Uncategorized

رواية كحل عرب الحلقة السابعة والثلاثون 37 للكاتبة زينب ماجد

 رواية كحل عرب الحلقة السابعة والثلاثون 37 للكاتبة زينب ماجد

رواية كحل عرب الحلقة السابعة والثلاثون 37 للكاتبة زينب ماجد

رواية كحل عرب الحلقة السابعة والثلاثون 37 للكاتبة زينب ماجد

(فخ ال ثجيل ) 
واتصبّر يكَلبي
انعيش تتواكَد واكَلك هود 
دنياتك نحيسة عين والوادم خلية جود ..!
(لـــِ عريان السيد خلف )
سرحان : كضيت ايد خنجر … اوچب 
– خلني اشوفهم الشيخ ياهو . 
– موش بفاتحة ابونا ، اطي صبر
ظل يغلط خنجر : مناعيل الوالدين مال افوت بيهم و علي اوذرهم اتوذر … 
ظليت كاض ايد خنجر و اعاين بيهم .. اطاني زناد نظر و مال عني .. دخلوا اهل العراضة للفاتحة .. و انا وكفت اعلى راس الفاتحة ، اجا زناد صف يمي ، راد يحجي اجو ازلام تسلم … 
فرونا واحد واحد … و مشوا . 
حجه زناد : اشوفنك سكتت يخوي . 
– جاي احاول اكظم غيضي منك … بس خاطر ما تصير سالفة بفاتحة ابوي والا ….
– والا شنهي يسرحان 
– دكتك ناقصة .. ابوي وصى تخلص الفاتحة و نحجي . 
– ابوي ما وصى ، ابوي اخر ايامه ما كام يفرزن اموره و انت مليت راسه اعلى اهله .. استغليت مرضة و شردت الوادم من القصر لا خليت ليه زوجة ولا خوان ولا ويلاد  .. كلهم هججتهم و تكلي الشيخ وصى . 
هزيت راسي و سكت و انا اصمن اعلى ايدي حيل خاطر اجرع جلماته ليه بنص فاتحة ابونا .. انترس صدري غيض منه و كام الهوى البيناتنا يخنك بزردومي . 
استغليت موقف .. مغرب و صبة غدا و انا طلعت من الفاتحة كلها. .. اهيس الدنيا انسدت بوجهي كلش … وينك يا بويه امس دفنتك حدر التراب و اليوم عداك تولوني .. 
جنت اهيسنه حايط شكثر ما اتأذى منه لجن وكت ما اهوى استند اعليه و يسندني، لا اخو يوكف بوجهي ولا خوان .. طاح وطلعو الجانو ضامين روسهم و ما يحجون جلمة بوجوده . 
دشيت القصر .. ديوانه كله نسوان غربة 
حس كواغد طالع و هي تنعى .. دنجيت راسي ما عاينت احد .. ومشيت لحجرة ابوي ، كربيت لفراشه .. جريت السكملي وكعدت اتنوع لمچانه .‌
-ذول اخوتي الكتلي شد ظهرك بيهم بويه ، ذوله عمامي الكلت شيرهم و شاورهم .. ذول اهلك . 
دكة اعلى دكة اهيس راسي ما كام يفرزن اموره ، كلشي عدي اختلط .. الواجب اعليه هساع اكضن زناد و اطردنه من الفاتحة و اذبه من العشيرة و انا اعرف ابوي عهدلي مجانة و مضيفة .. لجن وصيته لا تتصرف الا تبات بمصيبتك يوم .. 
(بويه سرحان لا تشمت عداي بيه )
اندكت الباب ، شلت راسي و انا افرك بوجهي : يااااهو 
فتحت الباب بشرى : رايدينك غاد 
– كليلهم جاي . 
كمت من مچاني عدلت هندامي ، مسحت على لحيتي و على شعري .. و لفيت الشماغ على ركبتي .. فكيت الباب و جاي اطلع … 
عرضت هدوة جدام عيني … خذيت نفس بشوفها و كلت الها : شلونج بويه ، شلون علومج . 
هزت راسها و بساع تجمعت دموعها بعينها ورارن .. 
ظليت موچد بعيونها … اتلامعن الدموع بعيني و انا اشوفنها .. ولا جنها هدوة ذيج ، فراكي ماخذ من حيلها هواي .  
