رواية ليل الفصل الحادي والعشرون 21 بقلم ياسمين خالد
 |
| رواية ليل الفصل الحادي والعشرون 21 بقلم ياسمين خالد |
رواية ليل الفصل الحادي والعشرون 21 بقلم ياسمين خالد
حسام بعد ما لاحظ إن الولد مشي ورا سهيله وندي ،بيمشي وراه لحد ما راح وراه وكان هو واقف ف وشه وسهيله وندى واقفين ومش شايفين حسام ..
قرب عليهم وندي كانت بتقول ..يابني عاوز ايه مني مش كفايه ..
حسام بكل عنف قرب عليه وضربهُ
“ندي وسهيله شَدوا حسام ندي بتوسل : ارجوك ياحسام خلاص ،ارجوك
_ حسام بيضُم إيدو كإنه بيجمع كل العصبيه إللي جواه ..عروق إيدو بانت ..وهو باصص للولد بغِل ..كان شايف ندي بتتكلم لكنه مش سامعها ..
الولد بيقوم من علي الأرض وهو بيمسح ب إيديه الدم إللي سايل علي شفايفهُ ببرود وبإبتسامه كُلها خُبث وضع إيديه ف جيبهُ وجهه كلامه لحسام وقال إنت فاكر إنها بتحبك!قلبها مدقِّش لحد غير ليا وإسألها.
“حسام قرب عليه وإبتدى إنه يهاجمهُ..باباها سمع صوت خناقه جري وأنس ورودينا جريوا علي مصدر الصوت مسكوا ف مامتهم من الخوف باباها حاول يحوش مابينهم..
والد ندى بيحاوط حسام ويوقفهُ وراه ..بعصبيه: قولتلك إهدى خلاص انا هتصرف.
“حسام إحترَم كلمه والد ندي .
_ والد ندي وجهه كلامه للولد ” ..عايز ايه تاني ياإسلام !!
“حسام بَص ل ندي بصدمه ..بص ل إسلام نظرات شر وغِل .
_ رد إسلام ببرود: أنا مش عايز حاجه ،أنا جيت وسألت ندي قولتلها إنتي لسه بتحبيني وان خطيبك ده انتي واخداه مجرد سد خانه بس لحد ماارجعلك انتي محبتيش غيري حتي لو حاولتي تداري
“دموع ندي بتتساقط منها بصت لعيون حسام اللي بتقول انها مصدقه كل كلمه إسلام بيقولها ..بصت علي إيدو اللي مع كل كلمه إسلام كان بيقولها كان حسام بيضغط علي إيدو أكتر ..
سهيله كانت خايفه علي حسام ليفقد السيطره علي نفسه وتزيد عصبيتهُ..حاولت تقرب منه بصوت خافت : اهدي ها وحاول تبين انك واثق ف ندي وف نفسك مش كلامه اللي هيبعدكم عن بعض .
_والد ندي : بص يابني مش عايزين مشاكل انا بنتي دلوقتي مخطوبه ومبتحبش حد غير خطيبها وانت مقدرتهاش وخونتها يعني اصلا لو كنت شوفتها ف مكان تتكسف علي دمك وتتداري ،مش بعد ماالتانيه تعلِم عليك عاوز تخرب حياه بنتي .
“إسلام بان علي ملامحه التوتر والزعل من كلام باباها حاول يداري ده ب بإبتسامه خبيثه: لا لا انا اللي سيبت التانيه بمزاجي مش أكتر ،وجاي عشان بس أفوق ندي قبل ماتظلم حد تاني معاها..وانها عاوزه ترد اللي انا عملتهُ فيها مش أكتر
“ندى مسحت دموعها قبل م إسلام يشوفها عشان ميحسش بضعفها خرجت عن صمتها وبعصبيه قالت:انت اخر واحد تتكلم عن الظُلم ..اخر واحد تتكلم عن الحب والخيانه والقرف والعك وسد الخانه..اخر واحد ف الدنيا مفروض يتكلم أصلا ..انا محبتكش ياإسلام ولا عمري حبيتك كنت معجبه بيك مجرد اعجاب ويمكن مع الوقت كنت حبيتك لكن ك حب “قربت علي حسام” انا محبتش غير الشخص ده ،الشخص اللي مُكتفي بيا عن كل الناس ،الشخص اللي عمروا ماوجعني بحرف ولا أذاني نفسيًا ..أحبك إنت ! واضحك علي حسام وأظلمه عشان أنساك إنتَ! ” بتضحك بسخُريه” فكرني بيك أصلا كده!انا نسيتك من الوقت اللي شوفتك فيه مع صاحبتي وعيني جت ف عينك وتجاهلت نظرتي اللي كانت فيها كسره نفس مش عشان دايبه فيك ! لا لا ..اوعي تفهم كده والله أزعل ..زعلت عشان بس إديتك حجم أكبر من حجمك وضيعت معاك وقت كان شخص غيرك مُخلص مش أناني يستاهل إني اعيشوا معاه..زعلت اني اول مره شخص يخدعني ويتزين ب انه شخص كويس وعاوزني ومستحيل يسيبني وإنه عاوز يعمل أي حاجه عشان بس أكون معاه وأول مابقيت معاه خلاص بح كإنه كان داخل فِ رهان بينه وبين نفسه ولما كسبت الرهان قولت خلاص بقي لعبنا شويه وهزرنا هتفضل معايا كتير وعملت لعبه مع صاحبتي عشان اشوفكم وانتو سوا،أنا خلصت إللي عندي وإوعي تفكر إن حركاتك القذره دي هتفرق بيني وبين حسام عارف ليه!..عشان هو مش عيل هو راجل مدرك وواعي وناضج عارف إللي معاه إيه وعارف بحبه إزاي صح ياحبيبي “بتبص لحسام نظره كلها حب ..وكإنها بتقوله كل حرف مني طالع بصِدق “حسام رد الإبتسامه بصلهُ ب إنتصار و ب إبتسامه إستفزاز قرب منهُ وقال: إتقل منك اوي ياصاحبي أنا لو منك كنت زماني دفنت نفسي ولا إنت شايف إيه.
_ شايف إن إنتو مش هتكملوا.
= تؤ تؤ تؤ إخص عليك كده عيب ياحبيبي كُخ تدخل ف علم الغيب متعرفش إنه حرام ولا إيه !!عمتًا متزعلش كده وتكشر ..دعوة فرحنا هتلاقي كده بالبُنط العريض نرجو دعوه سيداتكم لحضور حفل زفاف الأنسه n اللي هي ندي يعني واخد بالك إنت، علي الاستاذ حسام اللي هو انا ..الدعوه دي بقي هتكون علي المكتب اللي جمب سريرك قُريب خلصانه! بالسلامه إنت يافرج يااخويا .
_ ندى ببرود: واه هنزعل أوي ياإسلام لو مجيتش ها .
“إسلام جَز علي سنانه بغيظ وحقد ومشي “..
