رواية قضية خلع الجزء الرابع الفصل الرابع 4 بقلم عمرو راشد
رواية قضية خلع الجزء الرابع الجزء الرابع
رواية قضية خلع الجزء الرابع البارت الرابع
رواية قضية خلع الجزء الرابع الحلقة الرابعة
نتجوز عرفي
= هو انا عشان بايتة عندك ف هتفكرني رخيصة ولا ايه.. لو ناوي تتجوزني فعلا يبقا رسمي
انا مقصدش حاجة.. أنتي ليه فهمتيني غلط ، انا كنت اقصد يعني نتجوز عرفي لحد ما عدتك تخلص وبعدها نتجوز رسمي قدام كل الناس
= لا وانا و مش هوافق على حاجة زي كدا
أنتي مش واثقة فيا؟
= ملهاش علاقة بالثقة.. بس أنا مستحيل هقبل بوضع زي كدا
مش احسن ما نكون بعيد عن بعض طول مدة العدة
= ومين قال اننا هنكون بعيد.. ولا انت مش هتبقا عايز تشوفني
لا طبعا هكون عايز ، دا انا اتمنى
= هحاول اصدقك
” كنت عارف انه هيعمل كدا وهيحاول يستفزني عشان ابان في اسوء صورة قدام نادية دا غير انه عايز يثبتلي انه هو اللي كسبان المرادي.. هو فعلا كسب بس الجولة مخلصتش.. فريدة جات قعدت جنبي
10 دقايق والغدا هيكون جاهز
= عادي خدي وقتك
مين كان بيكلمك
= هو في غيره؟
قصدك طارق
= طبعا
كان عايز ايه دا
= الباشا بيكلمني يسألني اذا كانت نادية تلزمني ولا لا
وانت قولتله ايه؟
= تفتكري هقوله ايه مثلا
قولت ايه يا حسام
= باركتله على الجواز مقدما
يعني زي ما توقعت.. ليه كدا يا حسام ، انت بتكدب على نفسك.. انت لسة بتحبها
= مش انا اللي اربط حياتي بواحدة ، كنتي عايزاني اقول ايه.. اللي أنا عملته هو الصح
لا مش صح.. انت بتحبها يبقا تروح وتتكلم معاها وتشوف هي عملت كدا ليه
= حد قالك انها داست على الكوتش الأبيض بتاعي ولا تكونش حرق*تلي القميص الكاروهات ، في ايه يا فريدة مالك.. دي ندهتني بإسم واحد تاني ولا انتي مش عارفة
من غير ما تتعصب عليا بس ، ليه مفهمتش منها هي ازاي قالت كدا
= وهو انا لسة هقعد و اسمع وبالمرة بقا نعمل قهوة وشوية فشار لزوم التسلية.. أنتي ايه رأيك
انت عايز تثبت ل طارق انك مش همك حاجة ولا فارق معاك نادية مع انك هتمو*ت من غيرها
= مش أنا لا.. الكلام دا مش بتاعي.. مبياكلش معايا .. انا حسام الهواري لو عايز اتجوز ممكن من بكرا اتجوز اي واحدة ومش هيهمني
عارف ايه اكتر حاجة صادقة في كلامك.. حسام الهواري.. حسام الهواري مرجعش من المو*ت ، حسام الهواري رجع زي زمان.. انت فاكر يا حسام احنا قطعنا كلام مع بعض زمان ليه ؟
= ليه يا ترى
= عشان طريقتك دي.. اي واحدة هتشوف هتنبهر ب شياكتك و أسلوبك و ريحة البرفيوم بتاعك بس اول ما هتعرفك مش هتكمل معاك دقيقة تاني ، نادية غيرت فيك كتير أوي يا حسام ولا انت مكنتش حاسس
لا كنت حاسس بس انا استفادت ايه من التغيير دا.. ولا اي حاجة
= مقتنع انك صح
جدا
= مش بقولك حسام الهواري رجع تاني زي زمان.. على العموم براحتك يا حسام.. شوف ايه اللي هيريحك و اعمله
” قامت من جنبي و دخلت اوضتها.. فضلت قاعدة جوا وبعد نص ساعة خرجت وحضرت الاكل
الاكل عندك اهو.. بالهنا والشفا
= مش هتاكلي معايا؟
لا انا تعبانة هدخل انام
” مسكت ايدها
فريدة مش هينفع انتي كمان تزعلي وتمشي ، انا دلوقتي معنديش غيرك
= ماهي دي المشكلة يا حسام.. انك بتلجألي بس لما يكون معندكش حل تاني غيري
والله مش كدا.. انا مقصدش
