رواية هلع الفصل الثالث 3 بقلم آية
رواية هلع الجزء الثالث
رواية هلع البارت الثالث
رواية هلع الحلقة الثالثة
//
خش موسى والتفت عليها >> ميرا
ميرا ماردتش
موسى مسكها مع يدها وفطنت >> خوذي نفس و ماتخافيش عشان ما تدوخيش ، بحتي فيا شوفي لعيوني
بحتت فيه وخشت اذكرت اليوم نفسه نفس الوقت ونفس اللحظة لي خشو فيها لحوشهم وشافو الجثتين مغرقات في دمهن اذكرت عياطهم و الخوف و الهلع اللي عاشاته وقتها
كان موسى فاهم الي حست بيه بس سكت و ماحبش يحكي فالموضوع
ميرا >> موسى انت عمرك ما حتريح معايا
موسى>> استغفر الله العلي العظيم خشي النبي غيري دبشك وصلي بالله مش وقت كلام
ميرا>> شفت امك اليوم كيف تشوفلنا ؟
موسى خش جاب كباية عصير>> ميرا العيله كلها تعرف القصة ويعرفو اني نحبك ونبيك معايا حتى وانا مش متريح
ميرا>> يعني فعلا مش متريح
موسى >> تشربي عصير😪
ميرا هزت براسها>> انا بنخش ندوش ونرقد من امس عالقه
موسى >> تمام باهي
خش موسى للدار غير دبشه و كان واقف عالمرايا يمشط فشعره على طلعت ميرا شعرها مبلول جت جنبه
موسى>> جففيه حتمرضي
ميرا >> حمو عادي حينشف بسرعه
موسى هز بكتفه وابتسم ببراده>> نشفيه “مدلها الاستشوار ”
ميرا>> فكني من الاهتمام عشان مانبيش
موسى>> منيش مهتم بس لو مرضتي معنديش لكي جو اني نعانيك بلا ثقة زايده 😂
ميرا حطت الاستشوار>> حنعاني روحي بروحي
موسى نزل عيونه ورد رفعهن>> البسي باهي دبشك
ميرا >> اطلع
طلع موسى للصاله غيرت ميرا دبشها ومعش فتحت باب الدار
شويه وخش لقاها مطوحه عالسرير راقده قرب منها فتحت عين وحده
ميرا>> بتطلع ؟
موسى>> اه
ميرا>> للاستراحه
موسى >> اه نراجي فيك ترقدي عشان نطلع
ميرا>>مش كنت نعسان وبترقد ؟
موسى>> طار نومي
ميرا غمضت عينها وكان النعس غالبها خمس دقايق وقعد يسمع فصوت نفسها وهي خشت في النوم
اطمن انها رقدت و طلع للاستراحه ، وكانت هذي حالته اغلب الوقت لما يسخن الجو بينه وبين ميرا يطلع بعد يطمن انها رقدت ويمشي للاستراحه فالليل يهرب منها و من فكرة انها حذاه ومش قادر يديرلها شي
//
//
في مكان ثاني فنفس الليله عند رسلان اللي ماسك تلفونه
اسير >> ماردتش
رسلان هز براسه>> لا
اسير >> فوتها خلاص
رسلان بحت فيه >> هي خمس دقايق نمسح رقمها وتو نفوتها تم
اسير >> مش وقت تهزاي بكل انعنك الله ما فتتها
رسلان>> ماتبيش تروح انت ؟
اسير >> حبيبي هضا شارعنا روح انت الحوشكم ولا ماخلتلكش عقل تفرق بيه 😂
رسلان ضحك>> نشوفك بكرا
اسير >> حل غاية مانشوفكش بس الله غالب زاقبلي
رسلان>> غصبا عنك
طلع رسلان من منطقة اسير صاحبه ومشى شور حوشهم وطول الطريق يشوف التلفونه يبي يشوف لو سما ردت عليه وبرضو ما فيش اي رد منها
