رواية البر التاني الفصل الثامن والسبعون 78 بقلم لولو محمد
رواية البر التاني الجزء الثامن والسبعون
رواية البر التاني البارت الثامن والسبعون
رواية البر التاني الحلقة الثامنة والسبعون
فى جنينه الجوارحه
الكل خارج عباده و مختار وامين ماشيين جنب بعض و ناصر و مغاورى ماشيين جنب بعض
امين / لا و نازلنا متاخر و لابس عبايه ابوه قال يعني كدا بقي الكبير
مختار / الكبير غصب عن عين الطخين فينا
عباده/ ما طلعتش حلوه زى ما الواحد كان فاكر
مختار / مات الملك عاش الملك دايره و كلنا بنلف جواها
عباده / بتعيش عمرك تعمل كل اللى تقدر عليه عشان تبقي احسن واحد يليق بيها بس عشان تطولها لازم حد غال اوى على قلبك يموت
مختار / فى دى معاك حق
امين / مش لازم يموت ما الحج شاهين اصلا كان نواها يعني حتى لو كان عايش مغاورى برده كان هيبقي الكبير
مختار / و انت ينفع تبقي كبير على ابوك
امين / طب ما الكبير بقي كبير على عمه و خيلانه هى بالسن
عباده / الاب غير يا بجم
امين / ما فكرتش فيها الصراحه الحكايه دى
ناصر يفتح باب العربيه و يركب
ناصر / خد بالك من مراتك
مغاورى / فى عنيا
الرجاله كلها تركب و يمشوا مغاورى يبص فوق يلاقي سماح واقف فى التراس جنب امه يبتسملهم و يدخل السرايا
…………………….
فى شقه يوسف
يوسف يدخل المطبخ
يوسف / بقولك يا ماما ما عكيش متين جنيه
اسراء / روح خد من شنطتى
يوسف / شكرا
يوسف يروح الاوضه اسراء تروح وراه
اسراء / يا ابنى ما تستهدى بالله و تسمع كلام ابوك جايلك ايه من العند ده
يوسف / لما يبقي يعاملنى عدل ابقي اتعدل انما شغل الذل ده ما ياكلش معايا
اسراء / ذل ايه بس
يوسف / يعني مش شايفه
اسراء / طب يعني بدا ما كنت بتشتغل و ليك مرتب ينفع ترجع تقعد فى البيت كدا
يوسف / انا بعت السي فى لكذا حته و بنزل ادور على شغل على اخر الزمن يوسف الجمل يشتغل عند الناس عشان ابويا ينبسط و يحس انه خلف راجل
اسراء / الدنيا ما بتمشيش كدا دا انت حبيبه دا روحه فيك يا وله
يوسف / كان دلوقت اجواز اخواتى مبقيهم عليا معين ممدوح ابن عمى ريس عليا و التانى اشترى منه عربيته الكحيانه باضعاف تمنها و بيساعدهم كلهم انما انا بيعد عليا اللقمه
اسراء / ما حصلش يا يوسف ابوك بس
يوسف / ما كانوش متين جنيه هتزليني عليهم
اسراء تفتح شنطتها و تديله فلوس كتير
اسراء / كل اللى معايا بس فكر فى كلامى انا امك و بحبك دا انت الحيله يا ابنى
يوسف يهز راسه و يمشي و هو نازل على السلم تليفونه يرن
يوسف / ازيك يا عموا اخبارك
حامد / بقولك ما تعرفش ميكانيكي كويس و يكون سعره فى الحنين العربيه عطلت و الميكانيكي بتاعى طالع فى العالى اوى
يوسف / لا ما اعرفش
حامد / مالك فى حاجه و لا ايه ابوك اتخانق معاك تانى
يوسف / لا ما
حامد / بقولك ايه تعلالى على القهوه و احكيلى انا كلام التلفونات ده بيتعبلى اعصابى
يوسف / تمام مسافه السكه و اجيلك
يوسف يقفل و ينزل
……………………
فى محل وسام
وسام بتتصل بحد فى التليفون ما بيردش تقوم و تروح المحل التانى كبير و مليان زباين تروح للكاشير
وسام / ما شوفتش هشام
الشاب / مشي من نص ساعه
وسام / مشي ازاى يعني
الشاب / هو ما قالكيش و لا ايه
وسام/ قالى على ايه
الشاب / هشام فض الشراكه و احنا اشترينا نصيبه
وسام / ازاى يعني
الشاب / زى ما بقولك هو ما قالكيش و لا ايه
وسام تسيب المكان و تطلع بره تجرى
…………………….
فى اول البلد
كونتينر داخله الغفر يوقفوها
غفير ١ / على فين يا بلدينا
السواق/ معايا حاجات للكبير
غفير ١ / حاجات ايه دى انزل افتحلى العربيه دى وريني محمل ايه
السواق ينزل و يروح يفتح العربيه من ورا فيها كراتين متبرشمه
غفير ٢ / افتحها
السواق / لا معلش انا بوصل بس لا مؤاخذه
غفير ١ / و انا اش ضمنى انها مش قنابل يعني
السواق/ قنابل ايه يا باشا هو مختار باشا فين
عربيه مختار تدخل
مختار/ خلاص يا رجاله عندى … لا مؤاخذه اصلك وصلت بدرى عن معادك
السواق / الطريق كان سالك
مختار / الحمد لله ورايا
مختار يسوق و السواق يركب و يسوق وراه
……………………..
فى سرايا الجوارحه
سماح طالعه على السلم بشويش تقابل كوثر نازله
كوثر / هتنامى بدرى كدا
سماح/ يادوب اوضب نفسي قبل جوزى ما يجي … كنتى عاوزه منى حاجه
كوثر / كتر خيرك
سماح / تمام عن اذنك
سماح تسيبها و تطلع كوثر تنزل تحت تلاقى الستات قاعدين بيجهزوا خضار
كوثر / الله ينور
ام مغاورى / نورك نمتى كويس قولتلهم ما حدش يزعجك
كوثر / ياختى الصداع مش راضي يفارقني و دوا الضغط مش جايب همه ما تقومى يا مجده تعمليلى قهوه ساده
ماجده / هى القهوه دى اللى تعباكى انا هقوم اجبلك مسكن احسن
كوثر / حد الله بناقص احنا ناقصين
ماجده / دا تمام مغاورى اللى جايبهولى ما تخافيش منه
كوثر/ ما توجعيش قلبي فى مناهده خلاص مش عاوزه حاجه … امال سماح مش بتساعد معاكوا ليه
ام مغاورى / كانت بتساعد و استاذنت تطلع تتشطف و تغير قبل ما جوزها يجي
كوثر / خليها تدلع مهى خلاص بقت الكبيره
ام مغاورى / البت كانت قاعده وسطينا بتشتغل زيها زينا و بعدين الاصول ما فيش فيها كلام و احنا سلونا معروف يعني مش جديد عليكي
كوثر / الله يرحمك يا خويا
ماجده / اقوم اعملك كركاديه يا عمتى
كوثر / لا انا طالعه اريح فى اوضتى
كوثر تسيبهم و تطلع
ام مغاورى / ربنا يهدى
………………
فى مخزن الزنايته
ناصر بيبص على الكراتين كلها درونز
مختار / كاميرات للتصوير بتتوصل بالموبايل و تتحكم فيها
ناصر / و دى هنعمل بيها ايه دى
مختار / نحط عليها سي فور و موبايل بشريحه او نعلق فيها شبكه
ناصر / مش انت فاهم كل حاجه اعتبرها مهمتك
ناصر يسيب المكان و يطلع بره مختار يروح وراه
مختار / حسك مضايق يعني
ناصر / كفايا انت مبسوط
مختار / انقذ عبد الله و جابلك ادوات تساعدك و معرض حياته للخطر
ناصر / اتكلمنا قبل كدا و قولت انه ما دام اتغير ربنا يهديه انت عمال تعيد و تزيد ليه ايوه يا سيدي طلع واد جدع و صاحب صاحبه زى ما كنت بتقول عنه طلعت غلطان مبسوط انت كدا
مختار / بالراحه يا كبير ما قصدتش
ناصر / و انت خليت فيها كبير دا انت فاضلك الصاجات و تلف البلد انا صح و الكبير غلطان
مختار يبتسم
ناصر / كفايا عليه كدا قوله يخلع بقي عشان احنا بعد الطلعه علاطول هنهجم
مختار / حصل
ناصر / انا طالع انام تصبح على خير
مختار / بدرى كدا
ناصر / مش احسن ما تفضل تحفل عليا كدا
مختار / استغفر الله و لا اجرؤ
ناصر / لعلمك انا عمرى ما فرحت انى طلعت غلطان قد النهرده على الله بس بعد اللى احنا فيه ده ما يخلص ما يرجعش للى كان فيه تبقي مصيبه
مختار / هههههههه لعلمك انت بقي مفيش فايده
ناصر يبصله و يسيبه و يمشي و مختار بيضحك
…………………….
