رواية هلع الفصل السابع عشر 17 بقلم آية
رواية هلع الجزء السابع عشر
رواية هلع البارت السابع عشر
رواية هلع الحلقة السابعة عشر
طلعت من المطبخ لقيت ربيع يلبس في كندرته بيطلع
سما >> عندي معاك كلام راه
ربيع >> امتى ما تبي
سما>> انت طالع توا ؟
ربيع >> لو ما فيش عندي شغل وتحقيق حنروح فالليل
سما >> خلاص تمام | كان خاطري تقعد معرفتنا احسن من هكي بس خوك خربها امس 🤦🏻♀️
ربيع>> متعود عليه 😂
طلع ربيع وانا خشيت لقيت رسلان راقد ع كنبة الصالة ، لما نقعد قاعده يقعد يسحون بيرقد فالدار ولما نسيبها له واسعه يرقد فصاله
مشيت عنده وكان شكله وهو راقد ولا كأنه الشخص لي قالب الدنيا امس وطالق لسانه
مشيت خذيت دبش وتوضيت وصليت وطلعت لقيته واعي ماعبرتش
خشيت للمطبخ درتله قهوة عشان انا محترمه ومسكت تلفوني وحطيت ع المسجات لقيت روحي دازه مسج المراد بس مش انا الي دازته ، عرفت انه رسلان دروحه رد عليه يا شريني هاه انا مش معدل 😪
رسلان>> القهوة ليا ؟
سما >> لو تبي يعني
رسلان>> نحسابك درتي الروحك
سما >> لا اطمن مش حقوده للدرجة هذي
رسلان>> بنطلع للشركة انا تبي حاجه ؟
سما >> لا | رسلان
برم عليا>> نعم ؟
سما >> انت كنت لوطا امس ؟
رسلان ضحك>> لا ليش
سما >> مش عارفه حسيتك لوطا واخرى حكيت معايا بس مافهمتش شن خلاني نحس هكي
رسلان>> بلكي حلمتي بيا
سما >> بلكي عشان ضايقت علمي فالواقع جيتني حتى فالحلم “وابتسمت ب استفزاز”
رسلان >> اهم شي ديما حواليك
طلع رسلان وانا اقسم بالله الراجل هضا معش فهمته
نزل لوطا ولقاه باته
عمي >> مازلت ما كملتش كلامي معاك
رسلان>> خلاص حصل خير 😐
عمي >> احسب حساب كلمتك قبل ما تقولها
رسلان >> حاضر حاضر معش ح ندوي بكل
عمي >> مانش واخذين بنت الناس من الشارع راه البنت كانت بتمشي الهلها ومن حقها
رسلان ما بش يكثر كلام مع باته عشان عارف انه ح يتهزب >> حاضر حاضر
خش باته وهو طلع
اما انا كنت مخنوقه بكل ماخطرش في بالي غير ميرا اختي هي الوحيده لي ح تحس بيا مسكت تلفوني ورنيت عليها ردت على طول
سما >> غريبة واعيه
ميرا>> طلع موسى فالصبح ونضت من تخبيطه معش جاني نوم
سما >>اها شنجوك باهي انتي
ميرا>> تمام مافيش جديد
سما سكتت شوية مابتش تضايق اختها
ميرا على طول حكت>> سما احكي شن بتحكي نعرفك راه
سما تنهدت>> تعاركت امس مع رسلان عركة كبيره بكلل وخشو فيها هله
ميرا بخوف>> ياساتر شن فيه
خذيت نفس وقعدت نحكي لها شنصار
سما>> وبس توا كيف ركبت وهوا ناض طلع للشركة
ميرا>> انتو الاثنين اغبى من بعضكم ، لا انتي همك لولي انا نعرفك كويس ولا هو همه مراد انتو دايرينهم شماعه المساكين عشان تعلقو عليها عصبيتكم و استفزازكم البعضكم بسسس، ماحد لاقي في شن ينفجر الا السبب التافه هضا لانكم مش فاهمين بعضكم و مش عارفين كيف تصرفو مع بعضكم ف لا انتي قادره تخشي حياته وانا نعرف انك مش مفكره في شي توا غير الهم لي انتي فيه والقضيه بس هضا كله يآثر عليك والدليل عركتكم امس
سما>> مش فاهمه والله علي قد ما عيطنا امس علي قد ما اني نايضه اليوم ماعنديش نيه نحكي ولا اناقش وهوا اكيد خاف من باته مش ح يحكي
ميرا>> يبقي خلاص ماتفتحيش الموضوع مشيه عادي لانه ماحد فيكم غلطان انتو الاثنين تسبلو علي بعضكم
سما >> ان شاء الله خير، شن داير معاك موسى
ميرا>> نستاهلها ليا ساعة لساني نشل وفالنهايه تسألي علي موسى تقول هو خوك
سما ضحكت>> لاني عارفتك ام لسان ومستفزه وعارفه موسى كيف الريشه معاك
ميرا>> اي ريشه هضا لما يفصل انسييي خلاص
سما>> تستاهلي 😂
ميرا>> ياحيوانه خليني نمشي نرقد حسني نعست
سما>> عدي باي
