رواية حكاية شمس الفصل الأول 1 بقلم سلمى سمير

رواية حكاية شمس الجزء الأول

رواية حكاية شمس البارت الأول

رواية حكاية شمس الحلقة الأولى

مساء الخير انا عايزه اعرفكم بنفسي بدون مقدمات كده
هحكيلكم حكايتي انا شمس خريجه تجارة عندي ٢٣ سنه
يتيمة الاب والام ماتوا في حادث عربية بعد جواز عمتو نهال بأسبوعين كان عمري ساعتها ١٠ سنين هتسألوا مين عمتو نهال دي بقي امي التانيه وصديقتي بابا هو اللي رباها وعلمها وجوزها لعمو مجدي وبصراحه عمتو هي وجوزها عمو مجدي ردوا جميل بابا واحتضنوني وربوني
صحيح بعد موت ماما وبابا باعوا كل حاجه تخصني لكنهم عملوا ليا بيها وديعه يصرفوا بيها عليا في حالة قصروا معايا
ومرت الايام واتخرجت وحاولت اشتغل بشهادتي لكن للاسف ده كان المستحيل ذاته المهم مطولش عليكم في الكلام
وادخل في الحكاية علي طول انا حاليا بعمل حلويات مقرمشه جميله وبابيعها لمحلات كبيرة
طبعا هتسألوني ايه جاب التجارة للحلويات هقولكم
انا جاتلي فكرة اعمل حلويات وابيعها من زباين عمتو
طبعا هتسألو زباين عمتو اللي هما مين هي عمتو نهال بتشتغل طيب جوزها فين، طبعًا مش هاسيبكم حيرانين كتير هقولكم
عمتو نهال من خمس سنين جوزها اتعرض لازمه قلبيه
وبعدها عمل عمليه خطيرة في القلب وطبعا كان واجب عليا اساعدهم بلي اقدر عليه علشان ظروفهم المادية مش تمام
فكيت الوديعه علشان اساعد في عملية عمو مجدي والحمد لله قام بالسلامه لكن كان صعب يشتغل اعمال فيها مجهود
وهنا جت فكرت عمتو انها تأجر نص الشقه للمغتربين
اللي هو ازاي شقة عمتو كبيرة ما شاء الله عملت نصها للايجار
كنت بنام انا وبناتها التؤام سهي ونهي باوضه
و عمتو وعمو مجدى وابنهم سامر في اوضه
وباقي الاوضتين للايجار وكانت الخدمه فايف ستار طبعا كلكم عارفين يعني ايه فايف ستار ولا اقولكم هو انا خسرانه حاجه يعني خدمة كامله مميزه وكنت بساعدها، بصراحه كانت فكرة ممتازة واحدة غضبانه من جوزها وعايزه تبعد يومين تجي تشرفنا واحد استلم شغل جديد ولسه بيدور علي مكان يشرفنا شباب او بنات بيدوروا علي سكن ايام الدراسة كان الحال ممتاز وبيتحسن وانا كنت بساعدهم والمكسب كان كويس وبيكفي لكن المصاريف ومتطلبات الحياة بتزيد وجت فكرة مشروعي بعد شكر زباينها في حلوياتي، قلت كويس علشان اقدر اساعد بمبلغ اكبر في مصروف البيت وبالذات انها نوع جديد من المقرمشات
وعملت المشروع تعبت في الاول لحد ما بقي ليا زباين كتير بيحبوا يشتروها ومحلات بتتعامل معايا بالطلب وقدرت اوسع نشاط مشروعي واخرج من القرية للمدينه
كان ارهاق السفر في القطر كفيل بإني اروح انام من التعب قتيله، بس حلوة المكسب اللي كان بيكبر علي طموحي في انه يكون ليا عملي الخاص
ده غير ساعدني ازيد من مساعدتي ليهم اكتر
وبعد ٦ شهور من انشاء مشروعي بقيت اسافر يوميا للاسكندرية اورد طلبات لمحل حلويات كبير كان مكسبي منه الضعف كان زبون ممتاز رغم انه طلب اشتغل معاهم بس خفت يخدوا مني سر الصنعه ويتعلموها ويدوني صابوني