تمنيت هنا و يوكف بيه ريل البين ، و انسى السلف و الناس و الخوان  و احط بمحطة شوفها وارتع برسومها … 
ما حجت لجن ادموعها جان يحجن و كل نظرة من عيونها اهيس تسألني ( ليش ؟ ) و لحظة عتابة مرت احلى عيونا حظنت شوف بشوف . 
درت عنها و انا اقفل الباب مال حجرة الشيخ ، كربت مني بشرى ، و هدوة وراي ، حجيت : حجرة الشيخ ممنوع منعا باتا احد يكربها والقفل .. خوش ؟ 
– خوش 
حجتها و عينها اعلى هدوة التحس بدموعها .. 
طلعت من المجان كله .. لكيت رحيم و حاكم واكفين بالباب : وينك يمعووووود 
– موجود 
– راح تسكت ؟ 
– لا ما راح اسكت .. بس موش وكته 
– جا يمتى وكته  ؟ احكم بزناد وطردة من الفاتحة .. هاذ ردي ودك الردية وكسر جلمة ابوه . 
– فاتحة ابوي تهمني ازود منه ، ما اريد اخلي الوادم تتشمت بينا هساع .. نصبر و ليما تفض الفاتحة ذيج الساعة تتصرف . 
رحيم: دك الحديد و هو حامي يسرحان ، يو خلصت الفاتحة يلاوونك .. خزيهم و شهدهم بوصيت ابوك . 
– جا ما فركت عنه ؟ ابوي الوصاني ما اشمت عداه بيه اكومن اطرد اخوي من فاتحته .. ما بيدي شي غير اصبر ليما تفض الفاتحة 
خنجر : امرني بيهم و خلني اوذرهم . 
– كض روحك يزناد .. ما اريدنك تتهور بيهم . 
مشيت جدامهم و هم تبعوني .. مريت من كفا الفاتحة عمي و زناد صابيلهم غدا و كاعدين ياكلون .. ساعة المريت منهم ما شلت عيني الهم .. تعديتهم مهامسهم وراي . 
دشيت للفاتحة .. توني جاي اكعد .. اجت عراضة من بعيد و شايلين بيارغ حمر و سود و عليها اسماء عشايرهم و يهوسون ( بخيت الچّلب وي ذوله ) 
حجه رحيم : كوم بساع عرب ال منعم اجو .. 
عدلت نفسي و كمت و ازلامنا طلعت تهوس وياهم و تدبج .. وكف الشيخ منعم .. وكامو ازلامه يذبون هوسات مدح بالمرحوم الشيخ . 
خلصو عراضتهم سلم اعليه الشيخ و حط ايده بيدي ، و فر بعدي اعلى الفاتحة فرها .. كعد و صاح ( الفاتحة يرحمكم الله ) 
رفعنا تدينا وقرينا .. خلصنا مسحنا وجوهنا ، رفع ايده الشيخ وصاح : الله بالخير 
– الله بالخير و الرحمة . 
كعدنا نتناقش بوضع العراق الحالي .. وموقف الناس و العشاير منه ..  ترخصوا ورادو يطلعون كرب اعليه الشيخ منعم حطه ايده بيدي و سلم و كرب راسه ليه : صكد السمعيته يو لاله .. زناد هو شيخ المضيف . 
– لا بسيطة ان شاءالله نخلص الفاتحة و نفضها . 
– ابوك موصي الشيخة ليك يو اله . 
– لا طبعا وصاني ووصايا جثيرة ، لجن عمامي باخر فترة تكاطعو ويا ابوي .. وما جاي افتهم شنهي غايتهم بس محلولة ان شالله . 
– ايدنا وياك وحط ابالك يو اعتازيت العونة امتنوه شيالة و اركابنا سدادة . 
– والنعم منك و ثلث تنعام .. ما تقصر شيخ و على راسي . 
– دايم راسك مرفوع .. ياله عز الله مصابكم . 
– الله يسلمك . 
طلع من الفاتحة و انا اعاين .. الغربة اخير من الكبرة .. كرايبي واحدهم نابز بكتري جنه سجين بخاصرتي . 
على حس كريم و هو يصرخ : يابووووووووووووووويه ، ولك بووووووووووويه 
ركضت ليه و تلكيناه ذب روحه اعليه و صاح : راح ولك سرحان راح و ما راضي عنيييييي ، ياااااابوية 
حضنته وكمت ابجي وياه ، حسيت دموعك و كتله : كول ياله خوية .. اترحمله و ادعيله بالمغفرة .. وراضي عنك ان شالله 
– حاوليت اشوفنه جم مرة .. وهو ما رضى يشوفني ، شكثر ردت منه يسامحني و ما دارلي يسرحان ، راح ابوي و هو مغضب اعليه . 
