رواية البر التاني الفصل الخامس والعشرون 25 بقلم لولو محمد
رواية البر التاني الجزء الخامس والعشرون
رواية البر التاني البارت الخامس والعشرون
رواية البر التاني الحلقة الخامسة والعشرون
مختار / عامله ايه احسن ؟
عبد الله يهز راسه اه
مختار / قالتلك حاجه عندى ؟
عبد الله / ما اتكلمناش غير عندك بتقولك يا انا يا السلاح
مختار / ما اقدرش ما ينفعش تخيرنى انا قولتلها دى حقيقتي دا توبى ما ينفعش اسيبه كانها بتقولى ما تبقاش مختار
عبد الله / هى برده قالت انك هترفض
عبد الله يروح يقعد و يقلع الجزمه و يفرد ضهره
مختار / انت هتنام
عبد الله / بصراحه مهلوك طول النهار ما بعملش اى حاجه خالص
مختار يبتسم و يروح يقعد جنب عبد الله
مختار / كلمتها قولتلها انى بحبها و ما اقدرش اعيش من غيرها
عبد الله يقوم يقعد
عبد الله / و لا هى تقدر تعيش من غيرك و انت عارف و هى عارفه و الكرسي اللى هناك ده عارف بس هيفرق فى ايه النتيجه واحده هى عنديه و انت عندى و ما حدش فيكوا هيتنازل للتانى
مختار و عبد الله الاتنين باصيين فى الارض و شايلين الهم
عبد الله / انا حاسس بيك جدا على فكره امبارح طول الليل ما نمتش من كتر التفكير فى كلامك و اقتنعت بيه … ايه يعنى حتى لو تاجر سلاح انا واثق انك هتحافظ على اختى
مختار / صدقنى الجمله دى فرقت معايا اوى
عبد الله / صدقني انت وجودك فى حياتنا فرق معانا كتير انا هتكلم مع هند تانى و انت كلمها تانى بس بلاش الورد و الدباديب و الشيكولاته و شغل الفرافير ده مش لايق عليك مش مقامك خلاص انت تدخل عليه بقنابل كلاشينكوف تجبلها دبابتين واحده للسوق و واحده للشغل
مختار ياخد عبد الله تحت باطه و يلعب فى شعره و الاتنين يضحكوا
…………………….
فى شقه حامد تانى يوم
كل العيله متجمعه
حمدى / انا مش فاهم فى ايه اللى حصل
محمود / و لا انا كلمنى و هو منهار و بيعيط و يصرخ اللحقونى اللحقونى و ما فهمتش من عياطه حاجه
م حامد / جيب العواقب سليمه يا رب
الباب يتفتح و حامد يدخل يرمى نفسه على اقرب كرسي و الهم راكبه الكل يحاوطه
م حامد / سلامتك يا خويا مالك
ابن حامد / مالك يا بابا فى ايه
حامد / كلو راح شقايا و تعب عمرى راح
م حامد / ليه بتقول كدا يا خويا بس
حامد / عشان دى الحقيقه و انا اللى كنت فاكر نفسي ناصح و انا اللى كنت فاكر نفسي ناصح
حامد يعيط
محمود / ما تنشف كدا يا حامد و تخلينا نفهم ايه الحكايه
حامد / بقولك شقى عمرى راح الفلوس راحت الراجل نصب عليا و خد الفلوس و هرب
م حامد تصرخ
حمدى / انت بتقول ايه بس ما يمكن غلطان عرفت منين
حامد / روحت الاجنس بتاعه لقيت واحد تانى ورانى عقد المكان اشتراه لدواعى السفر خد فلوسنا و باع المكان و هرب
م حامد / ازاى و اشمعن المرادى مهو ياما كسبنا اشمعن المرادى تلاقيه هنا و لا هنا بيشترى معرض اكبر .. اه معرض كبير فى وسط البلد عشان يوسع الشغل امال ايه
حامد / انتى هبله بقولك سافر ساب مصر و سافر كان بيرميلنا الفكه يطمعنا لحد ما طلعنا كل اللى حيلتنا لحد ما اقنعنا اللى نعرفه و اللى ما نعرفوش و لم كل اللى يقدر عليه و هرب
م حامد / يا لااااااااهوى
م حامد تقع فى الارض تليفون محمود يرن
محمود / ايوه يا متر خير
محمود يبص لحمدى و حامد و ابنه مشغولين بيفوقوا مراته
محمود / قبضوا على المجرمين اللى حرقوا المحلات .. انا جاى حالا مسافه السكه مسافه السكه
محمود يجرى و وراه حمدى و مراه حامد فى الارض و ابنها و جوزها بيحاولوا يفوقوها
………………………..
فى السرايا
مختار قاعد على السطح على السور و رجليه لبره و بيقلب الموبايل فى ايده عباده يدخل
عباده / ايه لحقت تزهق من الدنيا و لا ايه
مختار / انت بقيت بتخاف و لا ايه
عباده / امال عبد الله فين
مختار / مع امين بيركبوا خيل
عباده / عاقل عن اخته و امهم كمان عاقله
مختار / حلاوه روح مش اكتر
عباده / واثق اوى انها هتكمل يعني
مختار يبص لعباده
عباده / ان رفضت هتجبرها
مختار / لا طبعا انت بتقول ايه
عباده / يعني هتسيبها
مختار يبص الناحيه التانيه
عباده / هتسيبها ؟
مختار / مش هترفض
مختار يسيب المكان و يمشي و عباده متابعه
……………………
فى شقه محمود
اسراء قاعده حاطه ايدها على خدها محمود يدخل و هو بيطوح يترزع على اقرب كرسي
اسراء / عملت ايه
محمود / بتنا اتخرب يا اسراء
اسراء / ايه الجديد ما هو مخروب من امبارح
محمود / الاتنين اللى حرقوا المحلات لما قبضوا عليهم قالوا فى التحقيقات انى متفق معاهم و مديهم فلوس عشان اقبض التامين
اسراء / يعني ايه و هم صدقوهم
محمود / كلمتى قدام كلمتهم و طبعا شركه التامين ما صدقت
اسراء / و بعدين هنعمل ايه احنا كدا خسرنا كل حاجه احنا ما عدش حيلتنا حاجه
محمود / حمدى جاى و ان شاء الله هنلاقي حل
اسراء / و سي حامد بيه مش هيجي و لا ايه ما هو السبب فى خيبتنا السوده
محمود / حامد ما عدش حيلته اللى يساعدنا بيه حامد ما عدش حيلته الا مرتبه
محمود يقوم يفتح الباب على يوسف قاعد حزين محمود يتنهد و يقفل الباب تانى
…………………
فى اوضه هند
هند نايمه مريم تفتح الباب بالراحه و تدخل تصحيها بالراحه
مريم / هند .. دودو … هند
هند تصحى و تتعدل تقعد
مريم / كل ده نوم قومى كدا اقعدى معايا شويه … فطرتى
هند / فطرت و نمت
مريم / هو انتى زعلانه منى
هند / انا مش زعلانه من حد
مريم / و لا حتى عمى
هند / مش عاوزه اتكلم فى الموضوع ده لو سمحتى
مريم / على فكره امى منعتنا نتكلم معاكى فيه اصلا بس انا مش قادره اسمع الكلام بصراحه انتوا الاتنين صعبانين عليا بقولك ما تقومى تلبسي و ننزل نقعد فى الجنينه شويه
هند / مش عارفه … مريم انا ما عنديش طاقه اتكلم او اتعامل مع حد
مريم / مهو مش هتقضى اللى باقي من عمرك مداريه فى السرير … انا مش واخده عليكى كدا
هند / هى ماما و اخواتى فين
مريم / اخوكى خرج مع الرجاله فى الفجر ما رجعش و ياسمينا بتلعب مع العيال و مامتك فى المطبخ هتعملنا لازانيا بعتت امين جبهالها مخصوص
هند / نوع جديد من المكرونه بشاميل
