رواية الملك النمر الفصل العاشر 10 بقلم بيتر نيدفيد

رواية الملك النمر الجزء العاشر

رواية الملك النمر البارت العاشر

رواية الملك النمر الحلقة العاشرة

بعد مرور 10 سنوات
جزيرة العراة اللي بتصل مساحتها
لـ 2 مليون كم مربع ( ربما هى نفسها جزيرة جرين لاند فى عصرنا الحالي )
أطلقت صوفيا عليها أسم “هيبرو” نسبة الى المدينة الاصلية ليها (مدينة “نيبرو”، )
وقدرت توحد قبائلها وحولتهم لشعب واحد بلغة واحدة وهي لغتها ، وحولت ابنيتهم الى مباني حجرية بدلا من الخيم وعملت مصانع مختلفه ومباني مخصصة للتعليم ومستشفيات لعلاج المرضى وضمت الغابات لسيادتها للتحكم في الزراعة والمحاصيل المطلوب وأسست نظام وقوانين الحكم
وعملت نظام للجيش والشرطة الداخلية .
وشكلت مجلس لادارة المدينة الجديدة مكون من ٧ مسؤولين كبار
واطلقت عليهم مجلس “الرومايكنز ” وهم :-
1-“ماردي “مسؤول الصناعات والانتاج المحلي
2-“لابو” مسؤول للزراعة والمحاصيل والمنتجات الغذائية
3-” كالي ” مسؤول التعليم وتطويره
4-“فيدال “قائد الشرطة لادارة الشؤون الداخلية بما فيهم التعداد والتنظيم السكاني
5-“ماكونا “قائد البحار ( مسؤول عن السفن الحربية وعن مراكب الصيد والصيادين ايضا وكل مايخص البحر مسؤوليته )
6-“صاميل “مسؤول الصحة والرعاية
7- “لامك” الوزير الأعلى ونائب الملكة و مسؤول عن أدارة الرومايكنز من بعد الملكة ومسؤول عن كل كبيرة وصغيرة في مدينة هيبرو الجديدة …
أصبحت مدينة ناشئة ولكن قوية بفضل نظامها وقوانينها ، وتحصنت بالابراج والاسوار كالممالك بشكلها المعروف ..
وأهل المدينة شافوا صوفيا إنها ألأم الكبيرة وملكتهم ومعشوقتهم ، لان بفضلها حياتهم تحولت من شكلها البيدائي لشكلها الحضاري الحالي ، والجميع كانوا على استعداد يضحوا بارواحهم باشارة من ايديها لأجل ارضائها فقط ..
اما الأمير هرماس فأصبح محارب بارع وقوى البنيان ، قوي وسريع ، وذكي ، ومتواضع بيحب الناس وبيخدمهم وبيساعدهم بنفسه في اغلب الامور ، كل اللي عنده مشكلة او أزمة كان بيلجأ للأمير هرماس وبتتحل على الفور ..
وكان بيشرف بنفسه على تدريباتهم وتعليمهم وصناعتهم وبيتدخل في كل شئ وبيكتسب معرفة بالاحتكاك المباشر بجميع الفئات من أهل المدينة
و خصص مكان لتربية النمور ، ولكن كان معاه نمر اساسي مربيه من طفولته هو صديقه الاقرب ، النمر ” ليبو ” شدة ارتباط هرماس بالنمر صديقه وصلته انه قدر يفهم لغة النمور ، وطريقة التواصل بينهم واخضاعهم وسيطرته عليهم ، وكانت الاهالي بتشوف انه يملك قدرة خارقه وأنه بيشبههم في صفاتهم وقدراتهم ، فكان محبوب ومهاب من الجميع ..
