رواية اثبات ملكية الفصل التاسع 9 بقلم ملك ابراهيم

مسك ايدي وقربها من شفايفه وباسها برقه، قالي (بحبك) الكلمة دي رجعت الفرحه لقلبي تاني، ابتسمت بسعادة وسألته(بتحبني بجد؟) حرك راسه بـ لا وقالي(بحبك حقيقي) ضحكت واتحولت دموعي في لحظه لسعادة، مسك ايدي وقالي(ها قوليلي بقى ايه اللي حصل ومين اللي زعلك؟ ) بصتله وانا مش عارفه اقوله ايه، اتكلمت بتوتر وسألته(حسام انت شايف ان انا استحق اكون مراتك ولا كان المفروض تتجوز واحده احسن مني؟ ) حرك راسه بتفهم وكأنه فهم اصل الحكايه وقالي(يهمك اللي انا شايفه ولا اللي غيري شايفه؟ ) مفهمتش هو يقصد ايه اوي، ضحك لما شاف تعبيرات وشي وفهم ان انا مش فاهمه هو يقصد ايه،، اتكلم ببساطه وقالي(يعني لو يهمك اللي انا شايفه فـ انا بقولك ان انا لو لفيت الدنيا كلها مش هلاقي واحده اتمنى انها تكون مراتي غيرك)

ضحكت بسعاده، خطف قلبي بكلامه وحنيته، كل حاجه فيه بتخطف قلبي، نظراته ليا كانت حلوه اوي، حاسه اني شايفه صورتي جوه عينيه دلوقتي، حاسه ان شكلي بقى حلو فجأة وكأني بقيت اشوف نفسي بعنيه، اتكسفت من نظراته وقولتله(على فكره انت بتقول كلام حلو اوي) ابتسم ولمس خدي بإيديه واتكلم بعشق وهو بيتأمل ملامحي (انتي اللي حلوه اوي) اتكسفت جدا وخدودي احمرت، ضحك وقالي (كدا احلويتي اكتر، خفي عليا شويه عشان مش هقدر امسك نفسي اكتر من كدا) اتكسفت اكتر وارتبكت وحاولت اغير الموضوع وقالتله(هو احنا هنروح فين؟ ) فهم اني بغير الموضوع وشغل العربيه وقالي بمرح(هخطفك) ضحكت وكنت مبسوطه اوي، قولتله في سري ياريت لو تخطفني بعيد عن العالم دا وبعيد عن كل الناس اللي عايشين فيه، كان نفسي ياخدني معاه ومرجعش تاني بيت عمي، مش عارفه هعيش وسطهم الـ ٣ شهور دول ازاي، ربنا يعديهم على خير.

