رواية دوار العمدة الفصل الثاني 2 بقلم حبيبة الرحمن
رواية دوار العمدة الجزء الثاني
رواية دوار العمدة البارت الثاني
رواية دوار العمدة الحلقة الثانية
في الصباح في منزل العمدة تأتي بنات العمدة المتزوجات إلى المنزل (كوثر وصباح)
كوثر تقبل يد والدتها الحاجة أمينه / صباح الخير ياامه
الحاجة امينه/ صباح الخير يابنتي اومال ولادك فين
كوثر/ بيلعبوا بره ماانتي عارفه بقي لما بيجو هنا مش يبطلوا لعب مع ولاد محسن
الحاجة امينه/ مالك يا صباح مفيش حتي صباح الخير
تهمس كوثر لوالدتها/ معلش ياامه أصلها متخانقه مع جوزها
الحاجة امينه/ والمحروس بيتشاكل معاكي ليه
صباح/ أهو ياامه كل ميشوفني يتخانق معايا
الحاجة امينه/’لما ابوكي يجي من الغيط هقوله علشان يبطل ينكد عليكي
صباح/ كل ميشوفني يقولي انتي كبرتي وعايز اتجوز بت صغيرة ترجعلي شبابي
الحاجة امينه/ وهو لما اتجوزك مش كنتي صغيرة بردو دا انتي مكملتيش الستتاشر سنه وكنا مجوزينك عايز يتجوز دلوقتي بعد مبقي عندك رجاله وعرايس على وش جواز
صباح / فكرتيني ياامه الواد فوزي ابن عمتي هيام كلمني علي أسماء بنتي
كوثر/ البت لسه صغيرة يا صباح دي لسه بتتعلم
الحاجة أمينة / مش في تانية دبلون
صباح /’آه ياامه
الحاجة امينه/ خلاص يابنتي يبقى علي البركه تتجوز وتكمل تعليمها ولا لو مكملتش يعني هيجرا ايه هي البنت ليها غير رجالها وبيتها
كوثر/ لا ياامه انا مش معاكي في الحته دي البت تخلص تعليمها الأول وبعدين تتجوز
تنزل نرمين
نرمين/ صباح الخير
كوثر/ اه يااختي نموسيتك كحلي ايه اللي كان مسهرك طول الليل
الحاجة امينه / هو فيه غيره التلفون اللي مسكاه ليل نهار
نرمين/’أهو الأجازة قربت تخلص وبكره اروح مصر مع طارق واقعد هناك علشان الجامعه
الحاجة امينه/ الجامعه اللي وقفتي حالك بيها وطفشتي كل عريس يجيلك بسببها
نرمين/ هو انتي ياامه كل مشوفيني تسمعيني الكلمتين دول
الحاجة امينه/ طب ادخلي ل رسميه خليها تعمل فطور لاخواتك البنات وتولع علي الطير اخوكي هيجي ياحبة عيني هفتان من الاكل اللي بياكله هناك
صباح/ طارق جاي النهاردة
نرمين /جاي العصر
كوثر/ يوصل بالسلامة بس متعملوش حسابي في الأكل انا لسه فاطره قبل مااجي هقوم اشوف العيال مش سامعه ليهم صوت
نرمين/ ههههه الحقيهم لو كانوا بيعلبوا مع عيال محسن يبقى دلوقتي رموهم في الترعة دول عيال عفاريت
الحاجة امينه/ ميت مرة اقولك مش تقولي علي العيال الكلمة دي
تنزل شوق بضيق/ سبيها يا مرات عمي بكره نشوف عيالها بس تخلص كليتها
نرمين /’انا ولادي هربيهم احسن تربية
شوق/ تقصدي ايه يا نرمين إن ولادي مش متربيين
الحاجة امينه/ بس انتي وهي عمالين تردحوا لبعض قدامى ومفيش أي احترام
صباح/ يا خارج من بيتك حزين هتلاقي الفرح فين هو انا اسيب البيت علشان افك عن نفسي شوية الاقي الهم والنكد ورايا ورايا شوق/ انا رايحه اشوف هنعمل أكل ايه النهاردة
وتقوم شوق
كوثر/ شوفتي ياامه بنت عمي مرمتش علينا الصباح حتي
نرمين/ متاخديش في بالك هي اصلا معندهاش ذوق
هو محسن هيطق منها من شوية
الحاجة امينه ل نرمين/ بطلي تصطادي في الميه العكره وروحي نضفي اوضتك علي الأقل
كوثر/ هقوم اشوف العيال
صباح/خوديني معاكي يااختي أشم هوا بره شوية
……………
في منزل كامل
هنادي تحت مع سعدية اللي كانت بتغربل رز
هنادي / هو وائل مشي على طول ليه ياامه
سعدية بضيق/ لما يرجع ابقي أسأليه
هنادي/ هو انتي زعلانه من حاجة ياامه
سعدية/ نقي الرز وانتي ساكته وبطلي لعب
هنادي/ كامليا امبارح مشيت زعلانه مش عارفة وائل قالها ايه زعلها
سعدية/ متطبي لحد خالتك صفيه قوليلها امي عايزاكي
هنادي /مش أخلص تنقيت الرز معاكي الأول
سعدية/ لا لسه قدامى كتير في الغربله ناديها أهو تتسلي معايا
هنادي / حاضر هطلع البس
سعدية/ ومالها هدومك دي
هنادي /عايزاني اطلع بهدوم البيت
سعدية/ معاكي حق. ..البسي وتشيكي كده يمكن تلاقي عريس هنادي/ عريس ايه ياامه انا هكمل تعليمي الأول
سعدية/ بس اعملي حسابك مش هتدخلي غير صنايع ابوكي هيروح معاكي بكره المركز علشان يقدملك في المدرسة اللي هناك
هنادي وهي طالعه اوضتها بحزن/ ماشي ياامه اللي تشوفوه
………………..
