رواية هو مين دا الفصل الرابع عشر 14 بقلم أسماء الطبلاوي

رواية هو مين دا الجزء الرابع عشر

رواية هو مين دا البارت الرابع عشر

رواية هو مين دا الحلقة الرابعة عشر

(فى شارع جانبي بعيد شويه عن الحاره كانت نجات بتتكلم مع رجب صاحب المعلم شعبان وكان الحوار كالتالي.
نجات: بقولك ايه يا رجب انا يا اخويا ما بحبش اللف والدوران وكلمتي واحده من الاخر اللي هتطلبه هتاخده وفوقه كمان شويه زياده وااللى هطلبه منك يتنفذ بالحرف الواحد.
رجب: يا ست الناس انا خدام اللي انتى عاوزاه اعملهولك بس افهم كل حاجه الاول.
نجات: انا عندي شويه بضاعه عاوزاك تاخدها وتحطها في اوضه البدروم بتاعة شقة سنيه مرات المعلم الاولى.
رجب: واشمعنى سنيه يعني.
نجات: هو انت هتحقق معايا انا قلتلك هتنفذ اللي طلبته منك واللي انت عاوزه هتاخده بلاش رغي كثير.
رجب: تمام بس انا عاوز اعرف ايه العباره.
نجات: ولا عباره ولا حاجه ده احنا هنعينهم هناك شويه لحد ما يجيلهم زبونهم وبس.
رجب: طيب ما قلتيش ليه للمعلم ولا للست سنيه وهم يعينولك البضاعه عايزه تدخليها بالطريقه دي ليه اكيد في انه.
نجات: خلاص يا رجب انا هشوف غيرك ولو فتحت بقك هتاويك يا اخويا في تربه متر في متر ونص.
رجب: لا و على ايه انا عارف انك تعمليها قوليلي مكان الحاجه فين وبكره هتلاقيها هناك.
نجات: كده يبقى اتفقنا.
( عند نسمه كان راكان اداها جرعه حب كبيره قوي وحسسها انها عايشه قبل ما يسيبها ويمشي وهي هيمانه.
نسمه: يا سلام انا عمري ما حسيت ان انا مبسوطه زي ما بكون مبسوطه وهو موجود مش عارفه انا حبيته امتى وازاي كنت بحاول طول الوقت اسيطر على مشاعري وما احسش بحاجه ناحيته بس ما قدرتش وده اللي خوفني يلا الخيره فيما اختاره الله اما نشوف الدنيا هتمشي ازاي وكمان افكر اقوله ازاي اني بحبه.
( كانت نسمه بتكلم نفسها قبل ما يجيلها اتصال من زبون عندها في الدكان وردت.
نسمه: الو ازيك يا معلم رضا امال انت فين يا راجل ما عدتش بسمع صوتك ولا بشوفك يعني.
رضا: مشاغل والله يا بنت الغالي بس انا مكلمك عشان كده في مصلحه كبيره معايا ولا لا..
نسمه: انت عارف اني معاك على طول قلي بس مصلحة ايه وانا معاك انت عارف اني بحب افهم كل حاجه قبل ما اخد خطوه.
رضا: حقك طبعا في شويه بضاعه تصفيه وكاله وعاملين عليهم مزاد كمان نص ساعه وانا معيش سيوله تكفي قولت اكلمك علشان لو انتى حابه نخش سوا.
نسمه: البضاعه دي تستاهل يعني ولا اي كلام وهرس.
رضا: هى من ناحيه تستاهل فهي تستاهل كثير المهم انتى جاهزه.
نسمه: انت عارف انى دايما جاهزه اقل من نص ساعه وابقى عندك.
رضا: وانا مستنيكي يا بنت الغالي.
( قفلت نسمه التليفون مع رضا وافتكرت انها حاطه اكل على النار
نسمه: طب والاكل اللي على النار ده اعمل فيه ايه بقى انا لازم انزل حالا مفيش غير ام فاروق هي اللي تلحقني من الموقف ده وتخلي بالها من الاكل لحد ما ارجع
( خرجت نسمه على السلم زي عادتها وندهت على ام فاروق.
نسمه: ام فاروق انتى يا وليه ما تردي بقى.
(خرجت ام فاروق تجري على السلم من تحت.
ام فاروق: والله يا نسمه لا انا فاتحه ميه ولا حتى بملا قزازه.
( ضحكت نسمه على كلامها.
نسمه: هههههه يا وليه انتى بقيتي ملبوسه بحاجه اسمها نسمه ولا ايه اطلعي انا عاوزاكي.