فى اوضه سماح
سماح بتعمل شعرها بيبي ليس و لابسه فستان رقيق اسود باب الاوضه يخبط سماح تسيب البيبي ليس و تقوم ناحيه الباب
سماح /مين
كوثر/ انا ام عباس
سماح تفتح كوثر تجيبها من فوق لتحت
سماح / اؤمريني يا عمتى خير
كوثر / ايه اللى انتى عملاه فى نفسك ده يا بت
سماح / هو اللى بيلبسوها اقل منى طب بالله عليكي مش انفع امثل فى السيما
كوثر / اه تعملى دور رقاصه
سماح / و ماله هو انا هرقص لحد غريب
كوثر / صحيح اللى اختشوا ماتوا
سماح / على رايك ربنا يتوب علينا بقي من اللى ما بيختشوش
كوثر / قصدك ايه يا بت
سماح / بقولك ايه يا عمتى ما بدل وقفه الباب دا ما تتفضلي عشان اللحق اخلص مكياجى قبل ما الكبير يجي
كوثر / انا اساسا مش جايه اقعد و احكى كنت جايه اقولك كلمتين تحطيهم حلقه فى ودنك عشان ترتاحى فى البيت ده
سماح / طب ما انا مرتاحه جدا هنا اهو
كوثر / لتكونى فاكره الدلع المرء اللى انتى فيه ده هيدوم
سماح/ كلو فى علم الغيب ما دايم الا وجه الله … على العموم قولى يا عمتى
كوثر / انا قولتلك قبل كدا انتى مش جايه تتستتى على قفانا و مش معنى انك مرات الكبير انك تقعدى تتزوقى بالساعات فى اوضتك
سماح / الا انتى اخر مره عملتى لروحك كبايه شاى امتى يا عمتى
كوثر / الكبيره لما تتكلم
سماح / انا هنا الكبيره يا عمتى و ما يعلاش على كلمتى غير كلمه امى و امى عارفه انى هنا و قيلالى اطلع و بعدين لامؤاخذه يعني الراجل فى الاول و الاخر بيسيب حضن امه و يتجوز ليه ؟؟عشان ياكل !!!
كوثر/ قليله الحيا عديمه الربايه
سماح / انا عامله خاطر لابويا الله يرحمه و وصيته قبل ما يموت انك ما تتبهدليش فى اخر ايامك غير كدا انتى عارفه اخرتك
كوثر / و لا انتى و لا الاطخن منك تقدروا تبهدلونى انتى سامعه و لا لا
سماح/ اخدتى اكتر من وقتك و تعملى حسابك بعد كدا لما تبقي فاضيه شوفيلك تسلايه غيرى انا حامل و مش فاضيالك
سماح تقفل الباب بالراحه و تيجي فى الاخر
سماح / عن اذنك
سماح تقفل الباب و تنفخ و تروح تقعد على التسريحه تكمل مكياجها
سماح / ياختى عليكي قمر
……………………..
على القهوه
حامد / ابوك دا اتجنن خلاص و عمك طول عمره كدا عمره ما هيتغير ابدا طول عمره خايب و سلبي و ما لوش تلاتين تلاته لازمه
يوسف / انا رجليا ورمت من اللف على شغل و ان لقيت اصلا المرتب ما ياكلش عيش حاف
حامد / لا اله الا الله بقي تبقي صاحب عين و تشتغل عند الناس
يوسف / واحد صاحبى فى الكليه فتح محل ورد اول امبارح و كان عامل افتتاح خرافى … دا كان بيستلف منى يفطر
حامد/ على الله ابوك ينبسط
يوسف / انا خايف يجي عليا يوم و اصحى الاقى عمرى انسرق منى و انا لسه مكانى لا بيت و لا شغل و لا يحزنون
حامد/ ليه يا ابنى انت عندك شقتك و محلك انت بس اللى
يوسف / كلمته و قالى طول ما انا عايش ما لكش حاجه عندى
حامد / دا اتجنن دا و لا ايه
يوسف/ انا قولت اروحله الشغل اطلب باقي حسابى قال يعني زعلان ادهملى و ما قعدوش معايا يومين و النهرده استلفت من ماما و طبعا سمعتنى كلمتين حلوين
حامد / بس انت مشاريعك كانت كلها حلوه و مستقبلها مضمون
يوسف/ بس فين التمويل
حامد/ يعني هو جوز اختك احسن منك
يوسف / على رايك دا ضحك على ابويا و باعله عربيته المهكعه باضعاف تمنها عشان يحطها مقدم عربيه تانيه
حامد / مقدم ايه ابوك شارى العربيه كاش
يوسف / لا طبعا كنا عرفنا
حامد / يا عم انا كنت فى التوكيل النهرده بعربيني العربيه كاش مش قسط
يوسف / انت متاكد
حامد / ايوه الراجل قالى هيعملى نفس الاوفر على عربيه جديده و الكلام جاب بعضه
يوسف / انت هتجيب عربيه جديده
حامد يرتبك و يلم نفسه بسرعه
حامد/ ما العربيه دى فتحت بقها بدرى و مش هينفع اللى اكسبه منها اصرفه عليها فهبدلها يعني انت عارف الدنيا بتمشي ازاى
يوسف يبص لعمه و يهز راسه
………………………
فى المحل جنب محل وسام
وسام تدخل تروح للكاشير
وسام / مساء الخير اسفه على الازعاج هو انت ما عكش عنوان هشام
الشاب / اه معايا خير فى حاجه و لا ايه
وسام / تليفونه مقفول من الصبح و روحت المول ما لقيتوش و بصراحه قلقت عليه اوى
الشاب / ثوانى اجيب ورقه اكتبهولك
الشاب يكتب العنوان فى ورقه و يديها لوسام تاخدها و تجرى شاب يطلع من جوه المحل
شاب ٢ / هو فى ايه الحوار
شاب ١ / علمى علمك بس شكله مش حوار سالك
شاب ٣ / و ما دام انت عارف انه مش سالك بتديها عنوانه ليه
شاب ١ / عشان ما تحلش عنه و تلزقلنا احنا
شاب ٢ / قال يا خبر بفلوس بكره يبقي ببلاش
شاب ١ / عليك نور كل واحد يخلص اللى فى ايده بقي خلونا نقفل و نروح
………………………
فى شقه يوسف
يوسف / يعني حقيقي
محمود / مهو بيدفعلى القسط زيي زى البنك بالظبط الفرق انى وفرت عليه مبلغ محترم فوايد
يوسف / يعني توفرله و تنشفها عليا تشتريله كاش و تديني انا مقدم بس
محمود / هو شغال و بيحاول لكن انت طيارى و كل يوم بحال و بعدين انا مش قولتلك مليون مره تبعد عن عمك حامد يابنى عمك ده اللى هيضيعك
