رواية 24 ساعة حرب الفصل الثامن 8 بقلم عادل عبدالله

رواية 24 ساعة حرب الجزء الثامن

رواية 24 ساعة حرب البارت الثامن

رواية 24 ساعة حرب الحلقة الثامنة

الحارة أمام منزل مسعد
يخرج سيد الجن من مسكن بلوظة ويجري الي الصبي الواقف بعيد ويسأله : متعرفش الاقي مسعد فين ؟
الصبي : هات ٥ جنية وانا اقولك .
سيد الجن يخرج من جيبة بعض الأموال ويعطي الصبي ورقة بعشرة جنيهات .
الصبي : مسعد راح مع بلوظة الخناقة .
يمسك سيد الجن بالطفلة الصغيرة ويمشي .
،،،،،،،،،،،،،،،
حارة سيد الجن
يعود سيد الجن الي الحارة ومعه الطفلة الصغيرة ونجد أهل الحارة يبدو علبهم الفرح .
ثم تقول احدي السيدات : تسلم يا سيد ، كنا عارفين انك هتجيبها أنا هروح لأم البت علشان تيجي تاخدها تلاقيها يا حبة عيني مش قادرة تنام من خوفها علي البنت .
سيد الجن : لأ ميصحش تنزليها في الوقت ده خدي البت معاكي انتي وصليها لحد عندها ، ثم يسأل : أومال فين رجالة الحتة وفين المعلم بدري ؟
أحدي السيدات : الحكومة خدتهم كلهم واللي متاخدش منهم هرب .
سيد الجن : كام واحد الحكومة خدتهم ؟
ترد احدي السيدات : كتير يا سيد خدوا كتير اوي العربيات كلها اتملت .
سيد الجن : فيه حد اتعور ؟
يرد صبي صغير : كتير اوي عربيات الاسعاف خدتهم .
تأتي أم أسماء وهي تبكي وتسأله : أسماء فين يا سيد ؟
سيد الجن : أسماء مش هناك بس مش هغمض عيني الليلة الا لما اسماء ترجع وتنام في حضنك يا ام اسماء .
أم أسماء تبكي : أنا قلبي وجعني انا حاسة ان بنتي حصلها حاجة .
سيد الجن : لأ يا ام أسماء متقوليش كده أسماء هترجع وهترجع دلوقتي حالا كمان اطمني متخافيش .
،،،،،،،،،،،،،،،،،،
الشارع بجوار قسم الشرطة
يقف سيد الجن وفي يده سيجارة ويبدو أنه يفكر في شيئا ما .
و يتلفت يمينا ويسارا حتي تقع عينيه علي سعاد فيشير اليها فتقترب منه فيسألها : كنتي بتعملي ايه جوه القسم ؟
سعاد : كنت بعمل محضر في بلوظة .
ينظر اليها سيد الجن ويسألها : متعرفيش قبضوا علي مين جوه القسم ؟
سعاد : يووووه كتير اوي ده القسم جوه اتملا وخدوا ناس كتيرة كمان علي المديرية .
سيد : اهم حاجة انا عايز اعرف المعلم بدري وخالد صحبي وبلوظة ومسعد اتقبض عليهم ولا هربوا ؟
سعاد : معرفش خالد صحبك انما انا شوفت بلوظة جوه وعرفت ان المعلم بدري خدوه المديرية ومسعد كمان في المديرية .
سيد الجن : علفكرة بنتك في البيت .
تظهر علامات الذهول و الفرح علي سعاد وتقول : بتتكلم جد ؟ والله العظيم ؟ بنتي في البيت بجد ؟
سيد الجن : أنا رجعتها لك البيت عندك روحي بقي علشان تطمني عليها وتنام في حضنك .
تجري سعاد بلهفة وتقول : ربنا يخليك يا خويا ربنا يطول عمرك ثم تجري عدة أمتار وفجأة تقف تلتفت الي الخلف وتقول : علفكرة يا خويا البت اللي اسمها اسماء اللي كنتوا بتدور عليها الصبح جوه في القسم .
يجري اليها سيد الجن : بتتكلمي جد ؟
سعاد : ايوه والله شوفتها جوه كانت بتعمل محضر في مسعد وبلوظة علشان خطفوها .
