردوا لازم تفرق بين الناس وبعض دي المفروض بنت سوق يعني ورد عليها أشكال وألوان وأنواع تقدر بسهوله تميز بين معدن الناس
ياسر: للأسف كل واحد ليه حياته وحياتي غير حياتك وحياه حور غير اي بنت وبص ليونس وطبط على كتفه الموضوع محتاج صبر بلاش تفتحه دلوقتي
يونس بهزه راس: عندك حق كنت غلط لما فكرت اضرب على الحديد وهو سخن كان لازم اديها وقت تستوعب
ياسر بتأكيد: فعلا ايدها الوقت وصدقني الموضوع محتاج وقت بس مش اكتر
يونس بأمل : عندك حق
ياسر : طيب يلا قوم خلينا نروح الوقت
يونس وهو بيقوم من مكانه ويبنفض هدومه: يلا بينا اتحرك الثلاثه ياسر ركب عربيته ومازن يونس في عربيه يونس واتحركوا وكل واحد في وادي لوحده والتفكير واخد حيز كبير من دماغه
**************************حور في العربيه هي ومامتها والصمت كان سيد الموقف هدي جواها بركان كلام هاتموت وتفجره في وش بنتها بس فضلت الصمت لحد ما ترجع البيت
حور عارفه تفكير أمها وان منتظرها موال في البيت وبتفكر في يونس اللي اكتشفت انه اخد تفكير وحيد كبير من عقلها بس فضلت الصمت على الكلام وخصوصا وان الوقت متأخر والطريق مش سالك ومكسر فضلت تنفض دماغها من التفكير وتركز في الطريق لحد ما توصل والباقي ربنا يسهله من عندها
**********************
أصحاب حور في عربيتين عربيه شذا ومعاها نرمين وهاله وعربيه هدير ومعاها ياره وهويدا كل عربيه منهم الكلام موقفش عن حور وموقفها
شذا بعدم استيعاب : انا لحد لوقتي مش قادره أصدق ان حور ترفض واحد زي يونس الموضوع داه وراه سر والاكيد انه حاجه كبيره اوي
نرمين بتأكيد: فعلا في حاجه غريبه في الموضوع مفيش واحد ست ولا بنت تلاقي الحب والحنان بالشكل داه وترفضه الموضوع وراه إنا والا ليه اتطلقت قبل فرحها بشهرين ومن يومها وهي رافضه الجواز بالرغم من اني جبتلها كذا عريس وكذا حد اتقدملها
هاله بشرود وتفكير في كلام شذا ونرمين افتكرت كلام حور لما اتصلت تسألها على حكم الإجهاض من الاغتصاب
هاله لنفسها: معقول تمون حور مغ لالا اكيد لاء حور طول عمرها قويه طيب إيه ليه سألت بعد طلاقها على طول طيب ليه رفض العريس داه مع انه باين للأعمى انه بيحبها لا داه بيعشقها معول يكون حور حملت وسقطت لالا ايه الهبل اللي بفكر فيه داه
ونفخت بصوت عالي :استغفر الله العظيم من كل ذنب عظيم
شذا :مالك يا هاله
هاله :مفيش مستغربه مش اكتر
شذا بتهكم: ومين سمعك دانا مصدمه صدمه تكفي الجمهوريه وتوزع على البلاد المجاوره
هاله بحده: شذا بالله عليكي داه لا وقته ولا مكانه انه تقلبي الموضوع هزار
شذا بصتلها بغضب وسكتت
في عربيه هدير
هويدا بذهول : يا جماعه حد مصدق اللي حصل والله العظيم انا لحد دلوقتي ما مستوعبه داه كل الرجاله بتجري وراها وهي اللي بتقول لاء
ياره بفضول: ازاي يعني هو في حد تاني غير العريس داه
هويدا بهزه راس: اينعم
ياره بإنصات: مين
هويدا: ياسر ابن عمها
هدير برفعه حاجب: داه اللي هو ازاي اذا كان هو كان معانا