مريم / اهو نجربها اصل الرجاله هنا تقفل ما لهمش فى التجديد … حتى امى بتعمل جنبها اكل تانى عشان ما حدش يتكلم مره قولت اعملهم كوردن بلو و بعد ما طلعت روحى قعدوا يتنقوروا عليا
هند تبتسم
مريم / بس عمى مختار مش كدا و اقسم بالله ما بقول كدا عشانك بس هو والله طيب
هند / مريم
مريم / طب قومى اقعدى معايا فى الجنينه اقولك اجيب السماعات و نخربها
هند / بتستغلى انى عيانه عشان تكسبينى
مريم / سلامتك قومى يلا .. اقولك فكره فى السرير
هند / قولى يا مريم
مريم / البت سماح بتعرف تعمل ماسكات للوش و حاجات من دى كانت بتراقب ام داوود و هى بتعمل لامها انا هناديها تعملنا ههههههههه دا انا و هى ياما خربناها اقولك على موقف يدحك عملته فى عمى
هند / احكى
مريم / انتى عارفه ان اوضتى لزق لاوضته المهم اشترينا مسكات فحم من اللى بتخلى الوش اسود دى و طلعت خضيته
هند / ههههه و عمل ايه
مريم / هو مش هيقول بس والله العظيم اتخض
هند / ههههههههههههههه
مريم / ما عملش حاجه اخره يزعق بكلمتين و بعد كدا يراضينى
ياسمينا و بنت اكبر منها تدخل تزق الباب و تدخل شايله كيسه و يطلعوا على السرير
هند / اهلا اهلا اهلا
البنت / عمى مختار باعتلك ده و بيقولك عشان تقعدى على النت و تتسلى
ياسمينا / شغليلي بقي بيبي شارك
مريم تاخد الكيس تلاقي ايفون جديد تفتحه تلاقي جواه شريحه و متوصل بالنت
مريم / بالله عليكي تصالحيه بقي يعملك ايه اكتر من كدا
هند / لو عاجبك خديه
مريم / عاجبنى بس ما يجوزليش ههههههههههههه
هند تبتسم و تبص الناحيه التانيه
هند / كنت بتكلم عن الموبايل على فكره
مريم / طب ما انا عارفه ههههههههههههههههه
هند تبتسم و تبص الناحيه التانيه
……………..
فى شقه حمدى
م حمدى / سامحنى يا خويا
حمدى / انا مش قادر اصدق انا لو فى كابوس كان زمانى فوقت ازاى تعملى كدا من ورايا
م حمدى / يا ريتني ما طمعت يا ريتني خدت الفلوس و الفوايد اخر مره و رضيت المكسب كان كبير و طمعنى
حمدى / اهو راح الدهب راح و المحل راح و اداينا لطوب الارض كلو راح كلو راح
م حمدى / الحمد لله انها جت فى الفلوس بكره تتعوض
حمدى / تتعوض !!! احنا ما عدش حيلتنا الا مرتبي و كلها حاجه بسيطه و اطلع معاش و حتى مرتبي مش هلاقيه
م حمدى / هدور على شغل و اساعدك هعمل اى حاجه بس بالله عليك ما تقهر روحك
حمدى / هتدورى على شغل هتقومى من قدام التليفزيون و تتعبي نفسك و تشتغلى دا انتى شغل بيتك ما كنتيش بتعمليه
م حمدى تبصله و تبص فى الارض و تعيط باب الشقه يتفتح و ابن حمدى يدخل و الحزن ماليه
حمدى / مالك انت كمان
ابن حمدى / اترفدت المدير مشانى انا و فخر ابن عمى
م حامد / يا مصيبتى ليه
ابن حمدى / كنا مكلمين واحد صاحبنا يغطى علينا الفتره اللى كنا فيها فى الساحل الواطى نيمنا فى العسل و ما عملش اى حاجه و مش بس كدا دا راح فتن علينا للمدير كمان
حمدى يترزع على اقرب كرسي و هو ماسك قلبه و بيتوجع
…………………
فى اوضه هند
شيري نايمه و ياسمينا نايمه فى حضنها و هند قاعده بتلعب فى الموبايل توصلها رساله واتس تفتحها
مختار / وليت الذي بيني وبينك عامر…. وبيني وبين العالمين خراب إذا صح منك الود فالكل هين …. وكل الذي فوق التراب تراب
هند تبتسم و تلم نفسها و تكتب
هند / دا كلامك
مختار / للاسف لا دا ابو الفراس الحمدانى
توصل رساله تانيه
مختار / ايه اللى مصحيكي لحد دلوقت
مختار / اكلمك ؟
هند / ما انا نايمه طول النهار
هند / و بعدين ما انت صاحى
هند / ماما و ياسو نايمين جنبي
مختار / بفكر فيكي
هند / خير
مختار / كان زمانا متجوزين
هند / كان زمانك ضاحك عليا قصدك
مختار / لا تظلمن إذا ما كنت مقتدرا فالظلم مرتعه يفضي إلى الندم تنام عينك والمظلوم منتبه يدعو عليك وعين الله لم تنم
هند / انت اللى ظلمتنى و ما تكتبليش شعر مش هنخلص من دروس الاحياء ندخل فى الادب انا اصلا ما كنتش بحب العربي
مختار / حاولت اقولك كتير
هند / يا انا يا السلاح
مختار يشوف الرساله و ما يردش و هند تفضل مستنيه و الدموع تملا عنيها تاخد نفس و تكتب
هند / ما دام دا قرارك انا همشي
هند ما تبعتهاش و تقعد تبص حواليها و تعيط توصلها رساله
مختار / طلبت منك ما تطلبيش منى اقلع توبى عشان ما اتوهش انا ما اعرفليش عيشه تانيه
هند / انت مهندس زراعى دا مختار اللى حبيته
مختار / واحد ده او ده واحد
هند / دا قرارك يعنى يا اقبل بالامر الواقع يا تكسرنى
مختار / ما عاش و لا كان اللى يكسرك
هند / الحمد لله كلهم عايشين اهو ما شاء الله
مختار / اسمى مكتوب
هند / اولهم
مختار / يا قاسي القلب قد أشعلت أحزاني نارا بها مقلتي ذابت وأجفاني
هند / هعملك بلوك ايه الاستفزاز ده
مختار / حبيبك يبلعلك الزلط و عدوك يتمنالك الغلط
هند / مهو عشان بحبك مش عوزالك الغلط عوزاك صح عوزاك مختار المثالى اللى حبيته مش عاوزه اخاف عليك
مختار / يعني لسه بتحبيني
هند تعوج بقها
هند / و انا لو ما كنتش بحبك كنت هبقي متنيله كدا كان زمانى مشيت و ما بصيتش ورايا حتى
مختار / و اهون عليكي ؟
هند / ما انا ما مشيتش
مختار / و مش هتمشي صح ؟
هند / انت مش عاوزنى
مختار / ما تجبرنيش اسيب اكتر حاجه بحبها
هند / بتحبها اكتر منى ؟
مختار / انتى حاجه و دى حاجه تانيه
هند / ما بحبهاش مش عوزاها فى حياتي ما تفرضهاش عليا
مختار / مش هتحسي بالموضوع اوعدك
هند / ما توعدش بحاجه مش هتقدر توفى بيها عشان انت راجل لما بيوعد بيوفى و لو على رقبته
مختار / لو ما كانش جوازنا اتقدم كنت هخليكي تعيشي فى البلد هنا فتره تعاشرى الناس انا متاكد ان نظرتك هتختلف انتى يمكن عشان ما خرجتيش من السرايا و ما شوفتيش الناس مش مستوعبه عبد الله فهم
هند / عبد الله صغير و واخدك قدوه
مختار / و دا حلو و لا وحش
هند / انت عاوز ايه
مختار / انا مش عاوز غيرك
هند / و انا قولت اللى عندى و ما تكلمنيش تانى لحد ما تاخد قرار
هند تفتح اللعبه توصلها رساله تفتحها
مختار / هجبلك ورد و اقولك كلام حب
هند تبتسم و تقفل الموبايل و تحطه جنبها و تبص على مامتها و اختها نايمين تنام جنبهم و تحضنهم
………………….