//
//
عند موسى اللي كان فالاستراحة مع تيّح صاحبه
نزل موسى للمسبح وقعد تقريبا ساعه وهو فيه لحد ما دهش وتيح قاعد عند المسبح على تلفونه وعيونه على موسى
طلع موسى بعد ما قريب انقطع انفسه وهوا فالمسبح
تيح>> شي يوم ح تقتل روحك بالعوامه هذي
موسى مسك دخانه >> عالاقل حاجه تفرغ
تيح مسك دخان موسى خذا واحد موسى كره منه>> من امتى ادخن مش قلنا تبطله
تيح>>واحد مايضرش
طلّع موسى الولاعه وولع له
تيح>> مافش جديد ؟
موسى نفخ>> لا
تيح >> تحبها ؟
موسى بحت فيه>> انت اتعرّف عليا من جديد ولا شنو ؟
تيّح ضحك >> لا بس نبيك تهدرز 😂
موسى >> نحبها اه ومعش تحكي عليها
تيح >> الرجل الشرقي الغيور 😂😂
موسى ضحك وصبا >> الساعه ٣ مروح ولا قاعد؟
تيح>> لا بايت هنا بكرا عندي شغل فالمطار قريب من هنا
موسى >> باهي تمام عوامه لا اه ! وبروحك لا ودخان لا ومجهود لا
تيح >> لوزا راه عمري ٣٠ الله يرحم بيّك ماتكثرش عليا ساد امي فالحوش
موسى>> انبه فيك بس
تيح>> شكرا ع اللقاقه اطلع بس
عزق موسى الدخان من يده وطلع شور حوشه
//
//
كملن ايام العيد اللي مشى عادي عليهم كلهم
يومها كانت سما فالجنان ماسكه كبايه في يدها و باليد الثانيه تلفونها و مطبسه راسها على نزلت عمها عاشور
سما >> صباح الخير
عاشور >> صباح الخيرات كيف حالك اليوم
سما >> الحمدلله
عاشور >> قتلك اليومين الجايات ح يجي رسلان
سما >> عليش ؟
عاشور >> مقابله مش قلنا بعد العيد !
سما سكتت
عاشور >> في حاجه؟
سما >> لا
طلع عاشور ومسكت سما فالكبايه يلي فيدها لحد ما تكسرت في يدها ماحستش الا بدم
فطنت الروحها وخشت للحمام غسلت يدها ولفتها بدون ما تداويها ولا تشوف شن كبر الجرح
نزلت سالمة من فوق خشت ادور على سما
روان >> كانت فالجنان نسمع في خالو يحكي معاها
سالمه طلعتلها لقتها تلم فالكبايه المكسورة
سالمه>> هييييي شن فيه
سما>> وطي صوتك مفش شي انكسرت مني الكبايه بس
سالمه>> ويدك كنها ؟
سما >> خلاص قلنا اسكتي
سالمه>> حولي تو نلمه انا
وخرت سما ولمن الكبايه المكسوره ومسحت مكان الدم
سما >> خلاص ما تبحتيش فيا هكي انكسرت في يدي مش قضية
سالمه>> سكتت يا اوڤر
سما >> رسلان حيجي فاليومين هذينا
سالمة >> والله ؟ حتطلعي ؟ شن حديري
سما >> ماعنديش ولا جواب خلي يجي يومها وساهل
سالمة>> خلينا نخشو حموو
سما >> كنك انتي ؟
سالمة>> تعاركت مع حسن
سما>> وشنو الجديد ؟ ما ديما متعاركين
سالمة>> المره هذي تعاركنا لنا خمس سنين وانا كل يوم نكبر معاه انخطبتله وانا فرخه وتوا خاشه فال ٢٤وحنكمل جامعه خلاص بنتخرج ومافيش ولا جديد تخيلي من الكلمه هذكي ولا خطوه دارها ورايح متغير ومعش يكلم فيا يعني فوق ما انا معلقني مافيش اي اهتمام!