يوسف / انا ما ليش دعوه بمشاكلكوا دى انا مش هقطع نفسي من الوحيد اللى بيفهمنى عشان انت اكلت ورثه
محمود / عمك اخد حقه تالت و متلت عمك ما لوش عندى جنيه
يوسف / زى ما انا كملن اخدت حقى و زى ما اديت الناس كلها حقوقها مش كدا على العموم براحتك بقي انا سيبهالك خالص
يوسف يسيب البيت و ينزل اسراء تيجي تجرى وراه ما تحصلوش
اسراء / قولتلك هيعرف قولتلك راضيه
محمود / انتى مش سامعه بيقولى ايه و لا بيكلمنى ازاى
اسراء / عيل و اخولك مسخنه
محمود / كل ده و عيل دا اللى قده فاتحين بيوت انما ده عره الخلفه كلها
محمود يدخل اوضته و يرزع الباب
……………………
فى شقه فى عماره
وسام تروح تخبط هشام يفتحلها
وسام / انت بتستهبل يا هشام قافل موبايلك ليه
هشام / كنت نايم مالك في ايه
وسام / صحيح اللى بيتقال ده انت بعت نصيبك من المحل
هشام / اه و نصيبي من المول و صفيت اللى ليا فى مصر و مسافر امريكا
وسام / يعني ايه ؟ طب وانا ؟ و فلوسي ؟
هشام / فلوس ايه لا مؤاخذه مش فاهم
وسام تطلع الوصل من شنطتها
هشام / اااااه اهو ده بقي عيب اللى ما درسش قانون هو اى ورقه مكتوب عليها وصل امانه تبقي وصل امانه
وسام / يعني انت نصبت عليا
هشام / نصبت عليكي ايه انتى هتلبسيني تهمه و بعدين دا اساسا مش خطى
وسام تمسك فيه
وسام / فلوسي يا ابن الكلب فلوسي لاروح فيك فى داهيه
الجيران تتلم
هشام / هو الجواز بالعافيه و لا فكرانى زى الجدع الهفا اللى ضحكتى عليه و سرقتى شبكته
هشام يفك ايديها و يزقها فى الارض
هشام / يلا غورى داهيه تاخدك
وسام / مش هسيبك يا هشام مش هسيب
وسام تعدل نفسها و تبص على الناس بيتفرجوا عليها و تمشي من وسطهم
……………………
عند المحامى
يوسف / بس انا ما عنديش فلوس لكل المصاريف دى دلوقت
المحامى/ ما تقلقش انا هتكفل بكل المصاريف فى الاول و لما نكسب القضيه ان شاء الله هاخدهم منك بس ما تنساش حلاوتى
يوسف/ ما تقلقش هراضيك بس حضرتك واثق اننا هنكسب القضيه
المحامى / بما انك مش ضامن اهلك يشهدوا معاك يبقي ما قدمناش غير حل واحد هيكلفنا شويه بس صدقني اهلك نفسهم مش هيقدروا يقفوا قدامك فى المحكمه بعد كدا
يوسف / حل ايه ده
المحامى / هقولك بس الاول عاوزك تهدى خالص و تراجع نفسك انت فعلا مستعد تمشي فى القضيه دى للاخر و لا لا
يوسف / انا خلاص جربت كل الطرق ما عدش قدامى طريق تانى
المحامى / تمام يبقي تسمع اللى هقولك عليه و تنفذه بالحرف الواحد
…………………..
فى اوضه مغاورى
مغاورى يدخل يلاقي سماح نايمه على السرير بالفستان و شعرها مغطى وشها و شمع و اكل على الترابيزه و التلفزيون قايد مغاورى يروح يقعد الناحيه التانيه و يبعد شعرها عن وشها تصحى و تتفزع
مغاورى / لا مؤاخذه
سماح / كدا يا مغاورى طب والله زعلت منك
سماح تروح تقف قدام المرايه و تبص على نفسها شعرها باظ و مكياجها تحاول تظبط نفسها مغاورى يروح يحضنها من ضهرها و هى مبوزه
مغاورى / لو كنت اعرف كنت سبت اللى فى ايدي و جيتلك هوا
سماح / كنت عملاهالك مفاجاه قولت افرحك
مغاورى / اكتر من كدا كفايا انى ادخل الاوضه الاقيكي فيها
سماح تلف و تتعلق فى رقبته
سماح / من قلبك يا مغاورى
مغاورى / الا من قلبي و لسه لما ربنا يكرم و تجبيلى الواد ساعتها الفرحه مش هتساعنى بصحيح
سماح تلف و تعمل مقموصه
سماح/ يعني بتحبنى بس عشان ام الواد
مغاورى / و هو فى اغلى من الواد و ام الواد يا سماح دا هيبقي البكرى يا بت
سماح / و ان جت بت
مغاورى / خير حد يكره
سماح / يعني مش هتزعل
مغاورى / اللى ما جاش النهرده يجى بكره و احنا العمر لسه قدامنا طويل باذن الله
سماح / الاكل برد هسخنهولك
مغاورى / مش جعان اكلت لقمه مع الرجاله اصل النهرده كان يوم طويل اوى انا و عباده لفينا البلد حته حته بنوزع الرجاله على اسطح البيوت عشان نامن البلد من فوق
سماح / و انت لفيتها بنفسك ما تبتعت اى حد انت الكبير دلوقت و لازم ترتاح
مغاورى / و هو فى حد يقدر يعمل الحكايه دى زيي
سماح / و هو انت ليك زي برده بقولك ايه الحمام جاهز و السخان مليان و انت يا قلبي تلاقيك تعبان و ما فيش حاجه هتريحك غير تكبيسه ايديا
مغاورى / دا انا بقيت بروح بس عشان ايديكي داهى
سماح / ههههههههههههههه طب قوم تعال
مغاورى / مش خساره فستانك الحلو ده يتبل
سماح / فداك الفستان و صاحبه الفستان بس انت تعال
سماح تمسك ايد مغاورى و تسحبه على الحمام يمشي وراها و هو مبسوط
…………………..
فى القسم
وسام / مصلحتهاش عشان كدا كدا كنت هسيب المحل و اهو اللى يشوفها هيعرف انها شغاله فمش هيسرق
الظابط / ايوه بس كدا مفيش اى حاجه تثبت انك اديتيلو الفلوس يا استاذه
وسام / ما ايصال الامانه قدام حضرتك اهو
الظابط / يا استاذه ايصال الامانه له شروط و صيغه انما ده ما لوش اى معنى
وسام / يعني انا اتنصب عليا
الظابط / لا طبعا احنا هنمشي فى الاجراءات بس لو سمحتى تهدى خالص و تسبينا نشوف شغلنا
وسام / تمام اللى تشوفه حضرتك
…………………….
