رواية نادية في ورطة الفصل السابع 7 بقلم كريمة حمادة
رواية نادية في ورطة الجزء السابع
رواية نادية في ورطة البارت السابع
رواية نادية في ورطة الحلقة السابعة
_ ردك ايه يا نسرين
: احم … ممكن مردش دلوقتى يا احمد .. يعنى سيبنى وقت افكر كويس
_ امممم … ماشى هسيبك تفكرى .. بس ارجوكى قبل ما اسافر اسمع ردك
: إن شاءالله …. هو انت مسافر امريكا ليه صحيح
_ زيارة لواحد صاحبى كدا وكمان شغل
” ابتسمت نسرين بتكلف وكملت اكلها … كان بيبصلها بتمعن وشرود .. عدل من قعدته وقال بهدوء :
نسرين .. هو لو حد فجأة لقى نفسه فى مكان تانى مش بينتمى ليه وشوية شوية اخد عليه وبقى جزء من حياته كأنه روتين يومي مثلا .. بس هو ساعات بيحن للماضى أو بيحس أنه مش .. مش فاهم هو مين أو عايز ايه يعنى .. فهمانى
” كلامه شتتها شوية .. شربت بق مية واتنهدت وقالت :
بص يا احمد انا شوية فهمت من كلامك .. بس هقولك حاجة تمماشى معاه ، ولنفترض أن الشخص دا مثلا كان حد كويس .. طيب .. بيحب الخير .. محبوب بين الكل .. وكمان شغله كويس وبيحبه .. هوب حصلت حاجة نقلته نقلة تانية خالص عمل حادثة مثلا بس عاش .. ولكن نقول فقد الذاكرة .. فقد كل شىء عن حياته القديمة … اتقلب انقلاب تام .. بقى شخص شرير وبيئذى .. شغله بقى وحش اوى فيه أذية للغير .. نقول يا سيدى أنه بقى رجل مافيا ولا عصابة ولا مدمن مثلا .. فى الحالة دى اقدر اقولك أنه اتحول للنسخة دى بفضل حد تانى مش من نفسه عشان زهق من حياته الجديدة مثلا ..
” ضربات قلبه كانت بتعلى وتعلى … مشتت وتايه .. دماغه هتنفج.ر من صدمة الكلام .. بلع ريقه بصعوبة وقال بتلعثم :
قص..قصدك ايه .. إن حد تانى قلبه يعنى يا نسرين
” استغربت من شكله اللى اتبدل فجأة دا وحست أن فى حاجة غريبة فيه .. قربت شوية منه واتمعنت النظر فى عيونه وقالت :
يعنى نفترض اللى لقيه واحد عاش على الفساد والظلم مثلا .. اخده وعالجه .. اوهمه بقصة عن حياته مثلا .. اى حاجة زى امممم نقول قاله انك كنت شخص مسالم وعايش مع أهلك حياة حلوة .. بس حد عدوكم قت.ل اهلك وحبيبتك وحاولوا يخلصوا منك كمان .. وفى النهاية حط فى أيده مسد.س وقاله خد تارك منهم .. وهوب حوله لمسخ عايز ينتقم وبس واتبدل الشخص الطيب المحبوب لشخص تانى بيئذى ويقت.ل وشغال مع مافيا دا لو مكانش زعيمها ولا رئيسها يعنى …
” خلصت كلامها وكانت بتحاول تستشف منه اى رد فعل .. وفعلا لاحظت شحوب وشه اللى ظهر فجأة والتوتر … شربت مية وهى لسة مركزة معاه .. مرضتش تتكلم تانى وسابته على راحته ومن جواها أصرت أنها تعرف عنه اكتر …
” فاق م شروده وهو بيتنهد تنهيدة قوية … كلام نسرين بيتردد عليه كأنها اغنية … مبقاش فاهم ماله ولا ايه اللى بيحصل معاه من سعة ما قابلها … بتيجى عليه ذكريات مشوشة مش واضحة … اصوات كتير بيسمعها … احلام وربما كوابيس بتتردد عليه فى نومه بمشاهد كأنه عاشها قبل كدا ….. ضر.ب بايده على المكتب بتاعه بعصبية مفرطة وقال بوعيد :
