رواية موعد مع الليث الفصل الأول 1 بقلم منى مرزوق
رواية موعد مع الليث الجزء الأول
رواية موعد مع الليث البارت الأول
رواية موعد مع الليث الحلقة الأولى
” إنه يراكم هو وقبيله من حيث لا ترونهم ”
– مش عارفه دي المره الكام اللي اشوف فيها نفس الحلم و اصحى على نفس الٱيه، الحلم مخيف بس اكيد فيه سبب.
*صباح الفل يا ست الكل
– صباح الخير يا قلبي، ايه اجيب الفطار ؟
* اه يا ماما و انا هدخل الحمام على ما تخلصي
– ماشي يا حبيبتي
___________________________________________
*هتعملي ايه دلوقتي يا منى؟
منى: هقدم زي ما قولتلك في الشركة دي وربنا يسهل يا ماما، ادعيلي
سميه والدة منى : ربنا معاكي و يوفقك يا رب يابنتي
منى بتبوس ايدها و بترد : يا رب،تسلملي دعواتك القمر دي يا قمر انت.
سميه : هههههه ماشي يا بكاشه، يلا روحي انتي غيري هدومك و اجهزي عشان متتأخريش
منى : تمام
___________________________________________
منى : اهلا بحضرتك يا افندم
– عندك كام سنه بقى يا منى و خريجة ايه؟
منى : انا عندي 26 سنه و معايا بكالوريوس اعلام
– طب و اشتغلتي فين قبل كده؟
منى : اشتغلت في اكتر من قناة فضائية و 3 جرايد خاصه
– طب و يا ترى عندك فكره عن طبيعة الشغل هنا ف التسويق؟
منى : ايوه طبعا يا افندم، انا من ضمن دراستي كانت دعايا و اعلان
– اممم حلو اوي، عاجبني شطارتك دي يا منى
منى : ميرسي لحضرتك و اتمنى بإذن الله اذا اتقبلت ف الوظيفة اكون عند حسن ظن حضرتك
– *بيرد و هو بيقوم من على مكتبه* : انتي اعتبري نفسك خلاص اتقبلتي و لو تحبي ممكن نكتب عقد الشغل حالا
منى بدهشه : ده بجد؟!
– ايوه طبعا بس…
منى : بس ايه؟
– انتى لازم تعرفي بقية طبيعة شغلك و المطلوب منك
منى : و يا ترى ايه المطلوب؟
– بصي يا منى انتي ماشاء الله عليكي مثقفه و ذكيه و واعيه و انا عارف انك هتفهميني بسرعه
منى : افهم ايه؟
*بيقرب منها و بإبتسامه خبيثه بيقول*: يعني انتي وظيفتك مش هتكون بس في الشركه هنا
منى : اومال فين؟
– في اي مكان انا هكون فيه
منى : يعني ايه؟
– يعني هتلازميني مكان ما اروح واللي اطلبه منك يتنفذ بالحرف الواحد
منى بحذر : هو حضرتك بتتكلم كلام غامض ليه؟
– تعبتيني معاكي يا منى…. من الٱخر انا عايزك ليا يعني تنسي اهلك و نفسك و تكوني معايا انا و بس، يعني تعتبري نفسك على ذمتى مش موظفه عندي
منى بصدمه : ايه؟! انت بتقول ايه؟ انت اكيد انسان مريض لا يمكن تكون طبيعي
– لا بقولك ايه لسانك هيطول هندمك على اليوم اللي اتولدتي فيه، انتي متعرفيش انا ابقى مين
منى بدموع : لا عرفت، انت انسان حقير و زباله
– انا يا بنت ال…… اااااه
بتصرخ منى من المنظر *نجفة المكتب وقعت فوق دماغه قبل ما يكمل كلامه و وقع على الارض سايح ف دمه*
بتخرج منى من المكتب تجري و كل الموظفين بيجروا عليه، وبعدها بتخرج منى من الشركه و بتعمل مكالمة
منى بدموع : الو، ايوه يا اميره، انتي فين؟ … لا متقلقيش قابليني بس في الكافيه اللي هبعتلك اللوكيشن بتاعه
___________________________________________
اميره : معلش اتأخرت عليكي
منى : لا متأخرتيش، اقعدي بس خدي نفسك م المشوار