هنادي لبست وخرجت وفي طريقة لبيت خالتها صفيه
فتحي ابن عمها يقابلها/ ازيك يا هنادي
هنادي/ الحمد لله
فتحي/ رايحة فين
هنادي /رايحة عند خالتي صفية
فتحي/ ومش بتيجي عندنا ليه
هنادي/ انا بروح لخالتي واقعد مع كامليا هاجي بقي بيتكو اعمل ايه كلكو ولاد
فتحي/ تقعدي معايا يا بنت عمي
هنادي /اقعد معاك؟!
فتحي /بلاش أقولك تعالي نقعد في الغيط محدش هيشوفنا
هنادي بضيق/ أظن عيب لما تقول لبنت عمك كده انا ماشيه
………………..
توصل لحد باب بيت خالتها تخبط علي الباب
علي بالداخل/ تقفلي علي سيرة ابن اختك دي لانه ندل وميستهالش اللي عملناه معاه
صفيه/ طب وأختي ذنبها ايه
علي /ياوليه انتي مش صعبان عليكى بنتك اللي هارية نفسها من العياط جوه دي ايه عايزة تبدى اختك عن بنتك
الباب يخبط
صفيه /طب اسكت دلوقتي اما اشوف مين علي الباب
تقرب صفيه تفتح الباب تتفاجأ ب هنادي
علي بسخرية / أهي اخت المحروس جات اهه
تغمز صفيه لعلي/ ادخلي يا هنادي يابنتي
هنادي/ معلش ياخالتي بس امي كانت بعتاني ليكي عايزة تقعد معاكي شوية
علي بضيق/ وامك متجيش ليه
هنادي/ أصلها مشغولة شوية
علي/ وعايزة خالتك بقي تروح تساعدها زي مكانت عامله بنتي خدامه ليكو وياريته طمر فيه الندل بكره يشوفه في أخته
صفيه/ وهنادي ذنبها ايه بس ياعلي
هنادي / هو في ايه ياخالتي اني مش فاهمه حاجة
علي بانفعال/ روحي قولى لامك خالتي وبنتها بطلوا خدمه خلاص في بيتك والمحروس ابنها لو كان آخر عريس احنا مش عايزينه يابنت كامل
تخرج هنادي ببكاء
صفيه/ ليه كده ياعلي البت معملتش حاجة علشان تقولها كده
تلبس صفيه حجابها علشان تخرج تلحق هنادي
علي/ بتعملي ايه يا صفيه
صفيه / هطلع ألحق البت قبل متوصل لأمها
علي /طب عليه ال
صفيه تقعد/ خلاص ياعلي قعدت اهه
……………..
