رواية المبروكة الفصل الثاني 2 بقلم رشا منصور

رواية المبروكة البارت الثاني

رواية المبروكة الجزء الثاني

رواية المبروكة الحلقة الثانية

الست لواحظ…..
ايه يا شعبان فين المطلوب خلينا نخلص مافيش وقت
عم شعبان….
تعالي ورايا يا ست لواحظ ده أنا مجهزلك طلبك ولسه طازة
مشينا وراه لحد ما وقفنا عند قبر’ مفتوح ولقيت الست لواحظ طلبت مني أنزل مع عم شعبان وهو عارف هيعمل ايه قولت لها لأ انتى ناويه ليا ع إيه
الست لواحظ…..
فى ايه ياعين أمك مش عاوزة تتعلمي انزلى مع الراجل وهو بيحط العمل وتشوفيه بيعمل ايه
‏
نزلت معاه وأنا سناني بتخبط في بعض ولقيته فتح الكفن وفتح بوق الميت بالعافيه وقالي حطي العمل بسرعه حطيته وقفل بوقه ورجع الكفن تاني وقالي يلا بينا كنت سامعه أصوات وحاسه بحركه وفضلت اتلفت طول ما أنا ماشيه في المقابر وقربت ع الست لواحظ وقولتها أنا حاسه بحد بيراقبنا وماشي ورانا قالتلي
أمشي وانتى ساكته وركبنا التاكسي وبمجرد ما وصلت ونزلت قالت ليا روحى وبكره الصبح بدري تيجي روحت ع بيت عمي وأنا بتنفض وقولت لهم أنى خوفت اروح المركز لما لقيته جنب المقابر وجريت وفي الليلة دى شوفت كوابيس أن الميت صحي وماسك في رقبتي وفي أصوات صر’يخ وقومت مفزوعه من النوم وفضلت ع كدا لحد ما الشمس طلعت قومت جهزت ونزلت وروحت لها لقيتها حاطه قماش وورق وحبر أحمر وبخور وازايز صغيرة كدا عامله زى ما تكون زيت بس لونه غريب وحاجات تانيه مكنتش عرفاها وقالتلي اقعدى وفتحي دماغك معايا وفضلت تفهمني إزاى نكتب العمل والأرقام والرسومات وفضلنا لحد العصر قولت لها لازم امشي بسرعه علشان عمي وأول ما روحت
عمي…..
كنتى فين يا نهي فضلت واقف على باب الجامعه اكتر من نص ساعه وافتكرتك جيتي البيت كنتى فين
نهي….
صاحبتي اللى كنت معاها امبارح فجأة وأحنا في المحاضرة صر’خت وفضلت تعيط باين عليها اتلبست يا عمي خدتها أنا وزميلي وروحناها البيت وأنت عارف أنا مش معايا تليفون علشان اكلمك ومكنش ينفع اسيبها كدا وأنا الوحيدة اللى عارفه بيتها
عمي….
لا حول ولا قوه الا بالله كويس يابنتي أنك جريتي امبارح ومدخلتيش معاها المقابر
نهي….
دخلت ع الاوضه وفضلت أكتب كل حاجه اتعلمتها علشان منساش وخبيت الورقة معايا احسن حد يشوفها
وتاني يوم قصدت اتعلم سحر المحبه والطاعه وفضلت كل يوم اطلب من الست لواحظ اتعلم حاجه جديده وبردو كنت بنضف واغسل واطبخ لها وأوقات كنت بقعد معاها والزباين عندها بس كنت بحط طرحه ع وشي أحسن حد يعرفني ويبلغ عمي وفضلت ع كدا أكتر من ستة شهور وقدرت بعدها أعمل تسخير القرين
ايوة سخرت قريني لخدمتى علشان اقدر أعرف اللى قدامى بيفكر في ايه وعاوز ايه من غير ما يتكلم وفي يوم وأنا عند الست لواحظ لقيت واحدة قاعدة عوزاها
قدرت اخلي قريني يتواصل مع قرينها وفهمت كل حاجة وعرفت أنها شاكه أن حماتها عامله لها عمل علشان متخلفش وأنها سقطت كذا مره وعرفت أن مافيش ولا عمل ولا حاجة بس مكنش ينفع اقولها كدا قولتلها ياعيني عليكي دى ست مؤ’ذيه أوى
قالتلي بتكلمي عن مين قولتلها حماتك هو في غيرها عملت لكي سحر’ انك تفضلي تسقطي ومتخلفيش علشان تخلي ابنها يطلقك’ قالت ليا انتى عرفتي ازاى باين عليكي مبروكه شوري عليا أعمل إيه قولتلها
الست لواحظ عندها الحل بس زى ما تطلب منك تنفذي وطبعاً لواحظ كانت سامعه كل حاجه وفرحت وبعد ما الزبونه مشيت قالت ليا عجبتيني يابت يا نهي أنا بعد كدا هخليكي تقبلي الزباين
