رواية البر التاني الفصل الثاني والستون 62 بقلم لولو محمد
رواية البر التاني الجزء الثاني والستون
رواية البر التاني البارت الثاني والستون
رواية البر التاني الحلقة الثانية والستون
خديجه / و لو جت بت
عباده / يبقي زياده الخير خيرين بس من اولها اهو عشان ما تفهميش غلط انا ما بفرقش بين واد و بت هى الحكايه انى ما بعرفش اتعامل معاهم
خديجه / دا البت روح ابوها ما تقولش كدا
عباده / طب كلى ياختى و اكليها و بطلى رغى
خديجه / والله انا باكل انت اللى بتتكلم و طبقك زى ما هو اهو
عباده / ربنا يعدى الايام دى على خير
خديجه تطبطب على ايده يبصلها و يبتسم
…………………….
فى اوضه مختار
مختار قاعد على طرف السرير متابع هند نايمه الباب يخبط هند تصحى يشاورلها تنام تانى و يروح يفتح يلاقي انتصار شايله صينيه اكل
مختار / بنفسك كدا
انتصار / و انا عندى اعز منكوا
هند تقوم تقعد مختار ياخد الصينيه و يروح يحطها على الترابيزة
انتصار / عامله ايه يا ست البنات
هند تقوم
هند / تمام يا ست الكل تعالى اتفضلى
انتصار / لا اجى ايه انا ورايا هم ما يتلم يلا كليلك لقمه و لما تخلصوا رنوا على البت مريم تطلع تاخد الحاجه
هند / طب استنى اجى اساعدك
انتصار / كفى روحك ياختى مش محتاجين حاجه
هند / هههههههههههههه هتلفى و ترجعيلى برده على فكره
انتصار / ما اتحرمش
مختار / امين
انتصار / يلا سلام
انتصار تمشي و مختار يقفل الباب و هو مبتسم
هند / هو حته المربى بالقشطه دى اخوك لقاها ازاى
مختار / لقاها ايه دول متربيين سوا مش قولتلك قبل كدا انهم اخين متجوزين اختين تعالى يلا ناكل لقمه سوا يلا
هند / حالا هدخل بس الحمام خمسايه و راجعه
مختار/ ما تتاخرش لحسن تيجي تلاقينى ماسح الاكل دا كله
هند / الف هنا مطرح ما يسرى يمرى
هند تدخل الحمام و مختار يروح يغير هدومه موبايله يرن مختار يبتسم و يرد
مختار / السلام عليكم احلى رنه دى و لا ايه
ماجد / ايه ده مين معايا … لا هى النمره صح
مختار / هههههههههههههههه انا يا عم انا انا ازيك عامل ايه
ماجد / اصلى مش واخد على كدا واضح ان هند ظبطت اعداداتك
مختار / بتندموا الواحد انه رد عليكوا عدل
ماجد / لا يا عم ما تندمش
مختار / طمنى عليك و على هشام عاملين ايه
ماجد / الحمد لله مش هتصدق اصلا بعد ما رجعنا من عندكوا عم هشام اكتشف ان امين المخازن بتاعته بيسرقه و دب معاه خناقه كبيره المهم اتفق مع هشام يمسك مكانه لحد ما يلاقى شغل او يلاقى حد امين بداله انت عارف انه ما لوش ولاد
مختار / بس سمعت انه عنده بنتين الاتنين اجدع من بعض
ماجد / لا من حيث اجدع فهم اجدع بصراحه
مختار / ايه ؟ ما تقولش
ماجد / لا اقول
مختار / ههههههههههههههههه الله يعينها
ماجد / اخص عليك يا عم دا انا لقطه
مختار / و الواد هشام مش هنفرح فيه قريب
هند تطلع من الحمام
ماجد / والله هو فى حوار كدا بس انت عارف هشام يعني
مختار / ماله
ماجد / مش دلوقت و اكون نفسي و الحركات دى
مختار / يكون نفسه ايه
ماجد / بيقول الجنيه اللى ابويا هيساعدنى بيه فى جوازى هيديله الحق يدخل فى حياتى بعد كدا
مختار / بص هو بغض النظر عن وجهه نظره ما لحم كتافه طول السنين دى كان من خير ابوه و ده يدى لابوه الحق يبيع و يشترى فيه زى ما هو عاوز
ماجد / والله قولتله كدا و البت عينها منه بس هو مش عاوز يتحرك بيقول على الاقل اثبت رجلى فى الشغل شويه و بعدين اشوف
مختار / كل شئ باوان المهم انت
ماجد / انا يا سيدى اشتغلت اسبوعين مع هشام فى المخازن و بعدين بعتونى امسك المخزن فى اسكندريه شهر و بعدين امى تعبت فروحت اقدم استقالتى الحج اسماعيل عم هشام راجل محترم اوى اوى رجعنى معاه فى الشركه و شغلنى داتا انتريور ما انت عارف انى فاجر كومبيوتر
مختار / على يدى
ماجد / المهم هناك بقي اتعرفت على بنته المهم امى حست بان فى حاجه بينا راحت للراجل من ورايا و كلمته و قالتله احنا ظروفنا كذا كذا و كدا بصراحه الواد هشام كمان قال فى حقى كلمتين حلوين الراجل قالى انا ما بدورش على عريس غنى لبناتى و انه ما لوش غيرهم فى الدنيا و انها بقت امانه فى رقابتى اصونها و بصراحه احرجنى جدا بكلامه
مختار / امانه تقيله دى خد بالك
ماجد / ما انا افتكرت عموا محمد الله يرحمه لما قالك كدا برده
مختار / ربنا يسعدك
ماجد / المهم امبارح روحنا جبنا الشبكه امى بصراحه ما قصرتش معايا كانت عامله جمعيه و كانت شيلالى حتتين دهب للزمن و البت كمان عينها كانت مليانه اوى اشترت دبله و محبس سولتير سمبل اوى قطعوا حاجه و خمسين الف اقسم بالله امى ما كانت مصدقه
مختار / ربنا يتملكوا على خير و يرزقكوا بالزريه الصالحه
هند / مين
مختار / ماجد خطب بنت عم هشام
هند / الف مبروك ربنا يتلمهم بخير
ماجد / هى هند جنبك و لا ايه
مختار / اه جنبى بتباركلك
ماجد / المهم احنا هنعمل الشبكه فى بيت العروسه الاسبوع الجاى هبعتلك اللوكايشن على الواتس هتيجي اكيد
مختار / والله يا ماجد
ماجد / انا سافرت لاخر بلاد المسلمين عشان فرحك ما فيش اعزار
مختار / او قدرت مش هتاخر انت عارفنى
ماجد / طب حاول و هات هند معاك
مختار يبص لهند
مختار / لو قدرت هحاول انت عارف غلاوتك عندى المهم طمنى انت مش ناقصك اى حاجه
ماجد / لا يا حبيبي تسلم لما هعوز هقولك مش هتكسف يعني
مختار / أقسم بالله ازعل انت عارف
ماجد / لا ما تقلقش فعلا لو احتاجت انت هتبقي اول واحد اتسند عليه بجد
مختار / تمام انا عارف والله انى مقصر معاكوا
ماجد / الله يعينك يا عم الدنيا تلاهى المهم مفيش اخبار تفرحنا ايه مفيش ميخا صغير جاى فى السكه
مختار يبص لهند و يقوم يقف جنب الشباك
مختار / ادعيلى
ماجد / ربنا يرزقكوا بالذريه الصالحه اهو تعيشولكوا يومين قبل لخمه العيال
مختار / كلو على الله
ماجد / تمام انا مش هطول عليك هبعتلك اللوكايشن و التفاصيل و هستناك تمام
مختار / باذن الله و سلملى على هشام كتير اوى
ماجد / يوصل يلا سلام
مختار يقفل و يروح يقعد على الاكل هند تروح تقعد قدامه
