رواية المكيدة الفصل الخامس 5 بقلم أمل عبدالرازق

رواية المكيدة الفصل الخامس 5 بقلم أمل عبدالرازق

رواية المكيدة الجزء الخامس

رواية المكيدة البارت الخامس

رواية المكيدة الحلقة الخامسة

– نوال: قومي يا اختي نموسيتك كحلي
– ريم صحت من النوم مفزوعه وقالت: بسم الله الرحمن الرحيم، انتِ بتعملي ايه هنا
– نوال: بعمل ايه! بقولك قومي مش فاضيين مافيش وقت للمرقعة
– ريم: انا عايزه افهم انتِ ازاي تدخلي عليا أوضة نومي وازاي اصلا دخلتي شقتي وجبتي المفتاح منين، هو انا عايشه في قصة رعب ولا ايه، وبعدين عايزاني اقوم اروح فين…
– نوال: بصي يا شاطره انا مش محتاجه إذن عشان ادخل شقة ابني، ولو على دخولي ازاي معايا لشقتك بدل المفتاح عشره، قومي روقي البيت وشوفي مصالحنا يلا
– ريم: ومين اللي سمحلك تدخلي شقتي بدون إذن مني، شقتي دِ مملكتي ليا انا وعز، حضرتك تدخليها بأي حق، تدخلي أوضة نومي ازاي انا هتجنن
– نوال: انتِ لسه شوفتي جنان، قومي ومتجبيش أخري
– ريم: انا عايزه حضرتك تجيبي اخرك بقى، ما هو اللي في دماغ حضرتك مش هيحصل
– نوال: ولازمتها ايه حضرتك و انتِ بتكلميني كأني بنت صغيره واقفه قدامك، سيبك من كل دا انا عايزه اعرف ايه اللي في دماغي انتِ مش هتخليه يحصل
– ريم: في ايه جوزتيني ل ابنك وكنتي بتتعاملي معايا كويس طول ما انا مخطوبه ليه و في ايه بردو عايزه تخربي بيتي ولسه مكملتش في بيتكم اسبوع وعايزه ابنك يطلقني، مفتاح شقتي ممنوع يكون مع حد غيري وحضرتك بتقولي ان معاكي بدل النسخة عشره، وشقتي مينفعش تكون مستباحة وحد يفتحها عليا او يدخلها بغير استئذان، في خصوصية لازم تبقى بعيد عن عيون الناس، ابقى نايمه في أمان الله ألاقي حماتي داخله أوضة نومي بتزعقلي عشان اصحى، هو في ايه بجد، بزمتك ترضي ان هناء بنتك يحصل معاها كدا
– نوال: و انتِ بقى جايه تعلميني الأدب وتقوليلي ايه اللي يصح و ايه اللي ميصحش، مش كدا
– ريم: لا بالعكس انا عايزه اعيش في امان وبالي يكون مرتاح، عايزه حضرتك تتعاملي معايا بما يرضي الله و انا اوعدك هكون زي بنتك، اكيد الكل عارف ان مرات الإبن مش خدامه ولا جايه في البيت تخدم اهل زوجها، هي بتساعدهم زوقيًا منها، إنما مش مجبره أبدًا، غير كل دا هناء بنتك معاكِ يعني هي أولى بخدمتك مش انا، ومع ذلك انا مش عندي مشكله اساعدك و انزل البيت بس على الاقل تحترميني وتحترمي خصوصيتي مش تدخلي عليا أوضة نومي!