هنادي ماشية بخطوات سريعة بتعيط من كلام جوز خالتها ليها
هنادي ماشية بسرعة وخارجة من الشارع اللي فيه منزل خالتها تتفاجأ بعربية تفرمل بسرعة قدامها توقع هنادي علي الأرض
يخرج الشاب من العربية
تقوم هنادي تنضف هدومها وبغضب/ مش تفتح لما مبتعرفوش تسوقوا بتركبوا عربيات ليه
طارق/ انتي اللي غلطانه وكمان بتتكلمي
هنادي/’انا اللي غلطانه؟!. …ولا انتوا علشان راكبين عربيات مش شايفين الناس اللي ماشية علي الأرض
طارق/ علي العموم انا اسف
يقرب محمود ابن عم طارق
محمود/ اما انتي بت لسانها طويل صحيح غلطانه وكمان ليكي عين تتكلمي
هنادي/ انا لسانى طويل انت اللي قليل الأدب
طارق /’خلاص يا محمود محصلش حاجة بنت صغيرة بردو مش فاهمه
هنادي بغضب/’مين دي اللي صغيرة؟ !!!…وانت بقى الكبير العاقل
محمود / البت دي لسانها طويل سيبني اقطعولها
هنادي /نعم! …وريني كده هتقطع لساني ازاي
طارق/’خلاص يا محمود عيب كده
احنا آسفين يا شاطره اتفضلي بقى ارجعي لابوكي علشان ميقلقش عليكي
محمود/ هههههههههههههههه
هنادي تتركهم وتمشي وهي غضبانه
طارق/’وحشني ياابن عمي
محمود/ وانت اكتر ازيك اخبارك أيه
طارق / الحمد لله ….اركب اوصلك في طريقي
محمود/ لا ياعم انا هروح معاك طالما لسه جاي يبقي مرات عمي عامله المحمر والمشمر النهاردة واني بقي عازم نفسي عندكو
طارق/ تشرف. ..اركب بقي علشان نرمين عماله تتصل
محمود/ طبعاً تلاقيها قلقانه عليك
طارق أثناء الطريق /’متعرفش البنت دي بنت مين في البلد
محمود/ تقصد مين البت أم لسان طويل
طارق /هههههه ياابني عيب عليك تلاقيها بس مخدتش بالها
محمود/’تلاقي أبوها مديها حتة علقة ومش شايفة قدامها انت مش شايف عينها حمرا من العياط ازاي
طارق/’بصراحة صعبت عليه وانت كمان زودتها معاها اوى
محمود/ بصرف النظر عن كلامك المصري اللي مش بقي فيه حاجة مننا بس دي بت غلاطه اوي وضايقتني
…………
في منزل كامل
تفتح سعدية لهنادي وتتفاجا بملابسها المتربه
سعدية/ يالهوي مين عمل فيكي كده
هنادي /وقعت علي الأرض وانا ماشية
سعدية /ومالك كده انتي معيطه ولا ايه
هنادي /هو وائل عمل ايه مع خالتي وجوز خالتي ياامه
سعدية/ ليه يابنتي في ايه
هنادي/ جوز خالتي بهدلني وسمعني كلام خلاني اطلع من بيتهم أعيط
سعدية/ ياريتني مبعتك انا مش كنت أتعرف إن وائل قالهم حاجة هنادي / هو وائل قالهم ايه
سعدية /اخوكي هيتجوز بت من مصر
هنادي/ ايه! !!…طب وكامليا ياامه
سعدية/ هعمل ايه يابنتي مش بأيدي حاجة اطلعي غيري هدومك زمان ابوكي راجع من الغيط
………..
في منزل العمده حامد
نرمين / ومش ادبت البت دي ليه ياطارف
طارق /ياجماعة الموضوع بسيط ميستهلش كل اللى انتوا عاملينه ده
محسن /انا لو كنت معاك كنت علمتها الأدب بنت مين دي يا محمود
محمود/ مخدش بالي منها أصلها صغيرة مش كبيره يعنى
سعيد/ هي البلد دي كلها عايزة تتربي
العمده حامد/ مفيش غيرك عايز يتربي ايه نسيت انك من البلد دي ولا ايه
محسن / سعيد عنده حق ياابه
العمده / ايه ياولاد العمده هتتجبروا علي الناس ولا ايه
الحاجة أمينه / المهم ياابني. ..حمدا لله علي سلامتك
خلصي يارسمية الأكل وهاتيه يلا
محمود/ آه ياجماعة شهلوا كده انا واقع من الجوع
نرمين/ انت دايماً كده جعان وطفس
تقرصها الحاجة أمينه
نرمين لطارق/ علي فكرة صباح وكوثر كانوا عندنا النهاردة وبيسلموا عليك
طارق/ بجد. ..دول واحشني اوى هبقي اروحلهم اشوفهم وكمان العيال واحشني اوي
العمدة حامد/ ممسكتيش فيهم ليه ياحاجة علشان يتغدوا معانا
الحاجة امينه/ صباح مرضيتش ياحاج وكمان جوزها متخانق معاها
محسن /تاني هو مش هيبطل تلاقي الهباب اللي بيشربه ده هو اللي لحس مخه
وينظر لسعيد اللي يرتبك
سعيد / متخلف ياهدي انتي وترميم اومال
تيجي شوق
شوق/ خلاص الأكل جهز ياابن عمي
العمده حامد/ انا هقعد معاه وشوف ايه حكايته
الحاجة امينه/’حكايته إنه عايز يتجوز علي بنتك
محسن / وقعته مهببه ازاي يعني عايز يتجوز عليها اومال لو مكناش ولاد عم كان عمل ايه
العمده حامد/ هشوف حكاية الجواز دي كمان
ينزل طارق بعد مغير هدومه / إيه ياجماعه الغدا لسه مخلصش انا وقعت من الجوع خلاص
اومال فين محمود
الحاجة امينه/ البركه في اختك كسفته وخد بعضة ومشي
……………….
