رواية في زمن الحب الفصل الثاني 2 بقلم همس كاتبة
رواية في زمن الحب الجزء الثاني
رواية في زمن الحب البارت الثاني
رواية في زمن الحب الحلقة الثانية
جاسر ببرود : و بعدين .. كل شوية واحد ورا التاني .. من غير كلام مش هرجع يا محمد
محمد : يا ابني قولي اتفضل و بعدين اتكلم
دفع محمد جاسر و دخل
جاسر : اخلص ورايا شغل
محمد : يا عم انت لسانك ده مش هتلمه … ده انت مضيع نفسك و مضيعنا معاك
جاسر بحدة : محمد
محمد : يا جاسر انا اكتر حد فاهمك و مقدر موقفك … بابا كان فاكر انك هتقعد يومين تلاتة و ترجع … بس مش اربع شهور غايب و مش بتكلم حد فينا … يعم فين صلة الرحم ع الاقل
جاسر بهدوء : ما تنساش ان بابا هو الي حطني قدام الامر الواقع و هو الي خيرني و انا اخترت الانسب ليا
محمد : انا فاهمك يا اخويا … و عارف انها مسألة مبدأ … و انا مش جاي اقنعك توافق تتجوز يارا … بس و الله الشغل من غيرك زي قلته … انت دماغك عالية و دائما قراراتك الاصح … عمي حاليا مش عارف ياخد اي قرار سليم
جاسر بانفعال : عمك ده انسان استغلالي … عايز يستغل وضعنا المادي و شغلنا معاه لصالحه و لصالح بنته … عمك ده بياخد افكارنا بشوية ملاليم اخر الشهر و هو بيروح يبعها بملايين و بالاخر لو حد احتاج حاجة لازم ينكسرله و ينذل عشان يديه …. ده حتى مستخسر الدوا بامه ما بالك اولاد اخوه
محمد : و انا معاك بكل كلمك قولتها …. انا مش عايز اقنعك بحاجة لاني عارف انك صح … بس انا جاي اطلب منك تشق علينا من اليوم للتاني و تشوف تيتة و تطمنها … و نصيحة مني ابتدي شغل جديد و لوحدك اشتغل الحاجة الي انت بتحبها .. و انا بعد فرحي هقدم استقالتي و اشتغل معاك و انا متاكد منك يخويا و عارف جاسر مش بيستسلم
جاسر بابتسامة : انت جدع اوي يا محمد .. و الله كل ما بقعد معاك برتاح و بتطمن
محمد : انت صاحبي و اخويا و لو انا مكنتش بصفك مين هيوقف معاك
جاسر : عقبال ما نشوفك احلى عريس … ايه امته الفرح
محمد : لسا ما اتكلمتش مع اهلها بالموضوع ده .. باباها دماغه ناشفة اوي و عايز الخطوبة تتم سنة كاملة
جاسر : ربنا يهديه و يتمملك على خير
محمد : آمين …. طب انا هروح بقا .. عايز انام مطبق من امبارح ما نمتش
جاسر : ماشي
********************
عند حياة
كانت تجلس في غرفة الضيوف تضيع قدما فوق الاخرى و تهز بها و مقابلها شاب يرتدي بدلة رسمية و معه والدته .. كانت والدتها تعطيها تلك النظرات الثاقبة و تحرك حاجبيها بعدم رضا
انزلت قدمها و نظرت الى ذلك العريس بنظرة تفحص و هو توتر من نظراتها
اليسار بغرور : انا ابني بيشتغل مع باباه في الشركة و عنده شقة باسمه و عربية يعني جاهز من كله يا مدام كريمة
كريمة بابتسامة : ما شاء الله ربنا يخلهولك
اليسار :ميرسي … هو بصراحة شاف الانسة حياة بالكلية و عجبته اوي مع اني كنت ناوية اجوزه لبنت اختي بس هو مش عايز غير بنتك … من بعد ما شافها و حاله متشقلب و ابني شاب عاقل و يعجبك
