رواية بن أسود الفصل الثالث 3 بقلم رويدا القاضي

رواية بن أسود الجزء الثالث

رواية بن أسود البارت الثالث

رواية بن أسود الحلقة الثالثة

تمت الحفلة وبدت الناس تروح …
صالحة: اطلعي روحي انتي وكيان مع علي انا وعمتك بنقعدو باش ناخدو باقي الحاجات متعنا.
مرام: نبي نقعد معاك.
خديجة: روحي سلم بنتي ماتخلوش الحوش فاضي بروحه.
كيان: هيا ألبسي عبايتك علي يستنى فينا في السيارة .
مرام: تمام لكن ماتطلعوش علينا هلبا.
واحنا طالعين في امان الله طالعة ورانا أخت سندس للي كانت تموت في حاجة اسمها علي تعفسلي ع نهاية العباية تنفتح كلها وكانوا فيه شباب برا وعلي منهم انا قريب متت كلي ع الشارع بسرعة لميت العباية سكرتها وكيان تطلتم …..
في لحظات سمعت سحب سلاح لما الشباب بدو يلقحواا.
معتصم: نزل السلاح متعك بدير مشاكل ع خاطر مفرخ .
علي: تسمع فيهم شن يقولو ولا اطرش روحوا مانبي نشوف حد اهنيا.
كيان: راك تفكري ترجعي للصالة داخل تعالى معاي لسيارة علي.
مرام: توا تشوفي شن ايدير فيا ياحليلي يارب فوت الليلة ع خير.
كيان: مش عارفة علاش نحس فيا دارتها الحركة مقصودة.
مرام: توا مقصودة ولا.لا المهم هيا صارت وقعد جسمي ع الشارع.
كيان: لكن ماتخطبكش نصف شباب الزنتان ع للي شافوه اليوم تعالي حاسيبني .
مرام: هذا كان قعدت عايشة باش يخطبوني.
كان قيس خوه من ضمن للي مقعمزين وانا طالعة…
عمري ماننساه هذاك الموقف لين نموت….
كيان: هيا تعالى لسيارة بسرعة قبل مايولي عليك.
ركبنا السيارة والطريق كلها وهو يخبط ع الستريسو ويعيط……
علي: فاهمة شن درتي قبل شوية ولا عندك عادي انت الموضوع للي صار.
مرام: والله وحدة عفست عليا باش نفتحت.
علي: مانفهمش انا مش قادرة تلبسي القفاطين مش لازم حتى سروال يشكرو فيه وبعدين من توا جو حلقة في خشمك وخلاخل في رجلك والعار اهو فوتيه قاعد مانبيش نمد يدي عليك .
كيان: نسمع وساكتة نخاف نتكلم يفش فيا غله.
وهو في نص الكلام رن عليه قيس.
علي: الو خيرك شن فيه.
قيس: وصلت للحوش جايك نبيك في موضوع مهم
ضروري.
علي: شن فيه والله ماني ناقص مواضيعك توا اجلها.
قيس: لالا،مش حشيش ونفخ اطمن .
علي: نوصل للحوش وساهل.
كيان: في خاطري ربي يستر قيس مستحيل ايجينا إلا كان وراه موضوع وانا نزبطه.
مرام: ماقدرتش نسأله ونقوله هذا خوك متع المشاكل لانه نعرف انه مش طايق يسمع كلمة مني ندمت ع اللحظة للي فكرت نلبس فيها فستان تصرف اخت سندس نحسه مقصودة حركتها للي دراتها …
علي : انزلي اقلبي وجهك انتي وياها من السيارة ….
مرام: ع كثر ماهو قاسي عليا عمره ماكلمني بالأسلوب اهو وجعتني نفسي نزلت خشيت طول لدار البنات وقعدت نبكي.
كيان: سنين عشيتهم معانا مازال مش متعودة ع طبعه امسحي دموعك وتعالي نشوفو شن بنديروا توا قريب تروح امي وامك.
في الوقت هذا روحت صالحة وخديجة من الصالة ….وصلت الساعة 1 في الليل الجو هادي والكل مجتمعين معتصم ومحمد والبنات وصالحة وخديجة ومعاهم علي…..
