رواية هلع الفصل الثلاثون 30 بقلم آية
رواية هلع الجزء الثلاثون
رواية هلع البارت الثلاثون
رواية هلع الحلقة الثلاثون
//
ف يوم الي مشو مع بعضهم للمستشفي اخر مره ، و الكلام يلي حكوه البعضهم … فالليل جا موسى للحوش لقى البنات مقعمزات يهدرزن مع بعضهن فالجنان
موسى >> وينها
روان ابتسمت >> في داري خش
موسى >> ماحد يخش اه
روان >> اوكي 😂
سيبهم ومشى لعندها
سما >> المره هذي يا يطربقو الدنيا يا يتصالحو😂
روان >> تو نعرفو 😂😂 يا يطلع فاصل يا يطلع مبسوط
رندة غمزتلها>> ولا مرات ما يطلعش بكل 😂
روان>> معناها استقبلوني عندكم فوق اليوم😂
سالمة >> هضا الباين 😂
كانت ميرا في دار روان دق الباب و انفتح دغري وخش موسى
ميرا >> شن ادير هنا
موسى >> كيف دارك وانا معنديش العلم
ميرا>> الناس ادق وتراجي يا يقولولها خش يا لا
موسى>> هضكوما الناس ، بس انا راجلك
ميرا تنهدت ووخرت من عند الدولاب وين ماكانت مصبيه>> موسى شن تبي اكثر من هكي
موسى>> نبيك
ميرا وخرت عيونها من عليه وقعمزت على حاشية السرير >> لي يبي حد ما يسيبش و يطنشه هكي
موسى >> انا ما سيبتكش ، انا خليتك تهدي ونهدا
ميرا بحتت فيه >> والفتره هذي كلها معقوله تخليني هكي ؟ كيف قدرت بس حتى لو انا غلطانه بس انت عارف اني ما نقدرش بدونك معقوله تخليني هكي
” وبدت وصلت البكاء”
موسى جا جنبها و مسك وجها بيديه>> شن الهرمونات هذينا انتي كل شويه تبكي ؟ بعدين هبله انتي معقوله تفكري اني نخونك ونشوف الوحده غيرك لا ونشكي منك اخرى والله ما بعقلك
ميرا قربت يدها ومسحت عيونها >> مانعرفش فكرة انك تحكي مع وحده اصلا اين كانت هي من ما نحبش نفكر فيها بعدين قتلك انه هضا مش موضوعي
موسى ابتسم >> وانا اصلا من يوم ما طلعت من عندك هضك اليوم حذفت رقم الدكتوره
ميرا >> معش تخليني بروحي
موسى حضنها >> بطلي بكا يابنتي بس
ميرا >> بكيت اكثر منه وانت مش معايا
موسى >> انا هبل والله بس كنت خايف عليك من عصبيتي لاني تنرفزت بكل من كلامك ومعش عرفت نفصل بكل يعني ما توقعتش تشكي فيا ولا واحد فالميه ، انا ندير اي حاجه الا اني نخون ! انا بنظره ما خنتكش بنخونك ونكلم غيرك كيف جابها عقلك ؟ انتي ما شفتيش روحك كيف كنتي تحكي وكيف قلتي كلام ماقدرتش نتحمله و كان قبلها وجيج العزا و قصة تيح وسالمة و الدنيا خلطت عندي بكل وانتي ما فهمتيش مني
ميرا بحتت فيه وقربت من عنده >> اسفه باهي
موسى >> لالا ما نبيش اسف انا ” وقرب منها ”
ميرا ابتسمت>> انحبك باه
موسى حط يده على وجها>> وانا نموت بدونك وبدون عيونك وانا الي اسف اني قعدت بعيد عليك هكي
ميرا >> موسى روان والبنات
موسى حضنها >> مش تبيني نرقدك
ميرا هزت براسها
موسى ابتسم >> نرقدو هنا اليوم وبكرا نمشو الحوشنا ومعش ح تطلعي منه وانتي زعلانه
ميرا>> انت معش تخليني
موسى حط يده ورا ظهرها >> مستحيل
ميرا >> معش تقلب هكي كلهم كانو مستغربين بكل
موسى ابتسم >> خلاص عاد انسي وسامحيني
ميرا >> سامحتك
موسى >> لالا نحس مازلتي زعلانه
حطت يدها على كتفه >> بطل سماطه
موسى ضحك
.