لا لا .. مش هسمح بكدا ابدا … هما حرمونى من حياتى واهلى واخويا … هما اعدائى الوحيدين وانا لازم اخد انتقامى منهم …. كلامها ملهوش اى لازمة بالنسبالى
يا شريف … شريييف
” دخل المدعو شريف وقال :
امرك يا ريس
الريس بجمود :
احجزلى طيارة لأمريكا بعد يومين بالظبط .. مش هنستنى تانى
شريف : امرك يا ريس .. تؤمر بحاجة تانى
الريس بخبث :
بفكر اسيب تذكار للشرطة .. تذكار بسيط كدا يفرحهم بيا
شريف بمكر :
تحب نعمل ايه يا ريس … نبدا بنسرين
الريس بسرعة :
لا.. نسرين لا
” بصله شريف باستغراب وهو حمحم بتوتر وقال :
اقصد سيبلى انا نسرين … محدش يجى جنبها خالص
شريف بطاعة :
امرك يا ريس … عن اذنك
” شاورله بالانصراف .. رجع بضهره لورا وغمض عيونه بتعب … استرجع صورتها فى خياله وقال بغلب :
ااااه يا نسرين …. ااااه
_________________________&
/ يعنى مش هتستسلمى يا نادين
: دا بعينك … عينك اللى هخزهقالك يا زعيم
/ عندك دا هيوديكى فى داهية يا نادين .. اسمعى الكلام احسن وخليكى زكية وجدعة
: عارف مشكلتك ايه يلا … انك مستخف بيا ، فوووق يا زعيم انا نادين الطاهر .. نادين الطاهر اللى مخلية امريكا كلها تخاف من اسمها
” قرب منها جامد وبصلها بخبث وهى مربوطة فى كرسى .. شعرها الكيرلى اللى بيغريه وعيونها الرمادى الحادة والقوية .. بعد كم خصلة بايده وهى بعدت وشها بعنف وقال :
اللى شافعلك طول لسانك عندى … انى بحبك يا نادين بس أنا مش هصبر عليكى كتير
” بادلته نفس الابتسامة ممزوجة بالكره ليه وقالت ببغض:
يا اخى ملعون حبك دا اللى شابك فى زورى … اتفلق انت وحبك يا زعيم … وعندى اموت ولا انى ابقى معاك
” بعد عنها بهدوء وهو بيرمقها ببرود وهدوء مميت … حبها لا دا عشقها .. هو أكبر زعيم مافيا مصرى أمريكى وقع فى حب ظابطة شرطة فى دولة اجنبيه … عرف عنها كل حاجة من صغرها لغاية اللحظة دى … بس الظاهر عشان يوصلها هيضطر ينفذ اول تهديد ليها قالولها صريح :
يا تختارينى يا تختارى اختك نادية يا نادين
نادين بغضب:
اقسم بالله لو قربتلها ما هرحمك يا زعيم .. مش هرحمك
الزعيم بمكر :
هتفضلى عندى يومين مربوطة كدا .. فكرى كويس يا نادين .. فكرى كووويس
” قفلت الشاشة بوجع ودموعها مغرقة وشها .. فيديو جالها بعد موت اختها .. الكل فاكرها ماتت فى مهمة تبع شغلها ولكن هى الوحيدة اللى تعرف أنه اتغدر بيها واتق.تلت على يد زعيم مافيا … قامت نادية ووقفت فى البلكونة وبصت للسما وقالت بقهر :
سبتينى أواجه لوحدى .. بعافر عشان اجيب حقنا لوحدى .. بدلتينى من نادية الهادية العادية لنادية بتجرى ورا سراب وعايزة تجيب حقها وحق اختها … سمعانى يا نادين .. اظهريلى دلوقتى زى كل مرة وكلمينى … قوليلى اعمل ايه يا نادين …. نااااادين
” عيطت بقهر وتعب وهى بتسترجع ذكرى ليها ..
: يا نادين افهمى احنا لازم نرجع مصر ، رجوعنة لمصر هيحمينا منه وانتى تقدرى تتعاونى مع الشرطة المصرية وهتساعدك
نادين بجمود :
نادية انا قولت رجوع لمصر لا … عايزة ترجعى ارجعى انتى لوحدك لكن أنا لا
نادية بتروى :
يا نادين يا حبيبتى ..
