رواية البر التاني الفصل الثالث والأربعون 43 بقلم لولو محمد

رواية البر التاني الجزء الثالث والأربعون

رواية البر التاني البارت الثالث والأربعون

رواية البر التاني الحلقة الثالثة والأربعون

عبد الله / بعد اذنك يا كبير
ناصر يبص لعبد الله و يبتسم
غفير 1/ بالاذن احنا يا كبير
غفير 2 / ازيك يا سى عبد الله
عبد الله / الحمد لله تسلم
الغفر يمشوا
ناصر / خير فى حاجه و لا ايه
ناصر يبص على مريم واقفه بعيد و بتابع يشاورلها تيجى تهز راسها لا يبتسم
عبد الله / انا خاطب مريم صح
ناصر / والله على قد علمى
عبد الله يبتسم و ياخد نفس و يتشجع
عبد الله / انا عاوز صوره ليها و هى مش راضيه تديهانى
ناصر / هههههههههههههههه ياض الطمع فى الحاجات دى حلو دا بدل ما تقولى انا عاوز الاصل قال و على راى الست شويكار لما قالت مهو اصل قليل الاصل يسيب الاصل و ياخد الصوره و انت الاصل كلو يا ابن الجمل
عبد الله / مهو لحد ما تفرج بقى اعمل ايه
ناصر / و انا فى ايدى ايه اعملهولك ان كان عليا اوصلها لحد عندك التاخير من عندك انت
عبد الله / مهو لحد ما النتيجه تبان و اجيب التقدير اللى حضرتك طلبته و حضرتك بقى الكبير و ابو الكرم و حبيبنا و كل الحاجات الحلوه دى
ناصر / هههههههههههههههه و الله انا شخصيا ما عنديش مانع خليها تديك صوره
عبد الله / ما هى مش راضيه ادينى انت
ناصر / هههههههههههههه يا ابنى هو انا ماشى بصور فى محفظتى… اقولك اللى تلاقى فى محفظته الواد مختار شايلها طول الوقت
عبد الله ينط على ناصر يبوسه و ناصر يزقه و يضحك
عبد الله / حبيبى يا كبير والله
عبد الله يمشى و يرجع
عبد الله / الا هو فين مختار دلوقت
ناصر / هههههههههههههههههههههههه
ناصر يسيب عبد الله و يمشى و هو بيضرب كف على كف عبد الله يتكلم بصوت عالى
عبد الله / هو مفيش حاجه سالكه ليه فى الدنيا دى يا رب دى صوره مش مليون جنيه
ناصر يبص وراه و يضحك و يمشى يدخل السرايا مريم متابعه من بعيد تروح لعبد الله
مريم / كنتوا بتقولوا ايه
عبد الله / كنا بنقول و ما نيل المطالب بالتمنى و انما تؤخذ الدنيا غلابا عمك فين ؟
مريم / هههههههههههههههههه ما اعرفش
مختار يدخل بالعربيه من البوابه عبد الله يشوفه يجرى عليه و يقف قدام العربيه مختار يفرمل
عبد الله / جيت فى وقتك محفظتك فين
مختار ينزل من العربيه
مختار / خير فى حاجه و لا ايه
مختار يطلع محفظته عبد الله يخطفها مختار يستغرب عبد الله يطلع الصوره
عبد الله / اخيرا دا احنا عبرنا القناه اسرع من كدا
مختار / هو فى ايه ؟
مريم / ههههههههههههههههههه كتر خيرك يا عمى
عبد الله يرجع لمختار المحفظه و مختار مش فاهم اى حاجه
عبد الله / خلاص يا باشا قضيت ما تشوفلنا امى هتروح و لا هتبات و لا ايه النظام
مريم / شوفت لما خدت الصوره عاوز تمشى اهو
مختار / يمشى فين انا واقع من الجوع ناكل الاول و بعدين نتكلم فى موضوع المشيان ده
عبد الله / انا واقف على رجلى من صباحيه ربنا فى الشونه و لسه ورايا بكره موال قد كدا
مختار / كدا كدا لا انا و لا الكبير و لا ام فاتن هتسبكوا تمشوا الا لما تتغدوا … الهمه يا مريم
مريم تبتسم و تدخل تجرى على جوه
مختار / بالنسبه للصوره يعنى
عبد الله / هتستخسر فى حبيبك نسيبك اخوك و صاحبك حته صوره اربعه فى سته
مختار / ماشى يا عم حلال عليك الصوره و صاحبه الصوره بس اتجدعن
عبد الله / يعنى اعمل ايه قولى ما الدراسه اللى مش عاوزه تيجي
مختار يضحك و ياخد عبد الله تحت باطه و يدخلوا جوه و هم بيضحكوا
…………………………….
فى اوضه هند بعد شهر
هند ممدده على جنبها و مستغطيه و مختار موارب الشيش بتاع الشباك و واقف يبص بين الاتنين على القمر كانه صنم و مش واخد باله ان هند بصاله
هند / قلبي
مختار يبص
هند / هو الجو سقع و لا انا اللى سقعانه
مختار يبتسم و يقفل الشباك
مختار / حقك عليا انا اصلى سرحت و انا واقف
مختار يروح ينام على ضهره هند تروح تنام فى حضنه يبوس راسها و يبص فى السقف
هند / انت عارف ان القمر جسم معتم و مليان حفر و مطبات و ان النور ده انعكاس لنور الشمس
مختار / اه عارف .. ليه ؟ اشمعن ؟
هند / يعني بقالك ساعه سايبني و سرحان فيه و فى جماله حبيت اوضحلك حقيقته يعني و ان ممكن يعني بقول ممكن يكون فى مكان ما حواليك حاجه احلى مثلا لو تحب يعني
مختار يبتسم و يبوس راسها
هند / اللى واخد عقلك
مختار / انتى
هند / ناولنى بعد اذنك كبايه المايه دى يمكن اقدر ابلعها
مختار يبتسم و يبص الناحيه التانيه
هند / انت عارف ان سرك فى بير معايا صح
مختار يبوس راسها
هند / فى حاجه بخصوص السلاح حصلت او هتحصل او بتحصل
مختار / هند
هند / نفس النظره و القلق نفس القلق اللى جوايا كل ما حاجه تحصل انا بقيت بفهم من عنيك
مختار / عباده و فرحه
هند / فاضل عشر ايام بس على الاربعين
مختار / ممكن بعد كل ده يرفضوا و يفسخوها
هند / كان من ساعتها
مختار / التحقيقات لسه شغاله
هند / تحقيقات ايه و بوليس ايه
مختار / دا مخزن سلاح مترخص يعني عادى .. هند كدا كدا مش هتفهمى فا
هند / هفهم لو شرحتلى لكن اسلوب انتى غبيه و متصدعنيش ده