ابتسمت حياة و قالت بسخرية : و الله ؟ طبعا ما القرد بعين امه غزال
اتسعت اعين اليسار من الصدمة
شهقت كريمة و قالت بتوتر : هي مش قصدها حاجة ما شاء الله عليكم … ان شاء الله هنفكر و نردلكم خبر و لو حصل نصيبب هكلم قرايبنا و يبلغوكم
اليسار لوت بوقها و قامت و قالت بغرور : ان شاء الله .. عن اذنكم
بعد دقائق
كريمة بغضب : انتي ايييه ؟؟ لسانك ده مش هتلميه ؟ ده سابع عريس تطفشيه ببرودك و قلة ادبك .. انا مربتكيش كدة
حياة بقرف : مهو عيل ملزق و امه ست بيئة و عمالة تتفشخر بنفسها تقولي ابنها سي السيد
كريمة بنفاذ صبر : انا هتجنن من عمايلك .. دي عمايل بنت مؤدبة ؟ جبتيلي القلب يا ولية … انتي ايييه ؟؟ جبلة ما بتحسيش ؟؟ يا بت انا هموت ناقصة عمر من عمايلك
تقدمت حياة من والدتها بسرعة و حضنتها بقوة و قالت : و النبي ما تزعلي يا كوكو و انا مين ليا من بعدك يا جميل
كريمة نفضتها و قالت : ابعدي شوية هتعصريني … مهي دي المشكلة عايزة اطمن عليكي … اخواتك كلهم اتجوزو و ارتاحو بس فاضل انتي … و انتي مش عايزة تتجوزي انا خايفة عليكي من الدنيا يا حياة
حياة بصدمة : يماما انا عندي 20 سنة و 7 شهور وتلات ايام يعني بدري اوي على الجواز و بعدين الدنيا حلوة و الحياة ماشية ليه خايقة
كريمة بتعب و خوف : العمر بيمر قدامنا من غير ما نحس .. خايفة اموت و انا مش مطمنة عليكي … خايفة اسيبك بالدنيا لوحدك و الزمن ده ما بيرحمش يا بنتي
حياة بتاثر : بعد الشر عليكي يماما .. ربنا يمد بعمرك لغاية ما تشوفي احفاد احفادي .. بس يا كوكو هعيط خلاص افردي وشك
ابتسمت كريمة و قالت : بس فعلا الست دي كانت رخمة اوي يا ساتر
حياة بضحك : لا و بتحملنا جمايل انها جايالنا و سابت بنت اختها
كريمة : بالناقص منهم .. المهم خشي حضري الغدا و وضبي الشقة الضيوف زمانهم على وصول
حياة : ضيوف مين ؟
كريمة بتوتر : احم بصي هوواا
حياة : ربنا يستر في ايييه ؟؟؟ اوعي الي بفكر فيه يكون صح
كريمة بابتسامة : ايواااا هو ده
حياة بشلل : ععععريس تاني ؟! تاني يماما ؟؟؟
*********************
يارا : كل ده و انت مش عارف تقنعه يا بابي .. و بعدين بقا انا مش هصبر كتير يا اما جاسر يخطبني و الا و الله هسحب كل فلوسي من الشركة و هستقيل
سالم : انتي بتقولي ايه يا يارا … جاسر كدة كدة هيتجوزك … لازم يقتنع … المهم انتي ما تزعليش نفسك يا حببتي … و كل حاجة هتمشي زي ما انتي عايزة بالزبط
دلفت تمارة و قالت بانفعال : هو ايه الي هيا عايزاه هيحصل … بطلو حب التملك الي عندكو ده … جاسر مش بيطيقك افهمي بقا
يارا بزعيق : و انتي مالك … هيحبني و هتشوفي … خليكي بنفسك بس .. شوفت يا بابي
سالم : تمارة اعتذري لاختك حالا
تمارة بصدمة : اعتذر ؟ … هو حضرتك دايما كدة شايف يارا بنتك و انا لا
سالم : اهي اسطوانة كل يوم
يارا : دلوقتي هتدينا محاضرة و تطلع البريئة المظلومة ام قلب ابيض