اه صابونه يعني يزحلقوني، اظن انتو فاهمين أوضح اكثر يعني يطردوني بعد ما يستغفلوني،
المهم انتبهوا معايا وركزوا علشان من اليوم ده حياتي اتغيرت ٣٦٠ درجة ، اه والله الصدفه لعبت أعظم واكبر لعبة في حياتي ، اسمعوا منا الحكاية ،
في اليوم ده وانا راحه اورد طلب للمحل بالاسكندرية
كانت قاعده جمبي ست كبيرة تكسو ملامحها الطيبه والحزن سألتها مالك وايه سبب الحزن والدموع في عيونك
العجوز:- ابن بنتي اتقطعت اخباره من ٣ شهور وانا هتجنن واعرف حصله ايه وكل يوم انزل الاسكندرية واروح لشركته اسأل عليه ومفيش اي فايدة ولا فيه اي جديد
شمس:- طيب ما تتصلي بالتليفون تسألي عليه بدل السفر كل يوم للاسكندرية ده مرهق عليكي هو انتي ساكنه فين
العجوز:- في كفر الدوار وانتي
شمس:- بمرح انا كمان من كفر الدوار بس في القري من جوه بس انا اول مره اشوفك تركبي معانا القطر
العجوز:- كنت بسافر بعربيتي لكني تعبت من السواقه كل يوم فكرت اركب القطر واريح نفسي وفجاء وهي بتكلمني جسمها يرتعش وتقع عليا وكانت عرقانه جدا وجسمها متلج ، بصراحه انا اتخضيت وبقيت اصرخ الحقوني الحقوني
وتجي شابه صغيرة شكلها متخرجه جديد وتقول انها دكتورة وتمسك ايدها تقيس النبض وتبصلي برعب
دي حاله غيبوبة سكر حد معاه حاجه مسكره بسرعه
وواحده حشرية من الركاب شافت علب الحلويات اللي معايا وقالت بصوت عالي سمعه الكل اللي قاعدة جمبها معاها حلويات ويسحبوا علبه من الطلبيه ويفتحوها ويدولها قطعه
والدكتورة تكلمها افتحي بوقك وتحط ليه قطعة الحلويات وتديلها قطعه تانيه وبعد خمس دقائق تبدء الست الكبيرة تفوق
وانا كنت هصوت اه وربنا هصوت لان اللي فتحت العلبه داقت الحلويات لقت طعمها حلو بقت تعزم زي ما تكون بتاعتها وكل اللي في العربيه حبوا يدوقوا هما كمان وراحت الطلبيه في ابو بلاش وانا روحت في داهيه
تشوف الست الدموع في عيني بعد ما ضاع تعبي لا كسبت فلوس ولا حتي ثمن التكاليف اللي اقدر اعمل بيها طلبية جديدة وكده خسرت زبون كان بياخد طلبيه كبيره ومكسب ممتاز
اكيد لان الطلبيه كانت لحفله وكده هو هيخسر وطبعا هيرفض يتعامل معايا لاني خلفت اتفاقي معاهم واكيد هيخسر بسببي
العجوز:- اكيد الحلويات ده شغل انتي بتوصليه واكيد ليه تمن
وحرام تتحملي ثمنها لوحدك وكنت انا السبب انك تخسري شغلك تعالي معايا اروح الشركة اسأل علي ابن بنتي وبعدها تروحيني وانا هدفعلك كل التكاليف وتمن الحلويات كامل
وقتها قلبي ردت فيه الروح وانتعاش الامل من جديد وسالتها بلهفه وعدم تصديق وقلبي بيرقص من الفرحه بجد انتي بتتكلمي بجد
العجوز:- ايوه بتكلم بجد يلا قبل القطر ما يتحرك