سندته و كلتله : شد حيلك و اوكف بفاتحته 
وكف زناد ؛ ابوي متبري منه و ما يرضى بدشته لقصره و مضيفه شلون ترضى دشت اخونا الفضل الكاوليه اعلى ابوي ، و جاي ادخله . 
كضيته و ضربت على صدره و جريته ليه حيل و كلتله : خلني ساكت عنك ولا تخل غيضي ينفجر و اكومن اطردنك انت موش هو .. ابعد عني و خلني صابر ليما تفض الفاتحة . 
كريم ظل يعاين ليه : انت شمالك ؟ 
– جان ظليت بكتر مرتك عليش كلفت روحك لفاتحته.  
سرحان : شفت كريم راد يحجي اشرت لزلامنا وجريته من ايده و كلت اله : تفضل خوية تفضل . 
كعد و هو يبجي بالفاتحة و يذكر ابوي و يحجي بندم على ساعات الفاركه بيهن و ما ظل حذاه 
ظليت اواسي بيه .  حس دموعه و كال : شصاير بينك و بين زناد . 
– زناد تمادى و داس اعلى كلشي و لزوم ينرد 
– شنهو الصاير ؟ 
– نصبو عمامي شيخ 
– ابوي موش وصاها ليك . 
– جاي ينكرون وصية ابوي .. لجن ناطر الفاتحة تخلص و نحجي . 
– شكثر نذل هاذ ، انا اكومن اشوفن امي و اخيتي .. 
– مرتك وياك 
– اي وياي ، لجن يا سرحان شابع ضيم 
– عليش ؟ 
– شغلي حيل متعبني و الكمة كوة جاي احصلنها 
– كثر الشرب يكريم مكضي فلوسك على الشرب .
– كلما احاول اكطع يجي الليل و اردن … ما اكدر و تعبت غاد سرحان كلش تعبت .. لا هي ديرتي ولا هي ناسي .. جزعت العيشة غاد . 
– الله كريم ، روح شوف العالية و عود نحجي بعدين.  
لثالث يوم الفاتحة جان اضخم يوم و كلش متعب … نشتغل و ما نلحك .. ندهت علي امي و كالت : يمه تراها كواغد صارلها ثلث تيام تنعى بالفاتحة و ما كطعت رجلها ولا فاركت الديوان .. بيضت وجوهنا بنعاويها لزوم نطيها حكها . 
– تستاهل ام ستار 
شال وانطاها .. وحجه : سويلي مجال خاطر ادشن .. 
جاي امشي شفت وحدة من اليشتغلن بقصرنا .. تشيل بصندوك مالت بتيتة و كوة تنحثل بيه …  كتلها : عنج بويه هدي بالكاع . 
حطته اعلى الكاع .. وشلته انا خليته بمخزن غاد جوا بالغصر .. اول ما دشيت ، لكيت راديون و هدية جويعدات يسولفن .. مشيت عنهن و هن وكفن .. حطيت الصندوك … راديون طلعت و هدية ظلت واكفة بالباب ترد تمشي و تعاين ليه . 
اندرت خاطر اطلع و هي موجفه بالباب ، لا هي طالعة ولا هي داشة وبطنها عالية .. مدري شبلاني و رجفت اعضاي حذاها .. لجن تداركيت امري وانا اكللها : 
– من رخصتج خوية بس امرن . 
بساع شالت راسها ليه و كضت باطراف الباب .. و ميلت .. حجت : جنت اظننك ولف و الزلم ما تهد ولوفها بس يا حيفن عاليالي الكضيتهن بطرواك . 
اندرت ليها و كتلها : انا ابن شيوخ العب اعلى النسوان ، اجاريهن اماشيهن .. اكضي وياهن وكت اي بس بالاخير اخذ التعجبني و التناسبني ، شيليني من بالج يهدوة و انسي ايام الغوى تراهن جانن ايام طيش و هساع انا وياج كل واحد ليه حياته و مستقر بيها .. لا تفتحين دفاتر عتك ما ينفع ذكرهن . 
