رواية ميراث نور الفصل السادس والأربعون 46 بقلم لينا بسيوني
رواية ميراث نور الجزء السادس والأربعون
رواية ميراث نور البارت السادس والأربعون
رواية ميراث نور الحلقة السادسة والأربعون
” كهف الجن”
” نور ”
الساحر قال لزيجا :
انت متأكد انهم شياطين!!
زيجا هز رأسه، فالساحر قاله :
– اخرج بسرعة وحاول تتواصل معاهم بدل ما يحصل سوء فهم ويشتبكوا معانا.
زيجا كان لسه هيخرج فالساحر قاله :
– استنى استنى.
وحرك شفايفه تقريبا كان بيتواصل مع الجن اللى فى خدمته وقال لزيجا :
– اقعد انت هنا جنبهم وخد بالك منهم , قائد الشياطين اللى جاى بيسأل عليا وهدفهم نفس هدفنا .
الساحر بصلى وقال :
– واضح ان حبايبكم كتير !!
خرج بره الكهف وقبل ما يخرج بص لزيجا وحذره وقاله :
– اوعى تشيل عينك من عليهم !!
زيجا هز رأسه بالموافقة.
اول ما الساحر خرج من الكهف زيجا تمتم بتعزيمات ، جسمى فك من الشلل وحسيت انى بستعيد التحكم فى جسمى تانى فقرب عليا وهو بيتلفت يمين وشماله وقالى وهو بيفكنى :
– ارجوك متعملش حركة غبيه، خلى تركيزك فى انكم تهربوا من هنا بسرعة.
هزتله رأسى.
فكنى ، فجريت ناحية سندس ونورا وبدأت افكهم.
شوفت زيجا بيرمى تعزيمة على حنوش ونصير ففاقوا.
حنوش اول ما فاق مسك فى زيجا ، فزيجا قال :
– ابوس ايديكم اهربوا.. ابقوا انتقموا منى بعدين .. فى جيش من الشياطين هيهجموا على الكهف ويقتلوكم حالا.
حنوش شاله ورماه على جدار الكهف فرأسه اتخبطت ووقع على الارض.
كنت لسه مفكتش سندس ونورا، نصير جيه وكسر الجنازير بأيده وحررهم .
فى الوقت اللى حنوش حرر فيه مارو وكسر الجنازير اللى مربوط بيها.
مارو كان مدروخ وبيفوق بس مش قادر يقف.
رمى جسمه ووقع على الارض عشان يمسك العصاية ، اتسند عليها ووقف , حنوش مد ايده وقال :
– يلا بسرعة عشان انقلكم من هنا.
كلهم مدوا ايديهم وعملوا دايرة ما عدا انا جريت على زيجا اللى مغمى عليه ومديت ايدى فى جيوبه و خدت مفاتيح العربية.
نصير قالى :
– انت بتعمل ايه .! هات ايدك بسرعه.
قلتله :
– مش هينفع اسيبلهم الكتب.. انت عارف ان الكتب دى خطيرة وفيها بلاوى.
مديت لنصير ايدى وقلتله :
– اخفينى بسرعة.
مد ايده وخفانى ، حنوش قالى قبل ما يتنقل :
– قابلنا عند مدخل السلوم .
قلتله :
– السلوم ؟!! انت هتعرف تنقلهم السلوم ؟!
قالى :
– هتنقل بيهم كيلو كيلو لحد ما تحصلنا.
حنوش خدهم واختفوا.
لسه هخرج من الكهف لقيت الساحر جاى ومعاه واحد جته.
كنت خايف يشوفونى بس ماشافونيش.
شوفت الساحر بيجرى على زيجا فأنتهزت الفرصه، اتسحبت وخرجت بره الكهف.
دورت على العربية قدام الكهف ملقتهاش، بصيت عليها ورا الكهف، لقيتها واقفة ، ركبت العربية وانطلقت بسرعة بعيد عن البلد .
اول ما طلعت بره البلد ومسكت طريق السلوم اتفاجأت بلجنة على الطريق، هديت بالعربية ووقفت قدام اللجنة.
الضابط قرب على العربية، وكنت لسه هقوله انى نسيت الرخص لقيته بيبص على العربية بأندهاش ورجع لورا وهو مرعوب , افتكرت ان انا مخفى فأخدت العربية وكسرت اللجنة وجريت.
لقيت عربيات الشرطة بتجرى ورايا , هديت بالعربية ووقفت.
نزلوا من عربياتهم وبصوا جوا العربية ملقوش حد سايقها , فضلوا يبصوا لبعض بأندهاش وفى منهك اللى فرك عينيه.
ضربت الكلاكس فلقيتهم جريوا من حوالين العربية واتفرقوا فى الصحرا ، فاخدت العربية وكملت طريقى للسلوم.
