رواية للحبيب حبيب تاني الفصل الخامس 5 بقلم شهد محمد جادالله
رواية للحبيب حبيب تاني الجزء الخامس
رواية للحبيب حبيب تاني البارت الخامس
رواية للحبيب حبيب تاني الحلقة الخامسة
_انتي فينك طول اليوم؟
_كان عندي ضغط شغل وخلصت وقابلت عزت كان عايز شادي يبات معاه انهارده ف سيبتهوله
_طيب ماتيجي تباتي معايا انهارده
_لأ تعالي انتي
_مانا على طول عندك يا نادين تعالي انتي بقى هعملك كيكه وعندي كاكاو
_طيب هرتب كام حاجه في البيت وجايه
_مستنياكي
_ماشي باي
بقولها وبقفل معاها وبغسل الأطباق اللي في الحوض وبرتب اوضة شادي وبغير هدومي وباخد شنطتي وبروح لـ ياسمين
بالمناسبة ياسمين كانت الدكتوره اللي متابعه حالة بابا الله يرحمه وبعد ما اتوفى فضلت معايا عمرها ما اتأخرت عني
هي كمان لوحدها في الدنيا مامتها متوفيه وباباها متجوز واحده تانيه ومش بيسأل فيها انا وهي عوض لبعض
_ساعه عشان تفتحي؟
_كنت بقفل على البوتاجاز
_بتعملي اكل إيه؟
_مش هتصدقي
_إيه ياترى
_إندومي
_طب والله نفسي فيه ومش عارفه اجيبه عشان شادي
_اي خدمه
بدخل اوضتها بغير هدومي وبلبس بيجامة بتاعتها وبنخرج ناكل سوا وإحنا بنحكي تفاصيل اليوم لبعض
وبتدخل تعملنا كاكاو وبتجيب من الكيكه اللي عملتها وبندخل نقعد في بلكونتها
بولع سيجاره وانا قاعده على المرجيحه اللي في البلكونه وبتنهد وببص للفراغ
_بتفكري في إيه؟
_أبدآ حاسه بشوية زعل بس عشان شادي اول مره ينام بعيد عن حضني
_يوم ويرجع يا نادين امال عزت بقى اللي بعيد عنه من خمس شهور يعمل إيه
_صح عندك حق
_يلا بقى كملي الحكاية عارفه حساكي جدتي وبتحكيلي حكاية قبل النوم وبتيجي عند اهم حته وتقولي هكمل بكرا
_والله انا جدتك !!
_ياستي بهزر ها كملي
“فـــــلاش بــــاااكــ”
بعد إفتتاح المعرض بفضل معاه كام يوم بساعده في الشغل لحد ما كل حاجه بقت تمام جاب ناس تشتغل والمعرض اتعرف شوية وعلاقته بـ دينا كانت تمام
وانا رجعت للقاهرة رجعت عشان بابايا وشغلي هناك وهو اتفق معايا انه فتره ويرجع عشان مامته
كنت بتعايش عادي الكام يوم اللي كان بعيد عني فيهم كنا يوماتي نتكلم كول ويحكيلي تفاصيل يومه
والجزء الأصعب بقى لما يحكي عن دينا او عن اي بنت عمومآ وانا مضطره اكمل كلام واسمع عشان بس ميبانش عليا !
وإنهارده بعد ما جبت الفطار لبابا جبت الفطار والعيش لسوسو مامته وطلعت ليها زي كل يوم واتفجأت بيه هو اللي بيفتحلي الباب
_انت رجعت امتى !
_الفجر ولسه صاحي وكنت لسه هلبس وانزل اعملك مفجأءه
_ومقولتش ليه مجبتش سيره خالص
_امال هتبقى مفجأءه إزاي يا أذكى اخواتك
_طب خش ياخويا نفطر سوا الطعمية سخنه ، إنتي فين يا سوسو
بتخرج سعاد مامته وهي ماسكه في إيديها اطباق وبتقول:
_حمرت بطاطس وقطعت على الجبنه طماطم جبتي الطعمية والفول؟
_اه وبتنجان مخلل
_طب يلا يولاد نفطر سوا يلا
بنقعد كلنا بنفطر وباخد بالي من نظرات عينيه كان باين فيهم إن فيه حاجات كتير عايز يحكيهالي
بنخلص فطار وبننزل سوا للمكتبة
_يااه انتوا غيرتوها اوي
_شوية تجديدات
_بس تصدقي وحشتيني الأيام دي اكتشفت إنك جزء مهم في يومي
_يا ابني طبعآ هو انا اي حد ولا إيه
_المهم حصل حاجه كدا
_ياخوفي من الحاجه اللي كدا دي
بيقطع كلامنا نفس البنت اللي جت مره من فتره سألت على نوت وكان هياكلها بعنيه المره دي كمان منزلش عينيه من عليها
_لو سمحتي كنت عايزه روايات
_رومانسية ولا رعب ؟
_بصي مش عارفه انتي ممكن تختاري معايا أصلها هتكون هدية لبنت اول مره تقراء
_ممكن دي او دي ودي كمان لذيذه اوي
_خلاص هاخد التلاته
_تمام يا حبيبتي
بغلفهم ليها وبتدفع حقهم وبتمشي
_ها حصل إيه؟
_ثواني وراجع
بيقولها وبيجري وبيعدي نص الليل ومبيظهرش
وبعد فين وفين بيرن عليا بنزل ليه بنقعد على السلم سوا
_اختفيت فين؟
_كاميليا
_مين كاميليا؟
_البنت اللي كانت عندك إنهارده
_لحقت تتعرف عليها؟
_مش اوي بس مش عارف لما بشوفها بحس بحاجة غريبه يعني لما بشوفها بحس بالغبطه وقلبي بيدق جامد بحس إني متوتر وإني عايز اقولها إنها حلوه عايز اقولها إنها لو دخلت حياتي هتبقى خير ليا كدا يبقى إيه يا نادين؟
_بتحس بكل ده !!
