رواية ليل احتلت عرش القاسي الفصل الخامس عشر 15 بقلم تيسير محمد
رواية ليل احتلت عرش القاسي الجزء الخامس عشر
رواية ليل احتلت عرش القاسي البارت الخامس عشر
رواية ليل احتلت عرش القاسي الحلقة الخامسة عشر
بعد ما عدى تلات ايام على الاحداث اتغير فيهم حاجات كتير اولهم ان ياسمين بقت متجنبة عمر تماما بعد اللى حصل بينهم لدرجة انه بقى هو اللى يجرى وراها علشان بس تبصله او تتكلم معاه زى الاول مع انهم بقوا عايشين فى اوضة واحدة بس ياسمين مبقتش حتى تروح شغلها معاه علشان متتعملش معاه و كانت بتنام بدرى قبل ما هو يرجع من شغله و تصحى قبله علشان متتكلمش معاه .
اما بقى عمر فكان خلاص هيتجنن علشان ترجع تتعامل معاه زى الاول و كان هيموت و يسمع صوتها و هى بتكلمه او و هى بتضحك معاه بس للاسف هو مش عارف يعمل ايه لانها مش عطياه اصلا فرصة انه يصالحها زى ما تكون خلاص فقدت الامل فيه انه يحبها و بقت تتعامل معاه على الاساس ده او بمعنى اصح مبقتش تتعامل اصلا .
اما زين فالوضع هنا بالعكس زين هو اللى بيتجاهل ليل كانها مش موجودة مش لانه بيكرها زى هيا ما فاهمة لا هو بيتجاهلها لانه حس بتانيب ضمير انه اتكلم معاها بطريقة وحشة و حس انه كسرها لما قالها انها مجرد طباخة فقرر انه يسيبها لحد ما تهدا و بعدين هيفهمها انه مكنش يقصد ، و فى نفس الوقت هو بعد عنها زى ما نصحته هايدى علشان يقدر يحدد مشاعره من ناحيتها هل هو بدا يتعلق بيها فعلا و لا ده مجرد احساس بالمسؤلية .
اما بقى ليل فهى من اخر مرة اتكلمت مع زين مشفتهوش تانى مع انها كانت بتبقى صاحية و هو رايح شغله و تستناه لما يرجع و بعدين تنام بس كل ده من بلكونة اوضتها ( مهزئة يعنى ) و كان بعد ما يخرج تنزل هيا المطبخ تعمل الاكل كله لوحدها و مش بتخلى حد يساعدها ، طبعا كله كان فاهم انها بتعمل كده علشان تسلى نفسها لكن الحقيقة انها حاسة بالاهانة من كلام زين ليها فقررت انها هتشتغل فى البيت علشان متحسش انها عبأ عليه ( بس طبعا زين ميعرفش انها بتنزل المطبخ ) .
فى الشركة فى مكتب زين يدخل عليه عمر .
زين : مالك يا عمر فيك ايه شكلك مش عاجبنى بقالك كام يوم .
عمر : ياسمين يا زين خلاص مبقتش بتتعامل معايا نهائى كانى مش موجود فى حياتها يعنى لما كانت بعيدة كنا مع بعض دايما اهو على الاقل بنتكلم باستمرار انما دلوقتى هى معايا فى نفس الاوضة بس بقت بعيدة عنى اوى و مش عارف اعمل ايه .
زين : طيب و انت مفكرتش هى بعيدة عنك ليه ، يا بنى ده احنا كلنا كنا بنشوفها و هى لزقة فيك منين متروح و انت اللى كنت بتبعد عنها دلوقتى هيا اللى بتبعد عنك يا عمر يبقى ملهاش معنى تانى و هو انك غلطت غلطة كبيرة و هى مش قادرة تسامحك عليها .
عمر : فعلا انا غلطت فى حقها بس و الله يا زين ما كنت اقصد انى اهنها ابدا انا بس كنت عايز افهم منها .
زين : يبقى تقوم دلوقتى تروحلها و تاخدها من ايديها بالعافية و تفهمها قصدك و تحاول مرة و اتنين و تلاتة لحد ما تسمعك و لو غلطان اعتذرلها لحد ما تسامحك و بعدين ياسمين بتحبك و انت مش هتهون عليها .
عمر : معاك حق انا هروحلها دلوقتى بس قبل ما اروح انا عايز افهم انت بقى مالك .
زين : لا انا بقى حكايتى حكايه و عايزة قاعدة طويلة لما ارجع باليل نتكلم قوم انت روح علشان تتكلم معاها .
