رواية أسود الداخلية الفصل السابع 7 بقلم أسماء عبدالهادي
رواية أسود الداخلية الجزء السابع
رواية أسود الداخلية البارت السابع
رواية أسود الداخلية الحلقة السابعة
في المستشفى بعد
مامرام فاقت طلعت الموبايل اللي مخبياه لوقت الطوارئ وحطت الشريحة فيه وكلمت أيهم
أيهم قال
_ إيه يامرام في جديد ولا إيه.. طلعتي شريحة الطوارئ ليه
مرام بانزعاج
_ أيهم إنت وديت أهل نور فين
رد ببرود
_ قتلتهم
_ ليه كدا ياأيهم
_ إيه في إيه
_ ليه تقتلهم منقلتهمش أي مكان لحد ما مهمتي تخلص ليه
_ واجيب لنفسي وجع القلب ليه ….كدا ارتحنا منهم واهي كلاب وغارت
_حرام عليك ياأيهم
_ إيه هتحني وقلبك هيبقى رهيف ولا إيه .. إنتي نسيتي إنتي بتعملي إيه إنتي مرام اللي مدوخة الداخلية كلها معاكي
_ منستش بس دول ملهمش ذنب
_ كبري وانجزي في مهمتك خلينا نخلص سلام
قفل أيهم
فرجعت مرام كل حاجة في مكانها وهي حاسة بصدمة وحزن كبير أوي جواها مش عارفة مصدره
رغم إنها قتلت كتير واتسببت في تشرد عائلات كتير إلا إن موت العيلة دي بالذات تعب نفسيتها
علشان كدا حطت دماغها على المخدة واستسلمت للنوم .
❈-❈-❈
نرجع لعيلة قصي
الكل كان خايف على البنات لينا وسمر ومنة من عقاب قصي ليهم و
أمهاتهم كانوا حاطين إيديهم على ١قلبهم
قصي اتحرك بالكرسي وبدأ يزقه بإيد واحده وقال
_ بقا إنتوا زعلانين علشان عايزين تيجوا معانا؟؟ يعني مفكرين إننا علشان طلعنا رحلة يبقى كنا بنتفسح يعني!! مش يمكن دي مهمة سرية طالعينها وبنغطي بالرحلة عليها… ليه مفكرتوش فيها كدا
البنات بصوا لبعض وقالوا
_ مهمة!!
مازن بصلهم وهز راسه بس طبعاً مقدرش يتكلم وقصي شايط كدا فاكتفى بالإيماء براسه
البنات جت تتكلم
_اا إحنا ااا
قصي شاورلهم
_اشش متقولوش حاجة أنا عارف إنكم زعلانين ومن حقكم تزعلوا وتعبروا عن زعلكم دا.. لكن الأسلوب المتبع والتوقيت غلط…
منة
_ آسفين بجد يا أبيه حقك علينا
إبتسم لهم قصي وقال بحنان وصوت لين على عكس اللي كان بيتكلم بيه من شوية
_ إنتوا متعرفوش يا بنات إنكم غالين أوي عندنا… ومنانى إننا ناخدكم معانا في أي مكان نروحوا لكن للأسف أي مكان بنخطيه بيكون الشر فيه ورانا… وأدينا أهو بعد ما خلصنا مهمتنا وكله تمام… لقينا شر تاني جه من حيث لا ندري وكانت النتيجة زي ما إنتم شايفين
وخلع الجاكيت فظهر ذراعه المصابة
البنات أول ما شافوا إيده الملفوفة بالرباط
حنان قربت منه بفزع
_قصي إبني حبيبي فيك إيه يابني
قصي حط إيده على وش أمه
_ اطمني يا أمي أنا كويس والله مفيش حاجة
هزت راسها وقالت ببكاء
_ لا إنت انصبت تاني ياقصي.. ولما إنت عارف يابني إنها مهمة روحت ليه
ولما لقت قصي سكت… فكرت إنها جرحته بكلامها
حطت إيدها على بوءها وقالت
_ سامحني يابني مش قصدي بس أنا خايفة عليك.. خايفة أخسرك ياقصي زي ما خسرت أبوك وعمك في عملية واحده مش هقدر اتحمل تاني أبدأ
قصي حضن أمه وقال
_ يا حبيبة قلبي أنا والله العظيم كويس … حتى أنا أهو هفك الرباط قدامك علشان تصدقي أنا كان ممكن أشيله من بدري بس سبته علشان البنات تقتنع إن الأسود كانت فعلاً في مهمة مكانوش طالعين يتفسحوا زي ما هما فاهمين
ناديه بلهفه
_ لا لا يابني ما تفكوش سلامتك ألف سلامه
لينا
