رواية غلبني حبك الفصل الثالث 3 بقلم كريمة حمادة
رواية غلبني حبك البارت الثالث
رواية غلبني حبك الجزء الثالث
رواية غلبني حبك الحلقة الثالثة
: خير يارب… الو
_ عمار
: صوتك هادى وفيه نبرة براءة مزيفة كدا ، اشجينى يا ريتاج
_ انا فى القسم
” عمار فجأة بعد الفون من على ودانه وضرب المكتب بعصبية لدرجة إن احمد ونورا اتنفضوا بخضة .. اخد نفس عميق وحاول يتمالك أعصابه ورد تانى وهو بيجز على سنانه:
فى القسم ليه يا ريتاج
_ احم ، عملت حاجة كبيرة كدا
: ليه قفشوكى بتضر.بى با.نجو
_ لا
: طب مسكوكى متلبسة وانتى بتسرقى مثلا
_ لا لا
: جابوكى من د.يسكو طيب
_ تؤ تؤ
: اومال ايه يا ريتاج الحاجة الكبيرة دى ، هتكونى مثلا وزعتى صورك على الناس وقولتى انتخبونى ولا ايه
_ قت.ل
: ها
_ مسكونى وانا بحاول اقت.ل حد
” بعد نص ساعة بالظبط ”
: تعالى هنا يا ريتاج وحياة امى منا سايبك ، اوعوا سبونى
_ بالله عليكم ما تسبوه
: يابت بقولك تعالى .. دانا هطلع رو.حك فى ايدى ، ما تسبنى يعم
” ريتاج جوا زنزانة منفردة بابها من القضبان وقاعدة لجوة وخايفة تقرب ودا لأن عمار كان متعصب جدا وبيحاول يطولها بس اتنين من العساكر مانعينه..صر.خ بعصبية جدا لدرجة أن ريتاج خافت منه لأول مرة فاتقدمت براحة ووقفت وهى بتحاول تدعى الثبات ، ففلت نفسه من العساكر واتقدم منها ووقف وهو بيحاول يتمالك عصبيته ويتكلم بهدوء :
قت.ل ليه ؟ احكى احكى متخافيش منى
ريتاج بلجلجة : لا.. احم ، بص ..مش عارفه اقول ايه
: قولى ايه اللى دفعك لكدا ، يلا يلا سامعك
_ مسكت مسد.س وضر.بته بيه
” ضر.ب عمار بايده فى القضبان بعصبية جدا ، وهى خافت ورجعت لورا وبيحاول يطولها:
تعالى هنا يا ريتاج ، هخلص منك يعنى هخلص منك بقولك تعاااااالى
” وبعد لحظات كانت ريتاج فى مكتب الظابط ومعاها عمار قاعد وهو بيبصلها بغضب العالم كله ، فعملت نفسها مش واخدة بالها وفضلت تبص فى كل مكان فى المكتب ..
الظابط : طيب يا انسة ريتاج ، ممكن تتكلمى وتقولى حصل ايه
” اخدت نفس عميق وابتدت تتكلم : انا حضرتك كنت ماشية عادى مروحة البيت ، وهو طلع عليا بعربيته وكان هيخبطنى ونزل منها يتخانق معايا على انى ماشية غلط مع أنه هو اللى دخل فيا اصلا ، كلمته بالذوق منفعش وفضل يزعق ويشت.م وغلط فيا وانا عشان بنت طيبة وبتحب الخير ومليش فى المشاكل اعتذرت ومشيت
عمار باستنكار : نعم ياختى ، انتى ايه بالظبط ..مين دى اللى طيبة وملهاش فى المشاكل
_ لو سمحت يا باشا قوله يسكت عشان اعرف اكمل
الظابط : استاذ عمار ياريت حضرتك تهدى وخلينا نسمعها
” بصلها بنظرات متوعدة ورغم أنها خافت منه لكن محبتش تبين وكملت كلامها : مشيت كم خطوة ولقيته جيه ورايا ومسكنى من دراعى ، طبعا أنا الد.م فار فى عروقى قومت ضر.باه بالشنطة وزعقتله وفرجت عليه الناس ،وهو مسكتش وفضل يقول انى مراته ومتخانقين وبتاع ومسكنى تانى وشدنى من دراعى جامد لدرجة انى حسيت أنه اتخلع والله والله يا باشا ، فمحستش بنفسى غير وانا بفلت منه ايدى بالعافية وجريت على العسكرى اللى كان واقف بعيد وبقوله يلحقنى منه وبرضو اتكلم وقال انى مراته ، فأنا اتعصبت جامد وسحبت سلا.ح العسكرى وضر.بته بيه ، وبس هو دا اللى حصل كله
” عمار رغم أنه كان متعصب منها ، إلا أنه غضبه كان أكبر من الراجل دا أنه ازاى يتجرا ويمسكها ويقول انها مراته كمان ..
