رواية لم تكن لتلك الدنيا معنى إلا حين أحببتك الفصل الثاني 2 بقلم ندى زايد
رواية لم تكن لتلك الدنيا معنى إلا حين أحببتك الجزء الثاني
رواية لم تكن لتلك الدنيا معنى إلا حين أحببتك البارت الثاني
رواية لم تكن لتلك الدنيا معنى إلا حين أحببتك الحلقة الثانية
_ ملك انا في حاجة قررتها وانتي لازم تعرفيها
* حاجة اي دي يست ليلي
_ يعني انا عارفة انك ممكن متوافقيش بس …
* في اي ياليلي قولي عاوزة اي
_ انا هطلب نقلي بكرا من الشركة لاي فرع تاني
سابت العصير اللي كانت مسكاه وبصتلي بزعل وصوتها كان حزين
* ليه كدا ياليلي عاوزة تسبيني ؟
قربت منها براحة ومسكت ايدها وبصتلها بحزن يمكن اكتر منها
_ صدقيني لا مش كدا ..بس ياملك انا لسة اضعف من كل كلامي دا انا مش هستحمل اشوفه كل يوم واتعامل عادي كأن محصلش حاجة ..أوعدك اول مااقدر هرجع تاني بس دلوقتي مش هقدر بجد ياملك معنديش حلول تانيه
فضلنا ساكتين شويه احنا الاتنين القرار كان صعب علينا احنا كل حاجة بنعملها سوي وهي مش هينفع تنقل معايا وفي وسط تفكيري لاقتها حضنتني فجاه
* مش سهل عليا تسبيني ياليلي بس انا يهمني راحتك وانك تكوني مبسوطة اعملي دا لو هيخليكي مرتاحة في حياتك
_ ملك انتي اغلي حد عندي في الدنيا دي بجد وبعدين انا مش هبعد يعني هكلمك كل يوم وكل اجازة هاجي نقضيه مع بعض وماما كدا كدا بتقعد مع خالتو كتير فهبقي مطمنة عليها
معرفش انا خدت القرار الصح ولا لا بس انا دا القرار الوحيد اللي مريحني حاليا مكنش ينفع ابدا ابقي في مكان هو موجود فيه علي الاقل الفترة دي لحد ماقلبي يخف منه
تاني يوم رحت قدمت طلب نقل وخدت اجازة لحد ميتوافق علي طلبي ..حاولت امشي من المكان بسرعة قبل مااقابله بس دايما الدنيا بتعند معايا …شفته وانا علي سلالم الشركة بصتله والحقيقة ان قلبي اترعش بس المرة دي مكنتش رعشة حب ..كانت قبضة غريبه لاني مش حباه مش عاوزة حتي افتكر اني حبيته في يوم من الايام …وطي عينه في الارض كانه مكسوف قرب وكان لسة هيتكلم سبته وكاني مش شيفاه مشيت جمبه بكل هدوء ومشيت من المكان كله ….
تاني يوم ملك كلمتني وعرفتني اني اتوافق علي طلبي ولازم اكون في مقر الشركة الجديد اول الاسبوع ..جهزت شنطي وعرفت ماما كل حاجة واتفقنا اني هظبط كل اموري واخدها تعيش معايا في اقرب وقت …انهاردة كان اول يوم ليا في الشغل ولاني معرفش المكان كويس اتاخرت ودي بدايه مكنتش حلوا ابدا رحت هناك وكان ليا معاد مع المدير وبسبب تاخيري مكنتش مقابله حلوة بالمرة
= حضرتك الفايل بتاعك مفيهوش ابدا انك بتتاخري علي شغلك يعني ودي مش بدايه حلوة ياانسة ليلي
_ يااستاذ عامر اسفة جدا بس المكان جديد عليا وانا معرفش اني هاخد الوقت دا كله
لف بالكرسي بتاعه وبصلي فجاه ودا خلاني ارتبك معرفش ليه بس كنت عاوزة اخرج من الاوضه ليه المدير يبقي حلو كدا !!!
= انسة ليلي انا بحب الالتزام ومش معني ان الكل بيشكر فيكي ان دا يغير من حاجة هكتفي بلفت نظرك واتمني متتكررش اتفضلي علي مكتبك
خرجت من عنده وانا بحاول اتنفس براحة مبحبش المواقف دي مبحبش حد يعلق علي شغلي مبحبش اغلط !!