هويدا: والله العظيم زي ما بقولكم كده يوم ما كنا في البركه سمعتهم بودني دي وهو بيطلب يتجوزها وهي رفضت وقالتله وانتا ذنبك ايه تشيل ذنب غيرك بس مفهمتش ذنب إيه
ياره بتوضيح : يمكن علشان كان مكتوب كتابها
هويدا :الله اعلم علمي علمك يا اختي
هدير بشرود في كلامهم افتكرت لما حور اتصلت بيها تسألها على برشام إجهاض ولنفسها : طيب ازاي دي قالت اغتصاب هاااا معقول تكون حور اتعرضت لإغتصاب علشان كده اتطلقت من جبل بدل ما يفضحها بس أمته وازاي احنا اغلب الوقت مع بعض يا بنشوف بعض يا بنتكلم يا فيديو كول لو كان حصل كان بأن اثاره اقل تقدير على وشها او جسمها وحور كمان مش سهل حد يقدر عليها وقفت الورشه قوت جسمها وقلبها اووووف يا الله وبعدين بقى في الخوته دي دانا دماغي وقفت من التفكير الله يهديكي يا حور بقيتي عامله زي اللغز اللي محدش قادر عليه ولا قادر يحله
هويدا بتنبيه: هدير هديييير
هدير بنفضه: إيه وفي إيه يا بنتي فزعتيني
هويدا بسخريه: سلامتك والنبي على قلبك يا شيخه ركزي في الطريق محدش مستغني عن عمره بدل ما أنتي سايقه سرحانه معاكي أرواح بني ادمين يا ماما
هدير بهزه رأس: متقلقيش عيني على الطريق
ياره: بس عقلك مش معاكي
هدير وهي بتبص في المرايه اللي قدامها: مهو اللي حصل داه يلخبط بجد مش قادره استوعبه
ياره وهويدا: ولا احنا والله بس حور مجدتش علينا يعني وطول عمرنا عارفين ان اكتر حاجه تجننها هي ان
حد يحطها قدام الأمر الواقع بتتحول حتى لو مقتنعه مليون في الميه بترفض في نفس الثانيه
هدير بتأكيد: فعلا حور حتة انها اتحطت قدام امر واقع قدام الكل كان ليها تأثير سلبي انها رفضت رفض قطعي
هويدا بتفكير: طيب معني كلامها ايه لما قالتله((((مش محتاجه حب لاني اتربيت في بيت مليان حب عمران بالحب انا لو كنت محتاجه فأنا محتاجه الأمان محتاجه الثقه ))))
هدير: مش عارفه بس الموضوع فيه لغز
ياره: مش يمكن خطيبها او اللي كان خطيبها عمل حاجه خلتها فقدت الثقه في كل الرجاله
هدير ببوادر اقتناع: فعلا مش بعيد
هويدا بفضول: تمام ايه هي بقى الحاجه دي
هدير بتنهيده طويله: للأسف الوحيده اللي تعرف حور ودي مستحيل تنطق لو ماتت وروحها طلعت كده حور دايما كتومه كلامها قليل ووجعها بتحتفظ بيه لنفسها للأسف محدش منا لا هايعرف ولا هايقدر يعرف ما أدم مدفون جوه حور
الكل هز رأسه بتأكيد لكلام هدير وخيم الصمت على العربيه
**********************وصلت حور اخيرا بعد معاناه من الصمت المميت نزلت هدي ودخلت البيت بسرعه ووراها حور ببطئ شديد وكأنها بتأخر العاصفه اللي في انتظارها دخلت وهي بتقدم رجل وبتأخر رجل وبتحاول بكل الطرق الممكنة انها تقدر تعدي الزوبعه دي وتمتص غضب أمها غمضت عنيها لثواني واخدت نفس طويييييييل كتمته ثواني وطلعته مره واحده
هدي دخلت قلعت جزمتها ورمتها على جمب وخلعت طرحتها وحطتها جمبها
حور دخلت ببرود مصطنع ومن غير ولا كلمه اتحركت نحيه اوضتها