مختار/ هى الهرمونات اشتغلت و هتطلع علينا و لا ايه
هند / انا الحق عليا اصلا انى عاوزه اخفف عنك روح بص على القمر بص
مختار ينام على جنبه و يبصلها
هند / انا زعلانه على فكره
مختار يحضنها
هند / بقولك زعلانه
مختار / ما انا بصالحك اهو لا اله الا الله انتى مش قولتى لما تزعلى احضنك
هند / قولت بس فى حاجه اسمها حسن اختيار التوقيت و كدا
مختار / فى حاجه اسمها دا عند امه عشان انا ما اقدرش اسيب قلبي زعلانه
هند تبصله بطرف عينها
هند / كلام
مختار / ياختى اتوكسي انا لو بعرف اقول كلام كان زمان دا بقي حالى
هند / والله بتقول احلى كلام على الاقل عفوى و من قلبك مش جمل محفوظه و محن و السلام
مختار / والله من قلبي
هند / بضايق اوى لما بشوفك زعلان او شايل الهم و انا مش قادره اخفف عنك
مختار / مين قال كدا طب والله يا هند لما ببصلك بنسي الدنيا و المشاكل و الشغل و القرف كله و بفكر فى حاجه واحده بس
هند / هى ايه بقي
مختار / انا عملت ايه فى حياتى حلو اوى كدا عشان ربنا يكرمنى بيكي
هند / انت كنت بتعمل ايه مع الرجاله امبارح فى المضيفه صحيح
مختار / و لا حاجه كنا بنلعب شطرنج و طاوله و دومينو و الحاجات دى يعني
هند / سكيتي كدا ما اتفرجتوش على فيلم مثلا او مسلسل
مختار / كنا مشغلينه جنبنا عادى يعني .. ايه ده ؟ لا اقسم بالله بمجهودى و اجتهادى الشخصي
هند / هههههههههههههههههههه
مختار / و بعدين حتى لو اقتبصتلى جمله و لا انتى فى حاجه اسمها فن اختيار التوقيت تقولها امتى و فين
هند ترفع اديها لفوق و تسقف
مختار / و بعدين هو انا هخترع يعني مهم قالوا كل الكلام و مش عيب يعني ان الواحد يستعين بالخبراء من اجل تحسين المستوى و تطوير المنظومه ما احنا برده لازم نبدا من حيث انتهى الاخرون يعني و لا احنا هنفضل طول عمرنا عالم تالت يعني و دى احدى اهداف العولمه
هند / هى وصلت للعولمه !!! لا اله الا الله ادى اخره الوقفه فى الشباك … قولتلك تقل الجو بيسقع بالليل ما بتسمعش الكلام
مختار يبص الناحيه التانيه و يضحك هند تجيب وشه ناحيتها
هند / انا بحبك
مختار / مش قدى
هند تحط راسها فى حضنه و تنام
……………………
فى اوضه خديجه
مغاورى بيكلم عباده فى التليفون
عباده / ما هو مش معقول هنقعد فى الهم ده اكتر من كدا
مغاورى / اعملك ايه يعنى مش دى افكارك الجهنميه
عباده / ما يمكن فى سيم و لا حاجه انت مش واخد بالك منها
مغاورى / مفيش جنيه غريب اتحط فى حساب حد منهم و لا اى حاجه فى حياتهم اتغيرت و لا تصرف واحد غير اللى واخدين عليه اعملك ايه
عباده/ طب خلينى اراجع المكالمات انا
مغاورى / دى اسرار بيوت يا عباده و انا مش ممكن اطلعها بره
خديجه / ما يمكن مهديين اللعب الفتره دى لحد ما الامور تهدى
مغاورى / وارد
عباده / و العمل هنفضل فى الهم ده اكتر من كدا
مغاورى / هو انت فى الهم ده لوحدك ما تهدى علينا يا عم الحج … دا انا جبت ناس قلبوا البيت عليه واطيه و كدبت مليون كدبه على اهلى يمكن الاقى اى جهاز تنصت و لا اى حاجه
عباده / وربنا وحده اللى يعلم التكنولوجيا اللى مع ولاد الجزمه دول واصله لحد فين
مغاورى / اديك قولتها … بصراحه كدا انا مش شايفلها سكه تانيه انا هكلمها و ابدء
عباده / هتبقي لوحدك هناك
مغاورى / و انا قدها ان شاء الله
عباده / طب نستنى شويه كمان يمكن
مغاورى / كفايا وقت و ايام بتعدى ربنا وحده اللى يعلم الوليه دى بتمد جدوها فيها ازاى نصحى الصبح نلاقيها حكمت البلد و احنا نايمين على ودانا
عباده / ما عنديش رد … معاك حق
مغاورى / يبقي نتوكل على الله و نبدا
عباده / تمام على بركه الله
مغاورى يبص لخديجه و خديجه على ملامحها علامات الخوف و القلق
…………………
فى عياده النسا
الدكتوره بتكشف على هند بالسونار و هى مضايقه تتنهد و تقوم هند تبص لمختار يساعدها تقوم و تعدل هدومها
مختار / هو فى حاجه و لا ايه يا دكتوره
الدكتوره / انا مش شايفه اى حاجه كيس الحمل فاضي
هند / مهو بيبقي صغير فى الاول و بعدين بيكبر صح
الدكتوره / هو احتمال بس ضعيف
هند تبص لمختار
الدكتوره / احنا هندى فرصه الشهر ده و الشهر الجاى لو ما شوفناش حاجه هننزله
هند / يعني ايه ننزله لا طبعا
الدكتوره / يا مدام بعد كدا يوم زى عشره مفيش حمل اصلا كل اللى هتعمليه انك هتزودى على نفسك تعب الاجهاض و تجازفى مش بس بقدرتك على الانجاب لا دا انتى هتجازفى بحياتك
هند / السونار دا اصلا تعبان انا هروح اكشف فى مصر بسونار احسن و احدث و اكيد هيشوف البيبي و يطلع كل ده اى كلام
مختار / هند
هند / لو حكمت انى اسافر بره مصر هسافر … انا مش هنزل ابني
مختار/ تمام يا دكتوره .. عن اذنك
مختار يبص لهند و يمشوا و هند بتفرك
هند / انا اصلا مش مقتنعه بيها من الاول
مختار/ هند
هند / هيطلع زى الحمل كنت لسه بقول اخد منشطات و قلقانه وطلعت حامل
مختار / هند
هند / انا حاسه بابني جوايا … انا مش هنزله
مختار يبص الناحيه التانيه هند عنيها تتملى بالدموع
هند / انا محتاجه البيبي ده يا مختار … اعمل حاجه
مختار يبصلها و يهز راسه و ياخدها و يروحوا يركبوا العربيه و هند بتعيط و مختار ساكت
…………………..