وخدتها ونزلت واتفاجات من مظهرها كانت سيدة شيك جدا وانيقه وشكلها بنت ناس زيادة عن اللزوم من طريقة تعاملها مع سواق التاكسي اللي طلبناه ووصلنا لمقر شركة كانت شركة كبير عالمية للتعدين والجولوجيا، دخلت للاستعلامات تسأل علي حفيدها
الموظف:- يا مدام وصال احنا قولنالك كذا مره حفيدك المهندس يزن في رحلة بحث خارج البلاد هو والبعثه كلها واخبارهم اتقطعت من فترة لو وصل لينا اي جديد هنبلغك اتفضلي ده موقع الشركة بره راسليهم وهما اكيد هيبلغوكي باي جديد او يوصلوا رسايلك للمهندس يزن ده كل اللي اقدر اعمله ليكي
انا مقدر لهفتك وخوفك عليه بس انا معنديش اي حل تاني والله وزعلان علشان
وصال:- تاخد منه الورقه اللي مكتوب عليها مكان المرسله لحفيدها وتحطها في شنطتها وتبص للموظف بغضب
لو حفيدي جراله حاجه انا مش هرحمكم كلكم وتخرج متعصبه انا بصراحه خفت منها دي شخصيته قوية اووي
وخرجت اجري وراها وطلبت تاكسي وركبنا وطول الطريق ساكته طلبت من السواق يكمل بيها لكفر الدوار وهتديله اللي يطلبه ووافق السواق كانت رحله مريحه غير القطر وسالته
ليه مجتيش في سيارة اجرة بدل تعب السفر بالقطر مدام عندك مقدرة تدفعي اجرة السواق
العجوز:- خفت اركب معاه لوحدى انا مريضة سكر وزي ما شفتي اللي حصلي في القطر كان ممكن يحصلي وانا بالعربيه مع السواق لوحدى كان ممكن يأذيني ويسرقني او يرميني في اي حته ويخلص مني، يمكن ربنا بعتك ليا علشان تبقي رفيقتي انا ارتحت ليكي اوووي وعلشان كده اخدت تاكسي لحد البيت لانك هتونسيني وهترافقيني وهتاخدي بالك مني، لو حصلي زي اللي حصل ليا في القطر
شمس:- اكيد وفضلت تحكيلي عن حياتها وان كان ليها ابن وبنت بنتها وجوزها ماتوا من ٦ سنين في حادث طيارة وهما رايحين للحج وسابوا ليها يزن يونسها علشان كده بتجنن لما بيغيب عنها من يوم موت والديه وهو عايش معاهم
ام ابنها رفضت يعيش معاهم لان مراته كانت بتعمله وحش طرديتهم بره بيتها وحاليا عايشه لوحدها بعد اختفاء حفيدها يزن وليها احفاد من ابنها ولد وبنت شجون وشوكت
بس هي مش بتحبهم لان امهم مش بتحبها وعلمت ولادها يكرهوها وابنها مش بيتدخل ويصلح العلاقه بينهم وبالذات انه غيران من ابن اخته اللي مسيطر علي قلبها
حكايتها وجعتني وفكرتنيي بنفسي واحساسي باليتم ليه الناس بيستكثرو علي اليتيم العطف والحنان وحمدت ربنا علي عمتو نهال وعلي حب ولادها ليا
والمهم الطريق خلص وونزلنا من التاكسي وساعدتها تنزل
وقفت مصدومه من المنظر اللي شفته قدامي كان منظري زي الهبله من الصدمه ولقيتها بتقولي مالك واقفه كده ليه
✍ البارت الاول ✍
**________________**
تقف شمس مبهوره من مظهر البيت الذي امامها وتنظر الى السيده وصال باستغراب احنا هنا ليه
وصال :-انتي مالك يا بنتي واقفه كده ليه وايه الخضه اللي على وشك دي
شمس:- انتي مش شايفه اللي انا شايفاه بيت مين ده و احنا هنا ليه اوعي تقولي لي ان ده بيتك و انك ساكنه هنا
وصال:- ولو بيتي ايه المشكله تعالي ادخلي معايا ما تخافيش