اميره : ٱخد نفسي ايه بس يا شيخه ده انتي قطعتي نفسي من صوتك في التليفون، طمنيني مالك ايه اللي حصل؟
منى بتنهيده : هحكيلك
( بتحكي منى لأميرة كل اللي حصل)
اميرة : اما راجل ابن &$# صحيح، واهه الحمدلله ربنا اخدلك حقك و نال جزاؤه في ساعتها
منى بشرود : بس..بس انا حاسه بالذنب
اميره : ليه بقى ان شاء الله؟
منى : معرفش بس عندي احساس غريب بتأنيب الضمير،يمكن عشان من جوايا لما قالي الكلام ده اتمنيت ان حاجة وحشه تحصله، لكن…لكن والله ده كان مجرد تفكير جوايا بسبب غضبي منه
اميره : واللي اتمنتيه حصل،احمدي ربنا و خلي بالك من نفسك و بعد كده متروحيش مقابلات شغل لوحدك خالص عشان اديكي شايفه اللي بيحصل
منى : معاكي حق
___________________________________________
منى : السلام عليكم
سميه : وعليكم السلام، ايه يا حبيبتي طمنيني عملتي ايه؟
منى بتقرر تخبي عليها اللي حصل و بترد : ولا حاجه يا ماما،طلع شغل مش ادد كده و مشوره و مجهود ع الفاضي
سميه : يعني مقدمتيش؟
منى : ايه؟ اه…لا مقدمتش ماهو انا بقولك مطلعش كويس
سميه ب شك : مالك يابت انتي شكلك فيكي حاجة ومش عارفه تتكلمي ليه؟
منى : مفيش يا ماما مرهقه بس من المشوار و كده، بصي هدخل انام شوية و بإذن الله هصحى تمام
سميه : ماشي يابنتي على راحتك
___________________________________________
( بتدخل منى اوضتها و بترمي نفسها ع السرير و هي بتكلم نفسها) : ياااه هي الناس بقت بتفكر بالشكل المقزز و المرعب ده ازاي؟ الحمدلله يا رب بس… بس انا حاسه ان اللي حصل ده مش طبيعي، و كأني مكنتش مع المدير ده في المكتب لوحدي
*بعد شويه من التفكير بتروح منى ف النوم*
منى : ايه ده؟ انا فين؟ وانت مين؟
– انتي في ارضنا
منى : ارض مين؟ انا ايه اللي جابني هنا؟ و فين ماما؟
– انتي اللي جيتي بنفسك
منى : جيت بنفسي ازاي؟ انا معرفش المكان ده
– لا تعرفيه و زورتيه كتير
منى : انت كذاب ده محصلش، قولي ازاي ارجع؟
– مبقاش ينفع ترجعي
منى : ليه مينفعش ارجع ؟
– عشان انتي المختاره
منى : مختاره يعني ايه؟
– زي ما بتفكري فيهم هما كمان بيفكروا فيكي
منى : انت بتقول ايه؟ هما مين دول؟
*بيشاور بإيده على الارض* و بيرد : اللي تحت الارض
منى بصدمه : تقصد ايه؟
*بيلف الراجل ضهره ليها و بيظهر من ضهره شخص تاني و كأن الراجل ده شخص بوجهين* بيرد عليها و بيقول : اللي عملتيه زمان متنساش لحد النهارده
منى بدموع : هو ايه اللي عملته؟
*بتبدأ كل حاجة حواليها تنهار و كأنه زلزال قوي او فيضان* و بيرد عليها الراجل بصوت عالي : إنه يراكم هو و قبيله من حيث لا ترونهم
*مع اصوات صراخ مخيفه مش معروف جايه منين*
بتقوم منى من النوم مفزوعه و بتصرخ، و بتدخل مامتها الاوضه بسرعه و بتقول : في ايه يا منى مالك؟ ايه اللي حصل؟
منى بعياط : ش.. شوفته
سميه : شوفتي مين؟
منى : الحلم
سميه : حلم ايه يا حبيبتي؟ تلاقيه كابوس، استغفري كتير و استعيذي بالله من الشيطان
منى : لا لا مش كابوس،مش عارفه دي المره الكام اللي اشوف فيها نفس الحلم و اصحى على نفس الٱيه، الحلم مخيف بس..بس اكيد فيه سبب.