الظابط : على العموم يا ريتاج هو مماتش
ريتاج بفرحة : بجد
الظابط : اه اصلا الرصا.صة جات فى دراعه وكمان بسيطة بس هو من الخضة اغمى عليه
عمار بجدية : طيب يا باشا ودلوقتى هى المفروض موقفها ايه ، المفروض انها هى اللى تقدم بلاغ فيه باللى عمله دا
الظابط : مفيش داعى ، كدا كدا ريتاج هتمشى من غير ما يتعمل فيها محضر ولا هى تعمل محضر
“بصوله الاتنين باستغراب وهو كمل : رغم أنها صدفة بس انتى يا ريتاج خلتينا نقبض على واحد هربان اساسا ، هربان من مستشفى الامراض النفسية والعقلية
ريتاج بفرحة عارمة: اللهم صل على النبي ، دانا حققت العدالة بقى ، دا على بكرة هلاقى أسمى مكتوب فى الجرايد انى ساعدت الحكومة تقبض على واحد هربان من العدالة
عمار بنفاذ صبر : اللهم طولك يا روح ، اتنيلى يا ريتاج واسكتى اسكتى
” بصتله بتشنج والظابط ضحك عليهم وقال : تقدروا تتفضلوا ، بس ياريت يا انسة ريتاج المرة الجاية تنشنى صح عشان بس نقدر ناخد موقف
_ اوعدك يا باشا المرة الجاية هبهرك ، ولا اقولك انا هروح عند يوسف باشا هيفرح اوى لو عرف انى عملت حاجة ممكن تحبسنى
الظابط بضحكة مكتومة : حكالى عنك ، دانا كلمته قبل ما ادخلك واتبسط اوى انك مرحتلهوش … اتفضلوا
********
_ انت متعصب ليه كدا ، ما خلاص اهو خرجت ومفيش حاجة تانية
: اطلعى شقتكم يا ريتاج لو سمحتى حابب ابقى لوحدى شوية
_ لا مش هسيبك الا لما ترد عليا
عمار بزعيق : وانا قولتلك اتفضلى يا ريتاج اطلعى
ريتاج بضيق: انت بتزعقلى ؟
” عمار اخد نفس عميق وقال : ريتاج ارجوكى تجنبا لأى حاجة تحصل بينا بالكلام دلوقتى ، اطلعى شقتكم وسبينى لانى أعصابى تعبت ومش قادر اتكلم
_ بس أنا مغلطتش يا عمار ، انا دافعت عن نفسى أنا كنت لأول مرة اخاف يا عمار ، دا مسكنى جامد من دراعى ومصر ياخدنى ، ما بالك لو اخدنى فعلا غصب واهو طلع مريض نفسى وكان ممكن يعمل فيا حاجة وبعدين يقولوا معلهوش حرج لأنه ببساطة مريض نفسى
عمار بزعيق وعصبية : ما هو الهانم لو تبطل عناد ومشاكل ، مكانش دا حصل ، كل يوم مشكلة شكل وتعالى يا عمار الحقنى … انا. انا تعبت يا ريتاج تعبت من فكرة انك ممكن تتدخلى فى مشكلة انا ابقى عاجز انى اساعدك تخرجى منها زى كل مرة ..
ريتاج بحزن : انا مكنتش اعرف انى مديقاك اوى كدا يا عمار وتعباك معايا
“ابتسم عمار بسخرية وقال : تعبانى؟ ريتاج انتى مستوعبة بتعملى ايه اصلا … مش واخدل بالك أننا مخوفانا عليكى ، مش واخدة بالك أن مرات عمى ممكن يحصلها ايه لو جرالك حاجة مفكرتيش فى بابا وفاطمة ، وانا..
