رواية اسميته يوسف الفصل الثالث 3 بقلم شهد محمد جاد الله
رواية اسميته يوسف الجزء الثالث
رواية اسميته يوسف البارت الثالث
رواية اسميته يوسف الحلقة الثالثة
بعد ما روحت وانا مقرره اني خلاص مش هدور عليه تاني جيه تاني يوم ومارست روتيني اليومي بشكل عادي وبعد ما خلصت شغلي على سته
لقيتني تلقائيآ روحت البيت غيرت هدومي وجهزت نفسي عشان انزل نفس الكافيه استناه
غالبآ انا اتعودت!
وزي كل مره مجاش..
رجعت البيت قعدت على السرير وحطيت راسي بين إيديا وانا مش فاهمه ايه اللي بعمله ولا ليه بعمله اصلآ؟
قطع تفكيري صوت رن موبايلي كان رقم غريب اتنهدت ورديت كنت فاكره رقم من الشغل لكن ده طلع صوته!
_الو
_يوسف صح؟
_صح انا بعتذر جدآ عن آخر مره قولتلك هاجي ومجتش بس سافرت والله واتفجأت ب السفر ولسه راجع امبارح وحاليآ متوجد في الكافيه لو تقدري تيجي يعني
_ولا يهمك مش محتاجه اي مبرر وانا جايه حالآ
قفلت معاه وفضلت ساكته شويه مش مستوعبه اني خلاص لقيته
اختارت اشيك طقم عندي واحلى نوع برفيوم ولبست وجهزت ونزلت جري على عربيتي روحت لنفس الكافيه
دخلت دورت عليه بعيوني في وسط الموجودين لحد ما لمحته!
كان قاعد في إيديه كوفي وإيديه التانيه ماسك الفون
روحت ليه وانا مبتسمه وقولت:
_بنسوار
قام وقف سلم عليا وقال بضحك:
_سوري اوي على اخر مره قالولي انك جيتي كتير وعشان كدا خدت رقمك من عادل
_ولا يهمك اتفضل
قعدنا سوا فضلت ساكته مش عارفه أبدآ ب ايه انا ولا منين
ابتسم وقال:
_اكيد مكنتيش بتدوري عليا كل ده عشان تفضلي قاعده ساكته
_احم في الحقيقه لاء كنت بدور عليك عشان .. بص مش عارفه هتستوعب ولا لأ بس انت لازم تيجي معايا عند الدكتور النفسي بتاعي
_ليه ! انتي كويسة؟
رديت بهدوء وقولت:
_انا تمام بس هتفهم كل حاجه لما نروح عند الدكتور بتاعي ارجوك
اتنهد وقال:
_طيب يلا بينا نروح
بيقولها وبيحاسب وبنروح سوا للعيادة
بدخل بحماس وانا بقول لقيته يا دكتور بسام لقيته
بيبص ليا وبيبص ليه وبيقول:
_باسم يا شهد باسم
بيبتسم يوسف وبيكمل الدكتور وبيقول:
_اهلآ بحضرتك
_اهلآ بيك
_اتفضل على مكتبي
بيقولها وبيدخله هما الاتنين المكتب وباجي ادخل معاهم بيقف قدام الباب وبيقول:
_عايز يوسف بس
_لأ انا عايزه ابقى معاكم عايزه اسمع هتقولوا إيه
_وعد هحكيلك هنقول إيه
_ومبقاش معاكم ليه الموضوع كله يخصني بعدين انا اللي دورت عليه وانا اللي جبته
_يعني إيه يعني مش فاهم
_يعني الفضل ليا
_ولا كلمة روحي اقعدي هناك
_متزعقش
بيقفل الباب في وشي وبيدخل وانا بروح الكافتيريا بطلب قهوة وبقعد استنى
(داخل المكتب)
كان بيبتسم يوسف من الحوار اللي كان بين باسم وشهد وبيتكلم الدكتور وبيقول:
_إنسانه لمضة بشكل
_دي احلى حاجه فيها
_شهد حلوه شكل وروح بصراحه
_احم طيب انا بردوا مش فاهم انا ليه
_ببساطة انت خطيب شهد المستقبلي
_نعم !