= عادي خلاص.. حتى لو تقصد
فريدة احنا مش صحاب بس.. احنا أكتر من كدا بكتير اوي.. احنا في يوم من الايام كنا هنبقا متجوزين
كنا يا حسام.. وطبعا انت فاكر احنا متجوزناش ليه
فلاش باك
حسام.. انا عايزة اقابلك ضروري
= بعدين يا فريدة عندي شغل مش فاضي
المرادي عايزاك بجد يا حسام
= خير
مش هينفع في التليفون
= ومينفعش موضوعك دا يستنا ل بكرا
لا للاسف مينفعش ، الموضوع متوقف عليه حاجات كتير
” روحت و قابلته فعلا في الكافيه اللي متعودين نقعد فيه دايما
ياريت يكون الموضوع مهم فعلا زي ما بتقولي
= حسام أنا فكرت في موضوع الخطوبة
هايل وبعدين
= احنا مش هينفع نكون مع بعض.. انت علطول مشغول ومش هتبقا فاضيلي حتى نتكلم بس دا طبعا غير طريقتك معايا.. انت شخص كويس جدا على فكرة بس انا عارفة اتقبلك او اتقبل طريقتك ، انت بني آدم صعب.. صعب في كل حاجة.. ومع الوقت انا مش هعرف اكمل وهتحصل مشاكل كتير ف بعد اذنك خلينا صحاب بس
بيرفكت.. دا احسن قرار خدتيه في حياتك
= برضو طريقتك مش هتتغير.. مفيش فايدة فيك
عشان انا مش هقف عليكي.. هقابل واحدة و اتنين وتلاتة و اربعة وعشرة.. ولو كنا اتجوزنا كنتي أنتي اللي هتكوني الكسبانة ، ماهو أنتي مش متجوزة اي حد برضو ، انا حسام الهواري لو أنتي ناسية
= انا مش هتجوزك عشان اسمك ، انا هتجوزك عشان هكون بحبك
ومالو الحب حلو برضو.. الشيك لو سمحت
= انت هتمشي؟
تقريبا أنتي خلصتي كلام صح ولا مخلصتيش ، عموما انا مستعجل لو افتكرتي حاجة ابقي ابعتهالي في رسالة .. بعد اذنك
باك
#بقلم : #عمرو راشد
اليوم دا عدا عليه 7 سنين.. 7 سنين وانا لسة مش عارفة انساه.. انت دوست عليا في اليوم دا ، دوست على قلبي ، عارف لو كنت بس قولتلي خليكي معايا.. كلمتين بس كنت على الأقل احس اني فارقة معاك بس انت مشيت و رغم دا انا كنت واقفة جنبك ومازلت جنبك.. ارجوك كفاية بقا جايز كل اللي حصل دا يبقا درس ليك جرب تستغله بس استغله صح يا حسام ، تصبح على خير
” شدت ايدها مني و دخلت اوضتها.. فضلت قاعد افكر مكنتش عارف ايه الخطوة اللي جاية ، مش عارف هعمل ايه في حياتي.. غيرت هدومي ونزلت ركبت العربية ومشيت ، طول الطريق كلمتها بترن في ودني
• جرب تستغله يا حسام بس استغه صح
” كل كلامها كان بيرن في ودني ، هو انا ليه عامل في نفسي كدا ، عايش بإسم واحد تاني ، مستخبي وخايف حد يشوفني.. بقالي 5 سنين واقف مكاني مبتحركش و جه الوقت اللي اتحرك فيه ، روحت على المكتب بتاعي ، فتحته.. التراب في كل مكان.. كانت حالته سيئة جدا لانه طبعا بقاله أكتر من 4 سنين مقفول.. قررت افتحه من تاني ، ومن تاني يوم اتصلت ب أكتر من صنايعي عشان هغير شكل المكتب.. فضلنا 10 ايام على الحال دا لحد ما خلصت ، المكتب بقا جاهز عشان ابدأ الشغل.. وبدأت في تنفيذ الخطوة المنتظرة.. اعلنت في الجرايد كلها وعلى كل مواقع التواصل الاجتماعي.. اسم حسام الهواري كان تريند تحت هاشتاج ” الرجل الذي عاد من المو*ت ” ، قنوات كتير بدأت تكلمني عشان تستضيفني عندها.. الاضواء كلها متسلطة عليا ، مكنش في خبر بيعدي الا لما أكون موجود فيه.. ماهو مش طبيعي يعني واحد يرجع من المو*ت بعد 5 سنين…
