رواية قضية خلع الجزء الرابع الفصل الثامن 8 بقلم عمرو راشد
رواية قضية خلع الجزء الرابع الجزء الثامن
رواية قضية خلع الجزء الرابع البارت الثامن
رواية قضية خلع الجزء الرابع الحلقة الثامنة
انا مساحة الشقة مش عجباني خالص وضيقة زي ما انت شايف.. ايه رأيك تبيعلي المكتب بتاعك عشان افتحهم على بعض
= فكرة حلوة
ايوا وخصوصا بعد ما خسرت العملاء بتوعك كلهم
= هتدفع كام؟
مليون كويس
= 3 مليون
ليه يا حسام.. 3 مليون في شقة.. كتير اوي بصراحة
= ميهونش عليا زعلك نخليهم 2 مليون
معقول برضو
= هنمضي العقد امتا
جاهز
” طلع العقد من جيبه و معاه قلم
امضي
” بالفعل مضيت و بعدها طلع دفتر الشيكات وكتب شيك ب 2 مليون جنيه
الشيك بتاعك يا حسام بيه.. نشكرك على حسن تعاونك معنا
= انت تأمر يا طارق باشا.. عنينا ليك
تحب تقعد تشرب حاجة ولا انت مستعجل.. شكلك مستعجل صح
= فعلا انا مستعجل.. بعد اذنك
” مشيت من عنده ونزلت ركبت العربية رايح ل فريدة،، بصراحة حاسس اني زعلتها امبارح وبما إني معنديش شغل ف هاخدها ونخرج النهاردة.. طول الطريق كنت بكلمها بس كانت مبتردش ، وصلت قدام باب شقتها.. رنيت الجرس بس برضو محدش فتح.. جربت مرة واتنين وتلاتة لحد ما سمعت صوت خطوات بتقرب من الباب وبعد ثواني الباب اتفتح.. كان شكلها باين عليها نايمة وشكلي نسيت تماما اني رايحلها بدري جدا لان الساعة كانت لسة 10 الصبح ، دخلت وقفلت الباب ورايا و قعدنا بس هي متكلمتش.. فضلنا على الوضع دا لمدة خمس دقايق بعدها قررت أقطع انا الصمت دا
هتعملي فيها زعلانة ولا ايه.. محصلش حاجة لكل دا
= جاي ليه يا حسام
وحشتيني
= وغير دي
جاي ااخدك ونخرج سوا نقضي اليوم كله برا
= والشغل.. انت معندكش شغل؟
لا شغل ايه بقا.. خلاص مبقاش في شغل
= يعني ايه.. واخد اجازة
اه بس اجازة طويلة شوية.
= مش فاهمة.. قولي في ايه علطول
سيبك بس أنتي من الكلام دا وقومي جهزي نفسك عشان نخرج
= لا انا مش خارجة النهاردة
ليه.. الهانم وراها ايه
= مش هروح معاك في حتة غير لما تقولي مالك
مالي ازاي مش فاهم
= يا حسام انت متغير.. فيك حاجة غريبة
بس أنا مش شايف أي تغيير
= دي كارثة اكبر انك مش شايف التغيير اللي حصلك دا
صدقيني يا فريدة انا عادي وطبيعي جدا.. انتي بس اللي مزوداها شوية
= انت عايز تفهمني ان اللي قاعد قدامي دا حسام الهواري
ايوا هو والله وبقولك ايه بقا.. يلا ادخلي غيري هدومك عشان ننزل.. انا هستناكي تحت
” يارتني ما نزلت لإني فضلت مستني ساعة تحت بالظبط.. بعدها لقيتها خرجت من العمارة و ركبت جنبي في العربية
اطلعي يا فريدة.. اطلعي مش هنخرج النهاردة
= ليه
انتي مش شايفة ولا ايه.. المغرب داخل علينا وانتي لسة نازلة
= مغرب ايه يا حسام الساعة لسة 12 الا ربع كمان
وانا ليه استنا ساعة ليه يعني
= المهم بعد ما نزلت لقيتني استاهل استنا ولا لأ
ولو.. ولو برضو يا نادية انا مستناش ساعة
= امال عايز تستنا كام حضرتك
ساعتين تلاتة.. كله يهون عشانك يا قمر
” مشينا و دخلنا مطعم بيطل على النيل، مكان رايق و يفتح نفسنا على الاكل وكمان مش غالي أوي.. ماهو احنا برضو لازم نخلي بالنا من المصاريف شوية
قولي بقا عملت ايه من امبارح للنهاردة
= عملت ايه ازاي
يعني من ساعة ما سيبتك
= اااه ساعة ما هربتي من دفع الحساب ،،ولا حاجة يا ستي كلت انا البيتزا و لفيت شوية بالعربية و روحت البيت
بس كدا
= هعمل ايه تاني يعني
و ابنك يا حسام
= ماله
هتفضل سايبه كدا
= أولا انا مش سايبه.. هو مع امه
كمل الجملة.. مع امه و جوزها
= وايه يعني.. المهم انه مع امه
وبعدين
= هبقا اروح ازوره
حسام انت واخد بالك انت بتعمل ايه ، انت هتخلي واحد غريب يربي ابنك ، يعني هيقوله يا بابا وانت اللي هتكون اونكل حسام
= تصدقي حلوة اونكل حسام دي ، حاسسها شيك اكتر من بابا
” زعقت وخبطت ايدها على الترابيزة
ما تبطل استفزاز.. بقولك ابنك هيقول ل واحد غريب يا بابا.. فاهم يعني ايه و كمان دا مش اي واحد دا طارق
= يا فريدة خلاص انا فاهم كل اللي بتقوليه دا.. مش محتاجة كل شوية تقعدي تكرري الكلام و أنا قولتلك امبارح انسي الموضوع دا.. انا مش غبي عشان اقف قصاد طارق.. طارق حاليا أقوى مني بكتير
هتفضل عايش كدا يعني
= كدا اللي هو ازاي
بلا هدف
= بفكر اسافر
طب وانا
= تحبي تيجي معايا؟
احب!!.. طيب يا حسام عايزة بس اسألك سؤال.. هو انت ناوي تاخد خطوة في علاقتنا امتا
= وهو احنا مالنا كدا.. ما احنا كويسين اهو
وهو احنا هنفضل كدا لحد امتا.. انا عايزة افهم هنعمل ايه بالظبط
= احنا لسة محتاجين وقت أكتر من كدا عشان نتعرف على بعض
شوف احنا بقالنا كام سنة مع بعض ولسة جاي تقولي نتعرف
= ماهو احنا فعلا لازم نقرب من بعض أكتر
اكتر من كدا ايه
= مش عارف بس خلينا ناخد وقت أكتر جايز..
