رواية ميراث نور الفصل السابع والسبعون 77 بقلم لينا بسيوني
رواية ميراث نور الجزء السابع والسبعون
رواية ميراث نور البارت السابع والسبعون
رواية ميراث نور الحلقة السابعة والسبعون
” سراديب الموتى”
بالفعل نورا هربت جليلة وتعقبناها واندهشتنا لما لقيناها راحت لنفس البيت اللى كان فيه عروسه الفودو اللى عليها صورة نورا!!
دخلت البيت وفتحت باب سرى بيودى لسرداب تحت الارض !!
دخلنا وراها واندهشنا من اللى شفناه!!!
جليلة بتحضن ست شكلها غريب وعينيها كلها سودا !!
نصير علق على المنظر و قال :
اومال فين نيللى ؟!! مين الست دى !!
مارو قال :
قصدك تقول مين المخلوق دا !! دا ملوش قرين!!
جليلة وقفت قدامنا وقالت بنبرة شرسه :
اللى هيقرب من امى هقتله !!
قلتلها :
دى مش امك يا جليلة ! لو انتى امك نيللى !! فدى مش نيللى !!
مارو قرب عليا وقالى :
على ما اعتقد دا قرين نيللى وايسر دمجه مع بشرية.
سألت جليلة :
دا قرين امك؟!!
قالتلى وهى بتصرخ فيا :
إياكم حد يجى نحيتها.
نصير قال :
لو قرين نيللى يبقى لازم نحرقه .
جليلة انهارت لما سمعت كلام نصير وحاولت تهاجمنا بس مارو صدها بسهولة وكتفها بايده.
حاولت تقاومه مقدرتش , فبكت وهى بتقول :
متموتوش أمى ارجوكوا ، انا ماصدقت رجعتلى انا مليش حد غيرها , اقتلونى انا وسيبوها تعيش!!!
قلتلها :
يا جليلة دى مش امك بصى عليها كدا!!! اى ام فى الموقف دا هتدافع عن بنتها .
اللى قدامك ده مسخ , شيطان خايف مننا ولو فى ايده يهرب كان هرب دلوقتى , بصى .. متخشب ومش مدى رد فعل .
جليلة بصت فى وش امها الخالى من المشاعر , بكت بحرقة وهى بتقول :
أرجوك … أرجوكم سيبونا نعيش .. أوعدكم مش هتشفونا تانى …
قطع كلام جليلة صوت تليفونى اللى بيرن !! ظهر على الشاشة رقم حنوش.
وريت الشاشة لنصير ومارو اللى أندهشوا لوهلة …
قلت لمارو :
خليك هنا يا مارو وخلى عينك عليهم , هنرجعلهم تانى لما نخلص على أيسر .
خرجت أنا ونصير … رديت على التليفون وفتحت الاسبيكر ..
قلت :
ألو !!
رد عليا أيسر وقال :
ألووو يانور !!
قولتله :
أيسر !!!
قالى :
أها أيسر … هو أنت مفكر الحيلة الهبلة اللى عملتها دى هتخيل عليا !!… حنوش معايا ولو منفذتش اللى هقولك عليه ,هبعتهولك متقطع فى طرد !!
مردتش عليه وقفلت التليفون فى وشه , بصيت لنصير , نصير أبتسم وحضنى وهو فرحان قالى :
الله عليك يانور … أيسر بلع الطعم .
قولتله :
عيب عليك يانصه …
نصير قالى :
أنا صعبان عليا حنوش أوى !!
قلت لنصير :
حنوش رايح وعارف اللى يحصل.
وعارف كويس هيعمل أيه لما أيسر يمسكه … دلوقتى أيسر هيضطر يلعب بدماغنا أحنا , ومش هيلعب بمزاجه …
حاليا هو مفكر أنه معاه ورقة ضغط علينا , وأنه كشف لعبتنا , ميعرفش أنه دخل لعبتنا . وهيفكر زى ما أحنا عايزين.
نصير قالى :
ربنا يستر …
قلتله :
ان شاء الله ربنا هيستر .. دلوقتى لو كلمناه هيطلب منى السيف مقابل حياة حنوش وكدا هيبقى بلع الطعم صح .