صكرت من ميرا وحطيت التلفون جنبي وانا متريحه شويه بعد ماحكيت
//
//
عند البنات
بدت سالمة في التدريب فالصيدلية
موسى>> يعني انا نفتكى من توصيل البنات ونقول جت عطله تبديلي انتي
سالمة>> قلت البابا رايح تمبال من لما تقاعد من الشركه معش لا يشيل لا يجيب
موسى>> هيا نحطك وبنمشي للشركه تيح معايا برا
سالمة>> خلاص لبست بعدين المكان قريب خلوني نمشي علي كرعيا
موسى>> تبيلك قصة لسان
سالمة>> طلعت هاه 🤦🏻♀️
ركب موسى للسيارة و سالمة وراه
سالمة>> صباح الخير
تيح>> صباح النور ، مش تخرجتي ولا طلعت ماده اخرى😕
موسى ضحك 😂
سالمة>> ندرب في صيدليه 😒 وانت عليش تضحك
موسى>> لا شي 😂
تيح>> مش قصدي والله😂
موسى >>لا عادي اصلا حاجه متوقعه
سالمة>> عارف اخر مره توصلني انت وياه 😒
موسى>> من بيشيلك امالا
سالمة>> قتلكم نمشي علي كرعيا
رفع تيح حاجبه وكان باين عالمرايا وموسى مركز فالطريق ، سالمة بحتت فيه ورفعت حواجبها الاثنين ، ابتسم ونزل عيونه
موسى>> وصلنا ، امتي تكملي ؟
سالمة>> عال ٢
موسى>> مرات نخلي احمد يجيك
سالمة>> خلاص تو نكلمه
موسى>> رد بالك اه
سالمة>> حاضر
نزلت للصيدليه
تيح>> تو امان هنا بروحها ؟
موسى>> لا هي صيدليه شور واحد صاحبنا ومعاها بنت ثانيه جوا
تيح >> بنات بروحهن
موسى>> فالمنطقه و صاحب الشغل اصلا فاتح الصيدليه جنب حوشهم
تيح >> باهي ان شاء لله خير
موسى >> كنك 😒
تيح>> نسأل بس 😪
//
//
عند البنات كانن رندة وروان يهدرزن بما انهن هنا الاثنين الفترة هذي عاطلات
رندة>> بكرا لازم حد يمشي يجدد قيدي
روان>> اكيده ح يمشي حد يديرهن لنا وينزللنا المواد
رندة>> تو نشوف احميدا كان فاضي بكرا | انتي شنصار معاكي
روان>> في شنو؟
رندة>> ف اسوره 🫢
روان>> كرهتيني فالاسم 😂 ماصار شي
رندة>> تو فهميني انا مش متبعه القصة من الاول يعني هو معجب ولا ينابش ولا شن
روان>> تصدقي انا بروحي مش فاهمه نراجي في سما ترد عليا عشان نفهم
رندة>> مشعارفه ليش نحس انه هضا لي نصيبك
روان>> وانا نحس انه صاحب الجاكه لي ترقدي وهي جنبك نصيبك
رندة>> اي جاكه؟
روان>> تحسابيني مش فاطنتلك
رندة>> ع ربيع ؟
روان>> ايوه
رندة>> تبي الحق ؟
روان>> قولي
رندة>> هو اي نعم عاجبني يعني ، بس اول شي فرق العمر حسيته شوي واجد مع اني مانعرفش عمره
روان>> هو اكبر من رسلان؟
رندة>> اه هكي قالت سيمو ، رسلان تهيالي ٣١ ولا ٣٢
روان>> عليش نتقزو تو بعدين نسألو سيمو 😪| باهي وغير العمر شن فيه؟
رندة>> فيه القضية والمنظر اللي شافني بيه ، في راجل ح يشوف الوحده شافها بمنظر زي هكي ! لا وخش عليا وحقق معايا وسألني لو انه الحقير هضكي لمسني او لا ” وعيونها دمعن” على قد ما كانت خشته عليا وقتها امان بالنسبه ليا بس لما الموضوع قلب شخصي وقلبي قعد يميل له نحس في ياريته اللي صار ما صار ياريت تعرفت عليه في ظروف احسن
روان>> تو عليش بس اضايقتي خلاص انسي السيرة هذكي وصكري عليها ح تبدا الجامعة وتبدي حياتك انسيه و معش تخافي منه ولا من اللي صار انتي ما غلطتيش في شي
رندة>> يعني حتى بعد حد يعجبني يطلع مرتبط بمأساة حياتي
روان>> ليش ما تشوفيش للموضوع بطريقة اخرى؟
رندة>> اخرى كيف يعني ؟
روان>> ربي يهيأ فالاسباب وربيع محقق كيف ممكن ح اطقي فيه لو ماكانش صار اللي صار ؟ يعني ربي حط في طريقك زياد عشان يدير فيك هكي وينقذك ربيع بيش اتعرفي عليه
رندة>> بس انتي تعرفي تفكير الشباب كيف
روان>> ربيع محقق وياما مارات عليه قصص يشيبن الراس اصلا ف قصتك هذي وخوفك طلعيهن من راسك بكل
رندة>> مش عارفه نخاف نقرب نندم
روان>>اسمعي هو مش بعيد تقدري تمشي السيمو ف اي وقت وتشوفيه و لو هو يبي يدير اي خطوة يقدر يديرها وبالنسبة الفرق العمر ، ف خلاص من قبل كنا نشوفو فيك صغيره بس توا انتي كبيره انتي الي تقرري