فى جنينه سرايا الجوارحه الفجر
الرجاله خارجين للصلاه و عباده بيتاوب
مختار / مالك يا ابنى
عباده / ما نمتش ساعتين على بعض و جسمى مكسر ربنا يستر و ما اكونش بردت
مختار / طب ما تلحق نفسك … صباح الخير يا خليفه
خليفه / صباح الخير يا سي مختار ازيك عامل شاى تشربوا
عباده / مالك يا خليفه
خليفه / مالى يا سي عباده ما انا كويس اهو
خليفه يصب كبايتين شاى
مختار / لسه حوار بنتك و الجامعه برده
خليفه يرتبك
خليفه / بنتى !
عباده / مالها بنتك يا خليفه
خليفه / ما لهاش
مختار / امها مش قادره على بعادها و المدينه الجامعيه و كدا
خليفه يديهم الكبايتين كل واحد ياخد شفطه واحده صغيره
خليفه / ضريبه العلام يا سي مختار
عباده / ما تقولوش عليا رجعى بس مدينه ما ماديناشي البت ما تباتش الا فى بيتها بس انت وافقت من الاول و دا مستقبلها و انت ادرى بيه هى البت مهما درست اخرها ايه غير بيت جوزها
مختار / باماره واحد بعد ما الكل اتخرج قرر يدرس هاه
عباده / كنت عارف انك مش هتعديها سكيتي و كنت مستغرب ايه اللى اخرك
مختار / ههههههههههههههههههه
ناصر ينادى
ناصر / الصلاه يا رجاله
الاتنين يسيبوا الكبايات مليانه على اخرها و يجروا و خليفه واقف يبص على الكبايات
……………………..
فى اوضه سماح
سماح بتلبس مغاورى العبايه و هى ضاربه بوز
مغاورى / ان خبطت تانى ما تفتحيش و انا لما ارجع هتكلم معاها
سماح / يعني هفضل حابسه نفسي فى الاوضه طول النهار
مغاورى / خلصي اللى وراكى و زاكرى انتى بتضيعي وقت كتير و كمان حامل و لازم ترتاحى
سماح / اللى تشوقه
سماح توصل مغاورى للباب يمشي و يقفل الباب وراه و ينزل
ام مغاورى / اتاخرت كدا ليه كدا هتتاخر على الصلاه
مغاورى / ماشي اهو
مغاورى يبص على كوثر و بعدين يمشي
كوثر / و هى ست المحروسه يفرق معاها فجر من غيره
ام مغاورى / مش هنخلص بقي و لا ايه
كوثر / انتى اصلك ما بتشوفيش اللى انا شوفته
ام مغاورى / ما تروحيش اوضتها تانى لو مش عاوزه تشوفى حاجه تضايقك
كوثر / خليكي دلعى فيها لما بكره
ام مغاورى / سماح مش غريبه سماح مرات كبير الجوارحه و ام ابنه
كوثر / و هى بنتك هناك
ام مغاورى / بنتى هناك متشاله على الراس من الكبير قبل الصغير و الكل بيحبها
كوثر/ و بنتك قاعده طول الليل والنهار ما لهاش غير فى الزواق و السبسبه
ام مغاورى/ و ام عباده بتزوقهم بايديها و هم يعني بيتزوقوا لمين مش لولادنا ربنا يهدى سرهم انتى فيكي ايه يا كوثر مالك كدا حاطه عقلك بعقل عيله من دور عيالك
كوثر / انا ما يعجبنيش الحال المايل ما احنا كنا قدها و الحريم حواليكي كتير اهو و كل واحده ليها راجلها لو كل واحده سابت اللى فى ايدها من قبل المغرب و طلعت تتزوق و تتحنتف البيت ده مين هيمشيه انا و لا انتى
ام مغاورى / هبقي اشيله انا ما تقلقيش ما حدش فينا هيطلب منك حاجه زى ما طول عمرنا ما بنطلبش … بصي يا ام عباس احنا ما حدش فينا مجبور على حاجه اللى بتعمل بتعمل بكيفها و اللى عاوزه تقعد فى اوضتها تقعد بكيفها ما حدش فينا بيشيل التانى و نقدر نجيب بدل الواحده عشره و ميه يخدمونا فمتعمليش حكايه و ليله على ما فيش
كوثر / تصدقى انا الغلطانه انى بنزل من اوضتى اصلا
ام مغاورى / ماجده هتطلعلك اكلك
كوثر تبصلها و تطلع اوضتها
ام مغاورى / ماجده … اطلعى مع عمتك ما تخليهاش تخبط على سماح و تجر شكلها اخوكى فيه اللى مكفيه و مش فايق لهبل الحريم ده
ماجده / سماح عاقله و مش هتقوله
ام مغاورى/ قالتله هو انا مش هفهم ابنى من عنيه اطلعى يلا خلى الليله دى تعدى
ماجده تسيب اللى فى ايدها و تطلع
ست / بس ام عباس برده معاها حق سماح مزوداها اوى مكنا كنا عرايس يعني
ام مغاورى / عرايس زمان غير دلوقت و رجاله زمان غير دلوقت
الست / انتى بتبرريلها و خلاص
ام مغاورى / هو احنا طلبنا منها حاجه و قالت لا
الست / مهى قاعده طول وقت القعاد ضحك و كركره و تيجي اول ما نقول هاتوا حاجه بكره نتسلى فيها تفتكر تطلع تتشطف
ام مغاورى / ابقوا جهزوا الحاجه بدرى بعد كدا
الست / برده يا ام مغاورى كلميها هتقلب البنات علينا و ان ما كانوش بيتكلموا دلوقت بكره يتكلموا يا ام مغاورى و ان كان على الحمل فاديكي شايفه الحمد لله البطون على اخرها قصادك
ام مغاورى / خلاص خلاص هكلمها خلاص ياربى عليكوا
ام مغاورى تقوم و تطلع
…………………..