فى شقه يوسف
اسراء / مش هى اللى فسخت تاخد الشبكه ليه
محمود / انتى بتتكلمى فى ايه يا اسراء
اسراء / ايه مش كانت سندتنا دلوقت دا احنا جايبنها بالشئ الفلانى و الدهب غلى دلوقت يعني تمنها زاد
محمود / كنتى اتكلمتى وقتها كان لينا عين انما دلوقت تتكلمى في ايه اقلها هتقولك كنتى فين
اسراء / كنت ما كان ما كنت دا اعفن محامى يرجعلنا الشبكه دى فواتيرها معايا اصلا
محمود / يا اسراء كفيانا فضايح
اسراء / التاجر لما بيفلس بيدور فى دفاتره القديمه و احنا محتاجين كل قرش ايه هناكل طوب يعني
محمود / هنبيع العربيات و شقه يوسف و ناجر محل و نفرشه احنا احسن من حمدى و حامد الحمد لله
اسراء / و يوسف هنجوزه فين
محمود / لما يبقي يجي يتجوز يبقي يحلها حلال عن اذنك انا نازل
محمود يسيب المكان و يمشي
………………….
فى المضيفه
عبد الله نايم الباب يخبط ما يصحاش امين يفتح الباب بالراحه و يدخل يروح لعبد الله يصحيه
امين / عبد الله … عبد الله
عبد الله يصحي و يفتح بالعافيه
امين / مش هتيجي تلعب كوره زى ما اتفقنا
عبد الله يقوم بالعافيه
عبد الله / خمس دقايق هتشطف و اللبس و اجى
عبد الله يقوم يوصل لباب الحمام و يقف و يبص لامين
عبد الله / روحوا انتوا انا هنام احسن
امين / ليه يا عم دا انت اللى طالبها
عباده يدخل و معاه كيس
عباده / و عندك احلى كوتشي و احلى تشيرت محمد صلاح فى الدنيا
عبد الله يبص فى الكيس
عبد الله / دول اصلى
عباده / امال ايه دا احنا هنقطعهم النهرده
عبد الله يفرح و يدخل الحمام مختار يدخل
مختار / صحي
عباده / فى الحمام … انت مش هتلبس و لا ايه
مختار / لا مش جاى
عباده / ليه عارف انك هتتقطع يا سيدى مش هنحرجك قدام نسيبك
مختار / هههههههههههههههه انت مش ناوى تكبر بقي و لا ايه
عباده / صحيح الحاجات اللى انت طلبتها وصلت فى الجنينه الورانيه و الجماعه بيركبوها
مختار / بالسرعه دى ما شاء الله
امين / امال انت فاكر ايه
مختار / هروح ابص عليهم سلمولى على عبد الله
مختار يمشي و عبد الله يطلع من الحمام
عبد الله / شكلى ايه
عباده / دا احنا هنقطعهم النهرده
عبد الله / يلا
……………………
فى جزء من جنينه ورا السرايا
رجاله بتركب مرجيحه كبيره و زحاليق و لعب اطفال و العيال و البنات ملمومين مريم تشوف مختار تجرى عليه
مريم / المرجيحه دى حلوه اوى يا عمى الراجل قال انها تشيل ناس كبار
مختار / ابقي جربيها بس لما الرجاله تمشي لحسن تتكسر و يبقي شكلك وحش
مريم تبوز مختار يضحك
مختار / بهزر معاكى
مريم / ما تهزرش فى الحاجات دى
مختار عينه فى وسطيهم
مريم / ما نزلتش معانا قالت ما ليش مزاج حتى الفطار ما اكلتوش
مختار الحزن يبان على وشه ياسمينا تدخل تجرى تنط على مختار يشيلها
ياسمينا / دى عشانى ؟
مختار / مش انتى طلبتيها
ياسمينا تبوسه من خده يضحك
مريم / عيله خايبه طلبت شويه مراجيح كنتى طلبتي مليون جنيه
مختار / خليكي انتى جدعه و اطلبيهم انتى
مريم / لا انا شايله طلبى لحاجه تقيله
مختار / يا مرك يا مختار اتقل من مليون جنيه
مريم / خساره فيا و لا ايه
مختار / الدنيا بحالها مش خساره فيكي يا ست البنات … اتفضلى العروسه دى عشان انا وقفتى هنا ما لهاش لزمه
مختار يشيل مريم ياسمينا ياسمينا تنزل فى الارض و تجرى تقف جنب الزحاليق و الراجل بيثبتها فى الارض مختار يلاقيهم كلهم مبتسمين يمشي و يروح الجنينه القدمانيه يلاقي هند لابسه العبايه الجينز و تحتيها بنطلون ابيض و طرحه بيضه اللى هو اشتراهم فى الجهاز واقفه بتتكلم مع الغفير على البوابه
هند / هو انا محبوسه هنا يعني
الغفير / استغفر الله يا ست هند بس ما يصحش تخرجى لوحدك بقولك بس استني دقيقه انادى حد من الغفر يجي معاكى
هند / غفر ايه بقولك عاوزه ابقي لوحدى ابعد من طريقي
الغفير / يا ست الكل …
الغفير يشوف مختار مختار يشاورله يبعد
الغفير / اتفضلي يا ست الكل
هند / شكرا
الغفير يفتح البوابه و هند تعدى و تمشي مختار يبتسم و يروح يركب العربيه و يسوق و يروح يمشي ببطئ شديد جنبها و هى باصه فى الارض تبص تلاقيه هو تكمل مشي و هى باصه فى الارض و هو ماشي جنبها
مختار / على فين لوحدك
هند / ما لكش دعوه
مختار / بطمن عليكي بس
هند / ما تخافش مش ههرب سيبالك اخواتى و امى رهن و حتى لو فكرت اهرب هروح فين يعني
مختار / بلاد الله واسعه شاورى و انا اوديكي مكان ما تحبي
هند / مش عاوزه منك حاجه
مختار / هتعرفى تروحى لوحدك يعني
هند / و انت مالك
مختار / طب معاكى فلوس
هند / قولت ما لكش دعوه الله
مختار يبتسم و يسوق هند تستغرب وتقف تبصله تلاقيه بيركن العربيه الناحيه التانيه و نازل منها و راجعلها
هند / انا عاوزه ابقي لوحدى لو سمحت
مختار/ و انا عاوز ابقي مطمن عليكي
هند / بصفتك ايه هاه بصفتك ايه
مختار / خطيبك
هند ترفع ايديها الاتنين و توريهمله قدام و ورا مفيش دبله و تسيبه و تمشي و هى باصه فى الارض يمشي وراها تقف و تبصله
هند / هتفضل ماشي ورايا كتير
مختار / اللى يشوفك يقول بعاكسك
هند / والله فكره اصرخ و الم عليك الناس و نشوف بقي الصعايده هيعملوا فيك ايه
مختار يبتسم
مختار / اهون عليكي يعني
هند تسيبه و تمشي يكمل مشي وراها
مختار / تيجي نروح نتمشي على البحر
هند / مش عاوزه منك حاجه
مختار / طب اوقفلك تاكس اجره يوديكي