في القاهرة
في مصنع سمير الحسيني
بثينه / صباح الخير ياباشمهندس
وائل / صباح الخير جايه بدري يعني
بثينه / الأول قولي كلمت باباك في موضوعنا
وائل / متقلقيش كلمته وكله تمام
بثينه/ انا مش عارفه اقولك ايه
وائل / متقوليش حاجة المهم الجواز يتم وبس
بثينه/ يعني علي نفس الميعاد اللي اتفقت فيه مع بابا ولا في خلاف
وائل / نفس الميعاد المهم زي مااتفقت معاكي الشقة هتكون بأسمى
بثينه/ الشقة والعربية وكمان مرتبك هيزيد طبعاً ماانت هتكون جوز بنت صاحب المصنع
وائل / انتي اللي هتبقى مرات الباشمهندس وائل كامل
وبلاش جوز الست دي
بثينه / انا مقولته كده انا كنت أقصد
يقاطعها وائل / المهم دلوقتي تاخديلي ميعاد من والدك علشان والدي جاي الاسبوع الجاي علشان نتمم الخطوبة
بثينه/ أوك هكلمه
……………
في منزل كامل
سعدية/ يعني ايه يا كامل انت موافق علي اللي ابنك ناوي يعمله
كامل/ ولو موافقتش يعني تفتكري ابنك هيرجع عن اللي في دماغة
سعدية/ والبت الغلبانه اللي كسر قلبها دي ذنبها ايه
كامل/ إن شاء الله. ..هيجيلك اللي احسن منه
سعدية /اني داعيه عليه من قلبي علشان خاطر المسكينه اللي عشمها وبعدين يسيبها كده بعدما الناس كلها عرفت إنها مخطوبة ل ابن خالتها يوقف حالها السنين دي كلها
كامل/ مش تدعي عليه يا سعدية دا مهما كان ابنك ومش هيهون عليكي بردو
سعدية/ يلا أهو في حاله واحنا في حالنا واعمل حسابك انا مش رايحة الخطوبة ولا الفرح علي الأقل علشان خاطر اختي
كامل/ قفلي علي الموضوع وهاتيلي الجلبيه من الدولاب خليني اروح أقدم للبت في المدرسة
ينزل كامل تحت يلاقي هنادي قاعدة وايدها علي خدها
كامل/ مالك يا هنادي
تقبل هنادي يد ابيها
هنادي/ صباح الخير ياابه
مش يلا علشان مش نتأخر اكتر من كده
كامل/ بس انا شايفك مش مبسوطه
هنادي/ اللي تشوفه ياابه
كامل/ انا عارف انك نفسك تدخلي ثانوي
بس يابنتي انتي عارفة مصاريفها كتيرة واحنا علي قدنا اللي اصرفة في علامك اجهزك بيه
هنادي/ جهاز أيه ياابه انا لسه صغيرة
وبعدين وائل بيشتغل وممكن يعني
يقاطعها كامل/ اخوكي من يوم مشتغل في مصر مصرفش جنيه واحد علي البيت وانا مش عايز منه حاجة مصاريف علامك لحد متاخدي الدبلون وتطلعي من هنا علي بيت عريسك مسؤل مني اني سامعه ياهنادي ومش عايزك تقولي الكلام دا تاني ابوكي لسه عايش يابنتي
هنادي تحتضنه/ يطولنا في عمرك ياابه
كامل/ طيب يلا علشان مش نتأخر
في الطريق
هنادي / مين هيوصلنا ولا هنركب من علي الطريق
كامل / فتحى ابن عمك هيوصلنا وهو اللي هيبقى يوصلك بعد كده
هنادي/ مبلاش فتحي ياابه ابقي اركب من عفاف ورنا هما كمان هيقدموا في نفس المدرسة
كامل/ لأ مش تركبي مع حد غريب يبقوا يركبوا معاكي في عربية عمك
يوصلوا لبيت عادل شقيق كامل
فتحي قاعد في العربية يلمحهم ينزل ببتسامة
فتحي/ صباح الخير ياعمي. ..صباح الخير يا بنت عمي
كامل/ صباحك نادي يا فتحي يلا علشان مش نتأخر
تنظر هنادي لفتحي بضيق / يلا ياابه
…………………
في أرض العمدة