قتله معاك اسبوع تقرر ياتجي تحدد العرس رسمي يا اما كل حد في حاله وانا المره هذي قد كلامي لانه حتى بابا يزن وماما تهزب وانا نفسيتي تحت الارض
سما >> ما تشغليش بالك انتي حطيتي الموضوع كله في يده هوا خليه يقرر خلاص فوتي
خشن البنات جوا وقعمزن يهدرزن مع روان
//
//
عند ميرا
ناضت من النوم طلعت الصاله ما لقتش موسى قاعد
بحتت فالساعه كانت عشره استغربت لانه مش وقت طلعته
فتح باب الحمام وطلع
موسى لقاها مصبيه>> كنك؟
ميرا>> نحسابك طلعت
موسى >> لا
ميرا >> ما فطنتلكش امس لما روحت نحسابك بتت برا
موسى >> انتي نومك ثقيل بس روحت وخذيت دبشي من حذاك و دوشت ورقدت برا
ميرا >> اهااا والله ماحسيت
موسى مشى شور المطبخ>> بعدين وين عمري بتت برا وسيبتك
ميرا >> منعرفش قلت بلكي خطرلك
موسى >> معش تفكري
ميرا ماردتش >> بندير قهوة تبي ؟
موسى>> انتي ح اديريلي انا قهوة؟
ميرا >> قهوة راه مش عصبان
موسى >> مش فالحاجه فالفكرة نفسها ” وضحك ببرود”
ميرا>> عارف مش دايرتلك
موسى>> مانبيش اصلا طالع حنشربها برا
ميرا >> وين ماشي
موسى قرب منها نزل راسه>> جهنم ❤️🔥
ميرا ضحكت باستفزاز ونزلت راسها بهروب >> مش قاعد فيها ؟ كيف بتمشيلها
موسى وخر ورفع راسه>> ديري قهوتك عشان مش حنتنرفز ماتحاوليش
//
//
يوم جيّت رسلان عند سما رغم رفضها وقرارها اللي عارفته بينها وبين نفسها بس كانت متوتره
خش رسلان اللي كان بنفس التوتر للصالون و كان معاه عمهن عاشور و أحمد حكو شويه مع بعضهم كلام عادي وطلع عاشور
أحمد >> قبل ما نكلم سما تخشلك وتحكي معاك انسى انه عاشور وكيل عليهن آنا متأكد انه سما حتوافق ومن غير ذكر اسباب بس سما ماتجيش تشكي منك سوا توا ولا بعدين سما مش حمل تعب لو في نيتك اي شي سيء لها تقدر اتوكل توا ولا عاشور ولا اكبر كبير فالعيله يقدر يحكي حرف معاك
رسلان ضغط على يده >> انا جاي نخطب وزي ما يقولو خشيت البيت من بابه و مافيش في نيتي اي شي سيء اتجاه بنتكم واطمن مش حنستغل ظروفها عشان باتها متوفي انا ولد ناس وعندي اخت ونعرف العيب كويس بكل عمها وحقك تخاف
بس صدقني ماتخافش عليها وهي معايا انا بذات
طلع احمد بدون ما يرد بشي و مشا كلّم سما
خشت سما بلبستها العاديه و ايشرب معزوق ووجه رغم انه كان يحاول يبتسم بس كان الحزن غالبه ورغم هكي كان حلو في نظر رسلان اللي رفع عيونه بمجرد ما خشت
سما >> اهلين
رسلان ابتسم >> اهلا
سيبت كرسي بينهم وقعمزت فالكرسي يلي بعده ضحك رسلان
رسلان>> اسمها مقابله شرعيه يعني عادي تقدري ترفعي عيونك وتبحتي فيا عشان مرات ما نعجبكش وترفضي
سما رفعت عيونها وبحتت فيه وابتسمت>> انت عارف انه كل شي شكلي وقتلك ف اول مكالمه اسبابي وما فيش مجال للرفض ابدا
رسلان>> لالا تقدري ترفضي عادي وحقك لو ما اتفقتيش معايا
سما >> ممكن انت سامع بظروفي و ماتعرفش الا اللي حكيته لكي في وقت المكالمه بس انا موافقه عشان عمي عاشور بس و عشان مانبيش نخش في قصص معاه بنكسر الشر عشان انا عقلي كله مع بابا وعبودي الله يرحمهم ، وحالة ماما ووضعها يعني انا لا عقلي في زواج ولا قلبي ممكن انه يدق ويحب حد اصلا ومنبيش حد ينظلم معايا
حكيتلك مره وهذي الثانيه اللي نحكيلك انت اللي تقدر ترفض وتوخر مش انا عشان مش حتلقى حب مني ولا حتلقي قلب اصلا في الوقت الحالي يعني
رسلان>> ايوه زي ما قلتي فالوقت الحالي يعني ممكن لقدام حتحبيني ونحبك عادي
سما مسكت يدها المجروحه بالقوه بدون ما تفطن >> مش شرط كل من خذو بعضهم حبو بعضهم عادي فالظروف العاديه وتصير فما بالك في ظروفي انا
رسلان ما ردش على كلامها >> يدك كنها
سما نزلت عيونها على يدها >> جرح بسيط
رسلان >> وين البسيط قاعده يدك دم من تحت القارزه
سما >> حنخش نغسلها مش موضوع “وصبت”
رسلان >> سما لما نرن ردي على تلفونك!
