رواية كيد النساء وقهر الرجال الفصل الثالث والعشرون 23 بقلم منى محمود
رواية كيد النساء وقهر الرجال الجزء الثالث والعشرون
رواية كيد النساء وقهر الرجال البارت الثالث والعشرون
رواية كيد النساء وقهر الرجال الحلقة الثالثة والعشرون
بيسمع رانيا وعلامات الصدمة والذهول مرسومة علي وشه … فضل ساكت بعد اخر جمله ليها واللي بتطلب فيها منه بشكل صريح ومباشر أنها عايزة تقضي معاه ليلة واحدة وبعدها هتسيبه بدون مشاكل
رانيا خلصت كلامها وفضلت ساكتة وسايبه عاصم يستوعب اللي هي قالته ولما سكوته طال اتكلمت هي
رانيا
بص يا عاصم انا عارفه انك اتفاجات بكلامي عشان كدة هديك وقت تفكر علي مهلك خالص وترد عليا اتفقنا ؟
عاصم هز رأسه بموافقه وفضل ساكت … في الوقت دا دخلت والدة رانيا وطلبت منهم يقومو عشان يتغدو سوا
طول الوقت وعاصم بيحاول يبان قدام أهلها طبيعي علي قد ما يقدر ولما اخوها حس ان الوضع مش طبيعي هنا عاصم اتحجج أن جاله تلفون ضروري من البيت ولازم يمشي
سلم عليهم وخرج جري ركب عربيته وطار بيها بدون اي تفكير حتي هو هيروح علي فين
عاصم ل نفسه
معقول اللي سمعته دا … بقا هي دي اللي بدتها عن الاء …. هي دي اللي كنت خايف اكون بظلمها لأن مشاعري مع واحدة غيرها ؟ طب انا هعمل ايه دلوقتي … ابلغ اخوها ؟ اكيد هتنكر ومش بعيد تتبلي عليا اني انا اللي حاولت معاها دي بجحة … ااااه انا تعبت ليه بيحصل معايا كدة ليه
وصل قدام البيت وقبل ما ينزل من العربيه رجع في كلامة وطلع علي شغله وقرر أنه هيجازف واللي يحصل يحصل
❈-❈-❈
دخل شريف ل احلام وهو متوتر .. مقابلة مش سهله عليه ولا عليها .. حاسس ان كل الكلام تايه منه ومش عارف هيقول ايه ولا رد فعلها هيكون ايه
احلام اول ما شافتة ادامها حاولت توقف صوت عياطها اللي اتحول لشهقات بتطلع منها بين لحظة والتانيه
شريف قرب بهدوء وقعد علي طرف السرير وبقا قصادها
شريف
احلام ممكن تهدي شويه عشان احنا لازم نتكلم مع بعض
احلام ساكتة بس نظرتها ليه كلها حزن
شريف بوجع
بلاش البصه دي يا احلام بالله عليكي … بلاش تحسسيني اني الجاني مع انا المجني عليه …. انا اللي اتصدمت صدمة عمري في مراتي وحبيبتي وصحبتي وبنتي انا اللي حسيت ان العالم المثالي اللي كنت عايش فيه اتهد فجأة فوق دماغي … انا اللي بعد ما كانت كل خطوة في حياتي معاكي فجأة بقيت لوحدي تايهه ضايع من غيرك ومش عارف اعيش …. انا اللي كنت كل يوم قبل ما انام اسال نفسي ليه ؟ ليه عملتي فيا كدة ؟ انا حبيتك لا حبيتك ايه انا عشقتك يا احلام طلباتك كانت مجابه ديما كنت بحاول اكون ليكي زوج وحبيب واب واخ عشان اعوضك عن أي الم حسيتي بيه في حياتك قبل ما نتقابل … ليه انجرح كدة ؟ ليه تخدعيني بالشكل دا ؟ عملت فيكي ايه استاهل عليه كل دا ؟ ومع ذلك مقدرتش اقسي عليكي وكل اللي عملته اني بعدت عنك وعن حياتك وسبتلك الشقه دي وكنت بطمن عليكم من بعيد ل بعيد … بعترف اني مكنتش مصدق حاجة من اللي ماما قالتها ليا بس انا اكيد معذور يا احلام اكيد من حقي اني مصدقش واني اقول انك بتكدبي ولما اتاكدت انك بتتعرضي لازي فعلا انا اهو جمبك ومعاكي سندك وضهرك ومش هسيبك ابدا … فبلاش تبصيلي كدة بالله عليكي
احلام بصوت ضعيف