هند / قولت مش عاوزه منك حاجه
مختار / طب انتى عارفه حتى الطريق اللى ماشيه فيه ده اخره ايه
هند / ما لكش دعوه سبني فى حالى
مختار / انتى حالى يا هند
هند تقف و تبصله و تنفعل
هند / هو انا مش قولتلك ما تكلمنيش الا اما تاخد قرار بتكلمنى ليه ماشي ورايا ليه
مختار / احنا فى الشارع مش فى السرايا هنلمها
هند / اهم حاجه شكلك قدام الناس مش كدا
مختار ملامحه تبقي جد
مختار / احنا فى الشارع يا هند مش هقولها تانى
هند تلف و ترجع السرايا و مختار ماشي وراها و الناحيه التانيه عربيه مغاورى جايه يقف و يفتح الشباك هند تكمل للسرايا و مختار عينه عليها
مغاورى / من بعيد كنت فاكرك واحد بيضايق حرمه
مختار / من يومك مجدع
مغاورى / هو فى حاجه و لا ايه
مختار / حاجه ايه يعني
مغاورى / يعني مش اجلت الفرح عشان حوار عروستك اللى اتخطفت من وسط رجالتك ؟ اهى دلوقت لقيتها اهو الحمد لله مش هنفرح و لا ايه
مختار / هنفرح ان شاء الله و كل الناس كمان هتفرح بس لما تخليك فى حالك
مختار يمشي ورا هند يدخل بوابه السرايا
مختار / ست هند راحت فين
الغفير / مشيت ناحيه المضيفه
مختار يهز راسه و يروح وراها
………………………
فى شقه حامد
م حامد بتكلم م حمدى فى التيفون
م حامد / انتى متاكده من الكلام ده
م حمدى / انا لسه نازله من عند ممدوح و سمعت امل و هى بتكلم اسراء و تقولها سبيه يبيع بدل ما تحرجى نفسك مع وسام
م حامد / انا لو منها اعمل الاتنين عشان نفتح محل عليه القيمه
م حمدى / نفتح !!!
م حامد / احنا مش كنا شركا فى المحل اللى اتحرق نفضل
شركا فى المحل اللى هيتجدد بدل ما ياجروا واحد صغير و يضيعوا فيه الفلوس
م حمدى / انتى طيبه اوى انتى تحمدى ربنا ان محمود مهدود من اللى حصل كان زمانه بيحاسب حامد على الفلوس اللى اتنصب علي مراته فيها
م حامد / و احنا مالنا ما احنا اتنصب علينا احنا كمان و بعدين زى ما اسراء بتفكر احنا كمان لازم ندور فى دفاترنا القديمه احنا لينا عندهم حق و لينا عندهم كتير كمان و لازم نحط ايدنا فى ايد بعض عشان نرجع الحق ده
م حمدى / يعني هنعمل ايه احنا لا معانا ورق و لا اى حاجه تجيب الحق ده احنا خدنا نصيبنا و سلمناه الشيكات
م حامد / حامد عند المحامى بيحاول يلاقي حل مع ابن الكلب اللى نصب علينا لما يجى هحكيله و اكيد هيعرف يتصرف
م حمدى / على الله يجي بفايده لحسن البيت ما فيهوش جنيه
م حامد / و مين سمعك يلا حسبي الله و نعم الوكيل فى اللى كان السبب
………………….
فى المضيفه
مختار يخبط هند تطلع
هند / عبد الله مش جوه ما تعرفش فين
مختار / راح مع الرجاله يلعبوا كوره
هند / طب وسع
مختار / ممكن نتكلم لو سمحتى
هند / اللى عندى قولته
مختار / يبقي على الاقل اسمعى
هند / اتفضل اتكلم
مختار / هنا على الباب على الواقف كدا
هند / لا ازاى اتفضل نقعد انا و انت جوه سون فاسون كدا و ياسلام بقي لو شمعتين و شويه ورد و اضاءه خفيفه
مختار يبتسم و يبص الناحيه التانيه
مختار / انا عارف ان الفتره اللى فاتت كانت صعبه عليكي بس والله كانت صعبه عليا انا كمان فبالله عليكي ما تطلعى همك فيا و لا طلعيه يمكن تهدى و ترجعى هند بتاعتى تانى
هند بصاله تطلع بره المضيفه و تقفل الباب
مختار / انتى عارفنى انا لا ليا فى المحن و لا اللف و الدوران انا بحبك و عاوزك و ما غشتكيش انا
هند / انت
مختار نبرته تخشن
مختار / استنى اما اخلص كلامى
هند تسكت
مختار / انا حاولت اقولك اقسم بالله بدل المره اتنين و تلاته انتى ما كنتيش راضيه تسمعى
هند ترفع ايدها مختار يبتسم
مختار / اتفضلي
هند / انت كنت بتلمحلى و انا من هبلى كنت بشوفك حاجه ما حصلتش مستحيل يبقي فيك عيوب دا انا لما قالولى انك بتخونى ما صدقتش
مختار / عشان ما خنتكيش
هند / ليه ما جربتش مثلا تقولى هند انا عاوز اعترفلك بحاجه هند انا تاجر سلاح
مختار / هند انا تاجر سلاح
هند / مش موافقه
مختار / ما استاهلش منك تغضى الطرف عن الهفوه دى بس
هند / هفوه !!! ما استاهلش منك تضحى بالهفوه دى و تصلحها عشان تحافظ عليا للدرجادى الهفوه دى عندك اهم منى و لا انت انانى ما يهمكش الا اللى انت عاوزه و بس
مختار / انا عشت عمرى كله و انا بعمل كل اللى اقدر عليه عشان السلاح السلاح فى دمى يا هند انا لو سبت السلاح اموت زى السمكه بره البحر هتتنطت قدامك شويه و بعدين انتهى
هند / فكر فى عيالنا فكر فى مستقبلهم فكر لو جرالك حاجه انا هعمل ايه
مختار / الاعمار بيد الله هو يعني اللى ما بيتاجروش فى السلاح ما بيموتوش يا هند ما كلنا هنموت ما يمكن اطب منك ساكت
هند / عندك رد على كل حاجه ما شاء الله مختار الزيني اللى عقله شغال تصدق ان دى اكتر حاجه لفتت انتباهى و حبيتها فيك شوف دلوقت جايه على دماغى
مختار / و انا اكتر حاجه حبيتها فيكي انك بتثقى فيا
هند / و انا لو ما كنتش واثقه فيك كنت اتكلمت معاك كنت رديت عليك كنت اعترضت على كلامك تفتكر انى ما كنتش اقدر ادافع عن نفسي مع يوسف بس انا ما بثقش فيه بخاف منه ياذيني يقتلنى من غير ما يحس و يقعد يعيط جنبي …لا يا هند انا ما كنتش اقصد انتى اللى استفزتيني … و الاسوء ياذى اهلى فسكت و استسلمت
مختار باصصلها و مبتسم و عنيها كلها دموع
هند / عن اذنك
هند تسيب المكان و تمشي و مختار عينه عليها
………………………….