– نوال: تعرفي يا ريم يمكن لو واحده تانيه غيرك كانت مرات ابني كنت استوعبت الكلام اللي بتقوله وقولتلها عندك حق وفعلا انا مرضاش لبنتي كدا، لكن انتِ لأ، زمان و انا في سنك انكسر قلبي و زي ما انكسر قلبي انتِ كمان لازم تعيشي اللي انا عيشته وتدفعي التمن،لازم اخد حقي
– ريم: تمن ايه و اعيش ايه، هو انا اعرفك اصلا، في بيني وبينك عدواة و انا معرفش، دا انتِ اكبر مني بأكتر من ٢٥ سنه، حق ايه اللي ليكي عندي؟! حرام عليكي عايزه تإذيني ليه، ايه علاقتي بكسر قلبك مش فاهمه
– نوال: ذنبك الوحيد انك بنته، انتِ اكتر حاجه هتوجعه وتخليه مكسور قدامي، ذنبك يا ريم انه بيحبك اكتر من روحه ولو اتأذيتي هينكسر وهيبته تروح، هشوفه مذلول اخيرًا
– ريم بدأت تفقد اعصابها وقالت بصوت عالي: تقصدي مين بكلامك، انا هتجنن حرام عليكي سيبيني في حالي
– نوال مسكت ريم من شعرها وجرتها لبرا الأوضة وهي بتقول بكل غضب: اسيبك في حالك ازاي و انا بخطط لليوم دا من سنين، اسيبك في حالك ازاي و انتِ وسيلتي الوحيدة عشان اكسر نفسه، انا هفضحك فضحية مستحيل تخطر على بال حد، ابوكي هيخسر كل حاجه
– ريم: ااااااااااه حرام عليكِ سيبي شعري، عايزه ايه من ابويا يا مجرمه، ابعدي عني يا ظالمه، والله ما هسكت على اللي بيحصل فيا دا، بقولك ابعدي عني
– نوال سابت شعرها وقعدت قدام ريم وعينيها كلها تحدي وقالتلها: اللي عندك اعمليه، ارفعي راسك وركزي كويس مع اللي واقف قدامك
– ريم بصت قدامها شافت راجل واقف بيتفحصها بنظراته المخيفة و المريبه، ريم خافت جدًا وقلبها اتقبض وبدأت تصرخ بأعلى صوت وتقول: انت مين وبتعمل اي هنا، انتو عايزين مني ايه، حرام عليكِ انا معملتلكيش حاجه
– نوال: زي ما فهمتك بالظبط يا محسن، هتخليها تفقد الوعي وتشيلها وتدخل الاوضه و انا هصوركم كام صوره مش هيظهر فيها وشك نهائي بس اظهرلي وش الست هانم و انت شايلها بين ايديك وكدا مهمتك خلصت
– ريم كانت بتبكي بقهرة وحُرقه وقالت لنوال: ابوس ايدك ما تعملي فيا كدا، حتى لو في بينك وبين ابويا اي خلاف انا ذنبي ايه، انا زي بنتك حرام عليكي، ارجوكي ارحميني متعمليش فيا كدا
– محسن: لازم نكتفها الأول يا ست نوال
– نوال: كتفها و اعمل اللي انت شايفه صح
صوت صراخ ريم كان عالي ووصل لهناء وطلعت تجري على شقة اخوها تشوف ايه اللي بيحصل فوق وبدأت تخبط على الباب وتقول: مالك يا ريم بتصوتي كدا ليه، افتحي الباب يا ريم فيكي ايه يا بنتي
– ريم: إلحقيني يا…..
ريم لسه مكملتش جملتها وفجأة صوتها اختفى وبدأت هناء تخبط على الباب اكتر وحاولت تكسره بس كان الباب صعب انه يتكسر فخافت هناء وبدأت ترن على ريم كان موبايل ريم مغلق، رنت على امها سمعت صوت موبايل امها جوا في شقة ريم فعرفت ان امها ليها يد في صراخ ريم ومن غير اي تفكير رنت على عز تستنجد بيه
– عز: السلام عليكم، عامله ايه يا هناء
– هناء : انزل مصر بسرعه يا عز ريم مراتك في خطر
– عز رد عليها بخوف وقلق: مالها ريم يا هناء، مراتي جرالها ايه، انا برن عليها من الصبح مبتردش، انطقي يا هناء ريم حصلها ايه