فى فيلا فيرا
فيرا بتبص فى ورقه طويله
فيرا / بسيطه اعتبرهم بقوا عندك
مغاورى / و الحساب
فيرا / هديهالك بارخص سعر فى السوق و هخصم كمان عمولتك فى نقل الشغل بتاعى
مغاورى / ما دام انتى كدا كدا هتصدرى ما تعمليه بره
فيرا / سوقه بره ضعيف هنا السوق الاصلى للمنتج بره كدا تقدر تقول ببيع قطاعى لكن هنا الناس بتشترى جمله
مغاورى / وزعتى يعني
فيرا / ايه ؟ ناوى تجرب ؟
مغاورى / انا ما بخدش حتى مضاد حيوى عوزانى اخد مخدرات
فيرا / مسكنات … مسكنات يا مستر مغاورى
مغاورى / ما علينا المهم السلاح هيوصل امتى
فيرا / اديني يومين تلاته اجهزهولك انت مش طالب اسلحه عاديه
مغاورى / فى حاجه كمان عاوزها منك
فيرا / عيونى مستر مغاورى
مغاورى / عاوز اتنين تلاته خبرا يمرنوا الرجاله على الاسلحه دى
فيرا / لا دى سهله ممكن تاخدهم من بره و انت ماشي
مغاورى / تمام اتفقنا
فيرا / ليا عندك طلب مستر مغاورى لو مش هيضايقك
مغاورى / خير
فيرا / عيله الزيني ما تلزمنيش لو عاوز تخلص عليهم براحتك
مغاورى / هيحصل بس مش دلوقت كلو باوانه
فيرا / انا عاوزه مختار عايش
مغاورى / اشمعن
فيرا / ما تفهمنيش غلط مستر مغاورى انا بس عوزاه يشوف كل حاجه راحت قدام عنيه عوزاه يتمنى الموت و ما يلاقيهوش … عقيدتكوا بتمنعكوا من الانتحار عاوزه اشوف ساعتها لما الدنيا تسود فى عنيه هيعمل ايه هيخسر عقيدته و لا هيعمل ايه
مغاورى / تفتكرى هيعمل ايه
فيرا / لو فكرتى عنه صح هيقتلكوا واحد واحد و بعدين هيجي يقتلنى او هيبدا بيا و بعدين انتوا مش مهم الترتيب
مغاورى / مدياله حجم كبير اوى يا ست فيرا
فيرا / ما اتعودتش استهون بعدوى بديله حجم كبير عشان احاصره من كل اتجاه و احاصره و اعجزه ما اسبلوش خرم ابره يتنفس منه لحد ما يبقي الموت عنده اهون و ينهى حياته بايده عشان يرتاح
مغاورى / انا مش هاذى مختار بس ما ترجعيش تعيطي
فيرا / معايا مناديل كفايا ما تشغلش انت بالك
فيرا تبتسم بسماجه و مغاورى هيرجع و بيعانى انه يدارى
فيرا / اه … فى حاجه كمان
مغاورى بزهق
مغاورى / خير
فيرا / لما الليله دى تخلص اعتبروا كل حاجه الزنايته بتاعتكوا ما عدا حاجه صغنونه اوى تلزمنى
مغاورى / و دى تطلع ايه دى بقي ان شاء الله
فيرا / هند
مغاورى ملامحه يبان عليها الغضب
فيرا / و مريم
مغاورى يتعصب و يفقد السيطره
مغاورى / هقولهالك كلمه و مش هكررها حريمنا خط احمر
فيرا / انت لسه بتحبها و لا ايه
مغاورى / هى او غيرها دا انا اموت و لا تتلمسش من واحده من حريمنا شعره انا قولتهالك حريمنا خط احمر فاهمه و لا لا
مغاورى يسيب المكان و يمشي و فيرا مبتسمه بلا مبالاه
فيرا / طب ما انت هتموت فعلا يا مستر مغاورى فين المشكله بقي
………………….
فى اوضه هند
هند بتعيط و كل الستات و البنات حواليها
شيري / يا بنتى اللى بتعمليه ده هو اكبر خطر على الحمل
هند / تعالى ننزل مصر بكره
انتصار / هتستحملى الطريق يا بنتي
هند / هستحمل بس لازم اشوف دكتور تانى
شيري / يا حبيبتي
انتصار / تمام يا هند بكره ننزل مصر نطمن عليكي
شيري / انتى قولتيها مش هتستحمل الطريق
انتصار / هيسوقوا بشويش و ممكن نبات ترانزيت فى اى حته فى النص انا هكلمهم يرتبوا كل حاجه
هند تهز راسها اه
فاطمه / انتى لسه فى اول حياتك و صغيره مش مستاهله يعني تعملى فى نفسك كل ده يعني
هند / دا ابنى انتى فاهمه ابنى
فاطمه / جه اهلا و سهلا ما جاش السكه اللى تودى
هند / انتى بتقولى ايه
انتصار / خلاص يا فاطمه مش وقته
فاطمه / بقول ما فيش حاجه فى الدنيا تستاهل تقهر نفسها عليها بالشكل ده و بعدين اللى فهمته ان الدكتوره قالتلها انها كل ما هتتاخر هتاثر على حياتها
هند / و انتى يعني تفرق معاكى حياتى اوى
فاطمه / اه تفرق ما تفرقش ليه مش بقيتي مننا مش روح ايه بتكلميني كدا ليه كانى عدوتك انا خايفه عليكي
هند / بعد اذنكوا يا جماعه انا محتاجه ارتاح
انتصار / حقك … يلا يا جماعه
فاطمه/ شوفتى … و لا زى كل مره
انتصار / بعدين يا فاطمه مش وقته
فاطمه تسيب الاوضه و الستات وراها شيري تقفل الباب
شيري / ليه كدا يا هند
هند تعيط
هند / ابوس ايدك انا مش مستحمله ما حدش حاسس بيا ما حدش عارف البيبي ده بالنسبالى ايه انا مش هقدر انزله
شيري / مفيش بيبي اصلا يا هند مفيش
هند / لا فى انتى شوفتى التحليل انا حامل
شيري / لا اله الا الله يا بنتى اللى بتعمليه ده غلط عليكي
هند / انتى امى المفروض تفهمى البيبي ده هو اللى هيبعد مختار عن السلاح هيربطه بيا
شيري / مختار ساب السلاح مختار ساب حياته كلها و اختارك
هند / عشان بابا الله يرحمه عشان وعده … عشان ظروفنا … عشان ما لناش حد
شيري / ما تقوليش كدا مختار بيحبك
هند / انتى ما تعرفيهوش ما بتشوفيش اللى بشوفه ما بتشوفيش بيبقي عامل ازاى لما بتبقي فى حاجه .. بقيت بعرف انهم هيعملوا حاجه من عنيه نظرته ليا … سرحانه … سهره طول الليل قدام الشباك كانه بيقول دا مش مكانى كانه محبوس فى قفص نفسه يطير
هند تعيط بحرقه شيري تحضنها
شيري / مختار بيحبك …مختار
هند / هيحب ابنه اكتر هيعيش عشانه زى ما عموا شاكر عاش عشان عباده … فى ايه اغلى عند الواحد اكتر من ابنه
شيري / هيحصل هيحصل لما ربنا ياذن و بعدين احنا ممكن نتابع مع الدكتوره من الاول و تديكي منشطات او على اسوء الاحتمالات حقن مجهرى المهم انه ان شاء الله هيحصل
هند / مهو حصل اهو
شيري تصرخ فيها
شيري / ما حصلش … ما حصلش
هند تبص لشيري باب الاوضه يتفتح مختار واقف على الباب و عين هند و شيري عليه و هند عنيها حمره من العياط
مختار / هستاذنك يا امى ممكن يعني
شيري / هنزل ابص على ياسمينا
مختار يبتسم شيري تعدى من جنبه و تطبطب على كتفه يبتسم شيري تمشي و تقفل الباب وراها يروح يقعد جنبها و ياخدها فى حضنه تعيط
مختار / على فكره انا كمان زيك كان نفسي الحمل يكمل بس انتى عندى اهم و لو ابنى هيكون السبب فى اذاكى انا مش عاوزه
هند / هستحمل
مختار / انا مش هستحمل يا هند … و بعدين اكيد ربنا شايلنا حاجه احسن … اهو عندك فاتن اهو تالت حمل و اهو ينزل دلوقت احسن ما يطلع عينك تسع شهور و ينزل فى الاخر برده
هند / ما تقولش كدا ما تقولش كدا
مختار / نروح بكره مصر نسافر بره لو حكمت بس اهم حاجه عندى انك تكونى كويسه
هند / انا عاوزه البيبي ده
مختار / ربنا ما بيتعاندش … و عسى ان تكرهوا شيئا و هو خير لكم … ما حدش عارف ايه حكمه ربنا من اللى حصل ما حدش عارف الخير فين .. بس اى كان احنا راضيين و صابرين
هند تبصله و تمسح دموعها
هند / هيكمل ان شاء الله هيكمل
مختار يبتسم و يهز راسه
هند / انا حاسه … و انت لازم تصدقنى
مختار يبوس راسها و ياخدها فى حضنه
مختار / من هنا للزياره الجايه عاوزك تاكلى كويس و تهتمى بصحتك … مش عاوز عياط و لا زعل … هنرضي اى كان نصيبنا هنرضي .. تمام
هند تهز راسها و تغمض عنيها مختار يبوس راسها
مختار / بحبك
هند / و انا كمان والله
مختار يبتسم و يبوس راسها و هو بيحاول يدارى الحزن جواه
…………………..