هدي بعصبيه: على فين
حور بهدوووء: رايحه اوضتي اغير واريح جسمي من شقا اليوم
هدي بوجع: ليه يا بنت بطني ليه غاويه وجع القلب لروحك وليا الجدع شاري ليه تبيعي
حور اخدت نفس طويل: مش هانضحك على بعض يا أما أنا وانتي عارفين اللي فيها يبقى لزومه ايه كتر الهري الفاضي
هدي بزعيق: هري عشان خايفه عليكي هري عشان الجدع شاري وعمل اللي ميتعملش عايزه ايه فهمني راسك دي فيها إيه
حور بكزه سنان : فيها اني معيوبه وكملت بكسره ودموع لمعت في عنيها لأول مره من يوم اللي حصل فيها اني مدبوحه بدم بارد لا أنفع ليه ولا لغيره الله لا يسيئك يا أما سيبيني في حالي
هدي بدموع نزلت من كسره بنتها ونبره صوتها اللي دبحتها: انتي حالي ومالي وكل ما ليا جربي مش هاتخسري حاجه مش يمكن يطلع ابن حلال قلبي بيقولي انه نصيبك وانتي كمان تتمني يكون نصيبك
حور بعصبيه بتتداري بيها من تورترها: جبتي منين الكلام الخايب داه
هدي وهي باصه في عنين بنتها برغم الدموع اللي له اثرها على وشهم :من عنيكي يا بنت بطني اصل امي الله يرحمها كانت تقولي العين دي بوابه الروح اللي يعرف يقراها يعري اللي قدامه من كل اللي جواه يعرف يقرأه
حور وهي بتغمض عنيها وبتعصرها وبتهز رأسها بنفي فتحت عينها بقوه: مفيش الكلام داه وابوس ايدك ارحميني كفايه جلد روحي لنفسي بلاش تبقى انتي والدنيا ونفسي عليا كتير والله العظيم عليا انا بشر سيبيني في حالي يا أما الله يرضى عليي لو نصيبي هاخد حتى لو غصب عني لو مش نصيبي الله في سماه لو جابلي حته من السما ماهيجمعنا بيت مش داه كلامك
هدي بصتلها بوجع وهزت رأسها: طيب فكري ادي لروحك فرصه تفكري بلاش تسكعي الباب بالشكل داه مش يمكن يكون داه العوض يكون الجبر بعد صبر يكون المنحه جوه المحنه اللي بقالك سنين تايهه فيها
حور بسخريه: يااااه يا أما دانتي بتحلمي دانا من حاره وهو من المدينه انا واحده الدنيا سحلتها مخلتها وهو مولود في بوقه معلقه دهب احنا الاتنين نقيض بعض مينفعش وهارجع واقولك تاني وعاشر مفيش راجل هايقبل على روحه ياخد واحده لمسها غيره بلاش يا أما تنبشي النار اللي تحت الرماد بلاش تطلعيها اول ما تحرق هاتحرقني انا مش لوحدي لاء وهاتحرق عيله النصراوي كلها الله يخليكي خلي اللي في قبوره مدفون ومقبول عليه بلاش تنبشي فيه
رمت كلامها ودخلت اوضتها بسرعه وكأنه شياطين الأرض بتلاحقها قفلت الباب وسندت عليه ونزلت ببطئ وهي حاطه ايدها على بوقها بتكتم شهقتها من انها تطلع صوت نزلت على الأرض وسندت براسها على الباب والدموع خدت مجراها على خدها ونزلت زي سجين اتحرر من سجنه وطلع يجري محدش عرف يوقفه فضلت وقت محستش من الوجع هو طويل ولا قصير تبكي لحد ما حست ان الدموع جفت من عنيها وكأنها استهلكت كل التعب والضغط اللي كانت فيه مره واحده وقفت زي الإنسان الآلي ودخلت الحمام وفتحت الدش ووقفت تحت الميه بهدومها وكأنها بتغسل روحها من همومها فضلت لحد ما حست ان جسمها بيرتعش من البرد طلعت وغيرت هدومها وصلت فرضها وترمت على السرير ناكت من التعب زي القتيل محستش بأي حلجه وكأن عقلها فصل عن كل حاجه علشان ترتاح