“ضحكه حسام إللي كان مبينها قصاد إسلام عشان يضايقهُ إختفت ..راحوا تاني للترابيزه عشان يكملوا قعدتهم ..”.
_ هتفضل ساكت ياحسام .
= لو سمحت ياندي انا مخنوق دلوقتي ،سيبيني ومتضغطيش عليا
_ليه بتكلمني كده وليه بتحسسني إن انا اللي قولتله يجي!.
= انا مقولتش حاجه ياندي كل اللي طالبوا إني مش حابب اتكلم بس
_ سهيله: ليه ياحسام مش حابب تتكلم!،انا عارفه إنه مش من حقي أتدخل ما بينكم بس ده غلط البنت فعلا كانت ماشيه ورايا واول ماشافته حاولت تتجاهله وفهمتني ان ده كان خطيبها القديم وهو كان مصمم يوقفها كإنه فعلًا كان ناوي علي إنه يخرب مابينكم .
_والد ندي بيوجهه كلامه لندى وملامح وشه كان باين عليها الزعل: يلا يابنتي عشان نروح
_سهيله: ياعمي اقعد ده سوء تفاهم ،وحسام بس غيران عليها شويه .
“والد ندي بَص لحسام لكنه منطقش وكان مُستسلم لحزنهُ وساكت ..
_ والد ندي بعصبيه: انتي مستنيه إيه،قومي
_ “ندي والدموع متجمعه ف عيونها”..امشي ياحسام!.
_…….
= حسام هو انت ساكت ليه! امشي !.
“بصت لباباها ب كسره نِفس مسكت فِ إيدو إللي كان ماددهالها..بصت علي حسام بصه أخيره ومشيت
_سهيله ب عتاب:ليه ياحسام ممسكتش فيها!هي عملت إيه !حتي باباها لما قالها نمشي هي كان عندها امل تمسك فيهم..طب انت ساكت ليه رد ياحسام .
_ انا خايف ارجع تاني لنقطه الصفر ياسهيله ،ندى فعلا ممكن متكنش بتحبني واني بس صعبت عليها عشان كنت خارج من ظروف صعبه ومش عايزاني ف وقت النقاهه دي اني ارجع تاني اشرب ،ندى مش بتحبني ياسهيله.
_ ايه الهبل ده ،انت مشوفتش فرحتها ف قرايه الفاتحه ! طب ليه كانت هتتعب لما طلعنا من النادي انا وهي ولاقيتك مع بنت تانيه ! طب ليه هتوافق تدخلك حياتها وتبذل من طاقتها وتضيع وقتها عشان كل ده صعبان عليها بس ! ليه ثقتك فيها وف نفسك مهزوزه كده ياحسام! انت هتضيع البنت من إيدك ،انت مشيتها هي وباباها ونفسك مكسوره انت ضامن أصلا ان بعد م مشيوا وهما كده باباها ممكن يرجعها ليك تاني كرامه بنته من كرامته وانت حسستهم انك مصدق كلام الولد القذر ده ..فوق انت مفروض كبرت وعقلت .
_ يمكن فعلا ثقتي ف نفسي مهزوزه عشان إتخذلت وعشان كنت مدمن ف شايف نفسي اقل من اي حد وانها كبيره اوي عليا وانها ممكن ف اي وقت تضيع مني
_ ياحبيبي مش عيب انك لما تحب حد تشوفه حاجه كبيره ف نظرك بس العيب إنك تقلل من نفسك ومن شخصيتك لمجرد انك شايف الحاجه اللي معاك غاليه ..انت لولا غالي الحاجه غاليه دي مكنتش هتبقي معاك ..انت لو معاك 1000 جنيه وف حاجه عجباك اوي بس ب 2000 هتعرف تشتريها !
_ لا.
= بس كده أديك رديت..زي ماندي غاليه ف عينك ف انت غالي اوي ف عينيها..اتصل صالحها.
_ مش هقدر اتكلم دلوقتي
= لا لازم تتكلم دلوقتي ،مينفعش تسيب الدنيا مولعه وتقول هرجع كمان شويه الدنيا كده هتتفحم وتصبح رماد ،اتصل ب باباها
وانا هاخد الاولاد وهفسحهم شويه وانت شوفهم فين وروحلهم
_ رودينا بتميل علي كتفه بحنيه: خلاص بقي ياخالو متزعلش ،والله اقول لتيتا لو مضحكتش واخليها تجري وراك زي كل يوم بعصايه المقشه.
“بيبتسم ..” خلاص مش زعلان يارودي .
_انس ب مشاكسه: وانا بقي هخش علي التقيله لو مصالحتش ندي هروح اقولها انك كنت بتخونها مع البت البطل اللي علي الانستجرام
_ هوب هوب هوب،مبتستُرش أبدًا إنتَ
_ بتخون البت ياحسام والله أصبر عليا.
= والله إبنك ده هيوديني ف داهيه يابنتي واحده عاوزاني اعملها اعلان عندي علي الانستجرام واخلي الناس تعملها فولو بمقابل مادي هو بقي استاذ انس شافها افتكرني بكلمها ومن ساعتها وهو ماسكهالي ذله ..”بيضيق عينه” وربنا لأوريك ياأنس يابتاع عائشه إنت
_حبيبي ياخالو قلبك أبيض
_ يلا يارودينا ويلا يااستاذ انس وسيب خالك ف حاله.
= طب تدفع كام ياخالو واسيبك ف حالك!.
_ هسلط أمك عليك وأقولها إنك بتكتب لعائشه جوابات وبتحوشها لحد ماتكبر عشان توريهالها.
_ انت ياأنس بتعمل كده!
” أنس بيبص حواليه يمين وشمال كإن الكلام مش موجهه ليه ” ..
_ ايوه ايوه اعمل عبيط ،هتسيحلي هسيحلك.
= إتصدق إنك خال مش جدع.
_ أه ،عشان إنت إبن أختي.
= رودينا : ماما تعالي نمشي ونسيبهم مع بعض عشان أنا سيكا وهتبري منهم.
_ سيكا! حتي إنتي يارودينا إللي بقول عليكي عاقله وإسلوبك راقي.
= ياماما انا زي ماأنا بس دي كلمه متداوله يعني مابين جيلنا
_ عليه العوض ف ده جيل ..يلا ياأنس هفضل واقفه كتير.
= ماما خلي خلقك استريتش مالك قفوشه ليه !.
_ والله ياأنس إنت عاوز تتربى من جديد حد يكلم مامته بالطريقه دي ! .
_ عارف ياخالو ساعات بحس إن انا وانت والمجتمع كله مينفعش يعيش مع ماما الرُقي إللي عايشه فيه وروقان دماغها ده بيفكرني بزمن التسعينات والجوابات والرسايل الغراميه والقاعده ف البلكونه مع لسعه البرد وكوبايه الشاي بنعناع وصوت النقشبندي تحسها ف عالم موازي كده.