( طلعت ام فاروق تجري بعد ما قفلت باب شقتها عشان تشوف نسمه عاوزه ايه دخلت وقفلت الباب.
ام فاروق: خير يا بنتي في حاجه ولا ايه غريبه يعني انك مش بتندهيلي عشان خناقه.
نسمه: يا وليه بطلي افترا انا مش بقالي فتره اهو ربنا هاديني وما بعملش مشاكل تقدري تنكري.
ام فاروق: لا طبعا ما اقدرش ده انتى ست العاقلين هو انا قلت حاجه المهم عاوزاني في ايه.
نسمه: المعلم رضا بتاع الجماليه كلمني دلوقتي وعاوزني اروحله ضروري عشان في مزاد على شغل وانا مولعه على اكل جوه قلبي اتقطع من اكل الشارع كنت بطبخ لقمه سخنه عشان اكل عاوزاكي بس تخلي بالك منها لحد ما اجي.
ام فاروق: بس كده غالي والطلب رخيص يا حبيبتي لو عاوزه تطفي عليها وانا اجيبلك طبيخ من عندي عيني ليكى.
نسمه: تسلم عينيكى يا ام فاروق هو ده العشم بردو انا بس عاوزاك تخلي بالك من الاكل لحد ما ارجع وانا مش هتاخر.
ام فاروق: من عيني يا حبيبتي حاضر تاكليه في الهنا يا رب.
( خرجت نسمه بعد ما لبست هدومها بسرعه ودخلت ام فاروق شغلت التلفزيون عند نسمه وقعدت تتفرج.. وهناك في شقه سنيه كانت خلصت الاكل وقاعده هي والمعلم شعبان يتغدوا.
شعبان: تسلم ايدك يا سوسو الاكل زي الشهد بقالي كتير ما اكلتش لقمه حلوه كده.
سنيه: كل يا حبيبي مطرح ما يسري يمري.
شعبان: بس ايه الرضا ده كله هو ايه اللي حصل.
سنيه: والله يا حبيبي انا راضيه عنك على طول الله يسامحها بقى نجات هي اللي تخنت وداني انا ورباب عليك وكانت هتودينا في داهيه بس يلا كله خير ربنا يهديها.
شعبان: تخنت ودانكم ازاي يعني مش فاهم احكيلي اللي حصل بالظبط.
سنيه: ولا حصل ولا كان كل الحكايه انها قعدت تقول هو مالوش في الفلوس بتاعتنا وما ينفعش يقعد في البيت الا لما يبقى يصرف عليه ورباب سمعت منها وان جيت للحق انا كمان سمعت بس انا في الاخر حسبتها وقلت يا بنت انتى ملكيش غير بيتك وجوزك يبقى لازمتها ايه بقى تخربي على نفسك.
شعبان: يعني نجات هي اللي قالتلكم تعملوا كده معايا.
سنيه: اه يا اخويا وحياة النعمه اللي بناكلها دي وانا هكذب عليك ليه طب ان شاء الله اعدم شبابي هي اللي قالتلنا.
شعبان: بعيد الشر على شبابك يا سوسو ان شاء الله هي عموما حسابها جاي ليها روقه..
( عند ام فاروق كانت قاعده تتفرج على التلفزيون في شقه نسمه ومتابعه الاكل لحد ما باب الشقه خبط قامت تفتح ما لقيتش حد لكن لقت علبه محطوطه قدام باب الشقه بصت يمين وشمال ما لقيتش حد خدت العلبه ودخلت.
ام فاروق: ودي مين اللي حطلها العلبه دي ومشى خليكي هنا يا اختي لما اروح اطفى على الاكل وارجعلك.
(حطت العلبه على الترابيزه ودخلت تفط على الاكل ورجعت قعدت وخدت العلبه فتحتها ولقت جواها شوكولاته.
ام فاروق: الله شوكولاته ده انا بحبها قوي يا ترى مين اللي جايبهالك يا بت يا نسمه اما اخذ واحده اكيد يعني مش هتاخد بالها ان هي ناقصه واحده وبعدين نسمه ما تستخسرش فيا حاجه حتى لو العلبه كلها.
( اخذت ام فاروق شيكولاتايه واكلتها وقفلت العلبه زي ما كانت وحاطتها على الترابيزه ولقت الشقه مبهدله قالت تقوم تروقها لحد ما نسمه تيجي لكن بعد نص ساعه جالها مغص فظيع.
ام فاروق: اه يا بطني اه الحقونى يا ناس معدتي بتتقطع الحقوني يا ناس..