فى الهول تحت
فاطمه / يعني انا معايا حق اهو
انتصار / ما حدش غلطك يا ام عباده بس راعى البت بعد ما فرحت و اتعشمت يا عيني الله يعينها و يصبرها
فاطمه / ما كلنا زعلانين بس نعمل ايه يعني قضا اخف من قضا
انتصار / احنا غيرها .. انا مجربه احساسها و عارفه
فاطمه / و بعدين
انتصار / خير ان شاء الله خير دلوقت مختار يكلمها و يهديها و من هنا للشهر الجاى يحلها الف حلال
مريم / ما يمكن كل ده يتحل من عند ربنا لوحده و الحمل يكمل ما يمكن عيب من السونار زى ما هند قالت
انتصار / ياريت … ياريت يا مريم حد يكره المهم هى تبقي كويسه غير كدا يتعوض
مريم / ان شاء الله هتبقي كويسه
انتصار / ما لناش غيرك يارب
……………………….
فى سرايا الجوارحه
ست / بركه دعايا
ام مغاورى / و انتى عرفتى الكلام ده منين
بنت / شافوها منهاره من العياط … دا البلد كلها ما لهاش سيره غيرها
الست / تلم اللحمه اللى وزعتها على الناس بقي و الفشخره الكدابه بتاعتها
خديجه تدخل
خديجه / من امتى بتتكلمى عن ام فاتن كدا مش كانت حبيبتك و بتتمنيلها الرضا ترضا بنشمت فى المرض يا عمتى
الست / اتكلمى عدل يا خديجه انا روحى فى مناخيرى
خديجه / حقك عليا يا عمتى انا بس حبيت افكرك بس ان من صفات المنافق اذا خاصم فجر
الست تقوم تقف
الست / انا سكت عليكي كتير … عاجبك كلام بنتك يا ام مغاورى … انا منافقه !!!
خديجه / عملوا ايه الزنايته عشان تكرهيهم و تدعى عليهم كدا دول كانوا اخواتنا و حبايبنا ايه اللى جد
الست / انا اللى هقولك ؟ ايه الناس اللى ماتت دى ما تخصكيش الفلوس اللى راحت ما وجعتكيش
خديجه / مش هم يا ناس مش هم الظلم ظلمات يا عمتى
الست تقوم و تروح ناحيه خديجه و تلطشها بالقلم الكل يقوم يقف
الست / دلعوكى لما مرعوكى فضلوا يقولوا الدكتوره الدكتوره
خديجه تسيب المكان و تمشي الست تبص لام مغاورى
الست / شوفتى ربايه بنتك
ام مغاورى / انا مش هتكلم بس متاكده ان ابوها مش هيسكت
ام مغاورى تسيب المكان و تمشي
الست / شوفتوا ؟ ادى اخرتها … ابن الزنايته لحس دماغها و قواها علينا
الكل يبصوا لبعض و يسكتوا
……………….
على السطح
مختار واقف عباده يدخل
عباده / قلبي كان حاسس انى هلاقيك هنا
مختار يبصله و يبتسم عباده يمسك كتف مختار و يبتسمله مختار يبتسم
عباده / هتعدى
مختار يهز راسه و هو مبتسم و يبص قدامه
عباده / انا كلمتهم يجهزولكوا الشقه فى مصر بكره خدها و اقعدوا هناك كام يوم شوف بدل الدكتور ميه
مختار / انا دورت على اللى الدكتوره قالته كل ما الحمل اتاخر فى النزول كل ما كان اصعب فى نزوله و اخطر
عباده / بس فى احتمال ان يكون فى حمل فعلا انا كمان دورت
مختار / اجازف يعني اجازف بهند بعد كل ده اخسرها عشان حاجه يا تحصل يا ما تحصلش و ممكن اتخلى عنها دلوقت و تحصل بعدين او اتخلى عنها خالص
عباده / خالص !!!
مختار / ما حدش بياخد اكتر من نصيبه و انا اى كان نصيبي راضي
عباده يبص فى الارض
عباده / انا هخليهم يعملوا اطعام بكره صدقه عشان ربنا يساعدنا و يعديها على خير
مختار يهز راسه
عباده / بس انت سايبها لوحدها … يعني اللى اعرفه ان حالتها كانت صعبه و يعني
مختار / نمت … من كتر العياط نامت و خالتى ام عبد الله قاعده جنبها بتقرا قران و لما تصحي هتكلمنى … طمنى انت فى جديد
عباده ينفخ و يبص الناحيه التانيه
عباده / مغاورى راحلها و اتكلم معاها
مختار / لما يحددوا معاد التسليم ابقي قولى
عباده يبص لمختار و يبص فى الارض و يرجع يبصله و هو بيعض على شفته مختار يبصله عباده يبص الناحيه التانيه بسرعه
مختار / انا كمان شايف ان مش وقته تقولى اى اخبار وحشه
مختار يتنهد
مختار / عن اذنك
مختار يمشي و عباده متابعه و مضايق
…………………..
فى المكتب
ناصر / قولوله اى حاجه ما فيش سفر يعني ما فيش سفر
عباده / يا كبير ان هو فهم دا ان هو فهم هند مش هتفهم دى بتقول تموت و لا انش العيل ينزل تقولها لو نزلتى مصر ممكن تموتى هتقولك اموت و تسافر
ناصر / هو انت ما فهمتش كلام مغاورى و لا بتستهبل انت فاكر انها هتقتلها طب ياريت تقتلها اهو اهون من اللى فى دماغى
شاكر / هتقولوا لمختار ؟
الكل يبص لبعضه
ناصر / لا … لو عرف هيقيم عليها واطيها … مختار مش لازم يعرف
عباده / و العمل يا كبير
ناصر / و لا كاننا عرفنا حاجه و هنتصرف كاننا ما نعرفش بس هناخد بالنا … هناخد بالنا كويس اوى
عباده / تمام يا كبير اعتبره حصل
……………………
فى كباريه
عباس قاعد مع اتنين رجاله بيضحكوا و معاهم بنات اجانب كتير عمالين يضحكوا عباس يقوم و يشد بنت منهم من ايدها الاتنين يحاولوا يمنعوه و هم بيضحكوا يزقهم و يروح ناحيه المعلم اللى كان فى بيت فيرا الراجل يبتسم و يفتح باب لعباس ورا سلم لتحت عباس ينزل و البت وراه يدخلوا اوضه و يقفلوا الباب
…………………….