فى شقه يوسف بعد كام يوم
يوسف نايم فى السرير اسراء تفتح الباب و تدخل شايله صينيه اكل تحطها جنبه على الترابيزه و تقعد جنبه تصحيه
اسراء / يوسف اصحي يا يوسف
يوسف / اطلعى بره يا ماما عاوز انام
اسراء / و هو انت بتقوم من النوم يا ابني قوم كلك لقمه
يوسف / مش جعان لما اجوع هبقي اقوم اكل
اسراء / يا ابني انت ما بتدوقش الزاد جايلك ايه من دا كله طب اقولك اطلع اقف مع ابوك جايب ناس يوريهم الشقه
يوسف يتعدل و يبصلها
يوسف / ناس مين
اسراء / ما انت يا ابني لو تفوق لنفسك كنت عرفت اللى بيحصل معانا من يوميها
يوسف / هو بابا هيبيع شقتي
اسراء / محتاجين فلوس يا ابني محتاجين فلوس كتير المهندس كان بيعاين المحل امبارح و قال هيتكلف جامد عشان يرجع زى ما كان غير البضاعه اللى هيحطها فيه
يوسف / طب ما يستلف من خيلانى و لا ياخد قرض يبيع شقتى ليه هى يعني شقتي هى اللى هتحللكوا مشاكلكوا
اسراء / يا حبيبي هيجيبلك احسن منها بس نحل المشكله دلوقت
يوسف / انا مش موافق
يوسف يقوم يلبس
يوسف / هو يروح يجيب لكل واحده من اخواتى جهاز قد كدا و يصرف و يبعزق و يجي على شقتى و يبيعها امال انا اعيش فين
اسراء / اهدى يا يوسف ابوس ايدك ما تبوظش البيعه احنا محتاجين الفلوس دى طب بص هخليه يكتبلك الشقه دى
يوسف يسيبها و يطلع و اسراء واقفه تضرب كف على كف
اسراء / يا ريتني ما صحيتك يا ريتني ما صحيتك
………………….
فى المضيفه
الشباب قاعدين اللى بيلعب كوتشينه و اللى بيلعب طاوله و مختار و عباده بيلعبوا شطرنج
عباده / مهو اكيد مش هتفضلوا على الوضع ده العمر كله لازم واحد فيكوا هيتنازل للتانى
عبد الله / هند عنديه بس قلبها ابيض
امين / و بتحبه اصل ايه يقعدكوا هنا طول الوقت ده الا لو كان عندها امل ان الموضوع يتلم
عبد الله / على فكره هند عاوزه تمشي انا اللى مش موافق هند مش مبسوطه هنا بدليل انها بقالها كام يوم قافله على نفسها
امين / و الله انا لو منكوا امشي
عباده / بتقول ايه يا حلوف انت
امين / مقصدش اقسم بالله انا اقصد ان زى ما بيقولوا كدا اذا اردت شيئا بشده فاطلق سراحه
مختار / و هو احنا حبسينها دا بيتها
عبد الله / انا فاهم هو عاوز يقول ايه بس للاسف انا مش هقدر ابقي مطمن على هند فى اى مكان تانى … عن اذنكوا
عبد الله يسيب المكان و يقوم و الكل يبصوا لبعض مختار يقوم وراه يلاقيه قاعد لوحده على ديسك قدام المضيفه
مختار / ايه يا عم لقيت نفسك هتخسر قولت انسحب بكرامتى على فكره بعملها كتير اصل الجزم اللى جوه دول لما بيكسبوا بيطلعوا عين الواحد معايره و شماته
مختار يقعد جنبه
مختار / انا بحمد ربنا كل ثانيه انك موجود يا عبد الله
عبد الله يبصله
مختار / انت راجل جدع و طيب و اخ بجد كفايا انك واقف معايا و واثق فيا انا مش عارف لو هند صممت تمشي انا هعمل ايه
عبد الله / هند مش هتمشي انا قولت كدا بس قدامهم احنا ما لناش مكان تانى نروحه ما لناش حد
مختار / ربنا كبير و فوق الكل و بلاده واسعه و لو مش مرتاحين هنا
عبد الله / لو ما اترحناش هنا مش هنرتاح في اى حته تانيه بس ماما و هند بيضغطوا عليا نمشي عشان احنا مالناش صفه نقعد بيها هنا
مختار / استغفر الله العظيم دا كلام برده حد يقول كدا دا بيتك يا عبد الله .. مفيش اخبار عن النتيجه
عبد الله / بيقولوا الاسبوع ده ادعيلى
مختار / ان شاء الله منصور و رافع راسنا
امين يطلع من جوه
امين / بقولك يا مختار ما تاخد هند الليله تحضر معاك فرح حجازى عبد الحكيم
مختار / مليش مزاج احضر افراح
امين / يا خالى هند ما حضرتش افراح صعايده خليها تشوف الناس و تقرب منهم طول ما هى حابسه نفسها فى اوضتها مش هتفهم
مختار / تصدق ياض معاك حق صحيح يوضع سره فى اضعف خلقه
امين / بس ما تقولش اضعف
مختار / عن اذنكوا
مختار يروح يجرى على السرايا
……………………
فى شقه يوسف
محمود / ان شاء الله بكره نروح البنك تحولولى الفلوس و نسجل العقد
راجل / على بركه الله
محمود / والله ببيعها بالخساره عشان الظروف بس
راجل / ربنا يعوضك عنها خير ان شاء الله
يوسف يدخل
يوسف / سلام عليكم خير فى ايه
محمود / جيت فى وقت تعال دا الباشمهندس يوسف ابنى مهندس زراعى … الاستاذ على بيشترى الشقه
يوسف / شقه ايه ما عندناش شقق للبيع
محمود / يوسف اسكت
يوسف / اسفين على تعب حضرتك بس الشقه دى مش للبيع
محمود / بس يا يوسف … انا اسف جدا يا استاذ على
على / لو فى مشكله
يوسف / اه فى قولت الشقه مش هتتباع
محمود / لاخر مره بقولك اسكت يا يوسف كلمه كمان
يوسف / اقولك اشتريها و لو راجل عتب من باب العماره
على / و على ايه عن اذنكوا
على يجي يمشي محمود يمسكه
محمود / استني يا استاذ على لو سمحت
على / يا استاذ حضرتك اتفق مع ابنك و رقمي معاك
محمود / انا اتفقت معاك خلاص و بكره هسجلك الشقه
يوسف / قولت الشقه دى مش هتتباع يعني مش هتتباع
محمود يضرب يوسف بالقلم
محمود / كفايا بقي كفايا
على / عن اذنكوا
يوسف / انت بتضربني !!! بتمد ايدك عليا
محمود / كل يوم اقول بكره يعقل و يبقي راجل بكره يهدى بكره يسندنى ما طلبتش حاجه ما عملتهالكش لكن انت مفيش فيك فايده
يوسف / ما دام ما فيش فيا فايده بقى يبقي قلتى احسن انا ماشي
محمود / امشي يمكن لما تضطر تعتمد على نفسك و ما يبقاش في بابا و ماما تحس باللى كنت فيه
يوسف يجى يمشي اسراء تدخل و تمنعه
اسراء / يمشي يروح فين دا احنا ما لناش غيره
يوسف / سبيني
محمود / سبيه
اسراء / اسيبه فين انت ايه اللى جرالك
محمود / تعبت انا تعبت و بعدين انا عملت اللى عليا و زياده هو مش اتخرج يصرف على نفسه