مر الليل بسواده على كل اللي حواليه
صحيت تاني يوم وكأن شيئ لم يكن غيرت هدومها ونزلت الورشه حتى من غير ما تصبح على أمها ولا تفطر دخلت الورشه بهيبه معتاده منها طلعت المكتب وبعد وقت نزلت الورشه تدفن روحها فيها
*******************************عند يونس رجع شغله بس مطفي مش زي عادته
مازن دخل بزعابيبه: ايه يا هندسه
يونس بهدوء: ايوه يا مازن
مازن: دانا قولت هاترجع الورشه تصدق كان لايق عليك دور الاسطي
يونس بإبتسامه وجع: مبقاش ليه داعي اللي عملت داه كله علشانها قافله قلبها بميت قفل والف مفتاح
مازن بتروي: مش قولنا هاتسيبها شويه تفكر
يونس بشرود: عارف بس غصب عني عارف لما تقعد شهر كامل قدام عينك من الصبح لآخر النهار تحس ان في حاجه ناقصه شقاوتها عصبيتها برودها مقالبها حتى طريقتها في الشغل حاسس ان يومي ناقص حاجه من غيرها
مازن بهزه راس: عارف وفاهمك بس اصبر داه يا عم بيقولك الصبر مفتاح الفرج
يونس بوجع: منا صابر هو انا املك غير الصبر
مازن بصدق: ربنا يجعلك بعد الصبر جبر ويريح قلبك وبالك
يونس بلهفه: يارب يارب يا مازن ادعيلي
مازن بخبث غمزله بعينه: واقع واقع يعني مفيش كلام طيب ياض اتقل حبه تزداد محبه
يونس بإبتسامه: انا قابل بحبه صغيره بس ترضى يلا يلا خلينا نشوف اللي ورانا
مازن: عندك حق شوف كده التصميم داه بتاع المبني الجديد اللي في القريه بتاع وادي الريان
يونس فرد التصميم وبداء يشتغل عليه ويناقش مازن في كل التفاصيل والتعديلات المطلوبه ومر الوقت وقدر يتناسي يونس اي حاجه الا تقصيره في شغله ومصالح الناس
*************************
جبل طول الليل بيفكر في كلام مزجانجي اللي قلب كل تفكيره من النقيض للنقيض ودماغه عماله تودي وتجيب وكل الطرق مقفله في وشه عقله راسي ومستقر على تفكير صاحبه ونسي انه بعيد كل البعد عن ربنا وبداء يفكر ويخطط ازاي ينفذه وكثف المراقبه حوالين حور علشان يقدر يغتنم الفرصه صح ويرجع حور لعصمته تاني
**********************
مر يومين كل واحد بيهرب من كل اللي حواليه في شغله
ويونس اضطر انه ينزل الموقع يتابع الشغل بنفسه ويشوف التعديلات المطلوبه مع العمال
ياسر راح بيت عمه وخبط بهدوء على غير عادته
هدي فتحت الباب وبترحاب بسيط: ياسر اهلا يا ابني خطوه عزيزه
ياسر بإبتسامه: الله يعز مقدارك
هدي :طيب خش خش مش هانقف نتكلم من على الباب شكلك جاي في حاجه مهمه
ياسر بهزه راس خفيفه: فعلا
دخلوا الاثنين وكالعاده سابت هدي الباب مفتوح قعد ياسر وهدي قصاد بعض
ياسر بإستفسار: ها عملتي ايه مع حور يا مرات عم
هدي بتنهيده: ولا حاجه
ياسر بنفخه: طيب والعمل
هدي بوجع: العمل عمل ربنا هو انا اللي هاقولك على حور دانتا تدري الناس بدماغها الجزمه دي لا قابله تسمع كلمه ولا نصيحه كل اللي طالع في دماغها انها معيوبه ومحدش هايرضى بيها