سيد الجن : ربنا يطمن قلبك ، انا هدخل اشوفها واللي يحصل يحصل .
سعاد : لأ يا خويا استناها هنا زمانها خارجة كمان شوية ، لو دخلت هيحبسوك علشان اسمك موجود جوه في الخناقة ، معلش يا خويا انا ماشية عشان اشوف البت .
تجري سعاد وترحل من المكان .
بعد مرور بعض الوقت
يقف سيد الجن ويدخن سيجارة ويبدو عليه التوتر والقلق ثم تظهر أسماء وهي تخرج من باب قسم الشرطة يجري اليها سيد الجن ويقول : حمدلله علي سلامتك يا موئة كنت هتجنن عليكي .
أسماء : الله يسلمك يا سيد يلا نمشي من هنا قبل ما الحكومة تشوفك و تمسكك .
سيد الجن : فداكي يا موئة اهم حاجة اني اطمنت عليكي وشوفتك .
أسماء : كنت خايف عليا يا جن ؟
سيد الجن : كنت خايف أوي انا كنت مرعوب عليكي ، قوليلي يا بت أيه اللي جابك القسم وحصلك ايه طول النهار ؟
أسماء : طيب يلا نمشي من هنا واحكيلك كل حاجة واحنا في الطريق .
،،،،،،،،،،،،،،
مديرية الأمن
يقف الضابط ويبدو عليه العصبية ويقول : قولي بقي يا معلم بدري انت بتاجر في السلاح من أمتي؟
المعلم بدري : انا عمري ما تاجرت في السلاح يا بيه .
الضابط : انكارك مش هيفيدك احنا شوفنا السلاح جوه في قهوتك وكل صبيانك اعترفوا عليك .
المعلم بدري : يا بيه انا معرفش حاجة عن اللي انت بتقوله ده .
الضابط : والسلاح اللي جبناه من بيتك برضو متعرفش عنه حاجة ؟
المعلم بدري يقف في صمت لا يتكلم ثم يقول : يابيه الحاجة دي بتاعتي لكن عمري ما تاجرت فيها .
الضابط : مهما تنكر التهمة ثابتة عليك .
،،،،،،،،،،،،،،،
قسم الشرطة
يقف بلوظة امام الضابط الذي يسأله : خطفت البنت ليه يا بلوظة ؟
بلوظة : دي بنتي يا بيه هوه فيه حد يخطف بنته ؟
الضابط : لما تسلط واحد يخطفها في الشارع تبقي خطفتها .
بلوظة : مين اللي قال لسيادتك كده ؟
الضابط : امها وكمان كل الشهود واهل الحتة .
يبكي بلوظة : امها منعتني اشوفها من ٨ شهور من ساعت ما اطلقنا وكان نفسي اشوف بنتي واخدها في حضني زي كل اب يا بيه .
الضابط : كنت ممكن تتفاهم معاها .
بلوظة : حاولت اتفاهم معاها بس هي مش بتتفاهم ابدا وأهلها وجيرانها هما اللي مشجعينها علي كده منهم لله هما اللي خربوا بيتنا .
الضابط : طيب عرفنا موضوع بنتك خطفت البنت التانية ليه ؟ ودي مصيبة علي دماغك لأن البنت التانية كبيرة يعني ممكن تكون اغتصبتها .
بلوظة : لأ يا بيه ربنا يعلم محصلش معها حاجة .
الضابط : وخطفتها ليه ؟
بلوظة : يا بيه انا مخطفتهاش .
الضابط : انت حرضتت صحبك مسعد علي خطفها .
بلوظة : مسعد مش صاحبي .
الضابط : جاوب علي اد السؤال ، حرضت مسعد ليه يخطفها ؟
بلوظة : محرضتوش .
الضابط : قول الحقيقة يا بلوظة واوعدك هساعدك في القضية .
بلوظة : يا بيه احنا اتربينا في الحتة ان عيب لما حد يعلم علينا واللي اسمه سيد الجن ده كان عايز يعلم علينا علشان كده مسعد خطف البت كسر عين له مش اكتر .
الضابط : طيب قولي بقي مسعد لما بيخطف العيال بيعمل فيهم ايه ؟
بلوظة : لأ انا معرفش حاجة عن اللي انت بتقوله ده .