_اسمعني للأخر يا يوسف في نسخه من شهد مخطوبه ليك النسخه دي في عالم موازي وعشان نقضي غليها لازم اللي حصل في العالم الموازي يحصل في الحقيقة
_وكان إيه اللي حصل في العالم الموازي بقى؟
_اتخطبتو
_والمطلوب إني اخطبها يعني انا راجل مش بتاع جواز
_هو للأسف مش المطلوب انك تخطبها وبس
_امال إيه؟
_المطلوب إنك تخليها تحبك
_انا مش فاهم حاجه
_مش خطوبه والسلام يا يوسف لازم تبقى عن حب شهد بتعاني من مرض مخليها كل ما تدخل اي ريليشن تبقى شخصية توكسك وتسيب الطرف التاني لمجرد انه بيحبها ومهتم بيها
_المطلوب بقى اهتم بيها واحبها عشان تسيبني
_المطلوب إنك تخليها تحب محاولاتك وحبك واهتمامك بيها هي لو حبتهم مش هتزهق وبالتالي مش هتسيبك
_طيب تمام بس اديني سبب واحد يخليني اوافق اعمل كدا انا كل اللي في دماغي دلوقتي كلمة انا مالي اشمعنى انا
_عشان انت اللي كنت معاها في العالم الموازي وده دليل انك هتحبها شهد تتحب
_ياسيدي على راسي هي فعلآ حلوه ولطيفة وظريفة بس انا مش مخطط حياتي على كدا يا دكتور
_التخطيط ده بإيد ربنا يا يوسف جرب
بيقطع كلامهم دخول شهد وهي بتقول:
_كل ده قاعدين لوحدكم بتتكلموا في إيه بقى انت وعدتني يا دكتور هتقولي
بيتكلم دكتور باسم وبيقول:
_قوليلي يا شهد إيه مميزاتك كـ زوجة؟
_بعرف اعمل ورق عنب وبعرف اعمل مكرونة بشاميل وكيكة الشكولاته ودمي خفيف وفرفوشه واهلي طيبين وكمان بعرف ارقص
بيضحكه الاتنين وبيتكلم دكتور باسم وبيقول:
_بالذمة العرض ده يتفوت؟
_بصراحة لأ
بيقولها يوسف وبيضحك وبيقعده كلهم بيشربه قهوة سوا
وبعد ما بيخرجه من العيادة بيوصلها يوسف للبيت وبياخده أرقام بعض
“يـــــــوســـــــف”
فضلت افكر في كلام الدكتور كتير كلام مش مقنع وغريب لكن البنت تجنن !
مشكلتي الوحيده إن كل اللي جاي في حياتي كنت ناوي اعمله لوحدي مكنش في بالي يكون معايا حد وفي نفس الوقت انا لسه بموف اون اكيد مش همو اون بيها
بس شكلي هتجنن وهوافق اعمل كدا انا محتاج يتعمل كيكة بالشكولاته عشان اعرف اركز وانا بشتغل
في اليوم التاني بتفق معاها اننا نتقابل
وبالفعا بتقابل فضلنا نتكلم سوا كتير اتعرفنا على بعض شغلها وشغلي وفكرتني لما شفنا بعض في حفلة عمرو دياب
كنت مبسوط من جوايا لأني فهمت إن احنا الاتنين ونس لبعض
الوقت كان اتأخر وصلتها ورجعت روحت
