رواية زوجة ابن الأصول الفصل الثلاثون 30 بقلم ملك ابراهيم

فكرت جانيت انها تروح وتتكلم مع زين وتحكيله كل حاجه وتطلب حمايته..

اتحركت من قدام العمارة ومشت علي الطريق وهي بتفكر هتقول ايه ل زين..

ظهرت عربيه فجأه واتجهت لمكان جانيت بأقصى سرعه وصدمتها بقوة وكمل سائق العربيه طريقه بسرعه جنونيه????

عند زين وعليا❤

ضمها زين بسعاده واتكلم بحنيه: حبيبتي انتي كويسه..؟!

هزت عليا راسها ب ااه واخفت وجهها في صدره بخجل.. ابتسم زين وزاد من ضمها واتكلم بمشاكسه: شوفتي الموضوع سهل وبسيط ازاي..

اتكلمت عليا بصوت ضعيف من شدة الخجل: زين اسكت بجد انا حسه ان هيغمى عليا

وضمت وجهها في صدره اكتر وتابعت كلامها بكسوف: انا مش عارفه اصلا انا وافقت علي كدا ازاي

رفع زين حاجبه واتكلم بجديه مصطنعه: وافقتي علي ايه معلش..!! حبيبتي المفروض دا كان يحصل من زمان اصلا

ردت عليا بخجل: لا يا زين انا بجد حسه ان هيغمى عليا

لتتابع كلامها بجديه مصطنعه: بس انت اللي ضحكت عليا مليش دعوه

ضحك زين واتكلم بهزار: طب تعالي اضحك عليكي تاني

اتكلمت عليا بخجل وهي بتحاول تبعد عنه: لا زين اسكت بقى

زين بمشاكسه: اسكت ايه دا انتي طلعتي عيني معاكي

ابتسمت وهو قرب من شفايفها يقبلها لكنه توقف فجأة لما سمع صوت دقات قوية متتاليه علي الباب..

اتكلمت عليا بتلقائيه مرحه: هو عبد التواب جه هنا ولا ايه..ههههههههه

بصلها زين بغيظ واتكلم بتوعد: دا لو عبد التواب بجد انا كنت اقتله

زاد الخبط بعنف وظهر صوت احدى الخدم وهي بتنادي عليه برعب

قلق زين ولبس قميصه بسرعه واتجه لفتح الباب ..

وقفت البنت اللي بتخبط واتكلمت بسرعه: الحق يا زين بيه ..البيه الكبير جد حضرتك بيقولك انزله بسرعه ..جانيت هانم عملت حادثه كبيره اوي والمستشفى لسه مكلمين البيه دلوقتي..

بصلها زين بصدمه واتكلم بسرعه: طب قوليله ثواني ونازل

وقفل زين الباب ووقف بصدمه ..قربت منه عليا واتكلمت بخوف: زين هو ايه اللي حصل.. ازاي جانيت عملت حادثه

تأملها زين وهو بيفكر.. معقول اللي حصل ل جانيت دا بفعل فاعل..!!!

هز زين راسه بهدوء واتكلم مع عليا وهو بيحاول يطمنها: حبيبتي متقلقيش ان شاءالله هتكون حاجه بسيطه

هزت عليا راسها بخوف.. ضمها زين وهو بيحاول يهديها واخدها وقعدها واتكلم معاها بهدوء: حبيبتي اهدي خالص واطمني ..انا لازم انزل دلوقتي واروح معاهم المستشفى وانتي عشان خاطري متخرجيش من البيت خالص مهما حصل ..اتفقنا

هزت عليا راسها بخوف وقبل زين اعلى راسها ودخل علي الحمام بسرعه وبعد وقت قليل خرج وكمل لبسه بسرعه ووقف واتكلم بتأكيد مرة تانيه: عليا حبيبتي ..عشان خاطري ماتخرجيش خالص مهما حصل..