_الغريبة إن اول مره احس كدا
_ما هو مفيش حاجه ترعب غير إنك اول مره تحس بكدا يا سيف عمومآ انت فلاتي وصايع كلها يومين وتشوف واحده احلى منها وتنساها
_معتقدش لأ
_انت اتعرفت عليها إزاي؟
_مشيت وراها ووقفتها اتكلمت معاها على الروايات والكلام خدنا وخدتها للمكتبة القديمة رشحتلها كام رواية
_امم ضحية جديده في حياة سيف
_ضحية إيه انتي التانيه محسساني إني سفاح
_اكتر والله
_مش ذنبي إني حلو ومسمسم والبنات بتحبني
_بنات غبيه
_تفتكري هيجي يوم وتبقي غبيه زيهم؟
بتوتر ولساني بيتقل وبحاول اغير الكلام وبقول:
_بلاش كلام فاضي يلا امشي آلوقت اتأخر
بقولها وبدخل وبقفل ورايا الباب
ضربات قلبي بتزيد حاسه إني كنت مكشوفه قدامه نفسي امسكه ارنه حتت علقة واقولو فيهم إيه مش فيا !!
بيعدي يومين وبنشغل في تعب بابا اغلب الوقت ببقى معاه ومعرفش تفاصيل كتير عن سيف
وإنهارده بابا رجع كويس شوية وبنزل بفتح المكتبة وفي نص اليوم بلاقيه جاي ليا
_اهلآ
_باباكي عامل إيه دلوقتي؟
_احسن من الأول الحمدالله
_الحمدلله سوسو بتعمل شوربة خضار وبتسلق فراخ عشانه
_مالوش لزوم تتعب نفسها
_بقولك إيه ما نجوز ابوكي ل امي عشان نبقى اخوات ونعيش العمر كله سوا؟
_خطه في منتهى الذكاء
بنضحك سوا وبنفضل نهزر شوية وكالعادة بيجي الوقت اللي هيحكي فيه
_محتاس يا نادين
_ليه؟
_شكلي كدا حبيت كاميليا
_يعني مش متأكد؟
_مش عارف بس وانا معاها ببقى سعيد بقى بيصعب عليا اكلم بنت غيرها بحب اسمعها ويومي مش بيكمل غير بيها
_امم وبعدين؟
كنت بسمعه وفيه ريحة شياط طالعه من راسي وبيقطع كلامه رن موبايله
_دي دينا مش مبطله زن من الصبح
_طب شوفها عايزه إيه
بيقوم بيرد عليها وبعد شوية بسمع صوته بيعلى وهو بيكلمها
_دينا انا موعدتكيش بحاجه ومعشمتكيش ومقولتكيش إني بحبك إحنا حتى مش صحاب اللي بينا انتي عارفه هو إيه كويس .. بعدت عشان حبيت وانا لما بحب مش بخون يا دينا
بيقولها وبيقفل معاها واخر كلمه بيقولها بتوجعني عشان فعلآ سيف حب كاميليا رغم إني معرفش هي ظهرت منين ولا حصل إيه بس هو حبها محدش بيفهمه قدي
_نادين انا محتاس و ..
مش بقدر امسك اعصابي برمي الكتب اللي جنبي على الأرض وبزعق ليه وانا صوتي فيه نبرة العياط وعيوني مدمعه
_انت أناني صدقني أناني طول الوقت عايزني اسمعك طول الوقت عايزني احل مشاكلك حتى في الوقت اللي انا تعبانه فيه ومش في احسن حالاتي سيف انت غريب تروح تسهر مع دينا وتقضي معاها ايام وتستغرب انها حبتك ، مريم تقولك بحبك وتقولها انا كمان بحبك وتستغرب هي فاكركم مرتبطين ليه ، تجيب ورد وشكولاتات لـ نور وتخرج معاها وتشغلها اغاني رومانسيه وتغنيلها وتصورها وتستغرب هي حبتك ليه يعني هي دي مش عمايل تخلي اللي قدامك يفكر إنك بتحبه انا تعبت منك
بقولها وبضربه جامد بإيدي الضعيفه في صدره وبسيبه وبطلع البيت
بعيط بشحتفه بس عليا وعلى قلبي كلامي اللي قولته مالوش اي معنى بس كنت بحاول اداري إنهياري
اصل بجد ليه؟
ليه نحب حد مش حاسس بينا
ممكن يحب اي واحده في الدنيا إلا انا
شاف مني إهتمام وحب وتشجيع ومعاه في أوقاته الصعبه قبل الحلوه كل دي مش كفايه انه يحبني !