= أهو العالم الموازي ده اللي الكل مفتقدهُ دلوقتي ،انتو جيل الضوضاء والدوشه والزعيق والعصبيه والمشاكل وعدم التفاهم واخد بالك انت ياحسام ها ،
_ كملي كملي سامعك.
=جيل المهرجانات والأغاني الكتير واللهو عن ذكر الله والبُعد عن الصلاه أنا طبعًا مش بعمم إلا من رحم ربي بس الأغلبيه بقوا كده محدش بيقول بدل م أسمع المهرجان الفُلاني وأعيد وأزيد فيه أشغل سوره البقره كل شويه وأعيد وأزيد فيها ومع تكرار سماعها هلاقي نفسي بحفظها وهحس بسهوله ف حفظها ،اشغل سوره يوسف وأعرف معانيها وإن فيها موعظه سورة يوسف علمتني إن المريض سيشفى و الغائب سيعود
و الحزين سيفرح و الكرب سيُرفع كإنها بتقول “وبشر الصابرين “..بدل م طول الوقت بنردد كلمات أغاني نردد أستغفُر الله من كل ذنب أذنبه ،لا حول ولا قوه إلا بالله ،اللهم صلّ وسلم وبارك علي سيدنا مُحمد ..”ألا بذكر الله تطمئن القلوب”
هو ده العالم الموازي ياأنس إللي بقيت عايشه فيه ..تعمقت ف ديني وبقيت أعرف افرق مابين الحلال والحرام لازم أتكلم بإسلوب راقي يليق ب إني أكون من أمه سيدنا محمد أشرف خلق الله ،وبتمني إنتو كمان تحسنوا من كلامكم عارفه إنكو لسه ف سن مراهقه وعندكم فضول تقولوا كل الكلام اللي بيتقال حواليكم وبتسمعوه طول الوقت ..بس لما تتعلموا من صغركم لما تكبروا هتحسوا إن بالكم مرتاح وانها مش حاجه صعبه عليكم إنكم يكون عندكم أسلوب خاص بيكم ويلا بقي نمشي عشان حاسه إنكم هتناموا مني ،وانت ياحسام بشويش ها وتكلمها براحه.
_ حاضر ،خلي بالك من نفسك ومن الاولاد.
= حاضر
“انس ورودينا بيسلموا علي حسام وبيمشوا ..حسام كرر إتصاله بوالد ندى كتير لكنه مردش أحبط وطلع ركب عربيته ومشي بيها علي مكانه المفضل ..”المسجد ” حسام بيعتبروا أكتر مكان مُريح ممكن يفصل بيه عن أي أصوات مزعجه بتدور ف ذهنهُ وعن أي مشكله بيهرب منها ..بيصلي ركعتين لله وبيبتدي يقعد ف ركن من اركان المسجد بصُحبه المُصحف .
____________
علي الجانب الأخر .
ندي ووالدها.
______________
_ ساكته ليه ! وليه كاتمه دموعك.
=” حاولت تداري حُزنها ب ضحكه” أنا كويسه يابابا متقلقش.
_ إزاي كويسه ! وبعدين ليه حابه تخبي إتكلمي .
= متقلقش عليا أنا تمام
_ متعرفيش إنك بتشيلي ذنب دلوقتي.
= ليه!.
_ عشان بتكدبي .
= مقصدش ،بس انا مش عاوزه اشيلك همي ..انا دايما بحارب وبصارع مع نفسي ف اي مشكله بتحصلي وبرجع أحسن..بعتبر حزني ده شخص مغرور وقوي وعنده ثقه كبيره إنه هينتصر عليا وقتها بحس إن الإصرار جوايا بيزيد والعزيمه عندي بتعلى إن لا أنا اللي هنتصر وانت اللي هتحس بالهزيمه ..وقتها بس بنتصر فعلا ولو كده كان الحزن دايما هيفوز ب إنه يخليني أستسلم لوحدتي وإكتئابي،ف متقلقش يابوب أنا كويسه .
_ هو عمال يرن عليا علي فكره وانا حاولت أداري الموبايل عشان متشوفهوش وبعتلي مسدج ب انه عاوز يتكلم معاكي.
_قالت بحُزن: لأ يابابا عمري ماأنسي نظرتي ليه وإني كإني بقوله إمسك فيا وقولي خليكي وهو كان عندهُ لا مُبالاه .
_ طب تعالي أجيبلك حُمص الشام
_ بصتلهُ ب إستفاهم:حمص الشام ! أمال لو مكنتش قابض النهارده كنت هتعزمني علي ساندوتش فول .
_ انا غلطان إني عايز أأكلك حاجه تدفيكي ف ليالي الشتا الحزينه ياحزينه.
= حاساك بتعايرني سيكا!
_ لأ إتأكدتي .
= طب قدامي أكلني يلا اهو أي حاجه تديكي منك .
_ أيه!
= أقصد أي حاجه تديكي من ريحه الحبايب يعني انت فهمت إيه!.
_ ماشي ،ماشي .
” بيقعدوا قصاد الكورنيش ،بيطلبوا حمص الشام.
_ بابا زودتلي الشطه؟
= لا محطتش شطه أصلا عشان متتعبيش.
_ طب قوم ياحبيبي زي الشاطر حُطلي شطه عشان أعرف أكلهُ ولا أقوم ل عمو أنا!.
= هتتعبي يابنتي.
_ لا مش هتعب ،بس خليه يحط شطه كتير بعد إذنك.
_ ماشي ياستي
“بيقوم عند الراجل “.
_ الله يكرمك حطلها شطه ..” بيبص عليها بحيث يشوفها مركزه معاه ولا لا ،بص للراجل مره تانيه وبصوت خافت: حطلها شويه صغيرين عشان بتتعب منها.
_ الرجُل بلطف: طب خلاص روح وأنا هاجي وراك .
= ليه!
_ روح بس .
“مشي وراح عند بنته”.
= أديك الكوبايه ترجع من غيرها،حتي طمعان ف الكوبايه !.
_ يابنتي الراجل قالي هيحطلك ويجيبها .
“الرجُل بيقرب ب ابتسامه” معلش يابنتي انا حطيتلك شطه بس الواد إبني مراحش للعطار إللي بجيب منهُ الشطه الحراقه ف هتلاقيها كإني محطتلكيش حاجه بس المره الجايه تعالي أكون جيبت الشطه الحلوه .
_ ندى ب ابتسامه : تسلم إيدك ياراجل ياطيب والله كإنك حطيت وزياده كمان .
_ الله يكرمك يابنتي .
“والدها إبتسم للرجل”” لإنه عرف إنه بيقولها كده عشان هو عرفوا إنه خايف عليها ..الرجُل رَد الإبتسامه ومشي”
_ أهو عاجبك كده ،فضلت تقولي هتتعبي لحد م الراجل ولا كإنه حاططلي شطه أصلًا.