فى اوضه رشيد
فيرا تفتح الباب و تدخل الاوضه فاضيه و صوت الدوش شغال تروح تقعد على السرير و تمسك الموبايل و تبص عليه و ترميه مكانه و تمسك كتاب و وتقلب فيه صوت الميه يقف فيرا تبص على الحمام و ترجع تبص للكتاب رشيد يطلع من الحمام لابس برنص و بينشف شعره
رشيد/ اهلا
رشيد يفتح الدولاب و يطلع غيار يحطه على السرير
فيرا / انت متخانق مع سمر و لا ايه
رشيد / لا ليه
فيرا / سبتها و جيت علاطول و ما رجعتش
رشيد / و انا هفضل واخد الطريق قياسه و لا ايه
فيرا / لا بس ما فيش سبب خلاك ترجع اصلا
رشيد / ممكن امشي عادى
فيرا تقوم و تروحله
فيرا / انت عارف ان مش ده قصدى
رشيد / اللى عملتيه فى البلد رجعنى
فيرا / و دا يهمك فى ايه
رشيد / كنت متوقع انى هاجى الاقيكي خطفتى هند و بتطلعيلى لسانك بس فى الطريق عرفت انك حاولتى مع عبد الله و شوفى سخريه القدر بقي فشلتى برده ههههههههههه
فيرا / و عرفت منين بقي
رشيد / انا اللى مركب الكاميرات اللى على الطريق و اقدر ادخل على السيرفر فى اى وقت
فيرا / و يا ترى دخلت على السيرفر قبل ما ينقذوه و لا بعد ما انقذوه
رشيد / قبل و بعد انا كنت متابع العمليه كلها اونلاين انا حتى الموبايل كان مفتوح فى جيبي و انا واقف جنبك … بس انتى برده لازم تاخدى بالك من حاجه زى دى
رشيد يقعد على السرير و يبصلها تقعد جنبه
فيرا / انا جبت صور واضحه من الكاميرات للى عملوا كدا
رشيد / اسمى مكتوب … وشي الحلو ده كان منور وسطيهم
رشيد يشاور على وشه و يلف صابعه
فيرا / اكيد لا طبعا حبيبي انت فوق مستوى الشبهات
رشيد / بتلفى و تدورى على ايه يا فيرا انا بدات ازهق
فيرا / وصلت لمختار شحنه درونز ما تعرفش هيعملوا بيها ايه
رشيد / انتى فاكره لما قولتلك خدى بالك و انتى بتدخلى السيرفر بتاعهم لحسن تفتحيلهم الباب يدخلوا عندك … على فكره الناس دى فلوسها كتير ارض و بهايم و مشاريع بالهبل فى كل حته دا غير تجاره السلاح اللى بتكسبهم ملايين دول بيصدروا بره مصر اكتر ما بيستوردوا
فيرا / عندهم فلوس يشتروا درونز بس ما افتكرش عندهم امكانيات يستخدموها
رشيد / المصرى معروف بجبروته و قوته ههههههههههههه احنا فراعنه يا فوفا بنينا الهرم حته درون زى ده هيعصى علينا نتعلم نستخدمه … ههههههههههه دا احنا نعرف الكفت
فيرا / شيفاك حاطط نفسك وسطيهم
رشيد / مصرى بقي و الدم بيحن بس ما تقلقيش انا ولائي التانى للجنيه
فيرا / و الاول
رشيد / للدولار يا فيرا مالك كدا مش قريانى ليه بقولك ايه انا راجل متجوز و لو حد ابن حرام نقل لسمر انك قاعده فى اوضتى طول الوقت هتبقي مشكله و هى نكديه و انتى عرفاها هتقرفنى و بصراحه انا مش هقدر اكدب عليها و هقولها انى كنت قاعد بالبرنص طول الوقت اه كلو الا الكدب
فيرا / تمام تمام اتوزعت صحيح يا رشيد هو انت معاك نمره تانيه غير دى
رشيد / معايا نمر كتير اوى ليه
فيرا / مفيش
رشيد/ فيرا انتى شاكه فيا ؟
فيرا / لا طبعا قولتلك
رشيد / يبقي بطلى لف و دوران و اطلعى بره بدات ابرد
فيرا / تمام تمام ماشيه
رشيد/ بسرعه لو سمحتى
فيرا تطلع بره و تقفل الباب
رشيد / خفاش ما بيطلعش الا بالدم
…………………….
فى اوضه سماح
سماح/ يا لهوى لا طبعا ايه الكلام ده خلاص والله من بكره هنزل و اعمل كل حاجه زيي زيكوا بالظبط
ام مغاورى / ما تخافيش مش هيخلوكى تعملى حاجه تقيله بس اهو منظر وسط الحريم و بعدين انتى مرات الكبير و ليكي دور مهم وسطيهم
سماح / و لو العين ما تعلاش عن الحاجب ربنا يديكى الصحه و يطول فى عمرك
ام مغاورى / تبقي تحت عيني تتعلمى و تفهمى تسمعى و تركزى عشان لما الايام تدور و يجي دورك تعرفى تملى مكانك
سماح / بعد الشر عنك
ام مغاورى / انتى بتعملى ايه دلوقت
سماح / مغاورى قالى اخليني فى الاوضه حتى لو حد خبط ما افتحش و ازاكر عشان الفتره اللى فاتت طنشت مزاكرتى خالص
ام مغاورى/ تمام اعملى زى ما قالك و خلصى اللى وراكى عشان بكره تفضلي معايا تساعديني
سماح / عيني حاضر
ام مغاورى تبتسم و تقوم و سماح توصلها و تقفل الباب وراها
………………….
فى شقه وسام
امها / يعني ايه
وسام / الحيوان بيقول انى بتبلى عليه عشان فسخ الخطوبه
امها / و هيسافر بجد
وسام / لا لسه على ما يخلص الورق و المحضر يتقفل بس انا روحت لمحامى و راح شاف محضر القضيه … بس للاسف ما طمنيش
امها / لا اله الا الله
وسام / المشكله الاكبر ان الراجل اللى بعتله محلى هيجي يستلم النهرده و بكدا انا بقيت فى الشارع
امها / و الباكيه بتاعه المول
وسام / اهى دى اللى بقيالي هروح النهرده اتابعها و اتكلم معاهم فى حوار الحسابات اكيد الحيوان ده كان بيسرقنى و انا اللى كنت عبيطه و مصدقاه
امها / طب الواد ده ما لوش كبير نروحله ما لوش اهل
وسام / المفروض ليه بس انا ما اعرفهمش ما كنتش مهتميه اعرفهم و لا ان يكونلى علاقه بيهم و لما روحت له البيت ما حدش طلع من الشقه و هو اللى فتح بس تعرفى انا لازم ارجع هناك تانى و اسال الجيران و اعمله فضيحه كبيره و اعرف الناس كلها انه ابن كلب نصاب
امها / بلاش يا وسام لحسن يعملوا فيكي حاجه و احنا ما لناش حد يا بنتى
وسام / يعني اسيبه يسرقنى
امها / اقولك ايه بس قولتلك من الاول رجعى شبكه يوسف
وسام / ما حدش له عندى حاجه دا كان حقى و انا مش هسكت
وسام تاخد شنطتها و تنزل و الست تتنهد و الحزن باين عليها
……………………..