وتدخل شمس معاها وهي مش عارفه هي الست وصال غنيه ولا ساكنه معاهم ولكنها متدخلش البيت اللي يشبه القصر
وتدخل بيها لاوضة جانبيه مجهزه بكل سبل الراحه من فرش فخم واجهزه كهربائية حتي السجاد من النوع الغالي جدا
شمس:- انتي ساكنه هنا لوحدك ولا معك حد والقصر اللي بره دي ملكك
وصال:- انا ساكنه لوحدي من سنين لولا يزن ملا حياتي لكن بعد ما غيابه عني ما بقاتش طايقة اعيش في القصر لوحدي عشان كده جهزت الاوضه دي منها جنب المزرعه زي ما انت شايفه وفي نفس الوقت قريبه من القصر والبحر انت بقى اقعدي واحكيلي حكايتك انتي كده عرفت كل حاجه عني
وعايزه اعرف كل حاجه عنك
شمس:- انا بنت يتيمة الاب والام وعمتي هي اللي ربتني وعايشه معها في بيتها اشتغلت في صنع الحلويات عشان اقدر اساعدها زي ما وقفت جمبي وربتني وكمان في طريقه ثانيه بحاول اساعدهم بيها اكتر بيت عمتي اربع اوض اوضتين لينا واتنين للايجار وساعات بيجي يسكن عندنا شباب والبنات اللي بتبقى ساكنه معانا بتتضايق ومش بتاخذ راحتها فكرت في الاوضه اللي باعمل فيها الحلويات افرشها كويس و اجهزها للشباب اللي عايزه تيجي تسكن عندنا وفي نفس الوقت هيزيد الدخل وهتبقى زياده تنفعهم وابداء انا افكر في تكوين نفسي واسس مشروعي و زي ما انت شايفه انا شابه صغيره و فقيره واكيد مش هلاقي عريس بالساهل عشان كده بفكر اني بعد ما اعمل لهم الاوضه وافرشها كويس و تبقى حلوه للسكن كده اقدر اسيب مكاني و احاول اسكن في الاسكندريه واشتغل في اي مصنع للحلويات هناك لحد ما احوش مبلغ لمشروعي وهبداء بدكان صغير على قدي وكده اقدر اعملي قرشين ينفعوني اجهز نفسي بيهم بالمستقبل
وصال:- طيب وانتي دلوقتي خلصت الاوضه ولا لسه
شمس:- انا حاليا جهزتها ووضبطها بس فاضل الفرش و هتبقى تمام وجاهزة للسكن
وصال:- طب قوليلي على سعر الحلويات اللي اتفتحت في القطرعلشان ادفعلك ثمنهم
وكمان انا عايزه اتفق معك اتفاق انتي شايفه اني انا ست عجوزه ممكن يحصلي ازمه في اي وقت ومحتاجه حد يتابع حالتي او يرافقني وياخد باله مني ايه رايك كل يوم تيجي تقعدي معي ساعه او اثنين وتكتبي لي جواب اوتقرائي ليا جواب وتسليني او تقرائي لي قصه وهديك قد اللي بتكسبيه يعني لو انت بتكسبي 100 او 200 جنيه من بعد خصم التكاليف انا هديهم لكي من غير اي تعب كل اللي هتعمليه انك هتيجي تقعدي معايا وتونسيني و في نفس الوقت نفتح القصر و نقعد فيه انا وانت وكل يوم تروحي وتيجي الصبح شمس:- طب بس انت معاكي مزارعين كثير يقدر اي حد منهم ياخذ باله منك واضح كمان انك غنيه ومرتاحه ليه ما تجيبيش واحده تخدمك وتقعد.معاك اشمعني انا
وصال :- هصدقيني لو قولتك انا ما بحبش حد يخدمنى او حد.يقعد معايا يونسني الوحيد اللي ارتحت معاه هو يزن
