رواية يوسف وشهد الفصل الأول 1 بقلم شهد محمد جادالله

رواية يوسف وشهد الجزء الأول

رواية يوسف وشهد البارت الأول

رواية يوسف وشهد الحلقة الأولى

_بتفكر في إيه ؟
_ها أبدآ إنتي لسه منمتيش؟
_مجاليش نوم والله يا يوسف
بيولع سيجارة وبينفخ الدخان بملل وهو بيتنهد وبيقول:
_إيه شاغل تفكيرك؟
_مش عارفه خايفه من بكرا
_وتخافي من بكرا ليه وكلنا معاكي
_طب سيبك مني انا انت بتفكر في إيه؟
_في بكرا
_وخايف منه؟
_لأ انا بفكر هعمل إيه فيه
_وفكرت؟
_كتير اوي يا شهد اللي هيتعمل كتير مش عارف أبدآ منين ولا منين
_بسيطة إحنا سوا قولي ونحاول نرتب كل حاجه سوا على حسب الأولويات
_عايز اشوف شغل على شغلي وعايز اشوف شقه ليا وعايز اتجوز واشوف حياتي عايز افرح امي بيا
_تتجوز ! والعروسة موجوده؟
_لأ بس اكيد هتيجي مش هفضل طول عمري عازب
_بسيطة نشوف شغل في فترة مسائية واحده واحده هتعرف تجيب الشقة وتكون العروسه جت والباقي كله مقدور عليه
_إن شاء الله يا حبيبتي مش هتجوز غير لما اطمن عليكي انتي الأول
ببتسم ليه وبسيبه وبرجع لـ اوضتي تاني
مش عارفه ليه مفيش حاجه في الدنيا سهله
ليه العيشة صعبه والحياة العاطفيه صعبه وتحب حد مش حاسس بيك واللي يحبك متحسش بيه كأن الدنيا بتعاند معانا ومش عايزه أبدآ تشوفنا مع حاجه بنتمناها !
بتنهد بقلة حيلة وبقوم احضر لبسي والفطار عشان بنزل شغلي قبل معادي بساعه عشان المواصلات
ببص عليه في البلكونه وبلاقيه لسه قاعد بيبص للفراغ وفي إيديه سيجاره جديده
_احضرلك فطار؟
_لو ممكن فنجان قهوة يبقى كتر خيرك اوي
_عيني حاضر
بقولها وبدخل المطبخ بحضر فطاري وبقف اعمل فنجان قهوته
فقط القليل من البُن والسكر والمياه وقلبي واملي ونظراتي ليه يمكن يحس بيهم في القهوة ويعرف إني بحبه !
يبقى ابن عمتي بعد وفاة بابا وماما وانا عايشه مع عمتي في بيتها انا وهو ونادين اخته
كان بيحب بنت وفضل معاها كتير ولما أتقدم ليها باباها رفض عشان مكنش في نفس مستواها الاجتماعي
الموضوع عدا عليه كتير بس اعتقد لسه منسهاش لأنه معرفش حد بعدها
وقلبي الغبي ساب الكل وراح ليه !
بخلص فنجان قهوته وبدخل ليه
_تحبي اوصلك لشغلك؟
_لأ انت اصلآ هتشرب القهوة وتنام
_دي حقيقه القهوة الناس بتشربها بتفوق إلا أنا بشربها بنام
_نتيجتها معاك عكسية
بنضحك سوا وبسيبه وبدخل اوضتي بلبس وبجهز وباخد شنطتي وبروح شغلي
شغلي بيكون عباره عن حجز تذاكر الطيران مش بعمل حاجة غير إني طول اليوم قاعده قدامي اللابتوب والنوت وبحجز التذاكر
وعندي زميل دمه تقيل اسمه زياد مش بيبطل يتطفل عليا وإن شاء الله هسيب الشغل قريب بسببه
_صباح الخير يا شهوده
_صباح الخير يا زياد
_شكلك حلو إنهارده
_متشكره
_تشربي قهوة؟
_شربت
_تحبي اقولك نكتة عارفه السقا انا ساكن في السقا اللي قدامه ههه
_زياد ابعد عني
بقولها وبمضي على دفتر الحضور وبمشي برجع اقعد على مكتبي وبحاول اشوف شغلي لكن بركز في حوار بيدور بين صحابي البنات
_لو بيحبك هيغير عليكي يا ساره حتى لو هو مش واخد باله من حبك دلوقتي اول ما يحس إن فيه راجل غريب عنده مشاعر ناحيتك هيبدأ ياخد باله منك ومن حبه ليكي