” قاطعتها ناديين بصرامة :
نادية … قولت خلاص
نادية بضجر :
طيب سكت … طب المهم دلوقتى هنعمل ايه
نادين بحذر :
اسمها هتعملى ايه …وانا اللى هعمل مش انتى ، انتى ملكيش اي دخل بالموضوع .. ركزى فى دراستك ومستقبلك وبس … انا مش عايزة اى حاجة تئذيكى يا نادية مش عايزة اخسرك انتى كمان
نادية بابتسامة :
ماشى .. بس انتى كمان اوعدينى انك هتخلى بالك من نفسك يا نادين
نادين بهدوء :
وعد ..وعد هخلى بالى من نفسى عشانك يا حبيبتى
” رجعت من ذاكرتها وهى بتضحك بقهر وبتقول :
وعدتينى انك هتحمى نفسك وترجعيلى … حرمتينى منك وسبتينى لوحدى … مكانش سهل عليا انى اشوفك وانتى بتتقت.لى يا نادين ..
_ برضو خطفتها يا زعيم … والله ما هرحمك
” حط المسد.س على راس نادية وهو ماسكها بغضب وقال :
بايدك تنقذيها يا نادين … ها قولتى ايه
نادين بغضب أشد :
دا بعينك يا زعيم واختى هخلصها منك وانت هتموت على ايدى … والله هقتل.لك يا زعيم
” وعلى غفلة بحركة مفاجئة صوبت على رجله وهو وقع على الأرض بيصرخ بالم .. جريت نادية على نادين وحضنتها بخوف :
نادية انتى كويسة .. عملك حاجة
نادية بخوف :
كويسة كويسة .. خلينا نمشى من هنا ارجوكى
نادين بجمود :
اهربى يا نادية اهربى ومتبصيش وراكى … وامسكى دى
_ ايه دى
” ابتسمت نادية بحب وهدوء وقالت :
دا عنوان لحد مهم فى مصر .. هتنزلى مصر وتروحيله يا نادية قوليله كل حاجة وهو مستنيكى اصلا .. عيشى الباقى من حياتك هناك يا نادية واتبسطى وحققى حلمك يا نادية
نادية بوجع :
وانتى يا نادين .. انا مش هسيبك انا مش همشى من غيرك يا نادين ارجوكى خلينا نمشى مع بعض
نادين بصرامة :
اسمعى الكلام يا نادية وامشى … امشى يا نادية ومتبصيش وراكى
” وبعد إلحاح شديد منها أنها متسبهاش .. اخيرا جريت تنفد بنفسها وهى بتبكى بقهر .. سابت اختها تواجه مصيرها لوحدها … سمعت صرختا رجت المكان مع صوت طلق ناري .. وقعت فى الارض وبكيت جامد وهى بتصرخ باسمها ..نااااادين ….
: رجعت لمصر وانا تايهة ومتشردة .. لولا اسماعيل بيه رجعنة للحياة تانى كان زمانى ميتة … ودلوقتى بقيت حضرة الظابط نادية الطاهر … سمعانى يا نادين ، انا بقيت حضرة الظابط نادية الطاهر يا نادين … خدت مكانك مع اختلاف الاسامى يا نادين …
” بعد لحظات كانت هديت وقاعدة بتتفرج على مسلسل كورى وبتعيط وفى نفس الوقت بتاكل بوشار .. كانت بتتشحتف باسى على المشهد .. رن فونها وكان آدم وردت بغضب :
خير عايز ايه
_ انتى بتتكلمى كدا ليه
: آدم باشا انا مش فضيالك دلوقتى خالص .. فقول بسرعة بتتصل ليه
_ طيب ، عايزك بكرة الصبح على الساعة ٩ تجهزى نفسك عشان هنروح مشوار مهم
نادية بسخرية :
ويا ترى هنقبض على حد ولا هنرقص عشان اجهز نفسى كويس بس
_ جرا ايه يا حضرة الرائد انتى هتنسى بتتكلمى مع مين ولا ايه … اللى بقوله تنفذيه … سلام
” رمت الفون بغيظ وهى بتقول :
ابو غتاتة دمك يا اخى … الله يكون فى عون اللى هتحبك والله … دا اللى هى انا يعنى ..