بس انا مش عايزاك تدخلي في حاجة … انت بالذات مش هينفع تدخلي في حاجة … لو عايز تساعدني وافق اني ابيع نصيبي ف الشقه دي انت وقت ما اتجوزنا كتبت نصها باسمي خليني ابيع نصيبي واخد اختي واختفي خالص … صدقني مفيش حد هيقدر يوصلنا احنا هنسيب البلد كلها ونسافر في اي مكان … انت مش مضطر تكمل في مساعدتك ليا يا شريف ماماتك كتر الف خيرها عملت كتير معايا وكفايه اوي لحد هنا
شريف كشر
انتي متخلفه ؟ هو دا كل اللي فهمتيه من كلامي ؟
احلام بدموع
انا مش عايزة أازيك اكتر من كدة … كفايه اللي عملته واللي لحد دلوقتي بدفع تمنة وانا راضيه والله … يمكن ربنا حابب يخلص مني في الدنيا عشان لما اروحله اكون خفيفه من ذنوبي … مش هقدر أازيك تاني لا انت ولا ماماتك ولا اي حد من طرفك حتي لو كان الشيخ جاركم … سبني اختفي يا شريف … سبني اخد جزائي للاخر وانا راضيه … مش طلبه منك غير انك تحاول تحاول بس تنسي وتسامحني عشان لما اموت مكنش ميته وانا
قاطعها شريف بصوت مخنوق
بس بس بطلي تتكلمي كدة بس … وايه جاب سيرة الموت دلوقتي … حرام عليكي لو فعلا مش عايزاني اتأزي تاني ولا اتوجع ارحميني يا احلام … بعد ايه اللي تبعديه هه …. انتي هترجعي معايا ع بيت ماما انتي واسماء والولاد
احلام حاولت تقاطعه لكنه مدهاش فرصه وكمل كلام بلهجه أمره
شريف
بقولك ايه انا مش عايز نقاش ووجع قلب احنا هننزل من هنا علي اي ماذؤن هردك ونطلع ع شقه ماما عشان جودي هناك وماما لازم تكون معاها ديما هنقعد فيها وامير وجلال هيقعدو سوا في شقه جلال لحد ما زفت الطين دي يتقبض عليه وقتها اختك هترجع هنا ع شقه دي تقعد فيها ب ولادها واحنا هنرجع بيتنا نكمل فيه مع بعض دا قرار نهائي مش عايز اي نقاش فيه يا احلام تمام ؟
احلام بدموع
ليه ؟ انا دلوقتي اهو بحلك من اي تدخل …
شريف بحزن
لاني مش هقدر ابعد … مش هقدر اسيبك … جرحتيني اه … ولسه مجروح منك مش هنكر دا … بس انتي كمان بتتعذبي … ومش بس بتتعذبي لا وبيقتي في خطر كمان … انا مقدرش ابعد … ( اتنهد وكمل ) انا مجروح اه يا احلام لكني لسه بحبك ولسه حاسس بالمسؤولية تجاهك … ارجوكي كفايه كلام وارجعي معايا وسيبي الايام تدوب الجليد اللي بقا بينا … ممكن ؟
احلام مكنتش عارفه تقوله ايه … تقوله أنها ندمانة وتعتذر كتير علي اللي حصل منها … ولا تقوله أنها محتاجاله اوي وأنها اتعذبت اوي من بعده … ولا تسكت خالص وتترمي في حضنة وتعيط وبس. .. شريف مكنش فاهم سكوتها دا معناه ايه … مستني منها أي رد بس هي بصاله بحزن ودموع بتلمع في عينيها وساكتة
شريف بإصرار
ها يا احلام عايز اسمع منك رد علي كلامي ؟
احلام بدون وعي
هتسامحني ؟ انا عارفه انك هتقف جمبي وعارفه أن لسة في مشاعر جواك من ناحيتي بس الاهم من كل دا عندي يا شريف هتسامحني علي اللي عملتة ولا لا ؟
شريف اتنهد
مش عارف … بس طالما مش قادر ابطل احبك وحاسس انك مسؤوله مني … وكنت هموت من الغيرة لما عرفت أن الزفت دا عايزك ليه … يبقي اكيد مع الوقت هسامحك يا احلام … اديني شويه وقت بس مش اكتر ممكن ؟
احلام ابتسمت
موافقه خد كل الوقت اللي انت عايزة المهم في الاخر تسامحني يا شريف عشان أنا أقدر اسامح نفسي وارجع احلام من تاني بس المرة دي وعد مني هرجع احلام حبيبتك وبس مش هتشوف مني اي حاجة وحشه تاني انا والله العظيم بحبك … بحبك اوي انا اسفه … حقك عليا انا اسفه والله