_انت ايه ؟ خايف عليا برضو ولا فى حاجة تانى
“ابتسم عمار بخفة وقال وهو بيركب عربيته : امشى نامى يا ريتاج وانا هروح لواحد صاحبى اهدى كدا
“ركب العربية واتنهد بحزن وكان لسة هيتحرك بس لقى ريتاج بتخبط على الازاز ، نزل الازاز وبصلها باستغراب وهى قالت بضحكة : برضو مش هسيبك فى حالك يا محامى الخلع
” مشيت وهى بتضحك بخفة وهو ابتسم وقال : ولا انا هسيبك يا جلابة المصايب
*******
” دخلت ريتاج اوضتها وحمدت ربها أن مامتها عند فاطمة ، اترمت على السرير وبصت للسقف بشرود ، افتكرت كل احداث اليوم ، اتنهدت بتعب وكانت قايمة بس وقفها صوت وصول رسالة ، فتحتها بملل وقرأتها” عارف ان اليوم كان متعب بالنسبالك ، بس متزعليش كل حاجة تهون عشانك يا ريتاج ، وانا هعمل اي حاجة عشان تبقى مرتاحة ومتتعبيش ”
” زمت شفايفها باستغراب وقالت : ايه دا ، هو مركز اوى للدراجاتى معايا يعنى … لو اللى فى بالى طلع صح يبقى يا ويلك منى بقى ..
” أما عند عمار رجع متأخر من عند صاحبه ، دخل اوضته وغير هدومه وكان لسة هينام بس وقفه صوت بباه بينادى عليه :
نعم يا بابا
محمد : اقعد يا عمار حابب اتكلم معاك شوية
: اتفضل
” اتنهد محمد وقال : حاسك تعبان يا عمار وشايل هم على قلبك
عمار بتوتر : ليه حضرتك بتقول كدا ، انا كويس اهو
محمد : عارف يا عمار وانا فى سنك ، مكنتش بالشخصية دى ابدا ، كانت شاب طايش بس مش معناه واحد مش محترم لا بالعكس أنا بحاول ابقى قريب من ربنا واهلى وبحب الضحك والهزار ووقت الجد جد ووقت اللعب والهزار هزار ، بس المسئولية بدرى كبرتنى عن عمرى وغيرتنى ، تخيل تلاقى نفسك شايل بيت لوحدك وعلى كتافك مسئولية اخواتك ووالدتك .. بس اول ما دخلت حياتى فاطمة قدرت انها ترجع محمد تانى ، معاها ببقى زى الطفل مع والدته بيضحك ويلعب وبرة بكون محمد كبير العيلة
عمار بحب : ربنا يديك طولة العمر ويديمك لينا يا بابا
محمد : تسلم يا حبيبى ، اللى عايز اوصلهولك ، انك بلاش تضغط على نفسك وتشيل جواك ، تعالى احكيلى أو احكى لمامتك أو حتى …. احكى لريتاج
عمار بحنق : بالله عليك يا بابا ما تجبلى سيرة جلابة المصايب دى
“ضحك محمد بعلو صوته وقال بنبرة خبيثة : ليه عملت ايه المرادى
عمار بحنق : زى كل مرة بروح اجيبها من القسم
محمد بمكر : الا قولى يا عمار ، هو انت بتساعد ريتاج عشان بنت عمك ومسئولة منك ولا شغلك يحتم عليك تساعدها … ولا فى احتمال تالت كدا ها
” بصله عمار لحظة وبعدها ابتسم بسخرية وقال : والله انت يا حج محمد دماغك دى كبرة خالص ودايما قافشنا
محمد بغرور : انا بابا يلا … قوم يلا نام عشان بكرة يوم زحمة وطويل شوية
“قام عمار وباس راس والده وقال : تصبح على خير يا حج… وربنا يهديك عليا يا حج وتبطل تقفشنى كدا
محمد بضحكة خفيفة : هبقى افكر يولا
ربنا يريح بالك وقلبك يابنى انت وجلابة المصايب التانية دى ..
*********
” وفى الصبح ، كان البيت زحمة وكله اصوات كتيرة.. ودا لانه يوم الجمعة اللى بتجتمع فيه العيلة كلها ..
اجتمعوا على سفرة الفطار فى الصبح بدرى ، كان الهدوء هو المسيطر على المكان ودا لأن محمد بيحب الفطار يكون فى هدوء ..