وصلت لمدخل السلوم على وش الفجر، ركنت على جانب الطريق ونزلت من العربية.
دورت بعينى على حنوش ملقتهوش، فضلت مستنى ، بعد شوية شوفته وهو بيتنقل بعيلتى فى الصحرا وجاى من بعيد .
لحد ما وصلى ، قلتله :
– أتأخرتوا كده ليه , دا انا وصلت بالعربية قبلك.
قالى وهو بينهج :
– هو انت فين مش شايفك
قلتله :
وراك اهو.. هات ايدك يا نصير انا ورا حنوش.
ظهرت فحنوش قالى :
– أحمد ربنا انى وصلت أصلا ,تصور نفسك بتطلع عمارة الف دور مرة واحدة من غير ما تاخد نفسك!!
قلتله :
– انت رجل المهام الصعبة يا حنوش .. قولى بقى جبتنا هنا ليه ؟!
نصير قال :
– نسأل الاسئله المهمة الاول .. ايه موضوع جيش الشياطين دا ؟!!
مارو قاله:
– اكيد الموضوع ليه علاقه بالعرش التانى اللى كان جنب عرش نيللى ولا نسيتوه !!
حنوش قاله :
– صح يا مارو .. بس يا ترى دا عرش مين؟!!
نصير قال :
– مش فارقه عرش مين… كلها ايام سواد!!
قلتله وانا ماسك رقبتى :
– ابوس ايد الوالده ارحمنا من الطاقة السلبيه!! اتخنقت
سندس قالت :
– انا جعانه
كلنا بصينالها بأستغراب , فقالت :
– اها والله جعانة
فنورا قالت :
– ماما عندها حق انا كمان جعانة.
مارو كمان قال :
– وانا والله جعان وهفتان اوى.
نصير قال :
– اها صح لو هنموت يبقى نموت شبعانين.
حنوش قال :
– ولا يهمكم يا جماعة انا جايبكم هنا لكهفى او بمعنى اصح فيلتى فى عالم الجن.
احنا هنتجه دلوقتى لكهف الجن او مملكة الجنون اللى فى ليبيا .. الحته اللى هناك دى تعتبر الكمبوند بتاعنا هى معروفة فى عالم الانس انها خاصه بينا، مملكة بيحكمها ملك من ملوك الجان حيادى مبيدخلش فى اى صراعات، هدفه الحفاظ على الامن فى المملكة وحمايه اهلها.
نصير قاله :
– يابن الايه يا حنوش !! واشتريته ازاى دا انا اسمع ان المملكة دى غالية اوى!!!
قاله :
-اشتريته من كام قرن ايام الرخص و كنت مسقعه .. تعالو نشوف احسن.
قلتله :
– طب استنا والعربية هنوديها فين؟!
قالى :
– اكيد مش هنعرف نعدى بيها الحدود ولا انا هعرف اشيلها وانقلها.
مارو قال :
– متشغلوش بالكم بالعربية .
وقرب ناحية العربية، تمتم بكلمات وخبط العربية 3 خبطات بالعصاية.
الرملة اللى تحت العربية اتحركت وبدأت تبلع العربية جواها.
العربية اختفت تحت الرملة وظهر مكانها صخرة لونها اسود.
فرجع وقالنا :
-العربية كدا تمام والصخرة اهيه عشان تعلم مكانها.
حنوش بصله وبص للعصاية بأستغراب وقاله :
– العصاية دى شكلها وراها حوار كبير !! مش ناوى تقولنا بقى ايه اللى حصل؟!
مارو رد وقال :
– ما انتوا كمان بتخبوا عنى حاجات!!
وقال لحنوش وهو بيتريق :
– هى دى ايدك اللى وجعتك وانت بتضرب الصخرة؟!!! .. دا انت ماشاء الله من شوية فرتكت الجنزير كأنه بقسماط وبقيت تعرف تنقل وتتنقل.
حنوش بصله ومردش.
مدينا ايدينا لحنوش فنقلنا وفضل يتنقل بينا.
عدينا حدود ليبيا وفضلنا نتنقل لحد ما وصلنا مدينه اسمها غات حنوش وقف بينا وقالنا :
– قبل ما ندخل منطقة الجبل ، اقلع الحزام يا مار واى حد معاه حاجة حديد يرميها.
قلتله بأستغراب :
– اشمعنا!!!
قال :
– ممنوع تخش المملكة بالحديد هيفكروك معتدى عشان الجن اللى هنا بيخافوا من الحديد .
لمينا كل حاجة معانا فيها حديد بما فيهم مفاتيح العربية.
قلتله :
– طب هنشغل العربية بعد كدا ازاى؟!
قالى :
– هنتصرف يا نينو اهم حاجة دلوقتى ارموا اى حاجة فيها حديد.
عملنا زى ما حنوش قال.