– هناء: انا كنت نايمه صحيت على صوت صراخها وكانت بتتطلب المساعده وبتقول حرام عليكي انا عملتلك ايه عشان تإذيني، كانت بتعيط وتصرخ بصوت عالي ولما طلعت اشوفها بدأت اخبط على الباب وفجأة صوتها اختفى وكأن مافيش حد في الشقه
– عز: اتصرفي يا هناء و اكسري الباب و ادخلي لريم بسرعه، مسافة الطريق وهكون عندك بس المسافه كبيره، حد يدخل لريم يا هناء، بقولك امك معاها نسخه من المفتاح خديه منها وشوفي ريم، رني على حمايا هو بعدنا بكام شارع يجي يلحق ريم، بسرعه يا هناء بالله عليكِ
– هناء قالت بخوف كان باين في صوتها: انا رنيت على ماما سمعت صوت موبايلها جوا شقتك
– عز: و امك تليفونها بيعمل ايه جوا شقتي، ومراتي بتصوت يا ترى عملتي ايه في مراتي يا ماما، انا عارف انها مش هتجيبها لبر
– مسعود: في ايه يا ابني متعصب ومتوتر كدا ليه
– عز: انا نازل مصر حالا
– مسعود: ليه يا ابني، دا احنا لسه واصلين من ساعتين
– امي مش هتسيب ريم في حالها ولا هتسيبني اعيش مرتاح، طالعه لمراتي شقتها وريم بتصوت والباب مقفول عليها، انا نازل مصر حالا
– مسعود: رجلي على رجلك يلا بسرعه يا ابني، امك يومها مش فايت انا استحملت بما فيه الكفايه
– عز: انا خايف على ريم اوي، هناء بتقول انها كانت بتصرخ بأعلى صوت وبتقول حد يلحقني وفجأة صوتها اختفى
– مسعود: انا هرن على عماد يروح يشوف في ايه، ان شاء الله خير
_______
– نوال: اطلع انت من الشباك زي ما دخلت محسن هتلاقي السطح والباب التاني انا سيباه مفتوح عشان تخرج منه ، مش عايزه حد يلمحك وخلي بالك من الجيران لو حد شافك هنروح في داهيه
– محسن: متخافيش يا ست هانم انا محسن بردو و اكيد دا مش اول تعامل بينا يعني، المهم فلوسي فين
– نوال: فلوسك اهي وعليهم ألفين زياده كمان بس تختفي خالص ومتظهرش تاني
– محسن: ايوه بس في حد خبط على الباب وسمع صراخ البت دِ، وكمان تليفونك رن وممكن تورطك
– نوال: لأ دِ تبعي وفي صفي متقلقش منها، اطلع انت بس عشان انا هكلم ابوها والدنيا هتتقلب
_______
– عماد: ألوو مين معايا
– نوال: انا نوال حماة ريم بنتك، معلش يا استاذ عماد عايزاك في موضوع ضروري
– عماد: خير ان شاء الله يا ست نوال، ريم كويسه؟
– نوال: مش عارفه اقولك ايه بس، ريم بنتك عامله كارثه و انا مش عارفه اتصرف ازاي
– عماد: كارثه! كارثة ايه اللي بنتي عاملاها
– نوال: لما تيجي هتفهم كل حاجه تعالى بسرعه عشان نلحق نتصرف بس، وبلاش تعرف ام ريم حاجه عشان الموضوع ميكبرش
– عماد: مسافة الطريق وهكون عندك
______
– مسعود: ايوه يا عماد انت فين
– عماد: انا في مشوار يا مسعود ومش فاضي دلوقتي هكلمك وقت تاني
– مسعود: لأ سيب اللي في إيدك و اطلع على بيتنا دلوقتي و انا جاي في الطريق بس انت اسبقني
– عماد: هو في ايه يا مسعود، مراتك لسه رانه عليا وقالتلي تعالى في مصيبه و انت كمان رانن تقولي اطلع على بيتنا، بنتي جرالها ايه حد يفهمني، اقسم بالله لو بنتي حد لمس منها شعرايه مش هرحموا
– مسعود: يا عماد انا زيي زيك، هناء بنتي رنت قالت تعالوا الحقوا ريم بتصوت ومش بتفتح الباب، راجعيين مصر اهو ومعملناش أي حاجه
– عماد: بنتي مالها يا مسعود، بنتها جرالها ايه، مراتك رانه تقولي متقولش لحد وتعالى عشان بنتك عملت كارثه، كارثة ايه يا مسعود، هي بنتي لحقت تقعد في بيتكم يومين على بعض!