_ أحسن ،أحسن .
= بابا متعصبنيش .
_ هحدفك بالكوبايه ف وشك.
= بهزر معاك ياكبير الله ،بوب .
_ إيه !.
= بمشاكسه : ياتري أمي هتعمل فينا إيه لما نروح عشان خرجنا من غيرها!
_ بقول ناخدها من قاصرها انا وإنتي نروح نبات عند عمتك.
= عندك حق ،كفايه نكد لحد كده ..واحنا ناس فرفوشه مش ناقصين .
_ اخر ماازهق هتجوز علي امك.
= انا كده معايا بوينت ..انا هروح أخبص عليك وأقولها أول ماسمعته بيقول هيتجوز عليكي جيتلك وقولتلك ياحبيبتي ياماما ده انتي جوهره ازاي القاسي الجاحد يعمل فيكي كده ! ف هي طبعا هتتعاطف معايا وانت بقي تعيش مع اختك ياباشا.
= لو كنت بأكل حمار كانت هتطمر فيه التربيه..
_ بتأكلني كباب يعني !
= يابت انتي مش مفروض زعلانه ونفسك تبقي مسدوده !.
_ انت عارف زعلي بيجي بالأكل
= يعني أخاف علي دراعي لتحودي عليه!_سيد عيب إحنا أهل،احنا هنحود كده علي السوبر ماركت ،الكبابجي بتاع الايس كريم كده يعني دراعك ده هعمل بيه ايه.
_ خلصي القبض وملحقش أدي أمك حاجه وترجع تصوت ف وشي ف الأخر.
= الله وانا مالي يالمبي ،قولها بنتي وبدلعها وانتي مالك وشوح ب إيدك كده.
_ التربيه معدتش عليكي انا عارف .
_ حبيبي الله يكرمك
_…..
= بابا .
_ ها إيه تاني!.
= تفتكر حسام هيسيبني !.
_ لأ مش هسيبك
” بصت نظرات حاده لباباها وإتوترت ..بابا هو إنت إللي إتكلمت دلوقتي!
_ أنا يابنتي!
=بابا أنا سمعت صوت حسام
_ مش يمكن حسام هنا فعلا .
=” أدارت وجهها للخلف..بصت بذهول وبتوتر أدي إلي يدها إرتجفت أوقعت الكوب دون أن تشعر و قالت : حسام ! انت جيت هنا ..جيت هنا ازاي!
_ كسرتي الكوبايه للراجل ،ينفع كده .
= انا اسفه ياعمو والله .
_ يابنتي ولا يهمك.
= حسام : خد ياعم الحاج تمنها وتمن الحاجه اللي شربوها وهات كوبايتين تاني بعد إذنك.
_ أنا هاخد تمن الحاجه ،لكن الكوبايه مش هاخد تمنها ..فداها دي زي بنتي
_ شكرا بجد ياعمو
= العفو يابنتي ،اتفضلوا اقعدوا وهجيب الحاجه وأجي .
“بيقعدوا ..وبتوجهه سؤالها لباباها ..
_ حسام عرفت ان احنا هنا إزاي يابابا.
=مش عارف إساليه .
” نظرت إليه دون أن تتكلم” ..
_ كنت مراقبك .
= لا مش مراقبني ،بدليل قعدت ترن علي بابا كتير عشان تعرف إحنا فين
_انا اللي بعتله رساله فيها المكان ياندى
= طب ليه يابابا ،ليه غيرت موقفك انت مشوفتش هو سابنا نمشي ازاي ..وانا اصلا معملتش حاجه حسام اللي بينا خلص علي فكره انت من دلوقتي بتصدق اي كلمه بتتقالك،انت شخص معندكش ثقه ف اللي معاك يبقي مينفعش نكمل.
_ خلصتي! اولا باباكي بعتلي مسدج بالعنوان بعد مااتحايلت عليه كتير ف مسدجات وقالي هديك فرصه تتكلموا ،تاني حاجه انا هكمل معاكي وانتي مش فهماني اساسا.
_ بجد والله ! مش فاهماك ! إيه مببررك أصلا ياحسام ها !
=مبرري اني لسه معنديش ثقه ف نفسي مش فيكي ..شايف اني شخص سئ وان انتي متستاهلنيش ..شخص مدمن ممكن يرجع لإدمانه ف اي وقت هتسيبيه فيه
_ ايه ده ! ايه كلامك ده ! حد عاقل يفكر ف الكلام ده ! وليه دايما معلق شماعه صحتك علي شخص ! ..شخص سابني ومشي لأ انا هلجأ بقي لأي حاجه تدمرني وتهدني من تاني ،انت ليه ياحسام بتحسسني انك شخص سلبي ليه بتخوفني منك بجد ..انا عمري مافكرت انك ف يوم ترجع تاني ونسيت اللي فات خلاص ..ليه بتحسسني اننا لو كملنا مينفعش ازعل حتي لو من حقي الزعل ومن حقي اخد وقتي ف الزعل ده لحد ما يخرج من جوايا مينفعش اعمل كده ، عشان هخاف تشرب حاجه بسببي وتتإذي.
_ مش كده ياندى انا بتعب لما بدي حد ثقه ويمشي .
= انا ممشيتش ياحسام انت فعلا شايف كل الناس هي وموقف النهارده ده أثبتلي كده انا مش هي ولا عمري هكون هي
_ لو كنت شايفك هي مكنتش حبيتك ولا سعيت اني اوصلك ..يمكن خايف من البشر بس مش محتاج حاجه غير إني أطمن
_ لو كنت قولتلي إنك من البدايه خايف من غير ماتقول طمنيني هطمنك ياحسام لو الموضوع خوف انا واثقه اني هعرف اخليك مطمن لكن لو مش واثق فيا ف انا مش هعرف اكمل .
_ انا واثق فيكي ياندى ولو مش واثق مكنتش هدخل حد ف حياتي بس يمكن كلامه أثر بالسلب عليا أنا ومهزش ثقتي فيكي لأ بالعكس ردك عليه عرفني انك قويه تقدري تواجهي أي حاجه بس .
_ انت متشتت ياحسام ومتقولش مصدقتش كلامه ،لا انت صدقت ،صدقت اني بحبه هو وانه واخداك ف حياتي لحد ماأتعافى من حبه مش صح!
= لا ياندى
_ متقولش لا عشان فاهماك ف صراعات مابين قلبك وعقلك دلوقتي
قلبك بيقولك أه صدقها لأن كلمه بحبك لو اتقالت ومكنتش صادقه انت هتحس وانت حسيت يبقي بتحبك فعلا.
وعقلك بيرديقولك بس كلام الولد منطقي وممكن تكون بتحنلهُ.
بس ردي عليك مفروض يعني هيفُض المشاجره دي كُلها ..انا بحبك إنت ياحسام ..لو قلبك دق وحسيتها دلوقتي قول ولو محستهاش إمشي وأنا مش زعلانه.