فى المحل
محمود قاعد يوسف يدخل
يوسف / ازيك يا بابا عامل ايه
محمود / انا الحمد لله بخير المهم انت عامل ايه
يوسف / انا تمام الحمد لله لو حضرتك فاضي ممكن تيجي نتكلم فى مكان رايق شويه
محمود / اتكلم و ماله اتفضل
محمود يقوم و يروح مع يوسف ناحيه القهوه
يوسف / بلاش هنا خلينا فى مكان تانى احسن عشان ناخد راحتنا
محمود / و ماله تعال نروح بالعربيه
يوسف / ماشي بس ممكن انا اللى اسوق
محمود / ممكن جدا
محمود يدى المفتاح ليوسف يسوق هو و يركبوا العربيه و يمشوا
محمود / خير يا يوسف عاوز تتكلم فى ايه
يوسف / فاكر زمان لما كنت بتحبنى اكتر من نفسك
محمود / و لساتك يا ابنى انا ليا غيرك
يوسف / امال بتعمل معايا كدا ليه
محمود / بعمل ايه يا يوسف قسيت عليك شويه يا ابنى انا مش عاوز غير مصلحتك
يوسف / انا مش عارف انا عملت ايه غلط خلاك تقلب عليا بالشكل ده و ما تقوليش حوار هند حضرتك لحد يوم كتب الكتاب كنت فى صفى
محمود / و لسه لحد النهرده فى صفك يا يوسف بس انت بقيت فاكر ان الدنيا بتمشي على مزاجك و الفلوس بتيجي بالساهل
يوسف / بتيجي بالساهل لجواز اخواتى انما انا لا مش كدا
محمود / انا باخد من جوز اختك الاقساط يا ابنى زيي زي الغرب الفرق انه قرض حسن من غير فوايد و بعدين هو الفلوس اللى بتطلع من العربيه دى مش بيصرفها على اختك و وولادها
يوسف / يعني انا ما ليش حق يكون عندى أولاد زيهم
محمود / ازاى بس ما قولتلك هديك مقدم الشقه و مقدم العربيه و مرتبك فى المحل على اللى بيطلعلك من العربيه كمل الاقساط و انا هساك
يوسف / انا لو عشت عمرى كله مكفى على الدريكسيون مش هجيب تمنهم
محمود / ما انت لازم تعرف قيمه القرش لازم تفهم انه ما بيجيش بالساهل
يوسف/ و طبعا هم عارفين قيمته كويس مش كدا
محمود / ما تقارنش نفسك باجواز اخواتك انت حاجه و هم حاجه تانيه
يوسف / ليه بقي هم احسن منى فى ايه
محمود / انت مدلع و هوائي و لسه مش عارف انت عايز ايه و لا هتوصله ازاى ما عندكش اى خبرات
يوسف / دا انا لكن هم فله شمعه منوره مش كدا
محمود / انت ليه بتقارن نفسك بيهم بس
يوسف/ ما بقارنش انا اساسا مش فالح فى حاجه
محمود / لا اله الا الله يا ابنى انت لسه صغير بكره لما تكبر هتتعلم و تتودك
يوسف / لما اكبر و شعرى يبيض و سنانى تقع بقي
محمود / و مين فينا يا ابنى اتولد و فى بقه معلقه دهب دا انا و عمامك جبناها من تحت اوى
يوسف / طبعا
محمود / انا كنت شغال عند جدك من و انا صغير صبى صغير اشيل و احط و فضلت اتعلم و اتودك لما مسكت محلاته كلها و لما كبرت فى نظره جوزنى امك انما انت عاوزنى انا اجوزك و اصرف عليك طب ما اتجوزها انا بقي
يوسف / انا مش عاوز حاجه خلاص انا بس عاوزك تعرف انى بحبك مهما حصل و مهما قولت و مهما عملت انا بحبك
محمود / و انا كمان بحبك اوى يا يوسف
يوسف يركن العربيه
محمود / فى ايه هنا
يوسف / دا بيت واحد صاحبى عاوز اعرفك عليه … هنزل ارن عليه ينزلنا
محمود / و ماله رنله
يوسف ينزل من العربيه و معاه الموبايل فى ايده يبص لابوه من الشباك
يوسف / هروح اجيب حاجه من الكشك على ما ينزل
محمود / ماشي
يوسف يمشي و هو بيتكلم فى التليفون و اول ما يوصل للكشك يوقف تاكس و يركب و يمشي
………………….
فى اوضه العمليات فيلا فيرا
فيرا قاعده تتابع الكاميرات فى البلد مع رجالتها رشيد يدخل
رشيد / شكل فى حاجه مهمه بتحصل
فيرا / بيتمرنوا على استخدام الدرونز
رشيد يبص و يضحك
رشيد / ايه العيال دى كلها دا و لا مراجيح مولد النبى
فيرا / خليهم يفرحوا شويه
رشيد / و انتى هتسبيهم يفرحوا كدا عادى
فيرا / لا هههههه اكيد لا
رشيد / كنت متاكد و نويالهم على ايه بقي
فيرا / انا مش فاهمه الناس دى بصراحه الدرونز شكلها بدائي جدا بتاعه التصوير العاديه القديمه الرخيصه دى
رشيد / مهم اكيد مش هيتمرنوا فى الغاليه
فيرا / كبرلى الصوره دى … دا مختار صح
شاب جنبها يكبر مختار بيضحك مع العيال
فيرا / خف بسرعه اوى
رشيد / ما ماتش من الطلقه هيموت من عينك
فيرا / هههههههههههههههههههه هاى جايز ايز ايت فاير وركس تايم او نوت ( ايه يا شباب مش ده وقت الالعاب النارية )
اتنين شباب يطلعوا بره
رشيد / مش قادره تشوفيهم بيضحكوا غير لما تنكدى عليهم
فيرا / دى مجرد فاير وركس يا رشيد زى ما بتسموهم فى مصر بومب و صواريخ العيد
فيرا تقوم و تروح تبص على شاشه تانيه
………………….
فى عربيه محمود
محمود قاعد زهقان عمال يبص فى الساعه و يبص فى المرايه و يتلفت يمين و شمال و بعدين ينزل من العربيه يبص على الكشك يوسف مش هناك يتصل بيه غير متاح
محمود / يوسف يوسف يوسف مفيش فايده فيك ابدا كدا
عربيه اسعاف تركن و اتنين رجال ينزلوا منها بلبس الاسعاف يروحوا ناحيه محمود
محمود / خير يا ابنى فى حاجه
الاتنين رجاله يمسكوه جامد و يسحبوه ناحيه العربيه و هو بيقاوم
محمود / اوعى كدا اوعى بقولك فى ايه اوعوا انتوا واخدينى على فين … سيب بقولك
راجل تالت فى العربيه لابس دكتور يدى لمحمود حقنه ينام يسحبوه و يركبوه العربيه الناس اتلمت
الدكتور / هربان من مستشفى النفسيه و العصبيه و الحمد لله لقيناه قبل ما ياذى نفسه او ياذى حد
الناس تضرب كف على كف و تهمهم و العربيه تمشي
…………………….
فى شارع هشام
وسام بتتكلم مع اتنين رجاله
وسام / يعني ايه ؟ يعني دى كمان ايجار مش ملك
راجل ١ / احنا من يوم ما عرفناه و هو وحدانى احنا نعرف ان له قرايب فى الاسماعيليه بيروحلهم كل فتره اكتر من كدا ما نعرفش عنه
وسام / يعني ما فيش اى حد خالص جه زاره من يوم ما سكن
راجل ١ / صحابه بيجوله كتير و هو الشهاده لله عشرى و عمره ما عمل مشاكل مع حد
وسام / يا حج بقولك نصب عليا فى شقا عمرى انا و امى خد كل فلوسنا باعلنا المحل بتاعه و طلع بايعه لحد تانى
راجل ٢ / ربنا يعوض عليكي يا بنتى
وسام / كتر خيرك يا حج
وسام تمشي فى الشارع تليفونها يرن
وسام / الو
راجل / السلام عليكم يا استاذه وسام انا الحج شعبان بكلمك بخصوص المحل انا جيت استلمه و لقيته مقفول
وسام / هى نهله ما جتش انا سايبه المفتاح معاها
الراجل / لا شكلها جت اهى لامؤاخذه على الازعاج
وسام / تمام سلام
وسام تقفل و تبص تانى على بيت هشام و توقف تاكس و تركب
…………………
فى البلد
الرجاله واقفه و الدرونز فى السما و عمالين يلعبوا و يضحكوا عباده يروح يقعد جنب مختار و هو بيضحك
عباده/ طب والله فكره احنا نسيب الحكايه دى للعيال يدوروها اهو منها نسليهم و منها نتفرغ لاشغالنا
مختار / انت عارف ان الحكايه دى مش هتعدى من غير رد مش كدا
عباده / احنا جاهزين الرجاله فى اماكنهم و كلو تحت السيطره
مختار يهز راسه
عباده / انا كلمت حبايبك على مدافع الدرونز قالى هيحتاج شهر
مختار / مالها الطيارات الورق يعني
عباده / على رايك ههههههههههههههههه فاكر لما كنت تتعصب لما اقطعلك الحبل بتاع طيارتك
مختار / كانت غيه عندك هى
عباده / كنا عيال
مختار / و كبرنا امتى
عباده يبص لمختار
مختار/ ما تيجي
صوت فرقعه بعيد يبصوا يلاقوها العاب ناريه تفضل تنضرب ورا بعض ورا بعض و الكل مركز معاها و يوجهوا الدرونز تصور المنظر
عباده / شكله فرح حد كبير فى بلد جنبنا
مختار / و ما اتعزمناش !!!
