رواية للحبيب حبيب تاني الفصل الرابع 4 بقلم شهد محمد جادالله
رواية للحبيب حبيب تاني الجزء الرابع
رواية للحبيب حبيب تاني البارت الرابع
رواية للحبيب حبيب تاني الحلقة الرابعة
_بابي جيه بابي جيه
بيقولها شادي وهو بيجري على عزت
بياخده بالحضن وانا شايفهم من بعيد
وبيجيبه شادي لعندي انا وياسمين
_بابي رجع يا مامي
_مش قولتلي الصبح كنت هنبسط اكتر لو بابي جيه معانا اهو جيه
بيتكلم عزت وبيقول:
_شوف بقى بابي جابلك إيه من السفر
بيقولها وبياخده يوريه الهدايا اللي جابها
وبيسيبه مع أصحابه وبيرجع ليا
ياسمين بتسلم عليه وبتسيبنا لوحدنا
_اخبارك؟
_كله تمام أنت إزيك
_اهو شغال في مشروع جديد مسحول فيه والله
_ربنا معاك انت قدها
_إن شاء الله ، المهم عايزين نشوف حل لموضوع شادي يا نادين
_انا قولتلك إني مش همنعك عنه وقت ما تحب تشوفه مفيش مشاكل حتى لو عايز انه يجي يبات معاك
_انا فاهم ده كويس انا بتكلم فيما بعد ده ابننا مستقبله واللي جاي في حياته لازم نعرف هيمشي إزاي انا مش عايز ابني يكون معقد لمجرد إننا منفصلين يا نادين
_معتقدش انه هيحصل إحنا مش أعداء ومفيش بينا مشاكل
بيطلع علبة السجاير بتاعته بيديني سيجاره وبيطلع سيجاره ليه وبيكمل كلامه:
_نادين انا عمري ما هفكر اخد شادي منك غصب عنك بالعكس مصلحته معاكي اكتر مني وانفصلنا مخلقش بينا عداوه بالعكس انا هفضل احترمك وهفضل سند ليكي ول شادي انا بس خايف على نفسية الولد مش عارف اجيبها إزاي ان مبقاش ينفع انا وانتي نكون سوا
_فاهمك يا عزت ومتشكره على كلامك ده وتقديرك إن شادي يكون معايا انا بس هحاول نحلها سوا اكيد ليها حل
_اهم حاجه منقصرش انا وانتي في دور الأب والأم وارجوكي لو هتتجوزي تاني اختاري شخص كويس هو كدا كدا مش هيربي ابني انا اللي هكون شايل مسؤوليته كامله لكن هيكون معاه اكتر مني
_متقلقش يا عزت مش ناويه للموضوع ده وبشكرك للمره الألف انت اكتر راجل نبيل عرفته في حياتي
_وانتي ست جدعه وانفصلنا ببعض مش هيغير اي حاجه وأنا متفهم إننا معرفناش نحب بعض بس دي حاجه ربنا مش هيحاسبنا عليها الحب مش بإيدينا لكن هيحاسبنا على المعاملة وانا بشهد إنك كنتي ست مخلصه شايلني وبتصونيني انا وابني وبنسبة لمعاملتي يشهد ربنا إني كنت بحاول على قد ما اقدر مقصرش معاكم
ببتسم ليه وانا بنفخ دخان السيجاره
_من وجهة نظري إن ابننا هيكون سوي نفسيآ ام ناضجه وأب نبيل ومحترم وانفصلنا مقصرش علينا يبقى شادي مش هيعاني في حياته انا واثقه
_اتمنى
بيقطع كلامنا شادي وهو جايب يارا وجاي لينا
_بابي اعرفك يارا صاحبتي وده بابي يا يارا رجع من السفر انهارده
_هاي يا اونكل
بتقولها يارا وبيبتسم ليها عزت وبيسلم عليها وبياخدهم يلعب معاهم