الضابط : برضو هترجع تكدب تاني ؟
بلوظة : انا مش بكدب يا بيه .
الضابط : لأ انت بتكدب ولو مقولتش كل اللي تعرفة هعتبرك شربك في كل جرايم الخطف اللي مسعد متورط فيها .
بلوظة : يا بيه انا معرفش الا ان مسعد بيخطف العيال وبيوديهم لدكتور يعرفة وبيقبض عليهم فلوس اكتر من كده معرفش .
الضابط : ومبلغتش عنه ليه انت كده ممكن تكون شريكه في جرايمه
بلوظة : انا مبلغتش عشان مشوفتش حاجة بعيني كله كلام بنسمعه ومعرفش الحقيقة .
،،،،،،،،،،،،،،،
مديرية الأمن
يجلس ضابط القسم مع ضابط المديرية ويقف امامهما مسعد فينظر له ضابط المديرية ويقول : خطفت البت الصغيرة ليه يا مسعد ؟
مسعد : مخطفتش حد يا بيه .
الضابط : لأ مش عايزين كدب من اولها اذا كان أبو البت نفسه اعترف انه طلب منك تخطفهاله وانك خطفتها ووصلتها له .
مسعد : يا بيه ….
الضابط : اتكلم دوغري يا مسعد لأن كل حاجة ثابتة عليك يعني كدبك مش هيفيدك في حاجة بالعكس ده ممكن يوصلك لحبل المشنقة انما لو قولت الحقيقة كاملة هيحسن موقفك في القضية و تاخد اقل حكم .
مسعد : سيادتك عايز تعرف ايه يا بيه ؟
الضابط : خطفت البت الصغيرة بنت بلوظة ليه و خطفت البنت التانية اللي اسمها اسماء ليه ؟
مسعد : بلوظة اللي طلب مني اخطفله بنته وبعدها طلب اخطف البت بتاعت سيد الجن .
بلوظة : يعني بلوظة هو اللي حرضك علي خطف الاتنين .
مسعد : ايوه يا بيه .
الضابط : وعملتوا حاجة في البنت الكبيرة اللي اسمها اسماء ؟
مسعد : لا يا بيه و حتي اسألوها .
الضابط : طيب والعيال التانيين اللي كنت بتخطفهم كنت بتعمل فيهم ايه ؟
يبدو علي وجه مسعد صدمة المفاجأة ويرتبك ويقول : عييي اااال عيال اييييه يا بيه ؟
الضابط : العيال اللي كنت بتخطفهم وتوديهم للدكتور يا مسعد .
مسعد : دكتوورر دكتور مين يا بيه انا معرفش حاجة عن اللي بتقوله ده .
ينتفض ضابط القسم واقفا ويقول بصوت عالي : أنت هتستهبل يا روح امك كل حاجة اتعرفت خلاص و جيرانك وأولهم بلوظة اعترفوا عليك قدامي في القسم وكاميرات المراقبة في الشوارع رصدتك اكتر من مرة وانت بتخطف عيال .
ضابط المديرية : لو متكلمتش يا مسعد وقولت كل حاجة وقولت مين الدكتور الللي كنت بتوديله العيال دي هتتشنق ولوحدك ، اتكلم احسن لك ، اعترافك هيفيدك كتير في القضية والحكم ممكن يتخفف عنك .
مسعد : هتكلم يا بيه وهقول كل حاجة .
ثم نجد مسعد يتحدث ويحكي للضباط بالتفاصيل عن كل ضحاياه من الأطفال الذين تمكن من خطفهم وعن الطبيب الذي كان يأخذ منه الأموال مقابل هؤلاء الاطفال .
،،،،،،،،،،،،،،،
حارة سيد الجن
يعود سيد الجن ومعه اسماء الي الحارة ونجد الكثير من أهل الحارة في انتظاره وبمجرد ظهور تبدو عليهم صيحات الفرح والزغاريد ثم تجري أسماء الي امها وتحتضنها وتمسح دموعها وتقول : متخافيش يامه أنا كويسة ، تحتضنها امها بقوة ثم تقول : متشكرة اوي يا سيد ربنا يطمن قلبك زي ما طمنت قلبي علي بنتي .
سيد الجن : اللي يطمن قلبي حاجة واحدة بس يا ام اسماء أنك توافقي أخطب منك اسماء .