_ ألف سلامة عليك يا أبيه… إحنا خلاص صدقنا وعرفنا غلطنا والله
قصي
_ الله يسلمك يا لينا ياحبيبتي
منة قربت من قصي
_ سلامتك يا أبيه
مد إيده وحضنها وبص لسمر وقالها تعالي
قربت منه بخوف
حضنها قصي فلقاها بتترعش
_ مالك يا سمر معقولة لسه خايفة مني يابنتي كنت بهرج معاكم دا إنتم حبايبي
حاولت سمر تبتسم وتطمن أخوها لكن جواها كان فيه رعب مش عارفة تتخطاه أبدأ
أما مازن فقال لأخته
_ بت يا لينا تعالي في حضن أخوكي يابت تعالي
حضنها مازن وبعديه أدهم
عدي قال
_ اممم أنا بقول أستأذن أنا ياجماعة لأن شكلي وحش أوي كدا .. وأنا واقف بائس كدا مفيش حد أحضنه
مازن
تعالى ياض أما أحضنك ولا تزعل نفسك
عدي
_ أبعد ياعم أنا ما صدقت أرتاح من وشك العكر تقولي أحضنك
مازن
_ غور يالا الحق عليا اللي حبيت أرءف بحالك
عدي
لا ياعم متشكرين حل عني
الكل ضحك عليهم
فقال مازن
قصي أنا عارف إن يمكن الوقت مش مناسب وإنت عارف ليه كويس بس أنا مبقتش قادر أنتظر أكتر…
وبص لمنة اللي نزلت راسها بكسوف
وقال
_ قصي أنا كنت عايز ااا
في الوقت دا
جه لأدهم إتصال
_ أيوة يا سيادة اللواء… اه وصلنا الحمد لله… دلوقتي حالاً… حاضر يا فندم تمام مسافة السكة هنكون عند حضرتك
قفل الخط وبص للشباب
_اجهزوا حالاً ما فيش وقت
مازن حط إيده على راسه وقال
_ أنا مني لله أنا حظي نحس أنا عارف … كل لما أجي أتكلم في الموضوع تيجي مهمه تعطل عليا
مسكه عدي من قفاه وقال
_ مش وقته يابني يلا قدامي
قصي
_ في أمان الله يا شباب
وناديه وحنان قالوا
_ في أمان الله ياحبايبي ربنا يحرسكم ويحميكم
إبتسم لهم عدي وقال
_ما نتحرمش أبدأ من دعواتكم الجميله دي لا إله إلا الله الكل بصلهم وقالوا
_محمد رسول الله
❈-❈-❈
قصي دخل أوضته يرتاح بعد ماقدم الهدايا للبنات نيابة عنه وعن الشباب
❈-❈-❈
أما أدهم ومازن وعدي وصلوا المقر
وفي مكتب اللواء
_ تمام يا فندم إحنا تحت أمرك
_ حمدالله على السلامة يا أسود .. ها إيه أخبار المهمة
عدي
_ كله تمام يافندم وتم تسليمهم لشرطة الحدود
اللواء
_ عال عال براڤو عليكم يا أسود
مازن
_مهمة جديدة ياباشا!!
اللواء
_ أيوة يامازن… المهمة المرة دي هتكون اقتحام مقر لعصابة تهريب سلاح ومش هتكون سهلة لأن التعليمات جت إن معاهم كل أنواع السلاح علشان كدا هتحتاجوا كل القوة معاكم
أدهم
_تمام يا فندم إحنا قدها إن شاءالله
اللواء
_ عارف ومتأكد إنكم قدها … قدامكم يومين تدربوا فريقكم وتطلعوهم على الخطة علشان الهجوم .. اتفضلوا دا ملف القضية
عدي
_تمام يافندم علم وينفذ
اللواء
_ يلا اتفضلوا على مكاتبكم شوفوا هتعملوا إيه
في مكتب أدهم
أدهم قال
_ مازن إعمل إستدعاء كامل لكل الفريق و اعطيهم علم إن التجمع خلال ساعة من دلوقتي واللي هيتأخر عن المعاد هيتجازى مفهوم
مازن
_ تمام ياأدهم حالاً هعمل كدا
وخرج ينفذ المطلوب منه
أما عدي فقال
_ نستغل إحنا الوقت دا ونحط
الخطة اللي هنمشي عليها
أدهم قام من مكانه وبدأ يقرأ ملف المهمة هو وعدي
وبعد حوالي ساعة رجع مازن
_ أدهم كله تمام والفرقة منتظرة في الساحة برا زي ما طلبت
أدهم وعدي قاموا
فجه إتصال لأدهم من قصي
_ أدهم إنت فين دلوقتي
_ كنت لسه خارج علشان ندرب الفريق للمهمة الجديدة