وراحت اديتني مئه جنيه وقتها كان ده مبلغ كويس فرحت أوى وفكيت الفلوس وروحت ل عمي قولت له أنا قبضت شهر مقدم خمسين جنيه من واحدة ست عوزانى ادى ل بنتها درس خصوصي وفرح عمي ومرات عمي قالت ايوة كدا وعرفت من قرينها أنها مستخصرة الفلوس اللي بيدفعها ليا عمي
روحت قولت لها خدى يا مرات عمي العشرين جنيه دول مساهمه منى في مصروف البيت وعمي كان هيرفض راحت قالت له وماله وفيها ايه ودعتلي طبعاً وقولت لها كل ما اقبض أى فلوس هديكي منها وع بالليل نزلت بحجه الدرس الخصوصي وروحت للست لواحظ وبقيت البس عبايه سوداء واحط الطرحه ع وشي ومع الوقت بقيت أنا اللى بقابل الناس واعمل لهم الأعمال وقررت ساعتها أنى اتوسع أكتر علشان كده قررت اروح المقابر واسخر القرين الحر اللى ملوش صاحب واخليه في خدمتى وبقيت املك عشرين قرين ده غير قريني
وهنا قررت اعيش في شقتي وخصوصاً بعد ما ابن عمي ما رجع من السفر وبصراحه مرات عمي ما صدقت لأنها خايفه يكون ليا تأثير على ابن عمي ومصممه تجوزة ل بنت أختها وأنا بينت لها انه زى اخويا مش إكتر وقررت أنى اتجوزه غصب عنها
كنت أقدر اعمله سحر’ محبه لكن أنا عوزاه يحبني ويقتنع أنى مناسبة له ومن غير سحر وبقيت اروح لهم زيارة مرة كل أسبوع واخد فاكهه وخضار وحاجات للبيت وادى ل مرات عمي فلوس قدام عمي واقوم اروق البيت واساعد في عمايل الأكل والغسيل علشان ابين ل سعيد ابن عمي أنى ست بيت شاطره وطوع أبوة وامه وكنت بلاحظ نظرات عنيه ليا وفي مرة روحت لقيت بنت خالته وامها موجودين وجت مرات عمي تقولى تعالي أعرفك على عروسه سعيد بصيت ل سعيد لقيته بيقولي سلمي على سمر بنت خالتي وأختى وقام وسابهم فرحت من جوايا وعرفت انه مش عاوزها بصيت ل سمر وقولت لها الله أكبر عليكي ايه الجمال ده ألف مبروك يا حبيبتي وأن شاء الله الخطوبه امتى يا مرات عمي ولا مش مستهله خطوبه ما تعملوا الفرح ع طول ولا ايه رأيك يا مرات عمي
قالت ليا حبيبتي يا نهي عندك حق ده أنا خطباها ل سعيد من وهى فى ابتدائي شوفتي حلاوتها طلعالي قولت لها بصي يا سمر أى حاجة عوزاها أنا أختك وأخت سعيد قوليلي اروح معاكي نجيب أى حاجة نقصاكي في الجهاز وكنت عامله حسابي وجايبه قطرة وفيها عمل بالكراهية كنت مخليها في شنطتي ع طول وقومت علشان اجهز الأكل وقولت ل مرات عمي ميصحش تقومى وتسيبي العروسه أنا هجهز الأكل وروحت نقطت بالقطرة جوه جزمه سمر وخدت فتله من الشراب بتاعها وبعد الأكل قولت لهم معلشي بقي علشان عندى دروس ومشيت وأول ما روحت عملت عمل بالمرض ل سمر بس من جوايا مكنتش عاوزه أى اذي لها أنا عاوزة اعطل الجوازة لحد ما سعيد يفر’كش الجوازة بنفسه وطورت من نفسي في الشغل وبقيت أنا اللى بشوف الزبائن واخد الفلوس بالنص ده غير اسلوبي في كلام ومنكرش أن دراسة علم النفس كانت لها فايدة كبيرة في تأثيري ع الناس وبالذات الناس المتعلمه كنت بكلمهم بلغتهم بالعقل والمنطق وبقيت اقنعهم بالأعمال وقدرت اكسب كتير واتعرفت عن الست لواحظ بأسم المبروكه بس صممت أن يتعرف أنى بفك الأعمال والاعطال وبس وأنى ماليش في أى حاجة مضره بس كنت بعمل كل حاجه يعني لو محتاجه فلوس من واحدة ممكن اخليها تتعب فجأة واخلي القرين يلعب في دماغها أنها محسودة وتجيلي وياما دخلت ناس في مشا’كل من غير سبب وبمجرد ما أحضر كل حاجه تنتهي ويقولوا ده بفضل بركه المبروكه كنت فرحانه بنفسي أوى
‏وكنت بعرف كل حاجه بتعملها مرات عمي وبعد اسبوع روحت عند عمى وسمعت المفاجأة ……..
‏