عباده و مختار يبصوا لبعض
عباده / مهو دا كتير على افتتاح محل عصير قصب
مختار يبصله باستغراب
مختار / اشمعن عصير قصب
عباده / نفسي ريحاله اوى
مختار يضحك و يبص الناحيه التانيه يشوف درونز طايره بسرعه ناحيه الدرونز بتاعتهم و فجاه تنفجر و الدرونز تقع مكسره و الرجاله تحمى روسها مختار يزعق
مختار / كل واحد عارف دوره
الكل يجرى و يداروا و يتاهبوا و العيال تستخبى فى البيوت
………………..
فى فيلا فيرا
فيرا / ههههههههههههه شكلهم كيوت اوى
شاب / الدرون التانى جاهز
فيرا / معاك احداثيات سرايا الزنايته
رشيد / بلاش الحريم يا فيرا
الشاب / دخلتها
فيرا / ابعته على هناك
رشيد يتنهد و يشد كرسي و يقعد
فيرا / مش عاوز تروح فى حته
رشيد / لا عاوز اتفرج على اللى هيحصل
فيرا / اجبلك بوبكورن
رشيد / و يا سلام بقي لو بالكراميل … احبك
فيرا / ههههههههههه… كبر يا ابنى الصوره خلينا نتفرج
الشاب يعرض كاميره الدرون على شاشه كبيره
…………………….
فى شقه يوسف
يوسف يدخل يروح اوضته و يقفل الباب اسراء تدخل تلاقيه بيعيط
اسراء/ مالك يا يوسف
يوسف / ما فيش
يوسف يمسح دموعه
اسراء / ابوك كلمنى و قالى انكوا اتصالحتوا و روحتوا مع بعض مشوار
يوسف يرتبك
يوسف / امتى ده ؟
اسراء / يجي من ساعه و لا اكتر
يوسف / اه … ما احنا اتخانقنا و سبته و مشيت
اسراء / لا اله الا الله ليه بس كدا
يوسف / فضل يقول كلام غريب انى فاشل و اجواز اخواتى احسن منى سبتله العربيه و مشيت
اسراء / والله انتوا معمولكوا عمل دا انتوا ما بقيتوش تتكلموا كلمتين الا اما تقلب بخناق هو فى كدا
يوسف / سبيني لوحدى لو سمحتى يا ماما
اسراء / طب اجبلك لقمه تاكلها
يوسف / مش جعان شكرا روحى ارتاحى انتى
اسراء تهز راسها بحزن و تسيبه و تمشي يوسف يحضن المخده و يفضل يعيط
…………………….
فى سرايا الزنايته
العيال بتلعب فى الجنينه و مريم واقفه مع عبد الله بيمرجحوهم و بيضحكوا غفير قاعد على شاشات مراقبه جنب البوابه يقوم و يصرخ
الغفير / طياره جايه طياره جايه
عبد الله و مريم يتخضوا و يزقوا العيال على جوه فاطمه تطلع
فاطمه / فى ايه يا خليفه
خليفه / الكاميرات جابت طياره جايه على هنا
مريم وعبد الله يدخلوا بيجروا
مريم / درون يا عمتى درون
فاطمه / جاي على هنا … ليله ابوهم سوده
التلاته يدخلوا فاطمه تقفل الباب تلاقي انتصار طالعه من المطبخ و فى ايدها بندقيتين تدى لفاطمه واحده عبد الله ياخد التانيه و يطلع فوق
فاطمه / هند فين
انتصار / ما شوفتهاش قالت هتنضف المضيفه
فاطمه / داهيه لتكون لسه بره
مريم / ما كانش فى حد بره فى الجنينه و احنا جايين
فجاه صوت انفجار مريم تجرى تفتح الشباك و يلاقوا الدرون انفجر قبل ما يوصل للسور و وقع فى الشارع يطلعوا الجنينه يلاقوا خديجه واقفه فى شباك اوضتها فى ايدها بندقيتها
فاطمه / عفارم عليكي يا مرات ابنى
خديجه / مش انا … كنت هجيبها بس حد سبقنى
الكل يبص لبعضه صوت عبد الله من فوق بيزعق
عبد الله / خليكي عندك لتقعى اوعى تتحركى انا هاجى انزلك
الكل يتحركوا يبصوا هند بتتمشي فوق السور ناحيه الكاميرات و خارجه من ورا شجره كبيره
فاطمه / يخيبك بت ايه اللى طلعك عندك
هند / حماس الشباب بقي يا بطه نزلونى
انتصار / انتى اللى جبتيها
هند / اقل منها و لا ايه نزلونى بقي
خليفه يجيب السلم و يجى يحطه فاطمه توقفه
فاطمه / ابدا خليها متعلقه فوق كدا اما اعرف طلعت ازاى
هند / هههههههههههههههه على الشجره يا بطه والله بس مش عارفه انزل
فاطمه / ههههههههههههههه حطلها السلم يا خليفه
شيرى تطلع تجرى من جوه
شيرى / هند حبيبتي انتى كويسه
هند تنزل من فوق شيري تحضنها و تبوسها
فاطمه / ياختى كنت فكراها زى القطط طلعت قطه بصحيح بتعرف تطلع الشجر ما بتعرفش تنزل ههههههههه
هند / و بعرف اصطاد عصافير كمان
خديجه تطلع من السرايا
خديجه / كنت هجيبها على فكره
هند / تعرفى تطلعى شجره زى دى
عبد الله يطلع من السرايا
عبد الله / انتى كويسه يا هند
هند / انت كل ده بتعمل ايه فوق ما تضرب يا ابنى و لا مستنيها تدخل السرايا
عبد الله / هو انا لحقت دا يادوب وصلت للسطح و لسه هنشن انتى ضربتى بس انتى كنتى مداريه فى الشجره ما كنتش شايفك و بعدين دى بندقيتي اصلا
هند / اللى كانت قدامى بقي
انتصار / بقولكوا ايه يلا بيتك بيتك كل واحده تشوف كان وراها ايه و تروح تكمله يلا مش هنقف هنا نحكى يلا اتحركوا
الكل يمشي ناحيه السرايا انتصار تمسك ايد هند هند تبصلها و هى مبتسمه
انتصار / انا عارفه اننا وقت الخطر ما بنحسبهاش بس حاولى ما تعمليش كدا تانى لو كنتى وقعتى و لا جرالك حاجه
هند / تصدقيني لو قولتلك انا مش عارفه انا عملت كدا ازاى
انتصار / اصدقك بدليل لما الخطر خلص ما عرفتيش تنزلى
انتصار تبتسم
انتصار / بس جدعه يا بت
انتصار و هند يدخلوا جوه و هند مبسوطه جدا
…………………..