_ اه يعني المهمة تنفيذها مش دلوقتي تعالالي حالاً وسيب مهمة تدريب الفريق لعدي ومازن
_ خير يا قصي في جديد؟؟
_ لا مفيش .. بس كل الحكاية إن نور فاقت وطبعاً لوحدها في المستشفى وبحالتها دي وخلاص أهلها كلهم راحوا فبتالي مش هينفع نسيبها لوحدها
_ ناوي على إيه معاها
_ هنجيبها عندنا البيت
_ إنت بتتكلم جد
_ إيه يابني مبقاش ليها حد دي ممكن تعمل حاجة في روحها
_اه يعني إنت عايزني أجي معاك نعرض عليها إنها تيجي معانا البيت
_بالظبط كدا … اسبقني على المستشفى وأنا همهدلهم في البيت وأحصلك
_ تمام ياوحش هنكون هناك مسافة السكة
❈-❈-❈
قفل مع قصي وبص لعدي ومازن
_مش هوصيكم في التدريبات مكاني ها
عدي
_ إطمن يا أدهم
مازن
_الفرقة هتفرح أوي بالخبر دا
أدهم
_خبر إيه
مازن بتسلية
_ لا لا متاخذش في بالك .. روح إنت المستشفى يلا
أدهم مشي ونزل عدي ومازن للفرقة
❈-❈-❈
قصي في البيت بعد ماجمع الكل تاني وحكالهم الحكاية
حنان
_ ياحبيبتي يابنتي ربنا يكون في عونها والله
ناديه
_ لا حول ولا قوة إلا بالله منهم لله البعدا.. ربنا ينتقم منهم
منة
_اه هاتها يا أبيه يا حرام زمانها هتتجنن بسبب اللي حصل
لينا
_ اه يا أبيه خليها تيجي تعيش وسطينا هنحاول نعوضها عن أهلها… ربنا يكون في عونها
ولما قصي لقى سمر ساكتة
_ وإنتي يا سمر رأيك إيه
ارتبكت سمر
_ها.. ااا .. اه يا أبيه جيبها معانا هنا ربنا يصبر قلبها
بصلها قصي شوية وهو شاكك في أخته فيها حاجة لكنه تجاهل إحساسه دا
وقال
_تمام هروح أجيبها من المستشفى أنا وأدهم شوفوا بقا هتقعد مع مين وفين لحد ما نرجع
لينا
_ أبيه أدهم ما نزلش لمهمة؟
قصي
_هيجي معايا ويرجع تاني شغله
لينا
_تمام أوك يا أبيه ربنا معاكم
❈-❈-❈
ركب قصي عربيته وراح للمستشفى وهناك كان أدهم وصل هو كمان
ولما حست بيهم مرام … اتنهدت وقعدت بحزن … والمرة دي مكانتش بتدعي الحزن لأنها كانت زعلانة على أهل نور فعلاً
خبط أدهم
_ آنسة نور أنا أدهم وقصي معايا …ممكن ندخل.. ؟؟
مرام
_ اتفضلوا
فتح أدهم الباب ودخلوا
أدهم
_ ها إيه أخبارك يا آنسة نور
إتنهدت مرام وسكتت
فقعد أدهم على الكرسي
_ أنا عارف إن الوضع صعب واللي بتمري بيه عسير إنك تتحمليه بس الصبر وخلي عندك يقين في ربنا إنه أكيد عاينلك الأفضل ربنا يرحمهم جميعاً
عيطت مرام علشان تأدي دورها بإتقان
_ الأفضل إيه بقى … حياتي بعد أهلي مبقاش ليها أي ملامح خلاص… أنا انتهيت ياحضرة الظابط
أدهم
_ لا لا متقوليش كدا وأدعي ربنا إنه يصبر قلبك ويعينك على اللي جاي.. وعايزك تتأكدي إنك مش لوحدك وإحنا معاكي وزي إخواتك بالظبط لو احتاجتي أي حاجة إحنا معاكي فيها
مرام
_هاتوا حق أهلي ياحضرة الظابط انتقمولي منهم كلهم منهم لله منهم لله
أدهم
_دا شيء أكيد اطمني هنأخد حق أهلك وحق كل حد اتسببوا في أذيته .. لكن دلوقتي مش عايزك تفكري في حاجة غير إنك ترتاحي وتتأكدي إنك مش لوحدك وإننا معاكي علشان كدا مش عايزك كل شوية تقولي لنا ياحضرة الظابط نادينا بأسماءنا عادي
جت مرام تتكلم
هنا قصي قال
_ إنتي دلوقتي لسه في خطر وكمان لوحدك علشان كدا قررنا إنك تيجي تعيشي وسطينا مع أهلنا وكأنك واحدة مننا
مرام
_ حضرتك بتقول إيه بس مش هينفع أنا عايزة أرجع بيتي
أدهم
_هو فين البيت كومة التراب يانور؟؟
