رواية مغامره في حاره شعبيه الفصل الثاني 2 بقلم إيمان شلبي
رواية مغامره في حاره شعبيه الجزء الثاني
رواية مغامره في حاره شعبيه البارت الثاني
رواية مغامره في حاره شعبيه الحلقة الثانية
فضلنا نجري انا وعمرو وندخل في شوارع كتير لحد ما قدرنا نهرب من العصابه اللي عايزه تمسكنا
أنحني وهو بيسند أيده علي ركبته وبينهج بتعب :
-الحمد لله فلتنا منهم
وقفت سندت ظهري علي حيطه وانا بحاول اخد نفسي
-انتي كويسه ؟
هزيت راسي وعيوني بتلمع بالدموع :
-لا
رد بقلق :
-مالك في ايه ؟
عيطت وانا بقوله بقهر :
-في اني مليش حظ في اني فقر في اني كل ما اقول حياتي هتتعدل وهحقق حلمي يطلع كل ده كذب في كذب في اني تعبت ياعمرو تعبت من كتر ما الناس بتستغلني وتستغل طيبتي انا تعبت بقي تعبت
بصلي بشفقه وحزن وكان هيمسك ايدي بس رجع في كلامه وهو بيبعد خطوه لورا
-متزعليش كل اللي بيروح مش خير ليكي لو كان خير ربنا مش هيخليه يروح ربنا رحيم بالعباد ،وعشان هو بيحبك بيبعد عنك الشر تيجي أنتي بقي تقوليله ليه يارب بتبعده عني ينفع ؟
حطيت وشي في الأرض وانا بهز راسي بحزن :
-لا بس بس انا تعبت اوي ياعمرو تعبت ونفسي ارتاح
-ما بعد الصبر إلا جبر اصبري ياريما ربنا شايلك خير في المستقبل وبعدين احنا حياتنا عباره عن تجارب لازم نجرب وندوس ومنخافش من حاجه من غير التجارب عمر البني آدم ما هيتعلم حاجه أبداً ،ارجوكي لو سمحتي متعيطيش
اخدت نفس عميق ومسحت دموعي وانا بقوله بأسف :
-انا اسفه ياعمرو
-علي ايه ؟
-اسفه اني عرضتك للخطر
غمزلي بمرح :
-يابنتي خطر ايه ديه مغامره وانا عاشق المغامرات
ضحكت وانا بقوله باستغراب :
-مغامره اي ده يابني ده احنا كان هيتعمل مننا شاورما سوري
هز اكتافه بلا مبالاه:
-مالها يعني الشاورما جميله وبحبها
قفلت عيني نص قفله وانا ببص قدامي بشرود :
-ياسلام بقي لما بيكون معاها بطاطس ولتر بيبسي
بص قدامه بشرود :
-وتوميه وشيبسي ياه تصدقي جوعت
“طب ما تتفضلوا عندي عامله شويه عدس شوربه احسن من الشيف شربيني ”
اتنفضنا احنا الاتنين واحنا بنبص لمصدر الصوت والست اللي ظهرت فجأة من حيث لا ندري
بلعت ريقي وانا بسألها بتوتر :
-م مين حضرتك
طرقعت اللبانه اللي كانت في بوقها وهي بتقولي بمياعه
-محسوبتك سماح شخلعه
-شخلعه!!!
رفعت حاجب ونزلت التاني وهي بتبصلي بقرف من فوق لتحت :
-ومالك بتقوليها بقرف كده ليه ياختي انتي متعرفيش اني اهم ست في المنطقه ولا ايه
عمرو وهو بيعدل النظاره بتاعته :
-لا ما هو لازم تبقى مهمه مش بتشخلعي المشخلعين اللي زيك
بصيتله من فوق لتحت وهي بتحط ايديها في وسطها وبتغمزله :
-متعرفتش بالكتكوت
-كتكوت عمرو بقي كتكوت !
-بتقولي حاجه يا انسه
-احم لا ياست شخلعه ا اقصد لا يا مدام سماح بقول عن اذنك يلا ياعمرو
-يلا علي فين انتوا مش هتمشوا من هنا إلا لما تدوقوا العدس بتاعي
ابتسمت ابتسامه مهزوزه وانا بهز راسي بنفي :
-لا متشكرين احنا لسه متغديين عن اذنك
قولت جملتي وانا بمشي من قدامها وعمرو ورايا
كُنا هندخل من شارع جانبي بس لقينا واحد من العصابه واقف يدور علينا
رجعنا بخوف واحنا بنبص لبعض ..
-يالهوي هنعمل ايه !
عمرو وهو بيبلع ريقه :
-هنعمل ايه يعني هنرجع لمدام شخلعه ناكل عدس
-يعني انت شايف كده
-قدامنا حل غير كده يعني …اجري يامجدي
قولنا احنا الاتنين في نفس واحد واحنا بننادي علي سماح
-مدام شخلععععه
ـــــــــــــــــــــــــــــــــــــــــــــــــــــــــــــــــــــــــــــــــــــــــ
-شويه عدس بقي هتاكلوه هتنسوا نفسكم
بلعت ريقي وانا ببتسم ابتسامه مهزوزه وببص للعدس اللي كان شكله غريب وريحته اغرب
عمرو وهو بيهمسلي:
-هو ده عدس ولا فول مدمس ؟
-والله يابني مانا عارفه ا…
سماح وهي بتحط الطبق علي الطبليه وبتقعد قدامنا :
-يلا اتفضلوا بالهنا
بدأنا ناكل وفي الحقيقه كان طعمه مش احسن حاجه بس كُنا مضطرين !