رانيا : عمار ممكن طلب
: نعم
رانيا : ممكن بعد صلاة الجمعة توصلنى بعربيتك بيت جدى عشان احضر خطوبة ابن عمى
: حاضر
“ريتاج كانت متبعاهم ومتغاظة منهم ، فقالت بغيظ : والحلوة متعرفش تروح لوحدها ولا ايه
رانيا باستفزاز : لا مبعرفش
ريتاج بتشنج : ليه نغة ولا صغيرة ، دا بيت جدك بعدنا بكم شارع اصلا ، يعنى مش محتاجة عربية
محمد بصرامة : ريتاج
ريتاج باسف : اسفة يا عمى
” بعد الفطار اتفرقوا كل واحد فى مكان واللى بيعمل حاجة
عمار كان قاعد فى ركن وماسك فونه وبيبتسم فنطت عليه ريتاج وقالت : ولا يا عمار
: خير
_ مش هتصالحنى ؟
“بصلها بتشنج ومردش ، وهى كملت : بص صالحنى المرادى والمرة الجاية اوعدك هتصل بمحامى غيرك
: امشى يا ريتاج مش فاضيلك
_ ليه وراك ايه ، ما انت قاعد اهو فاضى وماسك فونك
: ماسك فونى هو شغلى ، اتطرقى يلا
_ يعنى معتصالحنيشى
: لا
_ ولا عتجبلى باتيه بالجبنة
: لا
_ ولا …
: امشى يا ريتاج بقولك
” زمت شفايفها بضيق وبصتله بشك ، مسكة فونه علطول مشككها .. قعدت بعيد عنه نسبيا وكل شوية تفتح تطبيق “صراحة” بس متلاقيش رسايل جديدة
بعد دقيقة بالظبط جاتها رسالة فتحتها بلهفة وقرأتها ” ربنا يغلبك يا ريتاج زى ما مغلبانى معاكى ”
بعد ما قرأتها فورا بصت لعمار ، دايما بيقولها الجملة دى عشان يستفزها ، قامت ومشيت براحة من وراه وحاولت تلقط اى حاجة من فونه وتشوفه بيعمل ايه بس معرفتش ، لقيته بيبتسم اكتر فقربت منه وقالت بضيق : بتضحكك اوى ولا ايه
: هى مين
_ اللى بتكلمها يا خويا
عمار بخبث : طب وانتى مالك بكلم مين ولا بضحك ليه
ريتاج بتوتر : ها ، لا ماليش طبعا ، بس يعنى اصلك شكلك ملحوظ للكل
: روحى يا ريتاج اقعدى مكانك بالله عليكى
_ ماشى ماشى مصيرى هعرف علفكرة ، عينى عليك يا محامى الخلع
: تسلملى عيونك يا جلابة المصايب
” بعد صلاة الجمعة ، كانوا مجتمعين على السفرة وبيتغدوا ،
ريتاج كانت كل شوية تبص لعمار بضيق وخصوصا أنه كل شوية يمكس فونه ..
ريتاج بخبث : جرا ايه حج محمد ، من امتى واحنا بناكل بنمسك تليفوناتنا ونسيب الاكل
” بصلها عمار واتوعدلها وهى غمزتله بمكر ، فقال محمد بحزم : ركز فى الاكل يا عمار وابقى بعدين امسك الفون
وداد : فكرتى فى الموضوع اللى قولتلك عليه يا ريتاج
ريتاج بضيق : لسة يا ماما
فاطمة : خير موضوع ايه يا وداد
وداد : ريتاج متقدملها عريس
” عمار كان بيشرب واول ما سمع كلمة عريس وشرق فكح جامد ، فبصتله ريتاج بترقب وقالت وهى بتوجه كلامها لمامتها : بس هبقى افكر يا ماما ، وإن شاء الله تفرحى بيا قريب
وداد : ياختى يارب بقى
رانيا : مين العريس دا يا مرات خالى
وداد : طارق ابن واحدة كانت جارتنا زمان عند بيت ابويا
ريتاج بمكر : لا متقوليش يا ماما ، معقولة طارق اللى كان بيحبنى من واحنا عيال
عمار باستنكار : نعم ياختى
ريتاج : أيوة والله يا عمار ، كنت كل ما اروح بيت جدى يفضل لازقلى ويجبلى حلويات ويقولى هتجوزك يا ريتاج لما نكبر
محمد بخبث : يعنى طلع فى حد بيحبك يا ريتاج
ريتاج بكسوف : أيوة يا عمى
عمار بتشنج : ايه دا ، مكسوفة بجد يعنى
فاطمة : سيبها يا عمار تتكسف الله
وداد : ابقى فكرى يا بنتى عشان ارد عليهم
ريتاج : حاضر يا مامى
عمار بضيق : لا مش موافقين
ريتاج : نعم ؟
عمار بتوتر : اقصد يعنى ، احنا معندناش بنات تتجوز الا لما تخلص تعليمها وانتى لسة فاضلك سنتين ، فاهدى كدا واسكتى
ريتاج بعناد : طب ايه رايك هوافق ، دا طارق يعنى
” قام عمار بضيق وقال وهو ماشى : مش هو اللى هيغلبك ويهدك يا جلابة المصايب
ريتاج بخبث : هنشوف يا محامى الخلع
_________________&
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية غلبني حبك)