أتصلت على تليفون حنوش , فأيسر رد عليا وقال :
للدرجة دى حنوش مش فارق معاكم ؟!!
قولتله :
طلباتك أيه ؟!!
قالى :
السيف !!
قولتله :
تعالا خده !!
أيسر ضحك وقال :
لا هاتهولى أنت … اظن أنت عارف مكانى كويس , مستشفى عرقة … معاك نص ساعة وتكون عندى لوحدك ومعاك السيف !!
قفل فى وشى التليفون..
نصير قال :
أكيد فخ !!
قولتله :
أكيد … ومهما كان الفخ أحنا جاهزين .
نصير قالى :
أكيد جاهزين ..
قلت لنصير :
بما أنك مش هينفع تراقبنى بالسحر وتشووف اللى بيحصل علشان الحماية اللى عملها أيسر , فأنا عندى حاجة مش هتيجى على بال أيسر ِ
نصير قالى :
أيه ؟!!
خرجت دبوس صغير من قميصى وقولتله:
هنلجأ للتكنولوجيا واللى أهملها أيسر من كتر هوسه بالسحر .. مد أيدك.
مد كف أيده وفتحته , حطيتله فى كفه كاميرا فى حجم رأس عود الكبريت.
قولتله :
دى هتنقل كل اللى بيحصل جوه مباشر.
نصير بص بأندهاش على الكاميرا الصغيرة وقالى :
دى !!؟ أيه دى ؟!!
قولتله :
دى كاميرا .. مدير قسم البرمجة اللى فى الشغل أدهالى كادو , مكنتش عارف هعمل بيها أيه بس جه دورها دلوقتى
خدت من نصير الكاميرا ورجعتها فى قميصى تانى , أديتله موبايلى وفتحتله التطبيق اللى هيشغل من عليه الكاميرا .
وقولتله :
كده أنت تقدر تشوفنى صوت وصورة ..
اخدت السيف من نصير و أستدعيت ننح , ظهر فقولته :
بص يا عم ننح .. انا هطلب منك طلب غريب شويه فشغل دماغك معايا.. طبعا ان بتطيع حامل السيف واللى هو انا حاليا.
قالى :
عايز ايه اخلص؟!!
قلتله :
خير ان شاء الله .. انا كحامل السيف بأمرك ان اى حد يمسك السيف من بعدى تلعنه
ننح هرش دماغه وقالى:
بص هو أنا أول مره أتعرض لطلب زى ده , مش عارف كدا فيها خرق للقاعدة وللخدمة ولا مفهاش !!
قلتله :
مفهاش اى خرق قاعدة .. دا حقى كأنى بالضبط معايا جهاز تليفون جديد وبعمله رمز حماية ضد السرقة ..
ننح هرش فى دماغه اكتر وقال :
مش كل الناس هقدر العنها، فى سحرة اقوياء عاملين حماية على نفسهم ضد الجن .. زى ايسر بتاعكم مثلا !!
قلتله :
انت تقدر تعمل ايه مع ايسر ؟!!
قالى :
انا اخرى انيمهولك اى فترة انت عايزها .
قلتله :
خلاص اى حد يمسك السيف من بعدى نيمه.
قالى وهو بيفكر :
بص هنفذلك طلبك بس بطريقتى.
قلتله :
مش فاهم !!
قالى :
مش لازم تفهم …. أى طلبات تانية ؟!!
قلتله :
أها …انقلنى مستشفى عرقة فى السعودية
قالى :
امرك يا حامل السيف!
نقلنى المستشفى فأمرته يرجع فى السيف !!
شيلت السيف على كتفى ودخلت مبنى المستشفى.. نديت بعلو صوتى وقلت :
يا ايسر ..انت فين يا ايسر.. انا جبتلك السيف اللى بتحبه اهو!!
سمعت صوته جاى من ورايا..
التفت فشوفت أيسر ماسك عصاية مارو بدراع والدراع التانى مقطوع ومركب مكانه خطاف حديد فى أخره سلسلة بيجرجر بيها حنوش اللى متشكل على شكل جليلة و كان واقف جنبهم زيجا .
ايسر ضحك وقالى :
جيت لوحدك ولا جيبت الشلة بتاعتك معاك ؟!