قيس: علي ياعلي…..
معتصم: خلي نمشي نشوفه شن يبي هذا .
علي: خليك توا نطلعله انا من بكري قلي بنجيك.
صالحة: نحس في روحي جعت هلبا نوضي ياكيان انت ومرام سخونوا الماكلة .
محمد: حتى انا مصاريني بيلصقوا من الجوع.
كيان:😁 ع قولت السوريين خسى الجوع واختك وبنت خالك موجودة.
مرام: واحنا في المطبخ نجهزو في العشاء كيان كأنه صوت علي عالي شن صاير.
كيان: اوف هذا قيس وسريب الحشيش متعه مازال تسألي انت امتا بتتعودي .
قيس: خوي انا جايك في موضوع نعرف مستحيل يتمه حد غيرك ولازم تفريلي فيه…
علي: احكي شن فيه .
قيس: البنت للي قدام الصالة انفتحت عبايتها نبيها وسالت امي وقالت بنت خالك .
علي: 😡 قصدك انت تحكي ع مرام .
قيس: اسمها حلو …
علي: شن تقول هاذي تحرم عليك زي ماحارمة عليك كيان ويارا….
قيس: علاش تحرم عليا هاذي مش اختي .
علي: اسمع ياقيس انت خوي ع عيني وراسي وين اطيح تلاقاني في ظهرك ويوم تميل بيك الدنيا انا نعدلها ورقبتي اطيح قبلك ..
لكن قولي تقدر تاخد وحدة خوك ايحبها ومحافظ عليها السنين هاذي كلها .
قيس: انا مانعرفش انك تحبها بكل لو نعرف اكيد مستحيل نقول الكلام هذا.
علي: رد بالك ياقيس مازال تفكر فيه الموضوع هذا حتى بينك وبين نفسك انساه.
قيس: حاضر ربي يخليكم لبعض.
علي: حسيت بكسرة الخاطر للي قيس فيها حضنته والله ولو طلبتني في الدم للي في عروقي نسحبه ونعطيهولك لكن الله غالب ياخوي طلبتني في الشى للي ماينعطاش.
قيس: جيت طالع 😁😁 اصلا نسيت حتى علاش جيتك .
علي: اقعد هدرز العيلة داخل يسخنوا في العشاء تعشاء معانا ….
قيس: لابارك فيك امك بارك فيها بعتث عشانا مع امي.
مرام: كيف حطيت السفرة وبنقعمز ناكل معاهم سمعت صوت علي ايضبح عليا…
صالحة: نوضي شوفي علي شن يبي.
مرام: تمام طلعتله لقيته واقف برا…
علي: الحقيني نبيك في السيارة.
مرام: اول مرة يقولي هكي ركبت معاه في سيارته المصفحة شن فيه شغلتني.
علي: بعيد ع للي صار اليوم انتي شن تشوفي فيا.
مرام: الغبي المتعجرف ولد عمتي النكد.
علي: ماتبيش تعرفي شن نشوف فيك انا.
مرام:😳 اه .
علي: شديت يدها وحطيتها ع قلبي نشوف فيك حبيبتي ومرتي نشوف عرضي وشرفي .
مرام: انا من الصدمة نرعش معاش عرفت حتى شن نرد عليه.
علي: العيلة كلها ملاحظين حبي ليك الناس كلها تشوف في اهتمامي بيك الا انتي غبية.
مرام: وهو قاعد يتكلم طلعت كيان تنادي عليا سبلة ولقيتها باش ننزل ونتهرب منه…
علي: توا كان واقف نهزب فيك راهو مادورك حد وتوا مش عارف من وين طلعتلي كيان .
مرام: نزلت نجري وانا وجهي مايتفسرش لونه ونرعش وصلتها …
كيان: خيرك شن فيه شن صاير.
مرام: خوك خوك ….
كيان: حي عليا شن درالك المرة هاذي.
مرام: قلي نحبك ونبيك.
كيان: روووووري هاذي اللحظة للي نستنوا فيها.
مرام: سكري فمك فضحتني ياحيوانة .
علي: من تزغريت كيان عرفت انه مرام حكتلها ع للي صار بينا.
