رواية قهر الفصل الثالث 3 بقلم رويدا القاضي

رواية قهر الجزء الثالث

رواية قهر البارت الثالث

رواية قهر الحلقة الثالثة

امباركة: ريتي هالولد العاقب قتله تعالى في الليل قطع وجهي شكله نساني…
خديجة: ماعليك منه في حوش اختك تريحي وامتا ماايجئ وكان ما جاء خير وخير…
هالة: خيرك منال نحس فيك متلخبطة مش ع بعضك صاير شئ.
منال: لالا مافي الا كل خير تريحي انت بس بكرا وراك مدرسة.
في الحاضر
هالة: تتفكري في طفولتي كيف كانت مراهقتي نحس في نفسي كنت ناضجة من وقت انا صغيرة مش كيف مرام عاشتها حياتها دلع ومصاريف وللي تبيها تحضر.
منال: وشن نفع الدلع كله عدا وتم الفايدة في العقل والرزانة وانتي حايزاته كله عقل وسماحة وخفة دم …
هالة: المهم كيف ماقتلها الدنيا ماليها والي وللي خلق عمره مايفرط في عباده تريحي توا ويحلها ربي بعدين.
منال: والله ماقهرني شئ كان امي نست من منال وشن دارت منال.
هالة: صيورها تفطن وتصحى ع نفسها وانت ع صح وللي ماشي صح عمره مايخاف كلها مكاتيب من ربي .
نرجعوا في الماضي
محمد: اولادك انهبلوا جو عندي ويبوا نردوا الحوش لمرت المنقبر…
رجعة: طيح الله سعدهم بلا عقول كيف باتهم تجر فيهم العاطفة .
محمد:ها ع سيرت باتي وين معاش حقيته بعد الفرح.
رجعه: ليه ثلاثة ايام مايتكلمش معاي يبكي كان ع ولده مفتاح ريته يلحقه ونتريح منه حتى هو.
محمد: كيف الحل مع خوتي.
رجعه: والله حرت وخلاص ماني عارفة كيف نتصرف.
مريم: نا عندي حل كويس…
رجعه: هاتي ماعندك.
مريم: محمد قال هما يبو ايجو ايكلموك خلي ايجو وقوليلهم عادي اتجيني للحوش تستسمحني وبعدها ترجع…
محمد: من يومك حمار قراية وطلعتي حتى الفكر ماعندك وين الحل هنا..
مريم: بعد اتجئ لعندك خلي الباقي عليا نا …
رجعه: تمام قولهم ايجوني…
خالد: ياحشمتي الساعة 12 اكيد امي بديرلي حضرة ليت اتفيق الناس كلها تميت نخبط كالعيل مانبيش حد يشوفني واقف ع بابهم متأخر..
امباركة: مش كأنه في صوت ع الباب ولا نا بعد طول مدهوب الشيرة تميت نتخايل…
خديجة: منال يامنال تعالي يامي كانك مزلتي واعية..
منال: ها نعم
خديجة: عدي شوفي الباب في حد ايطق عليه..
منال: توا في هالليل تبي نحق الباب اسم الله عليا نهبلت نا.
امباركة: عدي عدي بلا بوق بنات زايد مبدري لما انسلح وشاحك تميت راشقة كيف الثمتال
منال: من الخوف مشيت ومانعرف رجليا كيف رفعوني…. وصلت قدام الباب من ايطق…
خالد: نا خالد ولد عمتك امباركة …. نديلي عليها لو سمحتي …
منال: حاضر…
خالد: ايحضرلك الخير …..
امباركة: اه ياولد فرج من عند امتا وانت تعرف ايحضرلك الخير…
منال: تصبحوا ع خير.
امباركة: بضحكة خبيثة تصبحي وتربحي ياكنتي .
خالد: ركبنا السيارة …شن كنتي اهيا للي قولتيها للبنت وتهزبي فيا تقول عيل..
امباركة: سوق بلا اطروح وانت من بدري اذبل في عيونك تفوت فيه ع من انت…
خالد: في خاطري البنت عجبتني وماناقصها شئ …سكري عليه الموضوع هضا تو… خلينا في المهم.
امباركة: وشن المهم ياعيني.
خالد: ناقصهم شئ هما.
امباركة: نشد خديجة وقالت لا مستورة.
خالد: الله يهديك هو للي بيدير الخير ينشد مفهومك للخير غلط .
امباركة: تميت تدوي مفهوم و… يحضرلك الخير قيسك مريض وساخن اكيد.
وفات الليل وجاء النهار محمد ع طول بالحرف نفد مخطط مرته وقال لخوته خلي خديجة اتجئ تستسمح امي وبعدها ترجع لحوشها ….
سالم:سلم خوي هكي نعرفك نا ماتعلمنش ناكلوا حق غيرنا ويابال للي نحكيهم عليهم بنات خوي.
حسن: توا ماقعد غير نعرفوا هما وين يسكنوا ونمشوا نفهمو خديجة كل شئ.
محمد: ساهلة هذي عدي يالا الشر امباركة وهيا ادلكم عليها.
حسن: تمام نصلي الظهر ونتكي عليهم.