شريف طبطب علي ايديها وابتسم
خلاص بقا كفايه عياط يلا قومي خدي دش كدة يفوقك وحضري نفسك عشان لسه هنعدي علي الماذون وبعدين نروح
احلام
طب ما نفضل هنا انت بتقول ماماتك بتراعي جودي كدة هيبقي الحمل عليها كتير وكمان هطلع امير وجلال من الشقه ازاي بس
شريف برفض
مينفعش الشقه هنا مبقتش امان خلاص والفيلا في منطقه هاديه جدا ف مش امان هي كمان … وبعدين اسماء هتكون مع ماما وهتساعدها اكيد ف الحمل مش هيكون تقيل ولا حاجة ولو علي امير وجلال اكيد هيتفهمو الظرف دا انتي مرات اخوهم يعني مش حد غريب
احلام مع إصرارهم كلهم وافقت وفعلا خلال ساعتين بالكتير كان شريف ردها وروحو البيت وهناك حكو ل جودي وجلال كل حاجة
احلام كانت متوقعه معامله وحشه من جودي بسبب طريقتها معاها زمان والأسلوب المتكبر اللي كانت بتتعامل معاها بيه غير أنها كانت ديما تجرحها بسبب موضوع الخلفه
كانت قاعدة وسطهم بس ساكتة والكل بيتكلم حواليها
جودي كانت حسه باللي احلام بتفكر فيه من ناحيتها بصتلها ببتسامة صافيه
جودي
نورتي بيتك من تاني يا مرات اخويا مبروك
احلام بدهشه
ا احم الله يبارك فيكي يا جودي شكرا
نوال
واد يا أمير اتصل اطلبلنا عشا انا اعصابي بايظة مش هقدر اقف اعمل حاجة … العيال الصغيرة دي زمانها جاعت وشكلهم عايز ينام خلاص
جلال
خليك انت يا امير هنزل انا سريعا اجيب واطلع وبعد ما نتعشي نروح سوا
امير
تمام يا جلجل معلش بنتعبك معانا
جلال كشر
مش هرد عليك عشان امك قاعدة
نوال
لا رد عليه عادي ولا يهمك
جودي
أيوة رد عليه يلا خلينا نضحك شويه
جلال
نضحك شويه !! ابشر يا امير اختك هبله
امير ضحك
ما انا عارف وأخوها اللي قاعد ومبتسم اوي دا عارف وامها كمان عارفه
جودي كشرت
والله ! هي بقت كدة … طب يلا حضرتك انزل هاتلي عشا كتير وحلو من اللي بحبه يلا انا جعانه وانا والبيبي كمان
جلال ضحك عليها ونزل ونوال دخلت شنطة احلام اوضه شريف وشنطة اسماء وولادها اوضه امير في الوقت دا كان امير حضر شنطة صغيره له عشان ياخدها معاه وهو نازل
اسماء بحرج
انا اسفه اوي يا طنط علي اللخبطة اللي احنا عملناها دي حقكم علينا والله
نوال ابتسمت
مفيش لخبطة ولا حاجة يا اسماء عيب الكلام دا احنا اهل يا بنتي
❈-❈-❈
جلال رجع والكل اتعشي في هدوء وتعب من أحداث اليوم اللي كانت طويلة ومتعبه
بعد العشا جلال خد امير ونزلو والكل دخل اوضتة عشان ينامو
احلام كانت متوترة حاسه انها مكسوفه وندمانة وخايفه كوكتيل مشاعر جواها كتيير ومش عارفه ازاي تقدر تعبر عنه ف كانت ساكتة
شريف
واقفه كدة ليه … يلا غيري هدومك ونامي اليوم كان صعب عليكي ولسه بكرة الشيخ أسامة هيجي تاني
احلام بخوف
ا انا بقيت كويسه بلاش يجي تاني انا بتعب اوي لما بشوفوه والله يا شريف
شريف ابتسم
معلش نتعب شويه كمان ونرتاح أن شاء الله العمر كله استحملي شويه معايا ممكن ؟
احلام بقله حيله
ممكن حاضر … انا اتوضيت هصلي الاول وبعدين انام
شريف
تمام تقبل الله يا ستي
احلام ابتسمت
طب ما تصلي معايا عشان ارد عليك واقولك منا ومنكم صالح الاعمال أن شاء الله ؟
شريف ابتسم بحرج
ممكن طبعا ثواني اتوضي انا كمان واجيلك
احلام
اوك مستنياك