– مسعود: انا برن على نوال مش بترد عليا، روح يا عماد بسرعه وخليني معاك على المكالمة، و انت يا عز سوق بالراحه هتخلص علينا خالص بسواقتك دِ
______
– ريم بدأت تفوق وكانت دايخه وتعبانه جدًا؛ لأن نوال كان معاها حقنه خليتها تفقد الوعي لفترة وبدأت تفوقها: ااااااه راسي هتنفجر، انا فين وبعمل اي هنا
– نوال: بقى انتِ يا مقصوفة الرقبه بتخوني ابني، دا انتِ مكملتيش اسبوع في بيتنا يا قليلة التربية
– ريم بدأت تستوعب اللي حصل وبدأت تصرخ تاني وتعيط وقالت لنوال: انتِ عملتي ايه فيا منك لله، خيانة ايه اللي بتتكلمي عنها، الخيانه دِ أمثالك بس اللي يعرفوها، عملتي فيا ايه يا ظالمه
– نوال: وكمان ليكي عين تتكلمي بعد اللي عملتيه يا مقرفه، اهلك معرفوش يربوكي صحيح
– ريم: انا عملت ايه! انتِ هتكذبي الكذبة وتصدقيها، انا أشرف منك، والله مش هسكتلك أبدًا والبيت دَ مش هقعد فيه ثانية زياده انا هعرف اتصرف معاكي
– نوال: لأ وبتعرفي تهددي، ابوكي جاي يشوف بنته الجميله اللي خلت راسه في التراب
– ريم: انتِ مش بتخافي ربنا، مش خايفه لما توقفي قدام ربنا وتتحاسبي على عملك في الدنيا، بتعملي معايا كدا ليه، جايباني البيت المعلون دَ عشان تعملي فيا كدا، طب ليه!
– نوال: عشان أوجع قلب ابوكي عليكي زي ما وجع قلبي زمان لما سابني ومشى وقلبي بينزف وراه
– ريم: و انتِ تعرفي ابويا منين، سابك امتى و ازاي وهو اصلا عمره ما شاف وشك ولا اتكلم معاكِ، ازاي و انتِ داخله بيتنا بكل حب وقولتي مش هلاقي ل ابني زي ريم، جايه دلوقتي تتهميني بالباطل، مش خايفه من ربنا
– هناء دخلت أوضة ريم وقالتلها بلهفة: انتِ كويسه يا ريم؟ مالك يا حبيبتي فيكِ ايه، ليه كنتي بتصوتي
– نوال: انتِ ايه اللي جابك هنا ودخلتي ازاي يا هناء
– ريم: إلحقيني يا هناء، امك كانت مكتفاني وجابتلي راجل الشقه وقافله عليا الشقه وخدرتني
– هناء: الكلام اللي بتقوله ريم حصل يا ماما؟
– نوال: المفعوصة دِ بتخون اخوكي، ما صدقت انه سافر وجابت راجل البيت
– ريم: والله العظيم ما عملت كدا يا هناء، مستحيل اصلا اعمل كدا، امك اللي بتقول ان في بيتها وبين ابويا طار وهتخلصه فيا، امك اللي جايبه الراجل وقافله عليا الباب وواخده موبايلي وقفلاه، قالتله عايزه اصورك معاها وفجأة هي اديتني حقنه وغبت عن الوعي ومش عارفه ايه اللي حصل،
– هناء: انا قلبت البيت كله عشان الاقي مفتاح لشقة عز، كنت بدور في الأوضة بتاعتك يا ماما وبرفع راسي شوفت راجل بينط من الشباك وبيتسحب على سطح الجيران وصورته بسرعه
– نوال: صورتيه! يا غبيه صورتيه ليه عايزه توديني في داهية، هتفضلي غبيه لحد امتى
– هناء: غبيه ليه! غبيه عشان عايزه اكشف ريم والراجل اللي كانت بتخون اخويا معاه، انا هخلي عز يشوف صورته ويدور عليه عشان نعرف ايه اللي بيحصل هنا
– نوال: هاتي الموبايل حالا واحذفي الصور دِ بدل ما اخرب بيتك اكتر ما هو خربان
– هناء: مافيش موبايلات ولا صور هتتحذف الا لما افهم في ايه
– نوال: يا غبيه انا اللي جبت الراجل دَ عشان نخلي راس ريم وابوها في الأرض ويكونوا تحت طوعنا ونبتذهم بالصور، وبدل ما نغير القايمه هناخد كل املاكه وتبقى ب اسمك