قصي
_ إسمعي الكلام… وتعالي معانا… البنات منتظرينك هناك مش هتحسي بينهم بأي غربة
مرام
_مش عايزة أكون ثقيلة عليكم
أدهم
_بالعكس إنتي هتنورينا
وقام وقف
_يلا هبعتلك الممرضة تجهزك وإحنا هننتظر برا
مرام بمسكنة
_اللي تشوفوه أنا مبقتش قادرة أفكر خلاص
خرج قصي وأدهم برا
أما مرام فابتسمت بخبث إنها قدرت تحقق الغرض اللي جاية عشانه
جت الممرضة وساعدتها إنها تلبس
وبعدين ركبت معاهم العربية
وفي عملت إنها تعبانة ومغمضة عينيها وأدهم وقصي بيبصوا عليها بشفقة وحزن على حالها
لكن في الحقيقة مرام كانت بترصد كل حركة وايماءة ليهم
ولما وصلوا للبيت
بصلته مرام بصة متفحصة وقالت في نفسها
_ ممم حراسة مشددة على البيت كله .. وكمان كاميرات مراقبة حوالين المبنى و أجهزه إنذار.. اممم إنتوا مش فايتكم حاجة بس هنشوف على مين كل دا
❈-❈-❈
في ساحة التدريب
واحد من الظباط في الفرقة
_ ولا إحنا هنتنفخ… وربنا عظمي مدشدش من آخر مهمة ملحقناش نرتاح ياناس
_معاك حق… قلنا هنرتاح من الوحش شوية جالنا النسخة منه أدهم اللي مبيرحمش
هنا جه مازن
_ سمعتك يا حلو إنت وهو
بلعوا ريقهم بخوف
_ نهار إسوح دا أخوه سمعنا هنتسوح كلنا
مازن بص لعدي وضحكوا الإتنين
مازن قال
_ ابسطوا النهاردة أدهم باشا مش معاكم في التدريب
الكل فرح وبدأوا يصفروا
عدي
_ انتباه إنت وهو
عملوا التحية العسكرية ووقفوا بانتباه
_تمام يا فندم
عدي
_مش معنى إن أدهم باشا مش موجود إننا نتقاعس ها .. عايزين تدريبات بأقصى ما عندكم المهمة اللي داخلين عليها مش سهلة ولا هينة لأي تقاعس أو دلع
_تمام يا فندم معاك
_ ودا ظني فيكم كلكم .. إنكم رجالة وهتسدوا وقت الجد .. يلا هنبتدي التدريبات بسم الله
❈-❈-❈
و في البيت رحب الكل بمرام
حنان
_ أهلاً بيكي يا بنتي نورتينا والبقاء لله يا قلبي ربنا يربط على قلبك .. أنا أم قصي يابنتي ودول بناتي اللي هما بقوا أخواتك خلاص سمر ومنة
سمر
_ أهلا بيكي يا نور… والبقاء لله
منة
_ربنا يرحمهم يا حبيبتي… أنا منة
هزت مرام ليهم راسها بإيماءة بسيطة
أما نادية
_ وأنا يابنتي أم أدهم ودي لينا … اعتبري نفسك هنا عندك بدل الأم إتنين وبدل الأخوات كلهم هنا أخواتك… أكيد طبعاً مش هنغني عن أهلك الحقيقين.. بس ربنا بيعوض ورحمته واسعة يابنتي
لينا
_ أنا لينا يانور وأتمنى تعتبريني زي أختك
اتنهدت مرام وبعدها عيطت
فأخدتها حنان بحنان في حضنها وبدأت تهديها
والكل كان مشفق عليها جداً وزعلان علشانها
قصي
_ ها يامنة قررتوا تعملوا إيه
منة
_قررنا إني هطلع أقعد مع لينا فوق يا أبيه ونور هتكون هنا مع سمر بس طبعاً إحنا طول الوقت هنا تحت عادي
هز قصي راسه
_تمام مفيش مشكلة وعايزكم تحطوا نور جوا عينيكم
لينا
_اه طبعاً يا أبيه
أدهم بص لسمر اللي مش فى حالتها الطبيعية وقال في نفسه
_ مالها دي فيها حاجة غريبة.. مش دي سمر بتمردها وعنادها اللي أنا متعود عليه أكيد فيها حاجة وأنا لازم أعرفها
سمر لاحظت نظرات أدهم ليها
فبلعت ريقها بخوف
_ياربي خايفة يعرف باللي حصل ساعتها هتكون نهايتي على ايديهم يارب… يعدي الموضوع دا على خير ومحدش يكتشفه ربنا يستر
يتبع…..
لقراءة الفصل التالي : اضغط هنا
لقراءة الرواية كاملة اضغط على : (رواية أسود الداخلية)