ملك كلمتني بليل وحكتلها كل اللي حصل معايا من اول يوم وقعدت تضحك عليا وعلي منظري اللي مكنش لطيف ابدا وحكتلها عن المدير وقد اي حلو اوي
* وملك ام لسان ونص فضلت ساكته عادي كدا لا مصدقش
_ مش عارفه ياملك بس عنيه فيه حاجة غريبه خلتني اسكت
* عنيه وحاجة غريبه احنا لحقنا
ابتسمت عشان فاهمه قصدها كويس بس اكدب يعني الراجل حلو
_ ياملك ماهو اللي حلو اعمله اي يعني الله وبعدين متقلقيش اختك حرمت خلاص مبقتش تصلح للعلاقات
* محدش عارف بكرا مخبي اي ياليلي خليها تمشي زي ماربنا عاوز
_ ان شاء الله يلا بطلي رغي بقي انا عاوزة انام اليوم كان طويل اوي عليا
………
انهاردة يبقي عدي سنة عليا في المكان .. سنة غيرت كل حاجة غيرت كل حياتي خلتني اتغير واتعلم. واكتشفت ان محدش بيموت من الحب واني اقدر اعيش من غير زين عادي. قدرت ابقي احسن اتعودت علي المكان وبقي ليا صحاب وكل اجازة بقضيها مع ملك واما بتاخد اجازة بتجيلي وحقيقي كانت احلي سنة في حياتي ….انهاردة فيه حفله تبع الشركة وكلنا لازم نحضر وحقيقي متحمسه جدا وخصوصا ان عامر هيتكرم انهاردة وهو فعلا يستاهل دا …
_ ايوة ياعامر عاوز اي
= عاوزك تخلصي ياليلي انا تحت بقالي ساعة مش معقول كدا
_ انت اللي جاي بدري
= حقك عليا يستي ممكن يلا بقي بجد تعبت من الوقفه
_ خلاص يعم نزله اهو وبجد المرة دي خلصت ونازله
قفلت المكالمة وانا ببتسم بجد من قلبي مبسوطة ان عامر بقي اعز صحابي زي ملك بالظبط وانه مستحملني برده زيها وبيحاول دايما ميزعلنيش خدت شنطتي ونزلت بسرعة وحقيقي نظرة عنيه اول ماشافني حسستني قد اي انا حلوة اوي
كنت لابسة جامبسوت لونها زيتي وطرحة لونها كافيه وهيلز بنفس اللون مكنتش حاسة اني حلوة اوي بس هو حسسني بكدا
= اي الحلاوة دي
_ اقل حاجة عندي يبني
قرب عليا وهمسلي
= اقل حاجة دي خطر علي اللي زيي
مفهمتش بيقولي كدا ليه بس قلبي اترعش واتوترت قربه مني بيوترني مؤخرا وخصوصا انه بقي يقولي كلام كتير مش مفهوم … حاولت اداري كل المشاعر الملخبطة جوايا وقربت من العربيه وركبت وهو كمان ركب واتحركنا سوي للحفله وصلت هناك واكتشفت انه عملي مفاجاه حلوة اوي لاقيت حد بيغمي عيني وطلعت …ملك .
_ بتهزري ؟ جيتي امتي وازاي
لاقتها بتحضني والحقيقة كانت وحشاني اوي
* عامر يستي اللي كلمني وظبط معايا كل حاجة وقررنا نعملها مفاجاه للست هانم
بصتله بامتنان بجد من قلبي كنت محتجاها معايا في يوم زي دا
_ شكرا بجد ياعامر
= شكرا علي اي ياعبيطة انتي
_ انت مش متخيل انا فرحت قد اي
= عشان كدا جبتها لمعة عيونك عندي بالدنيا ياليلي
بصتله كتير اوي مش عارفه ازاي هو فاهمني كدا … بيحاول دايما يبسطني بيعمل كل حاجة ترضيني بس نظرته ليا بتوترني او يمكن انا اللي خايفة …..