(وهناك في البنك عند هيام وهادي كانوا لسه قاعدين متنحين قدام الخزنه ومش عارفين ينطقوا.
هيام: انت هتفضل متنح كده كتير خلاص اللي حصل حصل المفروض دلوقتي نفكر هنعمل ايه
هادي: انا كنت عارف انه بيتاجر في الاثار لكن ما كنتش متخيل انه محتفظ بالاثار دي كلها في خزنه تخصه.
هيام: هو ده منصور مش مفهوم وكمان كانت اي حاجه بتعجبه ما كانش بيستخسرها في نفسه يعني عادي جدا لما كان بيفتح ساعات اي مقبره ويعجبه حاجه في قلبها حتى لو الزبون هيموت عليها كان لازم ياخدها.
هادي: ايوه لازمتها ايه ده لو كان حد اخذ خبر ان الحاجه دي موجوده هنا كان اتحبس من بدري كان اخذ فيها 100 سنه قبل الميلاد..
هيام: ههههههه لا حلوه دي عموما يا ريته كان موجود وكان اخذ ال 100 سنه دول يلا اهو راح فى 60 داهيه وخلصنا منه .
هادي: طيب هنعمل ايه في البلوه دي.
هيام: ما تقولش على النعمه بلوه احسن تروح من وشك..
هادى: يعنى من وجهة نظرك دي نعمه طب اتفضلي قوللنا هنتصرف ازاي في النعمه دي.
هيام: احنا دلوقتي هناخد بعضنا ونمشي وهنرجع كل حاجه زي ما كانت وهنيجي بكره ونطلب ان احنا ناخد محتويات الخزنه هيخلصوا الاجراءات هنكون احنا جايبين شنطه معانا هناخد حاجتنا وهنخرج بس ولما نخرج بقى انا هتصرف ملكش دعوه.
هادي: تفتكرى هيسيبونا نخرج بالبساطه دي.
هيام: والله انت واحد داخل تاخد حاجتك من البنك مين اللي ممكن يوقفك ما تقلقش انا عارفه بقولك ايه.
هادي: ربنا يستر يلا بقى نرجع كل حاجه زي ما كانت علشان نمشي
( رجع هادي هو وهيام الخزنه مكانها وعملت حساب باسمه ونقلتله نص المبلغ في البنك زي ما وعدته في الوقت ده عند نسمه في المزاد كانت لسه واصله حالا المكان وقابلت المعلم رضا.
رضا: يا مرحب يا مرحب ببنت الغالي نورتى الجماليه ايه الغيبه دي كلها..
نسمه:الجماليه منورة باهلها.
رضا: بقى يعني عشان الشغل كان نايم تنسينا خالص.
نسمه: ازيك يا معلم رضا والله ما نسيتك ولا حاجه بس الدنيا تلاهي وانت عارف وبعدين انت لسه قايل اهو الشغل نايم يعني مالهاش لازمه الواحد ينزل يفرهض نفسه على الفاضي قلت استنى لما يظهرلك حاجه اكيد هتلاغيني.
رضا: طيب يلا احسن المزاد هيبدا دلوقتي حالا.
(دخلت نسمه وبدا المزاد وكل واحد عنده سعر بقى يقولوا وفي الاخر اتفاجئ المعلم رضا بنسمه وهي بتسيب المزاد يرسي على حد ثاني.
رضا: انتى عملتى كده ليه هو مش احنا بينا اتفاق.
نسمه: عاوز الحق ولا ابن عمه يا معلم.
رضا: يعني ايه مش فاهم.
نسمه: يعني اجيلك دوغري ولا اقعد الف حوالين الكلام لحد الصبح.
رضا: لا طبعا تعالي دوغري انتى عارفه اني ما بحبش اللف والدوران.
نسمه: البضاعه دي مقلوشه.
رضا: قصدك ايه.
نسمه: يعني مغشوشه يا معلم حاطين شويه حاجات على الوش تجيب رجل الزبون لكن بقيت الخرده كلها هرس ما تعرفش تخرج منها بأي حاجه.
رضا: وعرفتى الكلام ده منين ده انتى لسه اول مره تشوفي البضاعه.
نسمه: اه بس مش اول مره في حياتي اشوف بضاعه الراجل مغطيها ومبين حبه من على الوش وكل ما حد يتكلم يقولك اصل الحاجه غاليه ولما حد يطلب انه يعاين يقول بعد ما المزاد يخلص هو احنا معلمين ولا جايين نتختم على قفانا ونمشي.
رضا: صحيح اللي خلف ما ماتش ابوكي بردو كان بيقعد يعرفني كل حاجه عمره ما بخل عليا بالكلام اللى في مصلحتي وكان مفتح زيك كده بردو واضح انك ورثتى العقل النور من ابوكى.