حجيتها ووكوة طلعن هالجلمات من خلكي ، اهيس رويحتي انعصرت ساعة اللجمت جروحها بهالجلمات ، شفت عيونها دمعن جدامي و عزت اعليها تنطك جلمة . 
ما تحمليت اشوفن عيونها همالات .. كلشي احمل الا ادموعها .. درت منها و انا كل اعضاي تتراجف و اهيس البصدري جن تعطب . 
 لجن اعرف هي ظاله اعلى اطلال عشكي .. و انا اعرف دربنا مامش امل بيه ، عليش موهدنه حياتها و هي تتامل ترد ليه ، خلها تحقد اعليه و تتوالم ويا حياتها وتنساني . 
حجت : شكثر فرق بين حجي الكبل و حجي اليوم 
كبل .. لا تهدين ايدي يهدوة 
وهساه .. انسي ايام الغوى 
انا يو كلبي ينطيني جا دعيت عليك بس والله كلبي ما ينطيني . 
ما درت ليها هديتها وراي بس شعلتني بجلماتها ما تحمليت .. دشيت لحجرتي و انا افرك بصدري ، اهيس كلبي اشتعل نار .. 
دفرت الميز برجلي بلا وعي .. صار صوت قوي .. فز مأمون من مجانة .. اندرت ليه كام يبجي شلته حبيته براسه و طلعت و انا اصيحن ببشرى خاطر تجي ليه . 
مشيت برا و هم جاعد ينزلون الجوادر .. وكفت اعلى راس الديوان و اخذتلي نظرة اعلى بيوت السلف .. اخذت حسرة … 
لا ولف 
لا خوان 
لا كربة زينة 
ايام كمت اهيس بروحي كلش غريب بهاي الدنيا ومالي مجان بيها ، جنت متني الله ياخذ عمري ويعوف ابوي . 
لما الانسان تتوالى عليه خيبات الامل 
ينام اعلى خيبة و يصحى اعلى خيبة 
يوصل مرحلة ييأس من كلشي بحياته و يسألن نفسه : انا شعدي بهاي الدنيا وليش حصتي منها بس القهر ، يحسدوني اعلى مجاني ابن شيخ وابن قصر وانا بس الكسران والخذلان نصيبي من هاي الدنيا . 
تنهدت خنجر وكف اعلى يمنتي ، درت ليه : ليش جاي يصير هيج وياي ، كلشي اريدنه يصير بعكس   . 
– هاذ الطيب يسرحان الدنيا تريد الصلف و الناس تقدر الحقير .. و تذل اليتواضعلها… و اليمش وياها عدل تستهين بيه و ادوس اعليه ..  
وكف كريم بظهري : لا تظن مات ابوي و ظليت وحيد ، وياك للمنية وما اهدنك … 
خنجر : امر و احنا حدر يمناك . 
اجا حاكم .. كرب و كال : سلطان رايد يجي يعزيك 
– هلا بيه .. خل يجي 
شوية و اجا سلطان و ازلامه يطلع بيهم ٢٠ واحد .. مد ايده و حطها بيدي وكال : غدروك يوليد ثجيل . 
– اهلا ابو نعمة تفضل 
– كتلك دام بيك دم من ال ثجيل ما يطوها الك .. خافن تصف و تميل لخوالك . 
– خيوان و سوء فهم و ينحل ان شاءالله ، ازناد اخوي و حزام ظهري .. ما بينا غدر ان شالله .
سلطان : جاي تغشم روحك يسلطان ، ان جان ثجيل راح حكه من كون دواي ما عهدها ليه ، لجن ابوك وصاها ليك … لا تخلهم ياخذون حكك و احنا وياك زلام ثجيل بخويطهم امر و هسه نحطلك روسهم حدر جدامك .. 
تكرب ازناد للمضيف و صاح : يا حلا نامت  عين الشيخ و ال ثجيل حلو بديارنا . 
سلطان : ابن الحلال بذكره .. كرب ومد ايده لزناد .. زناد ما مد ايده لسلطان ووكف جدام مضيف الشيخ مطر و حجه : شنهي الراي يبن ال ثجيل 
– جينا نأدي واجب لمنا و بينا .. لجن فضلينا ما ندش الفاتحة ولا نكربها .. 
حجاها وتكرب من سرحان و شاوره : ساعة التقرر احنا وياك .. لجن بالك تهد حكك .. ولا تظن انت وحيد .
– هلا بيك ابو نعمة ، ما تقصر . 