فقت من سرحاني علي حد بياخد عامر عشان يظبطوا حاجة وملك قربت مني وقفت قصادي
* بتحبيه ؟
لفيت نفسي وحاولت اني مردش علي سؤالها
_ اي العبط دا ياملك احب مين دا عامر يعني
* واي يعني عامر عيبه اي عامر
_ ماهي دي المشكله
* يعني اي
اتنهدت بتعب ودورت عليه بعيوني وبصتله
_ المشكله انه مالوش عيب ياملك ..المشكله انه عارف كل حاجة من يوم ماعرفت زين لحد انهاردة ..المشكله انه اجمل وابسط من انه يحبني انا ملقش بعامر ياملك
* ليه ياليلي متهيالي انه اما عرف بزين مغيرش طريقته معاكي بالعكس دا اكتر واحد وقف جمبك واما زين حاول يضايقك هو اللي وقفله ولا نسيتي
_ مش ناسيه ياملك بس دا يثبت كلامي اكتر .. عامر صديق وعمره مهيشوفني غير كدا
* بس هو بيحبك
حسيتي دخت مجرد الفكرة دوختني خلتني مش قادرة استوعب مش قادرة اتخيل انه ممكن يحبني
_عرفتي ازاي ؟ هو قالك حاجة ياملك بالله عليكي متخبي عليا
* مقالش ياليلي بس بجد عيونه فضحاه وهو اه عامر جدع وراجل وصديق وكل حاجة بس مفيش حد بيعمل كل دا لواحدة لمجرد انها صاحبته او عزيزه عليه ياليلي دا بيتمنالك الرضا ترضي
سكت وسرحت في كل حاجة بيعملها عشاني بس مش قادرة اعلق قلبي تاني وخايفة من ان كل دا يبقي وهم وخايفة اني اتخان تاني وعند الفكرة دي اتخنقت وكنت عاوزة ابقي لوحدي اتمشيت لمكان بعيد وقعدت تحت شجره وسرحت واتنهدت وقلبي بيعيط في صمت معرفش حتي بقالي قد اي هنا وسمعت صوت عامر
= بتعملي اي هنا لوحدك
بصتله بهدوء ولفيت وشي تاني وسكت حسيت بيه جيه وقعد جمبي
= قلقتيني عليكي دورت عليكي كتير
_ ليه ؟
= ليه اي؟
_ ليه ياعامر بتقلق عليا وليه كل حاجة بتعملها عشاني وليه نظرتك دي وليه كل حاجة ليه
ابتسم بهدوء وسكت شويه
= عاوز اشتري بوتجاز
ضحكت من قلبي لان مش دا وقته خالص بس هو دايما بيحاول يغير الموضوع
_ ليه كل متحب تغير الموضوع تقولي كدا
= عشان انتي غبيه ياليلي
بصتله باستغراب شويه لاقيته بيكمل
_=لان هو دا الموضوع ياليلي تفتكري ليه هاجي اقول لواحدة كل شويه عاوز اشتري بوتجاز وانا لا بروح اشتري ولا انيل انا عارف انك كنتي بتاخديها بهزار كل شويه والحقيقة كنت بتبسط بضحكتك وكنت بسكت لان شكلك بيبقي حلو اوي وانتي مبسوطة كدا
ابتسمت بكسوف بس برده لسه مفهمتش وحسيت اني غبيه اكتر
= فاكرة اول مرة دخلتي مكتبي الحقيقة اني كنت ناوي اتخانق معاكي علي تاخيرك خناقة كبيرة اوي بس اما شفتك معرفش حصلي اي مقدرتش حتي ازعق ولا اخصملك اي حاجة مقدرتش ابقي سبب في زعلك وبعدين بقيت اراقبك من بعيد وبعدين بقينا صحاب والحقيقة كل مرة كنت بحس قد اي انتي جميله وقلبي كان بيتعلق اكتر واكتر واما عرفت بموضوع زين خفت..خفت اقولك تكوني بتحبيه لسه خفت اقرب اتوجع خفت حتي اني اخسرك قررت اني احتفظ بدا لنفسي بس دا ميمنعش اني كنت هموت واقولك بس عشان كدا كنت كل فترة اقولك عاوز اشتري بوتجاز كنت مستنيكي تقوليلي هنشتريه سوي معرفش ليه بس هو دا كان كل خيالي اني هسمع اجابه تفرحني بس برده ياليلي لحد اللحظة دي انا مش مستني منك اي حاجة انا كل اللي عاوزه اشوفك مبسوطة وبس …
مع اخر كلمه منه قمت وقفت بعدت شويه وعيطت عمري متوقعت ان حد هيحبني كدا كلامه عني دخل جوا قلبي خلاني عيطت لاقيته جيه ورايا وكان نبره صوته كلها خوف
= ليلي لو كلامي ضايقك انا اسف انا مكنش قصدي انا بس
_ انت مش فاهم حاجة ياعامر
= مش فاهم اي
_ انا كنت شايفة اني مستاهلكش ياعامر كنت خايفة حتي اقول لنفسي اني بحبك لاني شايفة انك تستاهل حد احسن مني بكتر
= بس مفيش حد احسن منك ياليلي ….ليلي انا بحبك
وكان الدنيا كانت بتلف بيا والهوا جيه يلعب بقلبي نسمه برد دخلت جوا قلبي تزغزغه وتطمنه اول مرة اعرف ان الكلمة دي حلوة اوي كدا …ابتسملي بهدوء وسالني
= بتحبيني
هزيت راسي في وسط دموعي
= طب بتعيطي ليه دلوقتي
مسحت دموعي بكف ايدي وابتسمتله
_ عشان عاوزة اشتري بوتجاز
وصوت ام كلثوم في الخلفية
” وقابلتك انت لاقيتك بتغير كل حياتي …”
لقراءة الرواية كاملة اضغط على : (رواية لم تكن لتلك الدنيا معنى إلا حين أحببتك)