سميه : يا حبيبتي صدقيني ده كابوس، بصي اقري قرٱن و نامي و ان شاء الله مفيش حاجة وحشة هتشوفيها
منى بعياط : لا يا ماما لا بلاش تسيبيني، هو… هو قالي انهم عايزني
سميه : هو مين؟ و مين اللي عايزينك؟
منى : قالي من تحت الارض
سميه بصدمه : بسم الله الرحمن الرحيم… انتي ايه يابنتي اللي بتقوليه ده؟
منى : صدقيني يا ماما والله ما بكذب عليكي، نفس الحلم بنفس الكلام و الاحداث بيتكرر معايا بس المره دي كان مخيف اكتر من اي مره تانيه قبل كده
سميه وهي بتاخد منى في حضنها : طب يا حبيبتي انا هنام معاكي النهارده في الاوضه، وبكره بإذن الله ابقى ابخرك و ارقيكي عشان صدقيني كل ده بسبب العين انتي محسوده انا عارفه
منى : محسودة ايه بس يا ماما
سميه : اسكتي انتي انا عارفه انا بقول ايه، يلا انتي دلوقتي غمضي عينك و نامي و متفكريش
منى بقلق : حاضر يا ماما حاضر
___________________________________________
منى : صباح الخير يا ماما
سميه : صباح الخير يا حبيبتي، طمنيني عليكي عامله ايه النهارده؟
منى : الحمدلله كويسه
سميه : اسمعي يا منى انتي من هنا و رايح تاخدي بالك من نفسك وبلاش تخرجي لابسه على سنجة عشرة ولا حطه لي في وشك مكياچ
منى : يا سلام! و ده ليه بقى؟
سميه : عشان العين يابنتي، انتي مشوفتيش بنفسك اللي حصلك امبارح؟
منى : يا ماما عين ايه بس، وبعدين المفروض انزل من البيت مبهدله عشان متحسدش؟ ده على اساس ان الانسان الطبيعي بيمشي ف الشارع لابس شوال؟
سميه : مقولتش تمشي مبهدله بس انتي يابنتي ماشاء الله عليكي جميله و كمان هيئتك بتلفت النظر ليكي اكتر
منى بإبتسامه : يبقى تفرحي يا ست الكل و تقولي الحمدلله على نعمته، و عموما متقلقيش انا هنتظم على قراءة الاذكار و بإذن الله مشوفش حاجة وحشه تاني
سميه : بإذن الله يا حبيبتي، صحيح بالمناسبة ناوية تيجي معايا فرح لمياء بنت خالك؟
منى : اممم مش عارفه بصراحه يا ماما
سميه : ايه ده، لا مش عارفه ايه ده فرح بنت خالك يا بنتي و ان مروحتيش عشانها يبقى عشان خالك
منى : هههههههههههه انتي غلبتيني يا ماما
سميه : ازاي يعني؟
منى : يعني منين خايفه عليا انزل الشارع عشان متحسدش و منين عايزه توديني فرح مليان ناس؟
سميه بإرتباك : ما.. ماهو يابت الفرح كله ناس و كلهم يعني عاملين في نفسهم ما يُعمل ف مش هيسيبوهم كلهم و يركزوا معاكي لوحدك
منى : طب الحمدلله ياريت تقتنعي بنفس الكلام ده وانا نازله و طالعه عادي و تعرفي اني مش محور الكون يعني
سميه : ماشي ياختي يلا خلصي فطارك عشان نبقى نقوم نشوف هنلبس ايه في الفرح
منى : حلاوتك يا سو احبك وانت مخطط كده
سميه : هههههههههههه ماشي ياختي
___________________________________________
منى : الله يا ماما ماشاء الله الفرح جميل اوي، مكنتش اعرف ان عريس لمياء مستواه عالي كده اللهم بارك
سميه : عريس لمياء؟ هو انتي فاكره ان هو اللي عامل الفرح ده؟
منى : مش هو ده المفروض؟
سميه : لا يا حبيبتي خالك هو اللي عامل الفرح على حسابه، متنسيش ان دي بنته الوحيده
منى : ماشاء الله مكنتش اعرف ان عندي خال غني والله
سميه : هههههههههههههه اديكي عرفتي
*بعد نص ساعه*
منى : ماما انا هقوم اقعد عند النيل بعيد شويه عن هنا عشان الزحمه خنقتني
سميه : ماشي يا حبيبتي
*بتقوم منى و بتروح تقعد على ترابيزه بعيده قدام النيل*
– حلو النيل بليل
منى : افندم؟!