.
.
بعد ما ردت ميرا مع موسى ❤️ بكم شهر
ميرا >> موسى ، حاسه اني ح نجيب توا
موسى توتر>>شن ندير باهي
ميرا حاطه يدها على بطنها >> كلم احمد يجيب ضحى وما تخليش سما تعرف الا بعد نجيب مانبيهش تنفجع
موسى كان يلبس فيها دبشها عشان يطلعو للمستشفى >> حاضر ، ماتخوفينيش عليك بالله
ميرا >> ماتنسش الشنطه
موسى توتر>> حاضر
نزلو ومشو للمستشفى ، و احمد جاب ضحى عند ميرا
احمد >> الواحد دوبه كيف متجوز قلقتوه
موسى>> احمد هي كويسه ضحى كنها معش طلعت
احمد>> يارا ريحنا ازف كيف العويله الصغار
موسى كان متوتر ويبرم
على طلعت ضحى >> مبروك ❤️ جاكم بيبي نسسسختك
موسى ضحك>> وميرا
ضحى>> تعبت واجد فالعملية بس حاليا كويسه و حتبات هنا اليوم وبكرا الصبح تطلع
موسى >> نبي نشوفها باهي نخش
ضحى>> راقده توا بس تقدر تخش جنبها
سيبهم موسى وخش
احمد >> عقبال ما نشوف عيالنا
ضحى >> نحبك “مسكاته من يده” تعال نوريك البيبي
احمد ضحك ومسك يدها ومشو يشوفوه❤️
.
.
.
ثاني يوم ميرا ناضت وموسى من خوفه على ميرا قعد جنبها طول الليل ما مشش للبيبي لحد ما خشت ضحى وجاباته لهم ❤️
ميرا>> موسى كيف نمسكه🥹 وكيف نرقده
ضحى >> حطيه في حضنك بشويه بس
موسى >> مش ح نعرف نمسكه
احمد >> خرفي 😂 عليك مرعوشين
موسى قرب ومسكه >> هضا عبدالله الصغير ❤️
ميرا ابتسمت و قرب موسى عندها و حطه في حضنها
احمد >> سقدونا عشان الحوش غادي كلهم يراجو و دايرين غدا و قصة و سما منشغله عليكي بكل
موسى >> هيا نلبسها و نطلعو
طلعو احمد وضحى
ميرا >> تحبني انا اكثر ولا هوا
موسى ضحك>> حبه من حبك انتي مش انتي جبتيه ، انتو الاثنين قطعة من روحي
ميرا >> شوف كيف يشبهلك بكل
موسى >> هرموناتك كلهن طلعن عليا “وضحك”
ميرا>> بالحب بس 😂❤️
//
//
عند سما ورسلان
من بعد عركة سما ورسلان و اللخبطه لي كانت صايره عندهم كلهم ، ومن بعد جيت سارة عندي و شوفتي الرسلان اخر مره … بعد كم يوم كلم احمد رسلان
احمد >> رسلان تعال نبيك
رسلان>> انت وين؟ فالقسم ولا الحوش
احمد >> فالحوش قاعد
رسلان >> تمام جايك، في حاجه ولا شنو؟
احمد >> تعال بس
بعد ما جا رسلان ، خش للمربوعه البرانيه
واحمد سيبه وجاني لقاني فالمطبخ
احمد >> سيمو فاضيه
سما >> اها نديرلك عشا ولا شنو
احمد>> لالا اطلعي للمربوعه نبيك
سما >> احمد النبي ما عش عندي حيل شن فيه
احمد >> استغفر الله عالدراما اطلعي نجيب تلفوني ونجيك
سما >> باهي سابقتك
طلعت وانا مطبسه راسي ونمشي بخطوات سريعه للمربوعه عشان صقع ، شابكه ايديا في بعضهن وصلت عند الباب حسيت انه في حد خشيت ورفعت راسي وكان عاطيني بظهره
سما >> انت شن جابك هنا
رسلان برم عليا ورفع حاجبه>> احمد كلمني !