قلتله :
جيتلك لوحدى لايسر …. خد السيف وهات حنوش .
قالى :
بالسهولة دى يانور !!من غير أى مقاومة منك … غريبة دى !!
قلتله :
ولا غريبة ولاحاجة , بص يا أيسر أنا جاى أعقد معاك صفقة .. أنا شايف دلوقتى فى أيدك عصاية مارو ونجحت فى أنك تكشف حنوش وهتبادله بالسيف , كده هيبقى معاك سلاحين فتاكين … خدهم يا أيسر واحنا مش هنجرى وراك , علشان أحنا تعبنا , وعرفنا أنك كسبت, بس أوعدنا يا أيسر انك تسيبنا فى حالنا زى ماهنسيبك فى حالك.
ضحك بسخرية وحاول يسقف على أيده اللى مركب فيها خطاف الحديد وقالى بدون مقدمات :
شغل السيف !!
بصتله بأستغراب , فقالى بنبرة تهديد :
شغل السيف َ!!
قولتله :
حاضر … متزعقش !!
تمتمت بالتعزيمة اللى بتخرج ننح , ننح ظهر وقالى :
أمرك يا حامل السيف !!
بصيت لأيسر وقولتله :
ها .. عايزنى أطلب حاجة معينة ؟!
أيسر قالى :
أها … أؤمره أنه يقتلنى !!
قولتله :
نعم !!
قالى :
زى ماسمعت أؤمره أنه يقتلنى !!
قولتله :
أها فهمت … أحنا فعلا طلبنا منه قبل كده أنه يقتلك او يخطفك , بس قالنا أنك عامل حماية على نفسك، خلاص يا أيسر عرفنا أنك هجين و جامد , مش لازم كل شوية تأكد على المعنى.
أتفضل خد السيف وأدينا حنوش وسيبنا نمضى فى سلام .
امرت ننح يدخل السيف تانى ومديت أيدى بالسيف لأيسر واللى رفض يمسكه فى أيده وقال لزيجا :
زيجا !! خد السيف منه.
زيجا مد ايده وخد السيف .. وفاجئنا كلنا وحاول يهرب بيه!!
أيسر أستخدم العصاية وشاور على زيجا فجمده فى مكانه , فك السلسة اللى بيجرجر بيها حنوش من خطافه وجرى ناحية زيجا اللى متجمد . وخطف من أيده السيف …
فى الوقت ده حنوش كان بيحاول يحرر نفسه من السلاسل وانا كنت عايز انتهز الفرصة ان ايسر ماسك السيف والعصاية بايد واحدة واهجم عليه بس استنيت.
ايسر تمتم بسرعة بالتعزيمات اللى بتخرج ننح من السيف , ننح خرج وقاله ببرود :
قبل ما تؤمر اى امر لازم اقولك اوامر حامل السيف اللى قابلك ..تسمع ولا تؤمر.
ايسر قاله بعصبية:
نفذ الامر الاول ..بعدين نسمع .. اقتلهم كلهم.
ننح قاله :
اوامر حامل السيف واجبة وانت اختارت انك متسمعش.
ايسر بصله باستغراب فننح كمل وقال :
نام يا ايسر نام ..
ايسر وقع على الارض واغمى عليه.
جريت بسرعة على حنوش وفكيته واطمنت عليه.
اتلفت ورايا ملقتش الا السيف !!
ايسر وزيجا والعصاية اختفوا!!
رجعت بحنوش والسيف لنصير ورحنا لمارو اللى كان لسه بيحرس جليلة وقرين نيللى.
حنوش قال :
هو دا قرين نيللى ؟!!
قلناله :
اها !!
قالنا :
لازم يتحرق مش هنكرر اخطائنا تانى!!
جليلة انهارت وانكسرت قدمنا لدرجة انها حاولت تبوس رجلينا وهى بتترجانا.
مش عارف.. بس صعبت عليا وعليهم!!
قلتلها :
احنا حظرناكى يا بنتى وقلنالك ان اللى معاكى دى مش امك!! دا شيطان وممكن يغدر بيكى فى اى وقت.