على باب الكباريه
عربيه راكنه جواها اتنين رجاله كل شويه يبصوا فى الساعه و يبصوا لبعض تليفون واحد منهم يرن يرد
الراجل / ايوه يا سي عباده
عباده / لسه هناك
الراجل / شكل السهره صباحى
عباده / والله ما عارف ايه اللى مصبرهم على الاشكال دى
الراجل / والله يا سى عباده لو تشوف الاشكال اللى داخله و خارجه من المكان تقرف من الدنيا و اللى فيها
عباده / انا هطلب منكوا طلب صعب شويه بس انتوا قدها ان شاء الله
الراجل / اؤمر يا سيد الناس رقبتى
عباده / انا عاوزك تركز معايا اوى فى اللى هقوله و تنفذه بالحرف
………………….
فى الاوضه
عباس عمال يشرب و البنت تصبله و تدلع عليه
عباس / اموت انا فى العسل الابيض بالقشطه
البنت تقوم تشغل اغانى و تبدا ترقص عباس يقوم يطوح معاها
عباس / الليله عيدنا عيدين
البنت بتلف حوالين عباس و هى مبتسمه
عباس / مش ناويه تتعلمى عربى بقي و ناخد و ندى بشكل ودى
البنت / يانى بونيما ( مش فاهمه )
عباس / يانى يانى من الحب الاولانى ها ها هااااااااى فينك يا ام العيال تشوفى اللى انا شايفه … بالك انتى لو ام العيال شافتك … عليا الطلاق تلغى كلمه ست من بطاقه الحكومه
عباس يطوح
البنت / بيريجيس بيريجيس ( حاسب حاسب)
عباس / يجي سي مختار يشوف الحريم ها ها هاااااى قال و ساب السلاح عشان المصراويه طب و اللى خلق الخلق انتى اجدع من اجدعها …
عباس تجيله زغطه و يطوح البنت تناوله كاس يشربه يقع من ايده يتكسر البنت تزقه على السرير
عباس / مش ما طلعتش حامل ههههههههههههههههه كل ما افتكر الدبايح اللى وزعوها عشان طلعت حامل ههههههههههههههه ولاد الفقريه اللحمه ما لحقتش تتهضم
البنت / جوفارى بيز بيريرفا ( اتكلم ما تسكتش )
عباس / شوفى مع انى لا فاهمك و لا فهمانى لكن شويه الدلع اللى بشوفهم معاكى ما بشوفهمش مع ام العيال اللى فاهمها و فهمانى على الاقل بقول الكلمتين اللى على كيفى اشتم فلان و لا اللعن سلسافيل علان لا هتنقلى الكلام و لا انتى اصلا فاهمه اللى بقوله
عباس عنيه بتقفل تحاول تفوقه يبصلها و يبتسم و ينام تانى تحاول تفوقه نايم و بيشخر تنفوخ و تقوم تلبس الروب و تطلع بره و تقفل الباب
…………………….
تانى يوم الصبح فى سرايا الزنايته
فاطمه بتصب لبن فى كبايه و تحطها على صينيه فيها فطار انتصار تدخل
انتصار / بتعملى ايه
فاطمه / بعمل فطار لهند
انتصار تبتسم
فاطمه / يعني هى لو منعت الاكل و قطعت روحها من العياط الحمل هيثبت يعني مشكلتها هتتحل
انتصار / لا اله الا الله
فاطمه / هتموت روحها يا انتصار انا كنت عارفه انها هبله بس مش للدرجادى
انتصار / هاتى الفطار انا هطلعهولها
فاطمه / لا انا اللى هطلعهولها و هتكلم معاها
انتصار / مش وقته يا فاطمه البت مش هتفهمك هتزودى الط؟؟ ين بله
فاطمه / مش هنقدر عليها و لا ايه والله ما هسيبها الا اما تاكل
انتصار / طب خلى مريم هى اللى تديها الاكل
فاطمه / قولت انا اللى هطلعها وسعى
فاطمه تشيل الصينيه و انتصار واقفه بتضرب كف على كف تجرى وراها
……………………..
فى مكتب محاماه باسم عباس الجارحى
عباس يفتح الباب و هو عمال يدعك فى وشه عشان يفوق و يدخل و يقفل الباب يسمع صوت شد اجزاء يبص وراه يلاقي مغاورى قاعد بيلعب فى مسدسه
مغاورى / صباح الخير
عباس / هو انت !!! بتعمل ايه هنا ؟ و دخلت ازاى ؟
مغاورى / جرا ايه يا ابن عمى بقي انت اللى بتسال فى حاجه زى دى
عباس / هعمل قهوه اعملك
مغاورى / هنشرب هنشرب ما تقلقش المهم عشان ما طولش عليك و انت شكلك راجع تعبان يا عيني كنت بتشقي انت امبارح باين عليك
عباس / اهدى على نفسك كدا لحد ما اشرب القهوه و افوقلك
عباس يروح ناحيه المطبخ مغاورى يروح وراه عباس يلقم الكنكه و يحطها على البوتجاز
مغاورى / والله الواحد كل ما نفسه بتهفه يجرب سهراتك الصباحى دى يفتكر منظرك و انت راجع منها يقول و على ايه الراجل ما حلتوش الا هيبته
عباس يبص لمغاورى
مغاورى / حلوه السهرات دى يا عباس
عباس يصب القهوه
عباس / والله ربنا يحاسبني لو قولت مش حلوه
مغاورى يبتسم و يبص الناحيه التانيه و يرجع يبص لعباس و هو بيحاول يكتم غيظه
مغاورى / بس ما تدخلش ربنا فى الموضوع عشان كدا كدا هيحاسبك
عباس / هيحاسبنا كلنا ما حدش خالى يا ابن عمى
مغاورى / انت كنت بايت فين امبارح
عباس / فى الكباريه
مغاورى / و الكباريه بيفضل فاتح لدلوقت
عباس / اه و بعد دلوقت كمان انا والله لولا ان ورايا قواضى و هم ما يتلم ما كنت جيت
مغاورى / دا على كدا القاعده هناك حلوه بجد بقي
عباس / احكيلك ايه و لا ايه كل مره انقح من اللى قبلها و كلهم حلاوه بالقشطه … اجانب … و كل مره بروح فى جديد
مغاورى / و نضاف بقي على كدا
عباس / يخربيت النضافه يا جدع … البت من دول عليها حته
مغاورى / عباس
عباس / خلاص خلاص انت اللى بتسال
مغاورى / انا بتكلم عن نضافه تانيه … اتنيل على عينك زى ما انت عاوز بس ما تاذيش اختى و انت فاهمنى هى ما لهاش ذنب
عباس / لا ما تقلقش امان
مغاورى / بتكشف يعني و بتطمن على روحك
عباس / انت جاى ليه يا مغاورى عاوز قول و انا اخدك معايا انما عيني فيه و اقول اخيه ده
مغاورى / الواحد لازم يطمن على روحه برضه مش هتبقي دنيا واخره يعني
عباس / اللى يعوز الدح ما يقولش اح
مغاورى يهز راسه و يبص الناحيه التانيه
مغاورى / و ناوى ترجع امتى من اسكندريه بتاعتك دى
عباس / بكره الصبح … اصل بصراحه كدا جو السرايا بقي كئيب و نكد
مغاورى / عمركش فكرت ان اهل البلد بيشوفوك و هيقولولها
عباس / قولى انت
عباس يسيب المطبخ و يدخل الحمام و يقفل الباب مغاورى يحاول يخبط الباب بكفه و يمسك نفسه قبل ما ايده تلمس الباب و ياخد بعضه و هو متعصب و يمشي و يرزع الباب وراه جامد اوى