حجاها و سلم وراح .. و زلامه تبعته 
دشينا للمضيف و كعدت .. و التموا عمامي وكبار العشيرة و كعدنا .. سبقني زناد و هو يحجي ويا الكبار ويسولف وياهم و فتح سالفة اعلى ابوي . 
اريد افتح موضوع واحجي هو اتعمد يسولف .. 
الى ان سالفته حدرت ليما كال : ابوي اخر ايامه كام الله يرحمه ما يفرزن .. و يأشر لعمنا من العشيرة و يكله حتى اموره ساءت  لا كام يعرف اخ ولا ابن .. ما يتضكر غير سرحان من كون سرحان ما هداه ، جزاه الف خير ، لجن كلش فقد ما كام يعرف شيحجي . 
انا حجاها و كمت ليه و انديت كضيته ياخته : يالردي ياهو الما كام يعرف شيحجي ، ابووووووي يخرف ، سرسرررررري 
جروه من عندي الزلام : ولك اخر يوم بعمره و هو يتضكرنا كلنا ووصاني اعليكم واحد واحد و انت تنكر .
حجا عمي : ياهو اليضكرنا واحد واحد و احنا دشينا اعليه و طردنا و ما عرفنا . 
– طردكم من كون انتم كمت ترفضون شوره و ما ردتوني اروحن لدعوة شيوخ الفرات الاوسط .. و هو اغتاض منكم ساعة العارضتوه 
جاسم : مامش هيج حجي ، دشينا اعليه و اهو طردنا و ما عرفنا و حتى زناد
– لا تكول زناد … ابوي وصى المضيف ليه 
صاح عمه : لا لا لا .. ما وصى كبل سبع اشهر كال ولدي خيرتي من بعدي .. ما وصى لواحد من ولده ولا فرك بيناتهم بس النعرفه زناد هو الجبير .. والحك اله . 
– بحظك و ابختك تنكر وصية ابوي ؟ 
– ان جان موصيك انا ما ادري 
زناد : شموصي .. سرحان اخوي ما اكرهنه لجن اخر ايامه فتك بالقصر طرد امي و خلا ابوي يبعدها و طرد عمامي و حتى كريم بعده 
كريم : تخسى يالنذل ولك يو ما انا شاهد سرحان ساكت و حاكم الجاب الطارش من ال ثجيل و ابوي بعد الوالدة و انا ما بعدني سرحان .. حماني من الجانو يلاحكوني ولك انت ليش هيج ردي 
كام زناد و تعارك ويا كريم و سواها هوسه و يصيح انا اخوك الجبير تغلط عليه ابوووو الكاولية 
وكريم يرده : سترت بت كالوليه و رديتها من الدرب بس ما دكيت الردية ويا اخوي و غدرت وصية ابوي، انا اتكلي يالنذل . 
ازناد و اعمامه تكاومو اعل. كريم .. وصار الصياح ماله والي و خذو الدنيا بصياحهم وسووها هوسة . 
يريدونهم بس يسكتون هجمو المضيف بصايحهم . 
الناس بعدها تتوافد اعلى المضيف تعزي .. و ذوله هرجو الدنيا ، سرحان ما شاف بيهم رجيه يسكتون ، خصم السالفة و طلع . 
حميد : المن طالع .. عليش تخلي ياخذك بالحس العالي
– جا شنهي تريد الناس تكول توه طاح ابوهم و تكاومو .. ما اشوف الوادم اجبلت و هم يهوسون .. نزل للناس يتقبلهم و يرحب بيهم .. طلع زناد من المضيف و يرحب ..  
دشو للمضيف كعدوا .. 
تقرب رحيم لسرحان :   ازلام زناد وولد عمامك كلهم مسلحين  وواكفين اعلى باب المضيف 
– شني هاي .. شناوين ؟ 
– ناوين عليها يو بالطيب يو بالكوة . 
درت لزناد يعاينلي  ظليت صافن ويا روحي : هاذ اخوي لو عدوي ، يحزم ازامه و يسلحهم يو ما تنازلتله يكاومني و نتجاتل ؟ 
كامو الزلام من المضيف سلموا و طلعو .. 