محسن / شايف الأرض دي كلها أهو انا وابويا اللي كبرناها ورعناها مكنتش بتجيب محصول بس بدماغي بقي خليتها أرض عافيه وبتجيب محصول اكتر من الاراضي اللي جارنا
طارق/ واضح فعلاً. ..المحصول. .ماشاء الله. ..مفيش بور في الأرض
محسن بمكر/ ماهو انا بقول لابويا يديني حتة الأرض دي ازرعها لحسابي وسعيد ياخد الأرض التحتنيه مش راضي
طارق/ والبيت واخواتك البنات انت عارف إن ابويا بيوزع المحصول بتاع الأرض عليهم وعلي البيت بعد ميطلع الزكاة
محسن/ وهما اخواتك البنات كانوا تعبوا في حاجة ولا جوز واحده فيهم قال ماراح اشوفهم بيعملوا ايه واساعدهم
ولا اختك نرمين اللي عماله تصرف يمين وشمال من تعبي وشقايه انا وسعيد ليل ونهار في الغيط نكري علي انفار وأوقات نشتغل معاهم علشان نخلص
طارق/ عارف يااخويا انكو بتعبوا بس يعني
محسن يقاطعه/ بص ياطارق يااخويا من الاخر كده وهجيبها علي بلاطه بعد عمر طويل اللي تعب في الأرض دي هياخد اكتر من الباقي يعني انت ونرمين اتعلمتوا وانت معاك شهادة بتشتغل بيها هتاخد زينا اللي مكملناش علامنا وطفحنا الكوته في الأرض دي
طارق /في ايه يا محسن انت بتكلمني كده ليه
محسن/ ماهو اللي بيلبس هدمه نضيفه ويرجع من شغله أيده نضيفه مفيهاش إلا نقطه حبر مش هيتساوي باللي بيرجع بهدومه مرتبه وأوقات بتبقى لامؤاخذة فيها طين ولا متبهدله من البهايم
طارق/ خلاص يا محسن موت أبوك وبتقسم دلوقتي علي العموم الأرض عندك اهه ابقي خد اللي انت عايزة
تركه طارق وخرج من الأرض
…………..
كامل وهنادي راجعين من المدرسة
كامل/ مش كنتي كملتي مع ابن عمك لحد البيت
هنادي/ لا ياابه أهو همشي معاك شوية
كامل/ طيب انا هحود لغاية الغيط أشقر عليه وروحي انتي البيت علشان أمك متقلقش عليكي
هنادي /مش كنت جبتلك تليفون علشان لو امي احتاجت حاجة تتصل بيك تجيبهالها واحنا هناك في المركز
كامل/ دا انا كده عايز أجيب تلفون ليه ولامك وليكي
هنادي /ههههههههه
كامل/ هجيبلك تلفون قبل متروحي المدرسة علشان ابقي أطمن عليكى
هنادي/ ههههه ومتنساش تيجبلك واحد كمان
كامل/ هههههه طيب يا لمضه علي البيت طوالي لا توقفي مع حد ولا تكلمي حد يعني متروحيش عند خالتك
هنادي ماشية في الطريق الزراعي للبلد في طريقها للبيت
توقف فجأة وتصرخ
ينزل الشاب من علي الحصان
هنادي تنظر له بضيق /أظن اني المرادي اللي غلطانه صح
طارق/ انا آسف انا المرادي اللي غلطان ماخدتش بالي
هنادي/ انت مستقصدني يا جدع انتا
طارق/ هههههه لا ابدا دي كلها صدف
وانا آسف كمان مره
هنادي/ وانا قبلت اسفك وسع بقي علشان اعدي
طارق/ ممكن أسألك سؤال
هنادي /لا مش ممكن
طارق / انت بنت مين في البلد
هنادي تتركه وهي تبتسم في داخلها
طارق بصوت عالي/ مردتيش يعني
تسرع هنادي في خطواتها وتبتعد عنه حتي تصل أمام منزل عمها عادل
طارق يركب الحصان ويسرع نحوها / طيب انا اسمي طارق انتي اسمك ايه
هنادي /لو ممشيتيش من هنا هنادي علي ولاد عمي يتصرفوا معاك
يخرج فتحي من بيته
فتحي/ في ايه ياهنادي.
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية دوار العمدة)