– هناء: اسمي انا! اشمعنا ب اسمي انا يعني
– نوال: لأن انتِ اول فرحتي وطالعه ل امك حبيبتك إنما عز ضعيف وجبان وبعد ما هيعرف حقيقة مراته اللي هي اصلا خطتي هيتصدم وهيكتئب إنما أنا و انتِ هنطرد ريم و أهلها في الشارع وكله في الاخر هيكون ماك بنتي هناء نور عيني، هاتي يا حبيبة ماما الموبايل عشان نمسح الصور دِ بدل ما تضيعنا
– هناء: حاضر يا ماما انا هحذفهم حالا، انا بحبك اوي يا احن ام في الدنيا، انا فعلا مش عارفه من غيرك كنت هعيش ازاي، انتِ اذكى واحده في العالم وريم كدا هتبعد عننا للأبد، هنزل بسرعه افتح البوابه لأن الجرس بيرن
– ريم: حتى انتِ يا هناء هتظلميني، طب انا عمري اذيتك، دا انتِ عندك بنات خافي عليهم، عز و امك عارفين ان جوزك متجوز عليكي بقاله سنتين ومحدش جابلك سيرة مراعاةً لمشاعرك
– هناء: انتِ بتقولي ايه، مستحيل طاهر يتجوز عليا، دا عمل المستحيل عشان يتجوزني، انتِ كذابه
– ريم: اتجوز عليكي بسبب أفعال امك، ساب البلد وسافر واستقر برا وبيبعتلك فلوس عشان البنات غير كدا مش عايز حتى يشوفك، عشان تعرفوا ان ربنا عادل اوي، بالرغم ان امك عارفه لكن سيباكي على عماكي كدا وحتى مش بتتعظ
– نوال: اوعي تسمعي ليها دِ كذابه يا هناء! بتضحك عليكي عشان تكوني في صفها ضد امك، لو متجوز عليكي هيبعتلك فلوس ليه وانتِ عايشه في بيت ابوكي وظروفه متيسره وممكن يصرف عليكي عادي، ليه يبعتلك فلوس تعملي بيت ليكم لوحدكم
– ريم: عشان يرجع بمراته الجديدة يلاقي البيت جاهز، مافيش تفسير غير كدا، عموما هو متجوز وعايش يا هناء و امك بتدمر في حياتك وبتستغلك زي عز بالظبط
– هناء حاولت تظهر متماسكه قدام ريم ونوال وقالت: مستحيل طاهر يتجوز عليا يا ريم، انا عارفاه كويس واللي في دماغك مش هيحصل والصور همسحها و انا مستحيل اخرج عن طوعك يا ماما، هنزل افتح للي بيخبط
_______
– اول ما هناء خرجت رجليها مقدرتش تشيلها وقعدت على السلم تبكي بحُرقه، كانت مصدومه ومش مستوعبه اللي حصل وبيحصل معاها، وكل اللي بيدور في دماغها ان طاهر ليه حق يتجوز عليها؛ لأنها قصرت في حقه كتير وظلمت أهله وسمعت كلام امها وضيعته من إيديها، في الوقت دا بنتها فتحت الباب وعماد طلع على شقة بنته وقبل ما يدخل سمع نوال بتقول لريم:
– ليه تعملي كدا يا ريم، هو عز قصر معاكي في حاجه يا بنتي، ليه الخيانه حرام عليكي، ليه تقصري رقبة ابوكي بين الخلق
– عماد دخل وهو ملهوف وخايف على ريم وشافها قاعده بتعيط جرى عليها وخدها في حضنه وقالها: مالك يا نور عين ابوكي، مين عمل فيكِ كدا ونزل دموعك الغاليه، مالك يا حبيبتي
– ريم مسكت في ابوها جامد وبدأ صوت بكاها يعلى وقالتله: إلحقني يا بابا، ام عز عملت خطة عليا عشان تنتقم منك، جابت واحد الشقة وكتفتني وصورتني وخدرتني يا بابا، شدتني من شعري وجرتني وراها، عذ*بتني يا بابا، خدني من هنا انا مش عايزه اقعد هنا ولو للحظة واحده
– عماد: اهدي يا حبيبتي انا جنبك واوعدك مافيش حاجه هتحصلك، ايه اللي حصل في بنتي يا ام عز، هل الكلام اللي ريم قالته دا حصل فعلا؟
– نوال: بنتك خاينه يا استاذ عماد، بنتك كانت جايبه راجل الشقة و..