فى فيلا فيرا
رشيد / ايه ده خلاص كدا الفيلم خلص
فيرا / ما خلاص الرساله وصلت
رشيد / رساله ايه و لمين انا كل اللى وصلنى من الفيلم ده انك مش هتقدرى تعدى حتى سور سرايا الزنايته حتى لو كل اللى فيها حريم
فيرا / ههههههههههههههه بس عرفوا انى قدرت اوصل
رشيد / بس انتى وصلتى لاكتر من كدا المره اللى فاتت
فيرا / تفتكر لو كنت بعت اتنين تلاته درونز كان هيحصل ايه هفجر شويه بنات انا اولى بتمنهم مخزن السلاح بتاعهم تحت السرايا لو كان الدرون انفجر فوقيه كان كل البنات دى هتموت و اكيد ما كنتش هسمح بده
رشيد / سقط منك انا فى حته كدا معلش مش قاريكي
فيرا / بخوفهم بس كان هينفجر مثلا فى الجنينه او السور او المضيفه اقل خساير فى الارواح و اقل اصابات عشان اعرف استفيد منهم بعد كدا
رشيد / طموحه اوى ما شاء الله لا و خيالك واسع … على العموم لما ربنا ينفخ فى صورتك و تفلحى فى الحكايه دى ابقي صحيني اسقفلك انا طالع انام
رشيد يسيبها و يمشي
فيرا / دا لو كنت انت عايش لوقتها
…………………
فى المول
وسام تدخل متعصبه تروح تقعدفى السيكشن بتاعها تبص على سيكشن هشام و تفضل تفرك بنت من اللى بيبعوا تدخلها و فى ايدها ورقه
البنت / دى لسته البيع من اخر مره جيتي زى ما حضرتك طلبتى بس استاذ منير سال عليكي
وسام / و دا عاوز ايه ده
البنت / ما اعرفش بس كان شكله مضايق اوى
وسام / مش فايقه لحد
وسام تقعد تراجع كشف المبيعات راجل يدخل
الراجل / احم احم
وسام/ استاذ منير اهلا اتفضل
منير / استاذ عبد الغنى المحاسب بلغنى ان حضرتك اعترضتى على الارباح بتاعتك و جيت اكلمك اكتر من مره لقيتك مش موجوده
وسام / معلش كان عندى ظروف كدا
منير / استاذه وسام احنا بدانا المشروع ده سوا بكل شفافية احنا كلنا فرد واحد المكان جديد بيحتاج دعايا كتير و زى ما حضرتك احنا غرقنا اسكندريه اعلانات و يفط دا غير الشاشات اللى فى المناطق الكبيره
وسام / ايوه بس انا بدفع ايجار المفروض انه شامل الحاجات دى انا كدا بيبع الهدوم اعمل بيها دعايا و مش هيبقي معايا اجيب غيرها
منير / اى مشروع جديد بيبقي محتاج تضحيات فى الاول
وسام / للاسف انا صعب جدا اضحى الفتره دى
منير / تمام … لو تحبى تفضى الشراكه اللى بينا تقدرى تتكلمى مع الاستاذ منصور المحامى و ياريت تراجعى بند الشرط الجزائي اللى فى العقد … عن اذنك
منير يمشي و وسام تنفخ
…………………
فى سرايا الزنايته
ناصر / طب والله لوزع ساقع شايفين ياللي كنتوا بتقولوا مصراويه
مختار / اجدع ناس
انتصار تدخل شايله صينيه شاى
انتصار / و هو مين فتح بقه بربع كلمه عن ست البنات و بعدين ايه افرق ساقع دى اخص عليك
ناصر / يا عباده
عباده / اعتبره حصل يا كبير ليله كبيره و احلى ليله كمان بس بشرط
هند / استر يارب
عباده / اعرف طلعتى الشجره ازاى
مختار / ههههههههههههه و لا سحر و لا شعوذه
هند / قسما بالله ما اعرف كل حاجه حصلت بسرعه جدا و ما فكرتش ثانيه اللى هو اول ما سمعتهم بيزعقوا البندقيه كانت متعلقه على الحيطه و انا بغير ملايه السرير شديت البندقيه و جريت اتعلقت فى الشجره و طلعت من فرع لفرع و جيت انزل ما اعرفتش قمت ماشيه على السور ناحيه الغفر عشان يساعدونى … ههههههه تصدقوا اول ما بصيت تحت و انا نازله لقيتني هدوخ هوب اثبت مش هنعدى كل ده و فى الاخر اموت واقعه من فوق شجره هههههههههههههههه
انتصار / بعد الشر يا بت تفى من بقك
شيري / ربنا ما يوريني فيكي و لا فى اى حد فيكوا حاجه وحشه ابدا
فاطمه / انا من اول يوم شوفتها قولت البت دى طلعالى
هند / يا بطه
فاطمه / ياختى انتى تطولى
الكل يضحك
عباده / هههههههه والله قعدتكوا ما يتشبع منها بس انا ورايا سهرايه جامده فى الارض النهرده
خديجه / لحقت
عباده / سواد الليل و راجع
خديجه تهز راسها و هى باين انها مش مرتاحه
عباده / لا الا الا الله
الكل / محمد رسول الله
ناصر / و انتوا كمان يا رجاله اطلعوا ارتاحولكوا ساعتين عشان تستلموا منهم الصبح
الكل يقوم و فاطمه تانج خديجه خديجه تبتسملها و يطلعوا مع بعض
……………………
فى اوضه يوسف
اسراء تدخل تلاقي يوسف قاعد و باصص فى الارض
اسراء / ابوك اتاخر اوى يا يوسف و اتصلت عليه ما كانش بيرد خالص اعمل ايه بس انا قلقانه عليه اوى
يوسف / كلمتى المحل
اسراء / ما راحش من ساعه ما مشي معاك
يوسف / كلمتى عمامى
اسراء / ما حدش عارف عنه حاجه و قالوا هيشوفوا و يكلمونى لو فى جديد
يوسف / هنزل يعني ادور عليه زى العيال الصغيره
اسراء / ينوبك فيا ثواب يا يوسف انا هموت من القلق عليه يا ابنى
يوسف / حاضر نازل بس هدور فين
اسراء / اى حته القهوه عند صحابه اى حته
يوسف / حاضر نازل
يوسف يقوم و ينزل و اسراء عماله تدعى
……………………
فى ارض على اول البلد
عباده قاعد مع رجاله و غفر
غفير ١ / بس احنا هنفضل كدا لحد امتى يا سيد الناس الكل بيتكلم و الناس بقت تخاف تخرج عيالها حتى الكبارات منهم الحريم بتخاف تبعتهم الجامعه
غفير ٢ / خصوصا بعد اللى حصل لسي عبد الله
عباده/ و هو كان ايه اللى حصل لعبد الله مهو بات فى بيته و راح تانى يوم كليته عادى و لا كان حاجه حصلت و بعدين ما احنا وسطيكوا طول الوقت و اول الصف كمان
راجل ١ / يا سي عباده ما انتوا مننا و احنا منكوا و بنخاف عليكوا و بعدين مش حلوه فى حقنا ان اللى مبهدلانا بالشكل ده تطلع حرمه فى الاخر يعني احنا مش رجاله و لا ايه
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية البر التاني)
تعليق واحد