دموعها نزلت لما افتكرت كسرت حور: طيب قولي يا ابني الله يرضى عليك انا موجوعه على ضنايا البت يا حبه عيني مدبوحه بسكينه تلمه وحتى مش قادره تقول اي والناس مبترحمش والبت كل خوفها من الناس وسمعتها وخايفه انه ميقبلش او يفضحها
ياسر بأسي: طيب نعرفها ازاي انه قابل بيها بكل ظروفها
هدي بشهقه: اوعي يا ياسر سامع اوعي دي تقوم الدنيا متقعدهاش حور نفسها ابيا وعزيزه وموضوع زي داه الله في سماه تقاطع الكل ومستعمل حساب لحد.دي بنتي وانا ادري الناس بيها
ياسر: طيب والحل ايه كل السكك مقفله والجدع صبر مره واتنين ومظنش صبره هايطول حتى لو عاشق الراجل دمه حامي وكرامته غاليه هو راخر ولو اتحمل مرتين فداه هشان مقدر وضعها وظروفها
هدي: طيب ما تتكلم معاها كده بالمهاوده واهو انتا من نحيه وانا من نحيه واصحابها من نحيه يمكن تلين داه بيقولك (((( الزن ع الودان أمر من السحر )))
ياسر بتنهيده: والله يا مرات عم هحاول مع ان بنتك دماغه جزمه قديمه بس ادعي ربنا ييسر
هدي بحرقه: ربنا يهديكي يا حور يا بنت بطني ويطمني عليكي قادر يا كريم
ياسر بصدق: آمين طيب امشي انا بقي اللحق وقتي
هدي بهزه راس: ربنا ينورلك طريقك يا ابني ويكفيك شر أولاد الحرام
ياسر بإبتسامه: اللهم آمين
ومشي وهو بيفكر يفتح الحوار مع بنت عمه ازاي
وبعد تفكير لحظات حسم أمره وشغل عربيته واتحرك في طريقه
وبعد وقت قصير ركن العربيه ونزل ودخل بكل هدوء: الله يا نور يا بنت عامر
حور رفعت وشها من العربيه اللي شغاله فيها ومسكت فوطه علشان تمسح ايديها: علينا وعليك يا ابن عابد
ياسر شد كرسي وقعد عليه: ايه الاخبار
حور بهدوء: تمام الحمد لله الشغل ماشي زي الفل واليومين دول عندنا ضغطه شويه
ياسر بتفهم: كان الله في العون،،حور حست انه عايز يتكلم ومتردد
طيب تعالي على المكتب ورايا كام فاتوره كده محتاجين ينزلو الدفاتر ونتكلم الكلمتين االي محشورين في زورك الا يقفوا فيه يجيبوا أجلك وانتا لسه ورور
ياسر بسخريه: ورور يا بت انا اكبر منك بسبع سنين يا عيله انا راجل من أيام ما كنتي بتقولي على السكر اوكر وبتجري ورا عربيه الرش في الشارع
حور بتهكم: معلش اصل شوفت ابن عمي كان بيجري وراها قبل مني فالعيب ع الكبير لما يعمل العمله مش ع الصغير لما يقلده
ياسر بتبرقه: وكتاب الله يا شيخه ما خدتي من امك الا اللسان هو هو نفس اللسان اللي لما تفتح بوقها يمسح بكرامه اتخن تخين الأرض يلا يلا يا اخر صبري
طلع الاثنين المكتب وقفلت حور الباب: ها هات اللي في جوفك
ياسر ببرود: يونس
حور ببرود مشابه: اشمعني
ياسر بكزه سنان : مش هاندخل لبعض افيه رفضتي الجدع ليه
حور بعصبيه: يا الله هو انا مش هاخلص من الحوار داه انا عارفه وانتا عارف والعارف لا يعرف يا ابن عمي ها في حاجه تاني
ياسر: اه فيه ليه حكمتي انه مش هيقبل طيب ما سبق وانا قبلت
حور بتوضيح: لأنك ابن عمي يعني لحمي ودمي مهما ان كانت المشاكل بس هو غريب ايه اللي يجبره
