رواية يوم الأم الفصل الأول 1 بقلم إسراء ابراهيم
رواية يوم الأم الجزء الأول
رواية يوم الأم البارت الأول
رواية يوم الأم الحلقة الأولى
خالد: ازيك يا ست الحبايب يا حبيبة
والدته وهي بتجهز الأكل: الحمد لله.. إيه اللي في إيدك دا يا خالد؟
خالد بابتسامة: هدية بمناسبة يوم الأم وكدا اتفضلي يا أجمل أم
فرحت والدته وخدت الهدية بسرعة وبتفتح فيها وهي بتقول: يا حبيبي يا خالد هفضل أدعيلك دايما بالستر والصحة
خالد بضيق: بالزوجة الصالحة بردوا يا أمي
فتحت والدته العلبة وبصت فيها وقالت بحسرة: جايبلي وردة يا خالد هو أنت مفكر نفسك بتهادي بستاني؟ دا العلبة والتغليف أغلى منها
خالد باحراج: يا أمي مش تكسري بخاطري كدا… مالها الوردة المهم إني افتكرتك ولو بشيء بسيط
بصتله بضيق وماردتش عليه فقال: هدخل أخد شاور عشان هخرج شوية مع صحابي
دخل ياخد شاور وبعد خمس دقايق موبايله كان بيرن، راحت والدته أوضته تشوف مين اللي بيرن عليه لقت الموبايل فصل
بقلم إيسو إبراهيم
راحت تدور عالشحن مش لقيته، فتحت الدرج تشوفه يمكن حاطه فيه، لكن لقيت علبة صغيرة لونها أزرق ففرحت وقالت في نفسها: معقولة كان بيهزر معايا بالوردة وطلع جايبلي خاتم دهب
وفتحت العلبة لقيت خاتم فعلا فلقته صغير على صباعها فقالت بضيق: الواد جايبلي خاتم صغير يمكن الفلوس معه ماكفتش
دخل خالد الأوضة وانصدم أول ما شاف العلبة في إيدها وقال بتوتر: بتعملي إيه يا أمي؟
بصتله والدته وقالت: بقيس الخاتم اللي جبته ليا بس طلع صغير يا بني
خالد بتوتر: دا دا مش ليكي
بصتله والدته بصدمة: اومال لمين؟
خالد بتوتر أكتر: لمراتي
فتحت عينها عالأخر وقالت: مراتك؟! أنت متجوز من غير ما أعرف؟
خالد بسرعة: قصدي اللي هتبقى مراتي في المستقبل عشان أبقى أديهولها في يوم ميلادها وكدا قولت أشتري حاجة قبل ما أتزنق أكتر والفلوس بردوا بتنصرف مني بسرعة
بصتله بصدمة وقالت: أنت طلعت ولد عاق يا خالد بقى من دلوقتي هتفضل مراتك عليا طالما بتفكر فيها من قبل ما تشوفها وتعرفها، وبتهمل أمك اللي حملت فيك تسعة شهور، وغير تعب الولادة والسهر والرضاعة والصحيان بدري والنوم اللي فيه قلق بسبب عياطك وتعبك وبأكلك وبشربك وبأكلك وبحمل همك من لما كنت في بطني لحد اللحظة دي وبدعيلك دايما وبخاف عليك وبهتم بيك وبهمل في نفسي عشانك يا بني وفي الآخر تفضل واحدة لسه مانعرفش شكلها ولا أصلها اومال لما تخطبها هترميني في دار مسنين
خالد بسرعة: كفاية يا أمي يا حبيبتي أنا فعلا غلطان دا أنتِ عملتي موضوع تعبير اتفضلي يا ستي الخاتم أهو
خدته والدته وقالت: هاخده أبيعه يا عاق وأشتري اللي الحاجات اللي كنت بحرم نفسي منها عشانك
وهو بصلها بصدمة وبيكلم نفسه: معقولة الموضوع كان كبير لدرجة إني أبقى عاق ولا هي كبرت الموضوع ولا إيه دي كمان هتروح تبيعه دا أنا فضلت أحوش في فلوسه سنة
وفضل على حاله في صدمته من اللي حصل
يتبع..
لقراءة الفصل التالي : اضغط هنا
لقراءة الرواية كاملة اضغط على : (رواية يوم الأم)