روحت وانا الفرحه مش سايعني وبفكر في إزاي هسمع كلام الدكتور واخليها تحبني
فضلت سهران لساعات على اكونتات الفيس والانستجرام بتوعها
ووانا بقلب في الفيس شفت بوست عن ان بنت جالها سلسله فراشه وقالها أحدهم ان هي فراشه زيها كانت عامله للبوست شير فا تقريبآ كدا عرفت انا هعمل اي
نمت وصحيت تاني يوم خلصت شغلي وروحت محل فضه جبت منه السلسله اللي على شكل فراشه
وروحت في مكان شغلها استتنهتا تنزل كنت عارف مواعيد شغلها وفي خلال دقايق ظهرت وهي خارجه من باب الشركه
ابتسمت ليا وهي بتقول:
_حسيت إنك هتيجي على فكره
_إحساسك طلع صح
ابتسمت وفضلت ساكته كنا ماشيين جنب بعض طلعت علبة السلسه من جيبي وابتسمت وانا بقول:
_ممكن تقبلي مني دي؟
ابتسمت وخدتها مني فتحتها وبصت ليا واتكلمنا في نفس الوقت قولنا:
_أهداني أحدهم سلسله على شكل فراشه واخبرني انه يراني مثلها والان اصحبت فراشه ترتدي الأخرى
ضحكنا سوا طلعتها من العلبه ولبستها وبصت ليا وقالت:
_متشكره اوي
_دي أقل حاجه حقيقي
اتمشينا شويه بعدين وصلتها وبعدها رجعت بيتي وانا بفكر في حاجة تانية اعملها
فتحت الفيسبوك بتاعها قولت يمكن الاقي اي حاجه تساعدني وبعد نص ساعه في الاميل بتاعها لقيت بوست ليها بتقول فيه نفسها تفطر في الشغل كيلوا فسيخ مع ١٠٠ رغيف و اتنين كيلوا بصل ولبانه بالنعناع
هو مش عارف ومش فاهم إزاي بنت بتحب الاكله دي بس هعمل كدا عشانها
طلبت أوردر فسيخ اونلاين
وفضلت افكر إذا كانت دي حاجه عاطفيه ولا لاء بس مش مهم المهم انها بتحبها
جيه تاني يوم واستلمت الاوردر ووقفت جبت لبان بنعانع من سوبر ماركت
وروحت للشغل عندها سألت عليها ووصفولي مكتبها
خبطت على باب مكتبها ودخلت لما سمعت إذن الدخول
قامت وقفت وهي مبتسمه وقالت:
_توقعت انك هتعمل اي حاجه انهارده على فكرا
ابتسمت ومردتش كان فيه تربيزه عندها في المكتب طلعت الاكل عليه كانت واقفه مذهوله ضحكت وهي بتقول:
_دي متوقعتهاش
ضحكت مع ضحكها بصت ليا وبصت للأكل وقالت:
_انت اكيد مجنون والاكيد اكيد إن بعد الاكله دي هترفض
ابتسمت وانا بقولها:
_مش مهم انا هعينك عندي
_بجد هتعيني في أي بقا
_في عش الزوجيه
ضحكنا سوا وقعدنا ناكل حاولت مبينش اني مبحبش الاكله دي
كانت مبسوطه كان باين فرحتها في الحاجات اللي بنسبه ليا عبيطه بس كانت بنسبه ليها عظيمه!