سما >> مانوعدكش
رسلان>> عالاقل اليوم عشان ما كملتش كلامي
هزت براسها و خشت
خش عاشور وحكى شويه مع رسلان انه ما يبوش لا صبايا ولا خطبه ولا شي خلاص هكي يعتبرو مخطوبين
مش ناقص بس غير يجيب رجاله ويديرو دفع عشان يكون كل شي رسمي و العرس امتى ما هو يقدر يقنع سما
//
//
في الليل بعد طلعت رسلان كانن البنات يهدرزن فحوش جدهن
وسالمة واخذه جنب وتحكي مع حسن بتلفون
سالمة>> قتلك معش ترن عليا لحد ما تقرر قرارك
حسن>> شن اللي صارلك ؟ ماه لنا سنين على نفس الحال شن جد توا
سالمة>> اللي جد انه انت مش معبر شي ضامن اني معاك ومتحمله عصبيتك اللي زادت اخر فتره وقلة اهتمامك وكل شي وانت ولا على بالك لافكرة فيا ولا قعدت معايا حسن في اصعب ايام حياتي في موتت عمي انت جيت كيف الضيف عزيت ثاني يوم انت وهلك بعدها معش كلمتني بحجة انه عارفك مش فاضيه واكيد حايسه !
برغم اني فوقتها كنت نشوف في سما وميرا يتقطعن وكنت نشوف في بابا حزين على خوه و جديده مرضت بعد سمعت الخبر ، وام البنات الي انت عارف وضعها كيف من العزا وهي في حال اخر كنت بروحي ونبيك معايا تقويني عشان نقدر نقويهن
بس ما لقيتكش ورغم هكي كملت معاك ! تخيل ؟
حسن >> واو هضا كله عشان كم مكالمه ما كلمتهنش لكي ؟ ليش الحسس هضا كله
عمك انقتل هو ولده انا شن المطلوب مني ندير ؟ درت الواجب وجيت عزيت اكثر من هكي ماعنديش
سالمة مصدومه في رده>> مش موضوعي اللي نحكي فيه معاك قتلت عمي يا حسن ، اساسا انت اصغر من اني اناقش معاك موضوع زي هكي
حسن عيط وتنرفز منها >> انتي تبي تبيني اني انا غالط وخلاص صح ؟ تبيها تجي مني ؟
ياستي مافيش نصيب خلاص مليت وتعبت من نفس السيرة ونفس النكد
متخليش حد من هلك يكلمني خلاص الموضوع انتهى بكل وصكر الخط في وجها بدون ما يسمع ردها
فنفس الوقت كانت ميرا تهدرز مع روان الي كانت اقرب حد لها
روان >> شن دايره مع موسى
ميرا>> موسى هو اللي شن داير معايا
روان >> كان ما نعرفك نصدق البراءه هذي 😂
ميرا >> مليت وانا نقول قلبي مش معايا راه مش حنقدر نعطيك شي وهو مش معدل
روان>> انا مش فاهمه الحب هضا كله من وين جابه لكي انا الي عايشه معاه طول عمري بما اني جيت حوش جدي بعد طلاق هلي وانا عمري سنتين فخويا موسى تربيت معاه و ما عمريش حسيت انه حتى معجب بيك ولا مره بحت ولو غلط نظره هكي ديما كنا نلتمو ونحكو كان يحكي معاك زي ما يحكي معايا او بنات عمك او اي حد فالعيله
ميرا>> ايام العزا ممكن لانه قرب مني واجد
قبلها كنا بس نتناقرو ونتعاركو وخلاص
روان>> انتي مش فاهمه انه المناقره هذي هي بداية كل حاجه
ميرا بحتت في سما >> وهذي كنها مستوهه من اول ما جينا ما حكتش شي على صار معاها اليوم