ياسر :العشق ايه مشوفتيش عشقه ليكي في عنيه يا شيخه داه باين للأعمى
حور بتنهيده: مينفعش المجازفه هنا سمعه عيله النصراوي كلها هاتنزل الأرض
ياسر : تحبي انا اوضحله
حور بعصبيه :انتا مجنون توضلحه ايه وكملت بزعيق ايه شايفني ايه علشان كل واحد يتكلم معايا موضوع وقفلته وخلص الكلام فيه مات واندفن انا كرست حياتي لأمي ونفسي وشغلي وبس
ياسر بمكر: وبعدين أمك ومش هاتعيشلك العمر كله كان عاش ابوكي الله يرحمه ليكي بس دي سنه الحياه كأس وداير وشغلك اللي بتفني نفسك فيه مسيره في الاخر يتقفل لما متلاقيش حد يكمل المسيره من بعدك وبيوت الناس اللي خايفه عليها انها تتقفل هاتتقفل وهاتبقى في الدنيا بطولك كل واحده من صحابك هاتتجوز وتخلف والدنيا هاتلهيها وانا كمان مسيري هاتجوز والدنيا هاتخدني لمسؤلياتي وبيتي وعيالي وانتي هاتقعدي بين أربع حيطان لوحدك فكري يا بنت عامر بس مش بعقلك تؤتؤ بعقل عامر الله يرحمه اللي كان يوزن بلد ربنا عطاكي فرصه وفتحلك باب وانتي بإيدك بتقفليه عارفه ابوكي الله يرحمه زمان حكالي قصه حلوه اوي
قالي مره واحد مركبه غرقت في البحر وكان قاعد على حته خشب في وسط البحر وعمال يدعي يدعي ان ربنا ينقذه عدت مركب ورفض يركب وفضل يدعي يدعي ان ربنا ينقذه وعدت مركب تاني وبردوا رفض يركب وفصل لحد ما عدا اربع خمس مراكب وكل مره يرفض يركب ويدعي لحد ما مات وسأل ربنا ليه يارب مأنقذتنيش
ربنا سبحانه وتعالى قاله انا بعتلك مركب واتنين وتلاته وانتا رفضت انتا سبب هلاك نفسك
الخلاصه يا بنت عمي ربنا بعتني ليكي ورفضتي طليقك طلب يردك وكان ممكن تكلمي الجوازه وتطلقي وتعيشي زي الناس تاني ورفضتي وادي راجل مليون بنت تتمناه عاشقك وطلبك بدل المره اتنين وانتي اللي بترفضي
انتي اللي هاتكوني سبب دمار نفسك لأول مره يا حور اقولك الكلام داه انتي جبانه
حور بصتله بصدمه
كمل ياسر بحسم وجديه وعصبيه: ايوه متتصدميش كده الكل بيحلف بحور القادره زي ما الكل مسميكي وانتي جبانه خوافه خايفه من الناس اللي بتخاف منك أمته الناس بتبطل كلام أمته الناس بتسكت قوليلي خايفه تواجهي خوفك وضعفك واجهي نفسك الأول وبعدين قرري
رمي كلامه زي القنبله وسابها ومشي
فضلت باصه للباب بشرود وكل كلمه نطقها ياسر فضلت بتتكرر زي الشريط في دماغها مره واتنين وتلاته وعشره
محستش بالوقت الا وسبارس داخل المكتب
سبارس: يا اسطى
حور بإنتباه: خير يا سبارس في إيه
سبارس: الساعه 7 ونص والعمال خلصوا ومشيوا مش هاتقفلي الورشه
حور بإنتباه: اه اه يلا بينا
نزلوا الاثنين وقفل سبارس الورشه وحور ركبت العربيه ومحستش الا وهي بتقف عند الشلال المكان المفضل ليها نزلت من العربيه وهي تايهه يا تري هي صح ولا غلط يا تري يونس فعلا ممكن يقبل بيها ولا لاء مسن اللي صح ومين اللي غلط
وفي وسط داه كله سمعت حد بينادي عليها……
يا تري مين اللي بينادي على حور ….؟
يا تري جبل بيخطط لأيه…..؟
يا تري حور فعلا هاتدي فرصه ليونس ولا لاء…..