…………………
فى اوضه هند
هند قاعده على السرير بتعيط الباب يخبط هند تمسح دموعها و تقوم تفتح تلاقى فاطمه شايله صينيه الفطار
فاطمه / جبتلك لقمه تتقوتى
هند / مش جعانه شكرا
فاطمه تزقها و تدخل تحط الصينيه على الترابيزه و هند متبعاها
فاطمه / عليكي بايه من دا كله
انتصار تدخل
فاطمه / اوعى تفتكرى انى مش حاسه بيكي انا اكتر واحده فى السرايا دى فهماكى و حاسه بيكي
انتصار / فاطمه جابتلك الفطار ما هونتيش عليها ما تاكليش لحد دلوقت انتى حامل و لازم تتغذى كويس
فاطمه / اسكتى يا ام فاتن
انتصار تبص لفاطمه فاطمه تمسك هند و تقعدها على السرير
فاطمه / انا عارفه العيل ده مهم بالنسبالك قد ايه فاكره انك بيه بتبتى قدمك مع مختار فاكره ان ده اللى هيربطوا ببعض
هند تبصلها
فاطمه / مش هينفعك لو جرالك حاجه مش هينفعك لو ما كملش و ما عرفتيش تخلفى تانى هتبقي لا طولتى لا سما و لا ارض
هند / هيكمل … ما تقوليش كدا هيكمل
فاطمه / زمان لما جيت البيت ده كنت عيله بنت اربعتاشر ما كنتش افهم حاجه مرات ابويا كانت بتسقيني المر فى ازايز و سى شاكر اتجوزنى عشان اجبله حته عيل ازاى ما اخلفش و لا يلاهوى لو بعد كل ده جبتله عيل اللهم احفظنا انا حاسه بيكي اقسم بالله حاسه بيكي
انتصار / بس الدنيا مش كدا يا هند عمى قعد ٢٠ سنه من غير خلفه و ما فتحش بقه بحرف و بعدين الطب اتقدم خالص دلوقت
هند / انتى ليه بتكلميني على انى ما بخلفش
فاطمه / بتخلفى و لا ما تخلفيش هيفيد بايه لو ما عشتيش يا عبيطه
هند / سبونى لوحدى لو سمحتوا بجد انا مش قادره اتكلم مع حد
فاطمه / يا بنت الناس احنا خايفين عليكي
هند / من امتى بقي ان شاء الله
انتصار / اخص عليكي يا هند
فاطمه / تقصدنى انا … انا مش شيطانه يا بنت المصراويه انا بس كدا طبعى حامى و ما بيعجبنيش الحال المايل … و لا الدلع
هند تبص الناحيه التانيه و تتنهد
انتصار تروح تجيب اللبن
انتصار / بصى يا هند انا عارفه ان نزول العيل مش سهل
هند تبصلها
انتصار / كلى و اتغذى كمل لقى امه قويه و عافيه و تقدر تراعيه ما حصلش نصيب تستحملى السقوط عشان تقدرى تقومى تانى بسرعه و ربنا يكرمك علاطول
هند / هيكمل
فاطمه / ان شاء الله كلو على الله بس دلوقت قومى كليلك لقمه
هند / مش قادره
فاطمه تشخط فيها
فاطمه / ما تبطلى مياصه بقي يا بت انتى ما تقرفيناش معاكى
هند تقوم و تزعق
هند / انتى مالك و مالى سبونى فى حالى انتى ايه ما بتحسيش
فاطمه / و انا لو ما كنتش بحس كنت جيتلك لحد عندك احايل فيكي
هند / تحايلى و لا تشمتى
فاطمه / اشمت !!! ربنا يسامحك قسما بالله لولا انى مقدره اللى انتى فيه كان بقي ليا تصرف تانى معاكى
فاطمه تسيب المكان و تمشي هند تقعد تعيط انتصار تتنهد و تطبطب عليها
انتصار/ كلنا وقت الزعل بنقول كلام ما كانش ينفع يتقال و الشيطان منه لله ما بيخليناش نشوف الدنيا صح
هند / انا تعبانه اوى
انتصار / كانت خايفه عليكي بجد انا عرفاها طيبه و قلبها ابيض … لسانها طويل حبتين و ليها شويه حركات تفقع بس طيبه
هند / انا مش فيها والله انا ما قصدتش انا بس
انتصار / انتى فى محنه … عارفين و فاهمين … بلاء من ربنا … امتحان لايمانك و صبرك و بعدين دا دى الحاجه الوحيده اللى ما لناش يد فيها اخرنا نسعى انما الباقي رزق و نصيب ارضي يا بنتى عشان ربنا يكرمك و بعدين لعله خير
هند / خير !!!
انتصار تبتسم و تقوم تجيب كبايه اللبن
انتصار / خدى اشربي دى و انا هحكيلك حكايه سيدنا الخضر عرفاها
هند تهز راسها اه
انتصار / فانطلقا حتى إذا لقيا غلاما فقتله قال أقتلت نفسا زكية بغير نفس لقد جئت شيئا نكرا… ربنا ما بيعملش حاجه وحشه فى حد … وأما الغلام فكان أبواه مؤمنين فخشينا أن يرهقهما طغيانا وكفرا فأردنا أن يبدلهما ربهما خيرا منه زكاة وأقرب رحما … ارضي يا بنتى ربنا يرضي عليكي ارضي و اصبرى و خلى عندك ثقه و ايمان فى ربنا
هند / بس انا حاسه انه هيكمل ان شاء الله هو مش برده الرسول صلى الله عليه وسلم
انتصار / عليه الصلاه و السلام
هند / عليه الصلاه و السلام قال ان ربنا قال أنا عند ظن عبدي بي؛ فإن ظن بي خيرًا فله، وإن ظن بي شرًا فله… انا هظن خير هيكمل و ربنا ان شاء الله مش هيخيب ظنى هيكمل
انتصار / و ما دام انتى عارفه كدا ما بتعمليش بكلامك ليه ورمتى عنيكي كدا ليه من كتر العياط جوزك ما رضيش يفطر و نازل يا كبدى راح شغله و هو زعلان عليكي
هند عنيها تتملى بالدموع
انتصار / هو لا اتكلم و لا قال حاجه انا اللى ربيته و افهمه من عنيه .. مختار ما عندوش اغلى منك يا هند طول ما انتى بخير هو بخير كلى يا بنتى و اتقوتى الحمل عشان يكمل محتاج غذى
هند / مش قادره
انتصار / من كتر العياط و الحزن يا بنتى
فاطمه تدخل
فاطمه / هى لسه ما كلتش
انتصار / هتاكل يا فاطمه اهدى بقي مش وقتك
فاطمه / اما نشوف اكليها
فاطمه تطلع بره
انتصار / شوفتى بقي قلقانه عليكي ازاى كلى بقي دا حتى الزعل ممكن يكون سبب لوحده ان العيل ده لا قدر الله لا قدر الله
هند / ما تقوليهاش
انتصار / خدي اشربي كبايه اللبن دى و انزلى اقعدى معانا ما تحطيش ايدك فى حاجه بس خليكي وسطينا انسي اللى فيكي و اضحكى و فرفشي من هنا للشهر الجاى خلينا نتعامل على انك حامل و نفرح بحملك مش هنشيل الهم قبل الهنا بسنه
هند تهز راسها حاضر و تاخد كبايه اللبن
انتصار / ربنا يهديكي يا بنتى
انتصار تقوم تجيب الصينيه و تحطها جنب هند على السرير و تاكلها بايدها فاطمه تدخل تبص من على الباب تلاقيها بتاكل تدخل
فاطمه / اكلتيها يعني عرفتى تقنعيها و لا هى بس كلمه فاطمه اللى بتقف فى الزور
انتصار / يا وليه اتهدى بقي ما صدقنا كلت