هند / لو تقدر تروح روح
مختار / سبيها لوقتها يلا ناكل لقمه بقي لحسن زمانه برد على الاخر
هند / اسخنهولك
مختار / ما لوش لزوم حلو اهو يلا سمى و كلى
هند تهز راسها و تغرف و تاكل و مختار ياكل و هو بيبصلها
…………………
فى اوضه رشيد
سمر عامله نايمه رشيد فارش جلبيه من بتوع سمر و قاعد عليها بيدعى
رشيد / انا خجلان منك اوى مكسوف من نفسي ان اول مره اجيلك ابقي عشان محتاجك بس انا والله عارف ان لولا سترك عليا ما كانش زمانى نجيت من كل اللى مريت بيه و انه لا هو شطاره منى و لا حاجه دا انت اللى ساترنى انا عارف ده و عارف انى عملت حاجات كتير غلط بس انت قولت ادعونى استجب لكم و انا بدعيك انت قولت ما نفقدش الامل فيك و لا فى رحمتك و انا مش عاوز غير رحمتك انا عارف انى عملت حاجات غلط و انها عملت حاجات غلط بس انت مطلع عليها هى عملت غصب عنها هى كانت مجبره انا عملت و انا عارف انها غلط و كان عندى اختيار هى ما كانش عندها
سمر تعيط و تحاول تكتم صوتها
رشيد / لو فى واحد بس خد الحبوب دى غصب عنه بصرنى بالعلاج اساعده … ساعدنى اساعدهم … انا راضي بعقابك ليا اى كان و انا استاهله و عارف انه شويه على اللى عملته فى حياتي بس مش عشانى والله … انت عارف انى واخد قرار انى اتغير و عارف انا هنا ليه … انا ما عدتش هنا عشان الفلوس انا ما جيتش اصلا عشان الفلوس و انت عارف يارب انت عارف انا هنا ليه … يارب انا عارف انك سامعنى … عارف انك … يارب انا مش عارف اعمل ايه و تعبت و كل اللى كنت مسنود عليهم انت عالم بيهم يارب
سمر تمسح دموعها
رشيد / انا مش عارف الواحد المفروض يدعى ازاى او يعمل ايه عشان دعوته تستجاب بس انا عارف انك فاهمنى و مش محتاج بيني و بينك وسيط فارجوك اقبل ارجوك ساعدنى و انا هتغير اقسم بالله هبقي انسان كويس هصلى و الله هصلى و مش هعمل كدا تانى و البت دى هتجوزها اول ما نخرج من هنا هنتجوز ان شاء الله يعنى
سمر ما تقدرش تكتم صوت عياطها رشيد يبص عليها و يسكت سمر تقوم و تدخل الحمام و هو متابعها
……………………..
قرب الفجر على السطوح
مختار واقف سرحان عباده يدخل
عباده / احنا محتاجين سرايا اكبر
مختار يبصله
عباده / مش لاقى مكان اختلى بنفسي فيه غير الحمام حتى ده لما بعوق خديجه بتخبط مش عارف بتقلق ليه يعني و تقعد تقولى انت كويس انت كويس هيجرالى ايه فى الحمام يعني مش فاهم
مختار يبتسم و يبص الناحيه التانيه
عباده / و انت كمان هند بتخبط عليك فى الحمام
مختار / هههههههههه لا
عباده / امال ايه اللى جابك هنا
مختار / اقسم بالله ما قادرلك
عباده / احكى ايه الجديد
مختار/ معزوم على خطوبه واحد صحبى … ماجد
عباده / نروح و نوجب معاهم
مختار / نروح !!
عباده / امال هتروح لوحدك ؟
مختار / اروحله و اخدله الهم و القرف فى رجلى اعرفها سكته عشان توجعنى فيه و فى اهله
عباده / اه صح معاك حق .. استنى استنى … ليه يا عم هى مش جاتلك الكليه كذا مره يعني اكيد شافتهم
مختار / و نسيتهم افكرها بيهم يعني
عباده / بص احنا نبعتله واجب محترم و كفا المؤمنين شر القتال
مختار / فكرت فى كدا برضه
عباده/ بس مش جايه على هواك
مختار / دول اعز اصحابى انا اصلا ما كانليش صحاب غيرهم
عباده / امال احنا ايه يا لوح انت
مختار / انتوا اخواتى يا عجل
عباده / اهو انت … بس احرجتنى الصراحه تشكر
مختار يضرب كف على كف و يبص الناحيه التانيه
عباده / هو الواحد ما كانش نفسه يسافر شهر عسل زى اى اتنين متجوزين ما انا كان نفسي بس مفيش نصيب … خلاص الدنيا انتهت يعني
مختار / ما انتهتش تقعد بيها فى البيت بدل ما تخرجها و ترجع من غيرها
عباده/ ليه شايف لابس طرحه و لا ايه قال ارجع من غيرها قال
مختار يبصله
عباده / ايه ؟ بتبصلى كدا ليه ؟ هو انت رجعت من غيرها ؟ ما هى اللهم بارك تحت اهى سليمه ما فيهاش خربوش حتى
مختار يبص الناحيه التانيه
عباده / انت ما غلطتش لما خدتها و خرجتوا و ما قصرتش فى حمايتها انا و انت عارفين احنا مامنين البلد ازاى و لو ما خدتش رحتك فى بلدك وسط اهلك و رجالتك هتاخدها فين هتتحبس فى البيت زى الحريم يعني
مختار / انا غيركوا
عباده / صح انت المختار المنتظر
مختار يبصله
عباده / انت الوحيد اللى مش هيموت لا هو و لا مراته انما الباقي لا ما كناش بنقولها فى وشك بس هى قالتها و كشفت المستخبى يبقي خلاص
مختار يبص الناحيه التانيه
عباده / رشيد كان باعتلى ان الفيلا كانت متلغمه زى النفق بس انت اول واحد دخلت و اخر واحد خرجت عشان كدا ما فجرتهاش فوق انت مش فى خطر
مختار / انا فى الاسوء منه احنا ما بنخافش من الموت بس بنخاف نخسر اللى بنحبهم
عباده يبص الناحيه التانيه و يرجع يبصله
مختار / البيت ده عدى عليه كتير لو اتحكى ما يتصدقش بس اللى احنا فيه ده جديد
عباده / عشان احنا مش زى اللى سبقونا
مختار يبصله
عباده / ايه ؟
هند تدخل و تقف بعيد
عباده / فكها و سبها على الله
مختار / و نعم بالله
عباده / بالاذن
عباده يحي هند براسه تبتسم و تحيه ينزل و يسبهم
هند / اتاخرت اوى
مختار يبتسم و يبص الناحيه التانيه هند تروح تقف جنبه
هند / المكان هنا حلو اوى بس والله اوضتنا احلى
مختار / كنتى نايمه ما حبيتش ازعجكك
هند / لا ابقي ازعجنى ما لكش دعوه انا بحبك تزعجنى
مختار يبتسم
هند / لما بتطلع هنا بعرف انك شايل الهم و لما بعرف انك شايل الهم بحس انى زوجه فاشله
مختار / ايه الكلام ده ؟
هند / مهو لو كنت زوجه عدله كنت قدرت اخفف عنك و انسيهولك
مختار / مفيش الكلام ده انا هنا عشان ما اصحكيش مش اكتر
هند / طب ما انت العصريه قعدت جنبى و انا نايمه و يا عالم لو ما كانتش ام فاتن جابت الاكل كنت هتفضل تتفرج عليا لحد امتى
مختار يضحك و يبص الناحيه التانيه
هند / لا ما احنا مش ساهلين برده يكون فى علمك
مختار / لا واخد بالى
هند / طب ايه هتفضل هنا و لا ايه
مختار / لا هننزل اوضتنا
هند تبصله و تبتسم و تمسك فى ايده يبتسملها و ينزلوا سوا
…………………….