” كنت بقلب في التليفزيون وشايفاه قاعد بيتكلم عن الفترة اللي كان مختفي فيها وكان بيقول
” في الحقيقة كان لازم اختفي اطول فترة ممكنة ، كان في تهديدات كتير بتجيلي وانا بصراحة كنت بدأت اقلق ، ماهو برضو الكترة تغلب الشجاعة ، وبالفعل حصل وفي ناس اتهج*مت عليا انا و صاحبي وضر*بونا بالنار بس كان نصيبي اني اعيش.. قررت اسافر و طبعا كان لازم الناس تعرف اني ميت
= خلال الفترة دي كلها مكنش في اي حد معاك ان متواصلتش مع اي حد
في الحقيقة لا.. انا مكنش عندي اي علاقات مع اي حد
” قفلت التليفزيون وفضلت اعيط ، حسام نسيني خلاص.. شالني من حياته.. في نفس اللحظة جالي تليفون من طارق
شوفتي البيه وهو بيتكلم.. شخصية متصنعة أوي لا وقال ايه مكنش في حد معاه طول فترة السفر ، الباشا عامل انه مش فاكرك.. وانتي لسة مش عايزة تنسيه يا نادية
= بعد اللي هو قاله دا انا خلاص هنساه وهعيش حياتي زي ما هو عايش حياته
يعني موافقة نتجوز
= موافقة
” الوقت كان بيعدي بسرعة جدا.. مكنش في اي حاجة في حياتي تقريبا حتى فريدة مش موجودة ، ولما بكلمها مبتردش عليا حتى لما روحتلها البيت ملقتهاش ، بقيت لوحدي تماما.. كنت بقعد في الشغل اطول وقت ممكن عشان محسش بالوقت ويبقا اللي فاضل ليا كام ساعة هنام فيهم عشان اصحوا اروح الشغل تاني.. ، فضلت على الحال دا 4 شهور وفي يوم جاتلي رسالة.. كانت من طارق
• الفرح بكرا الساعة 5 في قاعة ****** في **** ، هستناك تيجي يا حس
” نبضات قلبي زادت.. حسيت احساس غريب ، مكنتش عارف ازعل ولا افرح ولا حتى مش فارق معايا ، معرفش حصلي ايه ساعتها ، كنت كل اللي انا متأكد منه إن لسة في حتة جوايا بتحن ، حتة من قلبي كان لسة صاحية بس قررت امو*تها و ادوس على قلبي اكتر و روحت الفرح ، كنت لابس أشيك بدلة عندي. دخلت القاعة وشايفها قاعدة جنبه ، مش هكدب اني كنت مضايق بس مكنش لازم يبان عليا نهائي ، ابتسمت و بصيت على يميني بالصدفة شوفتها.. كانت لابسة فستان بيبي بلو طويل.. شعرها مفرود ، الميكب كان خفيف.. كانت زي القمر ، هي كمان شافتني قربنا من بعض ولمست ايدها
اخبارك ايه
= تمام وانت
بقيت كويس لما شوفتك
= طب كويس ، الف مبروك على المكتب وعلى رجوعك مرة تانية
لولا كلامك مكنتش رجعت وكان زماني فضلت تايه لحد دلوقتي
= امممم الحمدلله
وانتي كنتي فين
= سافرت شوية كنت بغير جو
كلمتك كتير على فكرة
= كنت عايزة ابعد شوية لحد ما احس اني بقيت كويسة
و دلوقتي؟
= احسن شوية
وايه اللي جابك النهاردة
= نادية بعتتلي رسالة امبارح ف قولت لازم ااجي و اباركلها
ولا عشان كنتي عارفة اني هبقا موجود
= انا قولتلك سافرت اغير جو مش اتعلم السحر
” ضحكت على كلامها
استنيتك كتير
= وانا بقيت موجودة اهو
طب يلا بقا نروح نباركلهم
= يلا
” مسكت ايدها و روحنا عشان نبارك للعرسان ، طارق اول ما شافني ضحك وقام وقف
كنت عارف انك مش هتفوت مناسبة زي دي
= وانا اقدر برضو مجيش
مبروك يا عروسة
” مردتش عليا حتى عنيها كانت في الارض
عقبالك بقا ياعم حسام لما نفرح بيك
= بس متقولش كدا عشان فريدة بتزعل
” شبكت ايدها في ايدي
معلش انا نسيت اقولكو.. انا وفريدة اتخطبنا!!
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية قضية خلع الجزء الرابع)