________________________&
” واخيرا انتهت الليلة وأتى الصباح ”
وقفت العربية عند مصنع الريس اللى باين عليه اثار الحرق .. نزل منها ادم واستنى وصول نادية بعد ما بعتلها العنوان على الفون .. وما هى إلا لحظات وجات نادية على الموتوسيكل بتاعها ولابسة لبس الشرطة الاسود ولامة شعرها كله لفوق ..
آدم باستغراب :
ايه اللى انتى لبساه دا
_ ايه لابسة ايه .. لبس شغل اهو
: تقومى تلبسى الزى العسكرى بتاع العمليات يانادية
_ لا اله الا الله … ما لبست امبارح فستان وكعب وطلع فى الاخر هنعمل فيلم اكشن … عايزنى اثق فيك تانى ليه بقى
” مسح على وشه بنفاذ صبر وقال :
اللهم طولك يا روح … انتى يابت انتى مبعوتالى ورطة ليا .. إنسانة على هيئة بلاء
نادية بزهق :
ارطم ارطم بقى … اخلص يا آدم باشا انا مش فضيالك
” مسكها ادم من هدومها وفضل يهز فيها بغلب وقال :
جرا ايه يابت ، ايه مش فضيالى دى ، هو انا جوزك عشان تقوليلى كدا كل شوية .. اتظبطى يا نادية بدل ما اظبطك بمزاجى … فااااهمة
” فلتت نفسها منه وهى بتبصله بغيظ وقالت :
فاهمة فاهمة … بلاش تهزيق بقى على الصبح الله
” اتنفس بنفاذ صبر .. طلع مسد.سه من جنب وسطه وقال بجمود :
خدى وضع الاستعداد .. هندخل مصنع الريس هندور فيه شوية
_ على ايه … هندور على ايه
” حمحم ادم بخفوت وقال :
مش عارف
نادية برفعة حاجب :
ها … مش عارف ازاى يعنى
” لعن نادين فى سره وهو بيجز على سنانه … ضحكت نادية عليه وضر.بت كتفها بكتفه وقالت بضحك:
يوه يا آدم باشا طلعت شقى وانا معرفش … خلاص يا سيدى هندخل ندور على اى حاجة تدين الريس دا
” هز راسه بيأس ومشى ناحية المصنع وهى وراه كاتمة ضحكتها بالعافية ..
دخلوا وهمو مصوبين مسد.ساتهم خشية أن حد يطلع فجأة … اتفرقوا وكل واحد بيدور فى مكان على اى حاجة … دخل ادم مكتب الريس وكان محروق بالكامل … بصله بضيق وقال :
يعنى قالتلى اجى هنا على أساس ايه دى .. دا محروق كله
” كمل بحث على اى شىء .. داست رجله على شىء رطب ، وطى لتحت وهو بيضغط بايده عليها .. زاح اللى عليه ولقى ملف مليان ورق .. فتحه بلهفة وخرج اللى فيه
مسك اول ورقة كانت باسم نادين الطاهر بجنسية أمريكية .. ظابطة شرطة تبع FBI ، مسك ورقة تانية وكانت باسم قاسم سويلم حمدان .. رائد شرطة مصرى وفورا عرفه لانه كان صاحبه واقرب صاحب ليه .. مسك الصور وقلب فيها وكانت بتحتوى على حر.يق عربية ، عربية بتتقلب ، جثة محروقة ، صور لبنت وشها مش واضح وهى مرمية على الأرض غرقانة بدمها ومغروز فى قلبها خنج.ر .. قلب فى الورق تانى لقى ورقة مكتوب فيها ( لو عايز توصل لباقى الحقيقة .. هتلاقيها لما تسافر امريكا ومعاك باقى المجموعة … وخلى بالك من نادية )
” لم الورق بهدوء وحطهم فى الملف .. خباه فى الجاكت بتاعه وخرج برة وهو راسم على وشه علامات البرود .. دور على نادية وهى بينادى عليها لغاية ما سمع صوتها جاى من اوضة بعيدة شوية … راحلها واتصدم من اللى شافه …
______________________&
: صباح الخير يا معلم مصطفى
مصطفى بابتسامة عريضة:
يسعد صباحك يا ست رباب .. عاملة ايه
رباب بهدوء :
بخير يا مصطفى .. احم كنت حابة اقولك حاجة
” خاف أنها تقول مش موافقة على عرضه .. فمحبش يسمعها منها وقال بحزن :
من غير ما تقولى يا رباب خلاص فهمت
: فهمت ايه