ولاني تعبانه مبقدرش اجهز اكل ليا في واحده بتيجي كل يوم تجهزلي الاكل وتمشي لكن انت الوحيده اللي ارتحت لها زي يزن يمكن لانك يتيمه زيه وقلبي اتطمئن لك وعشان كده انا عرضت عليكي العرض ده جربي مش هتخسري حاجه حتي لغايه ابن بنتي ما يرجع و اوعدك اني مش هتعبك او اطلب منك تعملي اي شغل غير انك ترافقيني و زي ما انت شايفه انا هادية وهابقى ساكته هسمع منك وكمان ابقي اعمليلي الحلويات بتاعتك لانها طعمها حلو قوي ايه رايك
وانا مستعدة يابنتي اديلك كل يوم قد اللي كنت بتكسبيه وهديلك فلوسك كل يوم مش بالشهر و هفرشلك الاوضه احسن فرش علي حسابي مقدما عشان تقدر تساعدي بها عمتك وجوزها ها موافقه وقبل ما ترفضي فكري كويس
شمس:- تبداء تفكر انا كده هبقى مرتاحه ومش هاسافر واتبهدل كل ما اودي طلبيه وفي نفس الوقت هيبقى معايا فلوس اقدر اعمل بيها مشروعي لكنها تحس انها كده هتبقي استغلاليه تبص ليها وتقول لها انا مستعدة اجي اقعد معاكي كل يوم واسليكي انتي زي جدتي وحضرتك طيبه جدا ويسعدني اخدمك بس من غير اي فلوس
الدنيا لسه فيها خير مش كل حاجه بمقابل
وصال:- يا بنتي انتي شايفه وقولتلك اني اقدر اوظف اللي تخدمني وتقعد معايا لكني اخترتك وانا عايزه اريحك زي ما هتريحيني يعني خدمة مقابل خدمة وافقي ارجوكي
شمس:- خلاص خلي الفلوس لحد ما ابن بنتك يرجع بالسلامه
حوشيهم معاكي ليا وهاخدهم منك اعمل بيهم مشروعي
وصال:- لا خدي وتفتح شنطتها وتتتصدم من الفلوس اللي كانت ماليه شنتطها ليها حق تخاف تركب تاكسي لوحدها
خدي دي الف جنيه خليها معاكي ولما يخلص اطلبي تاني ومترفضيش لاما هرفض مساعدتك انك تجي ترافقيني
شمس:- تاخد الالف جنيه وترتعش اول مره تمسك مبلغ كبير زي كده مره واحده وتخاف تحطه في شنطتها وتحسب الطلبيه كده معاها ٥٠٠ زيادة يعني حق طلبيه جديدة بأربأحها
وتشوف وصال الفرحه في عين شمس واحساسها بالرضي بمبلغ صغير زي الف جنية وتقتنع انها اختارت صح وان شمس فعلا الانسانه اللي هتكون رفقيتها مش طمع فيها لكن لانها بتحب تعمل الخير حتي لو المقابل قليل وبعد ما خدو علي بعض وقضو وقت سعيد واتغدت معاها تستتأذن شمس بالانصراف وتوعدها هتكون عندها قبل الظهيرة
●○●○●○●○●○●○●○■▪▪▪▪▪▪▪
رَبَّنَا لَا تُزِغْ قُلُوبَنَا بَعْدَ إِذْ هَدَيْتَنَا وَهَبْ لَنَا مِنْ لَدُنْكَ رَحْمَةً إِنَّكَ أَنْتَ الْوَهَّابُ ربنَا إِنَّكَ جَامِعُ النَّاسِ لِيَوْمٍ لَا رَيْبَ فِيهِ إِنَّ اللَّهَ لَا يُخْلِفُ الْمِيعَادَ
¤■¤■¤■¤■¤■¤■¤■¤■¤■●●●▪▪▪▪
وتروح البيت وتدخل علي عمتها تديلها ٢٠٠ جنية من الالف جنيه اللي خدته من الست وصال وتحكي لعمتها اللي حصل
نهال:- تزعل ليه كده يا شمس انا عندي تشتغلي في مشروعك ولا انك تشتغلي خدامه عند حد مساعدتك ليا هنا ده رزقنا وفي بيتنا لكن انك تشتغلي عندها بمقابل مرفوض
شمس:- يا عمتو يا حبيبتي من غير ما تقولي هي اديتني ١٠٠٠ جنية انا خدت حقي الحلويات ٥٠٠ والباقي انا هعينه وال٣٠٠ هجيب بيهم طلبات جديدة علشان اعمل طلبيات حلويات