_حسيتها ياندى ويمكن اول مره أحسها منك كده ،انا اسف علي أي احساس حسيتيه بسببي النهارده ،وأسف علي دموعك اللي نزلت بسببي ..عشان مفروض انا المصدر اللي بيطبطب عليكي وبيمسحلك دموعك مش اكون المصدر ف نزولها ..حقك عليا .
_ “إتنهدت وقالت”: انا مش زعلانه ياحسام ،حصل خير
= طب وانت ياعمي زعلان مني!
_ مش زعلان يابني ،بس عايز أعرفك حاجه أنا مربي بنتي علي الصراحه لو مش بتحبك مش هتحرجكك بس هتجيبهالك بطريقه شيك انك اخوها او مجرد صاحب هي مش مجبره تعرفنا عليك ولا توافق ولا مجبره تقولك بحبك وزي مافي غيرها كتير ف في غيرك كتير الأولى تستني اللي يجي وتحبه فاهمني!.
_ اه فاهمك ،مش هتتكرر تاني والله ومش هزعلها تاني وربنا الشاهد بينا
= متقولش مش هزعلها لإن الزعل والمشاكل ده شئ وارد مابين أي إتنين بس الأهم إنك متسبهاش تتمادى ف زعلها وهي كذلك فهمتو..
_ اه فهمنا.
= يلا عشان نروح بقي زمان مامتها روحت وهتضايق وهي قاعده لوحدها .
_ ماشي ،بس كنت جايبلك حاجه كده .
” بيطلع علبه من جيبه “.
_ ااه بقي شغل العلبه دي فيها ايه وفيها فيل والجو ده !.
= بطلي لماضه ،جايبلك خاتم عشان اصالحك .
” بيفتح العلبه “.
_ ها إيه رايك!.
= قالت ب انبهار: تحفه بجد ، زوقك حلو اوي لا خلاص كده هتجوزوا يابابا .
_ ” بإبتسامه ” تعيش وتجيب يابني .
= الله يباركلك ياعمي ،اهو نسيت اشرب حمص الشام وبِرد يرضيكي!.
_ فدايا .
” بتلبس الخاتم وفرحانه بيه ” ..تحفه ف إيدي صح!
= جميل أوي ماشاء الله ..يلا تعالوا عشان اوصلكم .
“بيركبوا العربيه ..”.
_______________
علي الجانب الاخر سهيله وانس ورودينا
______________
_سهيله: زمان خالكم بيُسأل الآن من ندى وباباها .
= انس: لا ياماما خالو هيعرف يصرف نفسهُ
_ رودينا:انا كنت خايفه أوي لما خالو إتخانق
=متخافيش ياحبيبتي،ربنا يهديه يارب..ها بقي تحبوا نروح كافيه ولا نتمشي ولا نروح الملاهي !.
_ انس: لسه شايفه اننا صغيرين ياماما وهنركب المراجيح بتاعت الاطفال دي !.
= تصدق عندك حق ،م انا معرفش ملاهي غيرها والله ..طب ايه رأيكم ف يوم ميكنش عندكم دروس او مدرسه ونروح دريم بارك!.
_ رودينا: ياريت ياماما بجد،دي تحفه طلعتها رحله مع صحابي انبسط اوي اليوم ده.
= بلغه مصاحبها خوف:لا ياحبيبتي متروحيش رحلات تاني لوحدك لازم نكون معاكي.
_ ياماما متقلقيش كان معانا مُشرفين وكانوا واخدين أرقامنا يعني ف أي وقت روحنا أي مكان بيتصلوا بينا لحد ما نتجمع تاني حواليهم
_ لا بردو ..عايزه تخرجي ف أي مكان قوليلي .
= حاضر ياماما .
_ الحنيه والدلع ل رودينا بس لكن انس كخه صح !
= لا طبعًا وإنتَ كمان ياحبيبي ..عوزتوا أي حاجه متقلوش علي بابا وتعالوا قولولي من غير ما يحس كده وانا هجيبها من ناحيتي انا فهمتوا .
_ فهمنا .
_ ماما ممكن طلب!
_ طبعا ياأنس قول
= عاوز أكل أيس كريم.
_ ياحبيبي عيني،بس الجو ساقعه وممكن زورك يتعبك.
= لا انا متعود باكله ف الشتا عادي .
_ حاضر يلا نجيب .
= لا انا اللي هجيب .
_ يعني انت معاك فلوس!.
= اه معايا ،بس بستأذنك بس اني هاكله قبل م اجيبوا عشان متزعقيش .
_ إيه الأدب ده ياانس !.
= شكرًا ،شكرًا ،ها بتحبي طعم إيه!.
_ شكولاته .
_ خلاص ماشي .
= رودينا:طب انا شفاف ياأنس مسألتنيش ليه!
_مش لازم يعني يارودينا
= ونِعمَ الإخوه .
_ طب انا رايح اجيب ،ومتبصليش كده عارف انك بتحبي المانجا هجيبلك يالمضه .
_ اشطر أخ ف الدنيا.
= عشان الأيس كريم بس ،غير كده انس وحش وتجري تقولي لبابا عليا.
_ خلاص بقي قلبك أبيض.
= ماشي ياستي ..
“بيروح يجيب الأيس كريم وبيجي يدي لكل واحد الطعم إللي بيحبهُ”.
_ ها بعد الايس كريم تحبوا تروحوا فين.
= هنروح ..ومش عشان حاجه والله او زهقنا بس عشان ورايا مذاكر والله ياماما.
_ ملحقتش أشبع منك ياأنس .
= المره الجايه تتعوض وهنكون خلصنا دراسه،بس انتي عارفه إن اليومين دول مراجعات عشان الإمتحانات .
_ طب خلاص ياحبيبي ،ذاكروا كويس ويلا نتمشي لحد ما نلاقي تاكسي
_ يلا .
” بيتمشوا لحد م يلاقوا تاكسي بتركب معاهم لحد ما يوصلوا عند البيت “.
_ خلو بالكم من نفسكم وكلوا كويس واتغطوا كويس عشان البرد اتفقنا ..
_ حاضر ياماما .
_ رودينا: متقلقيش ياماما، إيه ده بابا وطنط ساره أهي .
ساره قربت هي ويوسف ب إبتسامه.
_ سهيله: إذيك ياساره!.
= ” إبتسمت ” ..الحمدلله كويسه تعالي إتفضلي ..مينفعش تكوني تحت البيت ومتطلعيش.
_ لازم اروح والله سايبه ماما ف البيت لوحدها من الصبح ..وحسام مع خطيبته ف محدش معاها.
_ طب سلميلي عليها.
= حاضر يوصل،ها بقي إشتكيلي الاولاد مغلبينك!
_ لا خالص بالعكس والله دول شاطرين بيسمعوا الكلام
= لو صدر منهم أي مشاغبه من فضلك كلميني علي طول.