اتت والدتهن نجاح و قالت : و بعدين بقا كل يوم هتشدو في خناق بعض كدة .. عيب كدة يا بنات يلا اطلعو اوضتكم و اتصافو و اتصالحو انتو اخوات و مهما حصل لازم تكونو سند لبعض
تمارة : اتفضلي يا كبيرة
يارا بابتسامة : يلا تعالي .. و الله بحبك يا قمراية
تمارة : و انا كمان ده انتي قاعدة بقلبي و متربعة
بعد شوية
نجاح : جرا ايه يا سالم انت هتحط عقلك بعقل بناتك … حرام عليك انت كل مرة بتكون سبب الخناقة ما بينهم … و بعدين قولتلك مية مرة ما تطبلش للبت يارا و تعملها الي عايزاه .. هتبوظ البت بعمايلك
سالم : يارا تستاهل يتنفذلها كل الي عايزاه .. بنتك ذكية و قادرة و هي الي مشية الشغل عندي مقدرش ارفضلها طلب
نجاح : يا سالم يارا بقت عنيدة اوي و كل حاجة بتمشيها على مزاجها … انا ما انكرش انها شاطرة بس كل حاجة ليها حدود .. و صدقني جوازها من جاسر ممكن يدمرلها حياتها .. الراجل مش بيحبها .. و هو اصلا بيشتغل معاك بالعافية و انت عارف الكلام ده كويس
سالم : انا عارف انا بعمل ايه و يارا ماشية صح .. انتي الي مش فاهمة حاجة
نجاح : ماشي يا سالم .. بس خلي بالك انا استحالة اسمحلك تبوظ تربية عيالي … و انا متاكدة ان جاسر لا يمكن يوافق على الي بتقوله
سالم : اهي مسألة وقت و نشوف مين الكسبان
*****************
في اليوم التالي
كانت حياة تمشي في الشارع
جاسر : انسة حياة
التفتت له و قالت : ايوة
جاسر : صباح الخير .. ازاي حضرتك
حياة بابتسامة : صباح النور .. انا كويسة .. اتفضل عايز حاجة ؟
جاسر : لا بس حبيت اسلم عليكي … هو انتي رايحة الجامعة مش كدة ؟
حياة : اه
جاسر : تحبي اوصلك ؟
حياة بصدمة : نعم ؟؟ توصلني ؟؟ هو انت تعرفني اصلا عشان توصلني ؟
جاسر : انا اسف لو دايقتك بس يعني عشان مشوارك في طريقي و صعب تلاقي مواصلات بالزحمة دي
حياة : لا شكرا حضرتك .. انا هطلب اوبر لو ملقتش مواصلات.. عن اذنك
جاسر : انتي زعلتي ؟
حياة ببرود : لا و عن اذنك بقا انا تاخرت
جاسر : طب انا اسف مرة تانية اتفضلي
حياة بنظرات ثاقبة : سلام
جاسر باستغراب : سلام
ذهبت من امامه بسرعة و هو كان في حالة استغراب
جاسر لنفسه : هو انا قولت حاجة غلط ؟ غريبة البنت دي
****************
في الكلية
وضعت الشنطة بعنف على الطاولة
ريم بخضة : في ايه خضيني
تمارة : مالك يا حياة
حياة : انسان بجح و قليل الادب … قال ايه تحبي اوصلك .. فاكرني من الاشكال الي يعرفها
ريم : هو مين اصلا ؟؟
حياة : واحد جارنا ساكن جديد .. امبارح خبطت بيه بالسوبر ماركت و فضل يفتح معايا حديث … و انا احترمته جدا … بس النهاردة الصبح قال ايه تحبي اوصلك بالعربية … السافل
تمارة : طب و فيها ايه الشب جنتل و حب يوصلك .. بس انتي الي نيتك عاطلة على طول
حياة : و الله ؟
ريم : بصراحة يا حياة .. عندها حق .. انتي ليه دايما دبش مع الرجالة ؟؟ حتى مامتك امبارح كلمت ماما و قالت عن عمايلك و كلامك مع العريس و امه .. يا بت عمرك ما هتلاقي راجل يحب الدبش ده … انفقي و خلصينا
