رواية ملجئي الفصل الرابع 4 بقلم نانسي محمد
 |
| رواية ملجئي الفصل الرابع 4 بقلم نانسي محمد |
رواية ملجئي الفصل الرابع 4 بقلم نانسي محمد
-دكتور حد ينادي دكتور النبض وقف
-اوعا وسع يا استاذ لو سمحت
-ارجوك فوقها ارجوك اعمل اي حاجه المهم ماتروحش
-طلعوه برااا
بعد ساعه محاوله نقلوني العنايه المركزه لان حالتي كانت شبه فاقدين فيها الامل
-ارجوكي ماتمشيش…انا انا عارف اني كنت بضايقك بس غصب عني والله العظيم غصب عني انا كنت مجروح من الدنيا مش عايزك تروحي بسببي مش عايز حد تاني يروح بسببي فوقي يابحر ارجوكي انتي متعرفيش وصلت لهنا ازاي انا…….انا
الحُزن كَلنى
الحُزن صحيح مموتنيش، لكن طفاني
…………………..
بعد مرور اسبوعين
…………………..
-حمدالله علي سلامتك يابنتي وحشتيني اوي يابحر مكنت اتخيل اني اتعلق بيكي بالشكل دا ابدا يابنتي
وطيت علي راسها بوستها وخدتها في حضني
=لو تتخيلي حضنك وحشني ازاي زي اللي كانت تايهه عن بيتها ورجعتله
-احم طيب انا طالع انام عن اذنكم
-مكانش بينام الاسبوعين اللي فاتو كان قاعد معاكي في المستشفي ٢٤ ساعه يدوب يروح شغله ويرجع يقعد معاكي كان حاسس بالذنب اوي وحاسس انك هتروحي بسببه
=بسببه ليه بس وهو اللي زقني قدام العربيه دا قدر ومكتوب وهنشوفه لو قعدنا نلوم نفسنا علي حاجه عدت مش هنعرف نستعد للي جاي
-طيب اطلعي استريحي في اوضتك فوق وبكرا الصبح لينا كلام تاني مع بعض
=تصبحي علي خير يانانا
-وانتي من اهله ياحبيبتي
طلعت غيرت هدومي لبست بجامتي وسرحت شعري واخدت روايه وحاولت اشغل تفكيري عن اللي حصل لكن معرفتش انا بين دقيقه واللي بعدها كنت يعتبر بين ايد ربنا خلاص بين دقيقه الدنيا كانت فله وعايشه ومفيش حاجه في ثانيه…ثانيه واحده بس كنت هبقا مش موجوده تاني ولا ليا وجود قد ايه حياتنا علي كف عفريت والدقيقه الجايه مش ضامنين احنا هنبقا موجودين ولا في خبر كان…
=صباح الخير يانانا
-صباح النور يابحر عامله ايه النهارده
=الحمدلله احسن بكتير…انا هحضر الفطار
-ماتتعبيش نفسك
=لا ابدا تعب اي بس دا شغلي وكتر خيركم ماجبتوش حد غيري
-اجيب غيرك ازاي ومين يعملي قهوه زي بتاعتك
=ههههه شوف ازاي بيستغلوني علشان القهوه
-اكدب عليكي واقولك اني بحبك ودخلتي قلبي وخدت عليكي لا طبعا علشان القهوه
ميلت عليها حضنتها جامد وكنت هعيط
=انا مش عارفه اشكرك ازاي لو حد غيركم كان رماني وجاب غيري لاني مجرد شغاله عندهم لكن انا ربنا معوضني بيكم
-بس ياهبله انتي بلاش الكلام دا انتي من اول يوم هنا وانا عمري ماعتبرتك شغاله ابدا انا اعتبرتك بنتي اللي كانت غايبه عني بقالها سنين ورجعت
=ربنا يخليكي ليا
-الله الله شكلي جيت في وقت مش مناسب
=فصييل فصيييل
-بتقولي اي يازفته انتي
=بكح
-عامله اي دلوقتي
=الحمدال…ايه؟
-اي مالك بقولك عامله ايه
بصيت لست امينه وميلت عليها بصوت واطي
=هو ماله؟
-ماله؟
=بيقولي عامله ايه؟
-طب وفيها ايه؟
=هو انا اتخبط وهو يتأثر بالخبطه؟
-بتتوشوشو في اي
=ها لا ولا حاجه كنت بقولها هنعمل قلقاس النهارده
-هطردك يازفته والله
=ايوا كدا ياراجل ارجع لقله الزوق تاني
سيبته وجريت علي المطبخ قبل مايمد ايده التقيله…جهزت الفطار وبعدها الغدا
=الاكل اهو تحبو اي حاجه تانيه
-اقعدي يابحر كلي معانا
=حاض…ايه لا مايصحش ياست امينه
-ست امينه تاني ماتفقنا نانا بقا
=ماشي بس مايصحش
رفع عينه من علي الطبق بصلي شويه ورجع عينه تاني وقال
-اقعدي
=اي!!!!