رندة>> قولتك هكي
روان>> معش تفكري خلاص
منى >> انتن هنا ، امي تضبحلكن
روان >> هي يا ماما خاشين
خشت روان الخوخه و رندت خذت نفس وحاولت اطمن نفسها ولحقتها
خوخه >> وين كارسات كنكن ما تهدرزن معايا
منى >> شكله مش عاجبهن تهدريزنه انظر على شن يهدرزن
روان ضحكت>> على شن بنحكو يعني الجامعة بتبدا ونبو دبش
منى>> انتي ما تشبعيش من الشرا
خوخه>> خليهن يشرن هضا وقتهن
رندة>> والله ياخوخه لولاك انتي مانعرفش كيف كنا عايشين معاهم
خوخه ضحكت
منى >> خزي عليكن عدن ديرن لنا قهوة وتعالن
رندة >> هي
على نزلت فاطمة من فوق
رندة>> ماما نحسبك في القهوة
فاطمة>> ديريلي اهو باتك نازل حتى هو
رندة>> باهي
فاطمة>> ما كلمتيش خوك اليوم
رندة>> لالا روح بسالمة و عدا
خوخه >> خليهم براحتهم يا فاطمه
فاطمة سكتت وخشت قعمزت حذاهم و نزل عاشور الهم من فوق
رندة>> ماما كان تلقى توا ترن وتهزب ميرا😂😂
روان>> خايفه على موسى عاد ولدها الوحيد😂
رندة>> لو تعرف كيف موسى يحب ميرا بس را والله ما تخمم فيه بكل
روان >> اهو عاد تشوف فلي برا بس ماتعلمش بقلبه شن فيه
رندة>> خطرها ماصارش جديد مع اسير؟
روان >> مش عارفه من بعد يوم الجامعة يلي حكيتلكم عليه معش صار شي ولا سما قالت لي انه سال رسلان
رندة>> قصة
روان>> عادي يعني على اساس عمره في حد قعد معايا ديما
رندة>> ما هو ماتقعديش تعطي فيا نصائح واديري عكسهن
روان>> القهوة بتفور طفي ونحكو بعدين
دارن البنات قهوة و لما انظم عاشور للجلسة هربن للجنان عشان ح يكملها لهن اسأله و يحرق دمهن😂
//
//
في الليل كنت اليوم هضا نراجي في ربيع وكل شويه ننزل نشوف لو جا ولالا ، لحد ما فطنتله خش
نزلتله على طول
ربيع>> مش ح تعطيني فرصة 😂
سما >> لا
ع خشت رسلان
ربيع >> انا محقق بس مراتك بتفتح معايا تحقيق
“خشينا للصالون كنا نحن الثلاثه ”
رسلان>> قعمزي
سما>> لا هكي متريحه
ربيع>> شن تبي تعرفي ؟
سما >> اول شي ملف بابا من امتي عندك ؟
ربيع>> استلمته مؤخرا يعني لما كانت القضية فالبداية انا ماكنتش نشتغل عليها كنت ماسك قضية ثانيه ، بعد ما جت لجنة التفتيش مسكت انا الملف
سما >> وعمو احمد من امتى يعرف انك خو رسلان ؟
ربيع>> احمد يشتغل معايا بس هو فقسم وانا فقسم لما جاني اول مره وحكى معايا ماكانش يعرف اني خو رسلان خطيبك وقتها و عشان كان مهتم بملف القضية من الاسم والعيله وهكي ومن كثر ما خلطنا فبعضنا هو عرفني وانا عرفته ، وقتها صارت قصة رندة بنت عمك
سما >> باه ليش ماقلتوليش وقتها ؟ “وبحتت في رسلان وخبطت على راسي ” عشان هكي يومها انت دزيتلي الحمدلله على سلامة رندة ! ولما سألتك قتلي رنيت على مش عارفه من وهو قالي ”
رسلان>> ايوه لما قلتيلي القصة رنيت ع ربيع ووقتها قالي صاير كذا وكذا وقعدت معاه لحد ماوصللها
سما >> وليش ما قتلي وقتها انه خويا محقق وسألته؟
رسلان>> ماكنتش نبي نشغل بالك عشان كنتي متنرفزه يومها وعشان لما حتعرفي انه خويا نفسه الي ماسك ملف قضية باتك حتقربي مني لسبب هضا وانا مانبيش هكي ! منبيكش تقعدي معايا عشان بس في سبب معين ووقت ما يكمل السبب تعدي
غمضت عيوني وكنت نحاول نستوعب ، رديت بحتت في ربيع>> يعني يوم الفاتحه انت كنت قاعد ؟
ربيع>> ايوه الدفع كان عندي شغل والفاتحه جيت و ع فكرة انا راه مانقعدش فالحوش يعني ماكنتش نتهرب منك ولا كان حد يدس فيا عليكي | عادي الموضوع بس انتي خلط عليكي التفكير
قعمزت ع الكرسي >> خليني من هضا كله ! احكيلي قضية بابا من اولها
ربيع بحت في رسلان
رسلان>> احكي !
