رواية حبيبتي من تكون الفصل الأول 1 بقلم نور سعيد
رواية حبيبتي من تكون الجزء الأول
رواية حبيبتي من تكون البارت الأول
رواية حبيبتي من تكون الحلقة الأولى
-بُص أنت هتعمل أنك خطيبي وهنتجوز كدة وكدة لمدة شهرين شهرين بالعدد بجد وهديك الفلوس اللي تعوزها
_اعمل خطيبك كدة وكدة ونتجوز كدة كدة ؟حضرتك بتقولي ايه!!
قالي الجملة وهو باصصلي بإستغراب وكأنه شايف واحدة مجنونة قدامه
حاولت أتدارك الموقف المحرج دة وقولتله :
_على فكرة انا مش مجنونة ..انا عاقلة جدا وبنت ناس بس بعمل كدة عشان اغيظ الاكس بتاعي عشان خاطب وفرحه بعد شهرين او اقل
بدأ يبصلي ويدقق فيا جامد بعدين قالي:
_امم عشان تغيظيه يعني ! مش تقولي كدة يا استاذة …
قاطعته وقولتله :
_أستاذة قمر
قال وهو بيبتسم :
_وانتي قمر فعلا اسم على مسمي.
بعدين قالي وهو بيقف :
_طب اديني رقمك وانا هفكر وأرد عليكي كدة..
بصيتله برجاء وقولتله :
_بس please بسرعة لاني معنديش وقت لازم يعرف بسرعة اني اتخطبت ولازم انزل بوست
واضح انه مكنش فاهم من كلامي حاجة بس هز رأسه كأنه بيهاودني
اديته رقمي وقومت بعدين مشيت وأنا بفكر انا ازاي عملت كدة ؟انا ازاي اوقف واحد معرفهوش واتفق معاه على كدة…ازاي جيبت الجرأة دي…بس كله بسببك يا فريد لانك سيبتني وغدرت بيا وروحت خطبت ميرا ..بقي تفضل عني البت الرفيعة المعفنة دي …بس انا هندمك بكرا تشوف لما ابقي مع راجل احسن منك وافضل منك هتندم على انك سيبت قمر
بعدين قررت اتصل بصاحبتي نادين اقولها على اللي هببته …
نادين بغضب :
_انتي اتجننتي يا قمر !! ازاي تعملي كدة !!جيبتي الجراة منين ..افرضي شخص طماع ولا وحش كان عمل فيكي ايه؟
بصيتلها بيأس وقولت:
_مش قادرة اعيش من غير فريد يا نادين …بحبه اوي ..انا بحبه من وانا في ثانوي ..عيشت كل لحظاتي الحلوة معاه ..يجي في لحظة يهد اللي بينا عشان ميرا ..لا ومكفهوش دة رايح يتجوزها في شهر عيد ميلادي وعزمني ..مفرقش معاه عياطي ولا انهياري..لازم يندم يا نادين لازم
قالت نادين بحب :
_هيندم لما يلاقيكي سعيدة من غيره..لما تبقي ناجحة ومبسوطة وعايشة حياتك
بصيتلها بدموع وقولت:
_الرجالة.مفيش حاجة تكسرها غير انها تشوفك مبسوطة مع غيرها.. وانا خلاص قررت ولازم انفذ
……………..
كان يوسف ماشي في الحارة بتاعته وهو بيفكر…هي البت دي عبيطة ولا ايه؟تكونش بتهزر ولا تبع الكاميرا الخفية ؟ بس شكلها مبيهزرش ..شكلها واحدة الحب كواها زي ما بيكوي كل الناس .. زي ما كواه هو كمان وسابه يغلي ويولع ..بس هي حلوة اوي حلوة جدا ازاي ممكن حد يفرط في واحدة زي دي ولية اصلا ؟ لولا انه فقير كان اتمناها لنفسه …بس هو فقير وهي غنية ..هو اه قمور جدا ويمكن دي الميزة الوحيدة اللي فيه ..شعره الاصفر وعينيه الخضرا وبشرته البيضاء هي الحاجة الوحيدة الحلوة فيه…جايز تنتشه من حياة الفقر والعوز اللي هو فيها …دخل بيته وهو بيفكر ..كان بيت بسيط الصالة صغيرة جدا ومفيهاش غير سجادة وكنبة بايظة وقدامها تلفزيون بايظ مبيشتغلش بس محطوط كديكور …رمي مفاتيحه ع الكنبة ودخل اوضته ..قعد على سريره الصغير …اتفاجا بدخول أمه الاوضه
_يبني ..كنت فين ؟ لقيت شغل ؟
قال يوسف بحزن:
_دورت. برضوا كالعادة ملقتش..كلهم طالبين حد يكون بيرطن ألف لغة وأهم حاجة الواسطة.
قالت الام بحزن:
_طب هنعمل اي في ايجار البيت ..يبني صاحب البيت هيطردنا لو اتاخرنا اكتر من شهر
قال يوسف بحزن:
_خلاص يا امي انا هحاول الاقي حل…متقلقيش انتي وخدي ادويتك بانتظام دة اهم حاجة.
قالت امه وهي بتحط ايديها على راسه:
_ربنا يقويك يا حبيبي ،تحب أجهزلك الغدا ؟
_شكرا يا حبيبتي لو جوعت هقوم اغرف لنفسي.
بعد خروج امه من اوضته قعد يفكر…لازم يقبل بعرض البنت دي حتي لو ايه ..كدابة ؟يجرب ويشوف اصلها هتستفيد منه ايه وهو فقير مش لاقي ياكل .. لازم يجرب كل حاجة عشان ميترميش في الشارع هو وامه
…………..
كانت قمر قاعدة في اوضتها ماسكة فونها بتتفرج على صورها مع فريد …عاشت نص عمرها او اقل بتحبه وبتموت فيه..كل اللي حواليها قالولها دة كداب وخاين وهي مصدقتش..هي مشافتش في عينيه غير انعكاس حبها..اتخدعت حسبت ان دة حب…بس الحب مش كدة..الحب معطاء مش اناني …الحب وفاء مش خيانة…الحب بيمسح الدموع مش بينزلها …مسحت دمعة نزلت على خدها واتفاجات برقم غريب بيرن عليها فردت :
_الو مين معايا؟
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية حبيبتي من تكون)