-الحادثه اثرت علي ودنك ؟ بقول اقعدي طالما دي رغبه نانا نفذيها
وانا اللي فكرتك اتعدلت وبقا عندك دم طلعت علشان رغبه نانا جاك خابط
قعدت واتغدينا وهزرنا وضحكنا والشهاده لله سليم مبقاش يتعصب زي الاول ولا بقا رخم زي الاول اي نعم يعني ماتعدلش بس وماله اهو احسن من اللي فات
-انا هطلع انام عن اذنكم
طلع نام وسابنا وقعدت انا والست امينه نتكلم شويه ونتفرج علي التلفزيون وبعدها نمت …..
…………
بعد اسبوع
…………
عدا اسبوع مفيش اي جديد معامله سليم ليا هي هي التغير الوحيد بقا اهدي وبيقعد وانا موجوده عادي لكن مفيش كلام يجمعنا
صحيت بليل علي صوت تكسير ورزع قومت جريت علي برا لقيت الصوت جاي من اوضه سليم
=استاذ سليم في اي
-روحي علي اوضتك
=طيب هو حضرتك كويس اي الصوت دا
-بقووول روحي علي اوضتك ايه مابتسمعيش
=مش همشي افتح الباب لو سمحت ارجوك
فتح الباب وشدني من ايدي دخلني وقفل الباب بصيت للباب بخوف وهو بيقفله
-خايفه؟
بصيت لكل حاجه حواليا مش في مكانها كأن تور جه عدي علي الاوصه دغدغها
=ايه اللي حصل في ايه
رد بصوت كانه مش صوته صوت واحد في شعله مولعه جواه مسكني من ايدي جامد وقرب من نحيتي برواز من علي الارض في واحده
-شايفه دي…شاااايفه
=شا شايفه مالها
-هربت مع واحد نكره زيك سابت ابنها وهربت مع حته خدام مقرف ومش هسمحلك تقربيلي ولا تشغليني اكتر من كدا بكرا الصبح تلمي هدومك وتمشي من هنا فااااهمه ..ردي عليا بقول فااهمه
=لا لا مش همشي لا ست امينه اللي جابتني مش انت وامشي اروح فين ارجوك ماليش مكان اروحه ابوس ايدك
-كدا …يبقا انتي اللي اختارتي يلا علي اوضتك
سيبته وفتحت الباب وجريت علي الاوضه انهارت تماما علي الارض فضلت اعيط ساعتين بدون توقف قلبي كان مدغدغ مليون حته معرفش ليه حسيت ان مره واحده رجعت من غير اهل تاني رجعت لوحدي ومعرفش هو ناوي علي ايه بس الغلط من عندي مفروض مانزرعش ورود ف قلوب الناس .. وأحنا عارفين ومتأكدين بإن الأرض مش أرضنا ..!
………….
تاني يوم صحيت ومكنتش نمت غير ساعتين ونزلت احضر الفطار
-مالك يابحر مال وشك
=ابدا ياست امينه انا بس عندي دور برد مانمتش منه
-طيب ارتاحي النهارده
=لا لا مفيش حاجه دا انا خلاص خفيت
-الي يريحك يابنتي
حطيت الفطار ولسه هلف واطلع اوضتي جرس الباب رن كان سليم فتح
-السلام عليكم
-وعليكم السلام مين
-حضرتك استاذ سليم الفيومي ودي فيلا عبدالرحيم الفيومي؟
-ايوا انا
-جالنا بلاغ ان المدعوه بحر الهاربه من ملجأ الحلميه موجوده عندكم هنا
قلبي وقع حسيت الدنيا بتلف بيا وان العالم بينهار حواليا
-مين انتوا وعايزين ايه بحر بتشتغل عندي هنا قولهم حاجه ياسليم
-يافندم ماينفعش دي هربت ولسه تحت السن القانوني اللي يسمحلها انها تخرج وتبتدي حياتها لوحدها انا مضطر اخدها معايا
جريت علي ست امينه مسكت ايدها وتبت فيها والراجل كان بيشدني
=الحقيني ارجوكي مش عايزه ارجع ابوس ايدك سيبني انا معملتش حاجه ابوس ايدك مش عايزه ارجع قوليلهم ياست امينه
-لو سمحتي يلا وكفايه بقا عند
=لا لاااا ابوس ايدك مش عايزه ارجع ارجوك
-ماتقول حاجه ياسليم خليهم يسبوها
-انا اللي مبلغ …….
اي؟ هو؟ فلت ايدي من ايد ست امينه وبصتله في عينه وسيبتهم ومشيت مع الراجل وانا حاسه ان الدنيا كلها اتفقت توقع بحر…….
يتبع..
لقراءة الفصل الخامس : اضغط هنا
لقراءة باقي فصول الرواية : اضغط هنا
نرشح لك أيضاً رواية عشق أولاد القناوي للكاتبة شهد رفعت.