خلصنا اكل ولمينا الحاجه غسلنا إيدينا وعشان الريحه تروح حطتلي من البرفيوم بتاعها في إيدي
وبعد كوبايتين شاي سيبتها وروحت اشوف شغلي انا بقا
خلصت شغل وروحت فضلنا نتشات كتير على الواتس قالتلي انها مبسوطه اوي انهارده وفرحت جدآ بغض النظر ان بطني وجعاني بسبب الاكله دي بس فرحتها عندي ب الدنيا
وكالعاده دخلت على الفيسبوك اشوف حاجه تفيديني ولقيت صوره ل كلب مكتوب عليه انه كان كلبها ومات وهي حزينه عليه عشان كانت بتعتبره ابنها
طول اليل من بيدج لبيدج عشان اوصل لنوع الكلب وواحد من صاحبي قالي ممكن الاقيه فين
صحيت تاني يوم مع صاحبي وروحنا جبنا الكلب نفس الون نفس الشكل حتى اشتريت نفس السلسله اللي كان الكلب بتاعها لابسها
وبعد ما خلصت شغل استنتها قدام شركتها ب الكلب وشويه وطلعت من باب الشركه اول ما شافتني ابتسمت وجت عليا جري وهي بتقول:
_رعد
خدته مني فضلت تطبطب عليه بصت ليا وقالت:
_ده شبه جدآ بجد شكرآ يا يوسف مش عارفه اقولك ايه
_متقوليش حاجه المهم انك مبسوطه
ابتسمت وقالت:
_دي كمان متوقعتهاش
_انا اصلآ محدش يتوقعني
ضحكنا سوا بصت ليا وقالت:
_تكمل جميلك وتوصلني لمكان الميتنج؟
_ياباشا ده احنا اوامر ماشيه على الأرض يلا بينا
فتحتلها باب العربيه ووصلتها نزلت وخدت معاها رعد مرضيتش تسيبه معايا
ورجعت انا لشغلي وفضلت يومين بعيد عنها بسبب الشغل لكن كنا بنتكلم واتساب
وانهارده شفت بوست ليها على فيسبوك إنها بتحب كل اغاني محمد فؤاد
خدت عربيتي وصحابي وروحنا لتحت بيتها شغلت اغنيه لمحمد فؤاد كان معايا مايك بغني مع الاغنيه وصحابي معاهم طبله وبيغنو ورايا
||.. وبحب بكل ما فيا ب قلبي وروحي وعنيا وحبيبي اهو بين إيديا هحلم ب ايه تاني..||
طلعت من البلكونه وانا وصحابي مكملين غنى
||..وخلاص الدنيا ضحكتلي وسبق لما وعدتني بأجمل جب وهدتني هحلم ب اي تاني..||
الجيران كانه بيسقفه مستمتعين ب الجو وهي كانت مكسوفه طلعت موبايلها تصور وانا مكمل
||.. خدنا يا شوق طلعنا فوق ده حبيبي معايا وف حضني خايف عليه إيدي في إيديه حالف ما اسيبه ولا يسبني..||
خلصت الاغنيه واتكلم ياسين صحبي وقال:
_اتجوزيه يا شهد الواد بيحبك
وكمال صاحبي بأعلى صوت عنده قال:
_متكسريش قلب كتكوتنا واتجوزيه اللهي تتستري
كلنا ضحكنا حتى هي و الوقت اتأخر حدفت ليها بوسه في الهوا ومشيت
عدا اليوم واتكلمنا واتساب نزلت استوري ب الفيديو اللي صورتو وكانت فرحانه جدآ
عدا يومين وكان جيه على بالي فكره جديده
عرفت من صاحبتها انهم رايحين دانكن دونتس بعد الشغل
فا روحت اتفقت مع مدير الفرع ان اي حاجه تطلع يكون مكتوب عليها يارب يوسف يتجوز شهد كوفي او دونتس معجنات ومخبوزات اي حاجه حتى ازايز المياه
وبالفعل راحو دانكن دونتس واتفجأت ب كل حاجه مكتوب عليها يارب يوسف يتجوز شهد حتى الموظفين هناك كانه بيقولولها اتجوزيه والزباين كل الدنيا عرفت اني عايز اتجوزها
صاحبتها صورت ردة فعلها وبعتتهالي وشويه وهي كلمتني
_كل شويه حاجه غير متوقعه كدا يا استاذ يوسف
_حبيني بقا ربنا يخليكي حبيني
_امم تعمل اي وانا احبك؟