جا احمد ورايا و دفني بشويه قدام عشان نحول من عند الباب ، و صكر الباب ويحكي من برا
احمد >> ماعندنش بنات يباتن برا حواشينهن، ولا عندنا رجاله يسيبو صباياهم يباتن برا ، ركزو انت وياها الله يفتحها عليكم مانكمش صغار حلو الموضوع يا تكملو يا ما تكملوش كلا هكي ما يسير شي
برمت دقيت عالباب>> احمد افتح الباب بلاش سماطه عاد
احمد وخر من عند الباب و حط المفتاح في جيبه ومشى قعمز على حاشية الدروج بعيد عشان نحن نحكو
برمت على رسلان وبحتت فيه
رسلان>> تعالي اضربيني
سما >> بتقنعني مش انت لي قايله
رسلان ضحك>> حد قالك ميت عليك ؟
انحرجت و سكتت ، حطيت يدي ورا رقبتي و حكيتها و طبست راسي
رسلان قدم >> بس ميت بدونك
رفعت راسي و اتكيت عالباب وبحتت فيه
رسلان>> عرفتي انه مانقدروش نعيشو بدون بعضنا
هزيت براسي و تهربت من عيونه
قدم وحط يديه عالباب وانا فالنص >> وعرفتي انك غلطانه لما تقولي سيبني وتستاهل وحده احسن مني
هزيت راسي وانا مطبسه
مد يده رفعلي وجي >> وشن عرفتي اخرى
سما >> عرفت انك غبي ، وسيبتني بروحي هكي
رسلان ضحك >> عليش الغلط
سما >> كيف قدرت
رسلان>> يعني تطلعيني عيل صغير وتقوليلي طلقني شن تبيني ندير ؟
سما>> تمسك يدي وتقولي لا
مسك يدها وبحت فيها >> لا
سما ابتسمت >>شنو خفة الدم هذي ؟
رسلان>> الفترة لي فاتت كلها انا واسير مع بعضنا و توا بيبدا معانا فالشركه
سما >> قالت لي روان
رسلان ضحك>> على سيرة روان انقنها اصلية
رفعت حاجبي
رسلان كمل كلامه>> كنت كل يوم نسأل عليك منها
سما بحتت فيه وميلت راسها>> الحيوانه وانا نقوللها اسألي اسير مره تقولي ننسا ومره تقولي ما تلاقوش اليوم
رسلان رد يده عالباب >> نردو الموضوعنا
سما >> شنو موضوعنا ؟
رسلان>> مراد
سما نفخت >> رسلان بالله عليك اطلعه من راسك
رسلان>> بالفتحه ، و قوليلي بس ليش يقرب منك ليش مش ميرا ؟ ليش انتي
سما >> نجيب المصحف نحلفلك عليه ؟ انه والله العظيم عمره ما حكالي حاجه ولا كان في بيني وبينه حاجه ولا حيكون هو قريب منا بكل وانا اقربله فالعمر من ميرا
رسلان >> مصدقك بدون حلفان ، همي مش فيك فيه هوا
سما >> تو نحن ما نتلاقوش الا نادر بكل و حتى حوش خالي نادر ما نمشي خلاص يا حبيبي مش قصة هي عاد ماهو قتلك بيسافر مش عارفه امتى بس مسافر
رسلان مسك يدي وقربني عنده >> يسافر ولا يقعد المهم يخليه في حاله وانتي تختصري معاه
سكتت وحطيت يدي بنوخره>> احمد برا حول
رسلان ثبت روحه وما قدرتش نوخره ، شويه وقالي >> تروحي معايا
سما >> خليها بكرا نلم دبشي و نسلم على خوخه والبنات
رسلان >> خشي بس البسي محرمتك و بكرا حنجيبك عندهم
سما >> ضروري يعني
رسلان قرب عندي
دفيته بالقوه>> خلاص فهمت 😂
قاطعنا صوت الباب وخرت وبحتت في رسلان خش احمد
احمد >> قلنا اصالحو مش اجوزو من جديد😒
سما سكتت
رسلان ضحك >> خشي
هربت سما وطلعت تجري
احمد >> شنو ؟
رسلان>> بناخذها معايا
احمد>> خوخه ح تنوض فالصبح اديرلي موضوع
رسلان>> تو نجيبها لكم فالصبح
احمد >> مافيش صبر بكل
رسلان>> احمد اجعر
احمد >> سكتنا 🙂😂
//
//
عند البنات بعد ما خشت سما
روان >> تي وين رحتي
سما >> كنت مع رسلان
سالمة>> تبصرييييي
رندة>> قولي والله
سما >> والله
روان >> شنصار باهي
سالمة>> واضحه اصالحو شوفي وجهها😂
سما هزت براسها >> بنروح معاه
روان >> اشش اشش ميرا من كم يوم وانتي اليوم 💃🏻
سما >> تحشمن 😂 ح نجيكم فالصبح
لبست سما عالسريع و البنات حذاها كل مره وحده تضحك و تسمّط عليها
طلعت سما يومها وروحت مع رَسلان ❤️
.