نسمه: الله يرحمه ويحسن اليه وطالما ذكرناه يبقى نقراله الفاتحه بقى هو وامي واموات المسلمين.
( خلصت نسمه كلام مع المعلم رضا وركبت تاني علشان ترجع البيت طلعت على السلم وقابلت فاروق.
فاروق: هو صحيح الكلام اللي انتى قولتيه لامي.
نسمه: يا فتاح يا عليم يا رزاق يا كريم هو انت عاوز ايه دلوقتي يا فاروق علشان انا عفاريت الدنيا بتتنطط في وشي.
فاروق: عاوز اعرف انا فيا ايه يتعيب عشان ترفضيني وتقولي لامي لو شفته في شارع ثاني هفلقه انتى فاكره نفسك مين يا بت.
نسمه: هقولك… انا فاكره نفسي البنت اللي انت هتموت وتتجوزها وبعتلها امك عشان تخطبها… حاسب لكلامك يا فاروق انا مش اي حد والاحسن انك تخلي بالك من كلامك معايا عشان ما تزعلش
فاروق: ماشي يا ست نسمه والله عشنا وشوفنا ست بتهدد راجل.
( خلصت نسمه كلامها مع فاروق وخدت بعضها وكملت فتح باب شقتها ودخلت لقيت ام فاروق مرميه على الارض.
نسمه بخوف: ام فاروق انتى يا وليه جرالك ايه.. ام فاروق…. الحقوني يا ناس يا ناس غيتونا.
( طلع فاروق يجري على صوت صريخ نسمه لقى امه واقعه في الارض.
فاروق: ايه ده امه جرالك ايه يا امه ايه اللي حصل يا نسمه امي فيها ايه.
نسمه: انت لسه هتسال اطلب الاسعاف بسرعه خلينا نلحقها.
فاروق: حاضر حاضر هطلبه اهو.
( طلب فاروق الاسعاف وجت عربيه الاسعاف خدت ام فاروق وطلعوا على المستشفى اما الدكتور خلص كشف خرج لنسمه وفاروق.
الدكتور: حالة تسمم واضحه جدا وعلى فكره في شبهه جنائيه في الموضوع لو حابين انى اعملكم تقرير بالكلام ده.
نسمه: تسمم.؟؟ ممكن تكون اكلت ايه عملها تسمم.
فاروق: انتى بتساليني اسالي نفسك هي كانت عندك في الشقه ولا عندي.
نسمه: بلاش الكلام ده يا فاروق احنا لولا ان احنا في مستشفى انا كنت عرفتك تكلمني كده ازاي.
دكتور: هدوا اخلاقكم شويه يا جماعه عموما مش اي حد ممكن يبقى عنده النوع ده من السم ده بيجي من بلاد اجنبيه وبالطلب كمان.
فاروق: سم ايه انت قصدك تقول ان امي اكلت حاجه فيها سم يعني مش حاجه وحشه مثلا وعملتلها حالة تسمم عاديه.
الدكتور: لا واضح انها اكلت حاجه فيها نوع سم معين عشان كده بقولكم ان الموضوع في شبه جنائيه لو عايزين تبلغوا.
فاروق: طبعا هنبلغ انا لازم اعرف ايه اللي حصل لامي بالظبط وكمان انا عاوز ادخل اطمن عليها هي عامله ايه دلوقتي يا دكتور.
الدكتور: كمان نص ساعه ولا ساعه هتفوق ما تقلقش بس حاليا مش عاوزكم تجهدوها بالكلام هتحتاج راحه.
فاروق: اكيد هريحها اهم حاجه حق امي يرجع.
نسمه: والنبي تسكت دلوقتي وتخلينا نخش الاول نطمن عليها ونعرف ايه اللي حصل بالظبط عشان نعرف نجيب حقها لو زي ما انت بتقول في حد حاول ياذيها.
( دخلت نسمه هى وفاروق عند ام فاروق كان بدات تفوق.
نسمه: حمد لله على السلامه يا خالتي ايه اللي حصللك بس.
فاروق: عامله ايه دلوقتي يا امه.
ام فاروق: الحمد لله يا حبيبي.
نسمه: هو انت اكلتي حاجه وحشه ولا حاجه اصل الدكتور بيقول انك عندك تسمم.
ام فاروق: والله يا بنتي ما اكلت حاجه غير شيكولاتايه من العلبه اللي جاتلك.
نسمه: علبه.. علبة ايه…؟؟؟؟