فاطمه / ما بتهدش انا نازله المطبخ اشوف هناكل ايه خليكي انتى جنبها دلعيها كدا
فاطمه تمشي و انتصار تضحك
انتصار / مجنونه و ربنا … شوفتى … ما قدرتش تمشي الا اما اطمنت عليكي انك اكلتى … مش بقولك طيبه … كلى كلى
انتصار تاكل هند و هند مبتسمه ابتسامه خفيفه
……………………
فى جنينه مليانه شجر
عباده و مختار قاعدين على دكه خشب
عباده / هو كان باين عليه واطى ابن كلب اصلا
مختار / بس انه يكون زباله دا مش شرط يخليه خاين
عباده / هو اللى لط روحه احنا طلعت عينا وراهم نفر نفر دا مش فاضل غير اننا نراقب العيال الصغيره … سيبك انت كفايا عليك اللى انت فيه … ايه ناوى تعمل ايه
مختار / مش هينفع انزلها مصر
عباده / خير ما عملت
مختار / مش هكدب لو قولت مش هينفع اخرها من البلد و لو اقدر ما اخرجهاش من السرايا مش هخرجها
عباده / هو فى حاجه و لا ايه
مختار/ لا ما فيش بس الحوار اللى حصل فى الحمام بتاع الساحل ده لسه خانقنى
عباده يهز راسه و هو بيبص الناحيه التانيه
مختار / مش مرتاح
مختار يضغط بايديه على مناخيره من فوق جنب عنيه
مختار / حاسس انى هتجنن من التفكير رسالتها لما باركتلى بحمل هند كانى كنت حاسس بعدها ان الحمل مش هيكمل
عباده / اوعى يكون قصدك
مختار / لا لا لا بعيده اوى و مستحيله هى مش ربنا يعني
عباده / المهم هتعمل ايه
مختار / انا خليتهم يجيبلولى كل نمر الدكاتره بتوع النسا الكبار فى مصر و هشوف مين اشطرهم و اخليه يجيب عدته و يجيلها لحد عندها و ياخد اللى ياخده
عباده / يا عم لو على الفلوس امرها محلول باذن الله دى اسهل حاجه ربنا بس يجعله بفايده
مختار / صعبانه عليا اوى ما بتلحقش تفرح ما بطلتش عياط من امبارح و لا اكل و لا شرب و لو غصبت عليها تجيبه تانى فى الحمام سبتلها الدنيا و مشيت ما استحملتش
عباده / بس هى محتاجاك جنبها
مختار / عارف بس اعمل ايه مهو ابنى برده و انا كمان عاوزه و فرحت بيه انا كمان مضايق و متاثر اعمل ايه
عباده / ما تعملش فى ايدك ايه يعني تعمله الله يعينك
مختار / و انت ؟ طمنى عليك .. عامل ايه مع خديجه
عباده يعوج بقه
عباده / خد منها الموبايل امبارح و ما رجعوش
مختار / يا كبدى يا ابني
عباده / ما ينفعش تعرف الحاجات دى و لا يتكلم فيها قدامها انا فاهمه بس ما يجيبله خط و عده تانين و الرقم معاه ليه رخامته اللى مش على حد دى
مختار / مغاورى بقي
عباده / اه على رايك
……………..
فى سرايا الزنايته
هند قاعده و الكل ملموم حواليها انتصار تدخل و هى مبسوطه و بتتكلم فى التليفون
انتصار / كلت و شربت و قاعده وسطينا اهو
شيري / انا كنت فكراهم مسافرين الصبح عشان كدا ما جيتش
انتصار / و انتى ما بتجيش غير عشان هند و لا ايه والله ازعل
شيري / والله ما اقدر بس
انتصار / هاتى عبد الله و ياسمينا و تعالى اتغدوا معانا
شيري / انا علقت على الغدى خلاص خليها مره تانيه
انتصار تبص لهند و تبتسم
انتصار / ياختى غدى ايه سويه و عنيه لبكره طب دا حتى عبد الله يدعيلك
شيري / ههههههههههههههه بكره ان شاء الله هعدى عليكي ان كانت هند سافرت او ما سافرتش
انتصار / عشان غلاوتك بس انما غير كدا كنت زعلت … تاخدى هند تكلميها
شيري / هاتيها
انتصار تدى لهند التليفون
هند / الو
شيري / كلمتك كتير
هند / فاصل نسيت اشحنه امبارح
شيري / المهم انك بخير بتاكلى كويس
هند / اكلت ما تقلقيش
شيري / الزعل وحش عشانك خدى بالك من نفسك
هند / ما تقلقيش يا ماما انا الحمد لله كويسه
شيري / تمام يا حبيبتي ربنا معاكى انا هبقي اكلمك تانى
هند / تمام يا ماما مفيش مشكله
شيري / سلام يا حبيبتي
هند / مع السلامه
هند تقفل و ترجع التليفون لانتصار و تبتسم
انتصار / انا عملت البليله اجبلك طبق
هند / مش دلوقت كمان شويه
انتصار / براحتك لو عوزانى اعملهالك عشوره احنا لسه فيها
هند / لا هكلها بليله
انتصار / تمام انا فى المطبخ لو عوزتى حاجه ناديني
مريم / و تناديكي ليه ما احنا كلنا حواليها اهو نعملهالها احنا
انتصار / ماشي
انتصار تروح المطبخ
سماح / هو انتى مش كنتوا رايحين مصر
هند / مختار بيقول مش هستحمل الطريق هيجيب دكتور هنا
مريم / والله عين العقل
هند / بقولكوا ايه انا تعبانه هطلع انام شويه فى الاوضه هتعوزوا حاجه
فاطمه / ما تقفليش الباب بالمفتاح عشان لو حبينا نطمن عليكي
هند / حاضر عن اذنكوا
فاطمه / لو دخلت عليكي فجاه لقيتك بتعيطي
هند / مش هعيط هنام
فاطمه / اطلعوا معاها يا بنات وصلوها و شوفوا لو ناقصها حاجه
هند / ما لوش لزوم عن اذنكوا
مريم / موبايلي معايا لو عوزتى حاجه
هند تهز راسها و تطلع
فاطمه / ربنا يعدى الشهر ده على خير
سماح / شكله هيبقي شهر طويل اوى
فاطمه / مش هيبقي اطول من الشهر اللى فات
سماح / صحيح احنا هنفضل كدا شهر يجر شهر ما يشوفولهم حل فى حوار الجوازه دى
مريم / لسه شويه على الاربعين برده
سماح / اربعين و لا تلاتين هم يعني بيخلوه يشوفها و لا يتكلم معها و لا هى حتى بترد على حد فينا لما بنكلمها
مريم / ما تيجي نروحلها
فاطمه / تروحى فين
انتصار تدخل
انتصار / والله فكرت فيها نروح احنا الحريم نقعد و نتكلم و نشوف راسنا من رجلينا و نحاول نرجع المايه لمجاريها
فاطمه / ما الرجاله راحوا بدل المره اتنين و تلاته
انتصار / و هم الرجاله يعرفوا يعمله اللى بنعمله احنا و قال على راي المثل ما يجيبها الا حريمها
فاطمه / انا واخده على خاطرى منهم اوى مش معامله ولاد اصول دى
انتصار / البيوت ياما بيحصل فيها و العين فلقت الحجر سبيها على الله
فاطمه / كلو على الله بس برده
انتصار / سبيها على الله يا فاطمة
فاطمه تقوم و تطلع فوق و انتصار تتنهد و الكل يبص لبعضه
…………………..
