رواية دموع ممنوعة الفصل السابع 7 بقلم هناء النمر
رواية دموع ممنوعة الجزء السابع
رواية دموع ممنوعة البارت السابع
رواية دموع ممنوعة الحلقة السابعة
تعدت الساعة الرابعة وهو بداية رجوع الجميع من عمله ، وبدأ توافدهم بالفعل ، وصل عصام ومن بعده مجدى ، وبعدها بنصف ساعة وصل العم أكرم ، وفى نفس الوقت وصل عادل ، خرج من سيارته ولحق بعمه .
…مساء الخير ياعمى …
…مساء النور ياعادل ، ازييك ياحبيبى ، وأخبار فريدة ايه ؟
…الحمد لله ، تمام …
…يعنى كويسة معاك ، مرتاح ياعادل …
…السؤال ده لسة بدرى عليه ياعمى ، حضرتك مش مؤمن بالجواز عن حب ، وصممت أنى اتجوز بنفس الطريقة ، ولتانى مرة حد يختارلى ، بس وافقت المرة دى عشان حضرتك اللى اخترت ، وأنا طبعا بثق فيك ياعمى …
…بكلامك ده ، يبقى انت لسة زعلان ياابنى ، والأهم معناه انك مش مرتاح معاها …
… فريدة كويسة جدا ، بس …
..بس ايه ياعادل ، احساسك بإنك مجبر عليها مخليك بعيد عنها …
…لا ابدا ، كل الحكاية أن بعيدة تماما عن كل المواصفات اللى توقعتها وكنت عايزها….
…مواصفات، وليه مقولتليش اصلا أن فى مواصفات معينة فى خيالك …
…اشمعنى، كنت هتلغى الجواز …
…معرفش، بس اكيد كنت هتصرف ، انا كدة فهمت …
…فهمت ايه ياعمى ، تقصد ايه ؟
…انتوا راجعين بقالكوا 3 أيام ، شفتها فيهم كام مرة ، مشوفتش فى عنيها فرحة بنت لسة عروسة ، ودلوقتى فهمت السبب ، حاول ياابنى ، حاول تتقبلها ، فريدة كويسة ، وأنا شايف أنها مناسبة ليك جدا ، بالرغم انك انت مش شايف كدة …
…هحاول ياعمى …
…ربنا يهديك ياابنى ، يلا بقى احسن مرات عمك واقفة على الباب تشاورلنا من بدرى …
…ماشى ياعمى …
…على فكرة ، عمك حسن اتصل وقال انهم هيوصلوا يوم الاتنين العصر …
…فعلا ، الحمد لله ، وجدى كويس …
…الحمد لله ، كنا فين وبقينا فين …
*******
على مائدة الغداء ،الكل مجتمع ، أبلغ الحاج أكرم الجميع بميعاد وصول حسين المصرى وتحسن صحته ، وأنه سوف يكمل رحلة علاجه بإشراف الأطباء هنا ،
بالتأكيد أن منهم من اسعده الخبر ، ومنهم من نزل عليه الخبر كالصاعقة ، عصام مثلا ، فقد أصبح فى غياب جده مسؤول عن كل المزارع ومراعى الأبقار وحده دون منافس ، وقد كان جده رافضا لهذا الموضوع تماما ، وسميرة والدة عادل وعالية زوجة أكرم هى الأخرى ، فقد كان أملهم أن يعود ميتا من هذه الرحلة ، فلا إرادة لهم فى وجود الجد و فريدة فى نفس المكان ، فقد يحن إلى والدتها ، ومن الممكن أن يوزع التركة من جديد ويعطيها نصيب والدتها ، وبالطبع سهام هى الأخرى رافضة لعودة جدها سالما ، فقد كان يفرض عليها سجنا لا تريدة فهو يعلم حفيدته جيدا ويعلم بشأن انحلالها بعض الشئ ، أما الباقى فمنهم من اسعده الخبر ، ومنهم من لا يؤثر معه بشئ.
أما فريدة فقد كانت على علم كامل أن وجود الجد هو الشرارة التى ستفجر دواخل كل من تريده أن يتحدث ، فقد كانت تؤجلها بعض الشئ ، لكن حدث ما حدث .