كنا مقعمزين مقابل بعضنا انا وربيع و رسلان واقف عند الباب يسمع فينا
ربيع>> يوم العيد ، وقت روح باتك للحوش بعدها تقريبا بساعة توفى بحسب تقرير الطب الشرعي ، يعني ما لحقش يرقد زي ما قلتو انتو في اقوالكم انه كان مروح هو وعبدالله خوك عشان يتريحو ، في حد خش للحوش و يا اما باتك اللي فتحله يا اما كان معاه المفتاح لانه مافيش اي محاولات للاقتحام
كنت نسمع في ربيع و شابكه يديا في بعضهن و نتخيل في كل لحظة في خشت بابا في تفاصيله لما يروح للحوش يحط المفتاح ويعلق تلفونه فالشحن و يولع المكيف و يخش لازم ياكل حاجه عشان السكر
قرب رسلان من جنبي ومسك يدي وبحت في عيوني >> لو ماتبيش تسمعي خلاص
ضغطت على يده >> لا بنسمع
ربيع كمل كلامه>> في التقرير متاع قسم البحث الجنائي ما كانش فيه ولا دليل غير نوعين كندره مختلفات ، انقتل باتك اول شي والواضح انه جاته بغدره عشان ما فيش مقاومه ، والواضح انه القاتل تفاجىء بوجود عبدالله خوكي لانه طريقة قتلته واضحه انه القاتل كان متفلوج ويبي يطلع بسرعه عشان هكي طعنه كم طعنه بغباء وطلع
سما >> خلاص معش نبي نسمع تفاصيل الحادث ، قولي شن الجديد
ربيع>> مافيش جديد والله الملف علي نفس الكلام له سنتين ، حاولنا بكل الطرق نعرفو سألنا كل شخص يعرف باتك ، ماكانش في عنده عداوات ! والمشكله انه مافيش شهود ابدا … بس اطمني انا واحمد قررنا نمشو للحوش ونبدو نشتغلو من جديد
سما >> امتي ح تمشو ؟
ربيع >> مازال ما اتفقتش | مازال في حاجه بتسألي عليها ؟
سما >> لالا خلاص
رسلان مازال ماسك يدي >> انتي كويسه
سما >> كويسه كويسه
رسلان >> خوذي نفس بس
ربيع >> ما تقولش هضوما اللي امس كانو يصافقو بكل “وضحك”
رسلان>> بتطلع ولا نصافق معاك
ربيع>> طالع شدخلني ان شاء الله حتى تضبطها😪
رسلان >> ربيع
سما>> يدير هكي فالتحقيق ؟ “وضحكت”
رسلان>> تخيلي انه وسط التحقيق يشفط اشر من هكي 😂 بعدين ضحكتك سمحه ديما اضحكي ❤️
قعدت نبحت في عيون رسلان ونسأل في نفسي ، ليش الشخص الصح ديما يجي فالظروف الغلط ؟ ليش رسلان ماكانش قاعد وبابا وماما قاعدين ليش كل شي لازم يدمر و قلبي يتقطع عشان يجيني واحد زيه ؟ كيف الدنيا هكي صغيره عشان نجوز شخص يقعد خوه ماسك ملف قضية بابا !
رسلان>> وين سرحتي ؟
سما >> فيك
رسلان>> ناعليا ❤️
سما >> بلا سماطه نحن مازلنا متعاركين راه
رسلان>> صح نسيت 😒
//
//
في الليل عند موسى كان عند تيح
تيح >> موسى قتلك
موسى>> تيح من مبدري وانت بتحكي لاحكيت ولا وقفت برم
تيح >> تذكر لما حكيتلك على وحده وقتلك نبي نخطب وقتلي وين
موسى>> باهي ؟
تيح>> ماه بطل تدخين عشان نعرف نحكي
موسى>> وهضا الدخان وطفيته بتحكي ولا نطلع
تيح>> قتلك يعني لو عادي وانت موافق اناسبكم
وقال كلمته بسرعه وسكت
موسى>> تيح بتحكي كيف الرجاله ولا نطلع وكأني ما سمعت شي ؟
تيح>> توافق لو نطلب منك اختك
موسى باستعباط>>اي اخت فيهن ؟
تيح >> موسى 🙄
موسى>> سالمة صح
سكت تيح
موسى>> ومن امتى؟
تيح>> ورب الكعبه مافي بيني وبينها حاجه ولا كلمتها ولا حكيتلها ولا بيت ندير هكي الا لما نجي ونحكيلك وانت اكثر حد عارف اني اساسا مش متأمل فالموضوع بس قلت نقولك ولو رفضت هي عادي
موسى>> ماقتلكش لو حكيت معاها ولا لا زي ما واثق فيك واثق فيها بس نقصد امتى بديت تفكر ؟
تيح>> مش عارف مش من يوم معين
موسى>> خلاص ان شاء الله خير
تيح>> يعني شنو ؟
موسى>> يعني ح نحكيلها وان شاء الله خير
تيح>> لو رفضت عادي راه انا مقدر الوضع
موسى>> اقسم بالله قعدتك تغم القلب
تيح >> موسى لو انت بنفسك ما تبيش ف ما تفتحش معاها الموضوع
موسى>> تيح الله يستر بيتك فكني من دوتك العوجه، قتلي طالب اختك وقتلك نشوف البنت مايبيش الموضوع توتر
تيح>> نحكيلك عشان نعرفك انا
موسى>> طالع انا خليك في تكبير الشورخ متاعك
طلع موسى وتيح في راسه مليون فكرة ومليون سؤال
اصعب شعور في العالم لما تقعد حاط آمل في حاجه و تقعد مش عارف لو ح يصير منها ولا لا ! تقعد تراجي في شعور الفشل يجيك في اي لحظة يا انك تقعد فوق يا اما تنزل اسسسفل شي ، وهضا اكبر صراع في الحياة لما يقعد الانسان يصارع في روحه !