حجه الزلمة الجبير .. هاذ زلمة خير و جبير بالسلف و ابوي جان يحترمه حجه : بويه احنا ما نريد نشمت الوادم بينا .. الحك ينحجي احنا من الاول نعرف ازناد ابن الشيخ مطر  وكل عمرنا نشوف زناد احذاه الشيخ مطر ، نعرف عده ولد ثاني غير كريم الزغير لجن مبعد و ما نعرف عنه شي .. هاي كبل سنتين يالة عرفناك .. لا تزعل لجن هاذ الحك . 
الشيخ الله يرحمه جان جثير افعال اگليل حجي .. ولا مرة كال النا ياهو اليخلفه من بعده لجن النعرف جدامنا زناد هو الويانا و حاضر فصولنا و كعداتنا و يعرف اوادمنا ، لا تزعل يوليدي لجن هاذ الحك . 
– عمي حكك اعلى عيني وراسي ، لجن الشيخ وصى و انطى وصيته…. قاطعه عمه 
– وصانا بيكم و كال تخلفون عهدي بخير لجن هاذ الحجي كبل سبع شهور 
– عمي اضكر الله كالك سرحان الشيخ من بعدي اسندونه و تصيوله ظهر و عونه .. هاذ الحجي يو لا 
– حرام بالحرم ان جان سامع هاذ الحجي
حجه الزلمة : منهو الجانو شهود اعلى حجيه ووصيته التكول عنها . 
– وعلي عمامي جانو كاعدين .. وزناد و اهل القصر كلهم يعرفون الشيخ وصاها ليه و كبل سبع شهور ، وحرام بالقران ابوي اخر ايامه ما فقد ذاكرته ولا نسى احد و اخر يومين من رديت من مجلس الشيوخ وصاني . …. قاطعه عمه 
– يعني تجءبنا يسرحان و احنا جذابين 
– عمي جنت شاهد على الوصية احجي حك ربك 
– وانا اعرف الحك الشيخ ما اطاها لاحد .. عمك انا ولك .. ما تجذبني افتهمت . 
ازناد يكول ابوي وصاني من اسنين 
و سرحان يكول وصاها ليه .  و اغلب زلام العشيرة صفت ويا ازناد من كون سرحان جديد عهد اعليهم .  جان عايش ابغداد و كبلها عايش ابيت زهرة .. وكل الناس تعرف زناد هو الجبير و ابنه عمره ٧ سنوات و ابن سرحان يادوب عمره اشهر ما بيه سنة .
سرحان شاف الزلام مسلحة و زناد مثبت ياخذها يو بالطيب يو بالزور .. كام منهم و هداهم .. وعافله المضيف . 
خنجر و حميد و خاكم تسودنو : شلون تهد مضيفك اله 
– جا ما شفتم زلامه محزمة بتفكهم شنهو البيدي اسوي ؟ 
خنجر : جا انت خايف من زلامه ولك انطينا اشاره نهده كلهم والله ما نخلي راس اعلى لشه  . 
– واسوي الدم للرجاب خاطر اخذ المشيخة شمالكم تسودنتووووووو .. هاي و احنا نصيح يا علي تبرى من عدنا علي ان جان نكص الروس الخاطر نشيخ .. جا شنهي عليش نسمي ارواحنا اتباعه اذا ما نمش بسيرته … يريد المشيخة خلها اله 
– و تهد حكك يسرحان 
– الحك عد الله ما يضيع ، انا زلمة لا احب المشيخة ولا الي بسوالف الفصول ولا انا بحاجتها عدي معاملي و مشاريعي ابغداد .. خله اله و عساها بحظه و ابخته . 
التفتت الرحيم و كلت له : الوصية الطاه الك ابوي جيبها و اندهم الديوان القصر خاطر نفتح وصيته . 
راح رحيم اخذ الوصية .. ونده ازناد و كريم و العمام .. و دش لديوان القصر .. و حضرت ملوك منقبة .. وبنات الشيخ و راديون .. و اولاد عمامهم كلهم و التمو كرايب بالديوان مامش غريب . 
فتح الوصية و الشيخ مقسم خيراته 
القصر و البستان ونص من املاكه لسرحان 
و النص الثاني ربعه لزناد .. و اتلث ارباعه يتوزعن اعلى بناته و ردحة حاسبها من ضمنهن و مطيها حكها 
و حارم كريم و الشيخة ملوك من الميراث . 