احنا مش هنقتله ولا هنضطر نقتلك واحنا مبنقتلش اطفال احنا هننفيكم وبطريقتنا .. هنوديكى مكان تبدأى حياتك فيه من جديد ولو فكرتى ترجعلنا عشان تنتقمى ساعتها مش هنديكى فرصه تانيه .. انتى فاهمة .
مسحت دموعها وهى فرحانه وقالت :
موافقة ولا هأذيكم ولا تأذونى .
************************************************
” زيجا ”
ايسر جمدنى بس بعد ما نام , السحر اللى مجمدنى بيه اتبطل.
وقعت على الارض , فقت وشوفت نور وهو بيفك حنوش
وشوفت ايسر وهو مغمى عليه جنبى.
جريت بسرعة ومسكت العصاية وانا بتمتم بالتعزيمات اللى كنت بسمعها من مارو.
انتهزت الفرصه ومسكت ايد ايسر واتنقلت بيه بالعصاية لسراديب الموتى .
ايسر فتح عينه على خراطيم معدنية متوصلة باناء بيغلى
اتلفت حواليه وشاف الجماجم والعظام البشرية فى كل مكان , ضحكت وقلتله :
حبيبى يا ايسر!!! كل دا نوم!!
ايه رايك نجرب تجربة جديدة مع بعض، نرجع ايام زمان بس المرة دى هتبقى انت فار التجارب يا ايسر .. طبعا هتسأل نفسك على الحماية اللى كانت عليك؟!!
شاورتله على العصاية وقلتله :
عندك حق العصاية طلعت طاقتها السحرية لا نهائية واقوى من السيف .. كان ممكن تكتفى بيها يا ايسر لوحدها بس انت طمااع .
ايسر حاول يفك نفسه من السلاسل بس فشل , حاول يستعدى شاروك بس مستجبلهوش.
ضحكت وقلتله :
شاروك اول واحد جرى وسابك ..
قالى وهو مرعوب :
زيجا انا عالجتك .. فكنى يا زيجا !!
قلتله وانا بفتح محابس الخراطيم :
شكرا يا ايسر انك عالجتنى .. بس فكرنى مين كدا اللى حولنى مسخ فى الاول !
قالى :
لو قتلتنى مش هتعرف ابوك وامك مين وحصلهم ايه !!
قلتله :
ولا يهمنى مهما كانت القصة نهايتها واحدة ومش هتتغير هيفضلوا ميتين وهتفضل انت اللى قتلتهم .
قالى وهو بيترجانى وبيحاول يحرر نفسه :
زيجا ارجع عن اللى هتعمله!!
قلتله :
مش لما تعرف ايه اللى هعمله الاول !!
بص يا عم ايسر .. شايف الخراطيم المتوصله فيك دى ؟! دى هتضخ حديد مصهور فى عروقك .. شويه كدا وجسمك كله هيبقى عبارة عن قطعة فنية من الحديد .. تمثال هزين بيه سراديب الموتى.
على فكرة التجربة كلها متصورة صوت وصورة للذكرى!
الحديد بدأ يتدفق فى عروقه وصرخ بصوت هز ارجاء المكان، فضلت اتفرج عليه لحد ما اتجمد وبقى عبارة عن تمثال حديد!
************************************************
” نور ”
استقرينا فى كهف حنوش واللى سافر لارض الفردوس المكان اللى نفينا فيه جليلة وقرين امها.
بعد فترة رجع حنوش الكهف وهو شايل فى ايده عصاية مارو وطرد !!
قلناله :
ايه دا ؟!!
قالنا :
معرفش لقيتهم على باب الكهف !! مش تقولولى حمد لله على السلامة الاول
مارو جرى على العصاية بلهفة وخطفها من حنوش , حضنها وقال :
عصايتى ,حبيبتى , وحشتينى اوى.
اخدت الطرد من حنوش وحطيته على التربيزة وبدئت افتحه , العيلة كلها أتلمت حوليا فى فضول عشان يعرفوا ايه اللى فى الطرد .
فتحت الطرد لقيت جواه طرد!!!
فتحت الطرد التانى لقيت جواه طرد تالت!!
والتالت جواه رابع وهكذا لحد ما وصلنا لحد صغير جواه فلاشة !!
شغلنا الفلاشه على التلفزيون وفتحت الفيديو اللى فيها واتصدمنا باللى شفناه!!