روان >> عارفتيها ماتحكيش
كانت سما ماسكه تلفونها وكأنها تراجي في رسلان يرن رغم انها مش حترد😂 بس تراجي في مكالمته وتبي تعرف شن مازال يبي يحكيلها
على خشت أحمد
جاته سالمه >> عمو بنحكي معاك
سحب احمد الكرسى وقعمز >> شن فيه
البنات يبحتن فيها
سالمة>> نهيتها مع حسن مانبيش بابا يكبر الموضوع انت الوحيد اللي تقدر تحكيله ويسمعك قوله اني مانبيش نهائي وماتفاهمنش
رندة>> نعممممم تحكي جد؟؟
سالمة>> رندة النبي مش ناقصه اس
احمد ما سألش عليش>> متأكده من قرارك
سالمة>> متاكده بكل ومعش في امل للرده لو ١٪
احمد>> لو زعلك بحاجه حنمشي نخرب وجه توا هالوقت
سالمة>>لالا ياعمو مافيش حاجه والله نبي ننهي القصة بلا مشاكل بس
احمد>> تم اعتبريه انتهي ، بس نسمعك ياسالمة راده عليه ولا حاكيه معاه حنصبي ضدك تبي تنهي حننهيها بكل بس حتى انتي انهي بينك وبينه
رندة>> اطمن لو رن اصلا حنرد انا نهزبه علي وجه وحه البنت
احمد ضحك>>تربيتي الصقره😂
سالمة>> اطمن مش حنرد على ولا رقم اصلا لا هو لا حد من هله ولا رقم غريب
احمد >> تمام تمام
سما بحتت فسالمة ،غمزتلها انه حتفهمها بعدين
على خشت موسى>> السلام عليكم
ردو عليه كلهم وميرا ساكته جت عيونه عليها
احمد>> وين ذايح
موسى>> عمو والله طقيت مشوار مع تيّح وجيت
احمد>> انعمت عينك اول شي تحشم على شيبتك وانت تقولي عمي 😂
موسى ضحك>> انقنك كبرتنا
ميرا >> طبعا بلكي تحساب روحك صغير
موسى>> سيبتلك الصغر و صغر العقل بذات 😒
روان >> اووف يالقصف المتبادل
موسى>> ماحد قاللها تحكي
ميرا>> ننن مانبيش نروح بنبات مع البنات
موسى بدون ما يبحت فيها >> بنخش نشوف امي وحني نطلع نلقاك لابسة محرمتك
احمد زارته الضحك
وسما تبحت فيها وتبي تضحك
ميرا >> قسم بالله حد يضحك حنزعل اووووووف مثقلدمه ” وصبت من حذاهم”
روان>> حنمشيلها 😂😂
خشت روان وراها و رنده لحقتهم سالمة بس ركبت فوق
احمد >> شنو يا عمو ؟
سما >> ولا حاجه
احمد >> موافقين على العريس ؟
سما >> موافقه اه ان شاء لله خير
احمد >> باهي تمام
سما>> عمو ما فيش اخبار من البحث الجنائي ؟
احمد تنهد >> سما انتي مش صغيره عشان نكذب عليكي بس القضية صعبة جدااا لا فيه كاميرات في منطقتكم تبين من خش ولا فيه حتى حد شافهم سألو كل الجيران فالمنطقه والمناطق القريبه مافيش مافيش بكل ولا اي اثر، اللي داير الجريمة دايرها وعارف شغله كويس و غير هكي راه قسم الشرطه مليان قضايا غير قضيتنا يعني ماحدش حيسيب كل حاجه في يده و يمسك بس ملف قضية عبدالرازق الله يرحمه خصوصا انه مر عليها اكثر من سنة، بس نحن وراهم واصحابي في القسم موصيهم لو في اي دليل حيكلموني طول
سما >> فاهمه عليك وعارفه بس نبي اي خبر يريحني بنعرف بس من اللي دار هكي وشن السبب ! ليش حياتنا ادمرت هكي