آفاق الجميع من شرودهم على وقوف الحاج أكرم وحديثه مع فريدة ،
…فريدة …
…أيوة ياعمى …
…لو سمحتى عايزك فى المكتب بعد ما تخلصى …
..أنا خلاص خلصت ، جاية مع حضرتك …
…ابعتولنا القهوة على المكتب …
بقدر ما اقلق الجميع هذا الانفراد ، لأنهم لا يريدون أى انفراد بين فريدة واى فرد من أفراد الأسرة خاصة الكبار منهم ، فقد اقلق عادل هو الأخر ، فهو لا يريد عمه أن يتحدث مع فريدة بشأنه وبشأن علاقتهم وزواجهم ، غير أنه بالفعل قلق من أن تخبر فريدة عمه بشأن شكل علاقتهم الخاصة واتفاقهم ، فهى بالفعل جريئة جدا ويتوقع منها أن تفعلها.
********
….اتفضلى اقعدى …
…خير ياعمى …
…خير ان شاء الله ، سبق قبل كدة وكان فى اكتر من قاعدة بينا ، وكنتى بتطلبى منى الصراحة وكنت بقولك على كل حاجة ، حصل ولا لا …
…أعترف بده ، بس مفيش داعى للمقدمات دى ، أسأل على اللى انت عايزه وانا هجاوب ، انا معنديش حاجة أخاف منها عشان اخبيها. .
…لأ عندك يافريدة …
…اللى هى ايه بقى …
…حساباتك فى البنوك ، جت منين …
..،مش فاهمة ، تقصد ايه …
…لأ فاهمة ، اللى عرفته بس 3 بنوك دولية ، ارصدتك فيهم تبعدى 45 مليون دولار ، والله واعلم فى بنوك تانية ولا لأ …
… بتقلب ورايا ياعمى ولا ايه ؟
…حاشا لله يافريدة ، انا مشكتش فيكى للحظة ، مع أنى معرفكيش، ومعرفش ابوكى رباكى ازاى ، بس انا ليا نظرة فى الناس عمرها ما خيبت ، الموضوع كله عرفته بالصدفة…
…وايه المطلوب منى دلوقتى …
… عايز أطمن عليكى يابنتى ، على الأقل اعوضك اللى قصرت فيه من ناحية والدتك …
… متجبش سيرة والدتى لو سمحت ، لأنك مهما عملت مش هتقدر تعوض اللى قصرت فيه من ناحيتها، لا انت ولا غيرك …
…ابوكى كان عنده حق لما قاللى انك صعبة فى التعامل ومبتنسيش الأسية بسهولة …
همت بالوقوف وهى تقول
… أبويا غلطان ، انا مبنساش الأسية اصلا ، عن اذنك …
…استنى عندك ، اوعى تفتكرى الموضوع سهل ، ولازم اعرفله إجابة ، مهو متحاوليش تفهمينى أن وظيفتك الحكومى ولا حتى مكتبك اللى مهما كان بيكسب ولا ابوكى ، اللى معندوش غير وظيفته وكام صيدلية فاتحهم ، ممكن يجمعوا معاكوا ودايع بالمبالغ دى كلها وموجودة باسمك من اكتر من 10 سنين …
+
…أولا ، انا محاولتش افهمك حاجة اصلا ، ثانيا دى حاجة تخصنى ومحدش له دخل بيها ، لا انت ولا أبويا ولا أى مخلوق فى الدنيا له حق انه يحاسبنى ، خاصة لو كان الشخص ده شارك فى موت أهم انسانة فى حياتى ، وشارك فى تدميرى انا شخصيا ، حتى ولو بطريق غير مباشر …
أنهت كلامها وتركته حائراً بدون أن يفهم تلميحاتها ، ماذا تقول ، ومن شارك فى موت من ؟
أما هى توجهت خارج الفيلا ، فهى الآن فى وقت لا تريد أى مخلوق يراها بهذا الشكل ، فهى تكره الضعف وعدم التحكم فى الذات .
ماذا لو علم الحقيقة ، ماذا لو علم الجميع الحقيقة ، حقيقة المال الذى تملكه ، حقيقة انه ميراثها وميراث أمها من ثروة عائلة المصرى .
يتبع…..
لقراءة الفصل التالي : اضغط هنا
لقراءة الرواية كاملة اضغط على : (رواية دموع ممنوعة)