بقوم بغسل وشي وبرفع شعري وبدخل لبابا عشان معاد العلاج وبرجع للأوضه بتاعتي بولع سيجاره وبقعد على الشباك
وبعد ما بطلع خنقتي في السجاير بكتشف إن سيف مالوش ذنب
اصل هو مالو اعاتبه ليه على مشاعر انا اللي حساها اعاتبه ليه انه مش عارف يحبني ماليش سيطره على مشاعره ليا سيطره على مشاعري انا وقلبي أنا
بنام وبصحى اليوم التاني مش بنزل الشغل عشان اتجنب إني اشوفه وفي نفس اليوم بليل بيرن عليا انزل ليه في حوش العمارة
كان واقف ومعاه ورد وشنطه
_انا اسف ..
_محصلش حاجه انا اللي اسفه انا مكنش ينفع اقولك كدا
_مخاصمين بعض من إمبارح بس اليوم ده كأنه سنه حقك عليا نادين صدقيني انتي حد مهم في حياتي مينفعش اخسرك أبدآ
ببتسم ليه وباخد منه الورد بيكمل كلامه وبيقول:
_جايب شاورما وعلبة توميه عشان بتحبيها
ببتسم ليه وبنقعد سوا على السلم وبناكل
_عارفه اكتشفت إيه؟
_إيه ؟
_إني محتاج واحده دمها خفيف زي سهر ولطيفه ومزهقش منها زي دينا وبريئه وقلبي ميدقش غير ليها زي كاميليا والأهم من ده كله بقى تكون بتفهمني من نظرة عيني زيك لو لقيت واحده بكل الصفات دي هتجوزها
_نبقى نشوفلك في كارفور الباكيدج ده
_يا ظريفه
_انت عبيط يعني هو فيه واحده فيها كل ده محدش فينا كامل يا سيف
_عارف عارف بس بفكر معاكي بصوت عالي
_وفي المقابل بقى هتتجوز واحد صايع بتاع بنات صح؟
_لأ مميزاتي متتعدش وسيم جنتل مان وشيك دمي خفيف وراجل يعتمد عليه قد المسؤولية وكلمته من دماغه مش ابن امه ولسه طالب في الجامعه بس فتحت معرض ولسه عندي مشروع هشتغل عليه لوحدي كل دي مش مميزات؟ وكمان لما بحب مش بخون
_فعلآ مميزات متتعوضش الصراحه
_شفتي
_بطل سرمحه انت بس واختار البنت اللي تعجبك ونروح نخطبهالك انا وامك
_ووقتها اعرفها عليكم اقولها دي امي اللي جابتني الدنيا وانتي امي اللي بتنقذني من دماغي والدنيا
بسيب الأكل وببص ليه عيني بتلمع من جمال الكلمة بيكمل وبيقول:
_بس هي كاميليا انا متأكد
_لو كاميليا البنت اللي هتخليك تستغنى عن بقيت بنات العالم يبقى هي
_عشان كدا بقولك هي يا نادين مش عايز اعرف حد بعدها خلاص
_امم شكلك وقعت
_لازم اعرفك عليها
_ياريت
_بكرا هحدد معاها معاد ونخرج سوا
_اتفقنا
“بــــــــاكـ ”
_ده عزت بيرن
_شوفيه عايز إيه طيب
_الو ايوا يا عزت
_شادي مش عارف ينام من غيرك يا نادين انا في الطريق جايين ليكي
_طيب تعالى على بيت ياسمين انا عندها
_تمام في الطريق
بقفل معاه وبقول بفرحه:
_قلب مامي مش عارف ينام من غيري وجاي مع عزت
_طب اهو ياستي انبسطي هينام في حضنك
_حبيب عين امه ده
_كملي بقى
_لأ كفاية مش قادره
_انتي لحقتي بعدين يا نادين كنتي بتحسي إيه لما يحكي عن بنت غيرك
_ بـ نار في قلبي وببقى مضطره إني مبينش على ملامح وشي بس مكنتش بغير من ولا واحده فيهم إلا كاميليا عشان دي اللي حبها بجد
_واتجوزها؟
_هكملك بعدين قومي نحضر سندوتشات لــ شادي
_طيب يلا
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية للحبيب حبيب تاني)