_اولع الدنيا عشانك والله
_وريني
_عيني حاضر
قفلت معاها واتفقت مع أصحابي نعمل الترند بتاع إن الشاب يروح يتقدم وهو وراه كذا عربيه واصحابه يبقو ماسكين الحاجات اللي بتولع
عرفت من سلمى صاحبتها انها روحت وبدأت انا وصحابي في خططي من اول الشارع لحد باب العماره عندهم عربيات فيها انواع الصواريخ اللي بتولع
خرجت هي وجدتها والجيران خرجو على الأصوات وصحابي كلهم في نفس الوقت قالو بصوت واحد
“اتجوزيه بقا”
رنيت عليها عشان مكانتش هتسمعني من الدوشه ردت وهي بتضحك وبتقول:
_بجد انت اكتر واحد مجنون شفته في حياتي
_واكتر واحد بيحبك في حياته برضه
_بكرا نتقابل يكون اخويا الكبير جيه وتطلبني منه
_يعني وافقتي؟
_بكرا اقولك
قفلت معاها وبصيت ل صحابي وقولت:
_وافقت يا رجاله
كلهم بقو يغنو ويسقفو وشغله اغاني الجيران بقو يزغرطو
الوقت اتأخر كان لازم امشي مشيت وانا مش عارف انام اخيرآ بكرا هقابل اخوها واطلب إيديها
اكتشفت ان الراجل لما بيحب بيعمل حاجات غريبه انا عمري ما دخلت مطبخ ودخلت عشانها عمري ما حبيت الفسيخ ده وكلته عشانها ماليش في الحيوانات وحبتهم عشانها الراجل لما بيحب بيتعامل ب قلبه واحنا قلبنا جميل اوي والله لو لقينا اللي تستاهله
جيه تاني يوم لبست بدله بيضه كنت مبسوط حاسس ان انهارده خطوبتي مش رايح أتقدم لاء!
خدت معايا بوكيه ورد وخدت معايا عمي الكبير وروحت عشان اتقدملها
استقبلنا اخوها وبعد ما أتفقنا على كل حاجه قرينا الفاتحه
كانت لابسه دريس ابيض شعرها سايح حطه توكه صغننه على شكل مقص تقريبآ مش عارف بس هي حاجه ترندي يعني ميكب خفيف لابسه السلسه الي جبتها ليها
ودخلت واحده وهي بتقول:
_شهد اصحي يا شهد
_سبيني شوية كمان يا ماما عشان بتخطب
_بتتخطبي إيه قومي هتتأخري على الجامعة
بفوق من نومي وبدعك عيني وببص على موبايلي بلاقيه مفتوح على بوست
“لو رجعت البيت ولقيت نسخة تانيه منك هتثبت إزاي إن انت النسخة الحقيقية”
استوعبت الموقف وافتكرت إني قبل ما انام كنت عامله سيناريو في دماغي
يعني كل ده كان حلم !
يوسف كان حلم !
دكتور بسام او باسم ده كان حلم!
بستغرب الموقف وبدخل باخد شاور وبخرج البس وبنزل الجامعة بحضر محاضراتي وبخرج اقعد في كافتيريا الجامعة وبتفجاء من رقم بيرن
متسجل “دكتور باسم”
برد وانا مستغربه:
_الو
_إيه يا شهد مجتيش ليه مش إنهارده الاربع ؟
_إنهارده معاد الجلسة صح؟
_ايوا يابنتي
_معلش انا كنت بتعالج عندك ليه؟
_انتي فقدتي الذاكره ولا إيه؟
_ارجوك رد عليا
_عشان انتي شخصيه توكسك
_يعني حقيقه اهو طب انا جيت قولتلك إن فيه مني شخصيه تانيه
_شخصيه تانيه إزاي يعني
_نسخه تانيه يا دكتور وانت قولتلي دي عالم موازي
_مفيش الكلام ده انتي مش نايمة كويس ولا ايه
_انا جايه حالآ ونشوف الموضوع ده لما اجي
بقولها وبقفل معاه وباخد شنطتي وبجري على بره وانا عند بوابة الجامعة بخبط في حد وكل حاجاتي بتقع لسه هزعق بس انا وهو بنبص لبعض وبنقول:
_انتي؟
_انت؟
_انا حلمت بيكي
_انا حلمت بيك ..
تمت
لقراءة الرواية كاملة اضغط على : (رواية اسميته يوسف)