-ألا قولولي انتوا من هنا ولا جايين تزوروا حد اصل انا اول مره اشوفكم
عمرو بتوتر :
-احم ا اه ا احنا احنا جايين نزور خالتي ب بس للاسف حصل معانا مشكله
-مشكله ايه
-ا احم كح كح كح ا اصل ا اااه اصل واحنا داخلين الحاره شنطه مراتي اتسرقت
همست بشرود وصدمه:
-مراتك ؟
سماح وهي بتلوي بوقها وبتحط لقمه في بوقها :
-ياخويا احمد ربنا إن مش مراتك هي اللي اتسرقت
-للدرجادي
اتنهدت بحزن :
-اه ياخويا ده احنا عايشين في حاره ما يعلم بيها إلا ربنا ،لولا الفقر كان الواحد خرج منها وعاش في مكان في ناس محترمه بس اللي مش معاه فلوس في الزمن ده بيتذل
بصيت لها بحزن وانا بوقف اكل وبسألها بفضول :
-انتي عايشه لوحدك ياسماح
-لا عايشه مع المدعوق جوزي
-ه هو انا ممكن اسالك سؤال ؟
-اتفضلي
-انتي شغاله ايه
عمرو وهو بيهزني في كتفي وبيهمسلي :
-اسمها سماح شخلعه هتبقي شغاله ايه يعني وزيره بيئه!!
-ا احم اه صحيح ايه الغباء ده
-امممممم وياتري بقي متجوزين بقالكم قد ايه شكلكم عرسان جداد
بصينا انا وعمرو لبعض بتوتر وقلوبنا دقت بعنف
عمرو وهو بيحاول يكون ثابت :
-م متجوزين من شهر
-وياتري بقي عن قصه حب ولا جواز صالونات
رديت بلهفه وتلقائيه:
-لا طبعا قصه حب
عوجت بوقها بسخريه:
-حصره عليا ولا اعرف الحب ولا جربته
-ليه ياسماح انتي مش متجوزه عن حب
-لا ياختي ابويا رماني لصلاح الكلب عشان شويه ملاليم
منه لله اتجوزني من هنا وشغلني رقاصه من هنا
قلبي دق بعنف وانا بسألها بخوف :
-ج جوزك اسمه صلاح
-اه ياحبيبتشي ليه
-و وعايش معاكي في نفس البيت
فتحت بوقها ببلاهه وسكتت لحظه وهي بتبصلي في محاوله منها لفهم صيغه السؤال اللي انا شخصياً أدركت أنه اغبي سؤال ممكن يطرحه بني آدم!
عمرو وهو بيحاول ينقذ الموقف :
-هي تقصد يعني هو بيجي يبات معاكي كل ليله ولا مقضيها هروب من الحكومه وكده عشان يعني لو بيجي احنا نمشي ومنسببش ليكي مشاكل
سماح بحزن :
-لا متخافش مش بشوفه غير كل اسبوع ولا اتنين أصله عقبال عندك شغال حرامي وبيخطف البنات اللي زي مراتك كده بس بطريقه شيك
رديت بتوتر :
-ا ازاي ياسماح ؟
-يلبس لبس شيك ويعمل فيها ابن ناس ويروح يقعد في أي كافيه واول ما يشوف بنت حلوه يروح يقولها انتي جميله وفيكي كل مواصفات الموديل اللي بدور عليها ويبلفها بكلمتين ويديها رقمه عشان تفكر واول ما توافق يقولها علي العنوان ولما بتيجي هنا بيحاصرها هو والمقاطيع بتوعه وياخدها يشغلها في الكباريه غصب عنها وان موافقتش بتموت ولا من شاف ولا من دري
قلبي دق بسرعه وانا ببلع ريقي وعيوني بتلمع بالدموع وشفايفي بتترعش
تلقائياً لقيته مسك ايدي وهو بيضغط عليها وبيبصلي وكأنه بيقولي متخافيش انا معاكي
مسكت في أيده جامد وانا بترعش ونفسي لو ياخدني في حضنه يخبيني لكن للاسف مش هينفع
سماح باستغراب :
-مالك انتي كويسه ؟
عمرو بتوتر ولهفه :
-م مفيش هي تعبانه شويه بس اصل هي حامل م معلش يا مدام سماح ممكن تجيبي كوبايه مايه عشان تاخد البرشام بتاعها
قامت بلهفه :
-حاضر ياخويا من عينيا
قامت تجري علي المطبخ وانا قاعده بترعش وببص قدامي بشرود
عمرو بهمس وهو بيقوم وبيشدني من ايدي :
-يلا
رديت بخوف :
-علي فين
طلع يجري وهو بيسحبني وراه :
-اي مكان غير هنا يلا بسرعه
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية مغامره في حاره شعبيه)