.
وبعد ثلاث شهور من ردتها مع رسلان
نزلت سما لوطا عند سارة
سما >> سارة سارة
سارة >> كنك بسم الله
سما >> كيف نعرف روحي حامل ؟
سارة بحتت فيها >> شاكه في روحك
سما >> اها بس مش عارفه متلخبطه
سارة>> شن قالت لك دكتورتك
سما>> شي راجعت معاها كم مره بعد اللي صار وقالت لي وضعك تمام و حاليا ليا اربع شهور او اكثر ف صح ولا شنو مش فاهمه
سارة>> اصبري عليا شويه بس
خشت سارة رنت بالتلفون وبعد شويه دق الباب ، طلعت سارة تفتح وخشت ووراها لولي
بحتت في سارة ما فهمتش كنها تبيني ننجلط ولا شنو 🙂😂
سار فهمت عليا وزرتها الضحكه >> قلت اللولي تجيبلي اختبار الحمل من شقتي
لولي بحتت فيا وابتسمت >> مبروك ” ومدت يدها ”
سلمت عليها >> حتى انتي مبروك قالت لي سارة جوك عرب
لولي >> الله يبارك فيكي
سارة >> تقول دوبكن اتعرفن على بعضكن “كرت الاختبار” خشي نوريك كيف اديريه ، لولي وتي القهوة
لولي>> لالاااا ماما تراجي فياا جاياتها صبايا والحوش شايل، نخش نسلم على زوبه ونطلع
سارة >> تمام
.
.
في الليل بعد روح رسلان خش يغير في دبشه وجا حذايا
سما >> رسلان
رسلان >> احكي انتي من اول ما خشيت في كلام بتقوليه
سما >> مش عارفه كيف بنقولك ولا عارفه ندير حركات البنات😂
رسلان >> شن فيه
سما مدتله اختبار الحمل
رسلان بحت فيه >> هضا شنو ؟ حلوه ولا شن
سما هزت راسها و رفعت حاجبها >> مافيش فايده فيك
رسلان>> غير قولي بس
سما >> حامل 🙊
رسلان ضحك وقرب مني>> تحكي جد
سما >> قلنا حامل يعني بعد بعيد
رسلان>> قصدك تسع شهور؟
سما ضحكت بصوت عالي>> نبصر 😂
//
//
اما الشخص اللي متباعد الفترة هذي ، اللي هوا مراد
بعد ست شهور من العزا تحددت مشيته الكنده ، و طول الفتره هذي كان معش يسأل ومعش تلاقينا الا مرتين تقريبا مره لما مشينا حوش خالي عزمونا و مره في عرس احمد من بعيد و فالمرتين كان يحكي مع سما نادر واغلب كلامه مع ميرا
قبل ما يسافر بيوم رن على ميرا
ميرا>> انت وين مختفي
مراد ضحك>> نوتي فروحي لكندا
ميرا>> خلاص بكرا صح؟
مراد >> اه
ميرا>> ولعند امتى
مراد >> مش عارف سنه سنتين الله اعلم
ميرا>> مراد عاد ما اطولش
مراد >> ح نجي زيارات
ميرا >> عميمه عزيره اكيده قالبتها دراما
مراد>> مانحكيلكش ماسكتلي اجوز واجوز ودير عيله وبنفرح بعيالك
ميرا>> مش ح نحكي ونقولك معاها حق بس انت فكر
مراد ابتسم>> سلميلي على سما ما لحقتش نكلمها
ميرا ب استعباط>> صكر مني ورن عليها
مراد >> مشغول شويه
ميرا بتردد >> مراد من امتي
مراد >> شنو الي من امتى
ميرا >> مش ح نستعبطو على بعضنا النبي احكي بلكي اتريح
مراد خذا نفس >> مش ضروري حاجه غبيه
ميرا >> مراد مش ح نحكي لحد راه حتى السما نفسها
مراد >> حد قالك انك سكانه
ميرا ضحكت>> واجد ، نسهلها عليك باهي وانا اللي نسألك ، مش من ونحن صغار صح عشان كان هضا را فطنت؟