في حوش سميرة….
كامل: شن صار كلمت خوك حبيبك عليها….
قيس: بنرقدماعنديش خلوق نتكلم توا ولا نتناقش مع حد بكل ….
سميرة: خليه خيرك منعج مش هذا خوك للي ماتبيش تورطه معاك ونيته صافية وحرام تعامله بخبث.
قيس: ايه خوي شن تبي انت ننكر انهم خوتي مشاكلك مع راجلك للي تزوج عليك هاذي مشكلتك مع خديجة مش مشكلتي انا بكل…
كامل: احترم نفسك وانت تتكلم مع امك.
سميرة: خليه خسارة ماجبت وربيت خابت فيه الرباية.
قيس: عليك رباية لو ربيتني ع الصح راهو مش هذا حالي مخروم بسم الهاري اهو.
صالحة: خيرك عطلتي شن يبي علي .
مرام: في خاطري وقته السؤال هذا توا يبي نديرله قهوة .
صالحة: عامين ع قهوة.
مرام: ماهو بسلامته لازم منها المق الأول ينكب بسبلة مش حلو …
علي: خشيت لقيتها تتلعثم وتكذب سكتت فهمتها مازال ماتبيش من يعرف خليت العيلة ناضوا جيت جنبها سألتها علاش ماقلتيش للي صار بينا علاش كدبتي عليهم.
مرام: لانه لو عرفوا يمنعوني نقعد عندكم وانا تعودت عليك في يومي…
علي: وعلاش ساكتة صار تحبيني وساكتة غبية من يومك.
مرام: لالا. توا لو سمحت غير اسلوبك معاي لانه وضعي معاك توا يفرق ع قبل.
علي: حاضر أي طلبات ثانية.
مرام: لعند توا هكي وخلاص طلع علي وحطيت رأسي ع المخدة بديت نراجع في شريط الذكريات وكيف يتصرف معاي من وقت كنا صغار طلع مش غير هو يحبني كرهي لتصرفاته ورغم معاملته كنت قابلتها وع قلبي زي العسل ماهو حقيقة إلا قبول لوجود علي في حياتي….
خديجة:شن زيدو اقعدو معانا شوية والله ماشبعنا منكم.
صالحة:كان جت عليك انت تقولي اقعدو معاي ديما هيا مرام جهزي نفسك لميت حاجتي ومروحة غصب ركبت السيارة وعقلي وقلبي معاي علي….
حاتم: خيرها أميرتي مضايقة من مضايقك…
مرام: حد ..
مروى: انا نقولك يابابا مرام مازال تبي تقعد في حوش عمتي لكن ماما روحت بيها غصب.
صالحة: ياسرها عاد.
حاتم: انا خلي دلوعتي زعلانة توا نردك ولا يهمك ولما تبي تروحي كلميني طول.
مرام: فرحت لانه بنرجع حوش عمتي وفعلا لف بابا ورجعني وروح.
علي: وليتي.
مرام: ايه قت لي بابا مانبيش نروح ردني .
علي: لالا هكي هلبا خالي يفسد فيك بالدلع.
مرام: سكتت وشفتله 😏والمقصد.
علي: ادللي نوعدك ندلعك أكثر منه.
وفات أسبوع بعد العرس تقول حلم مش واقع لين جاء هذاك اليوم للي مستحيل ننساه.
خديجة: علي نبو نزوقو الحوش قداش ليكم واعديني بيه .
محمد: شن رأيك نديروها بالجو ونزوقوه احنا بروحنا بدون مانجيبوا حد.
معتصم: جو العائلة السعيدة اهو طلعوني منه.
محمد: علاش ان شاء الله محسوب علينا راجل ولا بنت.
معتصم: ماعنديش وقت قعمزوا توا نجيب عمال وخلاص.
كيان: انا نزوق معاكم .
مرام: حتى انا .
علي: برا اقلب وجهك لانبوك انت ولا عمالك .
خديجة: هيا قهوة باش تعدلوا روؤسكم وتزوقوا صح زي الناس.
كيان: ماما امتا بتروح يارا من تونس الحيوانة استاحشتها.