وبترجع ياسمين تقعد جنبي وبحكيلها على اللي حصل
_بس كدا ياستي
_والله شخص محترم وجدع
_دي حقيقة ربنا يعوضه بواحده تستاهله
_ويعوضك انتي كمان يارب
بيخلص يومنا في النادي وبنرجع للبيت وبتفق مع عزت إنه يحضر معانا عيد ميلاد يارا وبيوافق
بفضل جنب شادي لحد ما بينام وبرجع لياسمين بتكون خلصت الأكل وبنقعد نتعشى
_كنت مرعوبه يا ياسيمن ياخد مني شادي غصب عني
_عزت راجل كويس مستحيل كان يفكر كدا
_ربنا يهديه ويقدرنا ونربي شادي
_يارب يا حبيبتي
_مامتك كلمتك؟
_اه هيرجعه بعد اسبوع
_يرجعه بالسلامة يارب
_إن شاء الله ويارب نخلص بقى من حكاية سيف ما تحكيها كلها مره واحده يا نادين
_يعني هو احنا طول اليوم فاضيين بحكي وقت ما بيكون مش ورانا حاجه
_طيب عندي سؤال فضولي
_اتفضلي صدعيني
_محاولتيش تدوري على سيف؟
_دورت كتير سألت كل صحابنا ودورت على السوشيال ميديا بس مفيش ولا حاجه قدرت توصلني ليه
_لو رجعته شفته بعض تاني هيجرا إيه؟
_مش عارفه اكيد كبر واتغير ويا عالم اتجوز ولا إيه حياته دلوقتي
_كمليلي بقيت الحكاية طيب
“فــــلاش بــــااكـ”
تاني يوم بعد ما بروح ابيع السلسله وبرجع الفندق بنام بصحى على صوت خبط في الشباك اللي في اوضتي
بقوم بفتح الشباك وبيكون سيف اللي بيخبط عليه بعصاية المقشة
_إيه ده يا غالي؟
_تيلفون مقفول ومش قادر اخرج اخبط على الباب قولت اتصرف عشان اصحيكي
_وعايز إيه من وش الصبح كدا؟
_هو إيه اللي عايز إيه يا نادين قومي البسي وانزلي معايا هنفرش المعرض انهارده وانا محتاس اوي
_طيب هفطر بس واشرب القهوة و..
_مفيش الكلام ده يدوب اغسلي وشك والبسي ويلا
_طيب
بقولها وبقفل الشباك وبدخل بغسل وشي وبخرج بلبس تيشيرت ابيض وفوقيه سلوبيت جينز وبرفع شعري ثمرة انانانس
وبخرج ليه وبنروح للمعرض سوا وبتفجاء بوجود دينا معانا كانت بتساعدنا
نزلنا حاجات كتير ورجعنا نرتبها وغيرنا نظام كذا حاجه طول اليوم بنفرش وبنعرض لحد ما تعبت
سيبتهم هما يكملوا وروحت السوبر ماركت جبت فينو وجبنه ورجعت ليهم تاني وقعدت اعمل سندوتشات
_قلب الأم حاسه بينا؟
بيقولها سيف وهو بياخد من إيدي السندوتش
_مانت لو كنت صبرت شوية نفطر وننزل
_نخلص وهعزمك على اللي انتي عايزاه
_انا نفسي في فنجان قهوة دماغي هتتفرتك
_نخلص ونشرب قهوة واصورك سيشن على البحر كمان مع شروق الشمس
_اه إذا كان كدا ماشي
بقولها بضحك وهو بينادي على دينا بنقعد ناكل سوا وبنقوم نكمل لحد ما بنخلص
وواحنا واقفين بيجي الموظف اللي هياخد الفلوس ويسلم لسيف التصريح
باخد بالي انه بيتوتر عشان مكنتش لسه اديته الفلوس بتكلم وبقول:
_الفلوس اللي ادتهالي انا شايلها في شنطتي اجبهالك؟
_ااه ..