مراد >> لالا فالشهر لي جت وقعدت فيه عندنا
ميرا>> لما تعاركت مع عمي عاشور قصدك ؟
مراد >> اها ، وكان عرسها ح يطلع قريب كنت عارف انه هي ورسلان ما فيش حب بينهم بس انا نعرف مش غبي كنت حاس انه سما في شعور له ، و كنت برضو نعرف انها هي تشوفلي كمراد خوها بس يعني حتى كان سيبت رسلان مش ح تبحت فيا
ميرا >> وكيف قدرت الوقت هضا كله تدس لي فقلبك
مراد >> عادي ما تفرقش ، بس كان لازم ندير هكي عشان ما نبيلهش مشاكل نظره مني ولا كلمه كانت ح تودر الدنيا وتخرب حياتها وانا ما صدقت نشوفها مبسوطه انتي وياها ، مرات لما تحب حد تقعد تبيه يكون بخير حتى لو كان هوا بعيد عليك
ميرا>> عشان هكي انت ما تبيش تجوز؟
مراد ضحك >> امي من زمان تزن عليا نجوز من قبل حتى ما يطلعن مشاعري ، ف موضوع الزواج هضا نصيب ، وعارفك يا سوسه شن تفكري مش ح نعيش على اطلال ونقعد متعذب بالعكس لو في بنت حلال كويسه ممكن تفتحلي قلبي مش رافض
ميرا ابتسمت >> ان شاء الله نفرحو بيك
مراد >> انتي كيف عرفتي ؟
ميرا >> على قولتك سوسه 😂 ما تخافش ما فيش حاجه واضحه بس انا حسيت واحسن حاجه فيك لما سألتك جاوبت طول 😂
مراد >> خلاص رد بالكن من بعضكن و ماتحكيلهش شي اه وراسك
ميرا >> لالا مستحيل ، توصل بسلامه
مراد >> الله يسلمك
صكرت ميرا من مراد ، وقررت انها مش ح تحكي شي عشان سما مش ح توقف تفكير و حتحس انه مراد سافر عشانها حتى لو قنعتها ميرا انه مش هكي بس كانت عارفه تفكير اختها ، و عرفت من كلام مراد انه مشاعره عابره مش حب حقيقي لانه لو كان حقيقي كان ما خلاهش تريح من يده لو شن ما صار .
//
//
في الوقت الحالي ، في حوش خوخه
كنا كلنا ملتمين بعد ما تغير حالنا فالسنة اللي مرت هذي ، ونوتو العرس سالمة يلي بعد اسبوعين
كنت مقعمزه نبحت فيهن وهنا حايسات وسالمه تطبق هي و روان في الدبش وكالعاده قاعدين في دار روان
سالمة اطبق >> سيمو ازعمه تحضري عرسي بطولك ولا مع البيبي
سما ضحكت >> والله مانعرف من اول ما خشيت شهري وانا كل يوم انوض فالليل ونفجع في رسلان معايا ونقول خلاص اليوم
سالمة >> ان شاء الله تنوضي طيبه يارب
سما >> ان شاء الله
جت ميرا حذانا وقعمزت
ميرا >> نبي عبودي يكبر بسرعة 😭
سالمة >> يييييه بتبدا تبكي زي كل مره
سما >> حولي من حذايا مش ناقصني بكا
سالمة ضحكت >> وين حطيتيه بس
ميرا>> خذاته مني عميمه فاطمه
سالمة >> حبيبي حرام اكيده جيعان بس هضا عليش يبكي
ميرا >> المشكله بعد يقعد يبكي معش نعرف كنه نقعد نبكي معاه وموسى يضحك عليا 😂
روان >> كلا موسى هضا مسكين😂
ميرا >> مازال عبدالله ما طقش اربع شهور ويقولي ماتبيش بيبي اخرى ؟ 🙂
سما ضحكت>> معش تضحكوني انا على سبله
روان >> اضحكي خلي الفرخه تطلع بيش تحضري معانا العرس ونحن متهنيين 😂
سالمة >> اختى وينهي
ميرا >> قاعده تكلم في سيادة المحقق