/ انك مش موافقة على عرض الجواز … على العموم كل شىء قسمة ونصيب يا ست رباب واوعدك مش هقفلك تانى
” ضحكت رباب وقالت :
يوه يا مصطفى .. مكنتش هقول كدا يا يابنى
مصطفى باستغراب :
اومال كنتى هتقولى ايه
: كنت هقولك موافقة يا جدع وتعالى اطلبنى تانى
” اتسعت عيونه بصدمة وقال :
بجد … يعنى انتى موافقة بجد يا رباب … تعالى احضنك
” وقفته رباب بمسد.سها بسرعة وقالت بحدة طفيفة :
عندك ، جرا ايه يا مصطفى فى ايه
مصطفى بفرحة :
متأخذنيش بس الفرحة نستنى نفسى والله … الليلة هاجى واطلب ايدك ونلبس دبل
رباب بابتسامة :
دبل؟ بالسرعة دى يا مصطفى
مصطفى بصدق :
والله تعبت فى انتظار موافقتك فمش لما توافقى استنى تانى يا رباب دانا ما صدقت انك اخيرا رضيتى عليا يا ستى
” ابتسمت بخفوت وقالت:
ماشى … بس بقولك ايه تيجى قبل العشا عشان من بعد العشا بسرح
/ تسرحى فين كدا
رباب بمكر :
كباريه .. اصلى بشتغل رقاصة وردية كدا جنب شغلى
” زقها مصطفى بقرف وقال :
طب اتكلى على الله يا ست رباب خلينا نشوف اكل عيشنا
” ضحكت رباب وقالت:
ماشى يا مصطفى .. لعلمك انا مبخليش حد يلمسنى كدا غير ابويا والا كنت دوقتك رصا.صة من مسد.سى دا
” رفع سا.طور وسكينة كبيرة فى وشهل وقال بنبرة مرعبة مصطنعة :
بتقولى حاجة يا ست رباب
” بصتلهم بخوف شوية وقالت :
مبقولش يا معلم .. مبقولش
/ اه احسب
: بقولك يا معلم معندكش كيلو كرشة كدا لاحسن نفسى هفانى عليها اوى
/ من عينيا … روحى شغلك وهتاجى تلاقى احلى طبق كرشة وممبار مستنيكى
: انا كدا هحبك والله
/ ياريت تحبينى ..
_ صبرى بدأ ينفذ عليك والله
: اتلمى يا نور واسكتى
_ قولتلك أسمى نورا .. نوراااا
عمر ببرود :
طيب يا نور .. اقصد يا نورا اتفضلى قوليلنا هنطلع من الكارثة دى ازاى
_ وانا مالى حد قالك تجيلى المكتب وتقفل الباب جامد كدا
: وانتى مقولتيش ليه أنه بيتقفل من برة بس
_ انت مدتنيش فرصة فجأة لقيتك داخل عليا وبتقفله جامد وعمال تقول فى كلام مش مفهوم و جيت تطلع لقيته مقفول ومراضيش يتفتح
” بص عمر للباب وبعدين بصلها بهدوء وقال :
نورا
_ نعم
” اتنهد بعمق وقال:
انا بحبك
_ نعم ؟ بت ايه
عمر بحب :
بحبك يا نور .. ازاى وامتى وليه معرفش بس انا حبيتك بجد
” بصتله لثوانى وبعدين ضحكت جامد اوى عليه .. هديت من ضحكتها وقالت :
بتحبنى؟ وانا مفروض اصدق صح ؟ انت عبيط يا عمر بيه ، امبارح مكلمنى وعايز تقابلنى برة وفى الاخر تسالنى على نادية وواحدة اسمها نادين … ودلوقتى جاى وبتقولى بحبك وانا مفروض اصدق صح … انا مش عبيطة ولا هبلة عشان تلعب عليا كدا يا عمر بيه … كلمة بحبك دى كلمة كبيرة اوى ميقولهاش غير اللى بيحب بجد وصادق فى حبه … لكن بص لنفسك وانت بتقولها … تعرف لو كنت شوفت على وشك ولو ٥٠ ٠/٠ بس انك صادق كنت صدقت واديتك فرصة .. لكن واضح اوى ان ورا كلامك دا فى حاجة تانى عايز توصلها عن طريقى … وانا مش عايزة اعرفها
” فتحت دورج مكتبها وخرجت منه مفتاح .. اتجهت ناحية الباب وفتحته وقالت ببرود :
الباب اتفتح اهو تقدر تتفضل وانا هنسى اى حاجة قولتها هنا
” قرب منها ووقف فصادها .. اتمعن النظر فيها وقال بنبرة مفهمتهاش :
هتندمى على كلامك دا بعدين يا نور .. اقصد يا نورا
” خرج وسابها مشتتة من مجرد جملة … قعدت على الكرسى بإهمال وهى بتتنفس بغضب وغلب وحطت راسها بين ايديها ..