محمد: سكري فمك اختك وصلت حوشها تحسابيها بدير علينا طريق.
علي: بتخدمي ولا نكسر رأسك .
خديجة: قولي ياعلي معاش كلمك قيس قداش ليه بالك صاير معاه حاجة.
علي: تبي الحق ارتحت من دوشته وصداعه ومشاكله.
خديجة: في هاذي صدقت.
مرام: قربت منه يبي نولعله دخانه وكان كل واحد مشغول في الخدمة.
علي: مافيش حاجة تعرف المعنويات وتخليني نخدم بسعادة.
مرام: تعالى نقولك حاجة سر بيني وبينك.
علي: قووووولي.
مرام: نحبك ونموت فيك.
علي: ذبت انا فشلت معاش قادر نخدم بكل.
كيان: 😏😏 ايه هاذي خدمتك انت وياها قصدك هكي بتفوت.
مرام: مسمومة.
محمد: ياسر اليوم خلي نوقفوا من الصبح لعند العصر هلبا راهووو.
خديجة: تمام اعفاء انزلو …
محمد: الحمام الخارجي راهو يخشه حد بندوش وبنطلع.
خديجة: وانا الداخلي .
علي: ايه وانا البنقلا للي يقعد يستنى فيكم
مرام: هههههه دوش في حمام البنات فوق.
كيان: مصح وجهك معاش نسمعك تقوليها الكلمة هاذي بكل .
علي: غير انا توا نجريله ع اساس.
مرام: هيا انزل كل واحد امشى لمكانه وعلق فيها هاتف علي معاش سكت وهو يرن….
علي: مرام ايديا امسخات افتحيلي الهاتف وحطيه ع وذني….
مرام: حاضر فتحت الخط ودرت كيف ماقال هو.
علي: اه …😡 وين انت توا اهو جايك …
قيس: بنموت ياعلي….
مرام: شن فيه ياعلي من للي اتصل بيك.
علي: هذا قيس خويا مضروب لازم نمشيله.
مرام: هو ماشي يجري لسيارة وانا وراه ….اخر كلمة سمعتها منه ردي بالك ع روحك …
وطلع علي ومعاه سلاحه انا نجري زي المذبوخة بين عمتي ومحمد ونعيط نقولهم الحقو علي الحقو ماشي لقيس ومعاه سلاح….
خديجة: خيرك شن فيك يامرام.
مرام : علي طلع راهو بسلاحه اتصل بيه خوه قيس .
خديجة: يامحمد ياولدي يامحمد ألحق خوك ربي يستر ياحليلي انا عارفة ولد سميرة مستحيل يرتاح لين يقطع رقبته.
كيان: الو معتصم اتصل بعلي وشوفه وينه راهو طالع بسلاحه .
مرام: أول مرة نحس بحرقة القلب شعور مش معروف بين الخوف والقلق …
كيان: نوضي خشي داخل كان مش ع خاطرك ع خاطر عمتك للي مشغول داخل.
مرام : لالا خليني لين يروح علي.
كيان: نوضي معقولة علي بيقبل تقعميزتك هنيا قدام الناس .
مرام: علاش مايردوش لامحمد ولا معتصم.
كيان: أكيد يحلوا في مشكلة قيس ماتخافيش…
أذن المغرب خشيت نصلي وانا ساجدة في الركعة الاخيرة ندعي ربي يرجعه سالم وانا كيف سلمت سمعت صوت عمتي تعيط والاولاد يكلموا فيها….
مرام: علي ياعلي طالعة نجري نضبح عليه.
خديجة: جت تجري حضنتني علي مضروب في كتفه ادعيليه ادعيله يامرام.
مرام: من الصدمة جيت مقعمزة ع اركابي.
معتصم: يامرام ماتخافيش شوية اهو وبيروح .
مرام: وانا مقعمزة بويا شوية وجاء وامي وتعبأ الحوش
في دقايق ….
واحنا مقعمزين نسمع في صوت تليفون بابا يرن وكأنه العالم كله سكت في لحظات .
حاتم: لا إله إلا الله ياربي صبرني نكسرت في فزعتي يارب.
خديجة: لالا. اسكت ياحاتم اسكت كذب ايخيطوا فيه شوية وبيروح.