فى الجنينه
مختار / قولى انك بتهزر
عباده / لا بتكلم جد
مختار / مهو مهما كانت حياتنا سوده دا مش مبرر للانتحار
عباده / يا ابنى ما احنا لازم نجيب الموضوع لاخره
مختار / و احنا لازم احنا اللى نجيبه يعني يا ابنى الموضوع ده انا و انت اخر ناس نعرف نمشي فيه اصلا
عباده / ليه ؟ مش رجاله و لا ايه ؟
مختار يبصله بطرف عينه و يسيبه و يقوم و هو بيضرب كف على كف عباده يحصله
عباده / كل شئ مباح فى الحرب يا مختار
مختار / انت مقتنع باللى انت بتقوله
عباده / بلاش انت عشان خاطر هند هروح انا
مختار / و هتقول لخديجه ايه ما تنساش انها ما تعرفش حاجه عن الموضوع من اوله لاخره
عباده / هتصرف
مختار / يا ابنى فى مليون طريقه غير دى مش هتعرف
عباده / ابقي جربت و عملت اللى عليا
مختار / الناس لو عرفت … الكبير لو عرف … ما انت عارف انه مستحيل هيوافق اصلا
عباده / يووووه بقي يعني اعمل ايه يعني
عباده يتعصب و يدى ضهره لمختار و مختار متابعه مختار يبص فى الارض و يسكت
…………………
فى سرايا الزنايته
الكل على الاكل
ناصر / و انتوا سايبينها نايمه من ساعتها
فاطمه / مهى سهرانه من امبارح بتعيط خليها تريح عنيها شويه انا شقرت عليها كذا مره و الحمد لله فطرناها كويس و لما مختار يجي بالسلامه يبقي ياخد الاكل و يطلعلها ياكلوا سوا
شاكر يطبطب على ايد فاطمه تبصله مبتسم تبتسم
ناصر / تسلمى يا ام عباده
فاطمه/ انا كنت عاوزه اتكلم فى حاجه
انتصار / مش وقته يا ام عباده
فاطمه / لا وقته
انتصار تبص الناحيه التانيه
شاكر / فى ايه يا ام عباده ؟ قولى
فاطمه / حكايه الجوارحه و اللى بيعملوه هو ينفع اللى بيحصل ده
شاكر / والله انا كمان بدات اضايق
فاطمه / ما عرفوش ان هند تعبانه يعني
ناصر / و هم هيعرفوا منين بس
فاطمه/ و هى البلد دى فيها حاجه بتستخبى دا البلد كلها اوضه و صاله
شاكر / الواد كل شويه يروحلهم و يقابلوه وحش فوق الشهر اهه ما شافش عروسته لو مش هيكملوا الجوازه يقولولنا و احنا نشوفله غيرها
ناصر / الحاجات دى ما بتتاخدش كدا يا عمى ما تنساش هو رايدها و هى ريداه
فاطمه / رايدها اه انما ريداه دى بقي فيها كلام تانى
انتصار / و هى فى ايدها ايه بس يا كبدى و بعدين ما انا قولتلك نطمن على هند بس النهرده و نروح كلنا بكره نشوف الدنيا
شاكر / فيكي الخير يا ام فاتن بس
ناصر / خيركم من بدا بالسلام خلينا احنا الكبار للاخر يا عمى
مختار و عباده يدخلوا
عباده / احنا اتنسينا فى البيت ده و لا ايه مش قولنا جايين فى الطريق
انتصار / خد يا مختار الصينيه دى و اطلع صحى هند و كلوا سوا
مختار يهز راسه و ياخد صينيه من على البوفيه متغطيه و يطلع
شاكر / هو عامل ايه دلوقت
عباده يقعد و فاطمه تغرفله
عباده / هيعمل ايه يعني الله يعينه انا فضلت معاه اليوم بطوله خفت اسيبه لوحده
فاطمه / على ايه كل ده يا ناس طب هى و قولنا
ناصر / مهو ضناه برده يا ام عباده و اكيد كان نفسه يبقي اب
فاتن / بكره يبقي ان شاء الله هم الاتنين لسه صغيرين و اللى محصلش المرادى بكره يحصل
فاطمه / قوليلهم يمكن يسمعوها منك اصل الكلمه منى انا بتقف فى الزور
انتصار / ما خلاص بقي يا ام عباده
فاطمه / كلمت نسايبك النهرده
عباده يهز راسه و يبص فى الطبق
فاطمه / من حبنا حبيناه و صار متاعنا متاعه و من كرهنا كرهناه و حرم علينا اجتماعه على ايه دا كله بكره اجبلك ست ستها
عباده / تسلم ايدك يا اما الاكل حلو اوى
فاطمه / كل اهو ده اللى انت فالح فيه
شاكر / الواد راجع تعبان سبيه ياكل لقمه عشان يطلع يرتاح شويه شكله مش مظبوط اصلا
فاطمه / والله انا مش قادره اصدق اللى بيحصل ده بقى دول الجوارحه و كاننا اول مره نعرفهم دا احنا كنا بنقسم معاهم اللقمه
ناصر / فتره و هتعدى يا ام عباده و البيوت ياما بيحصل فيها
انتصار / ما تتقلوش فى الاكل عملالكوا شويه بليله هتاكلوا صوابعكوا وراها و عملتلك عشاوره يا عمى عارفه انك بتحبها
شاكر / تسلم ايدك يا ست الكل
فاطمه / انا ساعدتها
شاكر / و تسلم ايدك قبل ايدها
شاكر يبص لانتصار تضحك و تغطى بوقها بايدها و فاطمه قاعده مبسوطه
………………….
فى اوضه هند
مختار يفتح الباب و هو شايل الصينيه بايده التانيه يدخل يلاقى هند نايمه يروح يحط الصينيه على الترابيزه و يرجع يقفل الباب بالمفتاح و يقلع العبايه يعلقها و يدخل ينام جنب هند فى السرير و يحضنها تصحى
هند / انت جيت
مختار / لسه جاى فى السكه اهو
هند تبتسم و تقوم تقعد
هند / اكلت
مختار يشاورلها على الترابيزه تبص تلاقي صينيه الاكل محطوطه
مختار / الاكل ما لوش طعم من غيرك
هند / طب قوم ناكل سوا … ام فاتن و ام عباده اتكلموا معايا النهرده ما سابونيش الا اما فطرت