– عماد قاطعها وقالها: اخرسي قطع لسانك ولسان اللي يجيب سيرة بنتي، بنتي اشرف من اي حد، انا بثق في ريم اكتر من نفسي، مستحيل بنتي يخطر في بالها حاجه زي كدا، بنتي شريفة وعفيفة واتجوزت ابنك من غير ما حد يغصب عليها عن يدك، بتتهمي بنتي بالباطل ليه، عايزه من بنتي ايه، ريم مين اللي خاينه، اتوقع من اي حد انه يعمل كدا الا ريم، ريم بتتقي ربنا مش زيك، انا مش عايز كلمه زياده، انا مصدق بنتي في كل حرف، ليه بتعملي كدا
– نوال: يمكن لو رفعت النقاب كدا تعرف ليه انا بعمل مع بنتك كدا يا عماد
– عماد اتصدم لما شاف نوال وقالها : مستحيل، ازاي دا حصل، انتِ سميره مش كدا
– نوال: كويس انك عرفتني بعد كل السنين دِ يا عماد، كويس انك عرفت اني سميره، سميره اللي كانت بتحبك ومستعده تعمل اي حاجه عشانك وسيبتها ومشيت، سميره اللي فضلت تخطط كل السنين دِ عشان نشوفك مذلول قدامها، ايوه يا عماد بنتك معملتش حاجه بس في نظر الناس عملت وعملت بلاوي مش حاجه بسيطة
– عماد: وبنتي ذنبها ايه يا سميره، تإذي بنتي ليه، عملتلك اي هي
– سميره: زمان كنت بجري وراك في كل مكان، كانت أقصى أحلامي انك تكون ليا لوحدي، حضرتك عملت تقيل عليا ومسألتش فيا، كام مره اقولك اني بحبك و انت ولا هنا، دخلت الكلية اللي انت فيها بالرغم ان مجموعي كان يدخلني كلية احسن بس انا قولت عايزه ابقى جنبك، خليت ابويا يشغلك عنده وكان ممكن كل املاكه تكون ملكك ما انا بنته الوحيده، الشارع كله كان عارف اني بحبك، كام واحد احسن منك اتقدملي و انت ولا هنا، شوهت سمعتي بسببك وابويا زعقلي وقالي هتتجوزيه بالعافيه ازاي، كنت جارنا ومش مجرد جار كنت بحبك يا عماد
– عماد: ابوكي جه بيتنا وقالي يا تتجوز سميره بنتي وتنفذ شروطي يا اما تسيب المعرض وملكش شغل عندي، كنت هتجوزك ازاي و انا لا عندي شقه ولا وظيفه ثابته، كنت هتجوزك ازاي و انا مش بحبك يا سميره، هو بالعافيه يعني
– نوال: بس انا كنت بحبك وكنت هخليك تحبني يا عماد، كنت هعيش خدامه تحت رجلك، قلبي محبش غيرك ومعرفش يحب غيرك، اتجوزت مسعود وكان متجوز قبلي ومعاه بنت لسه صغيره امها توفت وهي بولدها، وقبلت بيه عشان عارفه انه صاحبك وهو اللي هيوصلني ليك، وفضلت ازن عليه عشان ينقل ويعيش جنبك،غيرت اسمي ولبست النقاب عشان متعرفنيش الا في الوقت المناسب، انت سيبتني ومشيت ومسألتش فيا، قلبي وجعني اوي وقررت اني هاخد حقي منك لو حصل اي
– عماد: مكنتش هتجوزك و أظلمك معايا، أو اعيش في بيت اهلك وألغي كرامتي عشان ارضيكي، بعنا بيتنا وعيشنا بالإيجار لإن والدك ضيقها عليا و امي كانت تعبت، بنيت نفسي هنا من الصفر واتجوزت اللي قلبي اختارها، كانت قاعده في بيتها محافظه على قلبها لصاحب النصيب، تسمعي عن القسمه والنصيب يا سميره
– نوال: انا اسمي نوال مش سميره، مش هكذب عليك و اقولك حبك في قلبي خلاص مش موجود، بالعكس كل ما اشوفك بفتكر الذكريات وقلبي بينبض ليك، تخيل اني لسه عندي امل تكون ليا
– عماد: اتقي الله، انتِ ست متجوزه وجوزك راجل محترم وصاحبي، عيب اللي بتعمليه، انتِ مش طبيعية عقلك فيه حاجه اكيد