: مسافر بكرة ؟ ليه يا احمد مش انت قولتلى انك هتسافر بعد اسبوع
_ للاسف صاحبى محتاجلى اوى ولازم اسافرله بكرة
: امممم .. ماشى يا احمد توصل وترجع بالسلامة يارب
_ طيب انتى فين دلوقتى
: مفيش .. معايا اجتماع مهم فى المقر كدا دلوقتى
_ اه … نسرين
: نعم يا احمد
_ عايز اقولك انك حتى لو موافقتيش .. هتفضلى احلى حاجة ظهرت فى حياتى الفترة دى
” ابتسمت تلقائى وقالت :
اللى عاوزه ربنا هيكون يا احمد
_ وانا هدعى ربنا انك تكونى من نصيبى يا نسرين
” قفلت معاه فجأة وهى بتعيط .. قلبها واجعها وحاسة بحاجة غلط .. حاسة بتخون مشاعرها لقاسم وفى نفس الوقت ابتدت تحس بحبها من ناحية احمد .. مسحت دموعها ونزلت من العربية ودخلت المقر واتجهت لمكتبها هى والبنات …
” أما عند أحمد بعد ما قفل معاها .. ضحك بسخرية وقال :
بت هبلة بصحيح مش عارف ازاى دى بتشتغل فى الشرطة اصلا لا وكمان قناصة
بتصطاد العصافير ومقدرتش تصطاد الريس اللى بيدوروا عليه واللى هو انا … غبية فعلا يا نسرين
” دخل شريف عليه وقال :
فى حاجة حصلت لازم تعرفها يا ريس
_ خير يا شريف
شريف :
الراجل بتاعنا اللى زارعينه وسط مقر الزعيم .. سمع حاجة كدا وقالهالى
الريس بانتباه :
سمع ايه يا شريف
شريف بجدية :
سمع واحد من رجالة الزعيم بيتكلم معاه وبيقوله أن البنت اللى بتلف حواليها واكيد يقصد نسرين انها ممكن تضيعك وتاخدك منهم ، والزعيم رد عليه أنه قريب هيخلص من ..
الريس بترقب :
من مين يا شريف .. انطق
” بلع ريقه وكمل :
سمعه بيقول أن قريب هيخلص من الريس ونادين ونادية
” عيونه وسعت بصدمة .. ازاى يخلص منه ومين نادين دى .. ويخلص من نادية ليه وهو ميعرفهاش اصلا .. بص لشريف بشحوب وهو كمل :
وكمان لما كان مع رجالة الزعيم وحاول يوقعهم فى الكلام عرف أن الزعيم قت.ل حبيبته عشان رفضته اسمها نادين الطاهر وهى كانت ظابط فى أمريكا ومنزلتش مصر نهائيا .. بس بعد فترة عرف انها عايشة وهى واختها بيحاولوا يدموره وياخدوه حقهم منه لأنه كمان كان السبب فى موت اهلهم.