امباركة:كسدت بروحي قريب انتم نحكي مع الحيوط … وخطر عليا نغني ….
ع ولد أمي ياخالقي حجب ع ولد امي ياخالقي حجب ع ولد أمي ع ولد ياشهد صافي وياعسل في فمي…
خالد: احم احم فنانة امباركة ممكن تنقصي طبقة صوتك شوي لانه الجيران يحسابوا عندنا زمزمات بعدين والحق ياسرنا فضايح عاد…
امباركة: سلحت الشبب وحدفته بيه.
خالد: وي وي طول هكي اصبتي الهدف عليك ايدين يا…
امباركة:😏 يدي يدي ياخالد ياعطيك ادعوه وتميت نعيط.
خالد: بسم الله كنها يدك شكلي قربعتها عين وانا نشوف في يدها تعطيني كف لين وذني رنت 😳شن جاك.
امباركة: باش نربيك نخليك هكي ع حل شعرك …
خالد: هههه 🤣🤣 غير ياامي من فينا ع حل شعره واحنا قاعدين نحكو طق الباب خشي جوا خل نشوف من جاي يشكي منك المرة هذي.
امباركة: عليم الله ماكلمت حد .
خالد: اهلين عمي حسن هيا تفضل جوا…في خاطري حوش عيلة قاسم ماايجوش الا وامي ماديرتلهم شي مصيبة…
حسن: لو ماعندكش مانع ياولدي نبي الوالدة شوي.
خالد: خير ان شاء الله صاير شئ لاسمح الله .
حسن: مافيه كان كل خير…
امباركة: ماتطلع الا امه رجعة وكنتها العقرب زارينه عليا لكن نا نربيهم عيلة فيليت.
حسن: اهلا حاجة امباركة كيف حالك:
امباركة:🤨 شن شن حاجة كونش لما حجيت معاكم ومع امكم بتردني عجوز مازال والله .
حسن: اسف مش قصدي.
خالد: مادروش امي مش قصدها شن تشرب عمي حسن.
امباركة: انطمر قمعز ماعنده مايشرب خش في الموضوع .
حسن: نبيك اتكلمي خديجة اتجئ تطلب السماح من امي باش ترجع لحوشها…
امباركة: من القهر حسيت جسمي انتفض شن شن السماح ع شن … ولا امك تقتل القتيل وتمشي في جنازته …طردت المرا وطلعتها هيا وبناتها وقلبها مازال مكسور ع موت راجلها باش
اتجئ وتندل لامك الكافرة لا والله تسكن تحت شجرة وتاكل خبزة واميه اشرفلها…
حسن: نا مش كيف خوي محمد ونعرف انه امي غلطت وواجد اخرى لكن مانقدرش نتكلم ولانخل فمي بحرف هاذي تقعد امي مهما تغلط … تربحي قلها اتجئ ع خاطر بناتها يكبروا بينا…
امباركة: توا نفكر يكبروا بينكم صار ريت مكة للي عايشيين فيها مش بيكبروا بين السحارة واختها يلا انتهت المقابلة فارقنا بريحة طيبة.
خالد: خشي جوا ياامي عيب الكلام هضا.
امباركة: خاشة خاشة الفال مانخشش اصابعي باش نقلع بيهم عيون الغراب رجعة…
حسن: معليشي مافيش داعي تتأسف نا نعرف انه قلبها ع خديجة وبناتها ومش لايم عليها وع كلامها وللي قالته يقعد هنا .
محمد: ها شن صار معاك دلاتك ع بيتهم.
حسن: للي ايحقك تنشد ايصدقك تقول الموضوع ايهمك .
محمد: فوت التفتفيت شن صار.
حسن: هيا بتكلمها…
في حوش خديجة مع العصر…
منال تعالي هنا نبي نحكي معاك كلمتين .
منال: ها نعم ياامي.
خديجة: مبدري الظهر جتني عمتك امباركة دازينها حوش جدك باش نعدي نستسمح رجعة ونرجعوا لحوشنا … ها شن رايك.
منال: ماتمشيش الله يربحك نسيت يوم طلعتنا وانت تترجي فيها ولا اهتمت لاكيف بنعيشوا لا شن بيصير فينا واحنا مانعلموا من الدنيا شئ…
خديجة: للي تقولي فيه صح لكن مانبيش نحملك اهموم خواتك ومصاريف الوكال وراك شهادة ولازم تركزي ع مستقبلك .
منال: نا نقدر نقرا ونخدم ولو احتجت ع خاطر خواتي ننحت حتى الحجر بسنوني ونطلع القرش بالحلال.
خديجة: ربي يفتحها عليك زي ماشايلة معاي هالحمل… لكن خلي نحاول وراك اتعارضيني.
منال: شوفي للي يريحك وديريه … وخشت نصحح في كراسات الطلبة رغم اني مش راضية لكن كنت مجبورة نسكت ونكتم … في قلبي.