تيح له فترة بيدير خطوه يبي يخطب ويبي يحب و يبي يجوز ويبي حد يهتم بيه ويشاركه حياته، بس كان عنده خوف انه لما يقرب ينصد والسبب انه مريض ومش عارف لو مرضه حيآثر بعدين على حياته و يظلم البنت معاه عشان هكي كان عايش في صراع من بداية مرضته وافكاره ما وقفنش.
//
//
روح موسى وكانت ميرا فالمطبخ
موسى >> مازلتي واعيه
ميرا>> عارفني مانرقدش وانت برا نخاف
موسى>> تبي نرقدك ؟ “وضحك”
ميرا>> نبيك تبطل قلة ادب ” ومشت شور الدولاب رفعت روحها بتجيب كبايه”
جا موسى وراها”استغلال الفرص كما يجب ان يكون” 😂 >> القصر هضا قصة
ميرا >> لا بس انت حاط الكبايه بعيد عارفني نشرب فيها ديما
موسى >> باه اهدي
ميرا برمت وجت مقابلته>> ماتبيش تعدي تغير دبشك؟
موسى ضحك>> باهي ديريلي سندوتش ولا ماتعرفيش
ميرا>> موسى خش غير 😒
مشى موسى يغير في دبشه ، وميرا قعدت اتفنن ساعتين علي سندوتش دحي 🤦🏻♀️😂
“هذي انا يابنات بعد نجوز حي علي امي وحي حتى الدحي نعتبر فيه انجاز 😭😂”
موسى >> ميرا ساعتين على دحي
ميرا>> ماه درت سندوتشين ومعاهن عصير
موسى>> لا عليك تعب والله😂
ميرا>> قول شن طعمته
موسى >> تسلم ايديك
ميرا>> احا 😐 مازلت ما ذقته
موسى>> شن الاسلوب هضا “وضحك”
ميرا >> تعلمتها من سما 😂
موسى كلا من السندوتش وقرب منها >> ذوقيه
قربت و كلت وتوترت مابتش تبحت فيه
موسى>> صحه
ميرا >> خلاص كول انا بنخش نرقد
موسى كر يدها >> تعالي هدرزي معايا
ردت قعمزت >> في حاجه
موسى>> تو بنسألك
ميرا>> شن
موسى>> لو تيح جا طلب وحده من البنات يعني ك خطبه وهكي شن رايك؟
ميرا>> جاي يخطب فيا ولا شنو كيف شن رايي ؟
موسى >> عارفه سندوتش الدحي شين ! و انا هبل اللي نحكيلك باهي
ميرا>> خاطري نقول احا بس ح تفصل “وضحكت” نبصرو عاد كمل
موسى >> يعني بطلي بصارة وقوليلي رايك
ميرا>>ماهو يا بيب اسأل صاحبة الشأن اللي طلبها تيح
موسى>> يامن ؟
ميرا>> يا بيب 🫢 وماتفهمش غلط بيب تنقال عادي بس لما نقولك بيبي هذي بروحها
موسى>> بيب بيب الله غالب علينا 😂 المهم طالب سالمة
ميرا>> تحكي من جدك؟
موسى>> والله
ميرا>> عارف انهم حا يكونو خيال مع بعضهم
موسى>>لاحول الله تي مانحكيش علي شكلهم انا نحكي على هم تيح و هل سالمة ترضي بيه
ميرا>> تي سالمة اكثر وحده مناسبه التيح صيدلانيه وتفهم في حالته وسالمة اعقل وحده فينا و غير هكي يعني نحن نعرفوه من زمان وبلا اعصاب الراجل خاش من الباب بطل طروح الرجل الشرقي واختي وهني
موسى>> ما قلنا شي 😒 قولتك نفتح معاها الموضوع
ميرا>> طبعا افتحه من بكرا
موسى>> خلاص ماتحكيش شي تو بكرا وانا موصلها للصيدليه نحكيلها
ميرا >> تمام
موسى>> خشي يا بيب ارقدي ، شكلك نعستي بكل
ميرا>> اه وانت؟
موسى>>نحط التبسي ونخش نرقد
ميرا>> تجي جنبي ؟
موسى>> كيف تعودتي
ميرا هزت براسها وابتسمت
موسى>> نشيل التبسي ونجي
خشت ميرا للسرير وشوي وجا موسى جنبها عطاها بظهره عشان ما يوترهش وغمض عيونه
قربت ميرا منه وباساته ع خده
ميرا>> المره هذي دوري ❤️
ابتسم موسى و رقد ❤️
مستحيل اتخيلو كيف ممكن كلمه وحده من شخص نحبوه قادره انها ترفعنا فوووووق وكيف انه نظرة زعل منه كفيلة بأنها تعكر مزاجنا طول اليوم!