بعد وقت قليل وصلنا، نزلنا من العربيه ودخلنا محل مجوهرات كبير، رحب بينا صاحب المحل وقعدنا وبدأ يعرض لنا كل حاجه موجوده عنده، كنت ببص لكل حاجه بدون انبهار، قربت من حسام وهمست له (انا عايزه دبله صغيره بس مش عايزه اي حاجه من الحاجات دي) بصلي شويه وبعدين ضحك وقالي(متخافيش على فلوسي اختاري برحتك حتى لو عجبك المحل كله هشترهولك) حركت راسي برفض وقولتله(الموضوع مش كدا بس انا فعلا مش بحب الحاجات دي) غمزلي وقالي(يعني مش ممكن تحبيها عشاني؟ ) اتكسفت جدا من حركت عنيه وهو بيغمزلي قدام الكل كدا، خوفت يكون حد من اللي موجودين معانا في المحل شافه وهو بيغمزلي، بجد كسفني جداا، مسك ايدي ولبسني خاتم عجبه، بصيت على ايدي وكان شكله حلو ورقيق اوي، شاف فرحتي بيه وعرف ذوقي بسرعه وايه اللي بيعجبني، اختارلي طقم كامل “عُقد وحلق واسوره وخاتم” كنت خايفه اوي ان الحاجات دي تكون غاليه، وللاسف كنت عارفه انها غاليه جدا بس هو اصر عليهم، بعد شويه واحنا في المحل قرب عليا وهمس لي(انتي ايه رأيك اجيب دبله ليا ولا مش مهم) حطيت وشي في الارض، اتكسفت اقوله اه لازم تجيب وتلبسها في ايدك عشان الدنيا كلها تعرف ان انت اتجوزت، خوفت يكون مش بيحب يلبسهم، لاحظ شرودي واتكلم بمشاكسه(بصراحه انا محتار اجيب ولا لا، يعني مثلا لو لبست دبله كل البنات اللي اعرفهم هيتصدموا وانا خايف عليهم من شدة الصدمه، انا بقول بلاش احسن، انتي ايه رأيك؟ ) اتجننت لما جاب سيرة البنات، معقول في بنات في حياته يعرفهم؟! ، اكيد طبعا دا برضه شاب وحلو وزي القمر وظابط وله هيبه وغني وعنده كاريزما تخطف قلب اجمل بنت، ايه دا انا هموت من الغيره عليه، معقول في بنات بيبصوله وبيتمنوه، محستش بنفسي غير وانا ببصله بغضب وقولتله بعند(طب ايه رأيك بقى يا حسام ان انت هتجيب دبله وهتلبسها في ايدك الشمال كمان عشان كل البنات والستات يعرفوا ان انت متجوز) اتفاجئ من تحولي من بنوته رقيقه لوحش عايز ياكل اي حد ممكن يبصله.. ضحك ولمس ايدي وقالي(بحبك) اتكسفت جدااا واللي كسفني اكتر الناس اللي حوالينا وانا وهو بنتكلم وكأننا في عالم تاني لوحدنا. بقلمي ملك إبراهيم
طلب يشوف دبل رجالي واختارنا واحده وحاسب على كل اللي خدناه وخرجنا من المحل وركبنا العربيه، كنت فاكره انه هيرجعني البيت عند عمي لكنه كمل في طريقه وخدني لمكان تاني، مكان عمري في حياتي ماكنت احلم اني ادخله، مسك ايدي ودخلنا وقعدنا وسألني اشرب ايه وطبعا اتكسفت، كنت عارفه اني مستحيل هقدر اشرب قدامه اي حاجه، قرب مني وهمس بتأكيد (عايزك كل شويه تفتكري انك بقيتي مراتي وانا جوزك يعني مفيش بينا كسوف ولا اي هبل من اللي في دماغك دا، شوفي حبه تشربي ايه قبل ما نطلب العشا ولا اطلب عشا على طول؟ ) قلبي هيقف بجد، حاسه ان جسمي كله بيرتعش، مش قادره اتخيل ان انا قاعده معاه دلوقتي وكمان بقيت مراته والمفروض اتعامل معاه عادي وعلى طبيعتي من غير اي رسميه، مستحيل اللي هو بيطلبه دا يحصل بسرعه كدا، خرج دبلته ودبلتي وقالي هاتي ايدك عشان دا يفكرك انك بقيتي مراتي، اتكسفت ارفع ايدي اصلا، لكنه خد ايدي ولبسني الدبله وقربها من شفايفه، سحبت ايدي بسرعه قبل ما شفايفه تلمس ايدي، كنت ببص حواليا وانا مكسوفه اوي من كل الناس اللي حوالينا، ابتسم بهدوء ولبس هو دبلته ومقلش اي كلمه، حاسيت انه زعل مني، بصتله وحاولت اعرف هو زعل فعلا ولا لا ومقدرتش افهمه، مسك تليفونه وبص فيه شويه وانشغل فيه، كان مركز جدا مع التليفون وبيبص فيه وهو بيبتسم، حسيت بالغيره، ياترى بيعمل ايه او بيكلم مين، ايه اللي ممكن يكون شاغله عني كدا، اتنهدت بزهق وقولتله بغيظ(ايه اللي شاغلك اوي كدا؟ ) ضحك وهو بيبص في التليفون ومردش عليا، اتغظت اكتر وتفكيري راح لبعيد، معقول في واحده هي اللي بتكلمه دلوقتي ومركز معاها اوي كدا، حسيت بنار في قلبي، الغيره دي طلعت وحشه اوي، بصيت عليه بتركيز، كنت في صراع مع نفسي .. خدي منه التليفون شوفي بيكلم مين.. ممكن تكون واحده.. معقول هيكون قاعد معايا وبيكلم واحده تانيه.. اتجننت اكتر وخدت التليفون من ايديه فجأة، ضحك وبصلي وبعدين بص جنبه ومقالش اي حاجه، بصيت للتليفون واتصدمت لما لقيته كان بيصورني بيه، اتكسفت جدا منه ومن تفكيري المجنون، قفلت التليفون و حطيته قدامي باحراج وانا مش عارفه اقوله ايه، اتكلم هو بمرح وقالي(ها فكرتي نطلب عشا ايه؟ ) استغربت انه مش مضايق اني خدت التليفون منه بالطريقه دي، بصتله وقولتله(هو انت زعلت لما انا خدت التليفون منك اشوف انت كنت بتكلم مين؟ ) كملت كلامي وانا بحاول ابرر سبب اللي انا عملته(اصل انا….. ) قاطعني وقالي (متكمليش ياحبيبتي ، اللي انتي عملتيه دا طبيعي جدا ان اي واحده تعمله مع جوزها لو حست ان في حاجه واخداه منها) قلبي مش قادر يستحمل جماله وعقله الكبير دا، انا بقيت بحسد نفسي عليه بجد، معقول في راجل في الدنيا عاقل ومتفهم اوي كدا، ابتسمت وقولتله(طب يلا نطلب العشا عشان انا بصراحه جعانه اوي ومكلتش اي حاجه من الصبح) ضحك وقالي (اختاري نتعشى ايه واعملي حسابك من النهارده اختيار الاكل دا من تخصصك انتي، بس كان في موضوع مهم كنت عايز اتكلم معاكي فيه ومش عارف هل دا الوقت المناسب ولا لا) قلقت من تغير صوته فجأه للجديه وسألته بقلق(موضوع ايه؟) بص حواليه وهو بيتنهد وخد نفس عميق وقالي(للاسف الشديد يا ساره انا بحب المسقعه جدا)😂😂 ضحكت اول ما قالي كدا واتكسفت جدا لما افتكرت اول مقابله بينا في القسم لما سألني عن سبب وجودي في القسم وانا قولتله اني روحت اشتري علبة جبنه عشان ماما عامله مسقعة وانا مش بحب المسقعة🤦😂😂

يتبع….

لقراءة الفصل التالي : اضغط هنا

لقراءة الرواية كاملة اضغط على : (رواية اثبات ملكية)