ردت عليا بقلق: حاضر بس ابقى طمني ..انا بجد قلقانه عليها

طمنها زين وخرج من الغرفه بسرعه ونزل لقى جده ووالده في غرفة المكتب وبيتكلموا بغضب

والد زين: انا مش عارف ايه اللي يصحيها بدري وتخرج وانا نايم وتروح المكان دا

قرب منهم زين واتكلم بقلق: هو ايه اللي حصل ؟.

اتكلم الجد بقلق: كمال جاتله مكالمه دلوقتي ان مراته عملت حادثه..

اتكلم زين: وهي فين دلوقتي

رد كمال بانفعال: في المستشفى

زين : طب يلا نروح نطمن عليها ونفهم الحادثه دي حصلت ازاي

رد كمال بملل: انا مش هروح لأي مكان وانا اصلا بفكر اطلقها

اتكلم الجد بصدمه: تطلقها ..!! جاي دلوقتي تفكر تطلق مراتك وهي في اكتر وقت محتاجاك فيه.. طب فين كلمة اطلقها دي وهي عايشه حياتها بالطول والعرض وسهر طول الليل وشرب وقرف طول النهار

رد كمال بعصبيه: هو مش حضرتك كنت عايزني اطلقها واديني اهوه هطلقها ..ايه اللي مزعلك بقى

حاول زين يتدخل واتكلم بهدوء: اسمحلي يا بابا جدي عنده حق وفعلا مش دا الوقت المناسب اللي تتخلى عنها فيه وهي مهما حصل شايله اسمك ولازم تقف جانبها

رد كمال بعنف وبصوت عالي: وانا هنتظر منك ايه غير كدا ..ما انت لازم تقف في صف جدك بعد ما فضلك عليا وكتبلك انت واخوك كل حاجه وخلاني زي الطفل الصغير اللي بيمد ايده لكم كل شهر ياخد المصروف

اتصدم زين من كلام والده و رد الجد بقوة: انا كتبتلهم كل حاجه عشان عارف ومتأكد انهم هما اللي هيحافظوا علي تعبي وشقايا وعارف ان انت لو طولت اي حاجه هتضيعها زي اللي ضيعته قبل كدا

وقفت قسمت وجيلان وهما بيسمعوا صوت صراخهم العالي ونزلت عليا من غرفتها بسرعه لما سمعت صوت الصراخ الغاضب المرتفع..  وقربت منهم واتكلمت بقلق: هو في ايه..؟

ردت قسمت بتمثيل: شكل زين بيضارب مع والده وجده..

لتتابع باقي حديثها بمكر: مش عارفه ايه اللي حصله دا كان طول عمره مش بيحب الصوت العالي ولا المشاكل

كملت جيلان حديث والدتها وهي بتنظر ل عليا بحقد: شكل زين مبقاش عارف هو بيعمل ايه واختيارته كلها بقت غلط واكيد دا مزعل جده ووالده

اندهشت عليا من حديثهم وهي مش فاهمه هما يقصدوا ايه…

خرج كمال من غرفة المكتب بانفعال واتجه للخارج.. وقفت عليا تتابع خروجه بقلق وقربت من غرفة المكتب عشان تطمن علي زين…

وقف زين جنب جده وهو بيحاول يهديه .. قعد الجد بتعب وحط ايده علي قلبه..

اتكلم زين مع جده بهدوء: جدي عشان خاطري متزعلش وحاول تاخد نفس بهدوء

دخلت عليا غرفة المكتب وقربت من الجد ونظرت ل زين بقلق: زين هو ايه اللي حصل ..

واتجهت بنظرها للجد وتابعت كلامها بخوف: هو جدي ماله ..؟

طمنها زين وقرب من مكتب جده واخد الدواء واعطاه لجده .. اخد جده الدواء وبعد دقايق قليله شعر بالراحه .. قبل زين ايده بحزن واتكلم بهدوء: جدي عشان خاطري بلاش تزعل نفسك

ابتسم الجد بتعب وهو بيتأمل نظرات الخوف اللي كانت في عيون زين وعليا واتكلم بتعب: انا كويس يا حبيبي اطمن .. المهم انت روح شوف موضوع جانيت دا ..عشان انا قلبي حاسس انه بفعل فاعل واحنا لازم نعرف كل حاجه بتحصل حوالينا عشان نعرف الضربه بتيجي منين