أحمد >> كله ح ينفهم يا عمو فوقته صدقيني انتي ماتشغليش بالك بس
على رنة تلفون سما مسكاته و حطاته صامت
أحمد ابتسم >> خليني نخش نشوف ميرا و موسى اكيد والعه جوا 😂
خش احمد و خذت سما تلفونها وركبت فوق السطاح اللي كان المكان اللي اتريح فيه و ردت على اخر المكالمة رغم انها ماكانتش تبي ترد
جاها صوت رسلان>> توقعت مش حيكون في رد كالعاده
سما ساكته
رسلان>> ماهو عاد مش يا ماترديش بكل يا اما تردي وتسكتي شن ح نستفيد😂
سما >> رديت عشان نعرف بس شن الكلام اللي ما قلتش وبتقوله
رسلان>> بنعرفك بروحي
سما >> من قالك بنعرف عليك حاجه؟
رسلان>> بتخشي علي حياتك معايا عالمعمي هكي ؟ وانتي متعرفيش غير اسمي ؟
سما>> رسلان ماتتعاملش علي اننا اثنين مخطوبين اوكي ؟ عشان كبدي ما تزعمش 🙂
رسلان>> مش حنرد عشان حنتعاركو حتى انا بالي مش واسع راه
سما >> اوكي هذي اول معلومه، بتحكي على روحك احكي
رسلان>> لا مانعرفش نحكي بدون محد يسألني
سما>>رسلان ماتصعبهش احكي لو بتحكي ولا نصكر
رسلان>> المعلومه الثانيه اني حبيت اسمي بصوتك
سما >> عارف ثالث حاجه حنصكر الخط
رسلان ضحك>>ياستي نشتغل مع عمك عاشور زي ما تعرفي موظف فالشركة فقسم المحاسبات ، حوشنا ح يكون فوق هلي و عندي صاحب دمه ثقيل اسمه اسير😂 وشن اخرى؟ اسألي كذا
سما >> شن حكالك عمو عاشور لما طلعت من عندك
رسلان>> ولا حاجه حكى عالدفع و قال يبي كل شي كلام رجاله
سما >> اوكي حتى انا هكي نبي
رسلان>> درتي يدك ؟
سما >> شنو ؟
رسلان>> مش يدك مبدري كانت مجروحه ؟
سما >> اها عادي مش جرح كبير
رسلان>> من شنو؟
سما >> انكسرت فيدي كبايه
رسلان >> متأكده انه جرح بسيط؟ ما يوجعش فيكي ؟
سما >> لا عادي عقماته ليا سالمة بنت عمي مبدري و لفيته من جديد وخلاص
رسلان >> عقميها كل يوم و افطني مره اخرى
سما >> رسلان بطّل
رسلان>> ياستي سكتت ماتبيش تحكي على روحك
سما >> لاء ونعست حنرقد
رسلان >> تمام تريحي
صكرت سما الخط ، وخش رسلان عند اسير
اسير>> شن ؟
رسلان سكت
اسير >> اسمع كان بتقعد قالب لي وجك هكي و بدره كبدي ف انهيها من توا ما بينك وبينها لا عيال لا علاقة حب مطنطه مش حفلة هي كل رنه بقلبة وجه😒
رسلان>> انت تعرفني اليوم ولا امس ؟
اسير >> المشكله اني عارفك بس نحاول نحكي ع لله اتغير رايك ، بس للاسف حيط بدال الراس😂
رسلان>> بلا استعباط 😒 و رايي مش ح يتغير القصة مش ساهله بس ح تحبني يعني ح تحبني مالهنش ثالث
اسير >> ح تتعب راه
رسلان مسك شيشة اميه>> مش موضوع
اسير >> راسك يابس من ونحن فالمدرسة ، طالع انا متبي شي ؟
رسلان>> لا
//
//
فنفس الوقت وقت ما خش موسى لقا امه قاعده بروحها
موسى>> خوخه وين
فاطمه>> تصلي فالدار لخرا
موسى>> باهي انا بنطلع غير خشيت نشوف فيكم بس
فاطمه>> انت متريح ؟
موسى>> امي عاد خلاص
فاطمه>> كل ما نشوفك هكي ننقهر مش بيدي مانبيلكش عيشه هكي ياما تمنيت نفرح بيك و نشوف عيالك و مراتك معاك وانت مبسوط وفرحان ساد انه حتى عرس ما درتلك حتى زفة وسط هلك واصحابك ما درتش طلعت في ليلة ما فيهش ضي قمر الله لا يسامح اللي دار هالجريمة و خلانا في حاله
موسى>> يا امي الله يربحك كان تحبيني معش تحكيلي في نفس السيرة بالله عليك معش تزيدوها عليا خلاص لما نجي نشكي احكي بس دابيني ساكت وما شكيتش خلوني في حالي
وطبعا الكلام هضا كله كان على مسامع ميرا اللي خشت بتلبس عشان تطلع
لحقتها روان >> شنصار بتعدي
خشت لبست ميرا ايشربها بدون ما ترد
طلع موسى >> ميرا برا
روان شيرت بعيونها لدار
طلعت ميرا قدامه وما حكتش
//
في السيارة
ميرا >> امك معاها حق
موسى يبحت قدام
ميرا>> ندوي انا
موسى >> عندنا حوش تو نهدرزو فيه
ميرا >> انا بنحكي هنا
موسى>> معاها حق في شنو يا اميرة ؟
ميرا بنرفزة>> ما سميش اميرة اسمي ميرا
موسى ضحك>> هضا اسمك فالاوراق 😂
ميرا>> وانا قلت منحبش نحب ميرا شن جد توا ؟
موسى>> والله بجوي ما تحكميش بشن اناديك
ميرا>> ناديني بأسمي اللي تنادي فيا بيه طول عمرك يعني لما تقول اميرة معناها راقيلك ؟ لا مش بجوك
موسى درس يمين>> تبي عشا ؟
ميرا ربعت يديها >> ياربي البرود ،اه جيعانه
موسى>> شن تبي
ميرا>> عادي اي حاجه بس دجاج مش لحم
موسى ابتسم>> نعرف
غاب ربع ساعه ورد مدلها الشكارة
ميرا>> ليش جبت ليا بس
موسى >> متعشي انا مع تيّح مبدري
ميرا>> شن اخباره تيح
موسى بحت فيها >> وانتي شن همك في اخباره؟
ميرا>> هوووووفففف عشان كان مريض الفتره لي فاتت شن يعني
موسى>> معش تنفخي
ميرا>> المهم امك معاها حق واسمعني وما تردش عليا ، مازلت نقولك انا مش ح نحبك يا موسى انا مش حنعطيك شي راه ! الزواج له شروط فالدين وربي حاط فينا كلنا مشاعر معينه انا مشاعري ماتن مش حتلقى فيهن شي منقدرش نهتم منقدرش نحب منقدرش نرقد جنبك نلمسك نحضنك نضحك نفرح مش عارف كل شي ميت عندي، وصدقني اللي جواك مش حب ليا شفقة بس عشان كنت قريب مني فترة العزا لانه كل حد كان لاهي في حاجه
موسى>> كملتي كلامك؟؟
ميرا سكتت
موسى ضغط على يده وابتسم>>كولي
ميرا>> ياربييييييي “و عيونها دمعن ”
فتحت الشكاره ومسكت السندوتش بعصبيه >> حنوسخ السياره اه
موسى >> مش موضوع
ميرا>> غصبا عنك
موسى ضحك عشان عارف انها تعاند في روحها وتمكر في روحها مش فيه وكان متفهم وصابر وموسع باله عشان يحبها بس !
//
//
نردو لايام 2016
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية هلع)