شريف اتوضي وصلي ب احلام وبعدها نامو هما الاتنين بس بعيد عن بعض هي خافت تقرب منه لتكون بتفرض نفسها عليه وهو مكنش قادر يلمسها حاسس أنه مش فاهم نفسه ولا فاهم هو حاسس بايه فقرر أن كفايه اللي حصل انهاردة والاكيد مع الوقت مشاعره هتوضح اكتر وهيكون اهدي
❈-❈-❈
صباح يوم جديد عدي هادي جدا بدون احداث علي الجميع
جودي ونوال طول الوقت مع احلام واسماء وطلبو منهم يقفو معاهم في المطبخ عشان يحضرو ل عزومة تاني يوم بتاعت أهل جلال
اسماء اندمجت جدا معاهم وحست اخيرررا بالراحة لكن احلام طول الوقت بتتعامل بحرج وكسوف وندم كبير اوي
عاصم في مكتبه مخرجش منه خالص بيخطط ل طريقه يخلص بيها من رانيا من غير اي مشاكل له
شريف في شغله وبيحاول ميفكرش في علاقته باحلام اقنع نفسه أن الأهم دلوقتي سلامتها .. سلامتها وبس اي حاجة تانيه تتاجل
ياسمينا محبوسه في شقه شادي وهو من وقت ما خرج وقفل عليها مظهرش تاني حاولت تستنجد ب حد من الجيران بس اتفاجات بيهم بيسمعوها ويطنشو مبقتش فاهمه ازاي عماره كامله محدش فيهم مهتم يساعدها رغم توسلاتها الكتير ليهم
واخيرا جه يوم العزومة اللي هيكون بدايه جديدة لكل ابطالنا
❈-❈-❈
في بيت محمود كانو بيجهزو عشان يتحركو مع بعض كلهم ل بيت نوال
في اوضة الاء تحديدا كانت بتكلم اميرة في التلفون قبل ما تنزل
الاء
لا انا حبيت الطقم الابيض اكتر يا ميرو
اميرة
تمام عموما هما الاتنين عليكي تحفة يا قلبي
الاء
حبيبتي انتي
اميرة
هنزل بكرة أن شاء الله ولا ايه ؟
الاء
اه طبعا كفايه انهاردة منزلناش …. مش عارفه انتي منزلتيش ليه طب انا معزومة ومينفعش مرحش انتي بقا منزلتيش ليه ؟
اميرة بضيق
انا اصلا مبحبش احضر ولا بحب الكليه كلها بس بنزل عشان نكون سوا ومسبكيش لوحدك اقوم انزل انا لوحدي لا يا ستي مليش دعوة
الاء ضحكت
خلاص بطلي تتقمصي زي العيال الصغيره كدة بهزر معاكي والله
اميرة
هزري براحتك ماشي بكرة ارخم عليكي بعد المحاضرة والشاورما والبيبسي بكرة علي حسابك عشان تبقي تهزري اوي
الاء
حاضر يا روحي انتي تؤمري
في اوضه هند كانت متوترة … اول مرة تخرج من البيت وتكون في تجمع فيه ناس كتير كدة من بعد ازمتها وفي نفس الوقت هي كارهه احساس الضعف اللي هي حسه بيه عايزة ترجع هند زي زمان تاني عايزة تطمن ابوها وامها عليها بدل نظرة القلق اللي ديما شافيهاها في عيونهم … اتنهدت بحزن وقررت تحاول عشان خاطرهم وبدءت تجهز بهدوء
ياسين وصل وكان في استقباله محمود
محمود
اهلا اهلا بالناس اللي طول الوقت مسافرة
ياسين
حبيبي يا حودة عامل ايه والبنات وهناء عاملين ايه ؟
محمود
الحمد لله كله كويس … انت عامل ايه فينك يا بني بنشوفك كل فين وفين ليه ؟
ياسين
والله غصب عني انا يا في الجامعه والمحاضرات والندوات يا في السفاري
محمود لسه هيرد هناء جت من رواه
هناء
حبيبي انت جيت … وحشتني .. وحشتني اوي اوي
ياسين وهو بيحضنها
حبيبتي يا نونا انتي كمان وحشتيني اوي والله … اومال فين البنات جلال رن عليا وقالي أنهم في انتظارنا من بدري
هناء
نازلين خلاص اهم ورايا
وفعلا خلال خمس دقائق كانو في طريقهم ل بيت نوال
❈-❈-❈
عاصم اتصل ب رانيا وطلب منها تقابله في كافيه جمب شغله لانه شغال علي قضيه مهمة وصعب يتحرك لمكان بعيد عن الجهاز رانيا وافقت وفي الوقت اللي حددة عاصم كانت موجودة هناك وفي المطبخ بتاع الكافيه كان موجود محمد اخوها وبيسمع كل حرف بيتقال بينهم