**************
في القصر الملكي لمدينة نيبرو
بيدخل هيرون بخطوات عسكرية سريعة وبينحني قدام الملك وقال:-
– مولا الملك الحارق
= هيرون القوي والشجاع ، الأنجاز اللي حققته بضم أراضي “الميندا ” لمملكتنا يستحق مكافأة كبيرة تخصص لأجلك اطلب مني ماتشاء
– أشكرك يامولاي بفضل حكمتكم وارشادكم قدرنا نحتل مدن مجاورة واخرهم مدينة الميندا التي لاتقهر زي مابيقولوا ، واراضينا بتزداد في التوسع ، وقوتنا بقت مرعبة لكل العالم
= عظيم جدا ياوزيري الأعلى وقائد جيوشي ، قولي طلبك حالاً وهيكون مجاب مهما كان
– اللي يشوفه الملك مناسب ليا هو اللي هيسعدني أكتر ، ويكفيني أن جلالتك راضي عن اللي بعمله
= ههديك القصر القديم يكون ملكك من ألنهاردة و 10 الاف قطعة ذهبية من خزينة المملكة عشانك
– غمرتني بكرمك وعطفك ياجلالة الملك ، لكن في امر هام احب أبلغك بيه يامولاي
= قول ما تشاء
– في مدينة الميندا وبعد اقتحامها ، قبضنا على تاجر غريب عن المدينة وقال انه بيجمع أقمشة عشان يتاجر بيها في مدينة “هيبرو ”
= هيبرو ؟! ماسمعتش أبدا عن مدينة بالأسم ده ، ده أكيد شخص مختل
– للأسف بعد عملية بحث مكثفة وبعد ما بعت اتنين من الكشافين بتوعنا للمكان اللي اتوصف من التاجر ، أتاكدت ان في جزيرة كبيرة مبني عليها مدينة بمساحتها بالكامل غير ان في غابات بمساحات واسعة تابعة ليهم
= هيبرو ! تشبه اسم مملكتنا ، وياترى أيه مدى قوتهم وتطورهم ؟
– هي مملكة ناشئة وبتحكمها ملكة اسمها الملكة الأم وده لان الشعب هناك بيناديها بالأم الكبيرة
= أكيد ليها أسم ، ماعرفتش اسمها ؟
– ماعرفتش لسه يامولاي ، لكن اظن أن الاهم اخضاع المملكة دي لينا وأحتلالها والاستحواذ على خيراتها ونولي هناك حاكم من رجالنا يدير شؤنها وتكون تابعة لمملكتنا
= اعرفلي تعداد شعبها و تعداد جيشها وقوة تسليحهم ومدى قوتهم ومهاراتهم وندرس الأمر ومن بعدها نجهز حملتنا العسكرية ضدهم
– أمر مولاي
خرج هيرون وساب الملك في حيرة وتفكير عميق ، عن المدينة المجهولة اللي تشابه اسمها مع اسم مملكته وازاي ظهرت وامتى ؟ وقال في نفسه عملية بناء مملكة كاملة تحتاج لسنوات ! ازاي ماكنش عندي علم بيها !؟
وفي اللحظة دي قطعت ماجدوليا تفكيره بدخولها جناحه مع ابنها الأمير ” دراجو” وقالتله :-
– الحارق مهموم وقلقان
= فعلاً ياماجدوليا ، كنت بفكر في مملكة جديدة أتوجدت على الارض فجأة واسمها هيبرو ، الحل الوحيد انها ازاي اتبانت على مدار سنوات بدون علمي ان اللي بناها الشياطين
– او صوفيا
= صوفيا ؟!!
– بقت الملكة صوفيا دلوقت بشكل رسمي
= أنتي متأكدة من كلامك ؟
– متأكدة جدا
= عرفتي منين وازاي
– معقول بتسألني السؤال ده ؟ عرفت بموهبتي
= وليه ماقولتيش قبل كده !