– نوال: عقلي وقلبي فيهم انت يا عماد، يعني غلطانه عشان بحبك، غصب عني اعمل ايه، عايز بنتك تكون بخير تعالى انا و انت نتجوز وتكون ليا و اعيش اللي باقي من عمري جنبك وتعوضني عن الأيام اللي كانت من غيرك وتستر بنتك من الفضحية وبلاش تدفع هي تمن وجعك ليا
– عماد: استغفر الله العظيم، أعوذ بالله من الشيطان الرجيم، يا ستي انتِ عايزه مني ايه، خربتي حياتي زمان وعايزه تخربيها تاني دلوقتي، انتِ مش محترمه جوزك بس انا محترم صاحبي ومراتي، انا راجل متجوز وعندي عيال، بحب مراتي وبناتي، وبنتي من اللحظة دِ هتكون في بيت ابوها لحد ما حقها يرجع، انا من الاول مكنتش قابل الجوازه دِ، ان كنت احترمت انك بنت زمان وسكتلك دلوقتي بنتي في الموضوع ومش هسكت، قومي يا ريم إلبسي عشان نمشي
– نوال: مافيش فايده فيك يا عماد، لازم تشوف وشي التاني، شايف الصور دِ يا عماد هتنزل على النت وهفضح بنتك في كل مكان، بنتك العروسة اللي لسه مكملتش اسبوع في بيت جوزها خانته
– عماد: حسبي الله ونعم الوكيل فيكي، انا كنت عارف حقيقتك طول عمري، لو كنت اعرف انك مرات مسعود كنت رفضت الجوازه دِ مهما حصل، بس ابنك وجوزك ناس محترمين ذنبهم ايه بس، الموبايلات دا هيتكسر دلوقتي، والفضحية هتبقى فضيحتك انتِ مش بنتي، بنتي حبيبة ابوها انا في ضهرها ومستحيل يحصل ليها اي حاجه طول ما موجود، فوقي لنفسك ولبيتك الشيطان ضاحك عليكي
– نوال: انت مفكرني بهزر، بضغطه واحده على الزرار دَ بنتك هتروح في داهية يا عماد، انا ضيعت فرص كتير اوي لحد ما شبابي ضاع واتجوزت راجل متجوز عشان تبقى ليا في الاخر، مش هخسر تاني يا عماد
– عماد: عيب اللي بتعمليه لو مش عشانك عشان ولادك، اتقي الله مسعود ميستاهلش منك كدا
– نوال: مسعود مين! مسعود دا انا عمري ما حبيته اصلا، انا استحملته عشان اوصلك بس، ربيت بنته ومتعاملتش على إني مرات ابوها، لكن عز ابني وورقتي الرابحه اللي وصلتني ليك
– رحمه: ايه اللي انا سمعته دَ يا عماد، الست دِ عملت في بينتي ايه وعايزه منك ايه
– عماد: انتِ ايه اللي جابك هنا يا رحمه
– رحمه: هناء رنت عليا وقالتلي تعالي إلحقي ريم
– هناء: يعني كنتي متعمده تخربي حياتي وكنتي السبب ان جوزي يتجوز عليا وتضيعيني انا والبنات
– مسعود: بقى انا كنت مجرد وسيله عايزه توصلي من خلالها لهدفك، سكه يعني
– نوال انصدمت لما شافت مسعود واقف قدامها وقالت: مسعود انت بتعمل اي هنا
– مسعود: نصيبك في الستر خلص يا نوال ولا اقولك يا سميره، اصل انا كنت مع عماد على الخط وسامع كلامك كله يا زوجتي العزيزة، طب ريم ذنبها ايه، وهناء ذنبها ايه! وعز ابنك ذنبه ايه، بتعملي كدا ليه، انتِ مريضة حسبي الله ونعم الوكيل فيكِ
– هناء: دِ صور الراجل اللي كان هنا يا بابا، انا شوفته وهو خارج وروحت بسرعه قولت لعمي سيد جارنا عمل ليه كمين ومسكه وكتفه هو وولاده وقولتله يخليه عنده لحد ما حضرتك توصل
– عز حضن ريم وقالها: حقك عليا انا يا ريم، انا اسف يا حبيبتي، انا غلطان اني وثقت في امي وسيبتك معاها لوحدك، معرفش ان دِ خطتها و ان كلنا مجرد ألعاب بتحركها عشان توصل لهدفها، الأيام معرفتش تنسيها، مش مدركه ان ابوكي سابها وراح لغيرها