وكان هضا وضع موسى بنظرة بس من ميرا يعيش و بنظرة يموت ، رغم انه مش عارف مشاعرها و لا هي قادره بعد الصراع هضا كله انها اتنازل وتحدد موقفها ومشاعرها بس هو هكي راضي اهم شي هي حواليه اهم شي يشوف فيها كل يوم و يسمع في صوتها و يشوف في زعلها وضحكها ، حتى لو قلبه يوجع فيه منها وعليها بس اهم شي هي معاه
~ كانـت من ذلك النوع الذي لا يُمكن أن تُحب بعدها أبداً، إنها تأتي لتكـون الأخيرة~
//
//
كنت قاعده مع عميمه واستغربنا انه سارة ما جتش اليوم هضا
شوية وخش علينا ربيع >> امي راه راجل سارة دار حادث بس هو كويس الحمدلله
زينب>> كيف ؟؟؟ شن صار حادث شنو
سما >> حادث شن صارله ؟
ربيع >> تي اهدن دهشتني ، حادث بسيط و توا طالع من المستشفي
زينب>> خليني نمشي اكيد سارة مسكينه مشغوله
ربيع >> امي الساعه قريب ١٢ وهو مازال يبو يجبسوله يده اكيد ح يطول ما يروح
بحتت في عميمه>> تو نكلم ساره نطمن منها و بكرا نعدي انا وياك مع بعضنا
زينب >> كلميها النبي اسأليها هضوما ديما يكذبو عليا
ربيع>> هضا لي طلع معاك 😪
سما >> رسلان وين ؟
ربيع >> فالمستشفي معاه
خذيت تلفوني و رنيت علي سارة وكان صوتها شكلها باكيه مسكينه بس قالت لي انه توا كيف خش عليهم و بعد شافاته اطمنت ، سكرت منها وطمنت عمتي
سما >> ربيع نديرلك حاجه تاكلها
ربيع>> شن تعرفي اديري ؟
سما >> دحي 😌😂
ربيع>> يا مينتي على خويا | لا تعشيت مع الجماعه
سما >> ما تقعدش تنفخ فيه بس را يصدق روحه
ربيع>> انتو ديما فاصلين هكي
سما >> هو عصبي بكل
ربيع >> بس طيب بكل والله
ع خشت رسلان >> من الطيب
سما >> جدي الله يرحمه ويغفرله💁🏻♀️
وركبت
ربيع يضحك>> مازلتو متعاركين
رسلان>> هذي ح اتعبني والله
ربيع>> انقنها بطله شكل و طبع
رسلان>> بتلم فمك ولا نخليك تجبس وترقد تلا ولد عمك ؟
ربيع >> الواحد بعد يحق حاجه سمحه يقول انها سمحه عاد 😂 بس تبي الحق ؟ بنت عمها اسمح
رسلان>> شفتهن كلهن مافيش وحده فيهن كيف اللي عندي
ربيع >> تي عدي الحقها امشي
رسلان>> ماشي حتى انا 😌
ركبت فوق وكنت نعسانه اصلا ما راجيتش رسلان عشان كنت متنرفزه منه 😒 خشيت للسرير غمضت عيوني ، وجا هو جنبي عالسرير ” هضا شكله يحسابها حفله كل يوم راقد هنا ”
سما >> عجبك السرير
رسلان>> لا عاجبتني انتي
سكتت معش قدرت نرد وهو سمعت ضحكته 🫢
//
//
ثاني يوم تكى موسى ع سالمة و فتحلها موضوع تيح
سالمة>> تيح دوالك عليا انا؟
موسى>> تي احترمي اني خوك
سالمة>> ما قلنا شي 😂
موسى>> باهي شن قولتك
سالمة>> باه يعني مش عارفه
موسى>> سالمة را دواوي عالتلفون لا بعد الخطبه نزمطها معش حندير روحي الخو الواعر عشان انتي كبيره و عاقله وانا ما نجبركش على شي وعمري ما حاسبتك على قراراتك هضا اللي عندي ف موافقه نديرو حاجه رسميه مش موافقه اعتبري ما صار شي
سالمة>> باهي يعني بنعرف حاجه وحده بس قصة مرضة
موسى>> تيح عايش معانا وانتي عارفه كل شي عليه مرضه راه يبي اهتمام ومش ح يأثر على اي شي في حياته انا اكثر واحد نعرفه وحافظه من بداية مرضته مفتاح بس مش مهتم بروحه وماحدش حواليه يفهمه
سالمة >> وبابا ؟
موسى>> لو انتي موافقه باتك شوري
سالمة بعد دقيقة صمت>> باهي موافقه تمام
موسى بحت فيها واستغرب السرعه>> تحكي جد؟
سالمة>> كيف كنت تبيني نرفض ؟