أم أسماء : وأنا مش هلاقي احسن منك لبنتي .
،،،،،،،،،،،،،،،
بعد عدة أسابيع
في المحكمة
يقف الجميع ينتظرون خروج القضاة من غرفة المداولة
ونري في قفص الأتهام سيد الجن وصديقه خالد والمعلم بدري وبلوظة و مسعد والطبيب وخلفهم العشرات من المتشاجرين في المعركة
ينادي حاجب المحكمة : محكمة
فيقف الجميع في صمت ثم يخرج القضاة ويجلسون علي منصة القضاء
ثم بجلس اغلب الحاضرون
في قضية التشاجر وترويع الامنين
بلوظة سنتين مع الشغل
مسعد سنتين مع الشغل
المعلم بدري سنتين مع الشغل
سيد الجن سنة مع الشغل
خالد سنة مع الشغل
وباقي المتشاجرين من الطرفين سنة مع الشغل
في قضية خطف الطفلة منة
ينادي رئيس المحكمة علي سعاد أم الطفلة منة فتاتي لتقف أمامه
يقول : ليه يا سعاد منعتي ابو بنتك انه يشوفها ؟
سعاد : با بيه اخاف عليها منه .
القاضي : تخافي عليها من أبوها ، ده معقول ولا انتي بتحاولي تعاقبيه بكده ؟ حرام عليكي ده ولا شرع ولا قانون يسمحلك تعملي كده
سعاد : يا بيه كنت خايفة ياخدها مني
القاضي : اهو بسبب عنادك ومنعك لطليقك انه يشوف بنته حصل كل ده وكانت ممكن تكون النتيجة كارثية اكتر من كده ، لما جوزك يخرج من السجن تخليه يشوف بنته بأستمرار .
سعاد : حاضر يا بيه
ثم يأمر برجوعها الي مقعدها
و ينادي علي بلوظة ويقول له : كان فيه مليون طريقة تقدر تشوف بيها بنتك غير انك تحرض واحد زي ده يخطفهالك اولها انك تلجأ للقانون اللي هيديلك الحق انها تشوفها علي الاقل مرة في الأسبوع احنا استخدمنا معاك الرأفة علشان ظروف جهلك ،
بلوظة ستة أشهر مع الشغل
مسعد سنة مع الشغل
في قضية حيازة أسلحة نارية والاتجار بها
المعلم بدري ١٠ سنوات مع الشغل
في قضية خطف الأطفال والاتجار في الاعضاء
مسعد الإعدام شنقا
الطبيب عزلة من جدول الاطباء الممارسين لمهنة الطب والحكم عليه بالإعدام شنقا
يقصف القاضي القلم ثم يجمع أوراقه
ينادي الحاجب. محكمة
فيقف الجميع ثم ينصرف القضاة .
بعد مرور سنة
عند بوابة السجن
يخرج سيد الجن من محبسه ويجد أسماء وامها وأمه في انتظاره يستقلون جميعا سيارة أجرة في طريقهم الي منزلهم .
حارة سيد الجن
تدخل السيارة الأجرة الحارة ويتلفت سيد الجن يمينا ويسارا في ذهول ويسألهم : هي الحتة مالها شكلها اتغير كده ليه ؟
أسماء : الحكومة بعد الحادثة عملوا أزالة لمنطقة العشش كلها وعطوهم شقق في المحافظة وبيبنوا مكانها دلوقتي مشروع سكني كبير ، والحتة عندنا فتحوا فصول محو الأمية اجباري لكل الحي و قبضوا علي كل تجار المخدرات في المنطقة .
سيد الجن : يعني ممكن ناخد شقة في المشروع السكني ده نتجوز فيها ؟
تنظر أسماء له بخجل وصمت ثم تشير الي امها .
سيد الجن : قولتي ايه يا حماتي اروح اشتري الشبكة احنا كنا المفروض نتخطب من سنة فاتت زي ما وعدتيني .
أم أسماء : أنا اديتك كلمة يا سيد وانا لسه عند كلمتي و اسماء فضلت قاعدة مستنياك طول السنة وكانت بتعدهم باليوم .
أم سيد الجن : يبقي الجمعة الجاية خطوبة سيد وأسماء .