– ٱسف لو كنت خضيتك، انا محمد صاحب العريس
منى بعدم اهتمام : اهلا
محمد : انتي صاحبة العروسة ولا قريبتها؟ اصل انا عارف كل عيلة العريس، صاحبي بقى و كده
منى : مش مهتمه اعرف على فكره
محمد : اممم شكلك متضايقة شويه يا…… هو انتي قولتيلي اسمك ايه؟
منى : مقولتش اسمي والله و لو سمحت اتفضل من هنا عش…. اااااااع
*بتصرخ منى اول ما بتقع فوق راس محمد لمبه كبيرة من بتوع الفرح و بيقع ف الارض مغمى عليه* ___________________________________________
سميه : يا حبيبتي اهدي و بطلي عياط بقى، ماهو الواد فاق الحمدلله و بقى كويس اهه
منى بشحتفه : ل.. لا انا السبب انا السبب
سميه : يابت انتي السبب ازاي يخربيتك، هتجيبيلنا مصيبه، هو انتي اللي وقعتي اللمبه فوق نفوخه؟
منى : لا بس… بس انا كنت متضايقة منه و مكنتش طيقاه
سميه : وعشان كده يعني هو جراله كده؟
منى وهي بتحرك راسها بمعنى الموافقه : ايوه
سميه : ليه ياختي مكشوف عنك الحجاب؟ و لا من اصحاب البركات؟
منى : تؤ يا ماما انا بتكلم جد والله وبعدين دي مش اول مره انا حصل معايا نفس الموقف تقريبا قبل كده
سميه : و ده امتى و فين ده؟
*بتحكي منى لمامتها اللي حصل ف الشركه*
سميه : يا ابن ال&#$@ طب ده انتي تحمدي ربنا ان ده اللي حصله بس عشان لو مكنش حصل كنت هروح اخلص عليه بإيدي
منى : خلاص اهه خلص خالص من غير مجهود منك
سميه : احسن يلا ف داهيه
منى : بس بجد يا ماما الموضوع بقى يقلق و يخوف، انا حاسه اني بقيت قدم نحس عالناس كده
سميه : فشرر بس يابت تفي من بوقك واياكي اسمعك بتقولي كده تاني و حسك عينك تقولي الكلام ده لحد
منى : خلاص خلاص اهدي، مش قايله ولا عايده حاجه ، يلا ربنا يسترها على عبيده
___________________________________________
اميره : لا بقولك ايه انا زهقانه و عايزه انزل و انتي كل شويه تطلعيلي ب حجه، انجزي و قومي البسي عشان ننزل نروح نقعد ف اي حته
منى : طب خلاص ايه الماسورة اللي فتحت ف وشي دي، قايمه البس اهه ياختي
اميره : ايوه كده شطووره قلب ماما
___________________________________________
منى : بصي انا مش معترضة على المكان خالص، لكن اكيد هكون معترضه عالفاتوره اللي هتنزلنا، بت اوعي تفتحي ازازة المايه
اميره : ازازة مايه ايه يا متسوله ده مكان فايڤ ستارز
منى : ماشي يابنت نجيب ساويرس
– ايه ده منى واميره
منى : ايه ده احمد ازيك
احمد : تمام الحمدلله، وحشانا والله يا منى
اميره : احم عامل ايه يا احمد؟
احمد : الحمدلله بخير، المهم انتو ايه اخباركم؟ مفيش جديد؟
اميره : لا والله مفيش لسه بندور على شغل عِدِل
احمد وهو بيبص ل منى : انا قصدي… قصدي لسه متخطبتوش؟
منى بتبص له و بعدين بتبص ل اميره