فيديو قتل ايسر على ايد زيجا ورسالة من زيجا بيقولنا فيها انه هيختفى خالص وهيبدأ حياة جديدة بعيد عن كل الماضى وهيفضل فاكرنا بالخير وهيفضل فاكر صديقه مارو وعيلته التانيه ” عيله ناير “.
نصير قال :
اصيل الواد زيجا, شاف ايام سواد
قلتله :
على الاقل هو هيقدر يبدأ حياة جديدة .. احنا اللى هنفضل مستخبيين وبنتنقل زى الحرامية ..مقدمناش بقى غير انى اغير شكلى طول عمرى وحنوش يضربلنا ورق ونعيش فى اى بلد مطرفة .
حنوش قال :
واضربلكم ورق ليه لما ممكن تسلم نفسك واطلعك منها زى الشعرة من العجينة!!
قلتله :
ازاى يا فكيك فاكر نفسك فريد الديب !!
قالى :
سلم نفسك ولو معرفتش اطلعك ههربك تانى يا سيدى!!
قلتله :
انت بتتكلم بجد يا حنوش !! هتقدر تطلعنى براءه !! دى جرايم قتل وارهاب!!
قالى بنبرة محامى مخضرم:
انا درست القضية واعتقد انى اقدر اخرجك وهعمل رد اعتبار كمان
سمعت كلام حنوش وسلمت نفسي وجيه يوم المحاكمة.
“قاعة المحكمة ”
حنوش وقف فى قاعة المحكمة بروب المحاماة….
وكيل النيابة قدم محاضره عن السحر وانه من الموبقات السبعة وانه محرم فى كل الأديان وعدد جرايمى بدأها بالاقل ” السحر والشعوذة ” ونهاها ” بالقتل والإرهاب
الناس هاجت فى القاعة واللى كانوا أغلبهم من قرية النيارين حشدهم حنوش عشان يسندونى فى المحكمة …
غير انه نشرهم على وسائل التواصل عشان يعددوا كراماتى وازاى ساعدتهم فى الخير بدون أى اجر ،بالعكس كنت بساعد المحتاج واللى مش قادر على العلاج …
حنوش كان قصدوا بالحركة دى انه يربك الرآى العام ويخلى الناس فى حاله تشكك من اللى شافوه وسمعوه
حنوش قام ، عدل الروب وقال :
سيدى القاضى .. حضرات المستشارين .. انى لا أنكر أى من الإدعاءات التى ادعتها النيابة على موكلى السيد نور أحمد ناير ..
ان موكلى ساحر .. نعم .. أن موكلى ساحر !
قلت لنفسى :
الله يخربيتك يا حنوش هتودينى فى داهية!!
كمل كلامه وقال :
لكنه ليس ساحر كما تظنون .. أنه ساحر فى العلم .. عالم من علماء هذه الأمه والذين يحاربون من أجهزة وقوى خارجية هدفها زعزعة الأمن والإستقرار والقضاء على الكوادر العلمية امثال موكلى ….
القاضى قاله :
انجز عايز تقول ايه ؟!!
حنوش جرى جاب أوراقه من الشنطة وفرشهم قدام القضاه وهو بيقول :
الحادثة الأولى سيدى القاضى كانت فى مصنع الكهرباء واللى على طريق مصر الإسكندرية الزراعى
الحادثة الثانية كانت بعدها ب 5 دقائق بمحل مصوغات بالمهندسين ..
اما الحادثة الثالثة كانت فى مول تجارى بمدينة نصر بعدها ب 3 دقايق فقط !!
سيدى القاضى
من هذا الشخص الذى بأستطاعة التواجد فى 3 أماكن فى نفس الوقت تقريبا
القاضى قاله :
ساحر !!
قلتله :
من امتى يا سيادة القاضى والمحكمة بتأخد بالامور الروحانية، المحكمة بتاخد بالأدلة القانونية الملموسة ..