بفتح شنطتي وبطلع منها الفلوس وهو بيحاسب الموظف وبيديني التصريح اخليه معايا
وبنقفل المعرض بعد ما بنخلص بيكون الوقت اتأخر والنوم بيغلبني خصوصآ إني مشربتش قهوة
بسيب سيف مع دينا وبطلع انا باخد شاور وبنام وعلى الفجر كدا بسمع نفس الصوت بتاع إمبارح
بقوم بحط شال خفيف عليا وبفتح الشباك وبيكون سيف
_إيه بقى شغل ابن الجيران ده؟
_تعالي ننزل نتمشى هعزمك على قهوة وهصورك
_لأ عايزه انام
_يابنتي انجزي هو انتي جايه شرم تنامي؟
_طيب اما نشوف اخرتها
بقولها وبدخل بلبس ميني دريس اسود وبحط ميكب خفيف وبعدل شعري وبنزل ليه
_كل ده؟
_كل ده إيه هو أنا لحقت
_تتصوري على البحر؟
_ياريت بس موضوعنا مش الصور يا سيف حصل إيه عايز تحكيلي عليه؟
_مكشوف للدرجادي ؟
_اوي
_حصل بيني وبين دينا حاجه
_يعني إيه؟
_مفيش اوضح من كدا ولد وبنت لوحدهم وحصل حاجه يا نادين
_متهزرش وهي وافقت؟
_هي إيزي عادي
_وانت مشفتش رباية عادي
_هو غلط بس مادام انا موافق على الغلط وهي موافقه عليه ومفيش ضرر لحد تاني يبقى إيه اللي يمنع؟
_مبرارت عبيطه المهم انت عايز إيه دلوقتي؟
_ولا حاجه بحكيلك
_ايوا يعني انت زعلان مبسوط ندمان؟
_مش عارف بس كنت سعيد وانا معاها اول بنت مزهقش منها انتي عارفه إني مش بطول في صداقتي مع البنات
_ماهو واضح عشان كدا إحنا صحاب بقالنا سنين صح؟
_لا انتي صاحبي انتي مش زيهم
_ما تحترم نفسك بقى صاحبي وامبارح اخويا الكبير شايفني بشنب؟
_ياستي انتي غيرهم
_ماشي غيرهم بس ميمنعش إني ابقى بنت يعني صاحبتك ماشي اختك ماشي بنت خالتك ماشي
_مش عارف مش حاسس إنك كل دول مفيش صفه قريبه من الأم؟
ببص ليه وبسكت مكنتش فاهمه افرح انه شايفني ام ليه ولا ازعل إن مفيش اي مشاعر حب ناحيته ليا
بنوصل للبحر وبيصورني صور تجنن وبيجبلي قهوة فرنساوي في كوباية ورق خفيفه وهشه زي قلبي الخفيف تمامآ
بنقف نشرب القهوة وإحنا بنتصور وبنهزر وبنرجع للمعرض بنكمل فيه شوية حاجات
لحد ما بيجي يوم الإفتتاح بنزل معاه عشان نشتري البدله بتاعته وفستان ليا
وبعد ما بنخلص لف بنرجع للفندق سوا
بكون جبت دريس ستان نبيتي بلبسه وبحط روج نبيتي وبغير لون شعري من اصفر لأسود الأسود بيكون عليا حلو اوي
بكمل بقيت الميكب وبلبس الهيلز وبخرج لما بسمع صوت خبط على الباب
بيكون هو واقف بكل شياكه وهو لابس بدله كلاسيك سوده انا اللي اختارتها ليه
_تحفه إيه السكر ده؟
_سكر إيه انتي إيه الحلاوه دي كانت مستخبيه فين يا بنت الذينه
_موجوده يا حبيبي إحنا بنعرف نكون الاتنين عادي
_ده يابخته والله
بنضحك سوا وبياخدني وبننزل للمعرض بتكون دينا مستنياه
لابس دريس اسود مفتوح من الجنب
شعرها ليس وميكب اوفر واول ما بتشوف سيف بتجري عليه