_ حاضر متقلقيش .
_ استأذنكم انا ،وشكرا يايوسف انك وافق الاولاد يكونوا معايا النهارده.
_ دول ولادك ياسهيله وده حقك .
= كتر خير ،سلام عليكم .
_ وعليكم السلام ورحمه الله وبركاته.
” بتمشي ” .
_ ساره بفضول : ها عملتوا إيه النهارده !.
= أنس:لما نطلع هحكيلك كل حاجه
_ ماشي ..
” بيطلعوا يعدوا علي بيت العيله “.
_ سلام عليكم .
_ ابو يوسف: وعليكم السلام ايه كلكم مختفين ليه كده النهارده!.
= يوسف ب استغراب: ليه مؤمن مجاش النهارده!
_ لا ولا حتي ليل .
_ ام مؤمن: يمكن مشغول وعنده شغل ولا حاجه،والله حتي ماقدرت اطلع اشوف ليل محتاجه حاجه ولا لا ضهري كان تاعبني .
_ ساره : هتصل بيهم اشوفهم فين
______________
علي الجانب الأخر .
________________
_ لسه اشطر مني بتعرفي تطيري الطياره مسافه أعلي مني .
= يابني دي حرفه ..الطيران ده فن مش عن عن .
_ ياواد ياجامد
_ حبيبي ،حبيبي ..المهم بقي انك لو كنت كلت علقه من ممدوح كنت انا هعمل ف ايه !.
= عيب عليكي الامن كان تحت السيطره.
_ يابني ده انت كنت مرعوب
= اه والله ،كنت خايف اخد ضربه واحده بس كنت هعترف ب كل حاجه.
_ ” بتضحك” اصيل ياابو رحاب
= عيب عليكي ،بس ايه رايك فيا !
_ لا عاش بجد ،بس الخاتم بقي راح فين!
= القوه خدتوا يابنتي ،اكيد هيحتاجوه ف اي مهمه تانيه .
_طب ولاده هيروحوا الجلسه بتاعته!
=أكيد يابنتي ..بس مش عارف زمان ممدوح ف السجن دلوقتي مصدوم من سعد بالذات.
_ اه والله فعلا ،بس هو ده التصرف الصح مش معني إنه باباه يبقي لازم يداري عليه والكلام ده
_ فعلا ..انا هنزل بقي اشتري الغدا وأعدي علي الجماعه يطلعوا ونتغدى كلنا سوا هنا.
_ طب خالتي وعمي هيقدروا يطلعوا ! السلم عالي عليهم .
= صباح الفل الاسانسير اتصلح.
_ والله فقدت الامل انه يتصلح عشان كده بنسى دايما انه شغال عادي .
= خلاص انزل هاتهم وعدى علي يوسف وساره وحور ولؤي بالمره.
_ اكيد هعمل كده.
= ماشي
_ يلا اقعدي مع تيتا فاطمه لحد ماأجي .
_ حاضر .
” بتروح تقعد تحت المظله مع تيتا فاطمه وعائشه ” ..مؤمن بينزل تحت يعدى علي باباه “
_ سلام عليكم
= عليكم السلام
_ ساره: ايه يابني برن علي ليل مبتردش ليه!
= اتلاقيها سايبه موبايلها ف الشقه .
_ امال انتو فين .!
_ ف السطح ..انا بقي عملتلكم حتت ديكور تحفه كل واحد هيسيب بيته ويعيش فوق ..هنزل اجيب الغدا ونطلع كلنا .
_ يوسف: مش كنت تقولي كنت وفرت الخمسين جنيه تمن اكله الكشري.
_ مؤمن : بخيل ياساتر
= ساره: اكله الكشري دي هيذلني عليها قرن والله يامؤمن .
_ فسحتك ولا مفسحتكيش!.
= ايوه ايوه اسكت بقي .
_ انا هنزل وإنتو عدوا علي لؤي وحور ..
=يوسف: لؤي هيجي النهارده من الشغل ٦ كلمني وقالي
_ طب هانت فاضل ساعه اكون جبت فيهم الأكل
= ماشي
“مؤمن بينزل يجيب الأكل ويوسف بياخد أهله و بيطلعوا ف الاسانسير “.
كلهم طلعوا ب إنبهار .. عجبهم جدا المنظر قعدوا كلهم وإتجمعوا.
_ ساره: لا بجد المنظر تحفه ماشاء الله عليه،انا نسيت انادي حور ،هكلمها
” بتتصل عليها” .
_ الو .
= ايه يابنتي جيتي ولا لسه!
_ اه جيت مروان ضايقك ولا ايه!
= لا خالص والله
_ طب اطلعي فوق السطوح مؤمن عازمنا علي اكل .
= طب والمكرونه اللي عاملاها!
_ سيبيها للعشا ياختي مش وقتك.
= طيب ماشي هلبس واطلع
_ ماشي،سلام.
_ هتطلع
= ابو مؤمن: والله ابني ده جوهره السطح مكنش يتشاف بجد خلاهولنا سينما .
_ يوسف: دماغ شغاله مش بتنام الله ينور عليه ..القاعده ناقصها معتز ولميس .
= اتصل بيهم خلوهم يجوا.
_ ماشي .
” يوسف بيتصل ب معتز ” .
_ ألو
= ايه ياسطى عامل ايه !
_ الحمدلله ،ايه فينك .
_ ف البيت لسه راجع من الشغل
=طب متاكلوش وتعالي إنت ولميس ومحمد
_ ليه ياسطى هتغفلونا وتاخدوا اعضائنا تبيعوها!
= أه تعالي بقي
_ ليه بجد ف ايه!
= ياعم تعالي ،بس اطلعوا علي السطوح علي طول
_ سطوح ! السطوح كمان!!!
= يابني ف ايه يابني مش هنخطفك ..تعالي مؤمن عازمنا علي اكله حلوه.
_ اكله ايه!
= مشاوي.
_ماشي أنا جاي ربع ساعه ونكون عندك.
=ماشي سلام.
______________
علي الجانب الاخر .
_____________
حسام وسهيله ف بيتهم.
_ سلام عليكم .
= وعليكم السلام ..ها عملتي ايه مع الولاد
_ روحتهم ،المهم انت عملت ايه مع ندى!
= صالحتها ولسه داخل اهو .
_ طب الحمدلله ،بتعمل ايه!
= ببعتلها مسدج عشان اراضيها بردو.
_ متزعلهاش تاني فاهم ،اللي مترضاهوش عليا مترضاهوش علي بنات الناس
= حاضر والله.
_ حضرلك الخير ،ماما فين!
= ف الحمام بتاخد دش تقريبًا
_ ماشي هقوم أسخن الاكل ..عشان انا جعانه أكل المطاعم ده بيجوع مبيشبعش .
_ ماشي ياحبيبتي.
_ قوم غير هدومك بقي.
= هقوم اهو..