– عماد: انا اسف يا مسعود، انا سبب في خراب بيتك يا صاحبي
– مسعود: انت ذنبك ايه يا عماد، بيتي مخروب من زمان بسببها، ربنا أراد انها تتكشف، ربنا اداها فرص كتير عشان تتوب وتفوق وهي مش هنا ومافيش في دماغها غير انها توصل ليك، كام مره ربنا سترها عشان تفوق وهي نفسها أمارة بالسوء
– نوال: انتو كلكم متفقين عليا، عماد كذاب وعامل خطة عليا عشان يخلينا نبعد عن بعض يا مسعود، عامل كل دا عشان بنته تاخد البيت لوحدها
– مسعود: مش عايز اسمع نفسك خالص، تصدقي انا قرفان أبص في وشك اصلا، عموما يا نوال انتِ طالق و انا طلبت النجده وخلاص جايين يخلصونا منك، وفي بدل الدليل عشره والحيوان اللي جبتيه عشان تظلمي بنت الناس اعترف من اول قلم، خلاص يا نوال انتِ خسرتي، متستاهليش تكوني وسطنا
– نوال: و انت يا عز هانت عليك امك، هتسيبهم يعملوا كدا فيا
– عز: كلنا هُنّا عليكي يا ماما، ربنا يسامحك انا مش في إيدي حاجه اعملها
– ريم: مافيش حل غير الحبس يا عمي
– مسعود: لأ مافيش حل ومافيش نقاش في للموضوع دا، واللي غلط لازم يتعاقب و دِ دمرتنا كلنا
– هناء قالت والدموع في عينيها: طاهر اتجوز عليا يا بابا خلاص بيتي اتخرب
– مسعود: نصحتك كتير اوي يا هناء ومسمعتيش كلامي، ومشيتي وراها وكنتي مستعده تخربي بيت اخوكي، دا درس عشان تتعلمي وتربي بناتك كويس، وانا وطاهر متفقين نوصلك انه متجوز عشان تفوقي لبناتك وتربيهم كويس، لكن طاهر هو نازل كمان شهر ومش متجوز ولا حاجه بس عايز يعيش في بيت هادي يا هناء، لو هتتعبي الراجل وتعملي مشاكل يبقى بلاش رجوعك ليه احسن
– هناء: لا يا بابا مستحيل اعمل مشاكل اوعدك اني هتغير للأحسن وهحافظ على بيتي وبناتي
– عز: مسمحاني يا ريم
– ريم: مسامحاك بس بعد اللي حصل مش هقعد في الشقة دِ ثانيه واحده
– عز: حقك يا ريم، احنا هنسافر ونسيب هنا خالص
– مسعود: مافيش سفر محدش فيكم هيبعد عني، مش هعيش لوحدي ، لو على الشقه هجيبلك أحلى شقه يا ريم، و انت يا عز هتشتغل هنا والفلوس موجوده الحمد لله، اعمل المشروع اللي يريحك
– عماد: رحمه انا اسف
– رحمه: انت احسن راجل في الدنيا يا عماد، متتأسفش يا حبيبي انت معملتش حاجه، ربنا ما يحرمنا منك، و خلاص هي خدت جزائها ياريت تتوبي لربنا عشان متتعبيش في الدنيا والآخرة
– نوال: مستحيل يحصل فيا كدا، مش انا اللي هخسر في الآخر، لأ يا عماد مش هسيبك في حالك وهتكون ليا يعني هتكون ليا، لأ مش هخسر، هفضحك يا ريم
– مسعود: اتفضل يا فندم المتهمه في الاوضة دِ، معلش قفلت عليها الباب لأنها بدأت تصرخ وتخبط في الكل تقريبًا اتجننت
– عز: انا زعلان عليها اوي يا بابا، مش عايز يكون مصيرها كدا
– مسعود: يا ابني مهما حصل الشر بيخسر والخير بينتصر في النهايه، وكل واحد فينا بيختار مصيره، وهي اختارت الشر ولازم تاخد جزائها، ربنا عادل اوي ومهما الظالم تجبر ليه نهايه حتى لو شاف إنه ملك الدنيا والظروف مهيأه ليه عشان يظلم هينكشف وربنا بينصر البريء دايمًا، دِ دنيا ولسه في الآخرة عذاب الظالم عند ربنا عسير، كل واحد يا ابني ليه نصيب من الستر والشاطر اللي يحافظ على نصيبه.

تمت…

لقراءة الرواية كاملة اضغط على : (رواية المكيدة)