وهو بيندمج معاها بس مش بزعل بمشي آليوم عادي وباقي الشلة بتيجي مريم واميره ومروان وطارق
بنحتفل كلنا سوا بنتصور وبنضحك وبيكون سيف مجهز اكلة سمك وبناكل كلنا
وفي آخر السهره بتعب من الهيلز بقلعه وبخرج أقف على الرمل قدام البحر
اتنفست بأرتياح وكأن نفسي كان مكتوم من سنين وفجاءه لقيت إيدين حوالين رقبتي ماسكه سلسله
بتخض وببص اشوف مين بيكون سيف ومعاه سلسلة ماما اللي بيعتها
_جبتها إزاي؟
_انتي فاكره إني مخدتش بالي إن رقبتك بقت فاضيه بعد ما قولتي إنك هتجيبي الفلوس
_رجعتها إزاي؟
_ربنا كرمني بواحد هيشتري ١٠٠ قطعة انتيكا من عندي خدت منه عربون وروحت دورت في كل محلات الدهب بوريهم صورة السلسله في رقبتك لحد ما لقيتها
_انا وانت واحد مزعلتش عليها صدقني
بيلبسهالي وبيقف جنبي وبيقول:
_تعرفي يا نادين أمنية من أمنياتي إن تكون مراتي واخده حنيتك لو خدت حنيتك هتبقى ام عظيمه لعيالي
_هو انت ناوي تتجوز يا سيف؟
_إيه رأيك؟ واجيب بنوته اسميها شذا وانتي تجيبي ولد تسميه شادي عشان بتحبي الإسم ده ونجوز عيالنا لبعض ونبقى قرايب
_الله وبنتك تقولي يا حماتي وابني يقولك يا حمايا
_هنبقى اسره لطيفه اوي انا واثق
_خلاص اتفقنا يا حما ابني
_طب يلا نكمل سهرتنا يا حمات بنتي
“بـــــــاكـــ”
_الساعه بقت سبعه الصبح يلا خلينا ننام
_كملي وحياتي يا نادين
_انا واحده عندها شغل بدري يا فاضيه انتي خلينا ننام
_اوف بتيجي عند اهم حته وتفصليني
_هكملك بعدين
تاني يوم بعد ما بخلص شغل بيكون عيد ميلاد يارا
بلبس بدله شيك حريمي لونها بيج
وبحط ميكب خفيف وبعمل شعري ويفي
وباخد شنطتي وباخد شادي وياسمين وبننزل سوا بندخل محل هدايا بنجيب هديه ليارا وبنركب مع ياسمين وبنروح للبيت عندها
وقبل ما بنطلع بيكون عزت وصل بيجري عليه شادي بيحضنه
_جبت هديه إيه ل يارا يا بطل؟
_عروسة
بيبتسم ليه عزت وبيفتح عربيته بياخد منها شنطة هدايا صغيره وبيقول:
_نضيف دي مع العروسه
_إيه دي يا بابي؟
_سلسلة عليها اسمها كل البنات بيحبه يكون في رقبتهم سلسله من حد غالي عليهم
بيبوسه شادي وبيمسك إيديه وبيجي لعندي ببتسم ليه وبنطلع سوا
الديكورات بتكون لطيفه اغلبيتها على شكل حورية البحر ويارا بتكون زي القمر
لابسه دريس بينك وتاج بينك وحطه بلاشر وروج خفيف
_يلا روح قدم ليها الهدية
بقولها ليه وبياخد الشنطتين وبيروح يديهم ل يارا وبيندمج معاها ومع اصحابه
وبتيجي لينا نسمه مامت يارا مع جوزها بترحب بينا وبيطلع فيه سابق معرفه بين عزت وبين بابا يارا وبيندمجه مع بعض في كلام عن الشغل
شادي بيكون فرحان بوجودي انا وعزت وبوجود يارا واصحابه
بصورهم وبستنى لحد ما بيطفي معاها الشمع وبنرجع للبيت
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية للحبيب حبيب تاني)
