رواية المبروكة الفصل الثالث 3 بقلم رشا منصور

رواية المبروكة البارت الثالث

رواية المبروكة الجزء الثالث

رواية المبروكة الحلقة الثالثة

بعد اسبوع روحت عند عمى وكانت المفاجأة مرات عمي قاعدة مش طايقه نفسها وقدرت أعرف من قرينها أن في مشكله حصلت بينها وبين أختها وبنت أختها وأن الجوازة احتمال مش هتكمل لو المشاكل زادت بينهم طبعا عملت نفسي مش عارفه حاجه وقولت لها مالك يا مرات عمي القمر زعلان من ايه اوعي يا عمي تكون مزعلها دى هى الخير والبركة ونصك الحلو
عمي….
والله يا بنتي ولا زعلتها ولا حاجه هى لوحدها كدا مش عارف مالها
نهي….
بس أنا عرفت يبقي علشان مش بتخرجها لها حق تزهق من قاعدة البيت وفتحت شنطتي وطلعت مئة جنيه وقولت لها اتفضلي يا قلبي دى لكي ملهاش دعوه بمصاريف البيت هاتى أى حاجة ممكن تفرحك مش عاوزة اشوفك زعلانه تاني انتى عارفه أن أمى ماتت وأنا من بعدها اعتبرتك امي وانت يا عمي في مكانة أبويا وأنا ربنا عوضني بكم وربنا يقدرني وأرد جمايلكم عليا
مرات عمي…..
حبيبتي يابنتي ربنا يسعدك ويخليكي ليا يارب سبحان الله أوقات ربنا بيسبب الاسباب علشان يشيل الغشاوة من ع عين الواحد
نهي….
طب يلا بقي قومى البسي وأنت يا عمى قوم خرجها اتمشوا في أى مكان لحد ما تهدى أعصابها وأنا هعمل الأكل واوضبلك البيت ولما اخلص هتصل عليكم ما أنا جبت موبيل اهو علشان بينفعني في الشغل
وروحت شلت السجادة وجبت جردل ميه رميته ع الأرض وقولت لهم يلا انتوا اخرجكوا ورايا شغل كتير ولازم اخلص قبل المغرب علشان عندى درس
مرات عمي…..
ده تعب عليكي يابنتي ملكيش حق انتى جايه تقعدى معانا ولا تهدي حيلك في شغل البيت
نهي….
بلاش الكلام اللى يزعل ده هو أنا مش بنتك ولا ايه وبوستها 😘 ودخلت ع المطبخ وأول ما مشيوا كنت مجهزة عمل جديد بس المرة دى ل مرات عمي
ووضبت الشقه وعملت الأكل وروحت رشيت من العمل ع باب الشقه بعد ما حطيت طرحه مرات عمي اللى كانت لبساها فيه علشان العمل يشتغل عليها هى وبس واى حد تانى يمشي عليه ميحصلش معاه حاجه وبعد كدا غسلت الهدوم ونشرتها وروحت عند سرير عمى وفتحت خياطه المرتبه اتجاه اللى بينام فيه عمى وحطيت عمل تاني بس بالكرا’هية من سمر بنت أخت مرات عمي اصل أنا لما اخدت فتله الشراب قطعتها تلات قطع صغيره
قطعه عملت بها العمل ل سمر والقطعه التانيه العمل ل عمي وقولت احتفظ بالقطعة التالته محدش يعرف الظروف وخيطت المرتبه تاني بدقه شديد علشان ميبنش أى حاجة واتصلت على عمي قولت له أنا خلصت كل حاجه والأكل فضله نص ساعه ويبقي استوي ع ما توصلوا يكون جاهز وظبطت نفسي بعد البهدله بتاعه التنفيض ولقيت سعيد ابن عمي وصل
سعيد….
نهي عامله ايه اومال فين الجماعه أنتي لوحدك هنا
‏
نهي…
اة لوحدى بصراحه لقيت مرات عمي شكلها زهقان قولت ل عمي خدها خرجها شويه وقولت أنا اروق البيت واجهز الأكل يمكن أقدر افرحها
سعيد…