معتصم: اه يما اه راح راح للي كان رافع الحوش ومتحملنا من مازال بيتحملني من مازال بيفزعلي.
محمد: اعقل يامعتصم اسكت .
كيان: يامرام مات للي يبيك من مازال بيحاسبك عيطي ابكي علي راح علي معاش موجود من بيقولك ديرلي قهوتي مع من بتتعاركي .
مرام: ولا دمعة نزلت مني جمد كل شئ في نظري فجأة وكأنه تجردت من العالم في أقل من نصف ساعة جابوا سيارته …
طلعت نجري نذكر في الكلام للي صار بينا في السيارة ولما قلي نبيك مرتي …
الكرسي عليه دمه سلاحه مازال في السيارة شديت سلاحه فكرت نقتل روحي حتى في هاذي طلعت فاشلة
معتصم: ع خاطر امك وبوك واحنا 😭كان ضعفتي انتي
من مازال بيقوينا…
مرام: ارفعني نشوفه ورأسك بالله عليك يامعتصم راني مخنوقة بنموت.
كيان: جيتهم نبكي احضنت مرام ارفعني معاك وراسك.
معتصم: نحس في دموعي ينزلوا سخونات ع خدودي ندمت ع كل كلمة وكل مشكلة صارت بينا .
ياريتني قعدت معاهم لما يزوقوا أقل راني شفته في أخر ساعات ليه في الدنيا للي صار كله تقول حلم نستنى امتا نفيق منه….
صالحة: عمتك تبيك تعالي اهدئ سلم بنتي الموت علينا حق.
مرام: ضعفت طحت في حضن امي مانقدرش ياماما راني نحبه كيف بننساه.
صالحة: قضاء الله وقدره ربي يعوظك ويعوضنا فيه خير يارب.
مرام: مانبيش عوض في غيره نبيه هوا.
فاتت الليلة كلها وانا راقدة في حضن امي ونبكي عمتي الليل كله وهيا تلف هنيا كان واقف يشرب في قهوته هنيا وين يقعمز يهدرز عليا هذا المق متعه هذا شبشبه
ياربي من بيناشبني .
مرام: الليل كله وانا نستنى في الصبح امتا يطلع وايجيبوه للي تقهر في الموضوع قيس الحقير ماصارله شئ الا جرح بسيط….
معتصم: ياريته سمع كلامي يما تعرفي كيف مات علي .
خديجة: اه ياربي كيف بنقول مات .
محمد: اتصل بيه قيس قله تعالى ضربوني في رجلي .
معتصم: ماقتلاته الا طيبته جاء نازل ومخلي سلاحه في السيارة يجر في قيس بيركبه ضربوه برصاصة من الخلف.
محمد: وياريته سعف نفسه لاخر لحظة رفع قيس ولما وصل كان نازف دم هلباااا.
كيان: ياسرنا كبدي انحسنت.
مرام: وصلت الجنازة وجابوووه ع اكتافهم اه ياعلي اه..
معتصم: بالله وسعوا خلو العيلة يشوفوه بس علاش الزحمة.
كيان: دخلوه لي للمربوعة خشيت شفت وجهه تقول راقد ويضحك بست ع جبينه.
خديجة: خشيت حضنته وضميته لصدري وكأنه قاعد بيبي.
مرام: لما جاء دوري بعدوا الكل وخلوني معاه ماقدرتش نقرب ونبوسه ولا نلمسه لانه مغسلينه وانا مش محرم ليه حرام نلمسه وقفت بعيد ودموعي ينزلوا توصي فيا نرد بالي ع روحي وانت نسيت ترد بالك ع روحك…
مش قتلي نبيك مرتي لمن مخليني نوض رد عليا قولي مش مسيبك من عندي بعدك انا.
معتصم: قطعتلي قلبي خشيت حضنتها ربي يصبرك ويصبرنا يامرام ادعيله بالرحمة بس توا…
محمد: خلاص اطلعي بنطلعوه …
وهما رافعينه وانا نجري وراه لين اغمى عليا من العياط ….وكانت خسارة علي أول درجة ليا في سلم الخسائر…