دخلنا المنطقة ولقينا فى وشنا جبل مرتفع طوله تقريبا ميعديش النص كيلو , وحواليه صخور منقوش عليها نقوشات بلغة غريبة.
أتلفتنا يمين وشمال لما سمعنا أصوات غريبة طالعة من الجبل ,سندس قفشت فى هدومى وهي بتقول :
-أيه الاصوات دى !!
حنوش قال وهو مبتسم :
-متخافوش الاصوات دى مسموعه طول اليوم ,بنحاول نبعد الانس المتطفلين عن المكان بس برضه بيجوا يتطفلوا
..لان المنطقه هنا صيتها عالى فى عالم الأنس وفى مغامرين بيحبوا يجوا هنا كسياحة فى النهار .
حنوش وقف قدام صخرة كبيرة فى قلب الجبل , قرب عليها وحاول يزقها فمقدرش لوحده ،بص لنصير ومارو وقالهم :
– أيدكم معايا يارجالة .. الباب معصلج .
قربوا ناحية الصخرة وزقوها معاه فبان ورا الصخرة تجويف صغير فى الكهف .
قولتله :
– أيه ياحنوش أنت هتقعدنا كلنا فى جحر ولا أيه!! مدخل الكهف بتاعك ضيق أوى !!
قالى بثقة :
هفاجأك ..
وبصلنا كلنا وقال:
– أتفضلوا أدخلوا واحد واحد …
نصير سبق ووطى رأسه وهو بيدخل فى التجويف اللى فى الجبل , أول مانفد من التجويف أختفى , وسمعنا صوته من جوه الكهف وهو بيقول :
– يابن الآيه ياحنوش !!
نورا الفضول أكلها وجريت ناحية التجويف ونفدت منه ..
سمعنا صوتها وهى بتقول :
– واااااااااااااو
مارو جرى هو كمان ونفد من التجويف وسمعت صوته وهو بيقول :
– حاجة رز بلبن خالص !!
سندس قالتلى :
– بعد أذنك ياسيدى..
وماأستنتش اديها الاذن ونفدت من التجويف , سمعتها بتقول :
– ياحلاوة ياولاد !!
نفدت من التجويف واندهشت من اللى شوفته !!!
الكهف من جوه واسع جدا , مساحتة ممكن تعدى الالف متر !!
الجدران مطلية بماء الذهب ومنقوش عليا نقوشات بلغة غريبة.
أتمشيت فى الكهف وانا فاتح بوقى من الأندهاش.
صالة الكهف واسعة جدا و شايف تحف , أنتيكات, انتريه الترا مودرن شيك.
مطبخ أمريكانى واسع وسط الكهف و قدامه تلفزيون 84 بوصة !!!
أخر الكهف فيه زى حمام سباحة كبير !!! وجنبه غرفة خشب على ماأعتقد ساونا!!!
سمعت نصير بيقول وهو مبهور :
– حلوه الخدعة دى ياحنوش!!
حنوش قاله :
– أيه رأيك ؟!!
قولتلهم :
– ثوانى هو ده كله خدعة !!؟ انا مش فاهم حاجة !!
نصير قالى :
– أيه اللى أنت شايفه ؟!!
قولتله على اللى شايفه ,قالى وهو بيضحك :
– أنتريه ألترا مودرن !! وتلفزيون 84 بوصة!!!
ده خيالك عالى اوى !! .. بص هى الحاجة الوحيدة اللى كلنا هنبقى مشتركين فى رؤيتها هى النقوش اللى على جدران الكهف , غير كده انت وخيالك .. صح يا حنش ؟!!
قاله :
– بالضبط يانصه.
النفوش اللى على الجدران دى بتخليك يانينو تشوف البيت اللى بتحلم تعيش فيه وأنت وخيالك.
أنما فى الحقيقة الكهف مساحته صغيرة وفاضى مفهوش غير النقوشات .
قولتله :
– يعنى بتعيشنا الوهم !!
قالى :
– تقريبا , بس وهم مصروف عليه ..يعنى مش وهم عادى , مثلا لو فتحت التلفزيون اللى أنت بتتوهم انك شايفة هيشتغل عادى وهيديك بث مباشر لمبارة برشلونة والريال ولو جبت اكل وطبخته فى المطبخ الامريكانى , هسيتوى عادى زى ما انت عايزه .
نصير دخل فى الكلام وقال :
– ولو رميت نفسك فى حمام السباحة , هتعمل طش .. وتطرطش مية كمان .. صح ياحنش .
قاله :
– صح يانصه !!! انجوى على ما أخرج أجيب أكل وشوية حاجات واجى …
وبصلنا وقال :
– نورتوا بيتى المتواضع ياجماعة , حد عايز حاجة من بره ؟!