اسراء / و هو كان لسه استلم الشهاده و هو مين هيشغله من غيرها
يوسف / مين فى عمامى عمل مع ابنه زيك
محمود / ما حدش دا انت كنت تشاور و انا انفذ عمرى ما حرمتك من حاجه عمرى ما رفضتلك طلب و فى الاخر نايم فى الاوضه اربعه و عشرين ساعه و سايبنا غرقانين
يوسف / خد قرض استلف لكن تبيع شقتي ليه
محمود / هبيع الشقه و هبيع العربيه كمان انا اللى جايبهم و محتاجهم
يوسف / قولى حاجه يا ماما
اسراء / اقول ايه بس انا حتى خيلانك مش هيقدروا يساعدونا مهم اتنصب عليهم هم كمان
يوسف / و هو مين السبب مش عموا حامد هو ملزم يعوضنا
اسراء / مهو لو معاه نتكلم لكن دول حالهم اسوء من حالنا
محمود / انتى بتجادلى فى ايه انا قولت كلمه و انت تقول حاضر
اسراء / هيقول يا خويا هيقول حاضر بس مش بالشكل ده احنا برده غلطانين كان المفروض نمهدله الموضوع
يوسف / انا ماشي
يوسف يمشي و اسراء تحاول تمنعه ما تحصلوش
اسراء / اللحقه يا محمود
محمود / ما عدش فيا نفس اجرى وراه خليه يمشي
اسراء / ما لوش غيرنا و ما لناش غيره حرام عليك مش هتبقي انت و الدنيا عليه
محمود / ما الدنيا كلها عليا كنت اتكلمت
اسراء / مش ذنبه
محمود / و لا ذنبي
اسراء / منك لله يا هند اشوف فيكي ساعه يا هند يا بنت شريهان
………………….
فى اوضه هند
هند ممدده على السرير و بتلعب فى الموبايل باب الاوضه يخبط
هند / مين
مختار / انا يا هند
هند / بغير
صمت ثوانى
مختار / ما كنتش هفتح اصلا و بعدين الباب ليه مفتاح من جوه لما تبقي بتغيرى اقفليه
هند تقوم تلبس اسدال و تقوم تفتح المفتاح و تفتح الباب
مختار / عامله ايه
هند / عاوز ايه
مختار / عندى فرح بالليل قولت اقولك من بدرى عشان تلحقي تجهزى
هند / ما ليش مزاج اروح فى حته
مختار / الساعه ٨ تكونى جاهزه
هند / قولت ما ليش مزاج
مختار / هتنبسطي
هند / و دا يتلبسله ايه
مختار / اى حاجه هدومك كلها حلوه
هند / هى مريم هتيجي معانا
مختار / ما اعرفش مين اللى رايح هشوفلك و لو رايحه هبعتهالك و لو مش رايحه برده هخليها تيجي تساعدك بس بيتهيالى لما تعرف انك جايه هتيجي عن اذنك
مختار يجي يمشي
هند / طب انا هاجى بصفتى ايه احنا ما عدناش مخطوبين
مختار يبصلها و يبتسم
مختار / يا هند !!!
مختار يمشي و هند واقفه مضايقه
هند / طب مش رايحه
هند تدخل و ترزع الباب
…………………
فى اوضه هند
هند قاعده على السرير و انتصار و مريم و شريهان بيقلبوا فى عبايات سمره مطرزه و طرح و هند قاعده على السرير لابسه فستان محجبات تركواز مطرز و قاعده على
انتصار / تلبس دى فوق الفستان
هند / انا مش هروح بالفستان ده اصلا
مريم / اجبلك الاحمر انتى بتحبي الاحمر
هند / مش هروح بفساتين خالص
مريم / ليه دا انتى عندك فساتين حلوه اوى هتلبسيهم امتى ما حدش عارف هيجي فرح تانى امتى
هند / ما ليش مزاج اروح اصلا
انتصار / ليه بس كدا يا بنتي حد يقول للفرح لا
هند / هروح معاه بصفتي ايه احنا ما عدناش مخطوبين
انتصار تروح تقعد جنب هند
انتصار / معلش يا جماعه تسيبونى مع ست البنات لوحدينا دقيقتين عاوزه اتكلم معاها بعد اذنك يعنى يا شريهان يا اختى
شريهان / مفيش مشكله هنزل ابص على الاكل لو احتاجتونى نادونى
مريم / جايه معاكى
شريهان تمشي هى و مريم و يقفلوا الباب وراهم انتصار تمسك ايد هند و تحطها بين ايديها الاتنين
انتصار / مالك بقي يا ست العرايس فيكي ايه
هند / مفيش
انتصار / امال ايه حوار مش مخطوبين ده ان كان على الدبله اللى ضاعت حالا ابعت اجبلك احسن منها اجبلك الصاغه كلها
هند / مش ده اللى اتخطبتله
انتصار / لا إله الا الله يا بنتي احنا بنتجوز الراجل و لا شغلته هو مختار يتعيب
هند / انا خايفه عليه
انتصار / العمر واحد و الرب واحد و ما حدش عارف بكره مخبيله ايه
هند / يبقي ما ارميش نفسي فى التهلكه
انتصار / لا ما تخافيش هم مش عيال صغيره و عارفين هم بيعملوا ايه كويس و بعدين يا بنتي ما كلنا فى يوم من الايام هنموت سلمى حمولك على اللى خلقك
هند / و لو اتقبض عليه دى جريمه
انتصار / يا بنتي قولنالك مليون مره هنا غير عندكوا هنا دنيا تانيه طب اقولك حاجه
هند تبصلها
انتصار / احنا من قريب رئيس المباحث جالنا قاصدنا فى حتتين سلاح يعمل بيها ضبطيه و ادناله
هند / و دا صح
انتصار / هنا صح و بيحصل مش احنا اللى اخترعناه
هند / و لو الناس كلها مشيت عريانه نمشي عريانين احنا كمان
انتصار / هههههههههههه يا بنتي دى غير دى ما تدخليش الدنيا على بعضيها
هند / انتوا ليه مش قادرين تحسوا بيا
انتصار / ممكن ناجل الكلام ده لما ترجعى من الفرح يمكن لما تشوفي الناس و تتكلمى معاهم تغيرى رايك
هند / ما افتكرش
انتصار / بقولك ايه استنى
انتصار تروح تفتح صندوق على التسريحه و تطلع كوليه محجبات تقيل جدا و طخين و عريض
انتصار / اللبسي ده فوق الفستان الحلو ده وريني هيبقي عليكى عامل ازاى
هند / دا بتاع ماما رحمه الله يرحمها
انتصار تبتسم
انتصار / ما لبسوش بعدها غيرك
هند / مش من حقى
انتصار / امال حق مين يا بنتي بلاش مكابره انتوا الاتنين بتحبوا بعض و احنا كلنا بنحبك و انتى كمان بتحبينا و لا داهيه لتكونى ما بتحبيناش يا بت
هند / بحبكوا بس زعلانه منكوا
انتصار / ظلمانا بس معزوره
هند / انا تعبانه و عاوزه انام
إنتصار تقوم و تحط الكوليه فى الصندوق
انتصار / احنا تقريبا خلصنا اقلعى الفستان و ناميلك ساعتين و هنصحيكي تجهزى
هند تهو راسها انتصار تبتسملها و تمشي و تقفل الباب وراها هند تبص فى الارض و تعيط
………………….