حياة : هو انا كدة .. انا مرتاحة كدة .. ولا عايزة حد يحبني ولا نيلة .. المهم مالك يا تمارة مش على بعضك ؟ في حاجة مدايقاكي ؟
تمارة : طبعا مفيش غير الست يارا … البت دي هتشلني .. تخيلي امبارح بتقول لبابا انه لازم يخلي ابن عمي يخطبها غصب عنه… دي بتطلبه زي ما تكون عايزة حتة شوكلاتة او كيس شبسي
حياة بضحك : يارا دي حكاية … مع انها بنت حلوة و ناجحة جدا و انا بصراحة بحبها … بس ليه عايزة تمرمط نفسها كدة ؟
ريم : القط ما يحبش غير خناقه
تمارة : المصيبة انها عملتله مشكلة مع اهله و سابهم و طفش
حياة : المهم سيبك منهم انا هروح اجيب قهوة حد عايز ؟
تمارة : اه اسبرسو بليز
حياة : و انتي يا ريم
ريم : سادة طبعا
حياة : اوك
******************
عند جاسر
حاتم : بس يا جاسر يا ابني المصنع الي بتقول تمنه غالي اوي و انا مش معايا المبلغ ده … انا نفسي اشاركك و اقف جنبك و عارف الظروف الي بتمر بيها .. بس انا كل فلوسي مشغلها بالسوق و معيش سيولة دلوقتي
جاسر : بص يا حاتم بيه انا عارف ان حضرتك ناوي تشارك عمي بالمشروع بتاعه بس عمي دلوقتي شغله بقا بالنازل و انا حابب ابتدي بعيد عنه و عن بابا و حضرتك عارف كويس اوي انهم داخلين المشروع بخسارة …. حضرتك كدة بترمي فلوسك بمركب مخروم … انا مش هضغط على حضرتك .. و هديك فرصة تفكر .. انا معايا سيولة بس ناقصة و مفيش حد اقدر اشاركه بنفس الوقت احط ثقتي فيه غير حضرتك لانك في مقام ابويا و ياما اشتغلنا مع بعض
حاتم بتفكير : طيب يا جاسر انا هدرس الموضوع و بكرا هكلمك و اقولك
جاسر : تمام كدة … عن اذنك
حاتم : لا مش هتخرج من غير ما تتغدا معانا
جاسر بابتسامة : تسلم و الله بس انا بجد واعد ناس ع الغدا و مقدرش اكنسل
حاتم بابتسامة: ايه المرادي بجد و لاااا
جاسر : انت عارفني كويس عمري ما كنت من جماعة ولا
حاتم : حس كدة بقا ربنا معاك يا بطل
ركب في عربيته و سرح شوية و بعدين ابتسم و انطلق
تمارة : انا هروح الجيم يا بنات تيجو معايا ؟
ريم : انا مقدرش النهاردة بودي معزوم ع العشا عندنا ولازم اروح اجهز نفسي
تمارة بتريقة : بودي !! ماشي يا بتاعة بودي .. و انتي يا حياة ايه النظام ؟
حياة : لا انا تعبانة و عايزة اروح انام شوية
تمارة : اوك طب تحبو اوصلكو ؟
حياة : لا انا لسا هطبع شوية ورق
ريم : خلاص تعالي وصليني يا تمارة يلا
تمارة : Let’s go
مر وقت قليل
كانت تمشي حياة بالشارع
حياة بتعب : هفف .. امته هخلص من ام الفرهدة دي .. قال علم قال … و الله شكلي هسمع كلام ماما و اتجوز الواد العرة بتاع الحلويات … منا لازم اتلم اومال هفضل اتشحطط كدة .. ياما كان نفسي ادخل هندسة … بس هو انا كدة فقرية … المنحوس منحوس لو علقو على راسه فانوس
جاسر : هو انتي دايما بتكلمي نفسك و انتي ماشية ؟ ……
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية في زمن الحب)