انت مش عايزني يا حسام.. انت لسة مش عارف اذا كنت عايز تكون معايا ولا لأ
= لا مش كدا بس يعني فيها ايه لو خدنا وقت نفكر فيه
الغلط مش عليك يا حسام.. الغلط عليا انا عشان انا اللي ضيعت نفسي ووقفت حياتي عشانك وجاي وعايز تكرر نفس اللي عملته زمان بس خلاص انا مش هوقف حياتي تاني عليك يا حسام.. خليك لوحدك بقا
#بقلم : عمرو راشد
” مشيت وسيبته قاعد لوحده في المطعم وتجاهلت كلامه.. وقفت تاكسي و ركبته.. وانا في الطريق عملت اللي كان لازم اعمله من زمان و اتصلت بيه.. اتفقت معاه على مكان نتقابل فيه و بالفعل روحت على المكان
من زمان متقابلناش يا فريدة.. بس خير قوليلي جاية ليه
= كل حاجة بوقتها يا طارق
حسام اللي باعتك؟
= انا معرفش حد اسمه حسام
لا بجد.. قولي حاجة غير دي
= انا ماشية
” قومت وكنت لسة همشي.. بس هو مسك ايدي
استني يا فريدة.. قولي كنتي عايزة ايه
= انا جاية عشان اقولك اني عايزة اكون معاك
مش فاهم
= يعني انا سيبت حسام خلاص.. مبقتش عايزاه خلاص ومش هكون معاه تاني
وبعدين
= يعني انا معاك مش ضدك.. انا عايزة اقضي على حسام ، عايزة اضيعه زي ما ضيعني
يااااه للدرجادي
= انت متعرفش هو عمل فيا.. أذاني كتير أوي.. ضيع عمري معاه
وهو في حد عاقل يروح يحب واحد زي حسام برضو.. دا واحد مختل بس هو انا ايه اللي يثبتلي ان دي مش لعبة عاملاها أنتي وحسام عليا
= و ايه اللي يثبتلك
نتجوز
= نتجوز!!
اه نتجوز.. عشان تثبتيلي انك عايزة تكوني معايا فعلا
= طب ومراتك
ملهاش دعوة.. انا اعمل اللي انا عايزه مش لسة هاخد إذنها
= وانا موافقة بس هيبقا ليا شروط
موافق على كل شروطك
” مشيت بعد ما خلصت معاها ورجعت الشغل.. مشيت من المكتب الساعة 10 و روحت البيت.. دخلت لقيت نادية بتحضر الاكل
جاي في وقتك.. ادخل يلا غير هدومك و تعالى بسرعة ععشان تاكل
= قبل الاكل تعالي عشان عايز اقولك حاجة
طب ثواني هخلص اللي في ايدي
= تعالي بس الاول
” جات قعدت جنبي
انا هتجوز يا نادية
= بطل هزار بقا.. قول بسرعة كنت عايزني ليه عشان اقوم اجهز الاكل
بس انا مبهزرش
= مبتهزرش يعني ايه
يعني مبهزرش يا نادية.. انا هتجوز
= تتجوز يعني ايه يا حبيبي.. هو احنا لحقنا أصلا.. قصرت معاك انا في ايه ولا انت فاكر انك جايب واحدة من الشارع.. لا بقولك ايه أنا مش من النوع دا.. ولو انت هتتجوز يا طارق طلقني
” مسكتها من رقبتها
اسمعي يا روح امك.. انتي ملكيش عندي حاجة.. فاهمة ولا مش فاهمة.. أنا مش مستني منك رد ، انا بقولك على اللي هيحصل اما بالنسبة للطلاق ف انا مش هطلق يا نادية و هتجوز يعني هتجوز!!
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية قضية خلع الجزء الرابع)