الانسان يتنازل مرة واثنين وثلاثة لكن في امور ماينفعش فيها التنازل وخصوصا لما يتعلق الموضوع بالكرامة …
،،،،،في الحاضر،،،،،،،،،
كنت نتوقع الماضي نهاية المعاناة للي عشتها ماكنت نعلم انه الحاضر طوفان قدام الماضي
تميت نتمنى نرجع صغيرة ننسى واجد امور عالقة في عقلي ماقدرت نتخاطاها ولا ننساها…
نا قلتلك مابيك غير الدعاء والصلاة كل ماتحسي بضيق توضئ وافتحي المصحف اقرئ شن تحبي تقرئ بتدبر وتمعن في المعنى وياريت لو كل يوم تقري فيه سورة البقرة كاملة …. صدقيني لما تقريها بنية الفرج ماتكملي 20 يوم والا واحد اشياء رح توضح قدامك رغم انها من قبل قدام لكن ماكنتيش تحقي في الضرر للي تسببلك فيه …
معاك حق ونعمة بالله.
،،،،،،،الماضي،،،،،،،
خديجة: قدام باب رجعه واصريت ع منال تخليني نعدي بروحي…
رجعه: ياهلا وغلا هالساعة نور الحوش اتفضلي…
خديجة: شكرا خشيت لصالة لقيت عندها مريم وولدها محمد وعمي معاهم….
سلمت وقعمزت جنبهم …
رجعه: ها نحق فيك ساكتة ماتبيش تتأسفي…
خديجة: نزلت راسي ونا منكسرة وعازه عليا نفسي لكن بناتي مانبيهن يتبهدلن … نا اسفة سامحيني
كان غلطتت في حقك.
مريم: ها وشن اخرى ياحسدية.
خديجة:نا 🥺 شن ريتي مني من يومي كافية خيري وشري .
رجعة: هههه مش خايل عليك الدور هضا…
خديجة: نا جيتك طالبه السماح مش باش ننهان هنا بينكم وانت ياعمي يرضيك للي صاير.
قاسم: ساكت ونزل راسه تحت .
رجعه: عمرك ماتحلمي حتى الحلم انك تعفسي التراب هذا ثاني نشوف رجليك نحشهن حش مالقن فيك هلك الخير نلقاه فيك نا…
مريم: ها جايه بكل وقاحة تبي تاخدي الحوش باش تاخديه لازم يكون وراك رجال اما انتي خلفتك بنات وبس.
رجعه: اطلعي من حوشي تموتي تنحرقي انت وبناتك راك تقولي نا كنت قاسم يلا بلا مطرود…
خديجة: من الصدمة نحس في روحي انشليت ع الحركة لاقدرت نوض نطلع ولا نقعد هضا الكلام للي تفكرته خاطي الباقي للي معاش نتفكره…
ماحسيت بروحي الا ونا في حوش امباركة ونبكي وبس .
امباركة: حقيت بعيونك ناقتلك كيف بعضن كلهن مافيهن خير … اسم الله عليك اشربي اميه واحكيلي شن دارن معاك.
خديجة:بصوت مخنوق بالعبرة ماخلن عليا كلمة عايروني بقطيعة هلي ليا …وغيره.
خالد: مااصعب انك تحق مظلوم وتحس روحك مكتف ماتقدرش تاخدله حقه.
امباركة: توا تريحي نمشي مشوار وانجيك .
خالد: عرفت امي بتعدي لحوش رجعه .. وقررت نخليها .
امباركة: من الغيض نحس في روحي نطير مانمشيش ع الوطا ولحسن حضي نا كيف بنوصل شفت ولدها محمد طالع بسيارته يعني الوضع تمام وقفت طقيت ع الباب…
رجعه: شن تبي يالكلب المدلل…لخديجة 🤣🤣
امباركة: نرجع لاورا ونقدم ونهد الباب ع فسختها ونخش ونلقا العقرب مريم تشرب في قهوة ها قيسك محتفله انتي وغولة القبور عجوزك …
مريم: ها مش انا ماعنديش علاقة بشئ
امباركة: ها وين لسانك للي كان قبل شوي يسب ويهزب كلاه القط .
مريم: خلينا نتفاهموا بس ياعمتي ياعمتي…
امباركة:هههه عمتك ياعطيك عميه لك وليها معزوقة برا تبي ساعة باش توقف ع كرعيها اما انتي شن يخلصك مني توا ونقزت عليها ماعقبت فيها شئ اش من تريش شعر واش من عض الحصيلة خلاص طلعت حرتي فيها وهيا تعيط كيف العيل ونا طالعة زدت رفست رجعه وعديت لحوشي…
خالد: كنك داهشة شكلك المرة هذي قتلتي حد…
امباركة: وين عمتك خديجة ..
خالد: وين ماخلتيها جوا.
امباركة: تعال ورايا … عليا الحلال ماخليت فيهن عظم صحيح هاذي تنفع وهاذي اضر …
خديجة:😂 والله عرفتك.
امباركة: هذي رجعة نحسها هكي تبي تركيب بلاتين…
واما مريم وجهها مانضني الا تشوه وتمت صلعه وعض ماتقول الا وشم ع جلدها كل ماتحقه تتفكر انك مش مقطوعة من شجرة وخلي هلها ينفعوها ولا راجلها…. نحق لو يسموها ترميم …. خير من مريم …