سالمة >> شي ما تبطل من هالتلفون
روان >> خليها كبدها دارهه من الامتحانات معش كملن ومعش تخرجت
سالمة >> طبعا ادافعي حتى انتي معلوقه طول اليوم مع اسير 😂
روان >> اللهم طولك ياروح “كرت منها الدبش” صبي ديريلنا قهوة تو نكمل باقي تطبيق
سالمة>> هي نخش نسألهن جوا كان يبن ونديرو مع بعضنا
//
//
عند رندة
ربيع >> تو كنت انا اللي راقيلي من موال القرايا قعدت توا انا لي نقولك خلاص هانت
رندة>> تعبت بكل كل امتحان اوعر من الاخر
ربيع >> انتي قدها وانا عارف كويس
رندة>> وين قاعد ؟
ربيع >> فالقسم شوية وطالع
رندة >> باهي تمام
ربيع >> البنات عندكم
رندة >> اها
ربيع >> معناها قوليلهن عازمكن عالعشا كلكن
رندة>> بلا سماطه
ربيع >>لسانك يبي قص ياروحي
رندة ضحكت>> قصدي يعني عليش اتعب في روحك
ربيع >> مدام الموضوع فيه شوفتك ف وين التعب
رندة >> من قالك ح نطلع ؟
ربيع >> حنخشلك لعند جوا
رندة>> ياربي العنف
ربيع ضحك >> خلاص ساعه هكي ونجيك
رندة >> انحبك تعرف صح
ربيع >> لالا نبي نسمعها بعد نجي
رندة>> كان طلعتلك
صكرت الخط و خشت للبنات
رندة >> ربيع عازمكن عالعشا
روان >> هالله الله شن المناسبه
رندة >> عارفته حسني مضايقه من الامتحانات
روان >> عسل
رندة >> شن نلبس بسرعه
سالمة >> ياعليك عرس كل ما يجي سيد ربيع لبسه
روان >> وتختم على لبسه من دولابي
رندة>> بنات الموضوع فيه عشا لكن 😂
سالمة >> اشربن قهوة على ما جا العشا 😂
سما ضحكت >> اطلعي بلبستك لي عليك كويسه
رندة >> بجامه
روان >> هضا المطلوب 😂
رندة >> بلا قلة ادب انتي وياها
“وفتحت الدولاب تدور في حاجه تلبسها ”
//
//
عند الشباب كانو موسى و تيح فالاستراحه خطمو عليهم رسلان واسير
تيح >> كراعك خذت عالاستراحه انت وياه
اسير >> المشكله انها تغم القلب ، مغير واخذين الحشمه لي يسمعنا في استراحه يحسابنا جايبين بنات وقالبينها محرمات
رسلان >> تي انتقي الفاظك وانت اللي تجي في راسك تقولها استغفر الله
تيح ضحك وضبح الموسى >> ماتبيش تطلع انت من المسبح
موسى شيرله >> اهو طالع شويه
تيح بحت في رسلان>> طبعا اوامر من اخت المدام حارمته من العوامه شكله اليوم خذا الاذن
اسير >> هابتين وهابا انت تحكي الهضا تحسابه يحل ويربط ، تي حتى هوا اوامر يمشن عالارض
رسلان >> انت وياه اكبر غلطه معرفتكم ببعضكم
تيح ضحك >> خليني نشوف المكرونه عالنار 😂
خش تيح
قعمز اسير على حاشيه الدروج مقابل المسبح وموسى كان يعوم ، جا رسلان في جنب اسير
رسلان >> كنت تبحت تقول اول مره تحقني
اسير >> ماكنتش متخيل بعد المعافره هذي كلها نحقك واخيرا تضحك ومبسوط هكي
رسلان >> الي صار الفترة لي فاتت هذي كلها مش ساهل بس كنت متأكد انه النهاية حتريح قلبي
اسير خبطه على كتفه >> عشنا وشفناك تضحك
رسلان >> حد قالك دمك ثقيل من قبل
اسير>> لا انت اول واحد 😂
.
.
عند تيح اللي كان يديرلهم في مكرونه جوا ، رن تلفونه
سالمة >> وين غياب ساعتين
تيح ضحك >> قاعد مع الشباب فالاستراحة
سالمة >> امم شن اديرو
تيح >> اسير جايبلنا بنات و جميع الحاجات اللي يخطرن في بالك واللي ما يخطرنش قاعدات
سالمة >> استغفرالله ، بلا سماطه
تيح ضحك>> يعني يا حبيبي شن نديرو موسى يعوم و اسير مكملها لنا خفة دم على روسنا و رسلان يهزب فيه وانا تقول ضانيهم وناسيهم نديرلهم في مكرونه وشويه اخرى اكيده ح يجو احمد وربيع دروحهم شخصية وضباط ويجو متأخر
سالمة ضحكت>> حديرلي مكرونه حتى انا راه بعد نجوزو
تيح >> انت نعطيك عيوني مش نديرلك مكرونه بس
سالمة >> تيح مش حاره اه
تيح >> فاهم
سالمة >> دخان لا و مسبح لا
تيح >> حاضر والله
سالمة >> ونحبك ونموت فيك
تيح ضحك >> ربي يمشي الاسبوعين هذينا بسرعه بس
سالمة>> باي 😂
صكر تيح الخط و طلع للشباب على خشت احمد وربيع
اسير >> اهم جو انتو يالله ماسكين في قسم شرطة بنغازي و دايرين قوبعه امالا كان في اوروبا شن درتو
ربيع >> كنت ح نحطك انت اول واحد مؤبد بدون تهمه
اسير >> ياساتر ياربي 😂
طلع موسى >> بنموت جوع انا
تيح>> خش غير دبشك تقول عيل صغير
خش موسى و قعدو الشباب يهدرزو شوية و حطو العشا وتعشو
تيح>> انا اللي درت العشا مش انا لي نغسل
كلهم بحتو في اسير
اسير >> هضا جوكم انتو ؟
احمد سبقهم وطلع >> المدام بروحها اسمحولي
رسلان >> وانا بنروح بيها
موسى >> طريقنا وحده معناها هيا
اسير >> عقبال نروح بيها حتى انا من نفس الحوش
رسلان طلق فيه باكو الدخان
موسى ضحك>> انا ح نمشيها لكي احمد ربك انه حميدا ما سمعكش بس 😂 كان ح يدفنك لا تجي من عرس لا من شي
اسير >> ياساتر 😂😂 ” وبحت في رسلان” احلم بيه الدخان
رسلان>> فيه واحد بس كان هضا را ما طلقتش فيك
اسير >> عارفك فقري
طلعو الشباب وقعدو ربيع واسير وتيح يلعبو في كارطه
//
//
عند رنده قبل ما ربيع يمشي للاستراحه خطم عليها
ربيع >> برا انا
رندة >> تمام
طلعت بسرعه فتحت الباب خش ربيع و صكر
رندة >> مافيش وقت التصكير الباب عشان بابا فوق
ربيع >> زمري مش قرينا فاتحه
رندة >> انت عارف
ربيع مدلها العشا >> شن السماحه هذي
رندة خذتهن منه >> باهي بعد شويه
ربيع>> شن كنتي تقولي عالتلفون مبدري
رندة>> كنت نقولك تبي كف ؟
ربيع قرب وهي ماسكه الشكاير وخرت
ربيع >> مش طالع راه
رندة>> ربيع بعد شويه بس
ربيع قرب عندها >> ياعيون ربيع الاثنين
رندة حطت الشكاير من يدها و حطت يدها بدفه
ربيع مسك يدها ووخر شويه >> قوليها نطلع
رندة بخوف تقول صاحبها مش راجلها 😂>> نحبك
ربيع ضحك >>ايوه الخوف كويس
وخر ربيع
رندة>> وين بتمشي
ربيع >> الشباب دايرين عشا
رندة رفعت الشكاير >> شكرا تعبت روحك
ربيع >> بلا سماطه عاد ، صحه
برم ربيع و فتح الباب وهي عيونها عليه لحد ما طلع وصكر الباب وراه
.
.
.