” صدمة تانية يعرفها .. سال نفسه يا ترى فى حاجة تانى عملها الزعيم والسؤال الأهم هو ليه عايز يخلص منه .. وكأن شريف فهمه وكمل :
وكمان يا ريس سمعهم بيقولوا أن من كم سنة الزعيم جاب شاب كان عامل حادثة ونص وشه محروق .. عالجه وساعده يسترد صحته واوهمه أن الشاب دا أهله ماتوا على ايد الشرطة وليه أعداء وزرع فى دماغه فكرة الانتقام لغاية ما خلاه رئيس مافيا مصرية بحالها
” لغاية هنا وكفاية .. عقله ابتدى يتشوش اكتر .. كلام شريف مشابه لكلام نسرين .. دقات قلبه كانت بتعلى اكتر .. افتكر لما اول مرة مسك مسد.س والزعيم كان واقف معاه وأمره يقت.ل حد .. افتكر شحنات السلا.ح اللى كان بيهربها ، مخد.رات ، قت.ل ، وآخرهم العساكر وظباط كتير ماتوا على أيديه .. زاغت عينيه بتعب وهو مش قادر يتنفس .. رأف بحالته شريف وقال اخر حاجة :
الشاب دا طلع اسمه قاسم سويلم حمدان يا ريس
_ اسمه قاسم .. فجأة اختفى من حياتى كدا
_ كنت خلاص ابتديت احبه واتقبل حبه
_ كان اقرب صديق ليا
_ هبقى زى ظلك يا نسرين ومش هسيبك
” كلها اصوات لنسرين اترددت عليه .. تنفسه بيضيق اكتر ومعدش قادر يستحمل وكأنه مسجون جوة كهف … بعد لحظات استعاد تنفسه ونفسه وقال بغموض :
حالا يا شريف .. حالا تحجزلى على اول طيارة طالعة امريكا
_________________________&
: نادية .. نادية انتى فين
_ الحقنى يا آدم باشا
” جرى ادم ناحية الصوت .. كانت فى اوضة بعيدة شوية ولما دخل أتصدم لما لقيها راكبة فوق دولاب كبير .. بربش بعيونه ببلاهة وقال:
انتى ايه اللى مطلعك فوق
نادية بخوف :
بالله عليك نزلنى وطلعنى من هنا
ادم بحدة :
مش قبل ما اعرف طلعتى عندك ازاى وليييه
نادية بتوتر :
هقولك والله .. بص انا دخلت هنا ادور على حاجة فلمحت فوق الدولاب ورقة كدا حاولت اطولها واجيبها معرفتش .. فجبت الكرسى الكبير دا وركبت عليه وطلعت فوق الدولاب .. مسكت الورقة لقيتها فاضية للاسف
ادم بسخرية :
ومنزلتيش على الكرسى ليه تانى
نادية بجدية :
لا انا اطلع اه .. لكن انزل لا سورى معرفش للاسف
” مسح على وشه بزهق منها .. قرب للدولاب ومد أيده لفوق وقال :
طيب نزلى رجلك لتحت براحة .. وادينى ايديكى وانا هتلفاكى
نادية بترقب :
هتغدر بيا يا آدم باشا ؟
ادم بحدة :
اخلصى يا نادية خلينا نمشى
_ ماشى .. بسم الله
” ابتدت تنزل رجليها لتحت براحة وبعدين مدت ايديها الاتنين .. مدلها ايديه وقالها اقعى بكلك عليا .. سمت بالله وعملت زى ما قالها .. بس للاسف من تقل الوقعة رجله خانته ووقعتهم الاتنين على الأرض جنب بعض
نادية بالم :
اااه يا ضهرى يانى … منك لله يا آدم باشا
” كان مركز فى وشها عن قرب .. لأول مرة يلاحظ الحسنة اللى جنب شفايفها ووشها الابيض والهادى … اعترف لنفسه أنه اخر فترة بقى يحس بشعور غريب من ناحيتها وفى نفس الوقت مش فاهم نفسه ايه اللى بيحصله دا .. نفس الشعور بيحسه لما نادين تظهرله فجأة ودا تاعبه ومعصبه جدا ..