_______
محتوي المسدج
_________
حقك عليا مش هزعلك تاني ،انا كنت غيران علي متشتت علي متضايق علي مخنوق ،واسف تاني علي أي حاجه زعلتك مني النهارده .
“بيعمل سيند للمسدج ..وقتها كانت فاتحه الشات”.
_ مش زعلانه خلاص ،عاوزاك تطمن معايا طول ماإحنا سوا كل حاجه هتبقي تمام وانا معاك متقلقش ..
_ مش قلقان خلاص كده .
= طب انا هقفل عشان هاكل مع ماما وبابا وهاجي
_ خلاص ماشي
___________
_خرجتوا من غيري!
_ المره الجايه هتكوني معانا ياماما .
= “بنظرات شك” ها عاكست كام واحده النهارده بقي.
_ اسالي بنتك ..بصيت جمبي حتي !
= بصراحه ياماما ومش عشان بابا بقي وبطبلوا وكده هو مبصش غير علي ٣ بس .
_ ولما تصدق دلوقتي !
= ” بتتكلم بجديه”بابا ليه خايف!،لما إنت هتخاف مكنتش بصيت من البدايه
_ والله البت دي بكاشه وعاوزه توقع بينا .
= م انا عارفاك عينك زايغه.
_ ب غزل: عيني مش بتزوغ غير عليكي يابطتي .
= ايوه اضحك عليا بكلمتين.
_ متشمتيش البت دي فينا بقي
_ خلاص مصدقاك انت .
=ندى: حاسه ان شكلي بقي وحش سيكا
_ يابنتي اللي داخل بيني انا وامك خارج ف متحاوليش .
_ حرمت خلاص .
= ايوه كده ،كلي وانتي ساكته.
_ حاضر.
__________________
“ف بيت عائله فرغلي”
__________________
_ جعان ياسميه .
= روح كل وانا اعملك إيه!
_ تعمليلنا ناكل .
= مش جعانه،عاوز تاكل اعتمد علي نفسك وإنزل حَضر أكل.
_هعمل أكل وحش
= امي تحت اطلب منها اكل هتعملك.
_ جوزها لسه ميت هبقي قليل الادب لو طلبت
=وانت كده مش قليل الأدب ومعندكش دم لما بتطلب مني تاكل وانا ابويا ميت.
_ لا
_ انت بتضايقني ليه ياسعد
= عشان بحبك
_ طلقني ياسعد لو سمحت.
= وتعمليلي اكل !.
_ رفعت حاجبيها”: بطل تستفزني
= فين الاستفزاز!
_ طب طلقني مش هعرف اعيش معاك
= ليه ريحتي وحشه!
_ سعد
_ سميه!
_ سعد متضايقنيش .
_ سميه متضايقنيش
_ وبعدين !
= وبعدين!
_ انت هتفضل تقلدني كده كتير!
= اعمليلي أكل طيب.
_ سعد ده مش بيتي عشان أنزل ببجاحه اعمل اكل .
= ماشي ياسميه .
_”راح إتجاه شباك الغرفه وفضل واقف سرحان”.
” فاق من شروده علي إيديها إللي إتحطت علي كتفه وبحنيه قالت: معايا باكو البسكوت ده كلوا لحد ماتنزل تحت وتاكل .
_ “بنبره زعل” مش جعان .
= ياسلام!
_ اه ياسميه ..كُليِه انتي
= مش جعانه ..
_ “تجاهل بصتهُ ف عيونها وبص إتجاه الجنينه” خلاص سيبيه لاي وقت تجوعي فيه .
= ماشي ،انت زعلان ليه دلوقتي .
_ هو انتي قولتي حاجه تزعل!
=لا
_ خلاص قدام مش مقتنعه انك مزعلاني ،خلاص .
=كل م ببصلك بشوف فيك عيون بابا وهو باصصلي بقله حيله وانه قتل عشان غلطتك ليا .
_ عارف ان من حقك تزعلي ،بس ده نصيب والغلطه دي غيرتني لإنسان تاني ،خدي وقتك ف الزعل مش هقولك سامحيني علي طول لان لازم كل الزعل اللي جواكي يخلص متراكميش جواكي اي زعل
_ ماشي ياسعد بس سيبني.
= مش هعرف ياسميه ،مش هقدر.
_ متضغطش عليا بوجودك.
= للدرجادي !
_ اه للدرجادي .
= خلاص انا هبعد.
_ عيونها إتملت بالدموع :هتبعد!
” كإنها بتقول انا هقول هبعد ،بس انت متسبنيش “
_ مش انتي حابه كده.
= حاولت تتكلم بصرامه وحَزم :اه حابه كده ياسعد
_ انا من النهارده انتي هتنامي علي السرير وانا علي الكنبه .
=بصتله ب استغراب:هو ده البعد.
_ امال انتي فاكره إيه!
=فاكره هنسيبني خالص.
_ ” بيحط إيدو علي كتفها” لا لا ماهو ده بردو بالنسبالي عقاب اني منامش ف حضنك كل يوم وتطبطبي عليا لحد مااروح ف النوم انتي عاوزه ايه تاني ده إنتي قاسيه.
_ ليه متمسك بيا ياسعد.
= عشان انتي جوا سعد.
_ يعني ايه.
_ يعني بحبك .
=…..
_ عارف انك مش هتردي ،بس امسحي دموعك ..اللي حصل حصل ،وزي م انتي ابوكي راح منك انا كمان ابويا راح ..هما الاتنين غلطوا وياخدوا عقابهم ب اختلاف الاسباب والنوايا بس الخساره واحده ياسميه محدش بيتمني ابدا يعيش من غير اب حتي لو كان وحش بس سند ف الدنيا بعد ربنا..ومش هكدب عليكي مهما حاولت ابينله اني مش زعلان ..بس انا زعلان من جوايا ،زعلان اني خدعته وعملت خطط عليه ووصلته لحبل المشنقه ب ايدي بس هو ده اللي كان لازم اعملوا ..عارف ان غلطتي كبيره بس انا كمان مكنتش اعرف كل ده ولا اعرف ان والدك مقابل جوازنا قتل عمي ..لو كنت اعرف كده مكنتش هتجوزك ياسميه وكنت هفضل انسان وحش بيأذي نفسه وبيغضب ربنا ..شوفتي انتي بقي كنتي سبب ف هدايه شخص ورجوعه لربنا..مش هضغط عليكي بس بالله عليكي رفقًا بقلبي انا كمان مش متحمل ومتعرفيش انا كاتم إيه شعور سئ جوايا
_ “بتترمي ف حضنه” ..انا بحبك اوي ياسعد،بس تعبانه اوي اوي بجد.
_ كل حاجه هتكون كويسه ..انا معاكي ..هنعدي كل حاجه سوا اوعدك.
” اومأت رأسها ” .
_ خلاص بطلي عياط وغلاوتي عندك.
= حاضر .