عمر : ماشى انا قايم لانى كمان جعان و ماما كل يوم توصفلى فى حلاوة اكل ليل اللى بتعمله على الغدا كل يوم لما الواحد خلاص مبقاش قادر .
زين اتصدم من كلام عمر عن ان ليل هى اللى بقت تطبخ كل يوم و ساله : هى ليل اللى بتعمل الاكل كل يوم ، لا يا عم اكيد بتساعد دادة سعدية مش اكتر .
عمر بتاكيد : لا يا عم ماما قالتلى انها بقالها تلت ايام هى اللى بتعمل الاكل لوحدها يعنى من الالف للياء و كمان بعد ما بيخلصوا هى اللى بتغسل المواعين و مبتخليش حد فيهم يعمل حاجة خالص ، بنت اصيلة بجد ربنا يباركلك فيها يا زين .
زين بصدمة : تمام روح انت يا عمر و انا هرجع بالليل .
عمر : تمام انا ماشى .
زين عيونه اتملت دموع و حس اد ايه هو اهانها و غلط فى حقها لدرجة انها تشتغل فى البيت كانها بتقوله انا مش عالة على حد انا هشتغل بلؤمتى ، قام زين من مكانه و لم حاجته و مشى من الشركة مش عارف يروح فين فقرر انه يرجع البيت علشان يمنعها من اللى بتعمله و يردلها كرامتها ادامه .
—————————–
يرجع عمر البيت يلاقى ياسمين قاعدة فى الجنينة فياخد نفسه و يقرر انه مش هيسيبها غير و هى مسمحاه .
عمر : ياسمين .
تتفاجا ياسمين من وجوده لانه مبيرجعش فى الوقت ده و كمان هى محستش بيه لما دخل فتقوم تقف علشان تمشى فيمسك ايديها و يلف وشها ليه .
عمر : ياسمين انا عارف انى غلطان بس بجد اللى احنا فيه ده مش حل انتى بعيدة عنى وانا كل ما احاول اتكلم معاكى بتبعدى اكتر ، خلينا نقعد و نتكلم و افهمك يمكن نلاقى حل .
ياسمين تبصله بعتاب و تسكت فيرد عليها : علشان خاطرى يا ياسو خلينا نتكلم و لو يا ستى معجبكيش كلامى انا راضى باللى تحكمى بيه ها ايه رايك .
ياسمين تسكت شوية و تقول : ماشى يا عمر بس اعتبر ان دى اخر فرصة .
عمر بفرحة : ياه يا شيخة ده انا كنت قربت انسى صوتك عامل ازاى و عموما انا موافق على اللى انتى عيزاه ، احنا بعد الغدا نطلع الاوضة و كل اللى جوانا نقوله لحد ما نحس اننا ارتحنا و اللى غلطان التانى يعمل فيه اللى هو عايزه ماشى .
ياسمين بنصف بابتسامة : ماشى .
—————————-
يدخل زين البيت و هو ساكت و يروح على المطبخ علشان يعرف ليل فين و بتعمل ايه و فعلا يطلع كلام عمر حقيقى يدخل يلاقى ليل بتطبخ لوحدها من شكلها باين عليه التعب و الارهاق كانها بقالها اسبوع منمتش و خسة كانها مش بتاكل .
زين : بتعملى ايه يا ليل .
ليل تتخض لانها مش متعودة انه يرجع دلوقتى و لو رجع مش بيكلمها فتبصله بصه كلها اشتياق و عتاب فى نفس الوقت و تضير وشها بسرعة قبل ما ياخد باله من اشتياقها ليه .
ليل ببرود : ابدا هكون بعمل ايه يعنى بطبخ الاكل علشان الغدا .
زين : طيب و انتى تعملى الغدا ليه ما فيه ناس هنا هما اللى بيعملو الاكل ليه انتى .
ليل من غير ما تبصله : عادى يعنى و بعدين انا متعودة .
زين يلفها ناحيته : يعنى ايه مش فاهم انتى ليه بتعملى كده .
ليل بصوت عالى شوية و تبعد ايديه عنها : سيب ايدى لو سمحت و بعدين بعمل ايه يعنى ماهو ده شغلى يا استاذ زين طباخة هو ده شغلى اللى انت عيرتنى بيه هو ده شغلى اللى مش بعرف اعمل غيره هو ده شغلى اللى مخلنيش اتحوج لحد و امد ايدى و اقول لحد ادينى .
تسكت ليل فجاة و تبص ورا زين تلاقى يوسف واقف و مصدوم من كلامهم
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية ليل احتلت عرش القاسي)