واخر وصيته الهم ختمها بأية قرأنية ( و تعاونوا على البر و التقوى ولا تعاونوا على الاثم العدوان ) 
ابتسم سرحان : يكولون الما يشوف الشمس عمى اليعميه .. من اجداد اجدادنا .. الشيخ يورث  من ابوه الشيخ المتوفي القصر و البستان  ..  و ابوي كتبهن ليه و هاذ كافي يدليكم بالحقيقة النكرتوها . 
كام اعلى حيله ووكف : امامنا علي يكول الوفاء لاهل الغدر غدر عند الله .. وانا اوافيلكم بعد العملتو يصبح غدر .. من هاي يا زناد كدامك بس الليلة .. تاخذ امك و نسوانك و تطلع من القصر و البستان قاطبة 
– تطردني من قصر اجدادي يسرحان ؟ 
– احمد ربك اكتفيت بهالقدر و ما جريت روحي للدم و الا انت مستاهلها .. لم ضعنك و امش . 
– اطني مجال للسبعة مالت الشيخ 
– باجر الظهر يتفرغ القصر بالكامل و يو ما تفرغ وكتها تجبرني اوضف الحرس يذبون اهلك خارج ، لا تجبرني اعلى الردايا اخذ اهلك و امش عنا . 
كام اعلى حيله و كال : تخسى اظلن مذول واتاني تذب غريضاتنا خارج ، كومي يمه . 
اخذ نسوانه و امه .. و راديون كالتله : اظلن بقصر ابوي 
جرتها الشيخة ملوك و طلعتها من القصر ومشوا لبيت عمهم .. 
لثاني يوم الناس تجي تعزي استغربوا .. اهل زناد عايفين القصر .. عرفت الناس الحصص توزعت بس الكل ينشد : ال جلوب معروفين القصر ينعد للشيخ ، شعجب الشيخ مطر عهد قصره لسرحان موش للشيخ زناد ؟ 
وظلت الناس تتسائل بهالموضوع .. ليش قصر الشيوخ ما صار للشيخ وراح لسرحان ؟ 
سلطان مغتاض من تصرف سرحان و اجا بس خلصت السبعة مالت الفاتحة : انت شنهي اتسودنت ترضى تنطي مضيفك لزناد 
– انا واخوي و الامور بينا تنحل .. 
– يا تنحل و اهو ماكل حكك 
– ابو نعمة انا احترمنك لجن ما ارضى احد يدش بيني وبين اخوي . 
– هده و ذب جرش ويانا و احنا ناخذلك حكك 
– ان جان هو باعني ، اما ابوي موصيني ما ابيعنه .. وانا ملزم بوصية ابوي اوجب حذاه و ارشدنه يو راد النصيحة . 
– يعني ما راح تتكاوم وياه . 
– زيغ شيطان و نتراضى ان شالله و خير يو سعيت بيناتنا و صالحتنا . 
– جا خوش ..  امش ينعمة . 
نعمة : شنهي الراي بويه 
– يا بستان الصار من حك زناد ؟ 
– اللي باطراف السلف .. بستان زغير ما يطلع ربع من بستان سرحان . 
– و يو راح شيظل الزناد ؟ 
– بيت و جم فلس .. ما تظل اله كاع . 
– جا اشعل الكاع ينعمة 
– عليش ؟ 
– سرحان لزوم ياخذ بحكه .. لجن ما يريد الطك .. لجن يو شعلت الكاع المتهم الوحيد بحريجتها ياهو ؟ 
– سرحان مامش غيره 
– و يو تهم سرحان ؟ 
– تكاتلو 
– ويو تكاتلو ندش نتحمى اعلى النار و ناخذ حيفنا منهم وخل الديرة تعاين اولاد مطر ساعة الغفت عينة شعملو بحالهم . 
زلمة سرحان ياهو ؟ 
– خنجر و حميد  رحيم 
– جر وحيدهم لكاع زناد .. و اشعلها . 
…. 
اندكت باب بيت حميد و كالوله : يكولون خنجر انجتل بكاع زناد .. 
فزع حميد يركض للكاع يهرع .. ساعة الوصل كاع زناد بالليل و يدور اعليها .. و يصيح ما لكا احد و السالفة موش صحيحة 
دار راسه وورجع 
انرشت الكاع بنفط و اشتعلت كلهاااااا 
فزعت الناس تصرخ ( حرررررررررررررررريجة  يهالوادم حرررررررريجة ) …
يتبع …
لقراءة الحلقة الثامنة والثلاثون : اضغط هنا
لقراءة باقي فصول الرواية : اضغط هنا

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى