رواية هلع الفصل الثاني عشر 12 بقلم آية
رواية هلع الجزء الثاني عشر
رواية هلع البارت الثاني عشر
رواية هلع الحلقة الثانية عشر
مر الشهر الثاني في التوتاي و رسلان مارنش عليا بكل بس ع قولة روان محد مهتم 😒
لعند ما خشينا ف اسبوع العرس
مشن البنات التفريشة الشقة وروحن يحكنلي ع الجو و هكي وع الحوش كيف كان خيالي بكل وقالن لي انهن شافن رسلان يومها برا كان يسلم ع الشباب
//
//
في نفس يوم التفريشة قبل ما يروحن البنات
روان >> خلاص صح؟
ميرا>> نرن علي موسى نقوللهم يجو !
روان >> اه حنطلع نشيل الاكياس هذينا نحطهن برا بس ونحن طالعين خلي موسى يقول الرسلان يشيلو الصناديق يعزقوهن
ميرا >> خلاص تمام
لمت ميرا الاكياس والقربج كله وطلعت برا ، ومن كان فيه فالوقت هضا 🙊 رسلان واسير قدام باب الحوش والباب مفتوح كان رسلان عاطي الباب بظهره و اسير مقابل ، اول ما طلعت روان شافها
اسير >> وراس امك ماتقول لا
رسلان >> شنو ؟
اسير >> سريع سريع
رسلان جا يبي يبرم بس اسير مسكه من رقبته>> ارعى العيب بتحق المدام هكي عيني عينك🙂
رسلان فهم >> قصدك روان باينه عليك؟
اسير >> وراسي عندك خمس ثواني ونطلع ، هلك جوا صح ؟
رسلان>> اسير ثواني اه
اسير >> تم تم غير ما تبحتش بس 😒😂
خش اسير و رسلان رد الباب ومشى يدخن “الصاحب القدع”😂
مشى بسرعه لوين ما فيه روان
اسير جا جنبها >> حنقعدو نتلاقو بالصدفة
روان رفعت راسها وبحتت فيه وضحكت >> صدفنا كثرن
اسير بحت في شكلها >> تو افرضي رسلان لي كان مقابل الباب وشافك مش انا
روان>> سوا شفتني انت. ولا هوا شن ح يكون فرق يعني؟
اسير >> لا يفرق بكل ، وبعدين شن السماحه هذي ؟
روان >> اسييير الشباب شوية ويجو عشان يروحونا حول خليني نخش
اسير وخر كتفه شويه >> خشي بس ح نحكو راه
روان مشت جنبه >> خفف ثقة بس
خشت روان واسير طلع متلخبط
رسلان>> هذينا كلهن خمس ثواني
اسير >> احلف انك ما بحتش 😒
رسلان>> تي في شن بنبحت شن لابسه لي ماتبيش حد يشوف
اسير >> مش شورك بس انقنك اجوز بسرعة عشان نوصل فيها بسرعه
رسلان>> مغير نوصل انا قبل 😂
//
//
الليله لي قبل الفاتحة
احمد >> نجي ناخذك باهي بعدين ؟
سما>> احمد بس
احمد>> سما انتي قلتي لعند اسبوع العرس وخلاص طقينا فيه وكلهم قاعدين غادي اليوم حتى ميرا ويوتو عشانك وامي من مبدري كل ماتحقني تقولي عدي جيبها
سما >>خلاص تو يجيبني مراد اهو قاعد اصلا
احمد>> تمام
صكرت من احمد ومشيت شور مراد
سما >> تشيلني غادي ؟
مراد >> بتعدي خلاص
سما >> انت تعرف انه معنديش نيه بكل كان نلقى يتفركش كل شي
مراد >> لو تبي نعدي نقربعها نعدي اسهل من التقربيع مافي عندي😂
سما >> انت بالذات احضر الفاتحه وانت ساكت بكرا😂
مراد>> عدي البسي 😂
مشيت لبست ولميت حاجتي
سما >> عميمه راك تغيبي بكرا
عزيزه>> لا والله مانقدر نغيب حانجي مالصبح
سما>> سلمك سلمي على خالو شكله مطول
عزيزه >>يوصل
وصلنا عند الحوش
مراد >> سيمو تبي اي حاجه دزيلي على طول لو نقصاتك حاجه لو انظر شن اسمه هضا ضايقك ولا فكر انه يزعلك بس قوليلي 😒
سما >> رسلان رسلان😂
مراد>> اللي هوا مهم اعرفي اني معاك اه لو اي شي كانو في كلهم ضدك تأكدي اني حنوقف معاك
سما >> ربي خذا مني عبودي بس عوضني بيك انت وموسى
مراد >> خلاص بلا دراما انزلي عطلتيني 😂
نزلت ونزل مراد ورايا بشنطتي حطها ليا قدام الباب ومشى
خشيت وسلمت عليهم كلهم وكل حد يسأل في سؤال شكل وانا راسي مصدّع جاملتهم شويه وقتلهم بنرقد
بس الحق كنت مضايقة كل ما يقرب وقت العرس كل ما نحس اني بروحي بدون بابا بالذات رغم انه كلهم حوليا
//
//
يوم الفاتحة
كانو كلهم يتبارمو مع انه عائلي مافيش حد جاي واصريت عليهم انهم يعزمو عيت جيرانه لي هما عيت ضحى ، وخذيت رقمها من احمد وقتله عيب غير انها جارتنا غير انها وقفت معانا فموضوع ماما لازم نكلمها وتوقعتها ما تجيش فيومها بس جت ، وحسيت انه هذي اشاره من ربي😂
عالعصر قالولنا انه الفاتحة انقريت و زغرتت عزيزة عشان تحول اجواء الحزن من الحوش و بعدها زغرتن باقي البنات ، مشى اليوم و الناس كلهم فرحانين صح انه عرس جاي بعد عزا وايام صعبه و كان اكثر عرس مختصر بس كلهم فرحولي وكأنهم كانو يرجو في حاجه بسيطة تكسر الحزن اللي كانو فيه اكثر من سنة ونص
//
//
سما >> ضحى قتلك البنات كلهن جوا بالله نسيت تلفوني عالطاوله برا جيبيه ليا
ضحى >> بلكي في حد برا؟
سما>> لالا مستحيل حد يخش
طلعت ضحى ورنيت ع احمد
سما >> قتلك تعال نبيك بسرعه
احمد>> تي قاعد مع الجماعه
سما >> تعال بسرعه بس عند الصور من لاوره اه
صكرت منه بدون ما يفهم و خش بسرعه
روان>> ياكلبه شن اديري ليش خششتينا كلنا ؟
سما >> اسسس بس
//
//
ع تصفيرة احمد برمت ضحى >> سوري بكللللل بس سما كانت تبي تلفونها وقالت لي انه هنا 😳
احمد ضحك>> سما هكي قالت لك؟ 😂
ضحى >> اه والله بس ما لقيتش
احمد >> حي عالعباطه😂 خشي سما تلفونها معاها
ضحى مازال مش فاهمه >> باه حول عشان نخش
برم احمد >> بس القفطان تُحفه😂
جتنا ضحى تجري وجها الوان الوان
سما >> سوري بكل لقيته تلفوني كنت نحسابه برا 😌😂
ضحى>> خش عمك راه ما عرفتش شن يبي وحقني عليك غباء 🙄
يامينتي عليك طيابه 😂مازال مش فاهمه الخطة
سما بشوية عباطه>> حي احميدا تو ندزله وحده من البنات 😂
روان >> انقنك الا ممثله بدعه😂
جاني مسج من احمد ” ان شاء الله تعقلي يافرخه”😂💁🏻♀️
//
//
اسير >> مبارك
رسلان>> نحس انه المسؤوليه زادت عليا ومش عارف علي شن خاش والله
اسير >> انا نسمع بخناق العرايس مش خناق العرسان🙂
رسلان>> فاضي نحكيلك حتى انا 🙂 مش ح تفهم المشاعر هذينا مانكش قاري فاتحه 😌
اسير >> رسلان اللي يحكي ع المشاعر خبر؟ 🫢
رسلان>> صبي من قدام وجي 😒
اسير >> باه اخر سؤال تحبها ؟
رسلان>> حب شنو كذا صبي وماتدخلش في كلام الكبار
اسير >>قصة رايح بكل الواحد مايحكيش حرف معاك😂
//
//
مشت الليلة هذي و انا كنت نراجي فيهم كلهم يرقدو وركبت فوق السطاح عشان نبكي 😭 وميرا كانت يومها حاسه بيا ف ما قدرتش تقعد وتبات معايا وروحت مع موسى عشان ما ننهارش انا وياها
وكل اللي فالحوش كانو يحاولو يبصرو معايا ومايقلبوهش نكد بس خوخه ماكانتش قادره تمسك دموعها كانت اليوم كله تبكي
كنت نبي بابا هو اللي معايا ونبي ماما تقعد مصبيه فالعرس و تحوس و يباركولها 💔 بس ح ننزف وانا مش ح نشوف حد فيهم وكانت هذي أكبر كسرة خاطر ليا كملت الليل كله بروحي فوق نبكي و كانو كلهم عارفين بس ماكانش في حد قادر يواسيني ف خلوني بروحي
وصلني مسج من رسلان ” ما تخافيش من شي حنكون معاكي ديما ”
قريت المسج و مارديتش كانن عيوني يوجعن فيا نزلت غسلت وجي وصليت الفجر
//
//
فالصبح
روان>> طح سعد عيونك
سما >> بالله ما حد يحكي معايا
سالمة>> هي واتيه ؟ احمد برا
سما >> ميرا ماجتش
رندة>> ما قدرتش تجي عند ما تطلعي عشان عارفين شن ح اديرن
طلعت ومشت معايا روان للكوافير
سما >> احميدا خوذلي اي حاجه عصير ولا شوكلاطه عشان من امس ما كليتش شي
احمد>>نجيبلك سندوتشات
سما >> مانبيش جيب حاجه سريع هكي
//
//
كملت كل حاجه فالكوافير و صبيت نلبس و روان تساعد فيا ، وانا حرفيا اليوم هضا كنت متوتره و بطني توجع فيا وراسي مصدع ، وسكنو يومها يرنو يرنو تقول بنهرب 🙄
بعد شويه هكي جا احمد وخذانا للصاله وكانو كلهم غادي يراجو فينا | خشيت للاستقبال وجتني ام رسلان سلمت عليا وكلهم يحكو حي مكياجك سمح الفيلو سمح ، مشاء الله طالعه خيال وانا هضا كله مش في بالي بكل من كثر التوتر ماركزتش في شكلي
قتلهم نبي احمد هو اللي يخششني ، وخشينا انا وياه
ركبت للمسرح وكل مره جاي حد يسلم عليا ووجوه غريبه بما انه مشترك وكل حد يسلم ويعرف بنفسه وانا عقلي مش معايا بكل
سارة>> رسلان ح يخش توا
جمد الدم في عروقي وصبيت ونزلتلي الطرحه
سارة>> ماتوتريش خلاص اليوم الحمدلله مشى ع خير و شويه وتروحو
تحساب روحها تواسي فيا 🥲 ماكانتش عارفه اني خايفه من الترويحه معاه اصلا
نزلت ساره وخش رسلان ، والواحد عشان يكون حقّاني ويقول اللي له واللي عليه كان طالع جميل 🙆🏻♀️❤️ رغم انه كان خاش وقالب وجه بس برضو سمح ، قعدت من التوتر نغمض في عيوني عند ما وصل فيا رفع الطرحه وقعمز 🙂
برمت قعمزت بروحي وركبن اخته وامه ووحدات شكلهن عماته ولا خالاته منندريش منو يسلمن ، ورسلان مابحتش فيا بكل لحد ما فجأة طبس ع وذني هكي
رسلان>> كم نقعدو انا مانعرفش؟
سما >> ع اساس انا متجوزه من قبل 🙂
قلب وجه و شير الساره تجي
رسلان>> نطلعو توا؟
سارة>> تي خليكم شويه كيف جيت انت بسم الله
مسح ع وجه و قعدنا و التوتر كان واضح بكل علينا ، شويه هكي وصبا رسلان وقالي هيا وانا بطني بدت مغص ، يعني خلاص ح نطلع😭
نزلت ومشينا عند جهة الاستقبال وهنا شفت ميرا اللي كانت تتجنب فيا طول الوقت
سالمة >> اطلعي النبي لو سلمتي عليها ه تقعدن تبكن لعند الصبح
غمضت عيوني وميرا برمت عشان ما تخلينيش نشوفها ، سلمت عليهم وكلهم كانو ح يبكو بس مسكو روحهم واللي ما قدرش خش جوا عشان ما يشوفنيش وكانت ساره جنبي وتساعد فيا
مسكت جديده رسلان وقعدت توصي فيه عليا وعميمه منى مصبية وراها وتبكي ومعاها عميمة فاطمة و البنات كلهن خشن عشان ما يشوفنيش وانا طالعه
طلعنا و الحمدلله انه رسلان دار لقطة و فتحلي باب السياره الوراني عشان الڤيلو كان ح يضايق لو قعدت قدام😒 ركبت وانا الطرحه والدنيا مغطيه ع راسي ووجي ما قدرتش حتى نشوف شي ، كان رسلان يسوق وما قالش ولا حرف طول الطريق ولا انا حكيت 🙂
وصلنا الحوش فتحلي الباب ونزل ، قربعت الباب بيدي لعند ما بحت فيا
سما>> ساعدني عشان نعرف نمشي 😒
جا حذايا وقعد يساعد فيا وهو ما قالش كلمة من لما طلعنا لعند شكيت انه تبكش يومها ولا شن🙂😂
خش قدامي واخيرا سمعت صوته لما قال >> الباب هضا جهة حوش هلي
قدمنا شويه لقدام
رسلان>> هنا وصلنا ، هضا الجناح
خشيت وهوا سبقني وخش للدار ، قعدت نكر فالفيلو ونشوف فالجناح كان متوسط مش كبير مطبخ مقابله صاله وممر فيه دارين و عاليسار حمام ، بس كانت جديده و كل شي فيها جديد
جتني لحظة ادراك اني خلاص ح نعيش هنا ومش معروف لعند امتى، معش في لمة البنات فالليل معش في السطاح اللي نركبله لما نضايق ومعش في قعدتنا فالصور وهدرزتنا 🥲
طلع رسلان من الدار وهو مغير دبشه ، خشيت للدار محوتك ما عرفت نسلح الفيلو و نمسح المكياج و نلبس توته ، واه لبست متاعت الدبدوب لو تذكروها 💁🏻♀️ وخساره فيه اخرى😒
//
//
روحت ميرا ع الحوش مع موسى وكانت قالبتها نكد وبكا عشان سما
ميرا>> يعني عدو كلهم وسيبوني حتى سما عدت 😭
موسى>> تي كنك اتفاولي عالبنت ماشيه متجوزة راه 🙂 شن قصتكن انتن اليوم كل شويه وحده تبكي
ميرا>> ماكنتش نتخيل اليوم هضا يجي بدون هلي ! بدون ماما حتى
موسى>> حاولنا بكل الطرق نلقو حل نطلعوها حتى يوم الزفه عشان تعيش اليوم هضا معاكن بس وضعها ما يسمحش
ميرا>> من يوم خشت المستشفي ما شفتهش غير كم مره بس ، وتصدق لو نقولك معش قعدت نبي نشوفها نبيها تقعد في بالي صورتها ماما العاقله اللي ما فيش كيفها مانبيش نشوفها وهي متبهدله وحالتها سيئة😭
موسى قرب منها >> تو انتي ديما تبكي ، في قمر يبكي ؟
ميرا>> ماه في عرسي ماحسيتش بشي عشان طلعت بدون عرس والفرق الوحيده نقلت دبشي من حوش الحوش بس سما حسيت بكل شي خصوصا اخر شهرين
موسى>> نديرلك عرس راه لو تبي مازلنا فيها “وغمزلها”
ميرا>> انا فشنو وانت في شنو بس 🙂
موسى>> انا فالقفطان اللي جاي عليكي نار ❤️🔥
ميرا وخرت >> انت ما تبيش اتحشم ؟
موسى>> على اخرى هكي فالحشم 😂
برمت وخشت للدار
موسى>> حرارتك كم🫢😂
ميرا>> موسسسسى 😒
موسى لحقها >> تو بس قوليلي شن السماحه هذي ؟ القفطان من لما شريتيه نشوف فيه معلق فالدولاب عادي بكل بس بعد لبستيه مش فاهم كيف جا خيال هكي
ميرا>> انت مصر توترني ؟
موسى >> لا انا مُصر علي سماحتك
ميرا >> عميمه اليوم رغم كل اللي نحن فيه عارف شن قالت لي ؟
موسى >> شنو
ميرا>> بيش تاخذي عشا الموسى راك تنسي خليه ياكل وكله مسقمه ، تو حد قاللها اني انا ماسكه عليك باب التلاجه؟
موسى ضحك>> معلش انتي عقلك كبير
ميرا>> والله عشان خاطرك مانردش ونكبر في عقلي
موسى >> عشان خاطري انا ؟
ميرا بتوتر>> بتخليني نغير ونمسح مكياجي ولا شن
موسى قرب منها وميرا وخرت >> اهدي بس مش داير شي
حط يده ورا ظهرها نزل السوسته >> عارفك ح تقعدي ساعه تحاولي تحليها ، وطلع
ميرا قعدت خمس دقايق مش مستوعبه
ميرا>> ميرا غيري دبشك و اطلعي كولي مش وقت حب وغرام
//
//
“رسلان ”
من قبل ما نخش للقاعة وانا متوتر، حسيت انه الموضوع قعد حقيقي بكل من التوتر لساني انربط
خشيت وما طولتش طلعت ع السريع ، طول الطريق ونحن ساكتين وحمدة ربي انها ما حكتش شي ، بعد روحنا سبقتها وغيرت دبشي وشفتها خشت للدار وبعدها طلعت ، لا والجلطة لابسه بجامة عليها دبدوب 🙂 عليك نهار هو معش با يفض
معش عرفت ما ندير ، كنت نحاول نسرق كم نظره نبحت فيها بس ما قدرتش نركز ف خذيت دخاني ونزلت ندخن لحد ما رن تلفوني وجا اسير
اسير >> هاك العشا واسمع هلك جايين حرك روحك بسرعة
رسلان>> يارا ارعى العيب ولم لسانك 🙂
اسير>> باه هات العشا دافع حقه بفلوسي 😒
رسلان كر منه الشكارة>> حل غاية معش نحقك شهر
اسير >> دروحك عريس يعني 😂
رسلان>>لا مش دروحي انا عريس فعلا😂
اسير>> خبر🫢 انقني شفت روان اليوم
رسلان>> تي وين شفتها ازف بديرلنا مشاكل انت
اسير >> تي وهي طالعه من القاعة ياراجل
رسلان >> وباهي؟
اسير >> مش عارف عقلي يقول حاجه وقلبي يقول حاجة كل ما نشوفها قلبي ينغزني
رسلان>> انت مره تبي الرقم مره تبي تحبها مره ماتبيش مره تبي تشوفها مره تبي تكلمها تي اعرف روحك شن تبي وخطاني مش يوم نقاشات
اسير >> انقنه يوم خبر اخرى 😍
رسلان >> اقسم بالله صحبه غبره
ودفه وخبط الباب
اسير يعيط من برا>>تحساب روحك بتقعد عريس ديما
طلع اسير بعد ما خفف دمه لعند شبع و ركبت فوق
//
//
فطنت الرسلان يبرم وخذا دخانه ونزل ، ما عبرتش بكل خذيت راحتي وشفت الحوش ومشيت نشوف فالدبش اللي هما جايبينه لانه سارة قالت لي طلعت وجبتلك كم حاجه
شويه سمعت رسلان خش
رسلان>> لو تبي اتعشي اسير جاب عشا
سما >> جيعانه بس مش عارفه كني راسي مصدع ومعدتي توجع فيا
رسلان>> عادي من كثر الجوع تسير ، قعمزي كولي بلكي اتريحي
قعمزت ولعت التلفزون رغم اني مانبيش بس عشان يدير صوت فالحوش لانه كملت كلها سكوت🙂
بحتت فالشكارة طلع فيها سندوتشات خذيت واحد ودوبني كيف بديت ناكل معش عرفت معدتي كنها صبيت على طول للحمام ، استفرغتتتت كل شي
رسلان جا يجري >> شن فيه كنك
غسلت وجي >> مش عارفه كبدي زاعمه
رسلان>> شن واكله ؟
سما >> من الصبح ماكليتش حاجه مش عارفه عليش نستفرغ اصلا
رسلان>> معناها من التوتر بس
مسحت وجي وطلعت >> مش ح نقدر ناكل شي وراسي مصدع
رسلان>> نجيبلك بنادول ؟
هزيت براسي
خش للمطبخ جابلي كباية اميه وبنادول ورد مدهن ليا
سما>> هلك ما روحوش ؟
رسلان>> لا روحو بس جناحنا مفصول راه مش ح تسمعيهم ولا يسمعونا عشان هكي طلعت هنا عارف مافيش ازعاج ، بس فيه باب المطبخ المصكر ” واشر عليه” يطلع على دروج تلقي روحك فوسط حوش هلي
هزيت براسي وخذيت الدوا وشربت اميه
رسلان>> تريحي ارقدي انا برا
سما >> اه بنرقد عشان راسي يوقف صداع
طلع رسلان وانا شويه هكي ورقدت
//
//
نضت ثاني يوم ع صوت تخبيط فالمطبخ ، صبيت لفيت شعري وطلعت
لقيت رسلان فالمطبخ يدير في قهوة
سما>> صباح الخير | خليها تو نديرلك
رسلان>> لا نعرف ندير بروحي مش مراد انا😒
سما>> بجوك😒
رسلان>> احسن اليوم؟
سما >> اه الحمدلله
مشيت من جنبه وخشيت نصلي 😒
رسلان>> مافيش حد فالحوش راه امي وسارة بس ، تقدري تطلعي في اي وقت تمشيلهم خويا اغلب وقته برا
سما >> انت عندك خو؟
بحت فيا >> عندي اه
سما >> مانندريش عليه
رسلان>> لو سألتي راك عرفتي 😒
خذا الفنجان وطلع وولع الدخان | خشيت فتحت الدولاب و غيرت دبشي وقلت ننزل نسلم ع امه واخته بما انه الحوش فاضي
//
//
“رسلان ”
مش عارف كني متوتر ، لولا العيب را طلعت و سيبت الحوش لحد ماناخذ عالوضع🙂
من كثر التوتر نضت بدري وخشيت قعدت ندير فقهوه ، ناضت ببحامة الدبدوب دروحها بديرها ليا 😒 بس ما خليتهش
مش عارف ع قد ما كنت ع التلفون ساكنلها اول فترة بس بعد ما قلب الموضوع جد معرفتش شن ندير !
القصة كانت هكي خاشه في بعضها من ناحيتي ومن ناحيتها
//
//
سما>> بننزل الهلك بتنزل ؟
رسلان>> انزلي بندخن ونلحقك
سما >> الشقة انقلبت بنتها دخان من اول يوم🙂
رسلان>> انزلي🙂
نزلت وانا مش فاهمه كيف يخليني ننزل ع هله بروحي 🙂مفروض ينزل يعرفني عليهم يدير لقطة 😒
سارة >> صباح الخير
سما >> صباح النور قلت ننزل نسلم عليكم
سارة >> تعالي ماما جوا | امس روحو العيله كلهم عشان عرفو انه رسلان طلع للحوش وهكي ما بوش يضاقونا وانا قعدت مع ماما اساسا حتشوفيني واجد 😂 ديما قاعده هنا
سما >> احسن مش متعوده عالهدوء😂 الحوش غادي كله بنات ف ديما ازعاج
على خشت صوت صغير ينادي >> مامااااا رسلان وين
سارة>> قول خالو يا قليل الادب | هضا يزن وليدي لي قتلك عليه
مسكته منها >> مشاء الله 😂 لسانه طالع ع خاله
سارة>> تربيت اسير و رسلان 🙂
سما>> امس ما حقيتش
سارة>> كان مع اسير وباته برا 😂
خشينا ع ام رسلان وسلمت عليها وقعمزنا عالطاوله فالمطبخ عشان كانن يفطرن
سارة>>نصبلك حليب وشاهي ؟
سما >> لالا والله ما نفطرش فالصبح
زينب “ام رسلان” >> خليها براحتها بعدين انتي بنتنا توا والحوش حوشك ماتحشميش
ابتسمت ع خشت رسلان ، ونط يزن مشاله يجري
رسلان>> تي وين اليوم ما جيتش الحوشي
يزن>> ماما دارت لي قصة
سارة فنصت فيه>> يززززن
رسلان >> مش شورك بيه 😒
سارة>> معش تخليه يتعلم يرد عليا 🙄 انت واسير خربتوه وفوقها باته
رسلان>> عليك صداع يا خالو عالصبح
يزن >> تنفيخ بكل
ساره>> ماماااااا قوليله
زينب>> نزله وتعال قعمز حذا مراتك
كنت نبحت في يزن ونضحك 😂 مش طبيعي حجمه وصوته عاللسان الي عنده | قعمز رسلان جنبي وسمعت صوت حد يحكي
سارة>> بابا جا ، وطلعت تجري
خش عمي سلم عليا >> مشاء الله مشاء الله مبروك
سلمت عليه >> الله يبارك فيك
سارة >>شفتها كيف سمحه 😂
عطاها رسلان نظره
زينب >> ماتركبوش علي البنت 😂
وانا قعدت مبتسمه ويزن يبرم حذانا ويتناقر هو ورسلان كأنهم كبر بعضهم 😂 برمت ع سارة قعدت نهدرز معاها و رسلان وباته طلعو يهدرزو برا
سما>> نحس فيكي صغيره ع انه عندك بيبي وهكي
سارة>> ليا تقريبا ست سنين متجوزه ، بعد علاقة وطواطي وكان ما خذيت مالك ولد عمي را انظر شن صار 😂
سما >> كم عمرك
سارة>> صح شكلي صغير بس عمري مش صغير واجد 😂 عمري ٢٨