موسى >> نحسابك بتقولي نفكر
سالمة>> تيح ع قولتك عايش معانا يعني ح تقعد حركه واضحه كان قتلك بنفكر 😂 صح مش هذك العرفه بس يكفي انه صاحبك وواثق فيه و مخششه وسطنا وانت واثق
موسى>> خلاص انزلي بعدين ح نتفاهم مع باتك
سالمة>> تمام
//
//
نضت ثاني يوم متأخر ، كان رسلان نايض وماشي للشركه
خشيت غسلت وصليت ومسكت تلفوني لقيت سالمة دازه عالقروب قصة تيح وهكي و البنات يردن عليها، خشيت وقعدت نقرا في المسجات وفرحانه السالمة
سالمة اكثر حد قريب مني رغم الاختلاف في الاطباع بينا سالمة هاديه وعاقله بكل وديما اي شي يصير تحله بهدوء ماتحبش تزعل حد ولا تحب تشوف حد زعلان ❤️ حتى طريقة لبسها ديما اكثر وحده محتشمه فينا 😂🙊 ديما تحب تلبس طويل وواسع عكسي كنت انا طبعي حاد ومزاجيه وكل شي نحله بالعياط والشياط😂
كملت سرحاني ورديت عليهن فالقروب
سما ” تيّح ما ينرفضش ”
سالمة” حتى انا وافقت 💁🏻♀️ ، بس لازم نحكي معاه ضروري بنفهم وهكي ، عنجد مايحكيش معايا الا بعد الخطبه زي ما قال موسى، انا مانبيش علاقة وحب مش ناقصني بكل اللي جاني من العلاقات كفاني بس برضو لازم نحكي معاه ولو مره قبل ما يسير شي رسمي وننخطب ونفسخ للمره الثانيه ”
سما ” معاك الحق، بس موسى تعرفي الرجاله كلهم هكي مهما كان ف هو صاحبه وانتي اخته وفنفس الوقت تيح اكيد مش حيكلمك من ورا موسى”
ميرا “اسمعي خليها شوري ”
سالمة ” شن ح ديري ”
ميرا”تو نحاول نجيب رقمه من موسى هو من قبل موسى رن عليا برقم تيح بس قالي امسحيه😒”
روان ” را يفطنلك موسى يقتلك”
ميرا” مايديرهش❤️”
رندة” تي وين التطورات كيف صار”
ميرا”تبيلنا تهدريزه ”
سما “خطرها عالتهدريزه راه راجل ساره داير حادث اليوم بنعدي تعالي كان بتساولي ”
ميرا” لاعيب لازم نجي تو نقول الموسى”
سما ” باهي تمام”
روان”سما اخر سوال بس ربيع كم عمره”
سما “قولي الرندة ٣٤ ودزيتلها غمزة”
رندة”تراك واضح واضح😂”
سما “ها روني ما تبيش تسألي ع اسير بالمره”
روان”لا انا نراجي فيه يكلمني كلا السؤال من بعيد هضا لعب عويله صغار😂”
طلعت من الواتساب وانا نضحك على هبالهن على رنت احميدا
سما >> عارف اني رايفت عليك
احمد>> عارف انك احسن وحده وحاديريلي موقف يخليني نطرشق
سما >> شن فيه ؟
احمد>> نبيك تحكيلي مع ضحى
سما >> تبصر قررت خلاص ؟
احمد >> مش قادر نطلعها من بالي والله حاولت نلهي في شغلي نحس فروحي نبيها نبي نسمع صوتها نبي نشوفها قدامي ، تي قعدت كيف العويله الصغار كل مره متحجج بحاجه وماشي شور المستشفي لي تشتغل فيها
سما>> يا فرحت خوخه 😂 المهم قولي توا نرن نقوللها انك تبيها وهكي
احمد>> لالا بس جسي النبض شوفيها لو تبي حد لو في حد في بالها مانبيش نخش نهد وتطلع ماتفكرش فيا
سما >> مع اني متأكده انه مافيش حد بس تو نرن نتأكد ونقولك
احمد >> نراجي فيك | خطرها جاي اليوم عند سيد رسلان بنساول مالك عيب عشان الشباب امس ربيع قالي
سما >> خلاص معناها بلكي نشوفك حتى انا بنمشي غادي
صكرت منه وانا نضحك شن اليوم الي مليان حبّيبه هضا 😂 سالمة خطبها تيح و ميرا قاعده ادافع ع موسى و هضا ران يبي ضحى و رندة تسأل ع عمر ربيع وروان تراجي ف اسير يرن ، راسي داخ في جرت مواضيعهم
خشيت درت مق نسكافيه عشان نصحصح الضحى ، وتوكلت ورنيت عليها | حكينا فالاول عادي وسألتني ع جوي وهكي من بعد اخر مره و بعدها خشيت فالموصوع