_ يلا ننزل ناكل بقي عشان جعان.
“بتضحك” .
_ يلا .
“بينزلوا ..ماجد كان قاعد ف كرسي السفره اللي ف النص مكان والده فرغلي ..
_ سعد: طب عيب والله تاكلوا من غيرنا.
= والله لسه كنت بطلع رقمك اهو ارن عليك اصحيك.
_ فيك الخير والله
=ماجد:تعالي ياسميه اتفضلي
_حاضر
=سعد:كلي ها ..كلي
_حاضر
_____________________
علي الجانب الاخر
عند مؤمن .
______________
_ انا جيت ..جيبتكلم بقي حبه أكل تاكلوا صوابعكم وراه..ايه ده ايه اللي جاب معتز!.
_ ياسطي ف ايه مش كده.
= انتو حرين مش هيتبقالكم اكل .
_ لميس: طب اقعد طيب ولا انت هتفضل كده تذلنا الريحه طلعت من نفوخي
= براحه ياماا ف ايه .
_ جعااااانه .
=بيقعد وبيفتحوا الاكل وبيقعدوا ياكلوا.
_ طب مقولتلويش بقي ايه رايكم !
_معتز: لا الاكل جامد
= علي السطح يابغل
_ جامد بردو.
_ ايه رايك ياامي !
= جميل والله.
_ عائشه بتوجهه كلامها ل انس: وانت متبوظش الورد ده عشان شكله حلو
= ليه هو انا معفن زيك وببهدل الدنيا .
_ انت اللي معفن.
= تيتا فاطمه: مش قولنا عيب ..صالحوا بعض يلا.
_ متزعليش ياعائشه انتي قمر.
= وانت كمان قمر .
“الكل بيضحك عليهم .”
“بعد مرور نص ساعه ..”.
_ دايما عامر يابني.
= بالهنا والشفا ياحاج ،واحده بقي تنزل تعملنا شاي .
_ لميس: انزلي ياحور وسيبي مازن عشان الشاي بتاعك حلو وانا وانس هنلم هنا الاكل ونظبط الدنيا.
= عيني حاضر .
_ لؤي : وهاتي ترينج عشان لبس الخروج مضايقني
_ لميس: وهتغير فين ان شاء الله هنحوط عليك!.
=مأمن نفسي متقلقيش
_ ماشي يااخويا ماشي ،ماشاء الله الجو جميل النهارده مش برد
_ليل: بطلي قَر لا الرعد يجي يفحمنا كلنا
=انا هسكت خالص اهو .
” بعد مرور ربع ساعه حور بتطلع بالشاي وبترينج لؤي ” ..
“بياخد ركن وبيغير هدومه”
“وهما بيشربوا الشاي”
_ مؤمن: ماتحكيلنا حاجه دينيه كده ياتيتا فاطمه.
= احكيلكم ايه مثلا !.
_ اي معلومات دينيه مثلا .
= تعرفوا ايه عن الموت .
_ الكل بص لبعضهُ برهبه .
= ساكتين ليه!.
_ لميس: ماتحكيلنا حاجه ياتيتا ايه جاب سيره الموت.
= كنت متوقعه رد زي ده لان دايما بنحاول نشغل نفسنا ب اي حاجه تانيه ومنعرفش الموت ده هو الحقيقه الوحيده اللي ف حياتنا ..
_……
= الموت ميخوفش ،ميخافش من لقاء ربنا غير اللي مش جاهز ..مفروض نفرح ان خلاص بقي مفيش زعل تاني ولا ف حزن ولا ف كرب ولا ف اي حاجه ..الانسان هو اللي بيختار سواء هيكون مُنعم ..ولا بيتعذب ولعياذُ بالله ..تعالوا نحكي احسن اول ليله ف القبر للشخص المؤمن .
_ اول ليله ف القبر ..اول حاجه هتحصل ضَمه القبر الحوائط هتضُم علي بعضها.. ومتخافوش من المُسمي قولتلكم كل حاجه بتحصل متخوفش بالنسبه للمؤمن ..هنفترض إن القبر ده أم طفلها غاب عنها ..يعني مثلا انا عايشه بقالي 75 سنه ..ف معني كده اني غايبه عن امي 75 سنه ..الضمه دي هنعتبرها حضن ..لو كنت شخص صالح هتحس ان ضمه القبر دي حاجه ألطف من حضن أمك نفسها .. تاني حاجه سؤال الملكين مُنكر وناكير ..
هيسألوك 3 أساله لو كنت مؤمن بقي ربنا هيثبتك عند الأساله..الاساله سهله وبسيطه ..لكن ف القبر من هول المنظر هتتوتر ومش هتكون عارف إلا لو كنت عايش علي الإيمان وطاعه الله ربنا هيذكرك
ف هيسالوك بكل هدوء وبطريقه لطيفه بعد ما يقعدوك لانك هتكون نايم ..
_من ربك!.
ف هتقول ربي الله .
_ من الرجُل الذي بُعث فيكم!
_ مُحمد إبن عَبدالله رسول الله صل الله عليه وسلم.
_ ما ديُنك!
= ديني الإسلام
بعد إجابه الأساله دي بأمر الله ..هتجيلك البُشاره مِن عِند الله هيقول للملائكه صدق عبدي
مُتخيل ان ربنا سبحانه وتعالي تتكتب عنده من فوق سبع سموات الصادق
مش بس كده القبر الصغير ده هيتسع المؤمن إللي إيمانهُ عالي ..القبر هيتسع ل مَد البصر ..واللي اقل إيمانًا هيتسع سبعين ذراعًا ..يعني كإنك عايش ف فيلا البشاره بقي التانيه ف إفرشوه من الجنه يعني القبر إللي إتسع ده هيتفرش من الجنه ،الثوب من الجنه ..الثوب ده هيكون من إكمام شجره طوبه اللي ف الجنه مينفعش عبدي يكون بالكفن ده بعد مافرشتله القبر من الجنه ف شايفين نعيم ربنا لا وحاجه كمان وافتحوا له بابا الي الجنه فايده الباب ده ايه بقي ..
يأتيه من ريحها يعني تشم ريحه الجنه وانت قاعد ف قبرك وريحانها وريحه الزهور الجميله ،وكمان تري قصرك وملكك ف الجنه وانت قاعد ف قبرك ..متخيلين الجمال ..ليه بقي بنخاف من الموت!
_ لميس: والله ياتيتا كلامك جميل حتي عن الموت.
_ ده لقاء الله يابنتي ازاي ميكونش جميل .
” بيقاطع كلامهم مكالمه ف تليفون مؤمن “..
_ الو ..ايه!! طب اهدي انا جايلك.
يتبع..
لقراءة الفصل الثاني والعشرون : اضغط هنا
لقراءة باقي فصول الرواية : اضغط هنا
نرشح لك أيضاً رواية وقعت أسيرة في حبك للكاتبة غفران