قدام المطبخ
شيري تيجي تدخل تسمع البنات بيتكلموا
فاطمه / و الله ليها حق تدلع ما دام لاقيه اللى يديها وش
فاتن / معزوره برده كان لازم يقولها
فاطمه / ما افهمش انا فى حوار لا بحبه و لا اقدر على بعده ده الرجاله ما بتتغيرش يا تاخده على عيبه يا تسيبه
سماح / سمعتها بتقوله النهرده احنا مش مخطوبين
فاطمه / و ما دام مش مخطوبين قاعده اكله شاربه نايمه لابسه فى بيته ليه هو فى واحده تعيش فى بيت واحد مش خطيبها … والله و لا خطيبها حتى ينفع
شيري تدخل الكل يرتبك
شيري / معاكى حق احنا هنمشي
فاطمه / لا يا اختى انتى فهمتى غلط احنا كنا بنتكلم فى حاجه تانيه
شيري تمشي و الكل بيبص لفاطمه تطلع اوضتها جرى
………………….
فى اوضه هند
شيري / اول ما اخوكى يجي مش هنقعد هنا ثانيه واحده
شيري تتصل بالتليفون
شيري / ما بيردش الحيوان ما بيردش
هند / هتلاقيه مش سامع من صوت ضرب النار
شيري / ضرب نار ايه
هند / هو انتى ما تعرفيش عبد الله عجبته الحكايه و رايح جاى معاهم يعلموه عيشتهم عاوز يبقي تاجر سلاح كبير
شيري / دا قايلى رايح يلعب مع الشباب
هند / مهو ده اللعب بالنسبالهم عشان تصدقيني لما اقولك ما ينفعش اقبل بمختار كدا
شيري / اللبسي اى حاجه و لبسي اختك و انا هجيبه من قفاه و راجعه
شيري تفتح الباب تلاقي انتصار كانت هتخبط الاتنين يتخضوا
انتصار / البنات حكولى على اللى حصل فى المطبخ
شيري / ما حصلش حاجه هى ما قالتش غير الحقيقه
انتصار / حقك عليا هى ما تقصدش هى كدا لسانها فالت منها
شيري / هند خدت قرارها خلاص و ما فيش نصيب انا كنت قاعده يمكن مختار يقدر يقنعها لكن خلاص لحد كدا و كفايا
انتصار / ليه بس يا اختى ما تقوليش كدا
مختار طالع السلم يجرى
شيري / طرحتك يا هند مختار
مختار / على فين يا امى
شيري / عبد الله فين يا مختار
مختار / فى منطقه الرمايه بيلعب مع الرجاله
شيري / كلمه خليه يجي حالا احنا ماشيين
مختار / انا كلمت عمى و هو جاى هو و ناصر و ليهم كلام معاها
شيري / هى ما غلطتش يا ابني هى ما عملتش حاجه ما قالتش غير الحقيقه لا هند و لا اى حد فينا المفروض يبقي هنا
انتصار / يا ست الكل بلاش الكلام اللى يزعل ده انتوا هنا مش ضيوف و ربنا العالم احنا فرحانين بيكوا قد ايه
شيري / الموضوع خلص … شوفلى عبد الله فين يا مختار خلينا نمشي
مختار / خليكوا النهرده يا امى و انا الصبح بنفسي
شيري / احنا لسه بدرى نلحق نروح احنا تقلنا عليكوا بما فيه الكفايه
مختار / قولى حاجه يا هند
هند / ماما معاها حق احنا كان المفروض نمشي من زمان و يمكن ما كانش المفروض نيجي هنا اصلا
انتصار / حتى انتى يا هند … طب استني ناصر يوصل بالله عليكي ما تكسفيني
مختار / انا هروح انادى عبد الله و لحد ما يجي ياريت تهدوا و تفكروا و اى كان قراركوا انا معاكوا فيه … سبيهم يرتاحوا
مختار يشاور لانتصار تمشي و هى زعلانه و بتضرب كف على كف و شيري تقفل الباب
……………………..
فى منطقه الرمايه
عباده / دا انا بقول عليك عاقل يا عبد الله
عبد الله / انا مش هرد عليك لو سمحت وسع
امين / يا عبد الله انت عارف الحريم و لتهم الكلام اتفهم غلط هم هيحلوها بينهم
عبد الله / مفيش مشكله ما حصلش حاجه وسع بقي يا امين
عباده / يا عبد الله احنا طول الوقت بنحاول نوفق الدنيا على بعضيها
عبد الله / لو كانت امى انا اللى قالت الكلام ده على اختك
عباده / امى غلطت بس هى قالت ما تقصدش و فى الاول و الاخر امى يا عبد الله
عبد الله / و دى اختى و مش ناوى اقل منها اكتر من كدا ابو دى جوازه اللى تزل الواحد كدا وسع
مختار يدخل
مختار / عبد الله
عبد الله / انا مروح و الموضوع انتهى
مختار / تمام يلا نلم حاجتنا انا هوصلكوا و ارجع معاكوا
عباده / يا جدعان ما تكبروش الموضوع
مختار / الموضوع كبير يا عباده يلا يا عبد الله
عبد الله يمشي مع مختار
امين / انا بقول نلم الحاجه و نرجع السرايا احنا كمان
عباده / ارجع انت انا هخليني هنا
امين / ليه يا عم
عباده / هروح اعمل ايه يا امين انصر الباطل و لا اجى على امى
امين / ما اعرفش بس لازم كلنا نبقي موجودين
عباده / لو قليتوا واحد مش هتفرق روح انت لو عاوز
امين / لم العده و انت ماشي
عباده يهز راسه امين يمشي
…………………
فى اوضه فاطمه
فاطمه رايحه جايه متوتره و تنفخ باب الاوضه يخبط
فاطمه / مين
انتصار / انا يا فاطمه افتحى
فاطمه تاخد نفس عميق و تروح تفتح
انتصار / ولعتيها و ارتاحتى
فاطمه / انا ما كنتش اقصد و بعدين انا ما كنتش بتكلم لوحدى ما بنتك كانت معانا
انتصار / و هى بنتى قدك انتى المفروض كبيره
فاطمه / ليه يعني الفرق بينا كام سنه يعني عاوزه تشيلينى الليله قوليلى شيليها مش تتحججى بالسن
انتصار / روحى راضي الناس هيمشوا
فاطمه / انا كلمتها فى وقتها والله و حاولت ما سمعتنيش
انتصار / و كدا عملتى اللى عليكي حاولى تانى و تالت بقولك هيمشوا
فاطمه / سبيهم يمشوا
انتصار / انتى بتقولى ايه يا فاطمه
فاطمه / هى عنيده و هو عنيد و كل واحد عنده امل فى التانى فرقيهم و اللى بيحب التانى اكتر هيتنازل
انتصار / مختار هيمشي معاهم يا فصيحه مش هيفترقوا ما كنتيش قادره تمسكي لسانك ده كانت راحت معاه الفرح و شافت ضرب النار و فهمت كانت وافقت ربنا وحده العالم هنصلح اللى هببتيه ده ازاى
فاطمه / ما تنصبولى المشنقه و لا تعلقونى فى الفلكه فى ايه عمركوا ما اتفهمتوا غلط يعني و لا هو ما فيش فى البيت ده غير فاطمه
انتصار/ تصدقى انا الغلطانه انى شغله نفسي بيكي كنت مستنيه منك ايه يعني مش عارفه فتك بعافيه
انتصار تمشي و فاطمه تقفل الباب
فاطمه / الله يعافيكي كل ده عشان حته المفعوصه هتمشي امال لو الجوازه تمت هيعملوا ايه
……………….
فى اوضه هند
شيري رايحه جايه فى الاوضه و هند قاعده على السرير و جنبها ياسمينا باب الاوضه يخبط شيري تفتح تلاقي عبد الله
شيري / انت كنت فين
عبد الله / جيت يلا العربيه تحت هنروح
شيري / يلا
هند / مين هيوصلنا
عبد الله / مختار هيروح معانا
هند تقوم و يمشوا انتصار تقابلهم
انتصار / استهدوا بالله يا جماعه حقكوا على راسي انا حقك على راسي يا اختى انا لسه جايه من اوضه فاطمه عينها منك فى الارض و بتقول فهمتيها غلط
شيري / حصل خير هستاذنك نلحق اليوم من اوله قبل ما تضلم
انتصار / قولى حاجه يا هند بالله عليك يا عبد الله تقول حاجه
ناصر و شاكر و سليمان يدخلوا
ناصر / على فين ان شاء الله
مختار / هنروح
ناصر / هتروحوا فين ما دا بيتكوا
شيري / يكرم اصلك بس الحكايه دى طولت اوى و شكلها ما لهاش نهايه كتر خيركوا عملتوا معانا الواجب و زياده بس الحاجات دى قسمه و نصيب
ناصر / انتى معاكى حق الحاجات دى طولت و النهرده نشوفلها اخر تعالى يا هند تعال يا مختار
شيري / كفايا يا حج ناصر احنا
انتصار / صبرك بالله يا اختى ابوس ايدك تصلى على النبي و تستهدى بالله دا شيطان و هيروح لحاله
شيري / عليه الصلاه و السلام
ناصر يفتح المكتب و هند و مختار يدخلوا وراه كل واحد يقعد على كرسي قدام المكتب و الباقي يتوزعوا فى المكتب و على الباب
ناصر / حكايتكوا انتوا الاتنين طولت الله يرحم ايام روميو و جوليت و الورد
هند تبص لمختار و تبص الناحيه التانيه الكل باصصلهم
ناصر / سمعك يا هند قولى عاوزه ايه
هند / لما حضرتك جيت لوالدى الله يرحمه تطلبنى لمختار قولتلنا انكوا تجار سلاح
ناصر يبص فى الارض
هند / بابا الله يرحمه حب فى مختار الشاب الملتزم اللى بيصلى ما كناش نعرف ان معاكوا فلوس ما فرقتش معانا حتى الشبكه ما طلبناش حاجه … لما جيت تتفق مع والدى كان مهرى ايه يا مختار ؟
مختار / اتقي ربنا فيكي
هند / و انت وفيت ؟
مختار / انا ما قصرتش
هند / لا قصرت كلكوا قصرتوا كلكوا ضحكتوا علينا و غشيتونا كل اللى انا عشته الفتره اللى فاتت و اللى لسه هعيشه بسبب كدبكوا عليا
انتصار / هند
هند / ما حدش فيكوا لا شاف اللى شوفته و لا حاسس بيا
ناصر / حاسين و مقدرين
هند / انا المطلوب منى اقبل مختار عشان بحبه فى الوقت اللى هو بيحول اخويا لنسخه منه
عبد الله / ما تدخلينيش فى الموضوع
هند تقوم تروح ناحيه عبد الله
هند / احنا ما بنشوفكش طول الوقت و كل ما نسال عليك معاهم بتضربوا نار بتركبوا خيل قاعدين فى الصحره
سليمان / علموا اولادكم السباحه و الرمايه و ركوب الخيل يا هند
عبد الله / و بعدين انتوا قاعدين حريم فى بعض اقعد وسطيكوا اعمل ايه و لا افضل قاعد لوحدى فى المضيفه طول الوقت
هند / كان ممكن اقبل لو ناس تانين غير دول لكن انا مش هستحمل تبقي واحد منهم
امين / هو احنا وحشين اوى كدا
مختار / امين
هند / حلوين او وحشين لنفسكوا احنا غيركوا
عبد الله / و انا مش صغير و انتى مش وليه امرى
هند / و احنا ماشيين عاوز تيجي اهلا و سهلا مش عاوز خليك
ناصر / يعني انتى مشكلتك فى عبد الله و لا مختار
هند / الاتنين انا ماليش فى الدنيا غيرهم انا خايفه عليهم مش هستحمل يتاذوا
ناصر / تمام قولتى اللى عندك اقعدى ارتاحى
هند تقعد
ناصر / عندك حاجه تقولها يا مختار
مختار / اصبرى لبعد الفرح شوفى الناس و افهميهم و بعدين قررى الدنيا هنا غير عندكوا
هند / و هقعد هنا باى صفه
مختار / وحدى الله يا هند و بلاش الكلام ده
هند / لا اله الا الله يا انا يا السلاح يا مختار
مختار / هند
ناصر / مختار
مختار يبص على ناصر يلاقيه بيجيب باسكت الزباله و يحطه على المكتب يستغرب و الكل متابع
ناصر / هند على كلمتها من يوم ما دخلت البيت انت اللى بتماطل
مختار / انا !!!
ناصر / هات دبلتك
مختار / دا ظلم
ناصر / بقولك هات الدبله يا مختار
هند تبص لمختار و تبص لناصر عباده يدخل من وسطهم و يشوف
انتصار / ناصر
ناصر / ما اسمعش نفس … مش هكررها اقلع الدبله دى بدل ما اقلعهالك بالعافيه
مختار / هند
هند الدموع تنزل من عنيها
ناصر / هات سلاحك
مختار يبص لناصر
ناصر / اختار يا مختار يا هند يا السلاح واحد فيهم هترميه فى الزباله يلا انجز
عبد الله / هند
ناصر / قولت ما اسمعش نفس .. انت مش صغير اختار و ما تعلقش بنت الناس بيك اكتر من كدا هى قالت كلمتها دلوقت قول انت كلمتك
مختار يبص لهند عينها عليه و بتعيط تبص فى الارض و تحاول تمسح دموعها مختار يطلع سلاحه من البنطلون و يرميه فى الزباله
مختار / هختار هند
مختار يسيب المكان و يمشي و الكل بيبص لبعضه و مش مصدقين اللى حصل و عباده مش قادر يصدق نفسه يجرى ورا مختار
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية البر التاني)
تعليق واحد