أولا يا سيادة القاضى الكاميرات لم توضح شكل موكلى بالتفصيل ومن المرجح انه ليس موكلى انما هم 3 اشخاص مختلفين يشبهون موكلى ،
دوبلير يا سيادة القاضى زى تصوير السينما .. دى حمله ممنهجة يا سيادة القاضى غرضها النيل من سمعة موكلى وانا هثبت لحضرتك حالا …
حنوش شاور على واحد عشوائى من اللى قاعدين فى القاعة
كان واحد لابس جلابية وشكله تعليمه على قده ..
وقفه قدام القاضى وقاله :
لو هتسرق جاموسه من الزريبه اللى جنبكم ، إيه اول حاجة هتعملها ؟
الراجل كان بيبص للقاضى وخاف يرد
حنوش قاله :
متخفش دا سؤال افتراضى
حنوش بص للقاضى وقاله :
سيادة القاضى هل تجيز السؤال ؟
القاضى هزله راسه بالموافقة
حنوش قال للراجل :
اهو القاضى سمح ها جاوب هتعمل ايه ؟
رد وقال :
هراقب المكان كويس واعرف الأوقات اللى الزريبة فيها بتبقى فاضيه واتلثم وأروح أسرق الجاموسه
حنوش قطع كلام الراجل وقال :
لحد هنا وهنقف هتعمل ايه .. هتتلثم ؟!!
انها الغريزة يا سيدة القاضى . من يرتكب جريمة هيتللثم .. هيغطى وشه !! حتى لو كان ذكائة محدود
وبص للراجل وهو بيقول :
لامؤاخذه يابلدياتنا
فما بالك ياسيادة القاضى بشخص يقال عنه ساحر مخضرم وذكى مش هيغطى وشه وهيكشف عن هويته ويقف قدام الكاميرات كأنه يداعب الجماهير يا سيادة القاضى !!
سيدى القاضى انى لديا الدليل القاطع الذى يؤكد ان موكلى لم يرتكب هذه الجرائم
القاضى قاله بفضول :
ايه !! ؟
طلعله ملف فيه بصمات وقاله ؛
اتفضل يا سيادة القاضى .. تقرير المعمل الجنائى أثبت عدم تطابق بصمات موكللى بالبصمات الموجودة على سلاح الجريمة والأماكن التى ارتكبت فيها الجرائم مع انه يظهر فى شريط الفيديو ان القتلة الثلاث منتحلى شخصية موكلى لم يرتدوا قفازات
تدخل وكيل النيابة وقال :
وتفسر بايه التحريات اللى أثبتت أن موكلك شغال فى الدجل والشعوذة؟
حنوش قاله :
هات دليل واحد انه يعمل بالدجل والشعوذة هناك فرق كبير بين المعالج الروحانى وبين المشعوذ وانا على استعداد أن أجلس مع حضراتكم لنستمع لشهدات سكان قرية النيارين ،
وانا واثق انهم سيؤكدون لسيادتكم ان موكلى لم يتقاضى اى اجر مادى نظير خدمته اهل القرية ،
هم من كانوا يطرقون بابه طالبين منه أن يعالجهم نظرا لسمعة اجداده الطيبة الذين عملوا كأطباء بالاعشاب ..
موكلى كان يزيل الأوهام عنهم وفى اغغلب الحالات ينصحهم بزيارة الطبيب ..
وأوكد انه لما يتقاضى اجرا ماديا نظير نصائحه
سيدى القاضى قد وضحت الرؤيه امامكم ولكننى ساوضحها لكم اكتر وسأثبت لكم وللعالم أن الذئب برئ من دم ابن يعقوب
معى هنا ووسط الحاضرين الدكتور صاحب الإدعاء أن موكلى ساحر ..
نادوا على الدكتور الشاهد واللى انكر كل اللى قاله واكد على كلام حنوش وقال انه تقاضى اجر مادى مقابل التشهير بيا وقال انه مكنش يعرف ان الجرايم دى كلها هتحصل ..
القاضى أجل القضية جلستين ورا بعض … حنوش اكدلى أننا هنكسب القضية … وبالفعل كسبنا القضيه!!
الموضوع جيه معايا بنتيجة عكسية!!
شهرة.. عروض شغل فى أكبر الشركات.. صحافة واعلام ومقابلات مبتخلصش!!
رجعنا تانى واستقرينا فى بيتنا واتلمينا حوالين ترابيزة واحدة ..
حوالين أكل سندس
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية ميراث نور)