سما >> انتي تعرفي عمو احمد طبعا غني عن التعريف هو اللي عرفنا عليكي اساسا
ضحى ضحكت >> ايوه
سما >> المهم انا مش حنكون هبله ونجي نرن عليك فجأه ونقولك في حد فحياتك عشان واضحه
ضحى>> كيف ؟
سما>> لا شكلك هبله كيفي 🤦🏻♀️ المهم احمد يسأل عليكي
ضحى>> يسأل السؤال اللي فبالي
سما >> ان شاء الله اللي فبالك يطلع انه معجب بيك بس عشان لو قلتي يسأل علي حالي ح ننجلط
ضحى”ضحكت” >> لا كيف ما قلتي 😂😂
سما >> باه ها شن رايك ؟
ضحى>> قوليله طولت راه 🫢
سما >> اقسم بالله عمي غبي
ضحى >> دره كبدي وانا نراجي فيه يقول حاجه يرن يلمح اي حاجه مافيش بكل عند ما حلفت معش نرن عليه
سما >> الحمدلله كنت نحساب مجهودي راح هباء
ضحى >> مجهود شنو
سما >> لا شي المهم اسمعي ، مانوصيكش على احميدا
ضحى>> راك تفضحي بيا بس وتقولي اني كنت نرجى فيه
سما >> تي ماعليكي نعرف كيف نحبكها شوري البهارات
ضحى>> يستر الله😂
سما >>مش ح ترقدي اليوم الا وهوا ران عليكي
ضحى >> خلاص ح نراجي 😂
صكرت منها ورديت اتصلت فهمت احمد انه البنت مافيش حد فحياتها و قتله ينجز مايدرهش كبدي، وقعدت ندير في كم حاجه فالحوش بعدها نزلت العمتي وقالت لي نوتي روحي عشان نمشو غادي
لبست بلوزة وبنطلون وبخيت عطر ، وكنت واقفه عالمرايه نسقم في ايشربي
رسلان>> عليك سماحه
بحتت فيه وابتسمت بعدين اذكرت انه متعاركين حولت ابتسامتي>> واتي انت ؟
رسلان>> حجابك ما يتحولش وانتي غادي
سما >> والله فهمت خلاص قعدت حتى بعد ننزل الهلك وباتك وخوك مش قاعدين نلبس فيه مانبيش مشاكل
رسلان>> السروال نتفاهمو عليه بعدين
سما >> خلاص عاد والله كويسه اللبسه مش اوڤر البلوزة طويله لاحظ انك غيرتلي حتى طريقة لبسي سادك
“وهربت من حذاه عشان شويه وكان ح يفصل حيقولي غيريها بكل ”
سيبت رسلان ورايا مبتسم
كملت ونزلت ، رغم انهم قريبين منا بس طبعا رسلان هو اللي وصلنا
نزلت عمتي قدامي
سما >> نازل انت
رسلان>> عيب كلهم هنا
سما >> ماقلتش شي نسأل بس
خشيت بسرعه ولقيت سارة اضبطتها وحمدتلها على سلامة راجلها ، وجاني يزن يجري رفعته وخشيت بيه جوا
وقعدت سارة تعرف فيا على العيله وع ام مالك ، ع جيت ميرا اختي سلمت حتى هيه عليهم كلهم وقعمزت جنبي
ام مالك>> مشاء الله على مرات رسلان
سارة>> شفتي ياعميمه كيف سمحه
لولي >> غير شكلها مازال ما تعرفش انه في اختراع اسمه مكياج بس
ميرا>> لا غير جمالها رباني مش مستحق مكياج سيبناه عاد للي محتاجله
طبست عند ميرا>>فوتيها بس عيب قدام عميمه
صبت لولي وهي طول القعده تعزق كلمه لعند ما علمي ضاق وتنرفزت بكل ومارديتش عليها بحرف ، كانت فالصاله ونحن كلنا قاعدين فالدار لما سمعتها قالت
لولي>> رسلان يبي قهوة قالي ديريلي
ميرا>> هذي شن تحساب روحها معلش ؟
سما >> انا انخنقت بنطلع شويه وردبالك تردي عليها خليها تخرط ماتعبريهش| ساره كذا تعالي
سارة>> ماتعدليش عليها والنبي
سما>> لا والله ما شورها اصلا فايتتها بكل
سارة>> تعالي برا للجنان ، نخش نمد القهوة ونجيك
سما >> باهي
طلعت برا شويه هكي لقيت رسلان طالع من المربوعه لي فيها الرجالة و لولي طلعت من باب المطبخ جايبتله فنجان قهوة
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية هلع)