سما >> مازلتي صغيره بكل😂
سارة >> عارفه خوتي كانو ح يجلطونا بيش يجوزو 🙂رسلان لعند استغربنا لما جا وقال نبي نخطب وهكي | من كثر ما فرحنا وافقنا ع شروطه كلهن
سما >> شروط شنو ؟
سارة>> قصدي انه كان يبي كل شي رجاله ع طول وكنت متحمسة بكل اني نشوفك بس ماما قالت لي دابينه هوا اختارها ف على كيفه اهم شي يتريح ، بس طلعتي سمحه الحمدلله😂❤️
قعدنا شويه نهدرزو خش عمي يقيل و عميمه ادير فالغذا هي وساره ورسلان مع يزن وانا قعدت نبرم وشويه وركبت فوق ، مسكت تلفوني وقلت نرن ع البنات
//
//
سالمة>> الحقيرة نخاف نرن عليها يقعد حذاها
روان >> ح تهزبنا 😂 فوتنها
ع طلعت رندة>> بنات ميرا تسأل فيا ما كلمتنش سيمو؟
سالمة>> لا خلوها براحتها تو هي ترن😂
روان>> امس ونحن طالعين من الصاله شفت اسير صاحب رسلان
رندة>> شافك؟
روان>> انا ماركزتش اول ما شفته نزلت عيوني عشان كان احمد مقابلني خفته يفطن
سالمة>> باه ليش ما تحكي معاه ما هوا حكى السيمو عليكي بذات بعد موقف يوم التفريشة حسيت الموضوع خش راسك ❤️🔥
روان>> حكى مره وقعدن حاجات بصدفة يجن ويوم التفريشة بذات حسيته يحكي معايا وعيونه كيف عليا ما فهمتش تلخبطت 😩 بس المفروض هو اللي يرد يفتح الموضوع مش انا
رندة>> دابينها سما قعدت مرات رسلان تو اتلاقو انتي وياه واجد😉
روان >> صاحبه راه مش خوه وعايش معاهم فنفس الحوش 😒
سالمة>> عادي باين انه صاحبة واجد | بحتى تيّح انتي جاته فتره زمان قبل ما يجوز موسى ٢٤ ساعه عندنا هنا لدرجة انه عمامي و موسى ما يعدوش فيه غريب 😂
روان>> خطرها ع تيّح وسيرته شن صار في المركز والماده امتى النتيجة ؟
سالمة>> عاد المره هذي كان ما نجحتش بنقه سودا خلاص اليومين هذينا تطلع النتيجة
ع رنت التلفون
روان >> سيمو سيييمو | الووو “وحطت سبيكر”
سما>> عطوني وحده متجوزه نحكي معاها كذا 💁🏻♀️😂
روان>> عاطك دا😂
سالمة>>ياحقيرة 😂
رندة >> هضا كله وقالبه وجك من اول يوم جا خطبك فيه هالراجل توا قعدتي تبي وحده متجوزه تحكي معاك 😒😂
سما>> ومازلت قالبة وجي ع فكره 😌
روان>> احكيلنا شن صاررررر
سالمة>> ياريت بتفصيل🫢
سما >> شنو قلة الادب هذي ما فيش حشم ؟ 😒
“وانا فعقلي نقول كان تندرو انه من بدايتها استفرغت وصدعت ومرضت ”
سالمة>> بنات هذي مش سيمو !