بترد عليها ساره وبتقول:
_مش فاهمه يعني اقولو في واحد معجب بيا ؟
_لأ طبعآ قوليله إن فيه عريس متقدملك وشوفي ردة فعله لو انزعج كدا واضايق يبقى بيحبك ولو خد الأمر عادي يبقى لأ يا ساره
بسمع حديثهم وبكمل شغلي وبحط الفكره في دماغي وبيعدي اليوم وبخلص شغلي وبرجع للبيت
بساعد عمتي في تحضير الغدا وبيجي الوقت الالطف في اليوم
وقت ترويق اوضته،حتى الاوضه بتاعته جميله زيه تمامآ
ريحته فيها وحاجاته اللي برتبها ليه اوقات بكون عبيطه كدا وبعمل فيها سعاد حسني وبمسك الشيميز بتاعه اشم فيه ريحته !
بخلصها وبقعد في البلكونه مستنياه يجي مستنيه اعمل الاختبار اللي سمعته من صحابي الصبح ياترى هتكون إيه ردة فعله !
بيتأخر الوقت ومبيكنش لسه جيه
بدخل اعمل كوباية شاي وبرجع للبلكونه
وفي نفس الوقت بيكون قاعد في البلكونه عم إبراهيم جارنا
راجل قديم جميل دمه خفيف على طول كل ما بيشوفني بيديني بنبوني
كان قاعد بيقراء جرنال ومشغل الراديو على اغنية لفريد الاطرش
||..ياحبيبي ياريت ابقى حبيبك
واكون من بختك ونصيبك
ده انا مهما تقسى بردوا راضي بك
وتسيبني الروح قبل ما اسيبك
قلبي عمل إيه يا حبيبي
ليه تقسي عليه يا حبيبي
وحشته أفراحه من شوقه إليك
ومساه وصباحه بيسألني عليك..||
ببتسم على كلمات الأغنيه زي ما يكون كل حاجه حاسه بيا وبقلبي معاده هو !
بيقطع شرودي صوته وهو بيقول:
_لسه صاحيه؟
_اه مستنياك
_في حاجه ولا إيه
_أبدآ هنتكلم شوية
_طيب هغير هدومي واجيلك
_مستنياك
بتوتر وبنسى الكلام ومش عارفه إذا كان اللي هعمله ده صح او غلط بس ده مجرد إختبار !
من حقي قلبي عايز يطمن ..
_معاكي يا جميل
بيقولها وبيجي يقف جنبي على سور البلكونه بجمع الكلام وبقول:
_بصراحة انا فيه شاب زميلي معجب بيا و..
_وإيه كملي ؟
_عايز يجي يتقدملي
_شكلك موافقه؟
_لأ هو بس قالي ابلغكم في البيت انه عايز معاد
_وانتي رأيك إيه؟
_الرأي رأيك
_لأ الرأي مش رأيي انا مش هعيش معاه مش انا اللي هعمله اكل وانضف بيته واهتم بطلباته كل ده عليكي انتي
_مش عارفه يا يوسف انا مفيش حاجه من ناحيتي ليه بس صحابي بيقولوا اخد اللي بيحبني
_الرأي الأول والأخير ليكي يا شهد خدي وقتك في تفكيرك وردي عليا موافقه هقولك يجي امتى مش موافقه بسيطه هيترفض
ببتسم بخيبة أمل وببص للفراغ
وبيفضل هو كمان ساكت بيولع سيجارته وبيسرح زي عادته
_لسه بتوحشك
بينفخ دخان السيجاره وبيبص ليا وبيقول:
_لأ
_لأ إيه انت حتى مسألتش مين دي
_عشان مفيش غيرها يا شهد نورهان
_باين فعلآ إنها مبقتش توحشك
_ربنا يسعدها وعادي هي دي الدنيا بنختار المناسب لينا مش اللي احنا بنحبه
_تعرف انت رعب
_انا !! ليه ؟
_عشان لسه فاكرها يا يوسف ولسه بتحبها مستوعب إنك ممكن تتجوز وبعد عشرين سنه من جوازك تبقى لسه فاكرها
_مش كدا بس الحب الاول ده بيفضل معلم زي مثلآ اول مرتب في حياتك وزي اول عربيه اشترتيها في حياتك زي اول صاحبه ليكي في الكلية كل حاجه في اول حاجه مبننسهاش
_يعني نقدر نقول إنك عملت موف اون؟
_وخفيت منها ومن حبها كمان
_ربنا يسعدك ويريح قلبك وبالك
_انا وانتي يا حبيبتي
ببتسم ليه وبسيبه وبدخل اوضتي