قاموا الاتنين ونضفوا هدومهم وطلعوا برة المصنع .. وقفوا برة للحظات وكان آدم بيتكلم فى الفون .. بعد ما خلص لف ليها ولقيها بتعمل حركات غريبة وسألها :
مالك بتترقصى زى البهلوان كدا ليه
” وقفت بتوتر وقالت :
ها لا مفيش ، متاخدش فى بالك
: متأكدة مفيش حاجة
_ بصراحة كدا
: ها
_ عايزة ادخل الحمام
: نعم ؟
” عملت نفس الحركات وقالت :
والله ما قادرة .. بالله
” كان عليه يخلص عليها دلوقتى بس مسك نفسه بالعافية وقال وهو بيجز على سنانه:
روحى يا نادية جوة اعملى اللى تعمليه … بسرعة
” جريت نادية على جوة بسرعة وهو هز راسه بيأس وتعب ، مرت دقيقة وفونه رن .. رقم غريب ولكنه حافظه .. ابتسم بجانبية ورد :
اوعى تكونى بتضحكى وانتى شيفانى هشت بشعرى منها
_ ياربى .. معلش يا آدم بقى استحمل
ادم بهدوء :
جيت المصنع يا نادين ولقيت ورق مهم زى ما قولتى .. بس ايه آخرة دا
_ آخرته لما تروحوا امريكا يا آدم .. فى خلال الأسبوع دا لازم تكونوا فى أمريكا
: ولما نروح لأمريكا هيحصل ايه يعنى … ولا هنسيب الريس هنا ليه
_ مش هتسبوه .. الريس زمانه على الطيارة لأمريكا يا آدم
” أتمالك نفسه أنه ميتعصبش ويزعق وقال بهدوء مميت:
نادين … اظهريلى وفهمينى كل حاجة ، انا لازم افهم منك انتى
_ سواء منى أو من اى حد تانى مش هتفرق .. ادم لو عايز ترجع صاحبك ولو عايز تعرف مين نادين كويس يبقى لازم تسافر امريكا .. ولاخر مرة هقولك خلى بالك من نادية يا آدم
: طب وانتى .. اقصد هتكونى فين
_ مطرح ما تكون انت موجود … انا هبقى موجودة يا آدم ، سلام
” قفلها معاها مع تنهيدة طويلة .. كان بيفكر فى كلامها لغاية ما جات نادية وهى بتقول براحة :
ياااه على الراحة يا فوزى
” ابتسملها بسخرية وقال :
حصلينى على المقر فى اجتماع مهم ..
نادية باستغراب :
اجتماع؟ ليه
: لما نروح هتعرفى كل حاجة .. متطوليش
_ طب بقولك
: خير
_ مش هتقولى احنا جينا هنا ليه
: امشى يا نادية بالله عليكى ما ناقص صداع
” مشى ادم وفضلت هى واقفة مكانها باستغراب :
تصدق بالله انك ظابط بارد … يا اخى تبا لك ..
/ الكلام اللى هقوله دا مهم اوى
_ قبل ما تقول يا سمعة … انا مفطرتش وجعانة
اسماعيل بغضب :
اللهم طولك يا روح .. هطلعك برة لو مسكتيش يا نادية
نادية بحنق :
خلقك بقى ضيق اوى على فكرة يا اسماعيل بيه
اسماعيل بسخرية :
ومين السبب ياختى غيرك يا بلوى
نادية بضيق مصطنع :
انا بلوى يا سمعة ، مكانش العشن علفكرة .. ما تشوفى ابوكى يا نورا
” كلهم بصوا لنورا بصدمة الا ادم كان عارف أنه ابوها .. ابتسمت ببلاهة وقالت :
أيوة اسماعيل بيه ابويا
رباب بعتاب :
اخس عليكى .. بتخبى علينا يا نورا
نورا :
يعنى على أساس عمرك ما شكيتى فى. الاسم يا بت
اسماعيل بصرامة :
مش عايز كلام تانى منك ليها … ركزوا معايا فى اللى هقوله .. عمر
عمر بهدوء :
نعم
اسماعيل بجدية :
عملت اللى قولتلك عليه
عمر : كله تمام
اسماعيل :
تمام .. اسمعوا بقى كلكم على بعض من بكرة الفجر هتسافروا على امريكا بطيارة خاصة لوحدكم
نسرين باستغراب :
امريكا ؟ ليه امريكا
“بصلهم بتركيز وهدوء وعينه بتجيب كل واحد فيهم .. اتنفس بثقل وقال :
هناك هيتم القبض على الريس ورجالته و … الزعيم
” اول ما سمعت اللقب دا وشها اتقلب للغضب وهى بتحاول تممالك نفسها ، فكمل اسماعيل بغموض :
بس عايز الريس عايش … فاهمين عااايش
” اتبادل النظرات الغامضة مع ادم اللى أومأله بهدوء وهما بيبصوا لنسرين بغموض أشد ..
__________________________$
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية نادية في ورطة)