روان>> حسيت لسانها طول 😂
سما >> تي نبصر معاكن وحشتوني 😭
رندة>> يييييي بتبدا تبكي
سما>> وين ميرا ؟
رندة>> روحت امس مع موسى ماقعدتش معانا بس ح تجي بعدين
سما >> من بيجي ياخذ الڤيلو
روان >> ماكلمنش حد
سما >> تحكي من جدك 😳
روان>> والله عندك راجل اظني 😌 خليه يشيله
سما >> صكرن صكرن طيح سعد اللي عابيه عليكن
//
//
صكرت من البنات ورنيت ع مراد
مراد>> كنك ؟؟؟؟
سما >> الناس تقول خير تقول كيف حالك
مراد>> سما شن فيك كنك ؟ صايره حاجه نجي ناخذك؟
سما >> طول عمرك اوڤر ودراما نفس درامة ميرا بضبط | تي مافي شي😪
مراد>> ما شن عرفني انا لقيت اسمك ويوم صباحيتك انفجعت
سما>> صباحيتك عليك جو قديم 😒😂 المهم بنقولك وين قاعد ؟
مراد>> مروح شور الحوش كنك
سما >> تجي تاخذ الفيلو للمحل ؟ تحشمت نرن ع موسى ولا احمد
مراد>> كني انا ما يتحشموش مني ولا شن😒
سما >> لا طبعا😂 بتجي ولا لا
مراد>> حتى بعد اجوزتي مازلتي في رقبتي الله غالب تو نجي ماتقدريش بلايا 😪
سما >> يا اوڤر خوذ الوصف من موسى “ع خشت رسلان وانا نحكي”
مراد>> ماه جيت معاهم فالتفريشه ياربع دماغ نعرفه نعرفه
سما>> نسيت 🫢 خلاص باي
مراد>> باي
بحت فيا رسلان >> من ؟
سما >> مراد
رسلان رفع حاجبه>> وشن يبي؟
سما >> انا كلمته ياخذ الڤيلو
رسلان>> مافيش غير مراد يجي😪
سما >> مراد الوحيد اللي ح يمشي بدون ما يهزب ولا يحكي عكس موسى واحمد تحشمت نكلمهم
رسلان>> امتي جاي ؟ ” وكان ينت وهو يحكي”
سما >> مسافة الطريق | لو ما تبيش تطلعله تو ننزل نطلعله انا ولا نقول العمي😒
رسلان>> كذا بطلي فترشه 🙂
خشيت من حذاه نلم فالڤيلو وماكانش عندي راس اناقشه 😒
ومسكت تلفوني دزيت الاحمد رسالة
” احمد مش كان معش قعدت معاك فالحوش تنساني ، مش مسامحتك لو صار اي شي فالقضية ولا عند ماما وماتقوليش ، الفتره هذي كنت حايسه بكل فالعرس واللخبطة لي صارت بس حاليا خلاص مش ح نركز غير فالقضية ”
على طول رد احمد بمسج ” تي يا بنتي اهمدي وكوني في راجلك في عروس ماطقتش ٢٤ ساعه تسأل على قضية و جريمة يامينتي عالراجل لي عندك 😂”
ضحكت و حطيت التلفون
شوية ورن مراد قالي انه برا
سما >> رسلاااان مراد لوطا
رسلان>> وكنك تعيطي
سما >> ما منحسابكش فصالة
رسلان>> تو نطلع له ” وخذا الڤيلو مني ” بتطلعي تسلمي عليه؟
سما >> والله ؟ عادي
رسلان>> مدامك مبسوطه بجيته ف اطلعي 😒وحطي حاجه ع راسك
سما >> حاجه ع راسي قدام مراد ؟ 🫠
رسلان>> معناها خليك هن 🙂
طلع وانا خشيت عزقت ايشرب ع شعري وطلعت لقيت رسلان يسلم على مراد وخش للجنان | قربت انا شورهم ومراد كان زارته الضحكه عشان كنت بالحجاب قدامه 😂
مراد >> سيمو الف الف مبروك😂
سما >> بلا ضحك باه 😒
رسلان>> هي تفضل والله اشرب حاجه
مراد >> لا مستعجل والله غير الفرخه هذي ما تبطلش من الطلبات ربي يكون فعونك
رسلان >> الله غالب 😂
سما>> عليك سماطه 😒
خذا مراد الڤيلو >> سيمو تبي حاجه قوليلي اه
قبل ما نرد انا رد رسلان >> لا خلاص انا قاعد ماتخافش 😪
غمزلي مراد بدون ما يفطن رسلان وضحكت عشان عارفه سماطته 😂
رسلان >> عليش زارته الضحكه
سما >> عشان كنت لابسه حجاب
رسلان>> وين لابستيه 🙂شعرك نصه برا
سما >> ماه مراد كيف خويا بالضبط هو تربيت معاه كنا ديما ايام زمان يا عندهم يا عندنا ومراد كان قريب منا بكل انا وميرا ف واخذه عليه
رسلان>> حسيت خاطره يقعد معانا
سما>> عليش مش طايقه مادارلكش شي 😒
رسلان>> هك مزاج 😒
وصبا خذا الدخان وخش للدار يدخن
صبيت وراه >> عندي كم كلمه بنقولهن !
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية هلع)