انا هرافقها لحد ما ابن بنتها يرجع وارجعلها فلوسها انا مقبلش استغل احتياجها للونس بإني اخد منها فلوس مقابل معروف هعمله معاها اني أسلي وحدتها وأرافقها واخد بالي من صحتها
نهال:- ايوه كده انتي بنت اخويا اللي ربتها صح كفاية رغي بقي وتعالي ساعديني نغسل المواعين ونجهز العشا للزباين
علشان نهي وسهي نامو انتي عارفه بيصحو بدري لمدراستهم
شمس:- خمس دقايق وهتلقيني فطيت جمبك في المطبخ يا احلي عمه بالدنيا هو فين صحيح عمو مجدي مشفتوش بالصاله لما رجعت ولا هو بره لسه مرجعش
نهال:- لا عمك مجدي تعبان شويا خد العلاج ودخل نام انا قلقانه عليه اووي يا شمس بقي يهمل في علاجه علشان يوفر ثمنه رغم ان ربنا سترها والحمد لله
شمس:- عمتو خلي ال٢٠٠ جنيه دول لعلاج عمو مجدي مش تحطيهم في الحصاله وخدي ده مفتاح الحصاله افتحيها لو احتاجتو اي فلوس دي فلوسكم زي ما هي فلوسي لاني بنتكم
نهال:- كفاية اللي بتدفعيه بالبيت من تعبك في عمل الحلويات ده غير مساعدتك ليا في خدمة الزباين كفاية كده حوشي قرش ينفعك انتي بقيتي عروسة ولو جالك عريس مش هنعرف نجهزك اتكفلي بنفسك وكفاية الوديعه اللي كانت مركونه لجهازك خدناها ومبقاش في غير الفلوس اللي بالحصاله اللي فاضلين ليكي واسمعي اذا كنت بتحسبي تربيتي ليكي ده دين لازم تسدديه يبقي الاولي اسد انا دين تربية امك وابوكي ليا طول عمري وجهازي اللي مدفعتش فيه مليم وابوكي هو اللي جهزني من ماله
شمس:- يا عمتو انا بنتك زي سهي ونهي واستحاله يبقي معايا فلوس محتاجنها واستخسرها فيكم ولا انتي مش بتعتبريني بنتك زيهم ولا ايه الحكاية يا مزتي انتي
نهال:- انتي مش بنتي بس دي انا ليا فيكي اكتر من امك وابوكي الله يرحمهم انا عشت معاكي كل يوم من حياتك يارب اعيش واشوف بناتي زيك ويلا بقي بطلي رغي خلينا نخلص اللي ورانا وننام ولا متعبتيش من الرغي طول اليوم
شمس:- تحضن عمتها انا مزهقش من الرغي معاكي يا نهول وتخرج نهال وتغير شمس هدومها وتحصل عمتها وتساعدها في الاعمال المنزليه وتجهيز العشا للزباين وينتهي اليوم وتنام شمس مجهده بعد يوم طويل ومرهق
وتصحي تاني يوم علي ايد عمتها بتصحيها بالحاح
نهال:- قومي يا شمس شوفي الناس دول عايزين ايه
شمس:- في ايه يا عمتو وناس مين انا مشبعتش نوم لسه
نهال:- بعصبيه في رجاله بره بيقولي جايين من عند واحده اسمها مدام وصال مش دي الست اللي كنتي عندها امبارح
شمس:- تفوق لما تسمع الاسم ايوه بس عايزين ايه هو جرالها حاجه ولا ايه وتقوم تلبس روبها علي قميصها القطني البيتي
وتخرج تلاقي ٣ رجال اجسامهم ضخمه ومعاهم راجل تظهر عليه ملامح الهيبه والوقار
الرجل المهيب :- انتي الانسه شمس وحيد
شمس:- ايوه انا انتو مين وعايزين ايه
الرجل المهيب :- انتي كنت مع الست وصال امبارح و
شمس:- تقطع كلامه ايوه بس والله سبتها بخير
هي ماتت ولا ايه …….؟؟؟
**____**____**_____**_____*&&&