نظرت عليا ل زين وجده بعدم فهم وتابعت زين وهو بيرد علي جده

اتكلم زين برفض: بس حضرتك تعبان يا جدي ومش هقدر اسيبك لوحدك

رد الجد بتعب: متقلقش انا كويس وكمان مراتك معايا اطمن

ليتابع الجد كلامه بتأكيد: مرات ابوك مهما عملت شايله اسم العيلة يا زين ومسؤله مننا يعني لو احتاجت تتعالج خارج مصر او احتاجت اي حاجه هي ملزومه مننا ..انت فاهم

رد زين بتأكيد: طبعا يا جدي اطمن

وقرب زين من عليا واتكلم بهدوء: حبيبتي خليكي جنب جدي وانا هروح المستشفى ومش هتأخر..متقلقيش

هزت عليا راسها بتأكيد ..قبل زين اعلى راسها.. وطمن جده انه هينفذ كل اللي هو طلبه وخرج في طريقه للمستشفى

رواية زوجة ابن الأصول بقلم ملك إبراهيم

قعدت قسمت في غرفتها وهي بتحاول تتصل علي والدتها عشان تبلغها ان جانيت اتعرضت لحادثه وتحكيلها المشكله اللي حصلت بين كمال ووالده….

في شركة جديده للهندسة المعمارية

دخلت جدة زين واتكلمت مع اول موظف قابلها: لو سمحت كنت عايزه اقابل البشمهندس حمزه

رد الموظف بتأكيد: طبعا يا فندم ..اتفضلي لحظه واحده هبلغه

وقفت جدة زين وهي بتنظر حولها وافتكرت حديث دار بينها وبين عليا في احدى الايام لما كانت عليا عيشه معاها وهي زعلانه من زين .. افتكرت كلام عليا عن حمزه وذكرها لموضوع سلسلة مامتها اللي حمزه اشتراها ورجعهالها.. حكت لها عليا بحسن نيه لكنها كانت بتسمعها بمكر وقررت تستخدم حمزه في خطتها وهي واثقه ان زين اكيد هيفقد عقله اول ما يعرف ان في اي علاقه بين حمزه ومراته وانه اكيد هيصدق اي حاجه يشوفها او يسمعها زي ما حصل لما شاف الفيديو اللي كان مع جانيت لما شاف حمزه وهو بيلبس عليا السلسلة ..

سمعت رنت تليفونها ولقت المتصل قسمت .. خرج الموظف واتكلم باحترام: اتفضلي يا هانم البشمهندس في انتظارك .. اغلقت جدة زين تليفونها بعد ما رفضت المكالمة ودخلت مكتب حمزه

وقف حمزه ورحب بها: اهلا يا فندم اتفضلي

قعدت واتكلمت بغرور: أنا ابقى جدة زين الشافعي

وتابعت كلامها بمكر: زوج عليا

___________________

وصل زين المستشفى وسأل عن المصابه اللي جت في حادثة اصطدام سيارة .. قربت منه احدى الممرضات واتكلمت بسرعه: هو حضرتك زوج المصابه

رد زين: لا انا من عيلتها ..هي فين..؟

ردت الممرضه: لسه في العمليات اصل حالتها خطيره اوي

لتتابع الممرضه حديثها برغي: اصلهم بيقولوا ان العربيه اللي خبطتها ..صاحبها خبطها وهرب على طول وحتى العربيه مكنش عليها نمر عشان يعرفوا يوصلوله .. ربنا معاها ..ولاد الحرام بقوا كتير

اتكلم زين بزهق من حديثها الكتير: طب فين غرفة العمليات اللي هي فيها

ردت الممرضه: اتفضل من هنا

اتجه زين لغرفة العمليات ووقف بالخارج في انتظار خروج الدكتور.. وبعد اكتر من ساعة خرج الدكتور ومعاه مساعديه.. قرب منه زين واتكلم: لو سمحت يا دكتور انا زين الشافعي من عيلة المصابه ..ياريت تطمني عليها

رد الدكتور بأسف: اهلا بحضرتك .. انا أسف جدا بس الحادثه كانت صعبه وللأسف اضطريناااا…….