رانيا
هاي يا عاصم عامل ايه
عاصم
تمام يا رانيا انتي اخبارك ايه
رانيا
انا تمام … خير ايه الموضوع اللي انت عايزني فيه ؟
عاصم
انا فكرت في العرض بتاعك
رانيا بدهشه
عرض ايه يا عاصم مش فاهمه ؟
عاصم
مش فاهمه ايه بالظبط انتي مش طلبتي مني افكر في كلامك وارد عليكي ؟
رانيا
انا بجد مش فاهمه انت بتتكلم عن ايه مالك يا عاصم انت كويس ولا ايه ؟
عاصم مكنش فاهم هي بتتكلم كدة ليه بس مجرد ما ابتسمت بخبث فهم أنها شكت أنه بيسجلها ويتاخد حذرها منه
عاصم
اااه انتي شاكة فيا اني بسجلك وكدة ؟ تمام خليني معاكي للاخر يا رانيا ايه رايك بكرة نقضي اليوم مع بعض يعني نقرب من بعض اكتر وكدة ؟ موافقه ولا مشغوله و وراكي حاجة ؟
رانيا كانت محتارة هو وافق فعلا ولا دا فخ منه … حس عاصم بترددها فقرر يضغط عليها عشان يخلص
عاصم
رانيا انا مش فاضي للعب العيال دا خيرتيني واخترت اهو ها بقا انا بجد عايز اخلص من الحوار دا بصراحة كدة بحب بنت عمي وعايز الحقها قبل ما تتخطب ولا تحب حد تاني ف معنديش وقت للف ولا الدوران بصراحة قوليلي قرارك دلوقتي لو سمحتي
رانيا ضحكت بدلع
مممم بتحب كمان … تلاقيها هي السبب انك ديما بعيد عني مش كدة
عاصم بقوة
راااانيا قرارك حالا الا والله ما يهمني شغلي ولا اي حد واطلع ع اخوكي وأبلغه أان كل شيء قسمة ونصيب
رانيا
طيب ثواني يا عاصم هبلغك ب قراري بس ثواني
طلعت تلفونها وطلبت رقم اخوها هنا محمد فهم أنها شكة أن عاصم قاله فقرر يمشي معاها للاخر طلع من الباب اللي ورا ووقف في وسط العربيات ورد عليها
رانيا
هاي يا مودي فينيك ؟
محمد
هاي يا قلبي … انا في مشوار في زايد في حاجة ولا ايه ؟
رانيا
لا ابدا وحشتني بقالي يومين مش بشوفك
محمد
هحاول ارجع بدري انهادرة ونسهر سوا تمام
رانيا ابتسمت براحة
تمام يا مودي باي
محمد
باي
رانيا بصت ل عاصم برغبه ودلع
اوك يا عاصم معانا بكرة بس في شقه تبعي أنا هقولك بكرة عنوانها اوكي ؟
عاصم ابتسم
تبعك تبعك مش هتفرق اتفقنا بس وعد يا رانيا بعدها الموضوع هيخلص من غير اي مشاكل … اوعي تكوني بتدبسيني في حاجة وقتها بجد مش هعمل حساب لاي حاجة
رانيا
تؤ يا روحي مش بدبسك طبعا هي ليله نستمتع فيها ببعض وبعدها اوعدك ان الموضوع هيخلص بكل سهوله متخافش انا مش عايزة مشاكل انا كمان
عاصم
ممكن اسالك سؤال مش قادر صراحة مسالوش
رانيا ابتسمت
ليه بعمل كدة صح ؟
عاصم
صح
رانيا
الموضوع بصراحة اني مش بتاعت جواز وخلفه ومطبخ وراجل يتحكم فيا داخله امتي وخارجة فين اوووف حياة ممله وصعبه اوي وفي نفس الوقت انا زي اي ست ليا احتياجات ورغبات ف ايه المشكلة اني استمتع برغباتي دي من غير قيود وجواز وكل الكالاكيع دي ؟ الدنيا ابسط من كدة يا روحي احنا بنعيش مرة واحدة من حقنا نتبسط ونفرح بالطريقه اللي تعجبنا مش نفضل نحاول نرضي الآخرون
عاصم لسه هيرد لكنه سكت وابتسم وبص وراها وهي حركتة دي قلقتها لسه هتبص وراها اتفاجات ب محمد اخوها جاي عليهم والغضب ماليه ويادوب هيقرب لمن رانيا كانت اسرع منه وفجأة
يتبع…..
لقراءة الفصل التالي : اضغط هنا
لقراءة الرواية كاملة اضغط على : (رواية كيد النساء وقهر الرجال)