محدش رد عليه .. سندس ومارو ونورا كانوا متنحين فى الكهف وتقريبا بيتخانقوا على اللى شايفينه ,وانا روحت ناحية التلفزيون وشغلته , نصير راح اخر الكهف وهو فرحان !!
حنوش خد نفسه وخرج بره الكهف , معداش ساعة ولاقيناه راجع ومجرجر فى أيده زيجا وهو متخرشم!!
رماه فى الكهف وقال :
– لاقيته واقف قدام الجبل وبيبص عليه .
مارو جرى ناحية زيجا ومسكه من رقبته ورفعه لفوق وهو بيخنقه.
حنوش كان بيحاول يسلك رقبة زيجا من أيد مارو وهو بيقوله :
– أهدى يامارو هنقتله بس مش دلوقتى , لما نعرف أبن الكلب عرف طريقنا ازاى !!
مارو رماه ,فنزل رزع على الارض ,وفضل يتأوه وهو بيقول :
– أنا جاى انقذكم..
نصير ضربه برجله وهو على الآرض وقاله :
– جاى تنقذنا !! هأأأأو … أنت مفكرنا عبط يله ..أنطق عرفت مكانا أزاى ؟!
زيجا قال :
– أيسر معاه عينة من دمك وعرف مكانكم وجاى هو وجوهر علشان يقتلكم , والله انا سبقتهم علشان أحذركم !!
مارو قاله :
– جوهر مين ؟!!
قال :
– أبن نيللى قائدة الشياطين من مارد بئر برهوت.
كلنا سهمنا وبصينا لبعض بأندهاش..
نصير قال :
– يادينى حرب ميجوانا تاني!!!
مارو قطع كلامه وقال :
– حاسس بطاقة بتقرب على الكهف!!
و بص لزيجا واداله بوكس فى وشه فوقع على الأرض مغمى عليه.
قولتلهم :
– يبقى أكيد حضروا !!
مارو قال :
– خليكم هنا أنا هطلعلهم.
حنوش أعترض طريقه وقاله :
– بطل تهور بقى .. لو خرجت هتموت , بيقولك ابوه مارد!!!
يعنى منعرفش قدراته ايه!! ممكن يبقى أقوى منك , أحنا محتاجين نهدى ونفكر , بس اولا لازم نهرب من هنا .
نصير قاله :
– نهرب نروح فين !!
حنوش قال :
– أكيد لابن القاف مدام فيها حرب ميجوانا!!
سألت حنوش :
– طب هو بن القاف فين دلوقت ؟!
حنوش قال :
– اخر مرة قابلته فيها قال انه هيروح يبنى القلعة تانى فى القطب الشمالى ؟!
قلناله كلنا بأستغراب :
– القطب الشمالى ؟!
نصير قال وهو بيلطم :
– الحرب الجاية فى الجليد؟ !!!
حنوش قال :
– بن القاف قالى انه مش هينفع يبنى القلعة فى نفس المكان تانى، خاصة انه معهوش جيش و شراذم الشياطين اللى فى الصحرا اكتر من الجن المتبقى معاه وهيهجموه , فلجأ لمكان بعيد لحد ما يجمع جيوش جديدة، وقالى على المكان بالضبط .
قلتله :
– طب هتعرف تنقلنا كلنا للقطب الشمالى ؟!!
حنوش قال :
– ما انت عارف اللى فيها يا نينو انا اخرى كيلو،.. 2 كيلو بالكتير ..
فنصير قال :
– كدا هيحصلونا بسهولة.
مارو قال :
– بقولك ايه يا حنوش هات ايدك كدا لما اجرب حاجة.
حنوش قاله :
– حاجة ايه ؟!! واشمعنا انا!
قاله :
– عشان انت الوحيد اللى تعرف المكان بالضبط..
اخلص ،حاسس بالجيوش بتقرب علينا خالص
حنوش مد دراعه فمارو قالنا :
– ضموا علينا واعملوا حوالينا دايرة ,وخليكوا لامسنا .
حنوش قاله :
-استنا..
وراح شد زيجا ودخله فى وسط الدايرة وحط رجله على صدره وقالنا :
-هناخده معانا نستجوبه.
مارو مسك ايد حنوش وفى ايده التانيه العصاية وقالنا :
– غمضوا عنيكم ، وانت يا حنوش فكر فى المكان بالضبط .. عايز افتح عينى الاقى ابن القاف فى وشى، متوهناش فى الجليد.
نصير قال :
– انا مش مقلق من حنوش .. انا مقلق منك انت .. العصاية دى هتنقلنا ؟!!
مارو قاله :
– معرفش ..
وبصلنا وابتسم وقال :
– ادينا بنجرب .
تمتم بكلمات وخبط العصاية فى الارض 3 خبطات , بعدها اتصدمنا كلنا من اللى حصل .
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية ميراث نور)