تعشن البنات مع بعضهن وكانن مقعمزات يهدرزن رن تلفون روان صبت من حذاهن
اسير >> لوزا وين مختفي اليوم
روان >> لكي سنة على لوزا هضا شن قتلك انا
اسير ضحك >> انحبه عشان ينرفز فيك
روان >> مستفز
اسير >> وين كنتي غاطسه
روان>> كنا نطبقو في دبش سالمة ونلمولها في حاجات العرس وانت وين
اسير >> قاعد فالاستراحه مع الشباب
روان >> مش مروح يعني
اسير >> بايت انا وتيح هنا
روان >> انت وياه خلطتكم على بعضكم كارثه 😂
اسير >> على قولة رسلان طنجرة ولقت غطاها
روان >> والله ؟
اسير ضحك >> بنغارو من تيح
روان >> لا عادي
اسير >> نحبك يا غبيه
روان >> خلاص عدي التيح بعد تفضى كلمني
اسير ابتسم على غبائها >> لوزا عاد
روان ضحكت >> انحبك يا لوزا
اسير >> ناعليا
صكرت الخط علي جيت موسى من برا شافاته ميرا مشت لعنده
موسى حضنها >> كنك
ميرا>> عارفني ما نقعدش بدونك
موسى ابتسم>> عبودي وين
ميرا>> جوا مع البنات
موسى >> تعبك ؟
ميرا >> يعني نص ونص
موسى >> معلش يا حبيبي ح يكبر و كل يوم ح تعرفي كيف اتعاملي معاه
ميرا >> مش ح نجيب لحد ما يطق عمره خمس سنين
موسى رفع حاجبه و لف يده على كتفها ويمشي وهوا يحكيلها >> في عيونك السماح هذينا
ميرا >> موسى
موسى >> مش انا نساعد فيكي فيه؟ ومش تخرجتي ؟ بالله عليك نبي بيبي ثاني بس واحد وبعدها خوذي راحتك
ميرا >> حفظتهن حركاتك راه ، وبعدين خلي عبودي يسكر سنة بعدها ساهل
موسى >> حاضرين
ميرا>> شعرك مبلول
موسى >> مش قتلك بنعوم عاد وقلتي باهي
ميرا حطت يدها علي شعره ومشت عليه>> نشف باهي شعرك كويس انت بسرعه ما تمرض
موسى غمزلها >> نروحو ونشفيه ليا
خشو عندنا جوا ، تنحنح موسى وخش
موسى >> سيمو رسلان برا راه
سما تسقم في حجابها >> اهو رن عليا
خوخه>> خليه يخش يتعشا
موسى>> كنا فالاستراحه تعشينا مع بعضنا
صبت سما تلبس عشان تطلع ، لمت حاجتها
منى >> هاكي هضا تمر موصيتلك عليه خوخه قالت كويس
سما خذت منها الكيس>> باهي
منى>> خوذيه مش تعزقيه
سما >> حاضر 😂😂
طلعت لقيت رسلان مصبي فالجنان ومطبس عالتلفون، رفع عيونه فيا
رسلان ابتسم >> بطه
سما >> بطل سماطه والله ما سمنتش واجد
رسلان قرب لعندي >> انرفز فيكي اصلا انتي عكس الناس بدال ما تزيدي تنقصي
سما حطت يدها على بطنها ومعش قدرت تصبي
رسلان مسك يدها >> سما كنك شن فيه
سما >> معش نقددددر
طلعو كلهم من جوا عشان سما كان صوتها عالي
عمتي فاطمه>> شكلها ولاده خوذها للمستشفي بسرعه
منى >> راجي نلبس ونجي معاك
سما >> لالا كلمو احمد يجيب ضحى للمستشفي بس ممنوع مرافق الا واحد و حيكون رسلان معايا “كنت نحكي وناخذ في نفس” وهي ح تخش بمعرفتها
رسلان كان متوتر
موسى >> اطلع بس
ميرا تبكي >> سما نجي معاك
سما هزت براسها >> لا ما حد ينشششف ريقي خلاص
طلع رسلان ب سما للمستشفى ، وموسى على طول رن على احمد و قاله يلحقهم بضحى للمستشفى
خشو كلهم جوا
ميرا >> يارب يارب
موسى>> بتبدا وصلت البكا
ميرا >> انا حاسه بيها يا سامط عارفتها واعره
مسحلها دموعها>> مش بعدها قعدتي كويسه وتقولي عبودي احسن شي في حياتي ؟ خليها تجرب الشعور هضا سما ما شافتش شويه
ميرا هزت براسها
موسى >> ديما دموع عبيتيني
ميرا وخرت >> باهي نقعدو هنا لعند ما نطمنو على سما
موسى>> نمشو الحوشنا ونطمنو عليها غادي
ميرا>> اوف منك “وصبت”
موسى ابتسم>> بنت بلا نفخ
//
//
بعد كم ساعه فالمستشفي
” رسلان ”
كنت ماسك يد سما وهي تعبانه ومغمضة عيونها
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية هلع)