أنتى ملاك من السماء يا نهي ع فكره أنا زمان مكنتش اعرفك كويس بس لما جيتي تعيشي معانا لقيتك هاديه ومطيعه وكمان قنوعه جدا ويمكن دى اكتر الصفات اللى عجبتني فيكي ده غير أنك جميلة يعني فيكي مواصفات يتمناها أى شاب وأنا علشان كده عاوز اتاكد من حاجه
نهي….تتأكد من إيه
سعيد…. أنا عارف أن البنات في فترة الجامعه بيكون في ارتباطات بينها وبين زملائها قصدى يعني أنتى بصي أنا عاوزك تصرحيني ومتخا’فيش مني
نهي….
سعيد أنا فهمت أنت عاوز تسأل عن ايه وابسط اجابه أن عمي كان معاه مواعيد محاضراتي واوقات كتير كان بيجي الجامعه يوصلني من غير ما يقولى واوقات كان بيدخلي ينتظرني أمام قاعه المحاضرات ولسه بس انهاردة جيبت موبيل وجيت علشان أعرف عمي رقمه يبقي ارتبطت امتى وازاى
أنا يا سعيد واخده عهد ع نفسي أنى أحب الشخص اللى هتجوزه ومش هسلم قلبي لحد غيره
سعيد….
أنا اسعد واحد بالكلام ده …. نهي أنا أنا عاوز اتجوزك أنا معجب بكي من قبل ما كنت اسافر بس قولت انتظر لما تدخلي الجامعه واكون أنا رجعت واشتغلت هنا قولتي ايه
نهي….
سعيد أنا مش عارفه اقولك ايه أنا دايما بسمع مرات عمي بتقول أنها هتجوزك سمر بنت أختها وخايفه تقول عليا أنى خطفتك’ منها وأنت عارف أنا ماليش أهل غيركم
سعيد….
أنا استحاله اتجوز حد غيرك المهم عندى موافقتك أنتي
نهي….
أنا موافقه يا سعيد أنت إبن عمي واكتر واحد يحافظ عليا وكمان أنا واثقه في اخلاقك بس عندي طلب استني شويه لحد ما موضوعك مع سمر ينتهي خالص مش عاوزة حد يفهمني غلط ولا مرات عمي تزعل مني وأنا بعتبرها أمي
سعيد….
وأنا هنفذ طلبك ومش هجيب سيرة نهائي لحد ما الموضوع كله ينتهي وكفايه عليا أنى عرفت بموافقتك بقلم رشا منصور هاتي رقم موبيلك وخلي بالك من اللحظه دى أى خطوة واى حاجه تعمليها تبلغيني بها أول بأول ولو قولت ع حاجه لأ تبقي لأ فاهمه
نهي….
عملت نفسي مكسوفه وقولت له حاضر واديته الرقم وقولت له لازم امشي قبل ما عمي ومرات عمي يوصلوا وأنت قولهم انك قابلتني ع السلم وأنا ماشيه يلا سلام وع فكره أنا عندي درس كمان ساعه هعدى ع البيت اغير هدومى وانزل ع طول ومشيت
مشيت وأنا من جوايا حققت اللى أنا عوزاه سعيد ده من حقي أنا وهيكون ملكي لوحدى وكان لازم اكسب قلبه من غير سحر’ عارفه أن في منكم هيقول عليا خبيثه مش مهم أهم حاجه إني اخدت قلب سعيد ولسه لما العمل يشتغل
وخدت بعضي وروحت البيت واخدت شاور ونزلت روحت عند الست لواحظ وطبعاً سايبه عندها العبايه السودة والطرحه ع الرغم أن بقي ليا زبايني بس أنا كنت بختار ناس معينه يعني الجماعه الاغنيه والمثقفين وبالذات اللى من محافظات تانيه
وخلصت مع الزباين وطلبت من الست لواحظ تعلمني إزاى أعمل اعمال الربط
دى إكتر حاجه الناس بتشتكي منها رغم أن أوقات كتير بيكون السبب نفسي مش إكتر أو بسبب مس عاشق لكن مش بيكون في أعمال لكن ع مين أنا كنت عندى القدرة أقنع الشخص أن اقرب حد ليه هو اللى عمله كدا …..