بصله زين بصدمه وهو بيسمع باقي حديثه…..

رواية زوجة ابن الأصول بقلم ملك إبراهيم

خرجت جدة زين من مكتب حمزه وهي بتبتسم بمكر بعد اتفاقها مع حمزه علي خطتها الجديده في الايقاع ب عليا وتشكيك زين فيها.. وكانت سعيده جدا من تحمس حمزه ولهفته في تنفيذ خطتها للحصول على عليا.. ورجعت الفيلا وهي بتفكر ازاي تقنع عليا انها تشتغل مع حمزه.. لان شغلها مع حمزه هيساعدهم كتير في تنفيذ خطتهم

________________

عند الجد جلست عليا جانبه بقلق وكانت كل شويه تسأل ياترى ليه زين متكلمش لحد دلوقتي ياترى ايه اللي حصل ل جانيت وكانت قلقانه عليها جدااا

ابتسم الجد بهدوء واتكلم بفضول: انتي غريبه اوي يا عليا ..يعني بعد اللي عملته معاكي جانيت وزعلانه عليها دلوقتي ..دي كانت هتدمر حياتك وكنتي برضه هتموتي بسببها

ردت عليا بصدق: بس الحمدلله ربنا حفظني وهي مهما كان روح وفقدانها صعب ومحزن

ابتسم الجد بهدوء واتكلم بجديه: بس مش كل الناس تستاهل تعاطفك دا يا عليا ..في ناس موجدين بس عشان اذيتكم

بصتله عليا بعدم فهم ..

شرد الجد لحظات وبص ل عليا واتكلم بإيمان: بس ربنا ان شاءالله هيحفظكم وهيرد مكرهم في نحورهم

________________

وصلت جدة زين الفيلا وقابلتها جيلان واتكلمت بتوتر: كنتي فين يا تيته ..معرفتيش اللي حصل

نظرت لها جدتها بدهشه واتكلمت: في ايه جيلان ايه اللي حصل..؟

ردت جيلان وهي بتبص حواليها: مش هينفع نتكلم هنا تعالي في غرفة ماما

رواية زوجة ابن الأصول بقلم ملك إبراهيم

وقف زين بصدمه وهو بيستمع لكلام الدكتور وشرحه ل حالة جانيت

الدكتور: للأسف الحادثه كانت صعبه جدا وحصل تشوه في الوجه من شدة الاصطدام والواضح ان العربيه دفعتها بقوة للأمام وكمل السائق طريقه ودهست العربيه النصف السفلي من جسدها وللأسف اضطرينا لعمل بتر للقدمين ..

فتح زين عينه بصدمه كبيره.. وتابع باقي حديث الدكتور

ليتابع الدكتور حديثه بحزن: احنا عملنا اللي علينا ..ادعيلها يعدى 24 ساعه  علي خير لان حالتها صعبه جدا

وقف زين بصدمه وبدأت صورة جانيت تظهر قدام عينيه في اول مرة شافها في الجامعه وهي ماشيه بتتهادى بخطواتها وبتتباهى بجمالها .. اد ايه كانت بتحب نفسها وكانت دايما بتتباهى بجمالها وهي فخورة بنفسها .. كانت دايما بتفكر في الشئ اللي يسعدها وبس ..كانت دايما مستهتره وعمرها ما فكرت في حلال وحرام ..واكيد دا عقاب من ربنا ليها ..لأنها استخدمت نعمة ربنا في الحرام و الشر ..اكيد الصدمه هتكون شديده عليها جدا.. اكيد مش هتقدر تستحمل حاجه زي دي ..

“النعمة إذا شكرت قرت.. وإذا كفرت فرت”

﷽

قال تعالى : {وَرَبُّكَ الْغَفُورُ ذُو الرَّحْمَةِ لَوْ يُؤَاخِذُهُمْ بِمَا كَسَبُوا لَعَجَّلَ لَهُمُ الْعَذَابَ}