فى القسم بعد يومين
مغاورى يدخل مكتب الظابط يلاقي سماح قاعده تشوفه تقوم تقف يبصلها و ساكت
سماح/ ازيك ؟
مغاورى / الحمد لله ايه اللى جابك فى حاجه ؟
سماح / هو انت مش عاوز تشوفنى
مغاورى / مش القصد بس دا قسم و بعدين هو انتى جايه لوحدك و لا ايه
سماح / لا خليفه بره
مغاورى / انتى بتهرجى يا سماح جايه مع خليفه لوحده انا مش منبه على اخوكى
سماح / غار فى داهيه مشي و ساب البلد النهرده الصبح اول ما عرفت خدت الاذن من ابويا و جيتلك
مغاورى يتنهد
سماح / كنت فكراك هتفرح لما تشوفنى ما كنتش اعرف انك هتزعل اوى كدا … حقك عليا انا ماشيه
سماح تيجي تمشي يوقفها
مغاورى / استنى انا ما اقصدش انا بس مش عاوزك … المكان هنا ما يناسبكيش ما ينفعش تيجي هنا
سماح / و لا يناسبك و لا مقامك و بعدين هو انا جايه اتفسح انا جبتلك اكل اكيد بيبعتولك اكل بس يعني اهو … انا عملاهولك بايدى
مغاورى / تسلم ايدك تعبتى روحك
سماح / تعبك راحه انا كلمت عباس ابن عمتك خدت رقمه من خديجه قالى انك مش هتطول ان شاء الله و انه ماشي فى الاجراءات
مغاورى / الحمد لله … الدراسه بدات
سماح / اه بس ما بروحش المدرسه الكبير جابلنا مدرسات يجولنا البيت ما حدش فى السرايا بيروح المدرسه
مغاورى / احسن
سماح / و هنفضل كدا لامتى مهو غار
مغاورى / من حبك فى المدرسه يعني يا سماح ما انتى كدا كدا ثانويه عامه و اخرك دروس مدرسه ايه اللى بتتكلمى عليها
سماح / ماشي
مغاورى / اخبار العمال ايه
سماح / ما اعرفش ما سالتش اتلخمت النهرده ان شاء الله اكلم ابا الحج اطمن عليه و اساله
مغاورى / ماشي
سماح / اخليهم يبعتولك حاجه غيار و لا اى حاجه ناقصك هنا حاجه
مغاورى / تسلمى خدى بالك من نفسك و تطلعى من هنا على البيت عدل
سماح / حاضر
مغاورى / خدى بالك من روحك
سماح/ هو مفيش هنا تليفون تكلمنى تطمنى عليك
مغاورى/ فى بس مش عاوز رقمك يتنطور بين المساجين هبقي اكلمك على رقم عباده
سماح / عباده لا هيرخم عليا و مش هعرف اكلمك
مغاورى / لا مش هيرخم و ان رخم هبقي اكلمك على رقم ابوكى
سماح / ابويا ماشي
مغاورى / انتى عامله محشي
سماح تبتسم
مغاورى / ريحته فاحت و جوعتنى
سماح / عامله بزياده عشان تاكل و تشبع و عشان عارفه ان الناس اللى جوه مش هيسبوك لا تاكل و لا تتهنى
مغاورى / تسلم ايدك بس ما تجيش هنا تانى
سماح / ما اوعدكش يلا انا همشي بقي عشان تلحق الاكل قبل ما يبرد
مغاورى/ توصلى بالسلامه هكلمهم اطمن عليكي و لو احتاجتى اى حاجه
سماح / ما تشغلش روحك بيا انا زى الفل مش ناقصنى غير خروجك ليا … لينا بالسلامه
مغاورى يبتسم سماح تبتسم و تمشي
………………..
فى المكتب
ناصر / يعني قررت تروح اخر كلام
مختار / انا من ساعه ما كلمنى و انا بفكر فى الموضوع و ما لقيتش حل انسب من كدا
ناصر / خلاص اللى يريحك بس برده مش هتسافر لوحدك
مختار / دا احسن حل صدقنى
ناصر / قولت لا يعني لا انت مالك بقيت لتات كدا ليه و كل حاجه تجادل فيها انت مهما كبرت ياله مش هتكبر عليا
مختار / استغفر الله يا كبير ليه الكلام ده
ناصر / عشان مش عاجبنى حالك يا مختار
مختار / اقسم بالله ما ناوى على حاجه
ناصر / امال عاوز تروح لوحدك ليه
مختار / خفافى و امان
ناصر / انسي سفر لوحدك ما فيش و كلمه كمان هحبسك فى اوضتك زى العيال الصغيره انت تعبتنى
مختار / لا و على ايه اللى تشوفه يا كبير عن اذنك
ناصر يشاورله يمشي مختار يطلع بره و يقفل الباب انتصار تدخل جرى
انتصار / فى ايه يا مختار اخوك بيزعق ليه
مختار يتنهد
انتصار/ طب اهدى و ما تزعلش نفسك اخوك الكبير برده
مختار / مش زعلان طبعا انتى عارفه انى عمرى ما ازعل منه عن اذنك
مختار يمشي هند تنزل من فوق تناديه
هند / مختار .. مختار
يقف و يبصلها هند تحصله
هند / رايح فين ؟
مختار/ كنت هشوف امين فين … فى حاجه و لا ايه؟
هند / كنت عوزاك تتكلم مع عبد الله
مختار / ماله عبد الله ؟
هند / يعني انت مش حاسس مثلا … تكون مديت ايدك عليه … قولتله كلام يضايقه … خالص يعني ؟
مختار / ايوه بس … تمام معاكى حق … ما اتحرمش منك
هند / امين
مختار يطلع بره و هند متبعاه و مبتسمه
…………………
فى سرايا الجوارحه
ماجده بتدخل شاى للعمال
راجل ١/ تعبتى روحك يا ست الكل
ماجده / تعبكوا راحه .. الهمه يا رجاله عاوزين نفرح
راجل ٢ / على ما سي مغاورى يخرج بالسلامه هتبقي عروسه
ماجده / البركه فيكوا … هبعتلكوا عماره جنبكوا لو احتاجتوا حاجه
راجل ١/ كتر خيرك يا ست الكل
ماجده تمشي ناحيه السلم تقابل كوثر طالعه
كوثر / عوقتى كدا ليه كل ده بتديهم الشاى
ماجده / يادوب يا عمتى
كوثر / خلصوا و لا لسه
ماجده / تقريبا مش فاضل غير حاجات بسيطه
كوثر / جوازه الهم و الندامه انا عارفه عاجبه فيها ايه البت دى قال هد حيطه و ابنى حيطه بكره تقوله هاتلى بيت لوحدى
ماجده / ربنا يقدم اللى فيه الخير
كوثر / عمر الخير ما هيخش البيت ده و بنت الزنايته فيه شوفتى اخوكى الورده المفتحه اول ما دخلها حياته جراله ايه … اهو بايت فى القسم و اللى قتل عشانهم نايمين فى بيوتهم و مدبغددين
ماجده / عباس قالى انه كدا كدا خارج اجراءات مش اكتر
كوثر / يلا انا هحرق دمى على ايه انزلى بصي على الاكل مع الحريم و انا هطلع اريح ضهرى شويه
ماجده / تمام يا عمتى عن اذنك
ماجده تيجي تمشي كوثر تناديها
كوثر / ماجده
ماجده تبصلها
كوثر/ انتى يا بت مش هتحسي على دمك ابدا ما تمرش فيكي التربيه يا بت
ماجده / انا عملت ايه بس يا عمتى
كوثر/ بقولك هريح ضهرى مش تقولى سلامتك مالك اى نيله على دماغك
ماجده / حقك عليا يا عمتى معاكى حق هبقي اخد بالى … سلامتك في حاجه ؟
كوثر / بعد ايه بقي يلا
كوثر تسيبها و تطلع ماجده تتنهد و تنزل تلاقي عباس واقف على السلم فى الدور اللى تحت مبتسم
ماجده / انت واقف هنا ليه
عباس / كنت طالع ابص على العمال سمعتك انتى و امى
ماجده / شكل ضهرها واجعها
عباس / انا عارف انها بتيجي عليكي بس من عشمها و انتى عارفه
ماجده / يا ابنى دى امى التانيه دا هى اللى مربيانى بقولك ايه ما تعطلنيش انا هنزل ابص على الاكل
عباس / من قله الحريم فى البيت تعالى تعالى عاوزك
ماجده / خير فى حاجه
عباس/ اه فى تعالى
عباس يروح اوضته و ماجده وراه تدخل عباس يقفل الباب ماجده تلاقي شنطه قماش على السرير عباس يروح يفتحها و يطلع علبه قطيفه يفتحها جواها طقم دهب تقيل
عباس / كنت معدى قولت اجبلك حاجه بقالى ياما ما جبتلكيش
ماجده / تسلم و تعيش بس دا كتير اوى
عباس / ما فيش حاجه تكتر عليكي
ماجده / هتلبسهونى و لا ايه
عباس / و ماله لفى
عباس يحط العلبه على الترابيزه و يطلع الكوليه يلبسه لماجده ماجده تحط ايدها عليه
عباس / دا احلى و لا الورد و الشيكولاته
ماجده / كل اللى يجي منك حلو
ماجده تقف قدام المرايه تبص على الكوليه تشوف عباس بيطلع شنطه هدايا كبيره من تحت الترابيزه تبص تلاقيه بيطلع من جواها بوكيه ورد و علبه شيكولاته
عباس / و ادى الورد و ادى الشيكولاته عشان ما يبقالكيش حجه
ماجده / بتهزر !!!
عباس / كل سنه و انتى طيبه
ماجده / هو النهرده الايه … عيد ميلادى
عباس / ما نسيتش المرادى الصراحه عملت تذكير على
ماجده تحضنه عباس يبتسم
عباس / الموبايل … ما وراييش شغل و لا ورايا سفريات و فضيتلك نفسي باقي اليوم عشان اعوض كل اعياد الميلاد اللى فاتت
عباس يمد ايده تحت الترابيزه فى شنطه تانيه جواها علبه يفتحها فيها تورته صغيره و كيس فيه طبقين بلاستيك و طرطورين و زماره و كيس بلالين ماجده تضحك
عباس / ما خلصتش استنى
عباس يطلع شمعه و شوك بلاستيك
عباس / بيتهيالى كدا عدانى العيب و ازح عيد ميلاد لعشر سنين قدام اهو
ماجده / نسيت الساقع
عباس / اعوذ بالله منكوا صنف … لا يا ستى ما نسيتوش
عباس يمد ايده فى شنطه الورد فيها ازازه و كبايتين بلاستيك
عباس / شوبيك لبيك عباس بين ايديك
ماجده / هو انا مش واخده على كدا بس ممكن اخد عادى يعني
عباس / لا ما تاخديش عشان ما ترجعيش تنكدى عليا لما انسي سبيها بظروفها كدا
ماجده / ماشي و انا راضيه
عباس / طب ايه مش هنغنى حيو ابو الفصاد و لا ايه
ماجده / قبل الاكل كدا يسد نفسك
عباس يروح يقفل الباب بالمفتاح ماجده تبتسم بخجل
عباس / قبل الاكل بعد الاكل البركه فيكي بقي يا قشطه انتى تفتحى نفسي احنا مش هنحتفل و لا ايه
ماجده / ازاى بس … استنانى هنا خمس دقايق هخش الحمام و ارجعلك … على ما تظبط الدنيا و تنفخ البلالين
عباس / ما تعوقيش خمس دقايق السادسه هجيلك
عباس يغمزلها ماجده تبتسم و تدخل الحمام عباس يطلع التورته من العلبه و يحط الشمعه و يرص الحاجه على الترابيزه و ينفخ بلونتين و يبص فى الساعه و يروح يفتح باب الحمام و يدخل
…………………….
فى المضيفه
مختار يخبط على الباب عبد الله يفتح
مختار / ادخل و لا لسه مخاصمنى
عبد الله / بيتك يعني انت بتستاذن تدخل بيتك
مختار / دا انت زعلان اوى بقي
عبد الله يدخل و مختار يدخل وراه
مختار / على العموم حقك عليا ما تزعلش انا كنت مضغوط و بعدين لو ما كنتش انت تستحملنى مين هيستحملنى يعنى
عبد الله / مش زعلان
مختار / من قلبك و لا لازم اكع
عبد الله يبصله مختار يقعد جنبه
مختار / بهزر معاك مالك كدا قافش ليه
عبد الله / مش قافش و لا حاجه انا بس
مختار / ايه سكت يعني
عبد الله / مفيش
مختار يضربه على دماغه من ورا بهزرا
مختار / ما ليش خلق انا لطبع الحريم ده ما تنشف كدا و تقول مالك فى ايه
عبد الله / انا مش زيكوا يا مختار انا مش عارف ارتب وقتى و ورايا التزامات كتير مش المفروض اشيلها فى السن ده
مختار / ليه صغير و لا ايه ما انت راجل اهو و ملو هدومك
عبد الله / انت فاكرنى مش عاوز اتجوز مريم عايزها النهرده قبل بكره بس ازاى و منين انا عايش فى بيتها و شغال عند اهلها
مختار / بس بس بس بس ما تعجنش اكتر من كدا انت هنا مش عشان انت ما لكش بيت انت عندك بدل البيت اتنين بس انت هنا عشان الامان
عبد الله / اللى هو كمان مش هعرف احمى نفسي و لا احمى امى و اختى يبقي المفروض احميها ازاى
مختار / انت مالك فيك ايه يا ابنى الدنيا مش كدا خالص احنا مجمعين الحريم كلهم فى حته واحده و مجمعين الرجاله حواليهم عشان نعرف نحميهم لو كل واحد خد حريمه فى بيت لوحده هنتفرق و ساعتها هيصطادونا و بعدين اديك شوفت بعينك نسيت نفسي لحظه و خدت اختك و خرجت بس كانت هتروح منى لولاش بس ستر ربنا تفتكر انا مش فاهمك طب قسما بالله ما حد حاسس بيك قدى بس ان نسيت فى يوم ناصر يفكرنى و ان انت نسيت يوم انا افكرك احنا سوا عشان نستقوى ببعض احنا عيله يا عبد الله اللى يوجعك يوجعنى و اللى يوجعنى يوجعك
عبد الله / طب و الشغل هارجع اخد مصروفى تانى يعني
مختار / انت هتضحك على روحك يا عبد الله و انت من امتى ما اخدتش مصروف هو انت بتقبض كام اصلا ما تبص كدا انت جايب شبكه بكام و هدايا بكام لتكون فاكر ان مرتبك ده هو اللى ساندك
عبد الله / لا انتوا اللى سانديني
مختار / ابوك الله يرحمه اللى ساندك هو اللى سابلكوا معاشه و ايجار البيت و الدكان اللى بيبعتولكوا قرشين كل اول شهر و مسنود بالحضانه اللى امك فتحتها
عبد الله / انت هتكدب الكدبه و تصدقها انت اللى فتحت الحضانه و شاركت ماما بالمجهود و اهى ماما قعدت هى كمان
مختار / بس لسه بتديرها بالتليفون انت فاكرنى مش متابع و لا ايه و بعدين انت مش دورك تجيب فلوس دلوقت انت ملزم بمهر و لازم تسده و مهرك ما كانش فلوس يا عبد الله كان شهاده الطب يعني راس مالك هو علمك فلوسك دى ما تساويش عندينا حاجه بس شهادتك تخليك تساوى وزنك دهب
عبد الله / ايه الاوفر ده
مختار / فى بلدنا الدكتور قيمته كبيره اوى سيد الناس اصل الناس هنا راس مالها صحتها مش زى مصر فهمتنى و لا هتتعبنى معاك
عبد الله / فاهمك بس
مختار / ما بسش بص يا ابن الناس احنا ما كانش عندنا وقت نزاكر انت ربنا كرمك بابوك الله يرحمه وفرلك الجو اللى يخليك تركز فى دروسك و تدخل كليه الطب و احنا محتاجين اللى زيك اعتبرنا بنبى بيت و بنصرف عليه و نكلفه عشان فى الاخر نقعد فيه و نستفيد من خيره فهمت بقي و لا ايه
عبد الله / فهمت
مختار / سيبك من مرتب الشونه اللى زعلان عليه جنب مرتب الطب و العياده اللى هتفتحها و الناس اللى هتجيلك انت بس اتقى ربنا فى نفسك و فى الغلابه و ربنا هيكرمك ان شاء الله
عبد الله/ ان شاء الله
مختار / ما تفتحش الموال ده تانى مش كل يومين هنعيده
عبد الله يبتسم
مختار / انا نازل مصر تيجي معايا
عبد الله / و انا ليا مين فى مصر لا خليني هنا احسن
مختار / بشوقك يلا اسيبك تشوف اللى وراك
عبد الله يبتسم مختار يمشي و يقفل الباب وراه
…………………….
فى شقه فى مصر
فارس بيفضي شنطه هدومه باب الشقه يخبط فارس يروح يفتح يلاقى رشيد واقف مبتسم و وراه اتنين رجاله فارس يشوف رشيد يتفاجئ
رشيد / احنا اسفين لو كنا جينا فى وقت مش مناسب بس الحقيقه انا استنيت اللحظه دى كتير اوى
الرجاله تهجم على فارس تنيمه فى الارض و رشيد يديله حقنه فى رقبته فارس ينام
رشيد / انتوا عارفين هتعملوا ايه اسبقونى و انا هحصلكوا
الرجاله تشيل فارس و يمشوا رشيد يتمشي فى الشقه و يروح يفتح الدولاب و يطلع من جيبه كيس بودره و يحطها وسط الهدوم رشيد يقفل الدولاب و يطلع منديل و يمسح البصمات و يمشي و يقفل الباب وراه
………………………
فى فيلا فيرا
سمر قاعده على السرير الباب يخبط تقوم تفتح تلاقي فيرا مبتسمه
فيرا / عامله ايه
سمر تبصلها و ساكته فيرا تبتسم
فيرا/ رشيد وصانى عليكي … ههههههه اصله ما يعرفش انتى مهمه عندى قد ايه
سمر / ما افتكرش انى مهمه اصلا
فيرا / ازاى امال اتجسس على رشيد و اعرف بيعمل ايه و بيفكر ازاى منين
سمر / مهو انا شخصيا ما اعرفش رشيد مش بيقولى حاجه و حتى لو سألته
فيرا / بيتعصب مش كدا
سمر / مش ديما هو ما بيثقش فيا
فيرا / بالعكس بيثق فيكي جدا هو بس بيخاف عليكي بيخاف تعرفى حاجه تبقي خطر عليكي رشيد بيحبك اوى … ما اعرفش على ايه
فيرا تبص على سمر من فوق لتحت
فيرا / بس يمكن النزعه الشرقيه اللى جواه او يمكن بتفكريه بحاجه قديمه فى حياتى اصل اللى زى رشيد ده بير مالوش قرار … اسالينى انا عن الشخصيه دى
سمر / انتى عاوزه منه ايه
فيرا / تفتكرى ممكن اعوذ ايه
سمر / يهربلك الحاجه بره مصر
فيرا / انتى عارفه انا فى مصر ليه
سمر / عشان تبيعي الحبوب
فيرا تبتسم و تهز راسها لا
فيرا / انا هنا عشان هم طلبونى قالولى تعالى يا فيرا قولت هاجى زيارات مسكوا فيا و ما رضيوش يخلونى امشي
سمر تبصلها باستغراب
فيرا / بجد دا اللى حصل و تعرفى مين اكتر واحد ماسك فيا و مش راضي ابدا ابدا انى امشي
سمر / مين
فيرا / صاحب رشيد الانتيم … مختار
سمر / مش صحاب والله مش صحاب كان شغل زيه زيك كدا حتى اخو مختار الكبير ناصر مسمى رشيد النجس و مش بيحبه
فيرا / اه عارفه انا الحوار ده بس مختار بقي
سمر / مختار ضرب رشيد يوم ما خدنى من عندهم
فيرا / عارفه ده كمان
سمر / انتى ليه مصره انهم صحاب ليه مصره ان رشيد بيعمل حاجه هو ما بيعملهاش
فيرا / انتى عارفه رشيد فين دلوقت
سمر / لا قولتلك ما بيقوليش حاجه
فيرا / عشان انتى ما بتساليش
سمر / بساله ما بيردش
فيرا / بتساليه غلط انتى ايه اللى انتى لبساه ده انتى بتنامى معاه كدا
سمر / قولتلك
فيرا / انتى جميله يا سمر و البنت الجميله زى السم بيجرى فى الدم لحد ما يوصل للقلب و ساعتها بيقتل العقل انتى بقي قدرتى توصلى لقلبه و انتى لابسه بس لسه سايبه عقله صاحى عشان كدا مش قادره توصلى معاه لحاجه
سمر / انا حاولت و سالته
فيرا / الرجاله كلها زى بعض بيتهبلوا لما بيشوفوا جسم واحده حلوه زيك
سمر / رشيد ياما شاف بنات و ياما
فيرا / البنات التانين مش زيك انتى فى قلبه البنات التانين كانوا بيحاولوا يلغوا عقله بس قلبه كان شغال انما انتى هتلغى قلبه و عقله فى وقت واحد مش هيقدر يقاوم
سمر / انا مش هعرف اعمل اللى بتقولى عليه ده مش هعرف
فيرا / الموضوع سهل و بعدين مش اول مره يعني امال فارس
سمر تعيط
سمر / فارس كان غصب عنى اللى حصل بيني و بينه كان غصب عنى انا ما اغريتوش و لا حاولت اعمل معاه اى حاجه هو اللى عمل كل حاجه هو اللى
فيرا/ بس بس بس انتى بتعيطي ليه انتى عاوزه العينين الحلوه دى تحمر و تورم … ما تعمليش حاجه يا سمر انتى مش محتاجه تعملى حاجه … بصي انا هعتبرك اختى الصغيره و هساعدك
سمر تبصلها
فيرا / اللبسي حاجه مفتوحه شويه ما تقلعيش اوى كفايا حاجات بسيطه منك تبان زرار او اتنين من فوق و نوسع الفتحه شويه من تحت بس شوفتى بسيطه ازاى
سمر / مش هيبصلى هو اللى جابلى اللبس ده هو اللى غطانى
فيرا / يبقي نستخدم عامل حفاز
سمر تبصلها
فيرا / هبعتلك شريط حبوب تحطيهوله فى الاكل و ازازه برفيوم ترشي منها على رقبتك و شرايين ايديكى مش هيقدر يقاوم كتير و هيجيلك يبوس ايديكى و رجليكي و ساعتها هتعرفى تستدرجيه فى الكلام لانه مش هيكون فى وعيه مش هيبقي عارف يفكر غير فى انه ازاى يرضيكي فتريحيه
سمر / انا مش
فيرا / مره فى مره هتتعلمى و بعدين كلو عشان خاطر ابن اخوكى اليتيم يرضيكي الناس الوحشين ياذوه دا يا قلبي ما بيبطلش عياط و صريخ عاوز ماما عاوز ماما قطع قلبي
سمر تبص فى الارض و تعيط
فيرا / هتقدرى اعملى اللى قولتلك عليه و انا متاكده انى هسمع اخبار حلوه اوى قريب
سمر/ رشيد بيصلى رشيد بقي بيصلى
فيرا تبصلها باستغراب
سمر/ رشيد مش هيعمل حاجه حرام مهما حطيتله فى حاجات من دى
فيرا / بعد ما بيقوم من الصلاه بيعمل ايه
سمر / بيدعى ربنا
فيرا تفكر ثوانى و تبص لسمر
فيرا / بينام معاكى على نفس السرير
سمر / ايوه بس ما
فيرا / يبقي تحطيله الحبوب فى الاكل و تعملى اللى قولتلك عليه
سمر تبص لفيرا
فيرا / بصي ما تضغطيش على نفسك حاولى نجحت كان بها ما نجحتش نشوف غيرها مش هنغلب يعني … يلا خشي استحمى و ظبطى نفسك و اجهزى و انا هبعتلك اللى اتقفنا عليه يلا هسيبك تشوفى اللى وراكى و مش هعطلك اكتر من كدا … باااااى
فيرا تشاور لسمر و تمشي سمر تجرى على السرير و ترمي نفسها و تعيط
……………..
فى شقه فى دور عالى على فيو بحر
رشيد واقف بيتفرج على البحر و وراه كرسي مربط فيه فارس و متغمى عنيه و فاقد الوعى و متكمم فارس يفوق و يبدا يان رشيد يبص عليه و يروح يفك عنيه
رشيد / صباح الخير ايه ده كل ده نوم
فارس يغمغم و يقاوم
رشيد / ما تحاولش انت مربوط ربطه معلم … و بعدين فى حد يبقي قدامه المنظر الساحر ده و يتعصب كدا
فارس يقاوم اكتر
رشيد / تعرف و انا صغير كان نفسي اوى يبقي عندى مكان زى ده تخيل تعيش الباقي من حياتك بتتفرج على الجمال ده الميه مع السما حاجه تهدى الاعصاب … شوفت بقي انا راجل محترم ازاى انا بقي هخليك تعيش الباقي من حياتك فى الجنه دى بس هو فى تفصيله صغيره بالنسبالك مش عارف هتفرق معاك و لا لا بس الجنه دى هتبقي جحيم بالنسبالك
فارس يقاوم و يتقلب بالكرسي رشيد يبص عليه
رشيد / ما تخافش انا مش هاذيك انا حتى مش هلمسك ههههههههه اصل حتى لو لمستك حتى لو فرهدت نفسي فى ضربك و تعذيبك البعيد لوح مش هيحس انما انا لو صبرت ساعتين تلاته كمان … انت هتصرخ من الوجع و تتعذب اوتوماتيك و من غير ما ابذل معاك اى مجهود
فارس يغمغم و يحاول يقاوم
رشيد / انت عارفنى صح و لا اعرفك بنفسي عارفنى صح انت عارفنى ؟
فارس يغمغم رشيد يضحك
رشيد / ههههههههه معلش معلش خلاص خلاص نسيت ايه يا اخى جل من لا يسهو يعني
رشيد يفك بق فارس
فارس / فيرا مش هتسكتلك فيرا هتقتلك انت و الكلبه بتاعتك
رشيد / فيرا مين … ااااااه شوف و انا اللى نسيت اقولك مش فيرا باعتك ليا اصلك خلاص يا بيبي بقيت اكسبايرد ما لكش لزمه و انا برضه عرضت عليها سعر كويس دى حتى هى اللى ساعدتنى اجيبك هنا … طيبه اوى فيرا دى و قلبها ابيض هى بس عصبيه حبتين و عنيفه تلت حبات بس صاحبك ايه مسيطر برده
فارس / انت عاوز منى ايه
رشيد / عاوز حق البت اللى وثقت فيك و انت استغليتها عاوز حق صاحبك اللى غدرت بيه
فارس / مهو عبيط زيك يدفع فى بت زى دى المبلغ ده لازم يقول كدا انت لا تعرفها و لا تعرفه ما كانوش ملايكه و هى نفسها ما كانتش طاهره الشريفه يعني تفتكر لو كانت عدله ما كنتش اتمسكت بيها و اتجوزتها
رشيد / ما كنتش هتقدر
فارس يبصله و يحاول يفك نفسه
رشيد / طول ما الحبوب دى فى دمك ما كنتش هتقدر تقول لا
فارس / طب ما انت ما بتاخدش منها و برده ما تقدرش تقول لا كل واحد و له حبل بيتربط منه و هى بتعرف تلف الحبال دى صح و انت حبلك فى بت خاينه ما تسواش تلاته ابيض
رشيد يعوج راسه و يبصله
فارس / انا قولت لفيرا كل حاجه عن سمر و هى اكيد عرفت تظبطلها الحبل اللى على مقاسها
رشيد / حبلها الحبوب زيك بالظبط بس لسبب ما الحلو ما يكملش انا كنت خلاص قربت الاقى علاج كنت خلاص قربت افك الحبل ده بس دايما فى اخر لحظه … كل حاجه بتبوظ
فارس / عشان ما فيش علاج انت فاكر انى ما جربتش كل الطرق كل المسكنات كل حاجه ممكنه و مش ممكنه حللت دمى فى اكبر معامل جوه و بره مصر صرفت فلوس بالهبل انى افك الحبل ده من على رقبتى بس ما فيش فايده الوجع بيخليك ترجعلها زى الكلب من تانى
رشيد / جربت تخففها بالتدريج
فارس / الوجع ما بيرحمش عضمك كله بيتكسر و بتفضل ترجع لحد ما تفقد الوعى دقايق و ترجع تفوق و تصرخ تانى
رشيد / و انا مش باقي عليك و لا هتصعب عليا و زى ما انت شايف الكومباوند هنا لسه ما سكنش يعني تصرخ زى ما تصرخ ما حدش هيعبرك
فارس / هتقتلنى قبل ما توصل للعلاج دا لو فى علاج اصلا
رشيد / يبقي ريحتك ما انت كدا كدا ميت اوعى تفتكر انى هسيبك تعيش لما نخلص انا بس هسيبك عايش لانى محتاج فار تجارب مش اكتر
فارس / مش هتسمحلك حتى تحاول انا لو منك اقتلنى دلوقت و اخلص
رشيد / لا لا لا اقتلك ايه يا راجل قول كلام غير ده هو انا وش ذلك … و بعدين انا ما بحبكش ارحمك ليه دا انا حتى لما تخف كدا ان شاء الله و تقوملنا بالسلامه مش هقتلك موته عاديه كدا لا دا انا هقتلك بفن هقتلك بطريقه يحتار فى تفسيرها اهل العلم و العلماء هيقولوا الجدع ده بقي كدا ازاى شاف ايه و اتعذب ازاى لحد ما وصل للمرحله دى
فارس / هتموت قبل ما تشوف اليوم ده اول ما توصل للعلاج فيرا هتقتلك هتقتلك و تبيع الكلبه بتاعتك لحد تانى اهبل زيك
رشيد / انا هسيبك لحد ما اوصل للعلاج ساعتها هتبقي انت بتحس هتحس بكل ذره وجع هتسببلك فيها و ما تقلقش كل يوم هيجيلك حد يديك اكل و ميه و الجرعه بتاعتك المكان كلو مترقب بكاميرات يعنى هتفرج عليك و انت بتتعذب لايف حتى و انا مش معاك
فارس / انا ما عملتلكش حاجه و ان كان على سمر
رشيد / لا لا مش حوار سمر خالص الحقيقه انا بكره الصاحب الخاين اللى زيك بتخلونى قرفان و عاوز ارجع
فارس / انا معايا فلوس كتير اوى هقسمها معاك
رشيد يبتسم
فارس / هديهالك كلها
رشيد يسيبه و يمشي
فارس/ استنى استنى يا رشيد انا اقدر اساعدك انا اعرف حاجات عن فيرا هتساعدك انا اعرف
رشيد يمشي و يقفل الباب وراه و رشيد بيتلوى فى الارض بيحاول يفك نفسه و هو ببصرخ
فارس / استنى يا رشيد استنى ما تسبنيش … رشييييييد
………………….
تانى يوم على الطريق
مختار سايق العربيه و عباده جنبه و ورا اتنين رجاله و وراهم عربيه تانيه فيها اربع رجاله
عباده / و ما دام انت كدا كدا مش هتحضر ام الفرح مشحطط روحك و مشحططنا معاك ليه
مختار / حد قالك تيجي
عباده يبصلها بطرف عينه مختار يضحك
مختار / انا مش عاوز اسيبه لوحده فى يوم زى ده من غير ما اشوفه و اسلم عليه و كدا و فى نفس الوقت مش عاوز اللفت الانتباه ليه و اسببله مشاكل خصوصا انى بعيد عنه و مش هقدر احميه فهمت و لا انت فاطر اي على الصبح
عباده / فاطر من اللى انت فاطر منه يا خويا
مختار / ما تقلقش انا مظبط كل حاجه مع الرجاله هنروح ساعتين زمن و نرجع علاطول
راجل 1/ بس كدا الطريق هيبقى صعب اوى يا سى مختار
مختار / انا هسوق و انا رايح و غيرى يسوق و هو راجع و اهو قدامكوا السكه طويله اللى عاوز ينام ينام و نبقى نبدل مع بعض بسم الله ما شاء الله احنا مش شويه يعنى
عباده / عبد المجيد بيتكلم صح احنا مش هنقدر نرجع النهرده هنبات و نرجع مع اول طلعه شمس
مختار / ما ينفعش يا عباده انا و انت بعيد عن البلد و كمان مغاورى فى الحجز
عباده / مش هيجرا حاجه انت فاكر البلد ما فيهاش غيرنا و لا ايه
راجل 2/ طب دا احنا بالصلاه على النبى بلدنا كلها رجاله طب دا حتى حريمنا رجاله
عبد المجيد/ والله فى دى معاك حق الواحد ريقه نشف من كتر ما بيدور على بنت الحلال الا ايه كلهم غفر
عباده / ما تتلم يا سى براد بيت عصرك و اوانك عاوزها تحطلك احمر و اخضر قبل الجواز و لا ايه
عبد المجيد / يا عم ما قولناش كدا بس اهو الواحد يشوف حاجه تجرى ريقه
راجل 2/ سيبكوا منه دا عبيط
عبد المجيد / هو ايه اللى عبيط انت هتغلط و لا ايه
مختار / خلااااص
عبد المجيد / الا قولى يا سى مختار هو بنات مصر حلوين كدا زى ما بيقولوا عليهم
مختار / انت جاى معايا حراسه و لا جاى تدور على عروسه
عبد المجيد / الله احنا مش رايحين فرح
عباده / ههههههههههههههههههههه يعنى هتروح تنقى واحده عامله عمره فى وشها تصحى فى الصبحيه تلاقى خليل نايم جنبك لا مؤاخذه يا خليل
خليل / مؤاخذتك معاك يا سيد الناس بس مش على اخر الزمن هصحى الاقى عبد المجيد جنبى
عباده / انت هتغلط فى عبد المجيد و لا ايه ما اسمحلكش دا براد بيت العرب ده
عبد المجيد / حقكوا تتمالسوا بكره ربنا يكرمنى ببنت الحلال اللى فى بالى حاجه كدا من اللى ترد الدمويه فى وش الواحد
مختار / ربنا يرزقك يا ابنى بس يؤسفنى اقولك اننا مش هنحضر الفرح و لا هتشوف بنات فى مصر
عبد المجيد / انت بتتكلم جد يا سى مختار
عباده / ههههههههههههههههه طب كنت هتهاله بالتدريج
عبد المجيد / يعنى ايه ؟ ما تلعبوش باعصابى يا جدعان ما يصحش كدا
خليل / يا ابنى انت مسطول و لا شارب حاجه انت مش سامع سى مختار من الاول عمال يقول مش هيحضر عشان ميجرش رجل صاحبه العريس فى الخيه
عبد المجيد / لا ما انت عارفنى ما برميش ودانى … استغفر الله العظيم طب انا هعمل ايه دلوقت
مختار / انت كنت فاكر ترجع بالعروسه فى ايدك و لا ايه
خليل / لا بس كان نفسه يقولهم انه لقى عروسه و يفلت من جوازته من سنيه بنت خالته مع انها اقسم بالله خساره فى جتته
عبد المجيد / يا عم و هو انا قولت انها وحشه
عباده / امال مش عجباك ليه
عبد المجيد / الواحد ما بيتجوزش اخته يا سى عباده و البت متربيه معانا من يوم ما امها الله يرحمها ما ماتت و انا بصراحه مش قادر اشوفها غير انها اختى بس امى بقى الله يهديها ما لهاش سيره فى الرايحه و الجايه غير سنيه لعبد المجيد و عبد المجيد لسنيه مع ان خطابها كتير اقسم بالله بس بطفشهم كلهم و اى عروسه اختارها من البلد تطلع فيها القطط الفاطسه
عباده / ما يمكن امك شايفه فيها خير انت مش شايفه
عبد المجيد / يا سى عباده سنيه الخير كله ما قولتش حاجه بس زى ما قولتلك مش قادر اشوفها اكتر من انها اختى الصغيره
مختار / مشكله دى برده اصل انت حتى لو جبتلها ملكه جمال مصر هتطلع فيها القطط الفاطسه برده يبقى فرقت فى ايه
عباده / و بعدين كله الا رضا الام يا عبد المجيد بصراحه
خليل / قوله يا سى عباده ياما قولتله ما يتبترش على النعمه
مختار / ما تضغطوش عليه يا جماعه اكيد ربنا شايلها حاجه احسن
خليل / والله يا سى مختار اى حاجه هتبقى احسن من عبدالمجيد
عبد المجيد/ شكلها هتبقى سفريه ما يعلم بيها الا ربنا
عباده / دا لسه واخد باله دلوقت
الكل يضحك و عبد المجيد يبص من الشباك
…………………………..
فى فيلا فيرا
سمر بتبص من الشباك على فيرا واقفه تتكلم مع ادواردوا فى رجاله كتير مسلحين بيركبوا عربيات
ادواردوا / يو نو ذات ايت ونت ايند ويل ( انتى عارفه ان الحوار ده مش هينتهى على خير )
فيرا / دونت ورى ( ما تقلقش )
ادواردوا / ذا بوليس اند ذا ارمى ويل سيند زير سولدجرز اند سراوند زا سيتى ( البوليس و الجيش هيبعتوا الجنود يحافوطوا المدينه )
فيرا / اى بيت زاى ويل ( اراهن انهم هيعملوا كدا )
ادواردوا / سو هواى يو ار دوينج سو ( امال بتعملى كدا ليه )
فيرا / زى نو ذا تروث هى ويل نو ذا تروث بت هى ونت بى ابل تو دو انى ثينج ( هيعرفوا الحقيقه هو هيعرف الحقيقه بس مش هيبقى عارف يعمل حاجه )
فيرا تبص لادواردوا و تبتسم
فيرا / هيز جوفرنمنت ويل بروتكت اس انتيل وى ريكريت اوزر مين ( حكومته هتحمينا لحد ما نجند رجاله تانين )
ادواردوا / زين يو ويل سيند زيم تو زير ديث تو ( و هتبعتيهم للموت هم كمان )
فيرا / زى ار ديد انى واى ( كدا كدا ميتين )
فيرا تبص على العربيات و تبتسملهم السواقين يتحركوا
ادواردوا/ يو ويل ريجريت زيس ( هتندمى )
فيرا / وى ويل سى ابوت ذات ( هنشوف )
فيرا تشاور للرجله يقفلوا البوابه و تدخل جوه تبص على سمر فوق سمر تقفل الشباك بسرعه
……………………………
فى القسم
مغاورى قاعد مع الظابط الجديد
مغاورى / انا مش فاهم انت بتتكلم عن ايه يا باشا
الظابط / انا بقولك ايه من الصبح كل حاجه اتغيرت حتى استراتيجيه الحكومه فى التعامل مع الازمه اتغيرت
مغاورى / يا باشا انا راجل فلاح و الكلام اللى سعادتك بتقوله ده كبير اوى عليا
الظابط / طب بتثق فى مين طيب عشان تسمعها منه تحب اكلملك المحافظ
مغاورى يتعدل فى قعدته
الظابط / الاعداد بتزيد و الكميه اللى بنمسكها كل يوم مش قليله
مغاورى / طب ما تقفلوا المحبس العمومى و تريحوا نفسكوا و تريحونا معاكوا
الظابط / مش بالبساطه دى
مغاورى / ازاى و لا مؤاخذه يعنى
الظابط / لما تبقى الفيلا ملك عضو مجلس شعب و عليها حصانه و اى محاوله فاشله للهجوم عليها هتفتح علينا فواتيح كتير اوى
مغاورى / اؤمر اقدر اساعد ازاى
الظابط / انا عاوز اتاكد ان اللحظه اللى ههجم فيها على الفيلا هلاقى سلاح و مخدرات و بنات و كل الحاجات اللى انت عارفه اللى الست دى بتاجر فيها عاوزها قضيه متكامله الاركان
مغاورى / و دا هيحصل ازاى ؟
الظابط / مغاورى بيه
الباب يخبط عسكرى يدخل يدى للظابط كارت
العسكرى / سى عباس الزيني بيستاذن يدخل يا باشا
الظابط / خليه يتفضل … الموضوع ما كانش محتاج محامين يعنى يا مغاورى
مغاورى / والله يا باشا ما كنت اعرف انه جاى
عباس يدخل
عباس / صباح الخير يا باشا عباس الزيني محامى مع المتهم
الظابط / زياد نصر الله
عباس / اهلا و سهلا نورت … الباشا كلمنى و جيتلك بنفسى
الظابط / كويس على الاقل مغاورى يلاقى حد بيثق فيه يصدقه
مغاورى / استغفر الله يا باشا بس الموضوع مش كدا خالص انا فعلا مش فاهم هقدر اساعدك فى حاجه زى دى ازاى
عباس / احنا لينا
مغاورى / احنا لينا عداوه كبيره اوى مع الست دى و خصوصا بعد النسب اللى حصل بينا و بين الزنايته
عباس يبص لمغاورى
مغاورى / بس عندى ليك طرف خيط
زياد / ايدى على كتفك
مغاورى / سعاده الباشا المامور
عباس / انت بتقول ايه يا مغاورى
مغاورى / الباشا مش بياخد الحبوب بس له سكه معاها احنا ما نعرفش ايه هى بس الباشا وصلها مره لفارس بيه الباشا اللى كان قبلك
زياد / انت متاكد من الكلام ده
مغاورى / انا ما عنديش دليل بس انت باشا كبير و تقدر تحط عينك عليه و تجيب التايهه و لا ايه
زياد / على العموم انا هعمل اللى اقدر عليه بس ارجوك لو عرفت اى حاجه او فى عندك اى معلومه تانيه
مغاورى / عيب يا باشا احنا خدامين الحكومه
مغاورى يبص لعباس عباس يبص لزياد و يرجع يبص لمغاورى
……………….
عند مدخل البلد
العربيات تقف و ينط منها الرجاله كل واحد ماسك رشاش يضربوا الغفر و يفتحوا النار على الناس اللى ماشيه فى الشوارع اهل البلد يطلعوا سلاحهم و يضربوا النار هم كمان و يحصل تبادل نار و رجاله فيرا يرسموا صلبان على البيوت
………………….
فى القسم
عباس قاعد مع مغاورى لوحدهم
عباس / انت ليه ما قولتلوش على رشيد
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية البر التاني)
تعليق واحد