– لأنك مش المختار عشان تقف قدامها
= يعني ايه كلامك وضحيلي فوراً ، انا الملك الحارق أعظم الملوك وكل سكان الأرض بتترعب من ذكر اسمي ، انا قادر أحطم اي مملكة في ايام معدودة مهما كانت قوتها
– أنا مايهمنيش رأيك في نفسك ، يهمني المستقبل اللي شوفته انا ، دراجو أبني هو اللي هيحطم صوفيا وأبنها ومملكتهم
= هبيدهم ياماجدوليا همسحهم من على وجه الارض ، وهرفع رأيتي على جثمان صوفيا وابنها
– أنا قولت اللي أعرفه وانت حر ، هلاكك هيكون على ايد هرماس
= انا هقود الجيش بنفسي ، وهرجع براس صوفيا وهرماس عشان تعرفي مين هو الحارق
– بخروجك من القصر معناه تسليم أمانة العرش لأبنك دراجو في مراسم ملكية قدام الشعب حسب قواعد المملكة
= دراجو لسه طفل عمره ٩ سنين ، أمانة العرش تتسلم للامير الاكبر والارشد
– ومين هو الأمير الأكبر تقصد أبن لوفي زوجتك القديمة
= اذا كنتي بتتكلمي عن قواعد المملكة فهي دي القوانين
– ماليش دعوة بالقوانين ، انا فوق القانون وأبني هيتسلم العرش لحين عودتك من الحملة ده اذا عدت سالم
= ماجدوليا ، انا بتمالك اعصابي لاقصى درجة ، وبحذرك من اسلوب الاوامر اللي بتستخدميه ضدي ،حذاري تستمري في أشعال غضبي
– لو أبن لوفي هو اللي استلم العرش هيتقتل وهستبدله بأبني ، قدامك خيارين ، أبني يتسلم العرش منك او يتسلمه مني ، فكر وخد وقتك
= أنتي ازاي بتهددي الملك ؟ جاوبيني ؟؟؟؟
– مش تهديد يامولاي ، ده القدر ، من اول يوم شوفتك وقولتلك ان ابننا هو اللي هيعتلى العرش من بعدك ، أنت اللي نسيت كلامي
= فاكر ، لكن ازاي هسلم العرش للامير الاصغر ، ده مخالف للقوانين والشرعية
– اعتقد الحارق أكتر شخص مش بيلتزم بقوانين في الارض ولا مع ابني أنا هتلتزم بيها ؟
= أيه أهدافك ياماجدوليا ؟ مستعجله على تولي دراجو العرش وحتى ماقولتيش عن صوفيا ومملكتها الجديدة برغم انك عارفه واختارتي تخبي عليا ، أيه أهدافك !!؟
– هو دراجون يبقى مين غير ابنك الأمير اللي هيحمي مملكتك من بعدك هدفي الحفاظ على أبني ومساندته وإخضاع اعدائه تحت رجليه
= انا ماطلبتش العرش ليا ، أنا بطلب تسليم أمانته لأبنك بشكل مؤقت لحين عودتك بسلام ..
بص الملك لـ دراجو وقاله :-
– تقدر تحكم مملكه يادراجو
= أقدر أحكم ممالك يامولاي
– نبرتك ونظراتك قوية وكلامك أكبر من سنك ، ده طبعا بفضل تربية ماجدوليا ليك
= مولاتي ماجدوليا تاج على راسي وكلامها مظبوط
– تقصد أيه بكلامها مظبوط أي كلام ؟
= هستلم العرش سواء من جلالتك او من اخويا
إتسعت عين الملك من اثر الصدمة وبص لمجادوليا بغضب وقال :-
– دي تعاليمك لإبنك ياماجدوليا
= إنت ماتعرفش حاجه عن تعاليمه يامولاي ، أنا عودته يتعطش للدم من دلوقت
– انا صحيح عايزه ملك قوي وشجاع ودموي لكن مش ضد أخوه
= العرش مابيعترفش بالاصدقاء ولا الاخوات ، العرش للقوي فقط واللي يقدر يحكم بالحديد والنار
شاف الحارق الشر والكراهية والدم في عيون ماجدوليا ودراجو وشعر بالاستسلام قدام رغبتهم ، لحماية أبنه الاكبر هواش ورفع ايده وأشار ليهم بالخروج من جناحه ودخل في تفكير عميق ..