اميره : لا لسه بردو والله ملقناش ولاد الحلال ادعيلنا بقى
احمد بإبتسامه وهو باصص ل منى : هدعيلكم و هدعيلي معاكم
منى بتوتر : طب ااا انا ٱسفه انا مضطرة امشي دلوقتي عشان اصل.. اصلي اتأخرت
اميره : استني يا منى، معلش بعد اذنك يا احمد
احمد : اتفضلوا
*بتخرج منى ووراها اميره*
اميره : ايه يابنتي الجنان ده، قومتي ليه؟
منى : انتي يعني مش شايفه احمد بيه و اسلوبه؟
اميره : وماله يابت ده الواد واقع على بوزه من ايام الجامعه، حرام عليكي ما تديله فرصه
منى : بلا فرصه بلا نيله، انا مش بفكر فيه كده و كمان كويس اني خرجت بسرعه قبل ما تحصل مصيبه جديدة
اميره : يا ستار يا رب مصيبة ايه؟
منى : بعد كل اللي حكتهولك عن اللي حصل لإتنين بسببي
اميره : منى بالله عليكي بطلي هبل عشان حقيقي مش طالبه معايا خالص
منى : انا بتكلم بجد يا اميره
اميره : ده اسمه جنان و ياريت تشيليه من دماغك عشان متكبريش الموضوع من مفيش
منى بتنهيده : خلاص يا اميره، يلا خلينا نروح
___________________________________________
سميه : حمدالله على السلامه، ايه اكلتي بره ولا اجيبلك العشا؟
منى : لا يا ماما شكرا يا حبيبتي انا شبعانه انا هدخل انام
سميه : ماشي يا حبيبتي، تصبحي على خير
منى : و انتي من اهل الخير
___________________________________________
*بتدخل منى اوضتها و بترمي نفسها ع السرير بتعب*
منى لنفسها بتنهيده : يا ربي يعني انا هفضل ف الرعب ده كتير، طب.. طب هو انا كده فعلا ممكن اتسبب في أذى لحد من غير ما احس؟ بس ايه ده؟ هو انا كده طلعت خارقه و عندي قوة غير منظوره زي ابطال ديزني؟
– لا زي اميرات ديزني
*بتقوم منى من السرير مخضوضه اول ما بتسمع الصوت و بتجري على النور تفتحه*
منى : بسم الله الرحمن الرحيم، ايه ده ايه الصوت ده؟
*بتبص حواليها في الاوضه بتلاقيها فاضيه ف بتتنهد*
و بتقول : لا لا انا شكل دماغي ساحت من اللي بيحصل ده، انا لازم انام بسرعة قبل ما اتجنن
*بتقفل النور و بترجع لسريرها*
– متفتحيش النور تاني عشان مش هتشوفيني
بتصرخ منى و بتقول : عاااا انت مين؟ و بتجري على النور تفتحه *لكن حاجة بتمسك ايديها*
– اهدي يا منى و اسمعيني
*بتصرخ منى اكتر و بتنده على مامتها*
– بيشد دراعها اكتر و بيقول : قولتلك اهدي، و بطلي صريخ مامتك مش هتسمعك
منى و هي مبرقه : ليه ماما مالها عملت فيها ايه؟
– مامتك كويسه و نايمه في اوضتها
منى بتوتر و عياط : يبقى هتسمعني هتسمعننني
– قولتلك لا….. انا اللي اقدر احدد مين يسمعك ومين لا
منى بخوف : انت… انت مين
*بيظهر ضوء بسيط مجهول بيبان منه وش شخص*
بإبتسامه بسيطة : انا.. ليث
منى : ……..
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية موعد مع الليث)
